18 C
Bangalore, IN
Monday, December 18, 2017
Home ಸಿನಿಮಾ ನ್ಯೂಸ್ ಸಿನಿಮಾ ಇತಿಹಾಸ

ಸಿನಿಮಾ ಇತಿಹಾಸ

ಶಂಕರ್ ನಾಗ್ ಎಂಬ ಕನಸುಗಳ ಕಣಜ

ಶಂಕರ್ ನಾಗ್ ತಮ್ಮ ಓದು ಮುಗಿಯುತ್ತಿದ್ದಂತೆಯೇ ಮುಂಬಯಿಗೆ ಹೋದವರು. ಮುಂಬಯಿಯ ಮರಾಠಿ
ರಂಗಭೂಮಿಯತ್ತ ಆಸಕ್ತರಾಗಿ ಸಕ್ರಿಯರಾದವರು. ರಂಗದ ಹಿಂದಿನ, ಮುಂದಿನ ಎಲ್ಲವನ್ನೂ
ಸೂಕ್ಷ್ಮವಾಗಿ ಗಮನಿಸುತ್ತಾ, ಗ್ರಹಿಸುತ್ತಾ ಪಳಗಿದವರು. ಇಷ್ಟಕ್ಕೂ ರಂಗದ ಮೇಲೆ ನಾಟಕ
ನೋಡುವವರಿಗೆ ನೇಪಥ್ಯದಲ್ಲಿನ ಆತಂಕ, ನಾಟಕವೊಂದು ರಂಗಕ್ಕೆ ಬರುವವರೆಗಿನ ಕಷ್ಟ,
ಕಣ್ಣೀರು, ಬೆವರು ಅರ್ಥವಾಗುವುದಿಲ್ಲ. ಪಾತ್ರಕ್ಕೆ ಹೊಂದುವ ವಸ್ತ್ರ ವಿನ್ಯಾಸ,
ಮೇಕಪ್, ಬಾಡಿ ಲಾಂಗ್ವೇಜ್, ಡೈಲಾಗ್ ಹೇಳುವ ಟೈಮಿಂಗ್, ಅವುಗಳ ಹಿಂದೆ ಅಡಗಿರುವ ಒತ್ತಡ
ಗೊತ್ತಿರುವುದಿಲ್ಲ. ಸ್ಟೇಜ್ ಸಿದ್ಧಗೊಳಿಸುವವನು, ಬೆಳಕು ಬಿಡುವವನು, ರಂಗದ
ಮೂಲೆಯೊಂದರಲ್ಲಿ ಕೂತು ವಾದ್ಯ ನುಡಿಸುವವನು, ಹಿನ್ನೆಲೆಯಲ್ಲಿ ರಂಗಗೀತೆ ಹಾಡುವವನು-
ಇವರಿಲ್ಲದೆ ನಾಟಕ ಇಲ್ಲ; ಶಂಕರ್ ನಾಗ್ ಇವುಗಳನ್ನು ಅರಿತಿದ್ದರು.

“ಸತ್ತ ಮೇಲೆ ನಿದ್ರಿಸುವುದು ಇದ್ದೇ ಇದೆ. ಬದುಕಿದ್ದಾಗ ಹಗಲು ರಾತ್ರಿಗಳೆನ್ನದೆ
ದುಡಿಯುವ ಮೂಲಕ ಮಹತ್ವವಾದುದನ್ನು ಸಾಧಿಸಬೇಕು” ಎಂದು ಹೇಳುತ್ತಿದ್ದ ಶಂಕರ್ ನಾಗ್ ಅವರ
ಮಹತ್ವಾಕಾಂಕ್ಷೆಯ ಧೋರಣೆ ಕೂಡ ರಂಗಭೂಮಿಯ ಹಿನ್ನೆಲೆಯಿಂದಲೇ ಪಡೆದದ್ದು.

ಅಲ್ಲಿ ಅಷ್ಟು ಪಕ್ವವಾಗುತ್ತಿದ್ದಂತೆಯೇ ಶಂಕರ್ ನಾಗ್ ಬೆಂಗಳೂರಿಗೆ ಬಂದರು.
ಅಷ್ಟರಲ್ಲಾಗಲೇ ಕನ್ನಡ ಚಿತ್ರರಂಗದಲ್ಲಿ ನೆಲೆ ಕಂಡುಕೊಂಡಿದ್ದ ಸಹೋದರ ಅನಂತ್ ನಾಗ್
ಇಂಗಿತದಂತೆ ಸಿನಿಮಾದಲ್ಲಿ ನಟಿಸಲು ಮುಂದಾದರು. ಗಿರೀಶ್ ಕಾರ್ನಾಡ್ ನಿರ್ದೇಶನದ
‘ಒಂದಾನೊಂದು ಕಾಲದಲ್ಲಿ’ ಚಿತ್ರದ ಮೂಲಕ ಚೊಚ್ಚಲ ಬಾರಿಗೆ ನಾಯಕನ ಪಾತ್ರದಲ್ಲಿ ನಟಿಸಿ
‘ದೆಹಲಿ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ’ದಲ್ಲಿ ರಾಷ್ಟ್ರೀಯ ಮನ್ನಣೆ ಪಡೆದರು. ಶಂಕರ್
ನಾಗ್ ಗಂಡುಗಲಿ ಪಾತ್ರದಲ್ಲಿ ಜನಪ್ರಿಯರಾದ ಆ ಚಿತ್ರ ಮೂಲತಃ ಜಪಾನಿನ ನಿರ್ದೇಶಕ ಅಕಿರಾ
ಖುರೋಸಾವ ನಿರ್ದೇಶನದ ‘ಸೆವೆನ್ ಸಾಮುರೈ’ ಚಿತ್ರದ ಕನ್ನಡ ಅವತರಣಿಕೆಯಾಗಿತ್ತು.
ಚಂದ್ರಶೇಖರ ಕಂಬಾರರ ಸಾಹಿತ್ಯವಿದ್ದ ಹಾಡುಗಳು ಚಿತ್ರಕ್ಕೆ ಮತ್ತಷ್ಟು ಅರ್ಥ
ತಂದಿದ್ದವು. ಆ ಚಿತ್ರದಲ್ಲಿನ ಅಲ್ಲಿಯ ಜನ, ಆ ಪ್ರಕೃತಿ, ಆ ಕ್ರೌರ್ಯ, ಆ ಸಂಚು, ಆ
ಪ್ರೀತಿ, ಮುಗ್ಧತೆ, ಅನಾಗರೀಕತೆ… ಇಂಥವೆಲ್ಲ ಇಲ್ಲಿ ನೆನಪಿಗೆ ಬರುತ್ತವೆ. ಹೀರೋ
ಆಗಿ ಆ ಚಿತ್ರದಲ್ಲಿ ನಟಿಸಿದಾಗ ಶಂಕರ್ ನಾಗ್ ಕೇವಲ ಇಪ್ಪತ್ತ ನಾಲ್ಕು ವರ್ಷದ ತರುಣ.

ಆಗ ಶಂಕರ್ ನಾಗ್ ಬಿಸಿನೆತ್ತರ ಯುವಕ. ಮಹತ್ವದ ನಾಳೆಗಳನ್ನು ಕನಸುತ್ತಿದ್ದ
ಕನಸುಗಣ್ಣಿನ ಹುಡುಗ. ಅಣ್ಣ ಅನಂತ್ ನಾಗ್ ನೀಡುತ್ತಿದ್ದ ಅಪಾರ ಭ್ರಾತೃತ್ವದ ಸವಿಯನ್ನು
ಕಂಡಾತ. ಅಲ್ಲದೆ ಸಿನಿಮಾದ ರಹಸ್ಯಗಳನ್ನು ಬೇಧಿಸುವಲ್ಲಿ ಅಷ್ಟರಲ್ಲಾಗಲೇ ಪಣ ತೊಟ್ಟು
ನಿಂತಿದ್ದ ಉತ್ಸಾಹಿ. ಭಾರತದ ಬೇರೆ ಬೇರೆ ಭಾಷೆಗಳಲ್ಲಿ ತಯಾರಾಗುತ್ತಿದ್ದ ಚಿತ್ರಗಳ
ಸೂಕ್ಷ್ಮತೆ, ಕ್ರಿಯಾಶೀಲತೆಯನ್ನು ಗಮನಿಸುತ್ತಿದ್ದ ವ್ಯಕ್ತಿ. ಅತ್ತ ರಂಗಭೂಮಿಯ ಗಟ್ಟಿ
ಬುನಾದಿ, ಇತ್ತ ಸಿನಿಮಾ ಎನ್ನುವ ಮಾಯಾಜಗತ್ತಿನ ಹೊಸಬಾನಿನೆಡೆಗೆ ನೆಟ್ಟ ನೋಟ…
ಇವೆಲ್ಲವುಗಳಿಂದ ಶಂಕರ್ ನಾಗ್ ಕಣ್ಣೆದುರು ಭರವಸೆಯ ನಾಳೆಗಳು ಸುಳಿದಾಡತೊಡಗಿದವು.

ಸಿನಿಮಾದ ವಿಸ್ಮಯಕಾರಿ ಸಂಗತಿಗಳ ಬಗ್ಗೆ ಧ್ಯಾನಿಸುವವರು ಮನುಷ್ಯನ ವಿಚಿತ್ರ
ಶೋಧನೆಗಳಲ್ಲಿ ಸಿನಿಮಾ ಕೂಡ ಒಂದೆಂಬುದನ್ನು ಮನಗಾಣಬೇಕು. ಚಲಿಸುವ ಫೋಟೋಗಳ ಮೂಲಕ
ಜಗತ್ತಿಗೆ ಹೇಳಬೇಕಾದುದನ್ನು ಸಮರ್ಥವಾಗಿ ಹೇಳುವುದೇ ಈ ಕಲೆಯ ಮೂಲ ಆಶಯ.
ನಾಟಕದಲ್ಲಾದರೆ ಒಂದೊಳ್ಳೆಯ ಡೈಲಾಗ್ ಹೇಳಿದಾಗ ಅಥವಾ ಒಂದೊಳ್ಳೆ ನೃತ್ಯ ಮಾಡಿದಾಗ ಜನ
ಚಪ್ಪಾಳೆ ಹೊಡೆಯುತ್ತಾರೆ. ಆ ಚಪ್ಪಾಳೆಯ ಪ್ರೋತ್ಸಾಹ ಕಲಾವಿದ ತನ್ನ ಮುಂದಿನ
ದೃಶ್ಯಗಳಲ್ಲಿ ಇನ್ನಷ್ಟು ಚೆನ್ನಾಗಿ, ಉತ್ಸಾಹದಿಂದ ನಟಿಸಲು ಪ್ರೇರೇಪಿಸುತ್ತದೆ. ಆದರೆ
ಸಿನಿಮಾದಲ್ಲಿ ಅಂತಹ ಆವಕಾಶವಿಲ್ಲ. ಕ್ಯಾಮೆರಾವನ್ನೇ ಪ್ರೇಕ್ಷಕ ಎಂದು ತಿಳಿದು ನಟಿಸುವ
ಕಲಾವಿದರ ಚಿತ್ತದಲ್ಲಿ ಒಂದು ಬಗೆಯ ಪರವಶತೆ ಹಾಗೂ ಜಾಗೃತ ಭಾವ ಒಟ್ಟೊಟ್ಟಿಗೆ ಕೆಲಸ
ಮಾಡಬೇಕಾಗುತ್ತದೆ. ಆದ್ದರಿಂದ ನಾಟಕದಲ್ಲಿ ನಟಿಸುವುದು ಎಷ್ಟು ದೊಡ್ಡ ಸವಾಲೋ
ಸಿನಿಮಾಗಳಲ್ಲಿ ನಟಿಸುವುದು ಕೂಡ ಅಷ್ಟೇ ದೊಡ್ಡ ಸವಾಲು. ಆದ್ದರಿಂದಲೇ ಸಿನಿಮಾ
ನಾಟಕಕ್ಕಿಂತ ಭಿನ್ನ. ಆ ಗುಟ್ಟು ನಾಟಕದ ಹಿನ್ನೆಲೆಯಿಂದ ಬಂದ ಶಂಕರ್ ನಾಗ್ ಅವರಿಗೂ
ಗೊತ್ತಿತ್ತು. ಗಿರೀಶ್ ಕಾರ್ನಾಡ್ ಎಂಬ ಎರಡೂ ನೆಲೆಯಲ್ಲಿ ಪಳಗಿದ ನಿರ್ದೇಶಕನ
ಮಾರ್ಗದರ್ಶನದಲ್ಲಿ ನಟಿಸುವಾಗ ನಾಟಕ ಹಾಗೂ ಸಿನಿಮಾ ನಡುವಿನ ಈ ಪುಟ್ಟ ವ್ಯತ್ಯಾಸ
ಶಂಕರ್ ನಾಗ್ ಅವರಿಗೆ ಮತ್ತಷ್ಟು ಗೊತ್ತಾಯಿತು ಅನ್ನಬಹುದು.

ಹೀಗೆ ಅವಲೋಕಿಸುತ್ತಾ ಹೋದಂತೆ, ಶಂಕರ್ ನಾಗ್ ಕಮರ್ಷಿಯಲ್ ಚಿತ್ರಗಳಿಗೆ ಒಗ್ಗಿಕೊಳ್ಳಲು
ಹೆಚ್ಚು ಸಮಯ ಹಿಡಿಯಲಿಲ್ಲ. ಶಂಕರ್ ನಾಗ್ ನಟಿಸಿದ ಚೊಚ್ಚಲ ಮಸಾಲಾ ಚಿತ್ರ
‘ಸೀತಾರಾಮು’. ಅಲ್ಲಿಂದಾಚೆಗೆ ‘ಪ್ರೀತಿ ಮಾಡು ತಮಾಷೆ ನೋಡು’, ‘ಅಟೋ ರಾಜ’, ‘ಮೂಗನ
ಸೇಡು’, ‘ಜನ್ಮಜನ್ಮದ ಅನುಬಂಧ’, ‘ಗೀತಾ’, ‘ಮಿಂಚಿನ ಓಟ’, ‘ಕಾರ್ಮಿಕ ಕಳ್ಳನಲ್ಲ’,
‘ನೋಡಿ ಸ್ವಾಮಿ ನಾವಿರೋದು ಹೀಗೆ’, ‘ಆಕ್ಸಿಡೆಂಟ್’, ‘ಸಿ.ಬಿ.ಐ.ಶಂಕರ್’, ‘ಇದು
ಸಾಧ್ಯ’, ‘ಹೊಸ ಜೀವನ’ ಮುಂತಾದ ಚಿತ್ರಗಳಲ್ಲಿ ವಿಕಸಿಸುತ್ತಾ ಸಾಗಿದಂತೆ ಶಂಕರ್ ನಾಗ್
ಅದ್ಭುತ ಕಲಾವಿದನಾಗಿ ಕಾಣುತ್ತಾರೆ. ಹಾಗೆಯೇ ಕ್ರಿಯಾಶೀಲ ನಿರ್ದೇಶಕರಾಗಿ ಸಹ. ಪೋಲೀಸ್
ಅಧಿಕಾರಿ ಸಾಂಗ್ಲಿಯಾನ ಮುಂತಾದವರು ಶಂಕರ್ ನಾಗ್ ಚಿತ್ರಗಳಿಗೆ ಸ್ಪೂರ್ತಿಯಾಗಿದ್ದಾರೆ.
ರಾಮಕೃಷ್ಣ ಹೆಗಡೆ, ಪ್ರೊತಿಮಾ ಬೇಡಿ ತರಹದವರು ಇವರಿಗೆ ಇಷ್ಟವಾಗುತ್ತಾರೆ. ಜನತಾ ಪಕ್ಷ
ಎಂಬತ್ತರ ಸುಮಾರಿಗೆ ಇವರು ಗುರುತಿಸಿಕೊಳ್ಳುವ ರಾಜಕೀಯ ಪಕ್ಷವಾಗುತ್ತದೆ.

ಇವರ ಚಿತ್ರಗಳಲ್ಲಿ ಹಾಡುಗಳಿವೆ, ಫೈಟುಗಳಿವೆ, ಪಂಚಿಂಗ್ ಡೈಲಾಗ್ಸ್ ಇವೆ; ತಂತ್ರವಿದೆ,
ಬಡವರ ಬಗ್ಗೆ ಕಾಳಜಿ ಇದೆ, ಸಾಮಾಜಿಕ ಪ್ರಜ್ಞೆ ಇದೆ; ಎಲ್ಲವೂ ವಾಸ್ತವಕ್ಕೆ ಹಿಡಿದ
ಕನ್ನಡಿಯಂತಿವೆ. ಚಿತ್ರ ಮಾಡಿ ಕೀರ್ತಿ, ಹಣ ಗಳಿಸುವ ಉದ್ದೇಶಕ್ಕಿಂತ ಮಿಗಿಲಾಗಿ
ಸಿನಿಮಾ ಮಾಧ್ಯಮದ ಮೂಲಕ ನಾಡಿಗೆ ಹೇಳಬೇಕಾದುದನ್ನು ಸ್ಪಷ್ಟವಾಗಿ ಹೇಳಬೇಕೆಂಬ ತುಡಿತ
ಮತ್ತು ವ್ಯವಹಾರದಾಚೆಗೂ ಸಿನಿಮಾವನ್ನು ಕಲೆಯಾಗಿ ನೋಡುವ ಪ್ರಾಮಾಣಿಕತೆ- ಇಲ್ಲಿ
ಏಕಕಾಲಕ್ಕೆ ಗ್ರಹಿಕೆಗೆ ಸಿಕ್ಕುತ್ತವೆ. ಈ ಕಾರಣದಿಂದ ಶಂಕರ್ ನಾಗ್ ಅವರ ಹಲವು ಬಗೆಯ
ಪ್ರಯತ್ನಗಳು ಮುಖ್ಯವಾಗಿ ಪರಿಗಣಿಸಲ್ಪಡುತ್ತವೆ. ಇವರು ಮೊದಲು ಕಾಲಾತ್ಮಕ
ಚಿತ್ರಗಳಲ್ಲಿ ನಟಿಸಿದವರು; ಆಮೇಲೆ ಹೆಚ್ಚು ಜನರನ್ನು ತಲುಪುವ ವ್ಯಾಪಾರಿ ಚಿತ್ರಗಳತ್ತ
ಮುಖ ಮಾಡಿದರು. ತಡಮಾಡದೆ ‘ಮಿಂಚಿನ ಓಟ’ದ ಮೂಲಕ ನಿರ್ದೇಶಕರಾದರು; ಚಿತ್ರಕ್ಕೆ ಎರಡನೇ
ಅತ್ಯುತ್ತಮ ಚಿತ್ರ, ಅತ್ಯುತ್ತಮ ಚಿತ್ರಕತೆ ರಾಜ್ಯ ಪ್ರಶಸ್ತಿಗಳೂ ಬಂದವು.

ಹೀಗೆ ಶುರುವಾದ ಶಂಕರ್ ನಾಗ್ ಅವರ ಕಲಾಪಯಣ ಕಡೆಗೆ ತನ್ನ ಸುತ್ತಣ ಸಮಾಜಕ್ಕೆ
ಸ್ಪಂದಿಸುವ ಕಡೆಗೆ ವಾಲಿಕೊಂಡಿತು; ‘ಆಟೋರಾಜ’ ಮೂಲಕ ಆಟೋ ಡ್ರೈವರುಗಳ ಪ್ರೀತಿಯನ್ನೂ,
‘ಲಾರಿ ಡ್ರೈವರ್’ ಮೂಲಕ ಲಾರಿ ಡ್ರೈವರುಗಳ ಅಭಿಮಾನವನ್ನೂ, ‘ಕಾರ್ಮಿಕ ಕಳ್ಳನಲ್ಲ’
ಮೂಲಕ ಕಾರ್ಮಿಕರ ಒಲವನ್ನೂ ಗಳಿಸಲು ಸಾಧ್ಯವಾಯಿತು. ಶಂಕರ್ ನಾಗ್ ಎಂಬ ಹೆಸರು ಕೇವಲ
ಒಬ್ಬ ಚಿತ್ರನಟನ ಹೆಸರಾಗದೆ ತುಳಿತಕ್ಕೊಳಗಾದ, ಶೋಷಣೆಯನ್ನು ಎದುರಿಸುವ, ಶ್ರಮಿಕ,
ಬಡವ, ದೀನ ಜನತೆಯ ಪಾಲಿನ ಗಟ್ಟಿಧ್ವನಿಯಾಗುವತ್ತ ತಿರುಗಿಕೊಂಡಿತು…ಈ ಎಲ್ಲ
ಕಾರಣಗಳಿಂದಾಗಿ ತಮ್ಮ ಓವರ್ ಸ್ಪೀಡ್ ನಿಂದಾಗಿ ಶಂಕರ್ ನಾಗ್ ತಮಗೇ ಗೊತ್ತಿಲ್ಲದಂತೆ
ತಮಗಿಂತಲೂ ಮೊದಲೇ ಇಲ್ಲಿ ಸ್ಟಾರ್, ಆರಾಧ್ಯ ದೈವ ಎನಿಸಿಕೊಂಡಿದ್ದವರನ್ನು ಹಿಂದಿಕ್ಕಿ
ಅತ್ಯಂತ ಕಡಿಮೆ ಅವಧಿಯಲ್ಲಿ ಒಂದೆರಡು ಹೆಜ್ಜೆ ಮುಂದಕ್ಕೆ ಹೋಗಿಬಿಟ್ಟಿದ್ದರು!

ಮಹಾನ್ ಕಲಾವಿದ ಶಂಕರ್ ನಾಗ್ ಅವರಲ್ಲಿದ್ದ ಈ ವಿಶೇಷ ಗುಣ, ತೀಕ್ಷ್ಣತೆ, ಚುರುಕುತನ
ಸಾಮಾನ್ಯ ಅನ್ನಿಸದ ಚಿತ್ರಗಳನ್ನು ಮಾಡುವ ರೀತಿ ಅಚ್ಚರಿಗೊಳಿಸುತ್ತಿತ್ತು. ತಮ್ಮ
ನಿರ್ದೇಶನದ ಚಿತ್ರಗಳಿಗೆ ತಾವೇ ಸ್ಕ್ರಿಪ್ಟ್ ಬರೆಯುವುದನ್ನು ರೂಢಿಸಿಕೊಂಡಿದ್ದ ಶಂಕರ್
ನಾಗ್ ಅವರಿಗೆ ಅಸಾಧ್ಯವಾದ ವಾಸ್ತವತೆ, ಪಾರದರ್ಶಕತೆ, ದೂರದೃಷ್ಟಿ ಇತ್ತು; ಇವರ
ನಿರ್ದೇಶನದ ಇವರದೇ ಆದ ಶೈಲಿಯ ಚಿತ್ರಗಳಲ್ಲಿ ಕಮರ್ಷಿಯಲ್ ಎಲಿಮೆಂಟ್ಸ್ ಏನೇನು ಇರಬೇಕೋ
ಅವೆಲ್ಲವೂ ಇರುವುದರ ಜೊತೆಗೆ ಜಗತ್ತಿಗೆ ಹೇಳಲೇಬೇಕಾದ ಒಂದು ಮಹತ್ವಪೂರ್ಣ ಸಂಗತಿ
ಕಲಾತ್ಮಕ ವಿನ್ಯಾಸದೊಳಗೆ ತಪ್ಪದೆ ಅಡಗಿರುತ್ತಿತ್ತು; ಎಷ್ಟು ಮನರಂಜನೆ ಇರುತ್ತಿತ್ತೋ
ಅಷ್ಟೇ ಭಾವುಕತೆ, ಚಿಂತನೆಗೆ ಹಚ್ಚುವ ಗುಣ ಇವರ ಚಿತ್ರಗಳಲ್ಲಿ ಇರುತ್ತಿತ್ತು.

ಹೀಗೆ ಹೇಳುವುದು ಶಂಕರ್ ನಾಗ್ ಅವರನ್ನು ಹೊಗಳುವ ಸಲುವಾಗಿ ಅಲ್ಲ; ಅವರ ಶಕ್ತಿ ಮತ್ತು
ಯುಕ್ತಿಯನ್ನು ಗ್ರಹಿಸುವ ಉದ್ದೇಶದಿಂದ ಮಾತ್ರ. ಪೂರ್ಣಪ್ರಮಾಣದಲ್ಲಿ ಶಂಕರ್ ನಾಗ್
ಗಿರೀಶ್ ಕಾರ್ನಾಡ್, ಸತ್ಯಜಿತ್ ರೇ, ಶ್ಯಾಮ್ ಬೆನಗಲ್, ಗಿರೀಶ್ ಕಾಸರವಳ್ಳಿ ಮುಂತಾದವರ
ಹಾಗೆ ಕಲಾತ್ಮಕ ಚಿತ್ರಗಳ ತೆಕ್ಕೆಗೆ ಸಿಕ್ಕಿಹಾಕಿಕೊಂಡು ಅಲ್ಲೇ ಉಳಿದುಬಿಟ್ಟಿದ್ದರೆ
ಇನ್ನೊಂದಿಷ್ಟು ಮಹತ್ವದ ಪ್ರಶಸ್ತಿಗಳನ್ನು ಕನ್ನಡಕ್ಕೆ ತಂದುಕೊಡುತ್ತಿದ್ದರು
ಅನ್ನುವುದನ್ನು ಬಿಟ್ಟರೆ ಸಾಮಾನ್ಯ ಪ್ರೇಕ್ಷಕನಿಗೂ ತಲುಪುವ ಸರಳತೆಯ ನಡುವೆ
ಸಂಕೀರ್ಣವಾದುದನ್ನು ಪ್ರತಿಪಾದಿಸುವ ನಟ ಅಥವಾ ನಿರ್ದೇಶಕ ಬಹುಷಃ
ಆಗುತ್ತಿರಲಿಲ್ಲವೇನೋ. ಶಂಕರ್ ನಾಗ್ ಅವರ ಹೆಚ್ಚುಗಾರಿಗೆ ಇರುವುದೇ ಹೀಗೆ ಎರಡು
ದಿಕ್ಕುಗಳು ಒಂದೆಡೆ ಸಂಧಿಸುವಂತೆ ಮಾಡುವ ಸಮತೋಲನ ಗುಣ, ಚಾಣಾಕ್ಷತೆ, ಪ್ರತಿಭೆಯಿಂದ.
ಹಾಡು, ನೃತ್ಯ, ಡೈಲಾಗ್ಸ್, ಪ್ರಜ್ಞೆ ಹುಟ್ಟುಹಾಕುವ ಚಿತ್ರಕತೆ ಮೂಲಕ ಹೃದಯ
ಸ್ಪರ್ಶಿಸಬಲ್ಲ ಈತ ಪ್ರೇಕ್ಷಕರ ಆಸಕ್ತಿ, ಅಭಿರುಚಿಗಳನ್ನು, ಅವರಲ್ಲಿ ಅಡಗಿರಬಹುದಾದ
ಕೌತುಕವನ್ನು ಗ್ರಹಿಸಬಲ್ಲವರಾಗಿದ್ದರು, ಅವರಲ್ಲಿನ ಭಾವಜಗತ್ತು, ಪ್ರೇಮಕ್ಕಾಗಿ
ತುಡಿಯುವ ಮನಸು, ಸ್ನೇಹಕ್ಕಾಗಿ ಹಾತೊರೆಯುವ ಹಪಾಹಪಿ, ವ್ಯವಸ್ಥೆಯ ಮೇಲಿನ ಅವರ
ಸಿಟ್ಟು, ಆಕ್ರೋಶ, ಅಸಯಾಕತೆ, ಕನ್ನಡ ನಾಡು ನುಡಿಯ ಬಗೆಗಿನ ಅವರ ಪ್ರೀತಿ, ಅಭಿಮಾನ
ಎಲ್ಲವನ್ನೂ ಅಚ್ಚುಕಟ್ಟಾಗಿ ಹಿಡಿದು ಅವರನ್ನು ರಂಜಿಸಬಲ್ಲ ಮಾಂತ್ರಿಕತೆ ಶಂಕರ್ ನಾಗ್
ಅವರಲ್ಲಿತ್ತು.

ಮೂವತ್ತೈದು ವರ್ಷಕ್ಕೇ ಶಂಕರ್ ನಾಗ್ ಎಷ್ಟು ಸಾಧಿಸಿದ್ದರು? ಚಿತ್ರರಂಗಕ್ಕೆ ಕಾಲಿಟ್ಟ
ಬರೀ ಹನ್ನೆರಡು ವರ್ಷಗಳೊಳಗೆ ಬರೋಬ್ಬರಿ ಎಂಬತ್ತಕ್ಕೂ ಹೆಚ್ಚು ಚಿತ್ರಗಳಲ್ಲಿ
ನಟಿಸಿದ್ದರು. ಹತ್ತಾರು ಚಿತ್ರಗಳನ್ನು ಬರೆದು, ನಿರ್ದೇಶಿಸಿದ್ದರು: ಆಕರ್ಷಕ ಗಡ್ಡ,
ವಿಶಿಷ್ಟ ದ್ವನಿ, ಸ್ಟೈಲಿಶ್ ನಡಿಗೆ ಮತ್ತು ಭರವಸೆಯ ಬೆಳಕನ್ನು ಮೊಗೆಮೊಗೆದು ಕೊಡುವ
ಕಣ್ಣುಗಳು ಅವರ ಕಲೆಯನ್ನು, ವ್ಯಕ್ತಿತ್ವವನ್ನು ಇಡಿಯಾಗಿ ಹಿಡಿಯಬಯಸುವವರಿಗೆ
ಸಹಕರಿಸುತ್ತಿದ್ದವು. ಅಣ್ಣ ಅನಂತ್ ನಾಗ್ ಜೊತೆಗೂಡಿ ಅಂದಿನ ಮುಖ್ಯಮಂತ್ರಿ ರಾಮಕೃಷ್ಣ
ಹೆಗಡೆ ಸ್ನೇಹ ಬೆಳೆಸಿ ಕಟ್ಟಿದ ‘ಸಂಕೇತ್’ ಸ್ಟುಡಿಯೋ, ಆ ಸ್ಟುಡಿಯೋ ಮೂಲಕ
ಕನ್ನಡಕ್ಕೊಂದು ರೆಕಾರ್ಡಿಂಗ್ ಸ್ಟುಡಿಯೋ ಲಭ್ಯವಾಗಬೇಕು ಮತ್ತು ಕನ್ನಡಿಗರು ಹಿಂದಿ
ಧಾರಾವಾಹಿಗಳಲ್ಲಿ ಕಾಣಿಸಿಕೊಳ್ಳಬೇಕು ಅನ್ನುವ ಕನಸುಗಳು, ಕನ್ನಡ ನಾಟಕ ಮತ್ತು ರಂಗ
ಕಲಾವಿದರು ರಾಷ್ಟ್ರಮಟ್ಟದಲ್ಲಿ ಪ್ರಜ್ವಲಿಸಬೇಕು ಅನ್ನುವ ಭರವಸೆಗಳು ಹಾಗೆಯೇ ದೊಡ್ಡ
ಮಟ್ಟದಲ್ಲೊಂದು ಕಂಟ್ರಿ ಕ್ಲಬ್ ಮಾಡುವ ಕನಸು… ಯಾವುದೂ ಹೆಚ್ಚು ಕಾಲ ಉಳಿಯಲಿಲ್ಲ.

ಅದೊಂದು ಬೆಳಗಿನ ಜಾವ ಶಂಕರ್ ನಾಗ್ ದಾವಣಗೆರೆಯಿಂದ ಹತ್ತು ಕಿಲೋಮೀಟರ್ ಈಚೆಗೆ ಕಾರು
ಅಪಘಾತದಲ್ಲಿ ತೀರಿಕೊಂಡರು. ‘ಒಂದಾನೋದು ಕಾಲದಲ್ಲಿ’ ಗಿರೀಶ್ ಕಾರ್ನಾಡ್ ಮೂಲಕ
ಚಿತ್ರನಟನಾದ ಶಂಕರ್ ನಾಗ್ ಅದೇ ಗಿರೀಶ್ ಕಾರ್ನಾಡ್ ಅವರ ‘ಜೋಕುಮಾರಸ್ವಾಮಿ’ ಮಾಡುವ
ಸಂದರ್ಭದಲ್ಲಿ ಕೆಟ್ಟ ಸಾವಿಗೆ ಬಲಿಯಾದರು. ಉತ್ತರಕನ್ನಡ ಜಿಲ್ಲೆಯ ಹೊನ್ನಾವರ ಸಮೀಪದ
ಮಲ್ಲಾಪುರದಲ್ಲಿ 1954ರಲ್ಲಿ ಜನಿಸಿದ ಶಂಕರ್ ನಾಗ್ ತಮ್ಮನ್ನು ಅಪಾರವಾಗಿ
ಪ್ರೀತಿಸುತ್ತಿದ್ದ ಅಸಂಖ್ಯಾತ ಕನ್ನಡಿಗರನ್ನು ಶಾಶ್ವತವಾಗಿ ಬಿಟ್ಟು ಹೋಗುವ ಮುನ್ನ
ಅದೆಷ್ಟೋ ಅದ್ಭುತ ಸಿನಿಮಾಗಳನ್ನು, ‘ಮಾಲ್ಗುಡಿ ಡೇಸ್’ ತರಹದ ಭಾರತ ಮಟ್ಟದಲ್ಲೇ ಬೆರಗು
ಮೂಡಿಸಿದ ಧಾರಾವಾಹಿಯನ್ನು ನೀಡಿದ್ದರ ಜೊತೆಗೆ ಕನ್ನಡಿಗರ ಪಾಲಿಗೆ ಒಂದು ದೊಡ್ಡ
ಶೂನ್ಯವನ್ನು ಉಳಿಸಿಬಿಟ್ಟು ಅರ್ಧದಲ್ಲೇ ದಿಢೀರನೆ ಹೊರಟುಬಿಟ್ಟರು.

 

-ಹೃದಯಶಿವ

12548936_10201284272185325_2026048081419821529_n

ಸುಬ್ಬಯ್ಯ ನಾಯ್ಡು: ಕನ್ನಡ ಚಿತ್ರರಂಗದ ಮೊದಲ ನಾಯಕ ನಟ

ಸುಬ್ಬಯ್ಯ ನಾಯ್ಡು: ಕನ್ನಡ ಚಿತ್ರರಂಗದ ಮೊದಲ ನಾಯಕ ನಟ

ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ದಲ್ಲಿ ನಾಯಕನಟರಾಗಿ ಅಭಿನಯಿಸಿದ ಹೆಗ್ಗಳಿಕೆ ಸುಬ್ಬಯ್ಯ ನಾಯ್ಡು ಅವರದ್ದು. ಅವರು ಕನ್ನಡದ ಮೊದಲ ನಾಟಕ ನಟ ಅನ್ನುವುದು ಕೇವಲ ಅಂಕಿ-ಅಂಶಗಳ ಮೂಲಕ ಮಾತ್ರ ಗುರುತಿಸಲ್ಪಡೋ ಸಂಗತಿ ಅಲ್ಲ ನಾಯಕ ನಟರ ಅಭಿನಯಕ್ಕೆ ಒಂದು ರೀತಿಯಲ್ಲಿ ಮಾದರಿಯಾಗಿ ನಿಂತವರು ಅವರು. ವರನಟ ಡಾ.ರಾಜ್ ಕುಮಾರ್ ಅವರು ಸುಬ್ಬಯ್ಯ ನಾಯ್ಡು ಅವರ ಕಂಪನಿಯಲ್ಲಿ ಅಭಿನಯಿಸಿದ್ದವರು ಮಾತ್ರವಲ್ಲ ಅವರ ಅಭಿನಯ ಕ್ರಮವನ್ನೇ ಅನುಸರಿಸಿದವರೂ ಕೂಡ ಹೌದು. ಅಷ್ಟೇ ಅಲ್ಲ ಕನ್ನಡ ಚಿತ್ರರಂಗದ ಕನಿಷ್ಠ ಮೂರು ತಲೆಮಾರಿನ ಕಲಾವಿದರು ಸುಬ್ಬಯ್ಯ ನಾಯಡು ಅವರ ಅಭಿನಯ ಕ್ರಮವನ್ನೇ ಅನುಸರಿಸಿದ್ದರು.

ಎರಡನೇ ವಯಸ್ಸಿಗೆ ತಂದೆಯನ್ನು ಕಳೆದು ಕೊಂಡ ಸುಬ್ಬಯ್ಯ ನಾಯ್ಡು ಬಲು ಕಷ್ಟದ ಬಾಲ್ಯವನ್ನು ಕಂಡವರು. ಶಾಲೆಯ ಮುಖವನ್ನೇ ಕಾಣದೆ ಎಮ್ಮೆ ಮೇಯಿಸಿಕೊಂಡಿದ್ದರೂ ನಾಟಕಗಳನ್ನು ನೋಡಿ ಶುದ್ದ ಸಂಭಾಷಣೆಯನ್ನು ಬಾಲಕ ಸುಬ್ಬಯ್ಯ ನಾಯ್ಡು ಕಲಿತಿದ್ದರು. ಇದೇ ರಂಗಭೂಮಿಯ ಕಡೆ ಬರಲು ಪ್ರೇರಣೆ ನೀಡಿತು. ಗಿರಿಧರ್ಲಾಲ್ ಕಂಪನಿ ಮೂಲಕ ಪ್ರವೇಶ ಪಡೆದರೂ ಹೆಸರು ಮಾಡಿದ್ದು ಸುಬ್ಬು ಗುರಿಕಾರ್ ಅವರ ‘ಭಾರತ ಜನ ಮನೋವಿಲಾಸಿನಿ’ಕಂಪನಿಯ ಮೂಲಕ. ಅದರಲ್ಲೂ ‘ವಿರಾಟ ಪರ್ವ’ನಾಟಕದ ಸುದೇಷ್ಟೆ ಪಾತ್ರ ಹೆಸರು ತಂದು ಕೊಟ್ಟಿತು. ಇದನ್ನು ಮಾಡೋಳು ಹುಡುಗಿ ಅಂದುಕೊಂಡು ಮೋಹಿಸಿದ ಶ್ರೀಮಂತರೂ ಕೂಡ ಇದ್ದರು. ಗಂಗಾಧರ ರಾಯರ ಕಂಪನಿಯಲ್ಲಿ ನಾಯಕನ ಪಾತ್ರಗಳ ಮೂಲಕ ಹೆಸರು ಮಾಡಿದರು. ಇಲ್ಲಿಂದ ಮುಂದಿನ ಸ್ಟಾಪ್ ಗುಬ್ಬಿ ಕಂಪನಿ. ಇಲ್ಲಂತೂ ‘ಸುಭದ್ರಾ ಕಲ್ಯಾಣ’ದ ಶ್ರೀಕೃಷ್ಣನಾಗಿ ಹೆಸರು ಮಾಡಿದರು. ಅಷ್ಟು ಹೊತ್ತಿಗಾಗಲೇ ನಾಯಕನ ಪಾತ್ರವನ್ನು ನಿರ್ವಹಿಸುವುದರಲ್ಲಿ ಅವರು ಮಾದರಿ ಆಗಿ ಬಿಟ್ಟಿದ್ದರು. ಗುಬ್ಬಿ ಕಂಪನಿಯವರೇ ನಿರ್ಮಿಸಿದ ‘ಹಿಸ್ ಲವ್ ಆಪೇರ್’ ಅನ್ನೋ ಮೂಕಿ ಚಿತ್ರದಲ್ಲಿ ಕೂಡ ಸುಬ್ಬಯ್ಯ ನಾಯ್ಡು ಅಭಿನಯಿಸಿದರು.

ಈ ವೇಳೆಗೆ ಸುಬ್ಬಯ್ಯ ನಾಯ್ಡು ಅವರಿಗೆ ಆರ್.ನಾಗೇಂದ್ರ ರಾಯರ ಪರಿಚಯವಾಯಿತು. ರಾಯರು ಮುಂಬೈಗೆ ತೆರಳಿ ವಾಕ್ಚಿತ್ರಗಳಲ್ಲಿ ಅಭಿನಯಿಸಿ ಅನುಭವವನ್ನು ಪಡೆದುಕೊಂಡು ಬಂದಿದ್ದರು.ರಂಗಭೂಮಿಯ ಕುರಿತೂ ಅವರಿಗೆ ಹೊಸ ಐಡಿಯಾಗಳಿದ್ದವು. ಇದನ್ನು ಕೇಳಿ ಸುಬ್ಬಯ್ಯ ನಾಯ್ಡು ಅವರಿಗೆ ಅವರಿವರ ಕಂಪನಿಯಲ್ಲಿ ಕೆಲಸ ಮಾಡೋ ಬದಲಿಗೆ ರಾಯರ ಜೊತೆಯಲ್ಲಿ ಸ್ವಂತ ಕಂಪನಿ ಮಾಡಬಾರದು ಏಕೆ ಅನ್ನೋ ವಿಚಾರ ಬಂದಿತು. ರಾಯರ ಮೊದಲಿಗೆ ಒಪ್ಪದಿದ್ದರೂ ತಾಯಿ ರುಕ್ಮಿಣಿ ಬಾಯಿ ಮಾತಿಗೆ ಕಟ್ಟು ಬಿದ್ದು ಒಪ್ಪಿಕೊಂಡರು. ಹೀಗೆ ‘ಶ್ರೀಸಾಮ್ರಾಜ್ಯ ನಾಟಕ ಮಂಡಳಿ’ರೂಪುಗೊಂಡಿತು. ಇಲ್ಲಿ ರೂಪುಗೊಂಡ ‘ಭೂಕೈಲಾಸ’ ನಾಟಕ ಕನ್ನಡ ರಂಗಭೂಮಿಯ ಇತಿಹಾಸದಲ್ಲೇ ಮೈಲಿಗಲ್ಲು ಎನ್ನಿಸಿಕೊಂಡಿತು. ರಂಗದ ಮೇಲೆ ಮೊಟ್ಟ ಮೊದಲ ಸಲ ಡಿಮ್ಮರ್ಗಳು ಸ್ಪಾಟ್ ಲೈಟ್ಗಳು ಬಳಕೆಯಾದವು. ರಾವಣನಾಗಿ ಸುಬ್ಬಯ್ಯ ನಾಯ್ಡು ಅವರು ಅಭಿನಯದಲ್ಲಿ ಹೊಸತನವನ್ನು ತಂದಿದ್ದರು.

 15bg_bgkpm_SUCH_17_1847890e

ಇದೇ ವೇಳೆಗೆ ಚಮನ್ ಲಾಲ್ ಡುಂಗಾಜಿಯವರು ನಾಗೇಂದ್ರ ರಾಯರ ಬಳಿ ಕನ್ನಡ ಚಿತ್ರವನ್ನು ನಿರ್ಮಿಸುವ ಪ್ರಸ್ತಾಪವನ್ನು ಮುಂದಿಟ್ಟಿದ್ದರು. ನಾಗೇಂದ್ರ ರಾಯರು ಹಾಕಿದ್ದು ಒಂದೇ ಶರತ್ತು ‘ಸುಬ್ಬಯ್ಯ ನಾಯ್ಡು ಅವರು ನಾಯಕರಾಗ ಬೇಕು’ ಹೀಗೆ ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ದಲ್ಲಿ ನಾಯಕ ಇಂದ್ರಜಿತುವಿನ ಪಾತ್ರವನ್ನು ಸುಬ್ಬಯ್ಯ ನಾಯ್ಡು ನಿರ್ವಹಿಸಿದರು. ರಂಗ ಭೂಮಿಗಿಂತಲೂ ಸಿನಿಮಾ ಭಿನ್ನ ಕ್ಷೇತ್ರವಾಗಿದ್ದು. ಆಗ ಕಲಾವಿದರು ಅಭಿನಯಿಸುತ್ತಲೇ ಹಾಡ ಬೇಕಿತ್ತು. ಸ್ಟುಡಿಯೋ ಇರಲೇ ಇಲ್ಲ. ಇಂತಹ ಸವಾಲಿನಲ್ಲಿ ಸುಬ್ಬಯ್ಯ ನಾಯ್ಡು ತಮ್ಮ ಸ್ವಂತಿಕೆಯನ್ನು ತೋರಿಸಿದರು ಅಲ್ಲಿಂದ ಮುಂದೆ ‘ವಸಂತ ಸೇನ’ ‘ಹರಿಶ್ಚಂದ್ರ’ ‘ಮಹಾತ್ಮ ಕಬೀರ್’ಚಿತ್ರಗಳ ನಾಯಕರಾಗಿ ಸುಬ್ಬಯ್ಯ ನಾಯ್ಡು ಅಭಿನಯಿಸಿ ಅಪಾರ ಜನಪ್ರಿಯತೆ ಪಡೆದರು. ಆದರೆ ಅವರ ಒಲವು ಇದ್ದಿದ್ದು ರಂಗಭೂಮಿಯ ಕಡೆಗೇ.

ಮದ್ರಾಸಿನಲ್ಲಿ ‘ಶ್ರೀಸಾಮ್ರಾಜ್ಯ ಮಂಡಳಿ’ ಕ್ಯಾಂಪ್ ಹಾಕಿದ್ದಾಗ. ಚಾಂಮ್ರವರ್ಣ ಅಣೆಕಟ್ಟು ಒಡೆದು ಅಪಾರ ನಷ್ಟವಾಯಿತು. ನಾಗೇಂದ್ರ ರಾಯರು ರಂಗಭೂಮಿ ಸಾಕು ಎಂದು ನಿರ್ಧರಿಸಿ ಚಿತ್ರರಂಗದಲ್ಲಿ ಭವಿಷ್ಯವನ್ನು ಕಾಣಲು ತೀರ್ಮಾನಿಸಿದರು. ಆದರೆ ಸುಬ್ಬಯ್ಯ ನಾಯಡು ಅವರು ರಂಗಭೂಮಿಯಲ್ಲೇ ಇಳಿಯಲು ಬಯಸಿದರು. ಇಲ್ಲಿ ಗೆಳೆಯರ ಹಾದಿ ಬೇರೆಯಾಯಿತು. ಇದರಿಂದ ಕನ್ನಡ ಚಿತ್ರರಂಗಕ್ಕೆ ದೊರಕ ಬಹುದಾಗಿದ್ದ ಸುಬ್ಬಯ್ಯ ನಾಯ್ಡು ಅವರ ವಿಶಿಷ್ಠ ಪಾತ್ರಗಳು ತಪ್ಪಿ ಹೋದವು. ಮುಂದೆ ಅವರು ಚಿತ್ರ ನಿರ್ಮಿಸಿದ್ದು ಮಗ ಲೋಕೇಶ್ಗಾಗಿ. ‘ಭಕ್ತಪ್ರಹ್ಲಾದ’ಚಿತ್ರವನ್ನು ನಿರ್ಮಿಸಿ ತಾವೇ ಹಿರಣ್ಯ ಕಶಪುವಿನ ಪಾತ್ರವನ್ನು ಅಮೋಘವಾಗಿ ಮಾಡಿದರು. ಅಲ್ಲಿ ಕೂಡ ಅವರ ಪ್ರತಿಭೆಯನ್ನು ಗುರುತಿಸುವ ಮನೋಭಾವ ಕೆಲಸ ಮಾಡಿತ್ತು. ಲೀಲಾವತಿಯವರು ಚಿತ್ರರಂಗಕ್ಕೆ ಬಂದಿದ್ದು ಈ ಚಿತ್ರದ ಮೂಲಕವೇ.

ರಂಗಭೂಮಿಯಲ್ಲೇ ಉಳಿಯಲು ತೀರ್ಮಾನಿಸಿದ ಸುಬ್ಬಯ್ಯ ನಾಯಡು ಹಲವು ಹೊಸ ಪ್ರಯೋಗಗಳನ್ನು ಮಾಡಿದರು. ‘ತಿರುಗುವ ರಂಗಸಜ್ಜಿಕೆ’ಮಾಡಿದರು. ರಾಷ್ಟ್ರಮಟ್ಟದಲ್ಲೇ ಇಂತಹ ಪ್ರಯೋಗ ನಡೆದಿದ್ದು ಅದೇ ಮೊದಲು. ಹೊಸ ಕಲಾವಿದರನ್ನು ಹುಡುಕಿದರು. ಶ್ರೀಕಂಠ ಮೂರ್ತಿಗಳು ಅವರ ಕಂಪನಿಯ ಪ್ರಮುಖ ನಟರಾಗಿದ್ದರು.

ಒಮ್ಮೆ ಅವರಿಗೆ ಅನಾರೋಗ್ಯ ಉಂಟಾಯಿತು. ನಾಟಕಕ್ಕೆ ಟಿಕೇಟ್ ವಿತರಿಸಿಯಾಗಿತ್ತು. ಒಬ್ಬ ಕಲಾವಿದನ ಸಲುವಾಗಿ ನಾಟಕ ನಿಲ್ಲಿಸುವುದು ಸರಿಯಲ್ಲ ಎಂದು ಸುಬ್ಬಯ್ಯ ನಾಯಡು ನಿರ್ಧರಿಸಿದರು. ಆದರೆ ‘ಭಕ್ತ ಅಂಬರೀಷ’ದಲ್ಲಿ ರಮಾಕಾಂತನ ಪಾತ್ರವನ್ನು ವಹಿಸುವುದು ಸುಲಭವಾಗಿರಲಿಲ್ಲ. ಯೋಚಿಸಿ ನಾಯಡು ಅವರು ತಮ್ಮ ಕಂಪನಿಯಲ್ಲಿದ್ದ ಗಾಯನವನ್ನೂ ಬಲ್ಲ ಸುಂದರ ಯುವಕನಿಂದ ಆ ಪಾತ್ರವನ್ನು ಮಾಡಿಸಿದರು. ಆ ಯುವಕ ಮುತ್ತುರಾಜ್ ಮುಂದೆ ಡಾ.ರಾಜ್ ಕುಮಾರ್ ಆಗಿ ಹೆಸರು ಮಾಡಿದರು. ವೈವಿಧ್ಯಮಯ ಪಾತ್ರಗಳನ್ನು ನೀಡಿ ರಾಜ್ ಕುಮಾರ್ ಅವರು ಮೇರು ಕಲಾವಿದರಾಗಿ ಬೆಳೆಯುವಲ್ಲಿ ಸುಬ್ಬಯ್ಯ ನಾಯಡು ಅವರ ಕೊಡುಗೆ ಬಹಳ ದೊಡ್ಡದು. ಅದರಂತೆ ನರಸಿಂಹ ರಾಜು, ಬಾಲಕೃಷ್ಣ, ಢಿಕ್ಕಿ ಮಾದವರಾವ್, ಬೇಲೂರು ರಾಘವೇಂದ್ರ ರಾವ್ ಸೇರಿದಂತೆ ಅನೇಕ ಪ್ರಮುಖ ಕಲಾವಿದರನ್ನು ಅವರು ಬೆಳೆಸಿದರು.

1962ರ ಜುಲೈ 21ರಂದು ಮಂಡ್ಯದಲ್ಲಿ ಅಭಿನಯಿಸುತ್ತಿರುವಾಗಲೇ ಹೃದಯಾಘಾತದಿಂದ ಸುಬ್ಬಯ್ಯ ನಾಯಡು ನಿಧನರಾದರು. ಅಭಿನಯದ ಅನುಪಮ ತಾರೆ ಕಳಚಿತು. ಅವರ ತಾರಾಪತ್ನಿ ಲಕ್ಷ್ಮಿಬಾಯಿ. ಮೂಕಿ ಚಿತ್ರದ ಸ್ಟಾರ್ ಎನ್ನಿಸಿಕೊಂಡಿದ್ದರು. ಚಿತ್ರರಂಗದಲ್ಲಿ ಕೂಡ ಮಹತ್ತರ ಪಾತ್ರಗಳನ್ನು ಅಭಿನಯಿಸಿದ್ದರು. ಮೊದಲ ಮಡದಿ ವೆಂಕಟಮ್ಮ ಗಂಡನ ಸಾವಿನ ಸುದ್ದಿ ಕೇಳಿದ ಕೂಡಲೇ ಸಾವನ್ನಪ್ಪಿದರು. ಈ ದಂಪತಿಗಳ ಜೋಡಿ ಪಾರ್ಥಿವ ಶರೀರದ ಮೆರವಣಿಗೆ ನೋಡಿ ಕಣ್ಣೀರು ಸುರಿಸದವರೇ ಇಲ್ಲ. ಸುಬ್ಬಯ್ಯ ನಾಯಡು ಅವರ ಮಗ ಲೋಕೇಶ್ ಕನ್ನಡ ಚಿತ್ರರಂಗದ ಪ್ರಮುಖ ಕಲಾವಿದರಾಗಿದ್ದರು. ಸೊಸೆ ಗಿರಿಜಾ ಲೋಕೇಶ್, ಮೊಮ್ಮಕ್ಕಳಾದ ಸೃಜನ್ ಲೋಕೇಶ್, ಪೂಜಾ ಚಿತ್ರರಂಗದಲ್ಲಿ ಹಿರಿಯ ಪರಂಪರೆಯನ್ನು ಮುಂದುವರಿಸಿದ್ದಾರೆ.

ಮುಖಭಾವದಲ್ಲೇ ಹೊಸ ಸಾಧ್ಯತೆ ನೀಡುವ ಕ್ರಮ, ಸಂಭಾಷಣೆ ಹೇಳುವ ಶೈಲಿ, ನಡಿಗೆಯ ಗತ್ತು ಎಲ್ಲವೂ ಸುಬ್ಬಯ್ಯ ನಾಯಡು ಅವರಿಂದ ನಾಯಕ ಪಾತ್ರಕ್ಕೆ ಮಾದರಿಯಾಗಿ ಬಂದಿತು. ಅವರ ಮಗಳು ಬಂಗಾರಮ್ಮ ತಂದೆಯ ಕುರಿತು ‘ನಟ ರತ್ನ’ಎನ್ನು ಕೃತಿಯನ್ನು ಬರೆದಿದ್ದಾರೆ. ಅದು ಒಂದು ರೀತಿಯಲ್ಲಿ ರೂಪಕ ಕೂಡ ಹೌದು.

ಡಾ.ರಾಜ್ ಕುಮಾರ್ ಕೊನೆಯವರೆಗೂ ಸುಬ್ಬಯ್ಯ ನಾಯಡು ಅವರ ಮಾದರಿಯಿಂದ ತಾನು ಚಿತ್ರನಟನಾಗಿ ಬೆಳೆದೆ ಎಂದು ಹೇಳಿ ಕೊಳ್ಳುತ್ತಿದ್ದರು.

Like Us, Follow Us !

121,079FansLike
1,815FollowersFollow
1,346FollowersFollow
1,650SubscribersSubscribe

Trending This Week