29.5 C
Bangalore, IN
Monday, March 18, 2019
Home ಸಿನಿಮಾ ನ್ಯೂಸ್ ಸಿನಿಮಾ ಇತಿಹಾಸ

ಸಿನಿಮಾ ಇತಿಹಾಸ

ಉಪೇಂದ್ರ ಹೊಸ ಸಿನಿಮಾಕ್ಕೆ ಶುಭ ಮಹೂರ್ತ !!

ವಿಜಯಲಕ್ಷ್ಮಿ ಅರಸ್ ಬ್ಯಾನರ್ ಅಡಿಯಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ –  ಡಿ೦ಪಲ್ ಕ್ವೀನ್ ರಚಿತಾ ರಾಮ್ ಮುಖ್ಯ ಭೂಮಿಕೆಯಲ್ಲಿರುವ ಹೊಸ ಚಿತ್ರದ ಮಹೂರ್ತ ಇಂದು ನೆರವೇರಿದೆ .

20161212_123007uppi-pooje

ಕಂಠೀರವ ಸ್ಟುಡಿಯೋದಲ್ಲಿ ಅದ್ದೂರಿ ಮಹೂರ್ತ

ಇನ್ನೂ ಹೆಸರಿಡದ ವಿಜಯಲಕ್ಷ್ಮಿಯವರ ಅರಸ್ ಅವ್ರ ಕನಸಿನ ಚಿತ್ರದ ಮಹೂರ್ತಕ್ಕಾಗಿ ಬೃಹತ್ ಶಿವಲಿಂಗ ನಿರ್ಮಾಣವಾಗಿತ್ತು. ಮಂತ್ರ ಘೋಷದೊಂದಿಗೆ ಪ್ರಾರಂಭವಾದ ಪೂಜೆಗೆ ಚಿತ್ರ ತಂಡದ ಪ್ರಮುಖರು, ಹಿತೈಷಿಗಳು ಸಡಗರದಿಂದ ಭಾಗವಹಿಸಿದರು. ನಿರ್ಮಾಪಕಿ ವಿಜಯಲಕ್ಷ್ಮಿ ಕ್ಲಾಪ್ ಮಾಡಿದ್ರು.

20161212_103530

ಉಪೇಂದ್ರ ರಚಿತಾ ರಾಮ್ ಶಿವಲಿಂಗಕ್ಕೆ ಪುಷ್ಪಾರ್ಚನೆ ಮಾಡುವ ಮೊದಲ ದೃಶ್ಯ ಸೆರೆ ಹಿಡಿಯಲಾಯಿತು .

20161212_104309

ರಿಯಲ್ ಸ್ಟಾರ್ ರಿಯಲ್ ಟಾಕ್ !!

20161212_152112-1

ಇದು ಒಂಥರಾ ಬುದ್ದಿವಂತ, ರಕ್ತಕಣ್ಣೀರು ಕ್ಯಾಟಗರಿಗೆ ಸೇರಿದ ಸಿನಿಮಾ.ವಿಡಂಬನೆ ಇರೋವಂಥ ಸಿನಿಮಾ.ಒಳ್ಳೆ ಸಬ್ಜೆಕ್ಟ್ ಇದೆ. ಸ್ಕ್ರಿಪ್ಟ್ ಕೆಲಸದಲ್ಲಿ ನಾನು ಸ್ವಲ್ಪ ಮಟ್ಟಿಗೆ ತೊಡಗಿಸಿ ಕೊಳ್ತೀನಿ. ಸ್ವಲ್ಪ ಕಾಲೆಳೆಯುವ ಸಿನಿಮಾನೇ.

ಹೊಸ ಸಿನಿಮಾ ಉತ್ಸಾಹದಲ್ಲಿ ಡಿ೦ಪಲ್ ರಾಣಿ ರಚಿತಾ

ಉಪೇಂದ್ರ ಅವರ ಸಿನಿಮಾ ನೋಡ್ತಾ ಬೆಳೆದವಳು ನಾನು. ಅವರ ಜೊತೆ ಅಭಿನಯಿಸ್ತಾ ಇರೋ ಮೊದಲ ಸಿನಿಮಾ ಇದು. ತುಂಬಾ ಖುಷಿಯಲ್ಲಿದ್ದೇನೆ. ಪಾತ್ರವು ಚೆನ್ನಾಗಿದೆ. ಟ್ರಡಿಷನಲ್ ಹುಡುಗಿ . ಸ್ಕೂಲ್ ಯುನಿಫಾರ್ಮ್ ಹಾಕ್ಕೊಳ್ಳೋ ಸನ್ನಿವೇಶಾನು ಇದೆ. ಉಪೇಂದ್ರ ಅವ್ರ ಜೊತೆ ನಟಿಸಬೇಕಾದ್ರೆ ಪಾತ್ರ ಸ್ಟ್ರಾಂಗ್ ಅನ್ನೋ ಆಸೆ ಇತ್ತು. ಅಂಥಾ ಅವಕಾಶ ಈ ಹೊಸ ಚಿತ್ರದಲ್ಲಿ ಸಿಕ್ಕಿದೆ. ಕಥೆ ತುಂಬ ಚೆನ್ನಾಗಿದೆ.

 ವಿಜಯಲಕ್ಷ್ಮಿ ಮೊದಲ ಕನಸು 

ನಿರ್ಮಾಪಕಿ ವಿಜಯಲಕ್ಷ್ಮಿ ಅರಸ್ ಕಂಠೀರವ ಸ್ಟುಡಿಯೋ ಛೇರ್ಮನ್ ಆಗಿದ್ದವರು . ಇದು ಅವರ ಮೊದಲ ಚಿತ್ರ . ಕಥೆ -ಚಿತ್ರಕಥೆಯೂ ಅವರದ್ದೇ . ಅವರೇ ಹೇಳಿದಂತೆ ಇದು ಅವರ ಕನಸಿನ ಸಿನಿಮಾ. ಚಿಕ್ಕಪ್ಪ ಕೆಂಪರಾಜ ಅರಸ್ ಸಿನಿಮಾ ಮಾಡುವುದನ್ನು ನೋಡುತ್ತಾ ಬೆಳೆದ ವಿಜಯಲಕ್ಷ್ಮಿಯವರಿಗೆ 12 ವರುಷದ ಬಾಲ್ಯದಲ್ಲೇ ತಾನೂ ಒಂದು ಸಿನಿಮಾ ಮಾಡಬೇಕು ಅನ್ನುವ ಆಸೆ ಹುಟ್ಟಿಕೊಂಡಿತ್ತಂತೆ. ಅದೀಗ ನನಸಾಗುವ ಘಳಿಗೆ ಕೂಡಿ ಬಂದಿದೆ. ತಾವು  ಬರೆದಿರುವ ಕಥೆಗೆ ಉಪೇಂದ್ರ ಅವರಲ್ಲದೆ ಮತ್ಯಾರು ಸೂಕ್ತ ಅಲ್ಲ . ಅವರು ಅಭಿನಯಿಸಿದರೆ  ಮಾತ್ರ ಕಥೆಗೆ ನ್ಯಾಯ ಒದಗಿಸುವುದು ಸಾಧ್ಯ. ಜೊತೆಗೆ ರಚಿತಾ ರಾಮ್ ಸೌಮ್ಯ ಸ್ವಭಾವದ ಪಾತ್ರಕ್ಕೆ ಸರಿ ಹೊಂದುತ್ತಾರೆ, ಮುದ್ದಾದ ಹುಡುಗಿ  ಅನ್ನುವ ಕಾರಣಕ್ಕೆ ಆಯ್ಕೆ ಮಾಡಿಕೊಂಡಿದ್ದಾರೆ . ಇದು ಇಡೀ ಕುಟುಂಬ ಕುಳಿತು ನೋಡುವಂತ ಚಿತ್ರವಾಗಿ ನಿಮ್ಮ ಮುಂದೆ ಬರಲಿದೆಯಂತೆ.

ನಿರ್ದೇಶಕ ಮಾದೇಶ್ ಮಾತಿಗಿಳಿದಾಗ 

ನನ್ನ ಹಲವು ಚಿತ್ರಗಳನ್ನು ಜನ ಮೆಚ್ಚಿಕೊಂಡಿದ್ದಾರೆ. ಇದು ಕೂಡ ನಮ್ಮ ಜನರೆಲ್ಲಾ ಖುಷಿಯಿಂದ ನೋಡುವ ಸಿನಿಮಾ ಆಗಲಿದೆ. ಕಮರ್ಷಿಯಲ್ ಚಿತ್ರ. ಒಳ್ಳೆಯ ದಿನ ಇದೆ ಅನ್ನೋ ಕಾರಣಕ್ಕೆ ಮಹೂರ್ತ ಮಾಡಿದ್ದೇವೆ. ಇನ್ನು ಒಂದೆರಡು ತಿಂಗಳು ಸ್ಕ್ರಿಪ್ಟ್ ಕೆಲಸವಿದೆ. ನಿರ್ಮಾಪಕಿ ವಿಜಯಲಕ್ಷ್ಮಿ ಅವರದ್ದೇ ಕಥೆ . ಎಂ ಎಸ್ ರಮೇಶ್ , ಕೆ ವಿ ರಾಜು ನಮ್ಮ ಹೀರೋ ಉಪೇಂದ್ರ ಅವರು ಸಂಭಾಷಣೆ ಕೆಲಸದಲ್ಲಿ ಸೇರಿಕೊಳ್ಳುತ್ತೇವೆ. ಇದು ಉಪೇಂದ್ರ ಅವರ ಜೊತೆ ನನ್ನ ಮೊದಲ ನಿರ್ದೇಶನ . ಮನೋರಂಜನೆಯ ಜೊತೆ ಸಂದೇಶ ಇದ್ದೆ ಇರತ್ತೆ. ಉಪೇಂದ್ರ ಟಿಪಿಕಲ್ ಸ್ಟೈಲ್ ಸೇರಿಸಿ ಹೊಸದನ್ನೂ ಕೊಡ್ತೀವಿ. ದಸರಾ ಹಬ್ಬಕ್ಕೆ ತೆರೆಗೆ ತರುವ ಯೋಜನೆ ಇದೆ.

ಹೊಸಚಿತ್ರದ ಕ್ಯಾಮರಾ ಹೊಣೆ ರಾಜೇಶ್ ಕಟ್ಟಾ . ಎಡಿಟರ್ ಕೆ ಎಂ ಪ್ರಕಾಶ್ ,ಅಸೋಸಿಯೇಟ್ ಡೈರೆಕ್ಟರ್ ಲಿಂಗರಾಜ್ , ಕಾರ್ಯಕಾರಿ ನಿರ್ಮಾಪಕರು ಎ ಕೇಶವ,ಎ ನರಸಿಂಹ, ಮಂಜುನಾಥ

ಅದ್ದೂರಿಯಾಗಿ ನೆರವೇರಿದ ಹೊಸ ಚಿತ್ರದ ಮಹೂರ್ತಕ್ಕೆ ಆಗಮಿಸಿದ ವಾಣಿಜ್ಯಮಂಡಳಿ ಅಧ್ಯಕ್ಷ ಸಾ ರಾ ಗೋವಿಂದು, ಚಿನ್ನೇಗೌಡರು ಮತ್ತಿತರರು ಶುಭ ಕೋರಿದರು .

 

ಕೆನಡಾ ಸೇರಿದರು ಕಾಡುವ “ನಟಸಾರ್ವಭೌಮ”ನ ನಂಟು

ಒಂದು ದೇಶ ಅಥವಾ ನಾಡು ಅಂದರೆ ಅದು ಕೇವಲ ಗಡಿರೇಖೆಗಳ ನಡುವೆ ಹರಡಿಕೊಂಡಿರುವ  ಒಂದಷ್ಟು ನೆಲ ಮಾತ್ರ  ಅಲ್ಲ !! ಅದು ,ವಾಸ್ತವವಾಗಿ ಆ ಒಂದು ಪ್ರದೇಶದ ಇತಿಹಾಸ, ಭಾಷೆ , ನಂಬಿಕೆಗಳು, ಅದರದೇ ಆದ ಜನಪದ, ಕಲೆ ,ಉಡುಪು ,ಆಹಾರ ಪದ್ದತಿ, ಪೂಜೆ , ಹಬ್ಬ ಹರಿದಿನ,  ಜಾತ್ರೆ  ಇತ್ಯಾದಿ ಆಚರಣೆಗಳು, ಮನುಷ್ಯಸಂಬಂಧಗಳ ಸ್ವರೂಪಗಳು , ಇಂಥ ಎಷ್ಟೋ   ಸೂಕ್ಷ್ಮ ಹಾಗೂ ಮಹತ್ವದ ಸಂಗತಿಗಳ  ಸಮ್ಮಿಲನದಿಂದ  ಹೊರಹೊಮ್ಮುವ ಒಂದು ನಿರ್ದಿಷ್ಟ “ಸಂಸ್ಕ್ರುತಿ” ಅನ್ನುವುದರ ಒಟ್ಟಾರೆ ಹೆಸರು  !  ” ದೇಶಮಂಟೆ ಮಟ್ಟಿ ಕಾದುರಾ ”  ! (ದೇಶವೆಂದರೆ ಬರೀ ಮಣ್ಣಲ್ಲವೋ !)ಅನ್ನುವ ತೆಲುಗಿನ ಖ್ಯಾತ ಕವಿಯೊಬ್ಬ ಇದೆಲ್ಲವನ್ನೂ ಒಂದೇ ಮಾತಿನಲ್ಲಿ ಎಷ್ಟು ಚೆನ್ನಾಗಿ ಹೇಳಿದ್ದಾನೆ ನೋಡಿ !!
ಹಾಗಾಗಿ , ಯಾವುದೇ ಒಂದು ನಾಡಿನ /ದೇಶದ  , ಸಾಹಿತ್ಯ ಸಂಗೀತ  ನೃತ್ಯ ನಾಟಕ ಸಿನಿಮಾ ಮೊದಲಾದ ಕಲಾ ಪ್ರಕಾರಗಳ ಬೇರುಗಳು ಅದರ ಸಂಸ್ಕ್ರುತಿಯಲ್ಲಿ   ಮಾತ್ರವೇ ಅಡಗಿರುವುದು , ಇರಲು ಸಾಧ್ಯವಾಗವುದು   ಇದೆಲ್ಲಾ ಸಹಜ ಸತ್ಯವೇ ತಾನೆ ?
ಆವೆಲ್ಲದರಲ್ಲಿ ಈ ಸಿನಿಮಾ ಅನ್ನುವ ಮಾಧ್ಯಮ, ತನ್ನ ಅತಿ  ಹೆಚ್ಚು ಜನರನ್ನು ತಲುಪುವ ಶಕ್ತಿ, ತನ್ನ ವ್ಯಾಪ್ತಿ, ಉಂಟುಮಾಡುವ ಪರಿಣಾಮ, ಒದಗಿಸುವ ಮನರಂಜನೆ ಈ ಎಲ್ಲ ಕಾರಣಗಳಿಂದ , ಉಳಿದೆಲ್ಲ ಮಾಧ್ಯಮಗಳಿಗಿಂತ ಅತ್ಯಂತ ಹೆಚ್ಚು ಪರಿಣಾಮಕಾರಿ ಹಾಗೂ ಪ್ರಭಾವಶಾಲೀ ಮಾಧ್ಯಮ ಅನ್ನಿಸಿಕೊಳ್ಳುತ್ತದೆ.! ಅದಕ್ಕೇ ಒಂದು ಸಿನಿಮಾ, ಆಯಾ ಕಾಲಘಟ್ಟದ ಬದುಕು, ಮನುಷ್ಯ ಸಂಬಂಧಗಳು, ಸಾಮಾಜಿಕ ನಂಬಿಕೆ ಮತ್ತು ಆಚರಣೆಗಳು ಇವೆಲ್ಲಕ್ಕೂ ಹಿಡಿದ ಕನ್ನಡಿ ಅನ್ನುವ ಒಂದು  ಮಾತಿದೆ !
ಈ ಎಲ್ಲ ಹಿನ್ನೆಲೆಯಲ್ಲಿ ನೋಡಿದಾಗಲಷ್ಟೇ , ಆಯಾ ಕಾಲಘಟ್ಟದ ಚಲನ ಚಿತ್ರ  ನಿರ್ಮಾಪಕರು , ಕಥಾ ಲೇಖಕರು, ಸಂಭಾಷಣೆಕಾರರು, ಸಂಗೀತ ಸಂಯೋಜಕರು, ಗೀತರಚನಕಾರರು, ಎಲ್ಲಕ್ಕೂ ಮುಖ್ಯವಾಗಿ ಆ ಚಿತ್ರಗಳ ಸೂತ್ರಧಾರರಾಗಿದ್ದ ನಿರ್ದೇಶಕರುಗಳು ,ಆ ಪಾತ್ರಗಳನ್ನು ತೆರೆಯಮೇಲೆ ಜೀವಂತಗೊಳಿಸುತ್ತಿದ್ದ ನಾಯಕ ನಟ ನಟಿಯರು , ಪೋಷಕ ನಟ ನಟಿಯರು ಹೀಗೆ ಇವರೆಲ್ಲರ ಪಾತ್ರ ಎಷ್ಟು ಮಹತ್ವದ್ದು ಅನ್ನುವುದು ಅರಿವಾಗುತ್ತದೆ ! ಹೀಗಾಗಿ , ಕಥಾನಾಯಕನ/ನಾಯಕಿಯ ಪಾತ್ರ ವಹಿಸುವ ನಟ ಅಥವಾ ನಟಿ ,ಅಥವಾ ಯಾವುದೇ  ಪೋಷಕಪಾತ್ರವನ್ನು ವಹಿಸುವ ನಟ ನಟಿಯರಿಗೆ , ಪ್ರತಿಭೆಯ ಜೊತೆಗೆ , ಆ ಪಾತ್ರವನ್ನು ಅದರ ಸಾಮಾಜಿಕ ಆರ್ಥಿಕ ಹಾಗೂ ಸಾಂಸ್ಕೃತಿಕ ನೆಲೆಗಟ್ಟಿನಲ್ಲಿ ಗ್ರಹಿಸಲು ಬೇಕಾಗುವ ಆ ಒಂದು ವಿಶಿಷ್ಟ ವ್ಯಕ್ತಿತ್ವ , ನೈಜ ಬದುಕಿನ ದರ್ಶನ ,ಅನುಭವ , ಇವೆಲ್ಲವೂ  ಇರಬೇಕಾದದ್ದು ಅವಶ್ಯ ಹಾಗೂ ಅನಿವಾರ್ಯ ಅನ್ನಿಸಿಕೊಳ್ಳುತ್ತದೆ !! ! ಆ ಗ್ರಹಿಕೆಯಿಲ್ಲದೆ ಹೋದರೆ ,ತನ್ನಲ್ಲಿ ಎಷ್ಟೇ ಪ್ರತಿಭೆಯಿದ್ದರೂ , ಆ  ಪಾತ್ರವೇ ಆಗಿಬಿಡುವ   ಪರಾಕಾಯಪ್ರವೇಶದಂಥ ಆ ನಿರ್ದಿಷ್ಟ ಪ್ರಕ್ರಿಯೆ , ವಿಫಲವಾಗಿ ಹೋಗುತ್ತದೆ !
ಈ ಕೋನದಿಂದ ನೋಡಿದಾಗ  ನಮ್ಮ ಚಲನಚಿತ್ರೋದ್ಯಮವನ್ನು  1954 ರಲ್ಲಿ ಪ್ರವೇಶಿಸಿ, ನಂತರ ಸತತ ಐದು ದಶಕಗಳ ಕಾಲ  ,ತನ್ನ ಅಪ್ರತಿಮ ಪ್ರತಿಭೆಯಿಂದ  ವೈವಿಧ್ಯಮಯ ಪಾತ್ರಗಳನ್ನು ಅತ್ಯಂತ ಸಮರ್ಥವಾಗಿ ನಿರ್ವಹಿಸಿದ ರಾಜ್ಕುಮಾರ್  ಅನ್ನುವ  ಒಬ್ಬ ನಟ  ,  ಕನ್ನಡ ಸಂಸ್ಕ್ರುತಿಗೆ ನೀಡಿದ ಕೊಡುಗೆ ಎಷ್ಟು ಅಮೂಲ್ಯ ಅನ್ನುವ ಸಂಗತಿ ಅರ್ಥವಾಗುತ್ತದೆ ! .
ರಾಜ್ಕುಮಾರ್ ಅವರ  ‘ ವ್ರುತ್ತಿಜೀವನದ ಅವಧಿ ‘ , ಮತ್ತು  ನಮ್ಮ ಕನ್ನಡದ ಶ್ರೇಷ್ಟ ಚಲನಚಿತ್ರ ನಿರ್ಮಾಪಕರು ,  ಸಾಹಿತಿಗಳು, ಸಂಭಾಷಣೆಕಾರರು, ಗೀತ ರಚನಕಾರರು, ಸಂಗೀತ ನಿರ್ದೇಶಕರುಗಳು, ಮತ್ತು ಎಲ್ಲಕ್ಕೂ ಮಖ್ಯವಾಗಿ  ಶ್ರೇಷ್ಠ ದರ್ಜೆಯ   ಚಿತ್ರನಿರ್ದೇಶಕರುಗಳು ಇದ್ದ ಆ ಅವಧಿ ,  ಈ ಎರಡೂ ಒಟ್ಟುಗೂಡಿದ್ದರಿಂದಲೇ  , ಅದು   ರಾಜ್ಕುಮಾರ್ ಪಾಲಿಗೂ ಮತ್ತು ಮತ್ತು ಕನ್ನಡ ಸಿನಿಮಾ ಪ್ರೇಕ್ಷಕರ ಪಾಲಿಗೂ ಸುವರ್ಣಯುಗ ಅನ್ನಿಸಿಕೊಳ್ಳಲು  ಸಾಧ್ಯವಾಯಿತು !
ಈ  ರಾಜ್ಕುಮಾರ್ , ಕನ್ನಡ ಚಿತ್ರರಂಗದ ಸುವರ್ಣ ಯುಗವಾದ 50 ರಿಂದ 90 ರ ದಶಕದ ಆರಂಭದವರೆಗೂ ಮೆರೆದ  ನಂಬರ್ ಒನ್ ನಾಯಕ ನಟ ಆಗಿದ್ದು ಆಕಸ್ಮಿಕವಲ್ಲ ! ಯಾಕೆಂದರೆ ,  ಆ ಐದು ದಶಕಗಳಲ್ಲಿ ಕನ್ನಡ ಚಿತ್ರರಂಗ ,  ಭಕ್ತಿಪ್ರಧಾನ, ಪೌರಾಣಿಕ, ಐತಿಹಾಸಿಕ, ಜಾನಪದ, ಸಾಮಾಜಿಕ , ಕೌಟುಂಬಿಕ ಹೀಗೆ ಎಲ್ಲ ಬಗೆಯ ಚಿತ್ರಗಳನ್ನು  ತಯಾರಿಸುತ್ತಿತ್ತು ! ಆ ಸಿನಿಮಾಗಳು ನಮ್ಮ ನಾಡಿನ ಕನ್ನಡತನವೆಂಬ ಒಂದು ನಿರ್ದಿಷ್ಟ  ಸಂಸ್ಕೃತಿಯ ಸೊಗಡಿನಿಂದ ಕೂಡಿರುತ್ತಿದ್ದವು ! ಆ ಕಥೆಗಳಾಗಲೀ ಪಾತ್ರಗಳಾಗಲೀ ಈ ಮಣ್ಣಿನಿಂದ ನೇರ ಹುಟ್ಟಿದಂತೆ ಇರುತ್ತಿದ್ದವು . ಅದೇ ಸಮಯಕ್ಕೆ ಸರಿಯಾಗಿ  ,ಈ ಎಲ್ಲ ವೈವಿಧ್ಯಮಯ ಪಾತ್ರಗಳನ್ನೂ ಅತ್ಯಂತ ಸಮರ್ಥವಾಗಿ ನಿರ್ವಹಿಸುವ ದೈತ್ಯ ಪ್ರತಿಭೆ , ರಾಜ್ಕುಮಾರ್ ಅನ್ನುವ ಆ ಒಬ್ಬ ನಟನಲ್ಲಿ ಇತ್ತು !! ! ಹೀಗೆ ,  ಈ ಎರಡೂ  ಸಂಗತಿಗಳ ಸಂಗಮದ ಫಲವಾಗಿ ಐದು ದಶಕಗಳ ಕಾಲ ,ಲೆಕ್ಕವಿಲ್ಲದಷ್ಟು   ಅದ್ಭುತ ಸಿನಿಮಾಗಳನ್ನು ನೋಡುವ ಭಾಗ್ಯವೂ ಕನ್ನಡ ಜನತೆಗೆ ಲಭ್ಯವಾಯ್ತು .
 ಅದರದೇ   ಆದ  ಒಂದು ವಿಶೇಷ ಮೌಲ್ಯ ವ್ಯವಸ್ಥೆಯ ಕಾರಣದಿಂದ   ,ಯಾವುದೇ ಸಮಾಜದ ಸಂಸ್ಕೃತಿಯಲ್ಲಿ, ಮಧ್ಯಮವರ್ಗದ ಸಂಸ್ಕೃತಿಗೆ  ಬಹಳ ಮಹತ್ವದ ಸ್ಥಾನವಿದೆ ! ಆ ಮಧ್ಯಮವರ್ಗದ ಮೌಲ್ಯಗಳಲ್ಲಿ ಅದ್ದಿ ತೆಗೆದಂಥ  ಸಾಮಾಜಿಕ ಚಿತ್ರಗಳ ಆ ಆದರ್ಶ ತಂದೆ ,ಮಗ ,ಅಣ್ಣ , ಸ್ನೇಹಿತ ,ಅಧಿಕಾರಿ , ಆದರ್ಶ ಪ್ರೇಮಿ ಇವೆಲ್ಲ ಪಾತ್ರಗಳಿಗೆ ರಾಜ್ಕುಮಾರ್ ಜೀವ ತುಂಬುತ್ತಿದ್ದ ಆ ಪರಿ ನಿಜಕ್ಕೂ ಮರೆಯಲಾಗದಂಥದ್ದು.
ಸುಖಜೀವನದ ಮಾನವ ಸಹಜ ಬಯಕೆಯ  ಕಾರಣದಿಂದ ,ಪಟ್ಟಣಕ್ಕೆ ವಲಸೆ ಬಂದು ,ಅಲ್ಲಿನ ಕೃತ್ರಿಮತೆಗೆ ಬಲಿಯಾಗಿ ಭ್ರಮನಿರಸನಹೊಂದುವ ,  “ದೂರದ ಬೆಟ್ಟ ‘  ಚಿತ್ರದ ಆ   ಮುಗ್ದ ಕಮ್ಮಾರ ಶಿವು , ಮುರಿದುಹೋದ ಅಕ್ಕನ ಬಾಳನ್ನು ಅವಳ ಸಂಸಾರವನ್ನು ಎತ್ತಿ ನಿಲ್ಲಿಸುವ ಛಲದಿಂದ ಹಳಿಯಲ್ಲೇ ನೆಲೆಗೊಂಡು ,ಕೃಷಿಕನಾಗಿ ದುಡಿದು , ಬಂಜರು ಭೂಮಿಯಲ್ಲಿ ಬಂಗಾರ ಬೆಳೆದು ,ಅಕ್ಕನ ಮಕ್ಕಳ ಬಾಳನ್ನು ಬೆಳಗಿ ಅಂತಿಮವಾಗಿ ಅವರ ಸಣ್ಣ ತನ , ಆರೋಪ , ದೂಷಣೆಯ  ಮಾತುಗಳಿಂದ  ನೊಂದು  ಮನೆಯಿಂದ ಶಾಶ್ವತವಾಗಿ ಎಲ್ಲಿಗೋ ಹೊರಟುಹೋಗುವ ಬಂಗಾರದ ಮನುಷ್ಯದ  ‘ರಾಜೀವ ‘ , ಈ ನೆಲದ ದೊರೆಗಳಾದ   ರಣಧೀರ ಕಂಠೀರವ , ಕೃಷ್ಣದೇವರಾಯ  ಪುಲಕೇಶಿ ಮಯೂರ , ಗಂಧದಗುಡಿಯ ಆ ಪ್ರಾಮಾಣಿಕ ಅಧಿಕಾರಿ ಆನಂದ್ , ಸಾಕ್ಷಾತ್ಕಾರದ  ಆದರ್ಶ ಮಮತಾಮಯಿ  ‘ಮಹೇಶ್ ‘ , ಹಾಲು ಜೇನುವಿನ ಆದರ್ಶ ಪ್ರೇಮಿ ‘ ರಂಗ ‘, ,ಸಮಯದ ಗೊಂಬೆಯ ಆದರ್ಶಮಯಿ ಅಣ್ಣ ,ಗುರು, ಎರಡು ಕನಸು ಸಿನಿಮಾದ ಭಗ್ನ ಪ್ರೇಮಿ ಲೆಕ್ಚರರ್  ರಾಮಚಂದ್ರರಾವ್ , ನಾನಿನ್ನ ಮರೆಯಲಾರೆಯ ಅದ್ಭುತ ಪ್ರೇಮಿ ಆನಂದ್ ,  ಸಾಹುಕಾರನ ಸಂಪತ್ತಿಗೆ ಸವಾಲೆಸೆದು ಗೆಲ್ಲುವ  ಸಂಪತ್ತಿಗೆ ಸವಾಲ್ ಸಿನಿಮಾದ , ಆ ನೇರ ನಡೆ ನುಡಿಯ ಪ್ರಾಮಾಣಿಕ  ಹಾಗೂ ಸ್ವಾಭಿಮಾನಿ ಭದ್ರ , ಒಂದೇ ಎರಡೇ ರಾಜ್ಕುಮಾರ್ ಜೀವಂತಗೊಳಿಸಿದ , ಮರೆಯಲಾರದ ಆ  ಪಾತ್ರಗಳು ! ಆ ಎಲ್ಲಾ ಪಾತ್ರಗಳಲ್ಲಿ   ವೇಷಭೂಷಣ , ಮಾತು , ಧೋರಣೆ , ಸಂಭಾಷಣೆಯ ಶೈಲಿ ,ಈ ಪಾತ್ರ ಪೋಷಣೆಯ ವಿವರಗಳಲ್ಲಿ  ಕನ್ನಡತನವೆನ್ನುವುದು ತುಂಬಿತುಳುಕುತ್ತಿತ್ತು .
ರಾಜ್ಕುಮಾರ್   ಆ ಪಾತ್ರಗಳನ್ನು ಎಷ್ಟುಚೆನ್ನಾಗಿ ಗ್ರಹಿಸುತ್ತಿದ್ದರು  ನೋಡಿ !    ಸೌಜನ್ಯದ ಮೂರ್ತಿಯಾಗಿದ್ದ  ಸತ್ಯಹರಿಶ್ಚಂದ್ರನಾಗಿದ್ದಾಗ   ಇರುವ ಬಾಡಿ ಲ್ಯಾನ್ಗ್ವೇಜ್ , ಮತ್ತು ಅದೇ ಹರಿಶ್ಚಂದ್ರ ಎಲ್ಲ ಕಳೆದುಕೊಂಡು      ಪುರಮಧ್ಯದಲ್ಲಿ ನಿಂತು ಹೆಂಡತಿಯನ್ನು  ಹರಾಜುಹಾಕುವಾಗ ,ಸ್ಮಶಾನ ಕಾಯುವ ಆಳಾಗಿ ತನ್ನ ದನಿಯೆದುರು ನಿಲ್ಲುವಾಗ ಅವರ ಬಾಡಿ ಲ್ಯಾನ್ಗ್ವೇಜ್  ಎಷ್ಟು ಅದ್ಭುತವಾಗಿ ಬದಲಾಗುತ್ತದೆ ಅಂದರೆ , ವಿನೀತ ಭಾವ ಅಂದರೆ ಏನು ,ಅದನ್ನ ನಟನೆಯಲ್ಲಿ ಹೇಗೆ ತೋರಿಸಬೇಕು ಅನ್ನುವುದಕೆ ಅದು ಉದಾಹರಣೆಯಂತಿದೆ !
ಎರಡು ಕನಸು ಸಿನಿಮಾದಲ್ಲಿ ಲೆಕ್ಚರರ್ ಆಗಿ ಕ್ಲಾಸ್ ರೂಮ್ ನಲ್ಲಿ ವಿದ್ಯಾರ್ಥಿಗಳ ಎದುರು ನಿಲ್ಲುವ ಭಂಗಿ ಯಾವ ನಿಜವಾದ ಲೆಕ್ಚರರ್ ಗೆ ಕಡಿಮೆಯಿದೆ ? ಒಲಗ ಊದುವವರು ಆ ಕೊಳವೆಯ ಬಾಯಿಗೆ ಇರುವ ಸಣ್ಣ ಪೀಪಿಯನ್ನು  ಆಗಾಗ  ಹೊರತೆಗೆದು ,ಅದರಲ್ಲಿ ಗಾಳಿ  ಊದಿ ಅದರೊಳಗೆ ಇರುವ ಎಂಜಲನ್ನುಹೊರತೆಗೆದು ಮತ್ತೆ ಅದನ್ನು ಓಲಗಕ್ಕೆ ಸಿಕ್ಕಿಸಿಕೊಂಡು  ಊದುತ್ತಾರಲ್ಲಾ ಆ ಸೂಕ್ಷ್ಮವನ್ನು ಕೂಡ ರಾಜ್ಕುಮಾರ್ ತಮ್ಮ ಅಭಿನಯದಲ್ಲಿ ಸೇರಿಸುತ್ತಾರೆಂದರೆ  ( ಶಹನಾಯಿ ನುಡಿಸುವ ಅಪ್ಪಣ್ಣ ನ ಪಾತ್ರದಲ್ಲಿ ) ಅದಿನ್ನೆಂಥ ಪಾತ್ರ ಗ್ರಹಿಕೆ ಆ ನಟನಿಗಿದ್ದಿರಬೇಕು !! ಇನ್ನು ಶಹನಾಯಿಯನ್ನು ಹಿಡಿದು ಕೂರುವ ಭಂಗಿ ,ನುಡಿಸುವಾಗ ಪಕ್ಕವಾದ್ಯದರ ಕಡೆ ನೋಡುವ ,ಮೆಲ್ಲಗೆ ದೇಹವನ್ನು ಊಗುವ ಆ ಅಭಿನಯ ಎಷ್ಟು ನೈಜ !!
ಅದೇ ಸಿನಿಮಾದಲ್ಲಿ ,ಅಪಣ್ಣನ ನುಡಿಸುವಿಕೆಯನ್ನು ಮೆಚ್ಚಿಕೊಂಡ  ಆ ಸಮಾರಂಭದ ಮುಖ್ಯ ಅತಿಥಿಯಾದ ಆ ಜಿಲ್ಲಾಧಿಕಾರಿಯು  ಊಟಕ್ಕೆ ಹೊರಡುವಾಗ – ” ನೀನೂ ಬಾ ಅಪ್ಪಣ್ಣ’  ಅಂತ ತಮ್ಮ ಜೊತೆ ಊಟಕ್ಕೆ ಕೂಡಲು ಕರೆದಾಗ  , ಎಷ್ಟೊಂದು ಸಂಕೋಚದಿಂದ ತನ್ನ ಸ್ಥಾನದ ಕೀಳರಿಮೆಯನ್ನು ತೋರಿಸುತ್ತಾ,ದೇಹವನ್ನು ಕುಗ್ಗಿಸಿ ,   ‘ ಇಲ್ಲ ತಾವು ದಯಮಾಡಿಸಿ ನಮ್ಮದು ಆಮೇಲೆ  ‘ ಅನ್ನುವ ಮಾತನ್ನು ಅಪ್ಪಣ್ಣನ ಪಾತ್ರದ ರಾಜುಕುಮಾರ್ ಆಡುತ್ತಾರೆ ಅಂದರೆ ,  ಅಯ್ಯೋ , ಒಲಗ ಊದುವ ಕೆಲಸದ ನಾನೆಲ್ಲಿ , ಜಿಲ್ಲಾಧಿಕಾರಿಯಾದ ನೀವೆಲ್ಲಿ ,ನಿಮ್ಮ ಜೊತೆ ಹೇಗೆ ಊಟಕ್ಕೆ ಕೂಡಲು ಸಾಧ್ಯ ಅನ್ನುವ  ಆ ಭಾವವನ್ನು ಕೇವಲ ಒಂದು ಸಾಲಿನ ಆ ಡೈಲಾಗ್ ನಲ್ಲಿ ರಾಜ್ಕುಮಾರ್ ತೋರಿಸುವ ಪರಿ ನಿಜಕ್ಕೂ ಅದ್ಭುತ ! ಒಬ್ಬ ನಟನಿಗೆ , ನಮ್ಮ ಸಮಾಜದ ಜಾತಿ ಅಂತಸ್ತು ಸಾಮಾಜಿಕ ಸ್ಥಾನಮಾನ ಇತ್ಯಾದಿ ವಾಸ್ತವಗಳ,ಜಾಡ್ಯಗಳ ,  ಒಟ್ಟಾರೆ ಈ ನೆಲದ ಸಂಸ್ಕೃತಿಯ ಆಳವಾದ ಹಾಗೂ  ಸೂಕ್ಷ್ಮವಾದ ಗ್ರಹಿಕೆಯಿದ್ದರೆ ಮಾತ್ರ ಅಂತ ನೈಜಾಭಿನಯ ,ಮತ್ತು ಪಾತ್ರವನ್ನು ತೆರೆಯಮೇಲೆ ಜೀವಂತಗೊಳಿಸುವಿಕೆ ಇವು ಸಾಧ್ಯ !
ಸಂಪತ್ತಿಗೆ ಸವಾಲ್ ಸಿನಿಮಾ . ಸಾಹುಕಾರನ ವಿರುದ್ಧ ಮಾತಾಡಿದ್ದಕ್ಕೆ ಅಣ್ಣನಿಂದ ಮನೆಯಿಂದ ಹೊರಹಾಕಲ್ಪಟ್ಟ ಭದ್ರ ನಿಗೆ ,ತಾಯಿ ಪ್ರೀತಿಯ ಅತ್ತಿಗೆ ,ಸಂಕಟ ಪಟ್ಟು ,ಕದ್ದು ಭದ್ರನ ಜೊತೆಗಾರನೊಬ್ಬನ ಮೂಲಕ ಊಟದ ಬುತ್ತಿ ಕಳಿಸಿರುತ್ತಾಳೆ . ಆಗ ಸ್ನೇಹಿತರ ಜೊತೆ ಕೂತಿದ್ದ ಭದ್ರನಿಗೆ ಅತ್ತಿಗೆಯ  ಆ ಮಮತೆ ಕಂಡು ಕಣ್ಣು ತುಂಬಿಬಂದು , ಬುತ್ತಿಯನ್ನು ಬಿಚ್ಚುತ್ತಾ  –  ‘ನಮ್ಮತ್ತಿಗೆಮ್ಮ ಅಂದ್ರೆ ದೇವ್ರು , ದೇವ್ರು  ಕಂಡ್ರೋ’  ಅನ್ನುವ ಮಾತು ಎಷ್ಟು ಹೃದಯಸ್ಪರ್ಷಿ !!
ಹೀಗೆ ಈ ಮಣ್ಣಿನಿಂದ ನೇರ ಹುಟ್ಟ್ಟಿದಂಥ ಆ ಎಲ್ಲ ಪಾತ್ರಗಳನ್ನೂ ಅತ್ಯಂತ ನೈಜವಾಗಿ ,ಸೂಕ್ತವಾದ  ಅಭಿನಯ ,ಭಾಷೆ ಮತ್ತು ದೇಹಭಾಷೆ ಇವುಗಳ ಮೂಲಕ ಅತ್ಯಂತ ಸಮರ್ಥವಾಗಿ ನಿರ್ವಹಿಸಿದ ರಾಜ್ಕುಮಾರ್ ಈ ನೆಲದ ಸಂಸ್ಕೃತಿಯ ರಾಯಭಾರಿಯೇ ಆಗಿಬಿಟ್ಟಿದ್ದರು ಅನ್ನುವುದು ಅತಿಶಯೋಕ್ತಿಯಾಗುವುದಿಲ್ಲ . ಕೆಲವಾರು ವರ್ಷಗಳ ಹಿಂದೆ, ನಮ್ಮ ಇಂಗ್ಲಿಷ್ ಪತ್ರಿಕೆಯೊಂದರ ಅಂಕಣಕಾರ , (Out look  ಪತ್ರಿಕೆಯ ಕಾಮತ್ ಅಥವಾ ಶೆನಾಯ್ ನೆನಪು ) ಆಗ ವಿಶ್ವ ಸುಂದರಿ ಪ್ರಶಸ್ತಿಗಳನ್ನು ಗೆದ್ದು ಭಾರೀ ಸುದ್ದಿಯಲ್ಲಿದ್ದ ಸುಶ್ಮಿತಾ ಸೇನ್ ಮತ್ತು ಐಶ್ವರ್ಯ ರೈ ಅವರನ್ನು ಹೊಗಳುವ ಭರದಲ್ಲಿ , ಅವರಿಬ್ಬರನ್ನು our cultural ambassadors ಅಂತ ಕರೆದಿದ್ದನ್ನು ಓದಿದಾಗ ನನಗೆ ಎಂಥ ಸಿಟ್ಟುಬಂದಿತ್ತು ಅಂತ ಈ ಲೇಖನ ಬರೆಯುವ ಈ ಕ್ಷಣ ನೆನಪಾಗುತ್ತಿದೆ ! ಅವರಿಬ್ಬರ ಸಾಧನೆಯನ್ನು ಗೌರವಿಸೋಣ . ಆದರೆ ,ಯಾವ ಭಾರತದ ಸಂಸ್ಕೃತಿಯ ರಾಯಭಾರವನ್ನು ಆ ಸ್ಪರ್ಧೆಯಲ್ಲಿ ಅವರು ಮಾಡಿದ್ದರೋ ?  ಒಂದು ಸಂಸ್ಕೃತಿ ಮತ್ತು ಅದನ್ನು ಪ್ರತಿನಿಧಿಸುವ  ಜನರ ಗುಣ ಪ್ರತಿಭೆಗಳು ಇವುಗಳ ಮಹತ್ವದ ಸ್ಪಷ್ಟ ಪರಿಕಲ್ಪನೆಯಿಲ್ಲದಿದ್ದರೆ  ಇಂಥ ಹಾಸ್ಯಾಸ್ಪದ ಮಾತು ಹುಟ್ಟದೆ ಇನ್ನೇನಾಗುತ್ತದೆ ?

Like Us, Follow Us !

120,521FansLike
1,826FollowersFollow
1,573FollowersFollow
4,234SubscribersSubscribe

Trending This Week