26.5 C
Bangalore, IN
Saturday, October 20, 2018

ಜೋಗಿಯ “ಸಾವಿನ” ಕಥೆ..

ಸಾವಿಲ್ಲದ ಜೀವಿ ಎಲ್ಲೂ ಇಲ್ಲ. ಆದರೂ ಸಾವನ್ನು ಮೆಟ್ಟಿ ಚಿರಂಜೀವಿಯಾಗುವ ಮನುಷ್ಯ ಪ್ರಯತ್ನ ನಿರಂತರ. ಅತಿಯಾದದ್ದು ಅಮೃತವಾದರೂ ವಿಷವೇ.. ಅಂತೆಯೇ ಆಯಸ್ಸು ಮಿತಿಮೀರಿದರೂ ನಾವು ಅನುಭವಿಸಬೇಕಾದ ಅನಾಹುತ, ದುರಂತ ಅಷ್ಟಿಷ್ಟಲ್ಲ. ಸಮಯಕ್ಕೆ ಸರಿಯಾಗಿ ಸತ್ತರೇನು ?ಸಾಯದಿದ್ದರೇನು? ಜೀವಂತಿಕೆಯಿಲ್ಲದ ಜೀವಿಯ ಜೀವಿತದ ಪಾಡೇನು ? ಎಲ್ಲವನ್ನು ಅವರೆಕಾಯಿ ಸುಲಿದಂತೆ ಬಿಡಿಬಿಡಿಯಾಗಿ ಬದುಕನ್ನು ಬಿಡಿಸಿ ತೋರಿದ್ದಾರೆ ಪತ್ರಕರ್ತ, ಸಾಹಿತಿ ಜೋಗಿ. ಕಾಲಾತೀತವಾದ, ಮತ್ತೆ ಮತ್ತೆ ಮೆಲುಕು ಹಾಕಬಹುದಾದ ಸಾವೆಂಬ ಪರಕೀಯನ ಜೊತೆ ಅಸಂಬದ್ಧ ಮಾತುಕತೆ ಇಲ್ಲಿ ಹರಡಿಕೊಂಡಿದೆ ಓದಿಕೊಳ್ಳಿ…

ನಾನು ಇವತ್ತು ರಾತ್ರಿ ಸಾಯಬಹುದು. ಅಥವಾ ನಾಳೆ ಬೆಳಗ್ಗೆ. ಇವತ್ತು ರಾತ್ರಿ ನಿದ್ದೆಯಲ್ಲಿ ಸತ್ತರೂ ಅದು ಲೋಕಕ್ಕೆ ಗೊತ್ತಾಗುವುದು ಬೆಳಗ್ಗೆಯೇ. ಸತ್ತವನಿಗೆ ಬೆಳಗ್ಗೆ ಸತ್ತರೂ ಒಂದೇ, ರಾತ್ರಿ ಸತ್ತರೂ ಒಂದೇ. ನರಳಾಡಿ ಸಾಯದಿದ್ದರಾಯಿತು ಅಷ್ಟೇ. ಅನಾಯಾಸೇನ ಮರಣಂ, ವಿನಾ ದೈನ್ಯೇನ ಜೀವನಂ.

ಸತ್ತು ಹೋದರಂತೂ ನೆಮ್ಮದಿ. ನಾಳೆ ಆಫೀಸಿಗೆ ಹೋಗಬೇಕಾಗಿಲ್ಲ. ಮತ್ತೆ ಅಕ್ಷರಮಾಲೆಯ ಒಂದೊಂದೇ ಅಕ್ಷರಗಳನ್ನು ಹೆಕ್ಕಿ ಅದನ್ನು ಆದಷ್ಟೂ ವಿನೂತನವಾಗಿ ಪೋಣಿಸುವುದಕ್ಕೆ ಹೆಣಗಾಡಬೇಕಿಲ್ಲ. ತರುಣ ಕವಿಯ ಕವಿತೆ ಓದಬೇಕಾಗಿಲ್ಲ. ಹಿರಿಯ ಕವಿಯ ಫೋನಿಗೆ ಕಿವಿಯಾಗಬೇಕಿಲ್ಲ. ಉಪ್ಪಿಟ್ಟು ತಿನ್ನಬೇಕಿಲ್ಲ, ನವಿಲು ಕಣ್ಣೀರುು ಹಾಕಿ ಮರಿಮಾಡುವ ಸುದ್ದಿ ಕೇಳಬೇಕಿಲ್ಲ. ಗೋವಿನ ಹಾಡು ತುಂಬ ಪ್ಯಾಥೋ ಅನ್ನಿಸಿ ಮರುಗಬೇಕಾಗಿಲ್ಲ.
ಹಾಗಂದುಕೊಳ್ಳುವುದು ಕೇವಲ ಸುಳ್ಳು. ಸಾಯುವುದಿಲ್ಲ ಅನ್ನುವುದು ದೇಹಕ್ಕೂ ಮನಸ್ಸಿಗೂ ಗೊತ್ತು. ನಿಜಕ್ಕೂ ಸಾಯುವ ಕಾಲ ಬಂದಾಗಲೂ ಹೀಗೇ ಯೋಚಿಸೋದಕ್ಕೆ ಸಾಧ್ಯವಾ? ಎಂಥಾ ತತ್ವಜ್ಞಾನವಾಗಲೀ, ಬೌದ್ಧಿಕತೆಯಾಗಲೀ, ವಿಚಾರವಾದವಾಗಲೀ ಬದುಕುವ ಅದಮ್ಯ ಆಸೆಗಿಂತ ದೊಡ್ಡದಲ್ಲ. ಬದುಕು ಅನ್ನುವುದು ಯಾವತ್ತೂ ಕ್ರಿಯಾಪದ. ಇನ್ನೊಬ್ಬರ ಬದುಕು ಮಾತ್ರ ನಾಮಪದ.

ಸಾವಿನ ಅಂಚಿಗೆ ಹೋಗಿ ಬಂದವರು ಬದಲಾಗಿದ್ದಾರೆ ಅಂತ ಕೇಳಿದ್ದೆ. ಇನ್ನೇನು ಸಾಯುತ್ತಾರೆ ಅಂದುಕೊಂಡವರು ಮತ್ತೆ ಬದುಕಿ ಬಂದು, ಜೀವನದ ಕುರಿತ ತಮ್ಮ ಧೋರಣೆಯನ್ನು ಬದಲಾಯಿಸಿಕೊಂಡು ಇನ್ನೇನೋ ಆಗಿದ್ದುಂಟು ಎಂದು ಓದಿದ್ದೆ. ಆದರೆ ಬದುಕನ್ನು ಬದಲಾಯಿಸುವ ಶಕ್ತಿ ಸಾವಿಗಿದೆ ಅನ್ನುವುದು ನನಗೆ ಖಾತ್ರಿಯಿಲ್ಲ. ಅದು ಕೇವಲ ಸ್ಮಶಾನ ವೈರಾಗ್ಯ ಅಷ್ಚೇ. ತೀರಾ ಎದೆ ನೋವು ಬಂದಾಗ, ಕೊಂಚ ಕೆಮ್ಮು ಜಾಸ್ತಿಯಾದಾಗ ಇನ್ನು ಸಿಗರೇಟು ಮುಟ್ಟುವುದಿಲ್ಲ ಎಂದು ಪ್ರಮಾಣ ಮಾಡಬಹುದು. ಅದು ಪ್ರಾಣಭಯದ ಪ್ರಮಾಣ ಅಷ್ಟೇ. ಮತ್ತೆ ಆರೋಗ್ಯ ಮರುಕಳಿಸಿದ ತಕ್ಷಣ ಎಲ್ಲ ದುರ್ಜನರೂ ಬಂದು ಸೇರುತ್ತಾರೆ. ಮತ್ತೆ ಅದೇ ಬದುಕು, ಅದೇ ನಗು, ಅದೇ ಸಂಭ್ರಮ.
ಆವತ್ತು ಹಾಗೆ ಮಲಗಿದ್ದೆ.
ದೇಹ ನನ್ನದು ಹೌದೋ ಅಲ್ಲವೋ ಅನುಮಾನವಿತ್ತು. ಯಾವತ್ತೂ ನನ್ನ ದೇಹ ಹೀಗೆ ವಿಚಿತ್ರವಾಗಿ ವರ್ತಿಸಿದ್ದೇ ಇಲ್ಲ. ಭಯಂಕರ ಕೈಕಾಲು ನೋವು ಎಂದು ಗೋಳಾಡುವವರನ್ನು ನೋಡಿದ್ದೆ. ಆ ನೋವು ಹೀಗಿರುತ್ತದೆ ಅನ್ನುವುದು ಗೊತ್ತಿರಲಿಲ್ಲ. ಎಲ್ಲಾ ನೋವುಗಳೂ ಅಷ್ಟೇ. ಅದರ ತೀವ್ರತೆಯ ಅರಿವಾಗುವುದು ಅದು ನಮ್ಮನ್ನು ಕಾಡಿದಾಗ ಮಾತ್ರ. ಬೇರೊಬ್ಬರ ನೋವು ನಮಗೆ ಸುದ್ದಿ ಮಾತ್ರ.

ಸಾಯುತ್ತಾ ಮಲಗಿದಾಗ ಏನೆಲ್ಲ ನೆನಪಾಗುತ್ತದೆ. ಉಪ್ಪಿನಂಗಡಿಯ ಗೆಳೆಯ ಆಶ್ರಫ್ ಸೂಟು ಹಾಕಿಕೊಂಡು ಅಬ್ಬರದಿಂದ ಓಡಾಡುವವರನ್ನು ನೋಡಿದಾಗೆಲ್ಲ ಹೇಳುತ್ತಿರುತ್ತಾನೆ: ಇವನು ಹೀಗೆ ಇಡೀ ಜಗತ್ತೇ ತನ್ನದು ಅಂತ ಓಡಾಡ್ತಾನಲ್ಲ. ಇವನ ಮೆದುಳಿನ ನರಮಂಡಲದ ಸೂಕ್ಷ್ಮಾತಿಸೂಕ್ಷ ನರವೊಂದು ಕೊಂಚ ಏರುಪೇರಾದರೆ, ಇದೇ ಮನುಷ್ಯ ಹಾಕಿಕೊಂಡ ಸೂಟು, ಕೋಟು ಕಿತ್ತೆಸೆದು ಬೆತ್ತಲೆಯಾಗಿ ಬೀದಿಯಲ್ಲಿ ಓಡಾಡೋದಿಲ್ವಾ. ಆದ್ರೂ ಈ ಜಂಬ ಯಾಕೆ ಮನುಷ್ಯನಿಗೆ ಅನ್ನೋದು ಅವನ ಪ್ರಶ್ನೆ.

ಜೀವವೂ ಅಷ್ಚೇ. ಯಾವಾಗ ದೇಹವನ್ನು ಬಿಟ್ಟು ಅಗಲುತ್ತದೋ ಗೊತ್ತಿಲ್ಲ. ಒಂದು ಕತೆಯಲ್ಲಿ ಒಬ್ಬಾತ ಪೇಟೆ ಬೀದಿಯಲ್ಲಿ ಅಡ್ಡಾಡುತ್ತಾ ಸಾವನ್ನು ನೋಡುತ್ತಾನೆ. ಸಾವಿನಿಂದ ಪಾರಾಗಬೇಕೆಂದು ತಕ್ಷಣವೇ ನಾಗಾಲೋಟದಿಂದ ಸಾಗುವ ಕುದುರೆಯನ್ನೇರಿ ನೂರಾರು ಮೈಲಿ ಸಾಗುತ್ತಾನೆ. ಸಾಕಷ್ಟು ದೂರ ಬಂದೆ ಎಂದು ನಿಟ್ಟುಸಿರುಡುತ್ತಿದ್ದಂತೆ ಅಲ್ಲಿ ಸಾವು ಹಾಜರಾಗುತ್ತದೆ.

ನನ್ನ ಯಜಮಾನನ ಅಪ್ಪಣೆಯ ಪ್ರಕಾರ ನಾನು ನಿನ್ನನ್ನು ಇಲ್ಲಿ ಸಂಧಿಸಬೇಕಾಗಿತ್ತು. ಆದರೆ ನೀನು ಬೆಳಗ್ಗೆ ಇಲ್ಲಿಂದ ತುಂಬಾ ದೂರದಲ್ಲಿದ್ದೆಯಲ್ಲ, ಹೇಗಿದು ಅಂತ ಯೋಚಿಸುತ್ತಿದ್ದೆ’ ಅನ್ನುತ್ತದೆ ಸಾವು. ಸಾವನ್ನು ಹುಡುಕಿಕೊಂಡು ಹೋಗುವುದು ಅಂದರೆ ಅದೇ.

ನಮ್ಮಲ್ಲಿ ಯಮವೇಗ ಎನ್ನುವ ಮಾತಿದೆ. ಯಮವೇಗ ಅನ್ನುವುದು ಯಮನ ವೇಗ ಇರಲಾರದು. ಅವನದೋ ಕೋಣ ವಾಹನ. ಕಂಬಳದಲ್ಲಿ ಕೋಣ ವೇಗವಾಗಿ ಓಡುತ್ತದೆ ನಿಜ. ಆದರೆ ಅದು ಅಂಥ ವೇಗವೇನೂ ಅಲ್ಲ. ಹೀಗಾಗಿ ಯಮವೇಗ ಅನ್ನುವುದು ಸಾವು ಜೀವವನ್ನು ಸೆಳೆದೊಯ್ಯುವ ವೇಗ ಇರಬಹುದೇ. ಅಥವಾ ವೇಗವಾಗಿ ಹೋಗುವವನು ಬೇಗ ಯಮಲೋಕ ಸೇರುವುದರಿಂದ ಆ ವೇಗವನ್ನು ಯಮವೇಗ ಅನ್ನುತ್ತಾರಾ? ಹಾಗೇ ಪ್ರಾಣವನ್ನು ಯಮ ಉರುಳೆಸೆದು ಕರೆದೊಯ್ಯುತ್ತಾನೆ ಅನ್ನುವುದೊಂದು ಪ್ರತೀತಿ. ಪ್ರಾಣಪಕ್ಷಿ ಹಾರಿಹೋಯಿತು ಅನ್ನೋದು ಮತ್ತೊಂದು ಉಕ್ತಿ. ಪ್ರಾಣಪಕ್ಷಿ ಯಾಕೆ ಹಾರಿಹೋಗುತ್ತದೆ. ಪ್ರಾಣ ಯಾಕೆ ಪಕ್ಷಿ? ಮತ್ಯಾರಿಗೋ ಪ್ರಾಣವೆಂಬುದು ಜ್ಯೋತಿ. ಅದು ಆ ಮಹಾಜ್ಯೋತಿಯನ್ನು ಸೇರುತ್ತದಂತೆ.

ಬದುಕಿರುವಾಗ, ನೆಮ್ಮದಿಯಾಗಿ ಬದುಕಿರುವಾಗ ಸಾವಿನ ಬಗ್ಗೆ ಮಾತಾಡುವುದಕ್ಕೆ ಸೊಗಸಾಗಿರುತ್ತದೆ. ಇತ್ತೀಚೆಗೆ ಶಿರಾಡಿ ಘಾಟಿಯ ಬಳಿ ಮರಕ್ಕೆ ಜೀಪು ಡಿಕ್ಕಿ ಹೊಡೆದು ಏಳೋ ಎಂಟೋ ಮಂದಿ ತೀರಿಕೊಂಡರಂತೆ. ಆ ಘಟನೆಗೆ ಪತ್ರಿಕೆಗಳು ಎಷ್ಟು ನೀರಸವಾಗಿ ಶೀರ್ಷಿಕೆ ಕೊಡುತ್ತವೆ ಅನ್ನುವುದನ್ನು ಗೆಳೆಯನೊಬ್ಬ ತಮಾಷೆಯಾಗಿ ವಿವರಿಸುತ್ತಿದ್ದ: ನಿಂತಿರುವ ಮರಕ್ಕೆ ಚಲಿಸುತ್ತಿದ್ದ ಜೀಪು ಡಿಕ್ಕಿ. ಇದನ್ನೇ ಬುದ್ಧಿಜೀವಿಗಳ ಮುಂದೆ ಹೇಳಿದರೆ ಜೀವವಿರೋಧಿ ಧೋರಣೆ ಅನ್ನುತ್ತಾರೆ. ಸಾವಿನ ಬಗ್ಗೆ ತಮಾಷೆ ನಿಷೇಧಿಸಲಾಗಿದೆ. ಸಾಯುವುದು ಸತ್ತವನ ಪಾಲಿಗೆ ಏನೋ ಎಂತೋ ಗೊತ್ತಿಲ್ಲ, ಬದುಕಿರುವವರ ಪಾಲಿಗೆ ಮಾತ್ರ ಅಂಥ ಆಹ್ಲಾದಕರ ಅನುಭವ ಅಲ್ಲ.

ಸತ್ತ ಮೇಲೆ ಏನಾಗುತ್ತೇವೆ ಅನ್ನುವ ಪ್ರಶ್ನೆಗೆ ಬದುಕಿರುವವರು ಉತ್ತರಿಸಲಾರರು, ಉತ್ತರಿಸುವುದಕ್ಕೆ ಸತ್ತವರು ಸಿಗುವುದಿಲ್ಲ. ಆದರೆ ದೆವ್ವಗಳನ್ನು ನೋಡಿದವರು, ದೆವ್ವಗಳ ಜೊತೆ ಮಾತಾಡಿದವರು ಯಾರೂ ಸತ್ತ ನಂತರ ಏನಾಗುತ್ತಾರೆ ಅಂತ ಕೇಳಿದ್ದು ವರದಿಯಾಗಿಲ್ಲ. ಸತ್ತ ನಂತರ ದೆವ್ವವಾಗುತ್ತಾರೆ ಅಂತ ದೆವ್ವಗಳು ಹೇಳಬಹುದು. ಆದರೆ ಎಲ್ಲರೂ ದೆವ್ವಗಳಾಗುವುದಿಲ್ಲ. ಪಾಪಿಗಳು ಮತ್ತೆ ಹುಟ್ಟುತ್ತಾರೆ ಅನ್ನುತ್ತದೆ ಪುರಾಣ. ಮತ್ತೆ ಹುಟ್ಟುವುದೇ ಪಾಪವಂತೆ. ಹುಟ್ಟದೇ ಇರುವುದು ಪುಣ್ಯ. ಪುಣ್ಯವಂತರು ದಿವ್ಯ ಸಾಯುಜ್ಯವನ್ನು ಸೇರುವತ್ತಾರಂತೆ. ಅವರು ಹುಟ್ಟುಸಾವುಗಳ ಚಕ್ರದಿಂದ ಬಿಡುಗಡೆ ಪಡೆಯುತ್ತಾರಂತೆ. ಹಾಗಿದ್ದರೆ ಹುಟ್ಟು ಇಲ್ಲದ ಸಾವೂ ಇಲ್ಲದ ಆ ಸ್ಥಿತಿ ಯಾವುದು. ಹುಟ್ಟದ ಹೊರತು ಇರುವುದು ಹೇಗೆ? ಇರದ ಮೇಲೆ ಅದು ಸ್ಥಿತಿ ಹೇಗಾಗುತ್ತದೆ. ಸ್ಥಿತಿಯೇ ಅಂದ ಮೇಲೆ ಹುಟ್ಟು ಇದೆ ಅಂತಾಯಿತಲ್ಲ. ಅಂದರೆ ಅದು ಸಾವಿಲ್ಲದ ಸ್ಥಿತಿಯೇ?
ಪ್ರಶ್ನೆಗಳು ಹೆಚ್ಚುತ್ತಾ ಹೋಗುತ್ತವೆ. ಉತ್ತರ ಸಿಗುವುದಿಲ್ಲ. ನಾಳೆಯ ಹಾಗೆ ಸಾವು ಕೂಡ ಅನೂಹ್ಯ. ಸಾವಿನ ಹಾಗೆ ನಾಳೆ ಕೂಡ ನಿಗೂಢ. ನಿನ್ನೆಗೆ ಸತ್ತು, ನಾಳೆಗೆ ಹುಟ್ಟದ ನಮ್ಮ ಇಂದಿನ ಬದುಕಿನಲ್ಲಿ ಯಾವುದು ಸತ್ಯ, ಯಾವುದು ಸುಳ್ಳು. ನಾಳೆಗಾಗಿ ಕಾಯುತ್ತಿರುವುದು ಕೂಡ ಬರೀ ನಿರೀಕ್ಷೆಯೇ. ಅದೂ ಪೂರ್ವಯೋಜಿತವೇ. ಪ್ರತಿ ಕ್ಷಣವೂ ನಮ್ಮನ್ನು ಗೋರಿಯತ್ತ ಕರೆದೊಯ್ಯುತ್ತಿರುತ್ತದೆ ಅನ್ನುವ ಮಾತು ನೆನಪಾಗುತ್ತದೆ.

ಅಮರತ್ವ ಮನುಷ್ಯನ ಮೂಲಭೂತ ಆಸೆ. ಆದರೆ ಅಂಥ ಅಮರತ್ವ ಎಂಥ ಸ್ಥಿತಿಯಲ್ಲಿ ನಮ್ಮನ್ನು ಸಮೀಪಿಸುತ್ತದೆ ಅನ್ನುವುದೂ ಮುಖ್ಯ. ಇಚ್ಛಾಮರಣಿ ಅನ್ನುವ ವರ ಭೀಷ್ಮನಿಗೆ ಶಾಪವೂ ಆಗಿತ್ತು. ಆತ ತನ್ನಿಚ್ಚೆ ಬಂದಾಗ ಸಾಯಬಹುದಾಗಿತ್ತು. ಆ ಹಿರಿಯ ಜೀವ ಸಾಯಬೇಕು ಎಂದು ಅನ್ನಿಸುವ ಹಾಗೆ ಅವನ ಮೊಮ್ಮಕ್ಕಳು ವರ್ತಿಸಿದರೇ? ಹಾಗೆ ಅವರು ವರ್ತಿಸುತ್ತಾರೆ ಅನ್ನುವುದು ವರ ಕೊಟ್ಟಾಕೆಗೆ ಗೊತ್ತಿತ್ತೇ? ಅಮರನಾಗು ಎಂದು ಹರಸಿದ್ದರೆ ಅದು ಮತ್ತಷ್ಟು ದೊಡ್ಡ ಶಾಪ ಆಗುತ್ತಿತ್ತೇ?

ಸಾವಿಲ್ಲದ ಅಶ್ವತ್ಥಾಮನನ್ನು ನೆನಪಿಸಿಕೊಳ್ಳಿ. ಅವನು ಚಿರಂಜೀವಿ ನಿಜ. ಆದರೆ ಚಿರಂಜೀವತ್ವದಿಂದ ಏನು ತಾನೇ ಸಾಧಿಸಲು ಸಾಧ್ಯವಾಗುತ್ತದೆ. ಮಕ್ಕಳಾಗಿದ್ದಾಗ ಹೇಗಿರುತ್ತೇವೋ ಬೆಳೆಯುತ್ತಾ ಹೋದಂತೆ ಹಾಗಿರುವುದಿಲ್ಲ. ಕ್ರಮೇಣ ನಮ್ಮ ಸುತ್ತಲಿನವರ ಪಾಲಿಗೆ , ಮಕ್ಕಳ ಪಾಲಿಗೆ, ಜಗತ್ತಿನ ಪಾಲಿಗೆ ನಾವು ಅಪ್ರಸ್ತುತರಾಗುತ್ತಾ ಹೋಗುತ್ತೇವೆ. ಹೀಗೆ ಅಪ್ರಸ್ತುತರಾಗುತ್ತಾ ಹೋಗುವುದೇ ಸಾವಲ್ಲವೇ. ಇನ್ನೂರು ವರುಷ ಬದುಕುತ್ತೀರಿ ಅಂತಿಟ್ಟುಕೊಳ್ಳಿ. ಆಗ ನಿಮ್ಮ ಓರಗೆಯ ಮಂದಿ ಹೊಸಬರಾಗಿರುತ್ತಾರೆ. ಅವರ ಜಗತ್ತೇ ಬೇರೆಯಾಗಿರುತ್ತದೆ. ಅವರ ಸಮಕಾಲೀನರು, ಮಿತ್ರರು ಯಾರ ಜೊತೆಗೂ ನಿಮಗೆ ಸಂವಹನ ಸಾಧ್ಯವಾಗುವುದಿಲ್ಲ. ಆ ಹೊತ್ತಲ್ಲಿ ಬದುಕಿದ್ದರೂ ಮಹಾತ್ಮಗಾಂಧಿಯ ಮೂರ್ತಿಯ ಹಾಗೆ ಜೀವಿಸಿರಬೇಕಾಗುತ್ತದೆ. ಎಲ್ಲರೊಂದಿಗಿದ್ದೂ ಎಲ್ಲರಂತಿರದೆ.

ಹೀಗಾಗಿ ಅಮರರಾಗಬೇಕು, ದೀರ್ಘಾಯುಷಿ ಆಗಬೇಕು ಅನ್ನುವ ಆಸೆ ಕೇವಲ ಭ್ರಮೆ ಮಾತ್ರ. ಅದರಿಂದ ಬಹಳ ಅನುಕೂಲಗಳೇನಿಲ್ಲ. ಕ್ರಮೇಣ ನಮ್ಮ ಆಯಸ್ಸೇ ನಮಗೆ ಭಾರವಾಗಿ, ನಮ್ಮ ಉಸಿರೇ ನಮಗೆ ಹೊರೆಯಾಗಿ ಯಾಕಾದರೂ ಬದುಕಿದ್ದೇವೋ ಅನ್ನಿಸತೊಡಗುತ್ತದೆ. ಬೇರೆಯವರ ಬಗ್ಗೆ ಹೀಗನ್ನಿಸುವುದಕ್ಕೂ ನಮ್ಮ ಬಗ್ಗೆಯೇ ಹೀಗನ್ನಿಸುವುದಕ್ಕೂ ಅಂಥ ವ್ಯತ್ಯಾಸವೇನಿಲ್ಲ.

ಬಾಲ್ಯದಲ್ಲಿ ತಮಾಷೆಯಾಗಿ ಆಮೇಲೆ ಭಯವಾಗಿ ಅದಾದ ಮೇಲೆ ನಿಗೂಢವಾಗಿ ಕಾಣುವ ಸಾವು, ಕ್ರಮೇಣ ಗೆಳೆಯನಂತೆ ಭಾಸವಾಗುತ್ತದೆ. ಎಲ್ಲೋ ಸಂಧಿಸಿದ ಹಳೆಯ ಮಿತ್ರನಂತೆ ತೋರುತ್ತದೆ. ತುಂಬ ದಿನದಿಂದ ಕರೀತಿದ್ದಾನೆ, ಒಂದ್ಸಾರಿ ಹೋಗಬೇಕು’ ಎಂದು ದೂರದಲ್ಲಿ ನೆಲೆಸಿರುವ ಮಿತ್ರನ ಕುರಿತು ಹೇಳುವಂತೆ ಸಾವಿನ ಕುರಿತೂ ಯೋಚಿಸಬಲ್ಲವರಾಗುತ್ತೇವೆ.
ಆದರೆ, ಎಪ್ಪತ್ತು ಸಮೀಪಿಸಿದ ನಂತರ ಮತ್ತೆ ಸಾವಿನ ಭಯ ಕಾಡುತ್ತದಾ? ನಿರಾಳವಾಗಿ ಬದುಕಿದ್ದವರು, ತೀರಾ ಇಳಿವಯಸ್ಸಿನಲ್ಲಿ ವಿಚಿತ್ರವಾಗಿ ವರ್ತಿಸುವುದನ್ನು ನೋಡಿದ್ದೇನೆ. ದಿನಾ ಡಾಕ್ಟರ ಹತ್ರ ಹೋಗೋಣ ಅಂತ ಗೋಳು ಹುಯ್ಕೋತಾರೆ ಅಂತ ಗೆಳೆಯರು ಅವರ ಅಮ್ಮ ಅಪ್ಪಂದಿರ ಬಗ್ಗೆ ಬೇಸರದಿಂದ ಹೇಳಿಕೊಳ್ಳುವುದುಂಟು.

ದುರಭ್ಯಾಸಗಳನ್ನೆಲ್ಲ ತ್ಯಜಿಸಿದ ಮಿತ್ರನಿಗೆ ವೈದ್ಯರೊಬ್ಬರು ಸಲಹೆ ಕೊಟ್ಟಿದ್ದರು: ಇವೆಲ್ಲ ಬಿಟ್ಟುಬಿಟ್ಟರೆ ನೀನು ಹತ್ತು ವರುಷ ಜಾಸ್ತಿ ಬದುಕ್ತೀಯಾ. ಆ ಕೊನೆಯ ಹತ್ತು ವರುಷಗಳು ನಿನ್ನದಲ್ಲ. ಯಾಕೆಂದರೆ ನೀನು ಬೇರೆಯವರ ಅಧೀನದಲ್ಲಿರುತ್ತೀಯಾ. ಅದರ ಬದಲು ಎಲ್ಲಾ ದುರಭ್ಯಾಸಗಳನ್ನು ಆನಂದಿಸುತ್ತಾ ಹತ್ತು ವರುಷ ಮೊದಲೇ ಸತ್ತು ಹೋಗು. ಕನಿಷ್ಟ ನೀನಾದರೂ ಸುಖವಾಗಿರುತ್ತೀಯಾ.
ಸತ್ಯವಾದ ಮಾತು ಎಂದು ಹೇಳುವುದಕ್ಕೂ ಮನಸ್ಸಾಗುತ್ತಿಲ್ಲ. ಇಲ್ಲ ಎಂದು ನಿರಾಕರಿಸುವುದಕ್ಕೂ ಮನಸ್ಸು ಒಪ್ಪುತ್ತಿಲ್ಲ.

ಯಡಿಯೂರಪ್ಪ ,ಈಶ್ವರಪ್ಪ ಬಾಹುಬಲಿ -2 ಪೋಸ್ಟರ್ ಗೆ ಬಂದಿದ್ದು ಹೆಂಗೆ ಗೊತ್ತಾ?

ಬಿಎಸ್ ಯಡಿಯೂರಪ್ಪ ಹಾಗೂ ಕೆ.ಎಸ್  ಈಶ್ವರಪ್ಪ ಶಿವಮೊಗ್ಗ ಮೂಲದ ಘಟಾನುಘಟಿ ರಾಜಕಾರಣಿಗಳು. ಹಾ ..? ಇದೇನಪ್ಪಾ ಅವರು ಸಿನಿಮಾದಲ್ಲೂ  ನಟನೆ ಮಾಡ್ತಾರಾ ? ಮೂಗಿನ ಮೇಲೆ ಬೆರಳಿಟ್ಟು, ಕಣ್ಣು ಬಾಯ್ ಬಿಟ್ಕಂಡು ನೋಡಿ ಕಿಸಕ್ ಅಂತ ನಗಿಸೋ  ಪೋಸ್ಟರ್ ಬಿಡುಗಡೆ ಆಗಿದ್ದು ಅದ್ರಲ್ಲಿ ಯಡಿಯೂರಪ್ಪ ಈಶ್ವರಪ್ಪ ಖಡ್ಗ ಹಿಡಿದು ನಿಂತಿದ್ದಾರೆ..
ಇದು ಸಿನಿಮಾ ಅನ್ನೋದೆ ಡೌಟ್..?
ನೋಡೋಕೆ ಸಿನಿಮಾ ಪೋಸ್ಟರ್ ಆದ್ರೆ ಇದು ಸಿನಿಮಾ ಅಲ್ಲ ಬಿಡಿ . ಯಾಕಂದ್ರೆ ಇಂದು ರಾತ್ರಿಯಿಂದಲೇ ತೆರೆಗೆ ಅಪ್ಪಳಿಸಲು ಸಜ್ಜಾಗಿರುವ ಬಾಹುಬಲಿ ಸಿನಿಮಾ ಪೋಸ್ಟರ್ ಗೆ ಇಬ್ಬರು ನಾಯಕರ ಫೋಟೋ ಎಡಿಟ್ ಮಾಡಲಾಗಿದೆ.
ಇಬ್ಬರ ಕಚ್ಚಾಟಕ್ಕೆ “ಚಿತ್ರ” ಉತ್ತರ..!
ಇವತ್ತು ಇಬ್ಬರು ನಾಯಕರು ಪರಸ್ಪರ ವಾಗ್ದಾಳಿ ಮಾಡಿಕೊಂಡು, ಭಾರತೀಯ ಜನತಾ ಪಾರ್ಟಿ ಹೆಸರನ್ನು ಬೀದಿ ಜಗಳದ  ಪಾರ್ಟಿ ಅನ್ನೋ ಹಾಗೆ ಮಾಡಿದ್ದಾರೆ..ಜೊತೆಗೆ “ಬಿಜೆಪಿ ಉಳಿಸಿ” ಸಮಾವೇಶದಲ್ಲಿ ಯಡಿಯೂರಪ್ಪ ವಿರುದ್ಧ ಮನಸೋ ಇಚ್ಛೆ ವಾಗ್ದಾಳಿ ಮಾಡಿದ್ದು, ಸಮಾವೇಶದಲ್ಲಿ ಗೊಂದಲ ಮೂಡಿಸಿದ ಯಡಿಯೂರಪ್ಪ ಬೆಂಬಲಿಗನಿಗೆ ಹಿಗ್ಗಾಮುಗ್ಗ ಬಡಿದ್ದಿದ್ದಾರೆ . ಇದೆಲ್ಲವೂ ಬಾಹುಬಲಿ ಸಿನಿಮಾಗೆ ಹೋಲಿಕೆ ಆಗ್ತಿದ್ದು ಇಬ್ಬರನ್ನು ಬಾಹುಬಲಿ ಹಾಗೂ ಬಲ್ಲಾಳರಾಯನನ್ನಾಗಿ ಬಿಂಬಿಸಿದ್ದಾರೆ.
ಬಾಹುಬಲಿ ಸಿನಿಮಾದಲ್ಲಿ ಕಥೆ ಉಲ್ಟಾ ಆಗಿದ್ದು ಬಾಹುಬಲಿ ರಾಜನಾಗಲ್ಲ.. ಬಲ್ಲಾಳ ರಾಯ ರಾಜ, ಬಾಹುಬಲಿ ಸೇನಾಧಿಪತಿ ಆಗಿದ್ದಾನೆ. ಇಲ್ಲೂ ಕೂಡ ಅದೇ ಕ್ಲೈಮ್ಯಾಕ್ಸ್ ರಿಪೀಟ್ ಆದ್ರೆ ಬಿಎಸ್ ಯಡಿಯೂರಪ್ಪ ಸಿಎಂ ಆಗಲ್ಲ..ಈಶ್ವರಪ್ಪ ಅರಚಾಡೋದು ಬಿಡಲ್ಲ.
ಸರ್ವಸಮರ್ಥ, ನಾಗಮಂಗಲ

ಸಿನಿಮಾ ಸ್ಟೈಲ್ ಕಂಡು ಗರಂ ಆದ್ರು ಎಚ್‍ಡಿಕೆ..!

ಮಾಜಿ ಸಿಎಂ ಕುಮಾರಸ್ವಾಮಿ, ರಾಜ್ಯದ ಸಾಕಷ್ಟು ಜನರ ಮೆಚ್ಚಿನ ಕುಮಾರಣ್ಣ ಬೆಳೆದು ಬಂದ ದಾರಿಯಲ್ಲಿ ಮೊದಲ ನಿಲ್ದಾಣ ಅಂದ್ರೆ ಸಿನಿಮಾ ರಂಗ.  ಆ ಬಳಿಕ ಗುತ್ತಿಗೆ ಕೆಲಸ, ಆಮೇಲೆ ರಾಜಕೀಯ.. ಆದ್ರೆ ಮೊದಲು ಆರಂಭಿಸಿದ್ದ ವೃತ್ತಿಯಲ್ಲಿ ಸಾಮಾನ್ಯವಾಗಿ ನಡೆಯಬಹುದಾದ ಘಟನೆಯಿಂದ ಇಂದು ಕುಮಾರಸ್ವಾಮಿ ಗರಂ ಆಗಿದ್ರು..

ಆಗಿದ್ದು ಇಷ್ಟೇ . ಮಂಡ್ಯ ಜಿಲ್ಲೆ ನಾಗಮಂಗಲದಲ್ಲಿ ಚೆಲುವರಾಯ ಸ್ವಾಮಿ ಜೆಡಿಎಸ್‍ಗೆ ಸೆಡ್ಡು ಹೊಡೆದ ಬಳಿಕ ಸುರೇಶ್‍ಗೌಡ ಹಾಗೂ ಶಿವರಾಮೇಗೌಡರನ್ನು ಪಕ್ಷಕ್ಕೆ ಕರೆತಂದಿರುವ ಅವರು, ಆದಿಚುಂಚನಗಿರಿಯಲ್ಲಿ ಬೃಹತ್ ಸಮಾವೇಶ ಮಾಡುವ ಮೂಲಕ ಶಕ್ತಿ ಪ್ರದರ್ಶನಕ್ಕೆ ಸಜ್ಜಾಗುತ್ತಿದ್ದಾರೆ.. ಇವತ್ತು ನಡೆದ ಪೂರ್ವಭಾವಿ ಸಭೆಗೆ ಕುಮಾರಸ್ವಾಮಿ ಆಗಮಿಸಿದ್ರು.. ಈ ವೇಳೆ ಬೆಳ್ಳೂರು ಕ್ರಾಸ್ ಬಳಿ ಜೆಡಿಎಸ್ ಕಾರ್ಯಕರ್ತನೊಬ್ಬ ಕುಮಾರಸ್ವಾಮಿ ಅವರ ಮೇಲೆ ನೋಟನ್ನು ಎರಚಿದ್ದಾನೆ..

ಈ ಘಟನೆಗೆ ಬೇಸರ ವ್ಯಕ್ತಪಡಿಸಿದ ಕುಮಾರಸ್ವಾಮಿ, ನಾಗಮಂಗಲ ತಾಲೂಕು ಸೇರಿದಂತೆ ರಾಜ್ಯದಲ್ಲಿ ಭೀಕರ ಬರ ಎದುರಾಗಿದೆ ಈ ರೀತಿ ನಡೆದುಕೊಳ್ಳುವುದು ತಪ್ಪು ಅಂತಾ ತಿಳಿ ಹೇಳಿದ್ದಾರೆ . ಇನ್ನೊಮ್ಮೆ ಈ ರೀತಿ ಘಟನೆ ನಡೆದ್ರೆ ಕಠಿಣ ನಿರ್ಧಾರ ಕೈಗೊಳ್ಳಬೇಕಾಗುತ್ತೆ ಅಂತಾ ಎಚ್ಚರಿಕೆ ನೀಡಿದ್ದಾರೆ..

ಕುಮಾರಸ್ವಾಮಿ ಕಾರ್ಯಕರ್ತನಿಗೆ ಹೇಳಿದ ವಿಚಾರ ಸರಿಯಾಗೇ ಇದೆ .. ಆದ್ರೆ ಸಿನಿಮಾದಲ್ಲಿ ಈ ರೀತಿ ಮಾಡುವುದು ನೆಪಮಾತ್ರ ಎಂದು ತಿಳಿಯದ ಅಭಿಮಾನಿ ಹೀಗೆ ಮಾಡಿದ್ದು ಸರಿಯಲ್ಲ.. ಈಗಲೂ ಸಿನಿಮಾರಂಗದಲ್ಲಿ ಸಕ್ರಿಯವಾಗಿರುವ ನಿರ್ಮಾಪಕ ಎಚ್ ಡಿ ಕುಮಾರಸ್ವಾಮಿ ಅಭಿಮಾನಿಗೆ ತಿಳಿ ಹೇಳಿರುವ ರೀತಿ ಅನುಕರಣೀಯ.

-ಸಮರ್ಥ ನಾಗಮಂಗಲ

ಮತ್ತೆ ಒಲಿದು ಬರುತ್ತಾ ಬಾಕ್ಸ್ ಆಫೀಸ್ ಸುಲ್ತಾನ್ ಪಟ್ಟ!?

ಖಡಕ್ ಲುಕ್, ಮಾಸ್ ಸ್ಟೈಲ್ ಅಂದ್ರೆ ಅಲ್ಲಿ ದರ್ಶನ್ ಇದ್ದೇ ಇರ್ತಾರೆ. ಇದು ಅವರಿಗಷ್ಟೆ ಸೀಮಿತವಲ್ಲ ಅವರ ಅಭಿಮಾನಿಗಳೂ  ಮಾಸ್ ಬಳಗದವರೆ.  ಬಾಕ್ಸ್ ಆಫೀಸ್ ಗೆ ಲಗ್ಗೆ ಇಡೋಕೆ ಸರ್ವ ತಯಾರಿ ಮಾಡಿಕೊಂಡಂತಿರುವ ಚಕ್ರವರ್ತಿ ಹೇಗಿದ್ದ ? ಹೇಗಾದ ಒಂದ್ಸಲ ನೋಡಿಬಿಡೋಣ.

ಅಷ್ಟಕ್ಕೂ  ದರ್ಶನ್ ರವರ ಹಾದಿ ಹೇಗಿತ್ತು?  

ಮಗ ಒಬ್ಬ ಕ್ರಿಕೆಟರ್ ಆಗಬೇಕು ಅಂದುಕೊಂಡ ಅಪ್ಪನಿಗೆ ನಾನೊಬ್ಬ ಹಿರೋ ಆಗಬೇಕು ಎಂದು ಅದಕ್ಕೆ ಬೇಕಾದ ಪೂರ್ವ ತಯಾರಿ ಮಾಡಿ ಆಗೊಂದು ಈಗೊಂದು ಪಾತ್ರ ಮಾಡಿದ ದರ್ಶನ್ ತೂಗುದೀಪ್ ಅವರಿಗೆ ಧಾರಾ ವಾಹಿಯಲ್ಲಿ ನಟಿಸಲು ಅವಕಾಶ ಬಂತು .. ದಿಗ್ಗಜನಂಥ ಖಳನಟನ ಮಗನಾದರೂ ಬದುಕು ಸಾಗಿಸಲು ಪಟ್ಟ ಕಷ್ಟ ಅಷ್ಟಿಷ್ಟಲ್ಲ.

 ಮೆಜೆಸ್ಟಿಕ್ ಅನ್ನೊ ಮಾಸ್ ಸಿನಿಮಾ ಸಿಕ್ಕಿದ್ದೇ ಬದುಕು ಗೆಲುವಿನ ರುಚಿ ತೋರಿಸಿತ್ತು .ಇದೇ ಸಿನಿಮಾ ನೋಡಿ ಕೈ ಹಿಡಿದಿದ್ದು. ಅಲ್ಲಿಂದ ಶುರುವಾದ ಸ್ಯಾಂಡಲ್ ವುಡ್ ಜರ್ನಿ ಒಂದಾದರ ಮೇಲೊಂದರಂತೆ ಸಿನಿಮಾಗಳು ಒಲಿದು ಬಂತು. ಆದ್ರೆ ಮೆಜೆಸ್ಟಿಕ್ ತದನಂತರದಲ್ಲಿ ದರ್ಶನ್ ನಾರ್ಮಲ್ ಸಿನಿಮಾದಲ್ಲಿ ನಟಿಸಿದ್ರು..
ಧ್ರುವ,ನಿನಗೋಸ್ಕರ,ಕಿಟ್ಟಿ ಹೀಗೆ ನಾನಾ ರೀತಿಯ ಚಿತ್ರಗಳಲ್ಲಿ ನಟಿಸಿದ್ರು.

 ಯಾರಿಗೆ ಲಕ್ ಯಾವಾಗ ಒಲಿದು ಬರುತ್ತೋ ಹೇಳೋರ್ಯಾರು .. ನಮ್ಮ ಇಂಡಸ್ಟ್ರಿಯಲ್ಲಿ ನಟನೆ ಜೊತೆಗೆ ಲಕ್ ಇರೋದು ತುಂಬಾನೇ ಮುಖ್ಯ. ನನ್ನ ಪ್ರೀತಿಯ ರಾಮು ಚಿತ್ರದಲ್ಲಿ ಅದ್ಭುತವಾಗಿ ನಟಿಸಿದರು ಉತ್ತುಂಗಕ್ಕೇರಲಿಲ್ಲ. ಸಾಧಾರಣ ಚಿತ್ರಗಳ ಸಾಲು ನಡೆದಿತ್ತು . ಅದಾದ ನಂತರ ಒಂದರ  ಮೇಲೊಂದರಂತೆ ಕರಿಯ , ಕಲಾಸಿಪಾಳ್ಯ , ಸಂಗೊಳ್ಳಿ ರಾಯಣ್ಣ ,ಸಾರಥಿ ಯಂಥ ಹಿಟ್ ಸಿನಿಮಾ ಕೊಟ್ಟು ಸ್ಯಾಂಡಲ್ ವುಡ್ ನ .ಬಾಕ್ಸ್ ಆಫೀಸ್ ಸುಲ್ತಾನ್ ಅನ್ನೋ ಪಟ್ಟಕ್ಕೇರಿದ್ರು..

ದರ್ಶನ್ ಸ್ನೇಹಕ್ಕೆ ಬಹಳ ಪ್ರಾಮುಖ್ಯತೆ ಕೊಡ್ತಾರಂತೆ . ಸ್ಯಾಂಡಲ್ ವುಡ್ ನಲ್ಲಿ ಸುದೀಪ್ ಅವರನ್ನ ಇಷ್ಟ ಪಡ್ತಿದ್ದ  ದರ್ಶನ್ ಸಿಸಿಎಲ್ ನಿಂದ ಬಹಳ ಆಪ್ತರೆನಿಸಿದ್ರು. ಯಾವುದೇ ಕಾರ್ಯಕ್ರಮದಲ್ಲು ಇಬ್ಬರೂ ಒಟ್ಟಿಗೆ ಕಾಣಿಸಿಕೊಳ್ತಿದ್ರು ..

ಇಷ್ಟಕ್ಕೂ ಬಾಕ್ಸ್ ಆಫೀಸ್ ಸುಲ್ತಾನ್ ಪಟ್ಟಕ್ಕೆ ಕುತ್ತು ತಂದಿತ್ತಾ  ಪತ್ನಿಯ ಜಗಳ?

ಕೇವಲ ಚಾಲೆಂಜಿಂಗ್ ಸ್ಟಾರ್ ಆಗಿದ್ದ ದರ್ಶನ್ ಗೆ ಬಾಕ್ಸ್ ಆಫೀಸ್ ಸುಲ್ತಾನ್ ಪಟ್ಟ ಸಿಕ್ಕಿದ್ದು ವಿಜಯ ಸಾರಥಿ ಅನ್ನೋ ಪತ್ರಕರ್ತನಿಂದ ಅವರನ್ನು ಎಂದಿಗೂ ಮರೆಯಲಾರೆ ಅಂತಾರೆ ದರ್ಶನ್

ದರ್ಶನ್ ಸ್ವಲ್ಪ ಮುಂಗೋಪಿ ಅಂತಾರೆ ಕೆಲ ಸ್ನೇಹಿತ್ರು ಅಷ್ಟೆ ಅಲ್ಲ ಸ್ವತಃ ಅವರ ತಮ್ಮ ದಿನಕರ್ ತೂಗುದೀಪ್ ಕೂಡ ಅವರ ಅಣ್ಣನ ಕೋಪಿಷ್ಟ ಅಂತಾರೆ ಬಟ್ ಇದೇ ಕೋಪ ತಾರಕ್ಕಕ್ಕೇರಿ ಪತಿ ಪತ್ನಿಯ ನಡುವೆ ಜಗಳಕ್ಕೆ ಕಾರಣವಾಯ್ತು .

ಯಾವ ಪ್ರೀತಿ ಇಷ್ಟವಾಗಿ ದರ್ಶನ್ ಅವರ ಬದುಕಿನ ನೋವನ್ನು ಮರೆಸಿತ್ತೋ ಮದುವೆಯಾಗಿ ಸುಮಾರು ವರ್ಷಗಳ ನಂತರ ಅದೇ ಪ್ರೀತಿ ದರ್ಶನ್ ಪಾಲಿಗೆ ಮುಳುವಾಯ್ತು..

ಎಲ್ಲವೂ ಸರಿ ಇದ್ದಂತ ಸಂದರ್ಭದಲ್ಲಿ ದರ್ಶನ್ ಮನೆಗೆ ಸರಿಯಾಗಿ ಬರಲ್ಲ ಅನ್ನೋ ಮಾತು ಕೇಳಿ ಬರ್ತಿತ್ತು . ಮತ್ತೊಂದು ಸಂಬಂಧದ ಮಾತು ಹರಿದಾಡಿತ್ತು .ಇದನ್ನ ಮನಗಂಡ ಅವರ ಪತ್ನಿ ವಿಜಯಲಕ್ಷ್ಮಿ  ಸಿಡಿದು ನಿಂತಿದ್ರು . ವಿಜಯಲಕ್ಷ್ಮಿ ಮೇಲು ಆಪಾದನೆಗಲು ಕೇಳಿ ಬಂದಿದ್ದವು . ಈ ಜಗಳ ವಿಕೋಪಕ್ಕೆ ತಿರುಗಿ ಕೈ ಕೈ ಮಿಲಾಯಿಸುವ ಹಂತಕ್ಕೂ ಬಂತು..

ಅಷ್ಟರಲ್ಲಾಗಲೇ, ವಿಜಯಲಕ್ಷ್ಮಿ ತಮ್ಮ ಮಗ ವಿನೇಶ್ ನೊಂದಿಗೆ  ಮನೆ ಬಿಟ್ಟು ಹೊರಟುಬಿಟ್ಟಿದ್ದರು . ಅಲ್ಲಿಂದ   ಪೊಲೀಸ್ ಠಾಣೆಯ ಮೆಟ್ಟೇಲೇರಿ ಹೈ ಡ್ರಾಮಾವೆ ನಡೆದು ಹೋಯ್ತು…

ದರ್ಶನ್ ಅವರ ಮುಂಗೋಪವೆ ಅವರು ಕಂಬಿ ಹಿಂದೆ ಹೋಗುವಂಥ   ಪರಿಸ್ಥಿತಿ ತಂದೊಡ್ಡಿತು. ಇದಕ್ಕೂ ಮುನ್ನ ದಿನಕರ್ ಅವರ ನಿರ್ದೇಶನದ ಅಡಿಯಲ್ಲಿ ಬರ್ತಿದ್ದ ಸಿನಿಮಾ ಸಾರಥಿ  ಶೂಟಿಂಗ್ ಹಂತದಲ್ಲಿರುವಾಗ್ಲೆ ದರ್ಶನ್  ಜೈಲು ಸೇರಿದ್ರು..

ಸಾರಥಿ ಕೊಟ್ಟ ವರ !!

ಒಂದಷ್ಟು ದಿನಗಳ ಕಾಲ  ಜೈಲಿನಲ್ಲಿದ್ದ ದರ್ಶನ್ ಗೆ ಅಭಿಮಾನಿಗಳ ಬಳಗ ಮಾತ್ರ ಕಡಿಮೆ ಆಗಲಿಲ್ಲ.  ಯಾವಾಗ ತಮ್ಮ ಹೀರೋ  ಸಿನಿಮಾ ಬರುತ್ತೋ ಅವರನ್ನು ನೋಡ್ತಿವೋ ಅನ್ನೋ ಹಂಬಲಕ್ಕೆ ಬಿದ್ರು. ಜೈಲು ಸೇರಿದ್ದು ಸಿನಿಮಾಗೆ ಹೊಡೆತ ಬೀಳುತ್ತೇನೋ ಅನ್ನುವ ಆತಂಕ ಸ್ವತಃ ದರ್ಶನ್ ಗೆ ಇದ್ದಿದ್ದು ಸುಳ್ಳಲ್ಲ.

ಆದ್ರೆ ದರ್ಶನ್ ಗೆ ಜೈಲು ಸೇರಿದ್ದೇ ವರವಾಯ್ತೋ ಏನೋ  ಜೈಲಿನಿಙದ ಬಂದ ತಕ್ಷಣವೇ ಯಾವುದಕ್ಕೂ ಮಣಿಯದೆ ಸಾರಥಿ ಸಿನಿಮಾ ಮುಗಿಸಿ ತಮ್ಮ ಅಭಿಮಾನಿಗಳಿಗೆ ಅರ್ಪಿಸಿದ್ರು .ಅಭಿಮಾನಿಗಳು ಅದೇನು ಅನುಕಂಪವೋ, ಪ್ರೀತಿಯೋ , ಸಿನಿಮಾ ಮಾಡಿದ ಮೋಡಿಯೋ ಸಾರಥಿಯನ್ನು ಸುಲ್ತಾನನ ಪಟ್ಟಕ್ಕೇರಿಸಿದ್ರು.

ಕಳಚಿದ ಕೀರೀಟ ..

ಇದಾದ ಬಳಿಕ ದರ್ಶನ್ ಅಂಬರೀಷ ,ಐರಾವತನಾಗಿ ಬಂದರೂ ಗೆಲುವು ಮರೀಚಿಕೆಯಂತೆ ಆಡಿಸಿತ್ತು .ಜಗ್ಗುದಾದ ಸ್ವಲ್ಪ ಮಟ್ಟಿಗೆ ಉಸಿರಾಡುವಂತೆ ಮಾಡಿತ್ತು. ಯಾವ ಹತ್ತಾರು ಸಿನಿಮಾಗಳ ಮಧ್ಯೆ  ದರ್ಶನ್ ಹೈಲೈಟ್ ಆಗಿ ಸುಲ್ತಾನ ಅನ್ನಿಸಿಕೊಂಡಿದ್ರೋ ಅದೇ   ಹತ್ತಾರು ಸಿನಿಮಾಗಳ ಮಧ್ಯೆ  ಒಬ್ಬರಾಗಿಬಿಟ್ರು ದರ್ಶನ್ ..ಸುಲ್ತಾನ್ ಪಟ್ಟ ಕಳಚಿಬಿದ್ದಿತ್ತು..

ಮುರಿದ ಬಿದ್ದ ಗೆಳೆತನ

ಈ ಮಧ್ಯೆ ದಚ್ಚು-ಕಿಚ್ಚ ಸ್ನೇಹ ಹಳಸಿದ ವಾಸನೆ ಶುರುವಾಗಿತ್ತು .ಸುದೀಪ್  ತನ್ನ ಕ್ಲಾಸ್ ಕಳಚಿ ಮಾಸ್ ಚಿತ್ರಗಳನ್ನ ಕೊಟ್ಟು ಗೆಲುವಿನ ದಾರಿ ಕಂಡುಕೊಂಡಿದ್ರು.  ನನ್ನ ಗೆಳೆಯ ದರ್ಶನ್ ಬಾಕ್ಸ್ ಆಫೀಸ್ ಸುಲ್ತಾನ ಅಂದಿದ್ದ ಸುದೀಪ್ ಸ್ವಲ್ಪ ವರ್ಷದಲ್ಲೇ ಬಾಕ್ಸ್ ಆಫೀಸ್ ಧೂಳ್ ಎಬ್ಬಿಸೋ ಗೆಲ್ಲೋ ಕುದುರೆ ಆಗಿಬಿಟ್ರು. ಹೆಬ್ಬುಲಿ ಅಬ್ಬರಿಸಿ ಬಿಡ್ತು . ದರ್ಶನ್, ಸುದೀಪ್ ಎಂದೋ ಆಡಿದ ಮಾತಿನ ಎಳೆ ಹಿಡಿದು ತಮ್ಮ fb ಅಕೌಂಟ್ ನಲ್ಲಿ ನೋವು ತೋಡಿಕೊಂಡ್ರು.  ಸುದೀಪ್ ದರ್ಶನ್ ರ ಟ್ವಿಟರ್ ಜಗಳ ಶುರುವಾಗಿತ್ತು .

ಮೆಜೆಸ್ಟಿಕ್ ಚಿತ್ರ ಸುದೀಪ್ ಬಿಟ್ಟು ಕೊಟ್ಟಿದ್ದು ಅನ್ನೋ ಮಾತಿಗೆ ಕೋಪಗೊಂಡ  ದರ್ಶನ್ ಟ್ವಿಟರ್ ನಲ್ಲಿ ಖಾರವಾಗೆ ಪ್ರತಿಕ್ರಿಯೆ ನೀಡಿದ್ರು ವಾದ ವಿವಾದದ ನಡುವೆ ಸ್ನೇಹ ಅನ್ನೊ ಸಂಬಂಧದ ಕೊಂಡಿ ಕಳಚಿಬಿತ್ತು.

ಚಕ್ರವರ್ತಿಯ ಸವಾಲುಗಳು ?

ಬಟ್ ದರ್ಶನ್ ಅವರಲ್ಲಿರೋ ಹಠ, ಛಲ  ಅವರನ್ನ ಸುಮ್ಮನೆ ಕೂರಲು ಬಿಟ್ಟಿಲ್ಲ .”ಚಕ್ರವರ್ತಿ”ಯ ರೂಪದಲ್ಲಿ ಬರ್ತಾ ಇದೆ. ಒಂದು ಕಡೆ ತೆರೆಯ ಮೇಲೆ ಪುಟಿಯುವ ಪ್ರತಿಭೆ ,ತಮ್ಮದೇ ಸಮುದಾಯದ ರಾಕಿಂಗ್ ಸ್ಟಾರ್ ಯಶ್ , ಮತ್ತೊಂದು ಕಡೆ ಅಬ್ಬರಿಸುತ್ತಿರುವ ಅಭಿನಯ ಚಕ್ರವರ್ತಿ , ಮಗದೊಂದು ಕಡೆ ರಾಜಕುಮಾರನ ಗೆಲುವು ಇದೆಲ್ಲವನ್ನು ಮೀರಿಸಿ ಚಕ್ರವರ್ತಿಯಾಗಿ ನಿಲ್ಲುವ ಅನಿವಾರ್ಯತೆ ಇಲ್ಲದಿಲ್ಲ. 

ಈ ಮಧ್ಯೆ ಮಾತುಕತೆಯಲ್ಲೂ ಸ್ವಲ್ಪ ತಣ್ಣಗಾದ ಹಾಗಿದ್ದಾರೆ  ದರ್ಶನ್. ಹೆಚ್ಚು ಮಿಡಿಯಾಗೆ ತೆರೆದುಕೊಳ್ಳದೆ ತನ್ನ ಪಾಡಿಗೆ ತಾನಿದ್ದು ತೆರೆಯ ಮೇಲಷ್ಟೇ ಅಬ್ಬರಿಸುವ ದಚ್ಚು ಚಕ್ರವರ್ತಿಯ ಬಗ್ಗೆ ಮಾತಾಡುವಾಗ  ಮಾತ್ತ್ರ ಲವಲವಿಕೆಯಿಂದ ಕಣ್ಣರಳಿಸಿ ಮಾತಾಡುತ್ತಿದ್ದಾರೆ. ಅಲ್ಲಿ ಭರವಸೆ , ನಂಬಿಕೆ ,ಛಲ ತುಂಬಿರುವುದಂತೂ ನಿಜ.

ಕಾದಿದ್ದು ಸಾರ್ಥಕವಾದೀತಾ ?

ಟ್ರೇಲರ್ ನಲ್ಲೆ ಸಾಕಷ್ಟು ಹವಾ ಕ್ರಿಯೇಟ್ ಮಾಡಿರೋ  “ಚಕ್ರವರ್ತಿ ” ದರ್ಶನ್ ಗೆ ಸಾಕಷ್ಟು ಹೋಪ್ ತಂದುಕೊಟ್ಟಿರೋದಂತು ಸತ್ಯ..ದರ್ಶನ್ ಅವರೆ ಹೇಳುವಂತೆ ಈ ಸಿನಿಮಾ ಪಕ್ಕಾ  ಹಿಟ್ ಆಗುತ್ತೆ. ಜನ ಗೆಲ್ಲಿಸೇ ಗೆಲ್ಲಿಸ್ತಾರೆ ಅನ್ನುವಂತೆ ಈಗಾಗಲೇ ಸೋಷಿಯಲ್ ಮಿಡೀಯಾಗಳಲ್ಲಿ ದರ್ಶನ್ ಅವರ ಹವಾ ಜೋರಾಗಿದೆ..

ಅದಲ್ಲದೆ ಖುದ್ದು ದರ್ಶನ್ ಹೇಳುವಂತೆ ಚಕ್ರವರ್ತಿ ಯಾವ ಹೊರ ರಾಜ್ಯದ  ಸಿನಿಮಾಗಳಿಗಿಂತ ಕಮ್ಮಿ ಇಲ್ಲ ನಾವಾ  -ಅವರಾ  ನೋಡೇಬಿಡೋಣ ಅಂತಿದ್ದಾರೆ! ಇದು ಕೂಡ ಕನ್ನಡ ಚಿತ್ರಗಳ ಜತೆ ಪೈಪೋಟಿ ಮಾಡಲ್ಲ ನಾವೆಲ್ಲಾ ಒಂದು ಅನ್ನೋ ಮೆಸೇಜ್ ಪಾಸ್ ಮಾಡಿ ಎಲ್ಲರ ಬೆಂಬಲ ಪಡೆಯೋ ಇಚ್ಛೆ ಇದ್ದಂತಿದೆ. ಜೊತೆಗೆ ತಮ್ಮ fb ಲೈವ್ ನಲ್ಲಿ ಶಿವಣ್ಣನ್ನ ನೋಡಿ ಲಾಂಗ್ ಹಿಡಿಯೋದು ಕಲಿತೆ ಅಂದಿರೋದು ಸ್ನೇಹಕ್ಕೆ ಸ್ನೇಹ ಪ್ರೀತಿಗೆ ಪ್ರೀತಿ ನಾನು ಸ್ನೇಹಜೀವಿ ಅನ್ನೋ ಸಂದೇಶ ರವಾನಿಸಿದಂತಿದೆ .

ಇಂದು ರಾತ್ರಿ ಹನ್ನೆರಡು ಗಂಟೆಗೆ  ರಿಲೀಸ್ ಆಗಲಿರೋ ಚಕ್ರವರ್ತಿ ಸಿನಿಮಾ ಬಾಕ್ಸ್ ಆಫೀಸ್ ಕೊಳ್ಳೆ ಹೊಡೆಯುತ್ತಾ? ಮತ್ತೆ ದರ್ಶನ್ ಗೆ ಅನಿವಾರ್ಯವಾಗಿರುವ ಬಾಕ್ಸ್ ಆಫೀಸ್ ಸುಲ್ತಾನಾ  ಅನ್ನೊ ಪಟ್ಟ ತಂದುಕೊಡುತ್ತಾ ಅನ್ನೋದನ್ನ ಮಾತ್ರ ಕಾದೇ  ನೋಡಬೇಕು.

ಏನೇ ಇರಲಿ , ನಮ್ಮ ಕಡೆಯಿಂದಲೂ ಚಕ್ರವರ್ತಿ ಸಿನಿಮಾ ಗೆ ಆಲ್ ದಿ ಬೆಸ್ಟ್ .

_ಪಲ್ಲವಿ ಗೌಡ

ಮೇರುಪರ್ವತದ ಜೊತೆಗೆ ಹುಲುಮಾನವನ ಅದ್ಬುತ ಕ್ಷಣಗಳು

ಅವತ್ತು ಏಪ್ರಿಲ್ 1 2006, ಇವತ್ತಿಗೆ ಸರಿಯಾಗಿ ಹನ್ನೊಂದು ವರ್ಷದ ಕೆಳಗೆ, ಅಂದ್ರೆ ಅಣ್ಣಾವ್ರು ತೀರಿಕೊಳ್ಳೊಕೆ ಕೇವಲ 12 ದಿನ ಮೊದಲು, ನಾವು ಚಾಮುಂಡೇಶ್ವರಿ ಸ್ಟುಡಿಯೋದಲ್ಲಿ ನಮ್ಮ ‘ತಿಮ್ಮ’ ಸಿನಿಮಾದ ಡಬ್ಬಿಂಗ್ ಮಾಡ್ತಾ ಇದ್ವಿ, ಮೇಲ್ಗಡೆ ಫ್ಲೂರ್ ನಲ್ಲಿ ‘ಅರಸು’ ಸಿನಿಮಾದ ಡಬ್ಬಿಂಗ್ ನಡೀತಾ ಇತ್ತು , ಅಲ್ಲಿ ಸಿಗ್ತಿದ್ದ ದಿನಗಳಲ್ಲಿ ಅಪ್ಪು ಸಾರ್ ಹಾಯ್ ಊಟ ಆಯ್ತಾ, ಕಾಫಿ ಆಯ್ತಾ ಅಂತ ಕೇಳ್ತಾ ಸ್ಮೈಲ್ ಮಾಡ್ಕೊಂಡ್ ಹೊಗೊರು.

ಅವತ್ತು ಬಂದು ತುಂಬಾ ರಿಕ್ವೆಸ್ಟಿಂಗ್ ಟೋನ್ ಅಲ್ಲಿ ನಮ್ ಡೈರೆಕ್ಟರ್ ಸಾಯಿಸಾಗರ್ ಅವ್ರ ಹತ್ರ ಬಂದು

” ಅಪ್ಪಾಜಿ ಅರಸು ಸಾಂಗ್ಸ್ ನೋಡೋಕೆ ಬರ್ತಾ ಇದಾರೆ ಅವ್ರಿಗೆ ಮೇಲ್ಗಡೆ ಫ್ಲೂರ್ ಗೆ ಹತ್ತಿಕೊಂಡ್ ಹೋಗೋಕೆ ಆಗಲ್ಲ ಹಾಗಾಗಿ ಪ್ಲೀಸ್ ನಿಮ್ ಫ್ಲೂರ್ ನ ಒಂದ್ ಅರ್ಧ ಗಂಟೆ ಮಟ್ಟಿಗೆ ಬಿಟ್ ಕೊಡೋಕೆ ಆಗತ್ತಾ “ಅಂದ್ರು .

ಐಯ್ಯೊ ಇದು ನಮ್ ಸೌಭಾಗ್ಯ, ಖಂಡಿತ ಬನ್ನಿ ಅಂದ್ರು,

ಅದಾದ ಅರ್ಧ ಗಂಟೆಲಿ ಅಣ್ಣಾವ್ರು, ಪರ್ವಾತಮ್ಮ, ಶಿವಣ್ಣ ಎಲ್ಲರೂ ಬಂದ್ರು, ಅಣ್ಣಾವ್ರು ಸ್ಟುಡಿಯೋ ಒಳಗಡೆ ಬರ್ತಿದ್ದ ಹಾಗೆ ನಮ್ಮೆಲ್ಲರ ಮೈಯ್ಯಲ್ಲಿ ಮಿಂಚಿನ ಸಂಚಾರ.

ಬಂದವರೇ ಅಲ್ಲಿ ನಿಂತಿದ್ದ ನಮಗೆ ನಮಸ್ಕರಿಸಿ ಎಲ್ಲಾ ಅರಾಮಿದಿರಾ ಅಂದ್ರು.

ನಮಗ್ಯಾರಿಗೂ ಮಾತೆ ಬರ್ಲಿಲ್ಲ, ಇಡೀ ಸ್ಟುಡಿಯೋ ನ ಸುತ್ತಾಡಿ ತುಂಬಾ ಬದ್ಲಾಯಿಸಿದಿರಲ್ಲ ಅಂತ ಸ್ಟುಡಿಯೋ ಮ್ಯಾನೇಜರ್ ಹತ್ರ ಕೇಳಿದ್ರು, ಒಂದು ಟಾಯಿಲೆಟ್ ಹತ್ರ ಹೋಗಿ ಅಪ್ಪು ನೀನು ಚಿಕ್ಕನ್ನಿರೋವಾಗ ತುಂಬಾ ಸಾರಿ ಇಲ್ಲೇ ನಿನ್ನ ತೊಟ್ಟಿಲು ಕಟ್ಟಿ ಮಾಲ್ಗಸ್ತಿದ್ವಿ ಅಂತ ನೆನಪಿಸಿಕೊಂಡರು.

ಈ ಹೊತ್ತಲ್ಲಿ ಅಕ್ಕ ಪಕ್ಕ ಶಿವಣ್ಣ, ಪರ್ವಾತಮ್ಮ ಅವರನ್ನ ಹಿಡ್ಕೊಂಡಿದ್ರು.. ಆ ಟೈಮ್ ಅಲ್ಲಿ ಶಿವಣ್ಣ ಫೋನ್ ಅಟನ್ಡ್ ಮಾಡೋಕೆ ಅಂತ ಸ್ವಲ್ಪ ದೂರ ಹೋದ್ರು. ಅಲ್ಲೇ ಇದ್ದ ನಾನು ಅಣ್ಣಾವ್ರ ಕೈ ಹಿಡ್ಕೊಂಡು ನೆಡ್ಸ್ಕೊಂಡ್ ಬಂದ್ವಿ, ಇದೊಂದು ಅಪೂರ್ವ ಗಳಿಗೆ ನನಗೆ…ಎವೆರೆಸ್ಟ್ ಪರ್ವತಕ್ಕೆ ನನ್ನಂತ ಹುಳುಮಾನವ ಹೆಗಲು ಕೊಡೋದಾ?, ಇವತ್ತಿಗೂ ಕನಸು ಅನ್ನಿಸ್ತಿದೆ.

ಹಾಗೆ ಸೀದಾ ಒಳಗಡೆ ಹೋಗಿ ಅರಸು ಚಿತ್ರದ ಹಾಡುಗಳನ್ನ ನೋಡಿ ಮುಗಿಸಿ ಹೊರಬಂದ್ರು,ಅಸ್ಟ್ರಲ್ಲಿ ನಮ್ ಸಿನಿಮಾ ಹಾಡುಗಳನ್ನೂ ಒಮ್ಮೆ ನೋಡಿ ಅಂತ ಕೇಳಿದ್ರು ನಮ್ ಡೈರೆಕ್ಟರು, ಇಲ್ಲ ಸುಸ್ತಾಗಿದೆ ಅಪ್ಪಾಜಿಗೆ ಮನೆಗೆ ಹೂಗಿಬಿಡ್ತಿವಿ ಅಂದ್ರು ಶಿವಣ್ಣ , ಇಲ್ಲಪ್ಪ ಅವ್ರು ಅಷ್ಟು ಹೇಳ್ತಾ ಇದಾರೆ ನೋಡೋಣ ನಡೀರಿ ಅಂತ ಮತ್ತೆ ಒಳಗಡೆ ಬಂದ್ರು , ಕೆಲವೇ ಕುರ್ಚಿಗಳಿದ್ದ ಅಲ್ಲಿ ಎಲ್ಲರೂ ಕೂತಾಗಿತ್ತು… ಒಂದ್ ಕುರ್ಚಿ ಮಾತ್ರ ಕಾಲಿ ಇತ್ತು, ಅದು ಅಣ್ಣಾವ್ರು ಕೂತಿದ್ದ ಪಕ್ಕದ ಕುರ್ಚಿ… ಸರಿ ನಾನ್ ನಿಂತೇ ಇದ್ದೆ.. ಶಿವಣ್ಣ ನನ್ ನೋಡಿ ಕುತ್ಕೊಅಪ್ಪ ಅಂದ್ರು ನಾನ್ ಪರ್ವಾಗಿಲ್ಲ ಸಾರ್ ಅಂತ ನಿಂತೇ ಇದ್ದೆ ಅಸ್ಟ್ರಲ್ಲಿ ಅಣ್ಣಾವ್ರು ನನ್ ಕೈ ಹಿಡಿದು ಕೂತ್ಕೋ ಮರಿ ಅಂತ ಅವ್ರ ಪಕ್ಕದಲ್ಲಿ ಕೂರಿಸ್ಕೊಂಡ್ರು.

ಸುಮಾರು ಅರ್ಧ ಗಂಟೆ ನಾನು ಟ್ರಾನ್ಸ್ ಗೆ ಹೂಗಿಬಿಟ್ಟಿದ್ದೆ !!!!!

ಹಾಡು ನೋಡುವ ಮದ್ಯೆ ಮದ್ಯೆ ನಮ್ ಸಿನಿಮಾ ಬಗ್ಗೆ ಕೇಳೋರು… ನಾನ್ ಅದೇನ್ ಉತ್ರ ಹೆಳಿದನೂ ದೇವ್ರೇ ಬಲ್ಲ… !!!

ಆ ಅರ್ಧ ಗಂಟೆ ನನ್ ಜೀವನದ ಅತ್ಯಮೂಲ್ಯ ಕ್ಷಣಗಳು !!! ಅಬ್ಬಾ ನನಗೆ ಇಂತ ಅದೃಷ್ಟ, ಒಂತರ ಕನಸಿನ ತರ ಅನ್ನಿಸ್ತಿದೆ ಇವತ್ತಿಗೂ.

ಮುಗಿಸಿ ಹೊರಗೆ ಬಂದವರೇ ನಮ್ ಡೈರೆಕ್ಟರ್ ಹತ್ರ ಇದ್ದ nokia n 70 ಲಿ ಒಂದ್ ಫೋಟೋ ತೆಗೆದುಕೊಂಡ್ವಿ….

 

 

 

 

 

 

 

ಅಂದ ಹಾಗೆ ಈ ಫೋಟೋ ತೆಗೆದವ್ರು ಪವರ್ ಸ್ಟಾರ್ ಪುನೀತ್ ರಾಜಕುಮಾರ😊

ಲೇಖಕರು – ವಿನಯ್ ಕಾಸ್ವೇ

ವಿನಯ್ ಕಾಸ್ವೇ (Vinay Kaswe)

ಪ್ರಥಮ್ – ಸಂಜನಾ ಜೊತೆಯಲ್ಲಿ ರಾತ್ರಿ ಕಳೆದ್ರಾ..?

ಪ್ರಥಮ್ -ಸಂಜನಾ ಬಗ್ಗೆ ಹರಿದಾಡಿದ ಸುದ್ದಿ ,ಅದಕ್ಕೆ ಮಾಧ್ಯಮ (ನಮ್ಮನ್ನೂ  ಸೇರಿಸಿ )ಪ್ರತಿಕ್ರಿಯಿಸಿದ ರೀತಿಯ ಬಗ್ಗೆ ciniaada.com ನ ಓದುಗರು ಕಳುಹಿಸಿದ ಪತ್ರವನ್ನ ಯಥಾವತ್ತು ಇಲ್ಲಿ ಪ್ರಕಟಿಸುತ್ತಿದ್ದೇವೆ. ನಾವು ಹೇಳಿದ್ದೆಲ್ಲವನ್ನು  ಜನ  ಯಾವ ವಿಶ್ಲೇಷಣೆ ಇಲ್ಲದೆ ನಂಬಿಬಿಡುತ್ತಾರೆ ಎಂಬ ಯಾವ ನಂಬಿಕೆಯೂ ನಮಗಿಲ್ಲ . ನಮ್ಮ ತಪ್ಪುಗಳನ್ನು ಎತ್ತಿ ತೋರಿಸುವ ನೈತಿಕ ಹಕ್ಕು ಜನರಿಗೆ ಇದೆ . ಅವರ ಮಾತುಗಳನ್ನು ,ಭಾವನೆಗಳನ್ನು ಕೇಳಿಸಿಕೊಳ್ಳೋಣ ಎಂಬ ದೃಷ್ಟಿಯಿಂದ  ಇಲ್ಲಿ ಪ್ರಕಟಿಸುತ್ತಿದ್ದೇವೆ ಹೊರತು ಯಾರನ್ನೂ  ಹಂಗಿಸುವ ಉದ್ದೇಶ ಇಲ್ಲಿಲ್ಲ .
ಪ್ರಥಮ್ -ಸಂಜನಾ ಜೊತೆ ರಾತ್ರಿ ಕಳೆದ್ರಾ ?
ಇದು ಇವತ್ತು ಮಾಧ್ಯಮಗಳಲ್ಲಿ ಚರ್ಚೆ ವಿಷಯ. ನಾನು ಸಂಜನಾ ಸ್ಥಾನದಲ್ಲಿ ನಿಂತಾಗ ನನ್ನನ್ನು ಕೇಳಿದ್ರೆ ಹೌದು ಏನಿವಾಗ..? ಅನ್ನೋ ಪ್ರಶ್ನೆ ಕೇಳ್ತೀನಿ. ಅದೇ ಓರ್ವ ಪತ್ರಕರ್ತೆ ಸ್ಥಾನದಲ್ಲಿ ನಿಂತಾಗ ಕೇಳಿದ್ರೆ ನಮಗೆ ಯಾಕೆ ಬೇಕು ಅವರು ಯಾರ ಜೊತೆ ಇದ್ದರೆ ಏನಂತೆ ಬಿಟ್ಟುಬಿಡಿ. ವಂಚನೆ  ಮಾಡಿದರೆ ಮಾತ್ರ ನೀವು ಎಂಟ್ರಿಯಾಗಿ ಅನ್ನೋ ಉತ್ತರ ಕೊಡ್ತೀನಿ.
ಅದೇನೇ ಇರಲಿ ಪ್ರಥಮ್ ಹಾಗೂ ಸಂಜನಾ ಬಿಗ್ ಬಾಸ್ ನಲ್ಲಿ ಒಟ್ಟಿಗೆ ಸ್ಪರ್ಧಿಗಳಾಗಿದ್ದವರು. ಹೊರಗಡೆ ಬಂದ ಬಳಿಕವೂ ಹಲವಾರು ಪ್ರೊಜೆಕ್ಟ್ ಗಳಲ್ಲಿ ಒಟ್ಟಾಗಿ ಕೆಲಸ ಮಾಡ್ತಿದ್ದಾರೆ. ಒಂದು ಕೆಲಸವನ್ನು ಒಟ್ಟಿಗೆ ಮಾಡುವಾಗ ಒಮ್ಮೊಮ್ಮೆ ಒಟ್ಟಿಗೆ ಹೋಗುವುದು, ಹೋಟೆಲ್ ನಲ್ಲಿ ಊಟಕ್ಕೆ ಹೋಗುವುದು ಸಹಜ. ಅಷ್ಟಿದ್ದ ಮಾತ್ರಕ್ಕೆ ನೀವು ಯಾರೊಂದಿಗೋ ಸಂಬಂದ ಕಲ್ಪಿಸಿಬಿಟ್ಟರೇ..? ಇದೇನಾ ಸಮಾಜದಲ್ಲಿ ನಾಲ್ಕನೆ ಅಂಗವಾಗಿ ಕೆಲಸ ಮಾಡುವ ಪರಿ..? ಯಾರೋ ಕೊಟ್ಟ ಸುದ್ದಿಯ ಸತ್ಯಾಸತ್ಯತೆ ತಿಳಿಯದೆ   ಮಾಧ್ಯಮಗಳು  ಅಷ್ಟೊಂದು ಬೊಬ್ಬಿರಿದು ಚರ್ಚೆ ಮಾಡುವ ಅಗತ್ಯವಿತ್ತೇ ಅನ್ನೋದನ್ನ ತಮ್ಮ ಹೃದಯ ಮುಟ್ಟಿ ಕೇಳಿಕೊಳ್ಳಿ.
ನಾನು ಊಟಕ್ಕೆ ಹೋಗುವಾಗ ನನ್ನ ಸಹೋದ್ಯೋಗಿಗಳ ಜೊತೆ ಹೋಗ್ತೀನಿ. ಹಾಗಾಗ ಫೋಟೋಗಳನ್ನು ಕ್ಲಿಕ್ಕಿಸುತ್ತೀನಿ.. ಅವರಿಗೂ ನನಗೂ ಸಂಬಂಧ ಕಲ್ಪಿಸಿದ್ರೆ ಮೆಟ್ಟಲ್ಲಿ ಹೊಡಿತೀನಿ. ಅದೇ ರೀತಿ ನಿಮಗ್ಯಾಕೆ ರೀ ಅವರ ವೈಯಕ್ತಿಕ ವಿಚಾರ.? ಅವರು ಸೆಲೆಬ್ರಿಟಿಗಳು ಅನ್ನೋ ಕಾರಣಕ್ಕೆ ಯಾರ ಜೊತೆಯೂ ಹೊರಗೆ ಹೋಗಲೇ ಬಾರದೆ.? ನಿಮ್ಮ ಕ್ಷೇತ್ರದಲ್ಲಿ ಎಷ್ಟು ಜನ ಕಾಮುಕರಿಲ್ಲ ? ಅವರ ಬಗ್ಗೆ ಮಾತ್ರ ಗ್ಯಾಪ್ ಚುಪ್ ಅಂತೀರಿ. ಹೋಗ್ಲಿ  ಪ್ರಥಮ್ -ಸಂಜನಾ  ಅವರೇನಾದರೂ ಸಮಾಜಕ್ಕೆ ಮಾರಕವಾಗುವಂತ ತಪ್ಪನ್ನು ಮಾಡಿದರೆ ಖಂಡಿತ ಕೇಳಿ, ಕೆಲವೊಂದಿಷ್ಟು ಜನ ನಿಮ್ಮನ್ನು ಫಾಲೋ ಮಾಡ್ತಾರೆ, ನೀವೇ ಹೀಗೆ ಮಾಡಿದರೆ ಹೇಗೆ.? ಅಂತಾ. ಅದನ್ನು ಬಿಟ್ಟು ಅವಳು ಅವನ ಜೊತೆ ಹೋದಳಂತೆ, ಇವನಿಗೆ ಹುಡುಗಿಯರ ಚೂಲಿದೆಯಂತೆ ಅಂತೆಲ್ಲಾ ವಿವಾದ ಮಾಡ್ತೀರಲ್ಲ ನಾಚಿಕೆ ಆಗ್ಬೇಕು ನಿಮಗೆ.
ಸಂಜನಾ ಸ್ಥಾನದಲ್ಲಿ ನಿಮ್ಮ ಮಗಳನ್ನೋ ಅಕ್ಕ,ತಂಗಿಯನ್ನೋ ಒಮ್ಮೆ ಕಲ್ಪಿಸಿಕೊಳ್ಳಿ, ಒಂದು ವೇಳೆ ನಿಮ್ಮ ಮಗಳೋ ಅಕ್ಕ ತಂಗಿಯೋ ಅವರ ಸ್ನೇಹಿತರ ಜೊತೆ ಊಟಕ್ಕೋ ಕಾಫಿಗೋ ತಮ್ನ ಸ್ನೇಹಿತರ ಜೊತೆ ಹೋದಾಗ ಮೂರನೇ ವ್ಯಕ್ತಿ ನಿಮ್ಮವರ ಬಗ್ಗೆ ಇದೇ ರೀತಿ ಮಾತನಾಡಿದರೆ ನೀವು ಏನು ಮಾಡುತ್ತೀರಿ ಎಂಬ ಅರಿವು ಇದೆಯೇ.?
ಪಾಶ್ಚಿಮಾತ್ಯ ರಾಷ್ಟ್ರಗಳಲ್ಲಿ ಹೆಣ್ಣು, ಗಂಡು ಪ್ರಾಯ ವ್ಯವಸ್ಥೆಗೆ ಬಂದ ಬಳಿಕ ತಂದೆ ತಾಯಂದಿರೇ ಅವರ ಸ್ವಂತ ವಿಚಾರಕ್ಕೆ ತಲೆ ಹಾಕುವುದಿಲ್ಲ. ಆದರೆ ಆಕೆ ತನ್ನ ತಾಯಿ ಜೊತೆ ಒಂದು ಕಾರ್ಯಕ್ರಮಕ್ಕೆ ಹೋಗಿ ಬಂದರೆ ಸಂಬಂಧವನ್ನೇ ಕಲ್ಪಿಸಿ ಬಿಟ್ಟಿರಲ್ಲ ಶಹಬ್ಬಾಸ್. ನಿಮ್ಮ ಸಮಾಜ ಮುಖಿ ಚಿಂತನೆಗೆ ನಿಮಗೆ ನೀವೇ ಬೆನ್ನು ತಟ್ಟಿಕೊಳ್ಳಬೇಕು.
ನಿಜಾ ಸ್ವಾಮಿ ಜನರಿಗೆ ನಕಾರಾತ್ಮಕ ವಿಚಾರಗಳನ್ನು ಹೇಳುತ್ತಾ ಸಾಗಿದರೆ ಆಕರ್ಷಣೆ  ಮಾಡೋದು ಸುಲಭ. ಹಾಗಂದ ಮಾತ್ರಕ್ಕೆ ನೀವು ಕೇವಲ ನಕಾರಾತ್ಮಕ ವಿಚಾರಗಳ ಹಿಂದೆ ಬಿದ್ದು ಸಮಾಜವನ್ನು ಯಾವ ದಿಕ್ಕಿಗೆ ಕೊಂಡೊಯ್ಯುತ್ತಿದ್ದೀರಿ ಅನ್ನೋ ಬಗ್ಗೆ ಕ್ಷಣ ಮಾತ್ರ ಯೋಚಿಸಿ. ಸಾಧ್ಯ ಆದರೆ ಮುಂದಾದರೂ ಒಳ್ಳೆಯ ವಿಚಾರಗಳನ್ನು ಹೇಳಿ ಸಮಾಜದ ಹಿತ ಕಾಪಾಡುವ   4ನೇ ಅಂಗ ಅನ್ನೋದನ್ನ ಸಾಬೀತು ಮಾಡಿ.
ಒಂದು ಹೆಣ್ಣು ಹುಡುಗಿಯ ಭವಿಷ್ಯದ ಪ್ರಶ್ನೆ ಅನ್ನೋದನ್ನು ಯೋಚಿಸದೇ ತಮ್ಮ ಬೇಳೆ ಬೇಯಿಸಿಕೊಂಡ ನಿಮ್ಮ ದೊಡ್ಡತನಕ್ಕೆ ಸಲಾಮು. ಆ ಸುದ್ದಿ ನಿಜವಾದರೂ ಅಪರಾಧ ಅಲ್ಲ ಅನ್ನೋ ಕನಿಷ್ಠ ಜ್ಞಾನ ಇಲ್ಲದಾಗಿದ್ದು ಮಾತ್ರ ದುರಂತ. ಸತ್ಯವೋ ಮಿಥ್ಯವೋ ಸಂಜನಾ ಪ್ರತಿಕ್ರಿಯೆ ಕೊಡಬಾರದಿತ್ತು. ಕೋರ್ಟ್‌ ಮೂಲಕ ಕಾನೂನು ಕ್ರಮ ಕೈಗೊಂಡು ನನ್ನ ಮೇಲೆ ವೃಥಾ  ಆರೋಪ ಮಾಡಿರುವ ಇಷ್ಟು ಸಂಸ್ಥೆಗಳು ಸಾಕ್ಷಿಯನ್ನು ಹಾಜರುಪಡಿಸಲಿ, ಇಲ್ಲದಿದ್ದರೆ ನನಗೆ ಆಗಿರುವ ಮಾನಹಾನಿಗೆ ನಷ್ಟ ಕಟ್ಟಿಕೊಡಲಿ ಅಂತಾ ದೂರು ನೀಡಿದ್ದರೆ ಚೆನ್ನಾಗಿರುತ್ತಿತ್ತು.
ದಿವ್ಯಾ ಕೊಡಗು

ಪ್ರಥಮ – ಪಾಪ!

ಪ್ರಥಮ್ -ಸಂಜನಾ ನಡುವೆ  ಅಫೇರ್ ಇತ್ತಾ ಅನ್ನುವ ಸುದ್ದಿ ಎಗ್ಗಿಲ್ಲದಂತೆ ಹರಿದಾಡುತ್ತಿದೆ . ಅದರ ಸತ್ಯಾಸತ್ಯತೆ ಒಂದು ಕಡೆಗಿರಲಿ. ಪ್ರಥಮ್ ನ ಮಾತು ,ಉಡಾಫೆ ಗಳ ಪ್ರದರ್ಶನವನ್ನ  ಗಮನಿಸುತ್ತಾ  ಬಂದ ಆಶಾ ವಿಶ್ವನಾಥ್ ಆತನ ಹುಚ್ಚಾಟಗಳ ಹಿಂದಿನ ಮನಃಸ್ಥಿತಿಯ ಬಗ್ಗೆ ತಮ್ಮ ಅನಿಸಿಕೆ ದಾಖಲಿಸಿದ್ದಾರೆ ಓದಿ ನೋಡಿ .
ಒಳ್ಳೇ ಹುಡುಗ, ಲೋಕಲ್, ಮೆಂಟಲ್, ಕಿರಿಕ್, ಹುಚ್ಚ , ಕಿಚ್ಚ……….
ಇಂಥ ಹತ್ತು ಹಲವು ಚಿತ್ರ ವಿಚಿತ್ರ ಟೈಟಲ್‍ಗಳನ್ನ ಹೆಸರಿನ ಹಿಂದೆ ಅಂಟಿಸೋದು ಯಾರು?
ಹೀಗೆ ಕೇವಲ ಹೆಸರುಗಳ ಬೆನ್ನು ಹತ್ತಿ ಪ್ರಸಿದ್ಢಿ ಪಡೆಯೋದಕ್ಕೆ ಸಾಧ್ಯವಾ?
ಏನಾದ್ರೂ ಮಾಡಿ ಒಟ್ಟಾರೆ famous ಆಗ್ಬೇಕು ಅನ್ನೋ ಹಪಹಪಿಯಲ್ಲಿ extraordinary ಮಾರ್ಗದಲ್ಲಿ ಹೋಗಿ ಪಡೆದುಕೊಳ್ಳೋ publicity ಎಷ್ಟು ದಿನ ಸಾಥ್ ಕೊಡುತ್ತೆ?
ನಾಲ್ಕು ಜನರ ಮಧ್ಯೆ ನಾನೇ ಬೇರೆ, ನನ್ನ ಸ್ಟೈಲೇ ಬೇರೆ ಅಂತ ಛಾಪು ಮೂಡಿಸಬೇಕು ಅನ್ನೋ ತರಾತುರಿಯಲ್ಲಿ ಉತ್ತೇಜಿತರಾಗಿ ಮುನ್ನಡೆದ್ರೆ famous ಆಗಬಹುದೇನೋ ಆದ್ರೆ ಆ ಪ್ರಸಿದ್ಢಿ, ಹೆಸರು ಎಷ್ಟು ದಿನ ನಮ್ಮೊಂದಿಗಿರುತ್ತೆ?
ರಿಯಾಲಿಟಿ ಷೋಗಳಲ್ಲಿ ಗೆದ್ದ ಮಾತ್ರಕ್ಕೆ ಜೀವನ ಗೆಲ್ಲುವ ಕಲೆ ಕರಗತವಾಗುತ್ತಾ?
ರಾತ್ರೋರಾತ್ರಿ ದಕ್ಕುವಂಥ popularity ಯ ಸತ್ವ ಎಷ್ಟು?
ಉಫ಼್……………….. ಇಂಥ ಹಲವಾರು ಪ್ರಶ್ನೆಗಳು ನನ್ನನ್ನು ಕಳೆದ 2 ದಿನಗಳಿಂದ ಮತ್ತೆ ಕಾಡ್ತಿರೋದಕ್ಕೆ ಕಾರಣ once again, BIGG BOSS ಮತ್ತು ಈ ಸೀಸನ್ನಿನ ವಿಜೇತ ಪ್ರಥಮ.
ಪಾಪ, ಇನ್ನೂ ಮಾಗದ ವಯಸ್ಸು, ಜೀವನದ ಜಂಜಾಟದಲ್ಲಿ ಏನೇನೂ ಇಲ್ಲದ ಅನುಭವ, ಆಗಸಕ್ಕೇ ಲಗ್ಗೆ ಇಟ್ಟು ಕೆಳಗೆ ಕಂಡಿದನ್ನೆಲ್ಲವನ್ನ ಖಂಡಿಸಿ ದಕ್ಕಿಸಿಕೊಳ್ಳಬಲ್ಲೆ ಎಂಬ ಹುಚ್ಚು ಹುಂಬತನ. ಇವೆಲ್ಲವೂ ಮೇಳೈಸಿರುವ ಪ್ರಥಮನ ಈಗಿನ ಸ್ಥಿತಿಗೆ ಅವನಿಗೆ ಓಟು ಹಾಕಿ ಗೆಲ್ಲಿಸಿ ತಪ್ಪು ಮಾರ್ಗ ತೋರಿಸಿದ ನಮ್ಮೆಲ್ಲರ ಬೇಜವಾಬ್ದಾರಿಯೇ ಕಾರಣ ಅನ್ನಿಸೋಲ್ವಾ?
ಏನೇನೂ ಸತ್ವವೇ ಇಲ್ಲದೆ ಕೇವಲ ಜೊಳ್ಳು ಆರ್ಭಟದ ಮಾತುಗಾರಿಕೆಯನ್ನೇ ಬಂಡವಾಳ ಮಾಡಿಕೊಂಡವನನ್ನು ಗೆಲ್ಲಿಸಿ ಹುಚ್ಚು ಆಸೆಯ ಮರೀಚಿಕೆಯ ಬೆನ್ನಮೇಲೇರಿಸಿದ್ದಕ್ಕೆ ಓಟು ಮಾಡಿದವರೇ ಕಾರಣವಾಗೋದಿಲ್ವೆ?
ಉದ್ಭವ ಮೂರ್ತಿಗಳೇ “ಉತ್ಸವ-ಮೂರ್ತಿ”ಗಳಾಗುತ್ತಿರುವ ಸಾಧ್ಯತೆ ಹೆಚ್ಚಾಗಿರುವ ಈ ದಿನಗಳಲ್ಲಿ,  ಕಲಾಕಾರನ ಕೈಗೆ ಸಿಕ್ಕು ನೊಂದು ಬೆಂದು ಕೆತ್ತಿಸಿಕೊಂಡು ಹೊರಹೊಮ್ಮಿದ ಮೂರ್ತಿಗಳು ಮಾತ್ರವೇ ನಿತ್ಯ ಪೂಜೆ ಮಾಡಿಸಿಕೊಳ್ಳಲು ಶ್ರೇಷ್ಠ ಅನ್ನೋದನ್ನು ನಾವು ಮರೆತಂತಿದೆ.
ಪ್ರಥಮ ಪಾಪ, attention seeking, extraordinary exhibition of self success,  ಕೀಳರಿಮೆ, ಅದನ್ನು ಮುಚ್ಚಿಕೊಳ್ಳಲೊಂದಿಷ್ಟು ಆರ್ಭಟಭರಿತ ಮಾತಿನ ಮೋಡಿ, ಎಲ್ಲವನ್ನೂ ಅತಿಯಾದ ವೈಭವಕ್ಕೆ ಒಳಗಾಗಿಸುವ ಬಾಲಿಶ ಮನಸ್ಸು, ಸಮಯೋಚಿತ ನಿರ್ಧಿಷ್ಟ ನಿರ್ಧಾರ ತೆಗೆದುಕೊಳ್ಳಲಾರದ ಡೋಲಾಯಮಾನತೆ, ಹೀಗೆ ತನ್ನೆಲ್ಲ ಸ್ವಂತಿಕೆ ಇಲ್ಲದ  ವ್ಯಕ್ತಿತ್ವ-ಕೊರತೆಗಳೊಂದಿಗೆ ಹೇಗೋ ನಾಲ್ಕರೊಳಗೊಂದಾಗಿ ತನ್ನ ಪಾಡಿಗೆ ತಾನಿದ್ದವ. ಬಿಗ್‍ಬಾಸ್ ಅನ್ನುವ ರಿಯಾಲಿಟಿ ಷೋಗೆ ಉಬ್ಬಿಸಿ ಕೊಬ್ಬಿಸಿ ಕರೆತಂದು ಗೆಲ್ಲಿಸಿ ಆಚೆಗಟ್ಟಿದ ಮಂದಿ ಈಗ ಅವನ ಜೀವನಕ್ಕೊದಗುವರೇ?
ಮುಖವಾಡದ ಜೀವನ ತುಂಬ ದಿನ ಜೊತೆಗೊದಗದು! ’ಪ್ರಸಿದ್ಧಿ’ಗಿಂತ ’ಸಾಧನೆ’ ಬೇಕು. ಪ್ರಥಮ, ಬಿಗ್‍ಬಾಸ್ ಅನ್ನೋ ಉಫ಼ಿ ಆಟದಲ್ಲಿ ಗೆದ್ದೆ. ಬದುಕೆಂಬ ಲೆಕ್ಕಾಚಾರದ ಆಟದಲ್ಲೂ ಗೆದ್ದು ಸಮತೋಲನದ ಸಂತಸದ ನೆಮ್ಮದಿಯ ಬಾಳು ಬಾ………………..
-ಆಶಾ ವಿಶ್ವನಾಥ್
ಮಾನಸಿಕ ಸಲಹೆಗಾರರು .

ಕನ್ನಡಕ್ಕೆ ಡಬ್ ಆಗ್ಬೇಕಿರೋದು ಏನ್ ಗೊತ್ತಾ ?

ಡಬ್ಬಿಂಗ್ ಡಬ್ಬ ಆಗಾಗ ಬಡಿದು ಕನ್ನಡ ಚಿತ್ರರಂಗ ಅಷ್ಟೇ ಅಲ್ಲ ಮನರಂಜನಾ ವಾಹಿನಿಗಳಲ್ಲಿ ದುಡಿಯುವವರನ್ನು ಕಂಗೆಡಿಸಿದೆ. ಹಾಗೇ ನಮ್ಮ ಸಿನಿಮಾ ಕ್ಷೇತ್ರದ ಇತಿಮಿತಿಗಳನ್ನು ಬಲ್ಲ, ಮುಂದಾಲೋಚಿಸುವ ಬುದ್ದಿಮತ್ತೆಯುಳ್ಳ ಕೆಲವರು ತೀವ್ರವಾಗಿ ಡಬ್ಬಿಂಗ್ ಯಾಕೆ ಬೇಕಿಲ್ಲ ಎಂಬ ಬಗ್ಗೆ ಎಚ್ಚರಿಸುವ ಪ್ರಯತ್ನ ಮಾಡಿದ್ದಾರೆ. ಕನ್ನಡ ಚಿತ್ರ ಜಗತ್ತನ್ನು ಅರಿತಿರುವ ಮಾಯಾಲೋಕದಲ್ಲಿ ಪೂರ್ಣಚಂದ್ರ  ಡಬ್ಬಿಂಗ್ ಬೇಕಿರುವುದು ಎಲ್ಲಿಗೆ ?  ಎನ್ನುವ ಕೆಲವು  ಅರ್ಥಪೂರ್ಣ ಸಂಗತಿಗಳನ್ನಿಲ್ಲಿ  ಹಂಚಿದ್ದಾರೆ .

national geography

1)ಕನ್ನಡಕ್ಕೆ ಡಬ್ಬಿಂಗ್ ಆಗಬೇಕಾಗಿದ್ದುdiscovery ಮತ್ತು national georgaphic channelsನ programs ಹೊರತು ಸಿನಿಮಾ ಮತ್ತು ಧಾರಾವಾಹಿಗಳಲ್ಲ.

2)ತಮಿಳು ಮತ್ತು ತೆಲುಗಿನಲ್ಲಿ ಸಿನಿಮಾ ಮತ್ತು ರಾಜಕೀಯ ರಕ್ತಗತವಾಗಿ ಬಂದಿದೆ. ತಮಿಳಿನಲ್ಲಿ 36%, ತೆಲುಗಿನಲ್ಲಿ 39%, ಸಿನಿಮಾ viewers ಇದ್ದಾರೆ, ಆದರೆ ಕರ್ನಾಟಕ ದಲ್ಲಿ 14% viewers ಇರುವುದು.ಹಾಗಾಗಿ ಅಲ್ಲಿ ಡಬ್ಬಿಂಗ್ ನಿಂದ ಯಾವುದೇ ಸಮಸ್ಯೆ ಆಗಲಿಲ್ಲ.

3)ಗಡಿ ಭಾಗದಲ್ಲಿ ಪರಭಾಷೆ ಸಿನಿಮಾ ಪ್ರದರ್ಶಕರ ಹಿಡಿತ ಇರುವುದರಿಂದ ಡಬ್ ಆದರೂ ಅಲ್ಲಿ ಬಿಡುಗಡೆ ಆಗಲು ಸಾಧ್ಯವೇ ಇಲ್ಲ.

4)ಇಲ್ಲಿ ಡಬ್ಬಿಂಗ್ ಪರ ವಕಾಲತ್ತು ವಹಿಸಿಕೊಂಡ ನಿರ್ಮಾಪಕರ್ಯಾರು ಬೌದ್ಧಿಕ ಬೆಳವಣಿಗೆಗೆ ಸಹಾಯ ಆಗುವಂತ ಸಿನಿಮಾ ಡಬ್ ಮಾಡುವುದಿಲ್ಲ.

5)ತಮ್ಮ ಜೇಬು ಬರ್ತಿಯಾಗುವಂತ ಪಕ್ಕ ಕಮರ್ಷಿಯಲ್ ಸಿನಿಮಾ ಮಾಡುತ್ತಾರೆ. ಅವುಗಳು ಬಿಡುಗಡೆ ಆಗುವುದು ಸಹ ಕನ್ನಡ ಸಿನಿಮಾ ಪ್ರದರ್ಶಿಸುವ ಚಿತ್ರಮಂದಿರಗಳಲ್ಲೆ.!

ಹಾಗಾಗಿ ಕನ್ನಡಕ್ಕೆ ಡಬ್ಬಿಂಗ್ ಅವಶ್ಯಕತೆ ಇಲ್ಲ.

ನಿಲ್ಲದಿರಲಿ “ಸುಹಾನಾ” ಸುಮಧುರ ಗಾನಯಾನ …

ಇವತ್ತು ವಿಶ್ವ ಮಹಿಳಾ ದಿನಾಚರಣೆ, ಮಹಿಳೆ ಕುಟುಂಬ ನಿರ್ವಹಣೆ ಜೊತೆಗೆ ಸಮಾಜದ ಹಾಗೂ ಹೋಗುಗಳಲ್ಲೂ ಪುರುಷನೊಂದಿಗೆ ಕೈಜೋಡಿಸಿದ್ದಾಳೆ. ಆಕೆಯ ಸಾಮರ್ಥ್ಯ ಹರಿದಷ್ಟೂ ವಿಸ್ತಾರವಾಗುವ ಕಡಲಿನಂತಹುದ್ದು.

suhana1

ಮುಂದುವರೆದಿದ್ದೇವೆ ಎಂದು ಭುಜ ಕುಣಿಸುವ ನಮ್ಮವರ ಇಂದಿನ  ವಿಪರ್ಯಾಸ ಅಂದ್ರೆ ಕರ್ನಾಟಕದಲ್ಲಿ ಓರ್ವ ಯುವತಿಯ ಎದೆಗಾರಿಕೆಯನ್ನು ಪ್ರಶ್ನಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಅವಹೇಳ ಮಾಡಲಾಗುತ್ತಿದೆ.. ತಾವು ಮಾಡುತ್ತಿರುವ ಘನಂಧಾರಿ ಕೆಲಸ ಏನೆಂದು ತಿಳಿದುಕೊಳ್ಳಲಾಗದ ಮೂರ್ಖರೆಲ್ಲಾ ಇಂದು ಬೇಕಾಬಿಟ್ಟಿಯಾಗಿ ಮಾತನಾಡುತ್ತಿದ್ದಾರೆ..
ಸುಹಾನಾ, ಈಕೆ ಹೆಸರು ಕರುನಾಡಿನಲ್ಲಿ ಈಗ ಜನಜನಿತ.. ಹೌದು ಕಳೆದ ಶನಿವಾರ ಜೀ ಕನ್ನಡ ವಾಹಿನಿಯ ಸರಿಗಮಪ ಸೀಸನ್ 13ರಲ್ಲಿ ಸ್ಪರ್ಧಿಯಾಗಿ ಆಯ್ಕೆಯಾಗುವ ಮೂಲಕ ಇಡೀ ಕರ್ನಾಟಕದ ಕಣ್ಣು ತೆರೆಸಿದ್ದಾರೆ.. ಜೊತೆಗೆ ಕೆಲವೊಂದಿಷ್ಟು ಧರ್ಮಾಂಧರಿಗೆ ಆಹಾರವಾಗಿದ್ದಾರೆ.. ಮೂಲತಃ ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಭೀಮನಕೋಣೆಯ ಹುಡುಗಿ ಮಾತನಾಡಿದ್ದರಲ್ಲಿ ಯಾವುದೇ ತಪ್ಪಿಲ್ಲ.. ಹಾಗಿದ್ದರೂ ಧರ್ಮ, ಆಚಾರ ವಿಚಾರ ಅಂತಾ ಬೊಗಳೆ ಬಿಡುವ ಮಂದಿ ಒಂದು ಹೆಣ್ಣು ಅನ್ನೋದನ್ನು ಬಿಟ್ಟು ಬಾಯಿಗೆ ಬಂದಂತೆ ಬೊಗಳುತ್ತಿದ್ದಾರೆ..

suhana4ವಿಷಯಕ್ಕೆ ಬರೋಣ, ಮುಸ್ಲಿಂ ಧರ್ಮದಲ್ಲಿ ಕೆಟ್ಟದನ್ನು ಮಾಡಬಾರದು ಅನ್ನೋ ನಿಯಮಗಳಿವೆ.. ಅದಕ್ಕಾಗಿ ಅವರು ಕುಡಿತದ ಚಟಕ್ಕೆ ದಾಸರಾಗುವುದಿಲ್ಲ, ವೇಶ್ಯಾವಟಿಕೆ ನಿಷಿದ್ಧ, ಹಾಗೆಯೇ ಹೆಣ್ಣು ಮಕ್ಕಳು ಸಮಾಜದಲ್ಲಿ ಕೆಟ್ಟ ರೀತಿಯಲ್ಲಿ ಕಾಣಿಸಿಕೊಳ್ಳಬಾರದು ಅನ್ನೋ ಕಾರಣಕ್ಕೆ ಮುಖ ಮುಚ್ಚಿಕೊಂಡು ಓಡಾಡಲು ಸ್ಕಾರ್ಪ್, ಹಿಜಾಬು, ಬುರ್ಖಾ ಧರಿಸುವಂತೆ ಸಲಹೆ ನೀಡ್ತಾರೆ ಇದನ್ನ ಪಾಲಿಸ್ತಾರೆ ಕೂಡ.. ಇದನ್ನು ನಾವು ಅಂದ್ರೆ ಹೆಣ್ಣು ತೋರಿಕೆ ವಸ್ತುವಲ್ಲ ಅಂತಾ ನಂಬಿರುವ ನಾವೆಲ್ಲ ಒಪ್ಪಿಕೊಳ್ಳೋಣ.. ಆದ್ರೆ ಈ ಯುವತಿ ಮಾಡಿದ ಅಪರಾಧವಾದ್ರು ಏನು..? ಬುರ್ಖಾ, ಸ್ಕಾರ್ಪ್, ಹಿಜಾಬು ಎಲ್ಲವನ್ನೂ ಧರಿಸಿ ಬಂದು ತನ್ನ ಪ್ರತಿಬೆಯನ್ನು ಅನಾವರಣ ಮಾಡಿದ್ದೇ ತಪ್ಪಾಯಿತೆ..? ಇಲ್ಲಾ ಮುಸ್ಲಿಂ ಬಾಲಕಿ ಹಿಂದೂಗಳ ಭಕ್ತಿ ಗೀತೆಯನ್ನು ಹಾಡಿದ್ದು ನಿಮಗೆ ನೋವು ತರಿಸಿದೆಯೇ..? ಕಲೆಗೇಕೆ ಸ್ವಾಮಿ ಧರ್ಮದ ಸಂಕೋಲೆ ?

suhana3ಅದು ಆ ಕಡೆಗೆ ಇರಲಿ, ನಮ್ಮ ಸಮುದಾಯದ ಯುವತಿ ಒಂದು ಭಕ್ತಿ ಗೀತೆಯನ್ನು ಹಾಡಿದಳಲ್ಲಾ ಅನ್ನೋ ಹೆಮ್ಮೆ ಇರಬೇಕಿತ್ತು ಆದ್ರೆ ನಿಮಗೆ ಸಹಿಸಲಾರದ ದುಖಃ ತರಿಸಿದೆ ಅನ್ನೋದೆ ದುರಂತ.. ಆದ್ರೆ ಸುಹಾನಾ ಛಲಗಾತಿ, ಯಾಕಂದ್ರೆ ಆಡಿಷನ್ ನಡೆಯುವಾಗಲೇ ಒಂದು ಮಾತನ್ನಾಡಿದ್ದಾಳೆ.. ನನಗೆ ಯಾವುದೇ ಕಟ್ಟುಪಾಡುಗಳಿಲ್ಲ, ನನ್ನ ಪ್ರತಿಭೆಯನ್ನು ತೋರಿಸಿಕೊಳ್ಳಲು ಯಾವುದೇ ಹಿಂಜರಿಕೆ ಇಲ್ಲ.. ನನ್ನನ್ನು ನೋಡಿದ ಮೇಲಾದ್ರು ಇನ್ನೂ ಹಲವಾರು ಪ್ರತಿಭೆಗಳು ಬೆಳಕಿಗೆ ಬರಲಿ, ಕತ್ತಲಲ್ಲೇ ಕಮರಿ ಹೋಗಬಾರದು ಅನ್ನೋ ಅರ್ಥದಲ್ಲಿ ಹೇಳಿದ್ದಾರೆ.. ಇದು ಅಪ್ಪಟ ಸತ್ಯ.. ಯಾಕಂದ್ರೆ ಎಲ್ಲಾ ಸಮುದಾಯಗಳಲ್ಲೂ ಇತ್ತೀಚಿನ ದಿನಗಳಲ್ಲಿ ಸಾಕಷ್ಟು ಬದಲಾವಣೆ ಆಗಿದ್ದರೂ, ಮುಸ್ಲಿಂ ಸಮುದಾಯದಲ್ಲಿ ಮಾತ್ರ ಅದೇ ಕಟ್ಟುಪಾಡುಗಳನ್ನು ಪಾಲಿಸಲಾಗ್ತಿದೆ..

suhana2

ಸುಹಾನಾ ತಂದೆ ತಾಯಿ ಶಿಕ್ಷಿತ ಕುಟುಂಬದಿಂದ ಬಂದಿದ್ದು, ಪೋಷಕರಿಬ್ಬರೂ ಶಿಕ್ಷಕರಾಗಿದ್ದಾರೆ.. ಅವರಿಗೆ ತಮ್ಮ ಮಗಳನ್ನು ಏನನ್ನು ಮಾಡುತ್ತಿದ್ದಾಳೆ ಅನ್ನೋ ಅರಿವು ಚೆನ್ನಾಗಿದೆ.. ಅಷ್ಟೆಲ್ಲಾ ಇದ್ದರೂ ಧರ್ಮ ಅನ್ನೋ ಏಕೈಕೆ ಅಸ್ತ್ರ ಹಿಡಿದುಕೊಂಡು ಒಂದು ಹೆಣ್ಣನ್ನು ಅಪಮಾನ ಮಾಡುತ್ತಿದ್ದೀನಿ.. ಈ ನಿಮ್ಮ ಮಾತಿಗೆ ಆ ಅಲ್ಲಾಹು ಶಿಕ್ಷೆ ಕೊಡುವುದಿಲ್ಲವೇ..? ಹೆಣ್ಣನ್ನು ಗೌರವಿಸಿ ಅಂತಾ ಕುರಾನ್‍ನಲ್ಲಿ ಸ್ಪಷ್ಟವಾಗಿ ಹೇಳಿದ್ದಾರೆ ಅಲ್ಲವೇ..? ಪಾಕಿಸ್ತಾನದಲ್ಲಿ ಮಲಾಲಾ ಎಂಬಾಕೆ ಶಿಕ್ಷಣ ನಿರಾಕರಿಸುವ ಜನರನ್ನು ಎದುರಿಸಿ ಬಂದು ಹೆಣ್ಣು ಮಕ್ಕಳಿಗೆ ಶಿಕ್ಷಣ ನೀಡಿ ಎಂದಾಗ ತಾಲೀಬಾನಿಗಳು ತೀವ್ರವಾಗಿ ವಿರೋಧಿಸಿದ್ದರು.. ಅವರು ಅಲ್ಲಿ ಮಾಡಿದ ತಪ್ಪನ್ನೇ ನೀವು ಇಲ್ಲಿ ಮಾಡುತ್ತಿದ್ದೀರಿ ಎಂದರೆ ತಾಲಿಬಾನಿಗಳಿಗೂ ನಿಮಗೂ ಇರುವ ವ್ಯತ್ಯಾಸವಾದರೂ ಏನು..? ಒಮ್ಮೆ ನೀವೇ  ಪ್ರಶ್ನೆ ಮಾಡಿಕೊಳ್ಳಿ ಸ್ನೇಹಿತರೇ..!

malalaಅಭಿನಯಿಸುವುದು , ಟಿವಿಯಲ್ಲಿ ಬಂದು ಬಹಿರಂಗವಾಗಿ ಮಾತನಾಡುವುದು ಧರ್ಮ ವಿರೋಧ ಎನ್ನುವ ನೀವುಗಳು ಅದೇ ಸಲ್ಮಾನ್ ಖಾನ್, ಶಾರುಖ್ ಖಾನ್, ಅಮೀರ್ ಖಾನ್ ತೆರೆ ಮೇಲೆ ಬಂದಾಗ ಶಿಳ್ಳೆ ಹೊಡೆದು ಕೇಕೆ ಹಾಕುವುದಿಲ್ಲವೇ..? ಪವಿತ್ರ ಇಸ್ಲಾಂ ಧರ್ಮ ಪುರುಷರಿಗೆ ಒಂದು ರೀತಿ, ಹೆಣ್ಣು ಮಕ್ಕಳಿಗೆ ಒಂದು ರೀತಿ ಇದೆಯೇ..?ಭಗವಂತ ಪಕ್ಷಪಾತಿಯಾಗಲು ಸಾಧ್ಯವೇ ? ಭೇಧವೆಣಿಸದ ಉದಾತ್ತನಲ್ಲವೇ ?

ಹೆಣ್ಣಾದ ಮಾತ್ರಕ್ಕೆ ಸಮಾಜದಲ್ಲಿ ಮಾತನಾಡುವುದು ತಪ್ಪು ಎಂದರೆ ಸಂವಿಧಾನ ಕೊಟ್ಟಿರುವ ಹಕ್ಕನ್ನು ಕಿತ್ತುಕೊಂಡಂತೆ ಆಗುವುದಿಲ್ಲವೇ.. ಇಂದು ಒಬ್ಬ ಸುಹಾನ ಎತ್ತಿರುವ ಪ್ರಶ್ನೆಯನ್ನು ಸಮಾಜದ ಎಲ್ಲಾ ಮನೆಯ ಹೆಣ್ಣು ಮಕ್ಕಳು ಕೇಳಿದರೆ ತಂದೆ ತಾಯಿಗಳಾದ ನೀವುಗಳು ಒಪ್ಪುವುದಿಲ್ಲವೇ..? ಕೆಟ್ಟ ಕೆಲಸ ಮಾಡುವುದಕ್ಕೆ ಎಲ್ಲಾ ಧರ್ಮದಲ್ಲೂ ವಿರೋಧವಿದೆ.. ಹಾಗಂದ ಮಾತ್ರಕ್ಕೆ ಕೆಟ್ಟ ಕೆಲಸಗಳು ನಿಂತಿವೆ ಎಂದರ್ಥವೇ..? ಇಲ್ಲ ಗೆಳೆಯರೇ ಎಲ್ಲಾ ಧರ್ಮದಲ್ಲೂ ಒಳ್ಳಯವರು ಕೆಟ್ಟವರು ಇದ್ದೇ ಇರುತ್ತಾರೆ.. ಅದೇ ರೀತಿ ಕೆಟ್ಟವರು ಇರುತ್ತಾರೆ.. ಇದನ್ನು ಬಹಿರಂಗವಾಗಿ ಒಪ್ಪಿಕೊಳ್ಳಲು ಆಗದಿದ್ದರೆ ನಿಮ್ಮ ಮನಸ್ಸನ್ನು ಒಮ್ಮೆ ಮುಟ್ಟಿ ಕೇಳಿಕೊಳ್ಳಿ ಸತ್ಯ ಗೊತ್ತಾಗುತ್ತದೆ..
ಸುಹಾನಾ ಎಂದರೆ ಸುಮಧುರ ಹಾಡುಗಳನ್ನು  ಹಾಡುವ ನಾರಿ ಎಂದರ್ಥ.. ಮಲೆನಾಡಿನ ಸೈಯದ್ ಮುನೀರ್ ಹಾಗೂ ನಸ್ರೀನ್ ಪರ್ವಿನ್ ಅವರ ಪುತ್ರಿ ಯಾವುದೋ ಘೋರ ಅಪರಾಧ ಮಾಡಿದ್ದಾರೆ ಎಂದು ಹೆಣ್ಣನ್ನು ಕೀಳಾಗಿ ಕಾಣುವ ಬದಲು ಆಕೆ ನಿಮ್ಮ ಮನೆ ಹುಡುಗಿ ಎಂದು ಪ್ರೀತಿಸಿ, ಸಾಧ್ಯವಾದರೆ ಆಕೆಯನ್ನು ಬೆಂಬಲಿಸಿ.. ಇಲ್ಲದಿದ್ದರೆ ತೆಪ್ಪಗೆ ನಿಮ್ಮ ಕೆಲಸವನ್ನು ನೀವು ನೋಡಿಕೊಳ್ಳಿ.. ಇನ್ನೊಬ್ಬರನ್ನು ಹಿಯ್ಯಾಳಿಸುವುದಕ್ಕಿಂತ ತಾನು ಸಮಾಜಕ್ಕೆ ಏನು ಕೊಡುಗೆ ಕೊಟ್ಟಿದ್ದೇನೆ ಅನ್ನೋದನ್ನು ನೋಡಿಕೊಳ್ಳಿ.. ಈಗಾಗಲೇ ಹಿಂದಿ ಸರಿಗಮಪ ಕಾರ್ಯಕ್ರಮದಲ್ಲಿ ಅನೇಕ ಮುಸ್ಲಿಂ ಹೆಣ್ಣು ಮಕ್ಕಳು ಹಾಡಿದ್ದಾರೆ, ಅದೇ ರೀತಿ ಅದೆಷ್ಟೋ ಪಾಕಿಸ್ತಾನಿ ಯುವತಿಯರು ಬಂದು ಹಾಡಿ ಹೋಗಿದ್ದಾರೆ.. ಕಲೆಗೆ ಧರ್ಮ, ಜಾತಿ, ಸಂಪ್ರದಾಯ, ಉಡುಗೆ ತೊಡುಗೆಯ ಅಡ್ಡಿಯಿಲ್ಲ.. ಅವರು ರಾಮನನ್ನು ಭಜಿಸಿದ್ರೆ ಹಿಂದು, ಅಲ್ಲಾಹುನನ್ನ ನೆನೆದರೆ ಮುಸ್ಲಿ, ಯೇಸುವನ್ನು ಆರಾಧಿಸಿದರೆ ಏಸು..
ಇನ್ನೊಂದು ನೀವು ಹೆಮ್ಮೆ ಪಡುವ ವಿಚಾರ ಅಂದ್ರೆ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತದ ಮೂಲ ಇಸ್ಲಾಂ.. ಅದೂ ಅಲ್ಲದೆ ಮುಸ್ಲಿಂ ಹಾಡುಗಾರರ ಪಟ್ಟಿ ನೋಡುವುದಾದರೆ ಮಹೇರ್ ಜಾಯ್ನ್, ಸಮಿ ಯೂಸಫ್, ಮಹಮದ್ ರಫಿ, ಜಾಯ್ನ್ ಮಲ್ಲಿಕ್,  ಇಮ್ರಾನ್ ಖಾನ್, ಅತೀಫ್ ಅಸ್ಲಾಮ್ ಹೀಗೆ ಪಟ್ಟಿ ಬೆಳೆಯುತ್ತಲೇ ಸಾಗುತ್ತದೆ.. ಈ ಹಾಡುಗಾರರ ಮಕ್ಕಳು, ಹೆಣ್ಣುಮಕ್ಕಳು ನಾನು ಹಾಡು ಹಾಡುತ್ತೇನೆ ಎಂದರೆ ಬೇಡ ಎನ್ನುತ್ತಾರೆಯೇ..? ಯೋಚನೆ ಮಾಡಿ ಉತ್ತರ ಕಂಡುಕೊಳ್ಳುವ ಪ್ರಯತ್ನ ಮಾಡಿ..

suhana5

ನಾನು ಬರೆದಿರುವ ಅಭಿಪ್ರಾಯ ಸರಿಯಾಗಿದೆ ಎನ್ನುವುದಾದರೆ ನೀವು ನೂರಾರು ಜನರಿಗೆ ಇದನ್ನು ಶೇರ್ ಮಾಡುವ ಮೂಲಕ ಬೆಂಬಲಿಸಿ.. ಸುಹಾನ ನೀನು ಹಾಡುವಷ್ಟೂ ದಿವಸ ನಾನು ಸರಿಗಮ ನೋಡುತ್ತೇನೆ ಗೆಳತಿ.. ನೀನಿಟ್ಟ ಹೆಜ್ಜೆ ಹಿಂದಿಡಬೇಡ.. ಮುನ್ನುಗ್ಗು ನಿನ್ನ ಸಾಧನೆಯ ಹಾದಿ ದೊಡ್ಡದಾಗಿರಲಿ.. ನೀನಂದು ಹೇಳಿದ ಮಾತುಗಳು, ಶಿವಮೊಗ್ಗದಲ್ಲಿ ಸೃಷ್ಠಿಯಾಗಿದ್ದ ಕೋಮು ವಿಚಾರ, ಸ್ಕಾರ್ಪ್ ಕಟ್ಟಿಕೊಳ್ಳುವ ವಿಚಾರವನ್ನು ಮರೆಸಿ ನಾವೆಲ್ಲರೂ ಒಂದು ಅನ್ನೋ ಭಾವನೆಯನ್ನು ಹುಟ್ಟು ಹಾಕಿದೆ.. ಇದೇ ನೀನು ಸಾಧಿಸಿದ್ದು.. ನಿನ್ನ ದಾರಿ ಸರಿಯಾಗಿದೆ. ಕಹಿಗಳನ್ನು ಕರಗಿಸುವ ಕಲೆಯ ಮೂಲಕ ಮುನ್ನಡೆ.. ನಾವಿದ್ದೇವೆ ಸದಾ ನಿನ್ನೊಂದಿಗೆ.. 

ಜೋಮ, ಶಿವಮೊಗ್ಗ

ಇತಿಹಾಸ ಸೃಷ್ಟಿಸಿದ “ಭಾರತ ಭಾಗ್ಯ ವಿಧಾತ”

 ಭಾರತ ಭಾಗ್ಯ ವಿಧಾತ!!  ಹಿಂದೆಂದೂ ಕಂಡರಿಯದ ರೀತಿಯಲ್ಲಿ ಅಪರಿಮಿತ ಯಶಸ್ಸು ಕಂಡ  ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ಧ್ವನಿ -ಬೆಳಕು;ದೃಶ್ಯ ವೈಭವಗಳ ರೂಪಕ. ನಾಡಿನಾದ್ಯಂತ ಸಂಚರಿಸಿ ಜನಮನವನ್ನು ತಲುಪಿ ಬಂದು ಇಂದು ಮತ್ತು ನಾಳೆ  ಬೆಂಗಳೂರಿನ ಬಸವೇಶ್ವರ ನಗರದ ಡಾ. ಬಿ. ಆರ್. ಅಂಬೇಡ್ಕರ್ ಕ್ರೀಡಾಂಗಣದಲ್ಲಿ ಅಮೋಘ ಪ್ರದರ್ಶನಕ್ಕೆ ಸನ್ನದ್ಧವಾಗಿದೆ.

Inivitation2 ನಿಜಕ್ಕೂ “ಭಾರತ ಭಾಗ್ಯ ವಿಧಾತ” ಇತಿಹಾಸ ಸೃಷ್ಟಿಸಿದ ವಿನೂತನ ಕಾರ್ಯಕ್ರಮ. ದೂರದರ್ಶಿತ್ವ, ಸೃಜನಶೀಲತೆ, ಶ್ರದ್ಧೆ , ಬದ್ಧತೆಯ ಬಲದಿಂದ ರೂಪುಗೊಂಡಿರುವುದೇ ಇದರ ಯಶಸ್ಸಿನ ಗುಟ್ಟು. ಯಶದ  ಸೌಧದ  ಹುಟ್ಟಿನ ಘಳಿಗೆ ,ಬೆಳೆದ  ಪರಿ ಎಲ್ಲವನ್ನೂ ಅಕ್ಷರ ರೂಪದಲ್ಲಿ ಹರಿಸಿದ್ದಾರೆ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ನಿರ್ದೇಶಕರಾದ  ಎನ್ ಆರ್ ವಿಶುಕುಮಾರ್.

vish1

ಅಂಬೇಡ್ಕರ್ ಅವರ ಚಿತ್ರ ಸದಾ ನನ್ನ ಚಿತ್ತವನ್ನು ಕಾಡುತ್ತದೆ .ನಮ್ಮ ದೇಶ ಅವರನ್ನು ಏಕೆ ಒಮ್ಮನಸ್ಸಿನಿಂದ ಒಪ್ಪಿಕೊಳ್ಳುತ್ತಿಲ್ಲ? ಗಾಂಧೀಜಿಯವರನ್ನು ಮಹಾತ್ಮ ಎಂದು ಸಂಭೋದಿಸಿದ ಭಾರತ ಅವರನ್ನು ಏಕೆ ಕೇವಲ ‘ಸಂವಿಧಾನ ಶಿಲ್ಪಿ’ ಎಂದಷ್ಟೇ ಕರೆದು ಸುಮ್ಮನಾಗುತ್ತಿದೆ?

ಗಾಂಧಿ ಮತ್ತು ಅಂಬೇಡ್ಕರ್ ನಡುವೆ ಮಧುರ ಸಂಬಂಧ ಇರಲಿಲ್ಲ. ಅಂಬೇಡ್ಕರ್ ಅವರ ನಡೆಗಳಿಗೆ ಗಾಂಧಿ ತಡೆಗೋಡೆ ಇಡುತ್ತಿದ್ದರು. ಅಂಬೇಡ್ಕರ್ ಕೇವಲ ತಳವರ್ಗಗಳ ಸುಧಾರಣೆಗಾಗಿ ಹೋರಾಡಿದ ನಾಯಕರು. ಭಾರತದ ಜನಸಮುದಾಯವನ್ನು ಜಾತಿಯ ಆಧಾರದಲ್ಲಿ ವಿಭಜಿಸಲು ಪ್ರಯತ್ನಿಸಿದರು.. ಇತ್ಯಾದಿಯಾಗಿ ಅಂಬೇಡ್ಕರ್  ಮತ್ತು ಗಾಂಧಿ ನಡುವಣ ಗೊಂದಲಗಳು ದೇಶದ ಕೆಲವರ  ಮನದಲ್ಲಿರುವುದನ್ನು ಕಂಡು ನನಗೆ ನೋವು ಎನಿಸುತಿತ್ತು.

8ಅಂಬೇಡ್ಕರ್ ನಮ್ಮ ದೇಶದ ಒಬ್ಬ ಮಹಾನ್ ನಾಯಕರು, ಜಗತ್ತಿನ ಪ್ರತಿಭಾವಂತ ಅರ್ಥಶಾಸ್ತ್ರಜ್ಞರು, ಅಪರಿಮಿತವಾಗಿ ದೇಶವನ್ನು ಪ್ರೀತಿಸಿದವರು, ಸಮಾಜದ ಎಲ್ಲ ವರ್ಗದ ಜನರಿಗೂ ಒಳಿತಾಗುವಂತಹ ಕಾರ್ಯಗಳನ್ನು ಮಾಡಿದ್ದಾರೆ …ಇತ್ಯಾದಿ ವಿಷಯಗಳನ್ನು ಸಾಮಾನ್ಯ ಜನರಿಗೆ ಹೇಗೆ ಮನದಟ್ಟು ಮಾಡುವುದು ಎನ್ನುವ ವಿಷಯ ನನ್ನ ಮನಸ್ಸಿನಲ್ಲಿ ಹಲವಾರು ವರ್ಷಗಳಿಂದ ಕೊರೆಯುತ್ತಲೇ ಇತ್ತು.

ಕಳೆದ ವರ್ಷ ರಾಜ್ಯದಲ್ಲಿ ಅಂಬೇಡ್ಕರ್ ಅವರ 125 ನೇ ವರ್ಷಾಚರಣೆಯ ವಿಷಯ ಪ್ರಸ್ತಾಪವಾದಾಗ ನಮಗೆ ಒಂದು ಅಪರೂಪದ ಸಂದರ್ಭ ಒದಗಿ ಬಂತು.

bharata-bhagya-vidhaata

ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಅಂಬೇಡ್ಕರ್ 125 ನೇ ವರ್ಷಾಚರಣೆಯ ಅಂಗವಾಗಿ ಒಂದು ಧ್ವನಿ -ಬೆಳಕು ಕಾರ್ಯಕ್ರಮವನ್ನು ರೂಪಿಸಲಿದೆ ಎಂದು ಆಯ -ವ್ಯಯ ಭಾಷಣದಲ್ಲಿಯೇ ಘೋಷಿಸಲಾಯಿತು.

bharatha-bhagyavidhaataನಂತರ ಅದನ್ನು ಕಾರ್ಯರೂಪಕ್ಕೆ ಇಳಿಸುವ ಬಹು ದೊಡ್ಡ ಹೊಣೆಗಾರಿಕೆ ವಾರ್ತಾ ಇಲಾಖೆಯ ಮೇಲೆ ಬಿತ್ತು . ಈಗಾಗಲೇ ಜನರ ಮುಂದೆ ಒಂದು ಜನಜನಿತ ವಾಗಿರುವ ಸಂವಿಧಾನ ಶಿಲ್ಪಿ ಎನ್ನುವ ಅಂಬೇಡ್ಕರ್ ಚಿತ್ರ ಇದೆ. ಆ ಚಿತ್ರವನ್ನು ಒಡೆದು ಅವರು  ಕೇವಲ ಸಂವಿಧಾನದ ಶಿಲ್ಪಿ ಅಲ್ಲ, ಇಡೀ ದೇಶದ ಒಳಿತಿಗಾಗಿ ಶ್ರಮಿಸಿದವರು ಎನ್ನುವ ನಮ್ಮ ಹೊಸ ಕಲ್ಪನೆಯಅಂಬೇಡ್ಕರ್ ಚಿತ್ರವನ್ನು  ಜನರ ಮುಂದೆ ಹೇಗೆ ಇಡುವುದು ಎನ್ನುವ ಹೊಯ್ದಾಟ ಶುರುವಾಯ್ತು. ದಿನನಿತ್ಯ ಇದರ ಬಗ್ಗೆ ಯೋಚಿಸುತ್ತಿರುವಾಗಲೇ ನನಗೆ ಸಿಕ್ಕಿದ್ದು ಬಿ ಎಂ ಗಿರಿರಾಜ್ ಅವರ ಒಂದು ಪುಟ್ಟ ವಿಡಿಯೋ ಕ್ಲಿಪ್.

26ಕಳೆದ ಏಪ್ರಿಲ್ 14 ರಂದು ಅಂಬೇಡ್ಕರ್ ಜಯಂತಿಯ ಸಂದರ್ಭದಲ್ಲಿ ಬಿ. ಎಂ ಗಿರಿರಾಜ್, ಸಾಮಾಜಿಕ ಜಾಲತಾಣದಲ್ಲಿ ಅಂಬೇಡ್ಕರ್ ಬಗ್ಗೆ ಮೂರು ನಿಮಿಷಗಳ ಒಂದು ಕಿರುಚಿತ್ರವನ್ನು ಹಂಚಿಕೊಂಡಿದ್ದರು. ಇದು ಹುಡುಕುತ್ತಿದ್ದ ಬಳ್ಳಿ ನನ್ನ ಕಾಲಿಗೇ ತೊಡರಿ ಬಿದ್ದ ಪ್ರಸಂಗ. ಅದರಲ್ಲಿ ಗಿರಿರಾಜ್  ಅಂಬೇಡ್ಕರ್ ಅವರನ್ನು ನನ್ನಂತೆಯೇ ಯೋಚಿಸಿ ಅವರೊಬ್ಬ  ಮೇಧಾವಿ, ಆರ್ಥಿಕ ತಜ್ಞ, ಸಮಾಜದ ಎಲ್ಲ ಜನರಿಗೆ ಒಳಿತಾಗುವ ಕಾರ್ಯ ಮಾಡಿದ್ದಾರೆ ಎನ್ನುವುದನ್ನು ಚಿತ್ರಿಸಿದ್ದರು.

ಇದು ನನ್ನ ಗಮನ ಸೆಳೆದು ಮುಂದಿನ ನಡೆಗೆ ಕಾರಣವಾಯಿತು.

38ಧ್ವನಿ ಬೆಳಕು ಕಾರ್ಯಕ್ರಮ ರೂಪಿಸುವುದು ಸುಲುಭದ ಕಾರ್ಯವಲ್ಲ. ಸಾಹಿತ್ಯ ರಚನೆ, ಸಂಗೀತ ನಿರ್ದೇಶನಕ್ಕೆ ಸೂಕ್ತವಾದವರನ್ನು ಆಯ್ಕೆ ಮಾಡಬೇಕು. ಸುಮಾರು ನೂರು ಕಲಾವಿದರು, ತಂತ್ರಜ್ಞರಿಗೆ ಎರಡು ವಾರ ತರಬೇತಿ ಆಗಬೇಕು. ಅಗತ್ಯ ವೇಷಭೂಷಣ, ರಂಗಪರಿಕರ,ಬೆಳಕು ವಿನ್ಯಾಸ, ನೃತ್ಯ ಸಂಯೋಜನೆ, ಕಲಾವಿದರ ವಾಸ್ತವ್ಯ, ಊಟ ತಿಂಡಿ ಇತ್ಯಾದಿ ವ್ಯವಸ್ಥೆಯನ್ನು ಸರ್ಕಾರಿ ನಿಯಮಾವಳಿಗಳ ಚೌಕಟ್ಟಿನಲ್ಲಿ ರೂಪಿಸಬೇಕು.

6ಇದಕ್ಕೆಲ್ಲಾ ನಮ್ಮಲ್ಲಿ ಅಷ್ಟು ಸಮಯ ಇರಲಿಲ್ಲ. ಆದರೆ ನಾವು ಈ ಸವಾಲಿನ ಕಾರ್ಯವನ್ನು ಈ ಹಿಂದೆ ನಮ್ಮ ಇಲಾಖೆಯೇ ರೂಪಿಸಿದ್ದ “ಮನುಷ್ಯ ಜಾತಿ ತಾನೊಂದೇ ವಲಂ” ಧ್ವನಿ ಬೆಳಕು ಕಾರ್ಯಕ್ರಮದ ಅನುಭವದ ನೆಲೆಯಲ್ಲಿ ಸುಲಭವಾಗಿ ಮುಂದೆ ತೆಗೆದು ಕೊಂಡುಹೋದೆವು. ಅಂಬೇಡ್ಕರ್ ಅವರ ಬಗ್ಗೆ ಒಳನೋಟ ನೀಡಲು, ಅಧ್ಯಯನ ಆಧಾರಿತ ಹೊಳಹುಗಳನ್ನು ನೀಡಲು, ಈ ಕಾರ್ಯಕ್ರಮದ ಸಾಹಿತ್ಯ, ಸಂಗೀತ ರಚನೆಗೆ ಅನುಮೋದನೆ ಪಡೆಯಲು ನಾಡಿನ ಹಿರಿಯ ಸಾಹಿತಿಗಳಾದ ಸಿದ್ದಲಿಂಗಯ್ಯ, ಎಲ್ .ಹನುಮಂತಯ್ಯ , ಬಿ. ಟಿ. ಜಾಹ್ನವಿ, ಅಂಬೇಡ್ಕರ್ ಪ್ರಶಸ್ತಿ ವಿಜೇತರಾದ ಮಾಂಬಳ್ಳಿ  ಚಿನ್ನಸ್ವಾಮಿ, ಮೈಸೂರಿನ ಅಂಬೇಡ್ಕರ್ ಅಧ್ಯಯನ ಕೇಂದ್ರದ ನಿರ್ದೇಶಕ ನರೇಂದ್ರಸ್ವಾಮಿ ಹಾಗು ಸಮಾಜ ಕಲ್ಯಾಣ, ಮತ್ತು ವಾರ್ತಾ ಇಲಾಖೆಯ ಅಧಿಕಾರಿಗಳನ್ನು ಒಳಗೊಂಡ ಒಂದು ಸಮಿತಿಯನ್ನು ಸರಕಾರದಿಂದ ರಚಿಸಿಕೊಂಡೆವು.

ಇಲ್ಲಿಗೆ ಒಂದು ಹಂತದ ಕಾರ್ಯ ಮುಗಿಯಿತು. ಎರಡನೇ ಹಂತ; ಇದು ಸೃಜನ ಶೀಲತೆಯ ಕಾರ್ಯ.

33ಇಲ್ಲಿಂದಲೇ ನಮ್ಮ ನಿಜವಾದ ಸವಾಲುಗಳು ಆರಂಭವಾದವು. ಕುಳಿತಲ್ಲಿ ನಿಂತಲ್ಲಿ ಇದರದ್ದೇ ಚರ್ಚೆ. ಕಡೆ ಕಡೆಗೆ ಇದು ಯಾವ ಹಂತಕ್ಕೆ ತಲುಪಿತೆಂದರೆ ಮನೆಯಲ್ಲಿದ್ದಾಗಲೂ ಇದರ ಆಳ ವಿಸ್ತಾರಗಳು, ಅದನ್ನು ಜನರಿಗೆ ಮನಸ್ಸಿಗೆ ಮುದ ನೀಡುವಂತೆ ಹೇಗೆ ರೂಪಿಸುವುದು ಎನ್ನುವ ಚರ್ಚೆಗಳು ಶುರುವಾದವು. ಒಂದು ದಿನ ಬಾಳ ಸಂಗಾತಿಯೊಡನೆ ನಡೆದ ಇಂತಹದೇ ಚರ್ಚೆಯಲ್ಲಿ , ಅಂಬೇಡ್ಕರ್ ತಳಸಮುದಾಯದ ಒಳಿತಿಗಾಗಿ ದುಡಿದ ಜನ ನಾಯಕರು. ಆ ತಳಸಮುದಾಯಗಳ ಜೀವಸೆಲೆಯಾದ ಜಾನಪದ ಕಲೆ ಮತ್ತು ಸಂಗೀತ ಇವುಗಳನ್ನೇ ಪ್ರಧಾನವಾಗಿಟ್ಟುಕೊಂಡು ಧ್ವನಿ ಬೆಳಕು ಕಾರ್ಯಕ್ರಮ ರೂಪಿಸುವುದೇ ಒಳ್ಳೆಯದು’ ಎನ್ನುವ ಹೊಳಹು ಧಕ್ಕಿತು. ಈ ಎಳೆಯನ್ನೇ ಹಿಡಿದು ನಾವು ಮುಂದುವರಿದೆವು.

bbv3ಈ ಹಿಂದೆ ನಮ್ಮ ಇಲಾಖೆಗಾಗಿ ‘ಮನುಷ್ಯ ‘ಜಾತಿ ತಾನೊಂದೇ ವಲಂ ‘ ಧ್ವನಿ ಬೆಳಕು ಕಾರ್ಯಕ್ರಮ ನನ್ನ ಪರಿಕಲ್ಪನೆಯಲ್ಲಿ ಮೂಡಿ ಬಂದಾಗ ನಮ್ಮ ಜೊತೆಗಿದ್ದ ಹಿರಿಯ ರಂಗ ನಿರ್ದೇಶಕ ಸಿ . ಬಸವಲಿಂಗಯ್ಯ, ಖ್ಯಾತ ಸಂಗೀತ ನಿರ್ದೇಶಕ ಹಂಸಲೇಖ, ಜನಪರ ಸಾಹಿತಿ ಕೆ.ವೈ ನಾರಾಯಣಸ್ವಾಮಿ, ಹಿರಿಯ ರಂಗ ವಿನ್ಯಾಸಕ ಶಶಿಧರ ಅಡಪ ಹಾಗು ನಾವು ಕುಳಿತು ಚರ್ಚೆ ನಡೆಸಿದೆವು.

51b746d4-8adf-4c50-9321-95eb2e6e4f14ಇಲಾಖೆಯ ಹೆಮ್ಮೆ ಹಾಗು ಪ್ರತಿಷ್ಠಿತ ‘ಅಂಬೇಡ್ಕರ್ ‘ಧ್ವನಿ ಬೆಳಕು ಕಾರ್ಯಕ್ರಮವನ್ನು ಈ ಸಾರಿ ಯುವ ಪ್ರತಿಭಾನ್ವಿತ ತಂಡದಿಂದ ಮಾಡಿಸಬೇಕು . ನಮ್ಮ ಕಣ್ಣ ಮುಂದೆಯೇ ನಮ್ಮ ಮಾರ್ಗದರ್ಶನದಲ್ಲಿ ಯುವ ತಂಡ ಇದನ್ನ ನಿಜಗೊಳಿಸಬೇಕು ಎನ್ನುವ ನನ್ನ ಸಲಹೆಯನ್ನು ಹಿರಿಯರೆಲ್ಲರೂ ಮುಕ್ತ ಮನಸ್ಸಿನಿಂದ ಸ್ವೀಕರಿಸಿದರು. ಮಹೋನ್ನತ ಆಶಯದ ಈ ಧ್ವನಿ ಬೆಳಕು ಕಾರ್ಯಕ್ರಮಕ್ಕೆ ಬಸವಲಿಂಗಯ್ಯನವರು ನಮ್ಮ ಪ್ರೀತಿಯ ‘ಬಸು ‘ ಭಾರತ ಭಾಗ್ಯ ವಿಧಾತ” ಎನ್ನುವ ಅರ್ಥವತ್ತಾದ ಹಾಗು ಆಕರ್ಷಕವಾದ ಶೀರ್ಷಿಕೆ ಸೂಚಿಸಿದರು. ಗೆಳೆಯ ಕೆ ವೈ ಎನ್ ಮುಂದೆ ಬಂದು ಶೀರ್ಷಿಕೆ ಗೀತೆ ರಚಿಸಿಕೊಟ್ಟರು. ಶಶಿ ಮನ ಸೆಳೆಯುವ ರಂಗ ವಿನ್ಯಾಸ ಮಾಡಿಕೊಟ್ಟರು. ಹಿರಿಯರ ಹಾರೈಕೆಯಲ್ಲಿ ಪ್ರತಿಭಾವಂತ ಕಿರಿಯರ ತಂಡ ರೂಪುಗೊಂಡ ಪರಿ ಇದು.

09246c69-91f3-45ca-aba8-c01ea3a9f701ಈ ಹಿರಿಯರ ಗೌರವ ಸಲಹಾ ಮಂಡಳಿಯ ಒಪ್ಪಿಗೆಯಂತೆ ಯುವ ನಿರ್ದೇಶಕ ಬಿ. ಎಂ ಗಿರಿರಾಜ್ ಸಾಹಿತ್ಯ, ನಿರ್ದೇಶನ, ಪೂರ್ಣಚಂದ್ರ ತೇಜಸ್ವಿ ಸಂಗೀತ, ಪದ್ಮಿನಿ ಅಚ್ಚಿ ನೃತ್ಯ ಸಂಯೋಜನೆ ಹಾಗು ಇನ್ನಿತರ ತಜ್ಞರ ಸಹಕಾರದಿಂದ ‘ಭಾರತ ಭಾಗ್ಯ ವಿಧಾತ’ ಕಾರ್ಯಕ್ರಮ ರೂಪಿಸುವುದು ಎಂದು ತೀರ್ಮಾನವಾಯಿತು. ಇನ್ನು ಮುಂದಿನದೆಲ್ಲ ಈಗ ನಮ್ಮ  ಕಣ್ಣ ಮುಂದೆಯೇ ಇದೆ.

“ಮನುಷ್ಯ ಜಾತಿ ತಾನೊಂದೇ ವಲಂ ” ನ ಬಹು ದೊಡ್ಡ ಪ್ರಭಾವಳಿಯಿಂದ ಹೊರಬಂದು. ” ಭಾರತ ಭಾಗ್ಯ ವಿಧಾತ ” ವನ್ನು ಕಟ್ಟಿಕೊಡುವ ಹೊಣೆಗಾರಿಕೆಯನ್ನು ನಮ್ಮ ಯುವ ತಂಡ ಸಮರ್ಥವಾಗಿ ನಿರ್ವಹಿಸಿದೆ. ನನ್ನ ಪರಿಕಲ್ಪನೆಯ ಪ್ರತಿಯೊಂದು ಆಶಯಗಳನ್ನು ಈ ಯುವ ಪ್ರತಿಭಾವಂತ ತಂಡ ಜನರ ಮನ ಮುಟ್ಟುವಂತೆ ಕಟ್ಟಿಕೊಟ್ಟಿದೆ. ಇದೆಲ್ಲಕ್ಕಿಂತ ಮಿಗಿಲಾಗಿ ನಾಡಿನ ಪ್ರಜ್ಞಾವಂತ ಜನತೆ ವಾರ್ತಾ ಇಲಾಖೆಯ ಹೆಮ್ಮೆಯ ಪ್ರಯೋಗವನ್ನು ತೆರೆದ ಹೃದಯದಿಂದ, ತುಂಬು ಮನಸ್ಸಿನಿಂದ ಸ್ವೀಕರಿಸಿದೆ . ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲಿ ಪ್ರದರ್ಶನಗೊಳ್ಳುತ್ತಿರುವ “ಭಾರತ ಭಾಗ್ಯ ವಿಧಾತ” ಕಾರ್ಯಕ್ರಮ ಈಗಾಗಲೇ ಜನಮನ ಸೂರೆಗೊಂಡಿದೆ. ನಮ್ಮ ಇಲಾಖೆಯ ಅಧಿಕಾರಿ, ಸಿಬ್ಬಂದಿಗಳು ಕಾರ್ಯಕ್ರಮದ ಯಶಸ್ಸಿನಿಂದ ಉಬ್ಬಿಹೋಗಿದ್ದಾರೆ . ವಾರ್ತಾ ಇಲಾಖೆಯ ಇತಿಹಾಸದಲ್ಲಿಯೇ ಪ್ರಥಮವಾಗಿ ಇಂತಹದೊಂದು ಮಹೋನ್ನತ ಆಶಯದ ಕಾರ್ಯಕ್ರಮವನ್ನು ನಾಡಿಗೆ ಕೊಡುಗೆಯಾಗಿ ನೀಡಿದ ಸಂಭ್ರಮ ಸಡಗರಗಳಲ್ಲಿ ಮುಳುಗಿ ಹೋಗಿದ್ದಾರೆ.

78eeeb2c-06f1-46ed-b2b1-218201b51dfcನನಗಂತೂ ನಾಡಿನ ಜನತೆಯ ಪ್ರೀತಿ ವಿಶ್ವಾಸದ ಮಾತುಗಳಿಂದ ಕೊರಳುಬ್ಬಿ ಬರುತ್ತಿದೆ . ಕಣ್ಣಂಚಿನಲ್ಲಿ ಸಂತೋಷದ ಹನಿಗಳು ಹನಿಯುತ್ತಿವೆ . ಸರ್ಕಾರಿ ಸೇವೆಯಲ್ಲಿ ಇಂತಹ ಸಾರ್ಥಕ ಸೇವೆಗಳನ್ನು ಮಾಡಲು ಅವಕಾಶ ಸಿಕ್ಕಿತಲ್ಲ ಎನ್ನುವ ಸಂತಸದಿಂದ ಮಾತುಗಳೇ ಹೊರಬರುತ್ತಿಲ್ಲ.

ಈ ಸಾಧನೆಯಲ್ಲಿ ನನ್ನ ಸಹೋದ್ಯೋಗಿಗಳ ಸಹಕಾರ ದೊಡ್ಡದು . ‘ಭಾರತ ಭಾಗ್ಯ ವಿಧಾತ ‘ ಕಾರ್ಯಕ್ರಮದ ಸಾಮಾಜಿಕ ಕಳಕಳಿಯನ್ನು ಅರ್ಥ ಮಾಡಿಕೊಂಡು ಅದನ್ನು ಹೆಚ್ಚು ಹೆಚ್ಚು ಜನರಿಗೆ ತಲುಪಿಸಲು ಹಗಲಿರುಳು ಶ್ರಮಿಸಿದ್ದಾರೆ . ಅವರಿಗೆ ನನ್ನ ಅಭಿನಂದನೆ ಹಾಗೂ ಕೃತಜ್ಞತೆಗಳು .

bfc27fb3-5e23-4bfa-bc09-3877e09ce086ಇವೆಲ್ಲಕ್ಕೂ ಕಳಸಪ್ರಾಯವಿಟ್ಟಂತೆ ನಾಡಿನ ಎಲ್ಲೆಡೆಯಿಂದ ಆಯ್ಕೆಯಾಗಿ ಬಂದಿರುವ ಯುವ ಕಲಾವಿದರು ನಮ್ಮ ಅಂಬೇಡ್ಕರ್ ಆಶಯವನ್ನು ಮೈದುಂಬಿಕೊಂಡು ಅಭಿನಯಿಸುತ್ತಾ ರಂಗದ ಮೇಲೆ ಮಿಂಚಿನ ಸಂಚಾರ ಮೂಡಿಸಿದ್ದಾರೆ . “ಭಾರತ ಭಾಗ್ಯ ವಿಧಾತ” ಕಾರ್ಯಕ್ರಮದ ಯಶಸ್ಸು ರಾಜ್ಯದ ನೆಚ್ಜಿನ ಮುಖ್ಯಮಂತ್ರಿಗಳಾದ ಶ್ರೀ ಸಿದ್ದರಾಮಯ್ಯ ಅವರ ಕಿವಿ ತಲುಪಿದೆ. ಹಾಸನ ಜಿಲ್ಲೆಯಲ್ಲಿ ಈ ಕಾರ್ಯಕ್ರಮ ಉದ್ಘಾಟಿಸಿದ ಪಶು ಸಂಗೋಪನಾ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರಾದ ಶ್ರೀ ಎ. ಮಂಜುರವರು ಈ ಕಾರ್ಯಕ್ರಮವನ್ನು ಮೆಚ್ಚಿ ಇದನ್ನು ರಾಜ್ಯದ ಎಲ್ಲಾ ತಾಲೂಕು ಕೇಂದ್ರಗಳಲ್ಲಿಯೂ ಪ್ರದರ್ಶಿಸುವಂತೆ ಮುಖ್ಯ ಮಂತ್ರಿಗಳಿಗೆ ಅವರ ಶಾಸಕಾಂಗ ಪಕ್ಷದ ಸಭೆಯಲ್ಲೇ ಒತ್ತಾಯಿಸಿದ್ದರು.. ಸದಾ ಸಾಮಾಜಿಕ ನ್ಯಾಯದ ಪ್ರತಿಪಾದನೆ  ಮಾಡುವ ಮಾನ್ಯ ಮುಖ್ಯ ಮಂತ್ರಿಗಳು ಇದಕ್ಕೆ ಒಪ್ಪಿ ಪ್ರತಿ ತಾಲ್ಲೂಕಿನಲ್ಲಿಯೂ ‘ಭಾರತ ಭಾಗ್ಯ ವಿಧಾತ ‘ ಪ್ರದರ್ಶನಕ್ಕೆ ಹಸಿರು ನಿಶಾನೆ ನೀಡಿದ್ದರು.

16ಒಟ್ಟಾರೆಯಾಗಿ ನಮ್ಮಇಲಾಖೆಯ ಹೆಮ್ಮೆ ಹಾಗೂ ಪ್ರತಿಷ್ಠಿತ “ಭಾರತ ಭಾಗ್ಯ ವಿಧಾತ” ಧ್ವನಿ ಬೆಳಕು ಕಾರ್ಯಕ್ರಮ ನಾಡಿನಾದ್ಯಂತ ಪ್ರದರ್ಶನಗೊಂಡು ಜನರಿಂದ ಅಪಾರ ಮನ್ನಣೆ ಗಳಿಸಿದೆ.

ಕೃಪೆ -ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ

Like Us, Follow Us !

120,526FansLike
1,826FollowersFollow
1,409FollowersFollow
3,307SubscribersSubscribe

Trending This Week