28.1 C
Bangalore, IN
Sunday, November 18, 2018

ಜೋಗಿ ಕಂಡಂತೆ : ಕಿಚ್ಚ ಸುದೀಪ್

ಸರಿಯಾಗಿ ಹದಿನಾರು ವರುಷದ ಹಿಂದೆ ಸುದೀಪ್ ನಟಿಸಿದ ಸ್ಪರ್ಶ ಚಿತ್ರ ನೋಡಿ ಕನ್ನಡಪ್ರಭದಲ್ಲಿ ವಿಮರ್ಶೆ ಬರೆದಿದ್ದೆ. ಅದರ ಪತ್ರಿಕಾಗೋಷ್ಠಿಯಲ್ಲಿ ಸುದೀಪ್ ಸಂಕೋಚದಿಂದಲೇ ಮಾತಾಡಿದ್ದರು. ಗಾಡ್ ಫಾದರ್ ಇಲ್ಲದ, ಸಿನಿಮಾ ಹಿನ್ನೆಲೆಯೂ ಇಲ್ಲದ ಸುದೀಪ್ ಸಿನಿಮಾ ಪ್ರೀತಿಯಿಂದ ಚಿತ್ರರಂಗಕ್ಕೆ ಕಾಲಿಟ್ಟ ಆರಂಭದ ದಿನಗಳಲ್ಲಿ ತುಂಬ ಒದ್ದಾಡಿದ್ದುಂಟು.

ಈಗಿನ ಅನೇಕ ಹೀರೋಗಳ ಥರ ಮೂರು ಸಿನಿಮಾಕ್ಕೇ ಹೀರೋಯಿಸಮ್ ಮೈಗೂಡಿಸಿಕೊಂಡು ಕೆರವಾನ್ ಒಳಗೆ ಕೂತವರಲ್ಲ ಅವರು. ಮಾತು, ಆಲೋಚನೆ, ಅಭಿನಯ- ಎಲ್ಲದರಲ್ಲೂ ಸ್ಪಷ್ಟತೆ ಇದ್ದ ಸುದೀಪ್, ಅವರ ಸಮಕಾಲೀನರಂತೆ ಸಂಭಾವನೆ ತಗೊಂಡು ನಟಿಸಿ ತಮ್ಮ ಪಾಡಿಗೆ ಇದ್ದವರಲ್ಲ. ಸಿನಿಮಾ ಕಲಿಯಬೇಕು ಅಂತ ಹಗಲಿರುಳು ಕತೆ, ಚಿತ್ರಕತೆ, ನಿರ್ದೇಶನ, ತಾಂತ್ರಿಕತೆ, ಛಾಯಾಗ್ರಹಣ, ಎಡಿಟಿಂಗ್, ಪೋಸ್ಟರ್ ಡಿಸೈನ್, ಪ್ರಚಾರ- ಎಲ್ಲದರಲ್ಲೂ ಆಸಕ್ತಿಯಿಂದ ತೊಡಗಿಸಿಕೊಳ್ಳುತ್ತಿದ್ದವರು.

ಆರಂಭದ ದಿನದಿಂದಲೇ ಭಯಂಕರ ಆತ್ಮವಿಶ್ವಾಸ ಮೈದುಂಬಿಸಿಕೊಂಡವರಂತೆ ಕಾಣಿಸುತ್ತಿದ್ದ ಸುದೀಪ್ ಸೋಲಿಗೆ ಅಂಜಿದವರಲ್ಲ. ಸ್ವಾತಿಮುತ್ತು ಸೋತಾಗ ಮಾತ್ರ ತುಂಬ ಭಾವುಕರಾಗಿ ಹೋಟೆಲ್ ಸರೋವರದಲ್ಲಿ ಕಣ್ಣೀರು ಹಾಕಿದ್ದರು.

ಮೈ ಆಟೋಗ್ರಾಫ್ ಚಿತ್ರದ ನಂತರ ಸುದೀಪ್ ಸ್ವಲ್ಪ ಮಟ್ಟಿಗೆ ಏಕಾಂಗಿಯಾಗಿಬಿಟ್ಟರು. ತಮ್ಮ ಪಾಡಿಗೆ ತಾವು ಕೆಲಸ ಮಾಡುತ್ತಲೇ ಹೋದರು. ಆ ಏಕಾಗ್ರತೆಯೇ ಅವರನ್ನು ಇವತ್ತು ಈ ಹಂತಕ್ಕೆ ತಂದು ನಿಲ್ಲಿಸಿದೆ.

ಹದಿನೆಂಟು ವರುಷ ಕನ್ನಡ ಚಿತ್ರಗಳಲ್ಲಿ ನಟಿಸಿ, ಕನ್ನಡದ ನಟ ಅನ್ನಿಸಿಕೊಂಡ ನಂತರ ಸುದೀಪ್ ಪೂರ್ಣಪ್ರಮಾಣದ ತಮಿಳು ಚಿತ್ರವೊಂದರಲ್ಲಿ ನಾಯಕನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ರಜನೀಕಾಂತ್, ಕಮಲ್ ಹಾಸನ್, ಚಿರಂಜೀವಿ ಮುಂತಾದವರ ಯಶಸ್ವಿ ಸಿನಿಮಾಗಳನ್ನು ಕೊಟ್ಟ ಕೆ ಎಸ್ ರವಿಕುಮಾರ್ ಈ ಸಿನಿಮಾ ನಿರ್ದೇಶಿಸಿದ್ದಾರೆ. ತಮಿಳು ಚಿತ್ರರಂಗದಲ್ಲಿ ತಮಿಳು ನಾಯಕರ ನಡುವೆ ಕನ್ನಡದ ನಟನೊಬ್ಬ ದೊಡ್ಡ ಬಜೆಟ್ಟಿನ ಸಿನಿಮಾ ಮಾಡಿ, ದೇಶಾದ್ಯಂತ 700 ಚಿತ್ರಮಂದಿರಗಳಲ್ಲಿ , ಕರ್ನಾಟಕದ 300 ಚಿತ್ರಮಂದಿರಗಳಲ್ಲಿ ಅದನ್ನು ಬಿಡುಗಡೆ ಮಾಡುವ ಮಟ್ಟಕ್ಕೆ ಬೆಳೆದಿರುವುದೇ ಬಹುದೊಡ್ಡ ಸಾಧನೆ. ಇಂಥ ರಿಸ್ಕ್ ತೆಗೆದುಕೊಳ್ಳಬಲ್ಲ ಧೈರ್ಯ ಎಲ್ಲರಿಗೂ ಬರುವುದಕ್ಕೂ ಸಾಧ್ಯವಿಲ್ಲ. ಅನ್ಯನೆಲದಲ್ಲಿ ಕಾಲಿಡುವುದೇ ಬಹುದೊಡ್ಡ ರಿಸ್ಕು ಅಂತ ಅನೇಕ ಸಲ ಸಾಬೀತಾಗಿರುವಾಗ, ಸುದೀಪ್ ಅಂಥ ಸಾಹಸ ಮಾಡುತ್ತಿರುವುದನ್ನು ಹೆಮ್ಮೆಯಿಂದ ನೋಡಬೇಕು.

ವಿಜಯ್, ಅಜಿತ್, ಸೂರ್ಯ, ವಿಕ್ರಮ್, ಧನುಷ್ -ಮುಂತಾದವರ ಸಿನಿಮಾಗಳು ಕರ್ನಾಟಕದ ತುಂಬ ಸದ್ದು ಮಾಡುತ್ತಿರುವಾಗ, ಕನ್ನಡದ ಸ್ಟಾರ್ ತಮಿಳುನಾಡಲ್ಲಿ ದಿಟ್ಟತನದಿಂದ ಚಿತ್ರರಸಿಕರ ಎದುರು ನಿಲ್ಲುವುದು ಸಣ್ಣ ಸಂಗತಿ ಅಲ್ಲ. ಇದು ಕರ್ನಾಟಕದ ಮಾರುಕಟ್ಟೆಯನ್ನು ವಿಸ್ತರಿಸುವ ಮಾತಲ್ಲ, ಕನ್ನಡದ ಪ್ರತಿಭಾವಲಯದ ವಿಸ್ತಾರವನ್ನು ತೋರುವಂಥ ಕೆಲಸ.

Congrats and Good Luck Sudeep 🙂

13754609_10154336924094941_1318993591092698745_n

ಲೇಖನ ಕೃಪೆ :  ಜೋಗಿ, ಜನಪ್ರಿಯ ಲೇಖಕರು

“ನೀನು ಮುತ್ತು ಕೊಟ್ರೆ, ಅಲ್ಲಿ ನನ್ನ ಹೆಸರು ಬರಬೇಕಾ?” ಅಂತಾ ಬೈತಿದ್ರು ಪುಟ್ಟಣ್ಣ!

ವೀರಸ್ವಾಮಿಯವರು ಹಾಗು ಪುಟ್ಟಣ್ಣ ಅವರು ನಾಗರಹಾವು ಚಿತ್ರಕ್ಕಾಗಿ ಹೊಸ ಪ್ರತಿಭೆಗಳನ್ನು ಹುಡುಕ್ತಾಯಿದ್ರು. ಆಗ ರಾಜೇಂದ್ರಸಿಂಗ್ ಬಾಬು ಅವರು “ನಮ್ಮ ಫ್ಯಾಮಿಲಿ ಫೆಂಡ್ ಒಬ್ಬ ಇದ್ದಾನೆ .. ಒಳ್ಳೆ ಶತ್ರುಜ್ಞ ಸಿನ್ಹಾ ಥರಾ ಕಾಣಿಸ್ತಾನೆ’ ಅಂತಾ ನನ್ನ ಬಗ್ಗೆ ಹೇಳಿದ್ರಂತೆ. ಅದಕ್ಕೆ ಪುಟ್ಟಣ್ಣ ಅವರು “ಹೌದಾ.. ಸರಿ ನಾಳೆ ಕರ್ಕೊಂಡು ಬಾರಯ್ಯಾ, ಒಂದ್ ಮೇಕಪ್ ಟೆಸ್ಟ್ ಮಾಡ್ಸೋಣಾ”’ ಅಂತಾ ಹೇಳಿದ್ದಾರೆ.

ಬಾಬು ನನ್ನತ್ರ ಬಂದು .. “ಪುಟ್ಟಣ್ಣ ಅವರು  ನಿನ್ನ ಟೆಸ್ಟ್ ಗೆ ಬರೇಳಿದ್ದಾರೆ” ಅಂದಾ

“ಏನ್ ಟೆಸ್ಟ್ ಅಪ್ಪಾ ಅದು” ಅಂದೆ.

“ಮೇಕಪ್ ಟೆಸ್ಟು ” ಅಂದಾ

“ಎಷ್ಟೋತ್ತಿಗೆ”

“ಬೆಳಿಗ್ಗೆ ೯ ಘಂಟೆಗೆ, ನಾನೇ ಬಂದು ಕಾರಲ್ಲಿ ಕರ್ಕೊಂಡು ಹೋಗ್ತೀನಿ” ಅಂದಾ

ಆಯ್ತು ಎಂದು ತಲೆಯಾಡಿಸಿದ ನಾನು, ಬೆಳ್ಳಿಗ್ಗೆ ಬೇಗ ಎದ್ದು ಎಂಟು ಘಂಟೆಗೇ ಮನೆ ಖಾಲಿ ಮಾಡ್ಬಿಟ್ಟೆ. ಯಾಕಂದ್ರೆ, ಮೊದಲೇ ನಾನು ಸ್ವಲ್ಪ ಕೋಪಿಷ್ಟ, ಆಕ್ಟ್ ಮಾಡುವಾಗ ನನಗೆ ಏನಾದ್ರೂ ಬೈದು.. ನಾನು ಇನ್ನೇನಾದ್ರೂ ವಾಪಸ್ ಮಾತಾಡಿ, ಯಾಕ್ ಬೇಕು ಸುಮ್ಮನೆ ಕಿತಾಪತಿ ಅಂತಾ.. ಆಮೇಲೆ ಬಾಬು ಏನೇನೋ ಮಾಡಿ, ಅವನಿಗೆ ನಮ್ಮ ಅಡ್ಡಗಳೆಲ್ಲಾ ಗೊತ್ತಿದ್ದುದ್ರಿಂದ ನನ್ನ ಹುಡುಕಿ ೧೨ಘಂಟೆಗೆ ಪುಟ್ಟಣ್ಣ ಅವರ  ಹತ್ರಾ ಕರ್ಕೊಂಡು ಹೋದ.

ಪುಟ್ಟಣ್ಣ ಕಣಗಾಲ್, ಗಂಗಣ್ಣ, ಚಿಟ್ಟಿಬಾಬು ಅವರೆಲ್ಲಾ ಇದ್ರು. ಇನ್ನೊಂದ್ ಕಡೆ ವಿಷ್ಣುವರ್ಧನ್, ಚಂದ್ರಶೇಖರ್ ಕೂಡಾ ಇದ್ರು. ನನ್ನ ನೋಡಿ ವಿಷ್ಣು ಕೇಳಿದ್ರು

“ಏನ್ರೀ, ನಿಮಗೆ ಶತ್ರುಜ್ಞ ಸಿನ್ಹಾ ಥರಾ ಮಾತಾಡೋಕೆ ಬರುತ್ತಾ”

“ಇಲ್ಲಾ ಸಾರ್. ನನಗೆ ಅದೇಲ್ಲಾ ಬರಲ್ಲಾ” ಅಂದೆ.

ಆಮೇಲೆ ನನಗೆ ಪುಟ್ಟಣ್ಣ ನನಗೆ ಮೇಕಪ್ ಮಾಡಿಸಿದ್ರು. ಆಗ ನಾನು

“ಸರ್, ನನಗೆ ಆಕ್ಟಿಂಗ್ ಎಲ್ಲಾ ಗೊತ್ತಿಲ್ಲ, ನೀವು ಹೇಳ್ಕೊಟ್ರೆ ಮಾಡ್ತೀನಿ ಸರ್” ಅಂದೆ.

ಅದಕ್ಕೆ ಪುಟ್ಟಣ್ಣ, “ಆಯ್ತು ಸರಿ, ನೋಡಿ ಅಲ್ಲಿಂದ ಇಲ್ಲಿ ತಂಕಾ ನಡ್ಕೊಂಡು ಬಂದು ನಿಂತಕೊಂಡು, ’ಹೇಯ್ ಹೋಗೋ ರಾಮಾಚಾರಿ’ ಅಂತಾ ಒಂದು ಡೈಲಾಗ್ ಹೇಳು” ಅಂದ್ರು.

ಅವರು ಹೇಳಿದ ಹಾಗೆ ಬಂದು ಡೈಲಾಗ್ ಹೇಳಿ ಸಿಗರೇಟ್ ಬಾಯಿಗ್ ಎಸ್ಕೊಂಡೆ. ಒಂದೇ ಟೇಕ್ ನಲ್ಲಿ ಓಕೆ ಆಯ್ತು. ನಾನ್ ಯಾಕೆ ಈ ಮಾತು ಹೇಳ್ತಾಯಿದ್ದೀನಿ ಅಂದ್ರೆ.. ನಾನು ಶತ್ರುಜ್ಞ ಸಿನ್ಹಾ ಥರಾ ಇದ್ದೇ ಅನ್ನೋದಕ್ಕಿಂತಾ, ನನ್ನ ನೋಡಿದ ತಕ್ಷಣ ಅವರಿಗೆ ನಾನು ಜಲೀಲನ ಪಾತ್ರಕ್ಕೆ ಸೂಟ್ ಆಗ್ತೀನಿ ಅಂತಾ ಗೊತ್ತಾಗೋಗಿತ್ತು.

ನಂತರ ಹೇಳಿದ್ದ ದಿನ ಶೂಂಟಿಂಗ್ ಹೋದೆ. ಅಲ್ಲಿ ಎಮ್.ಜಿ.ಆರ್.. ಅವರ ಮಾಸ್ಟರ್ ಶ್ಯಾಮ್ ಸುಂದರ್ ಅಂತಾ ನಮಗೆ ಫೈಟಿಂಗ್ ಹೆಂಗ್ ಮಾಡೋದು ಅಂತಾ ಹೇಳ್ಕೊಡ್ತಾಯಿದ್ರು. ಆಮೇಲೆ ಊಟದ ಬ್ರೇಕ್ ಆಯ್ತು. ನಾನು ಒಂದು ಕಡೆ ವಿಷ್ಣು ಒಂದು ಕಡೆ ಊಟ ಮಾಡ್ತಾಯಿದ್ವಿ. ಆಗ ಪುಟ್ಟಣ್ಣ ಬಂದು,

“ನಿಮ್ಮಿಬ್ರಿಗೂ ಒಳ್ಳೇ ಹೆಸರು ಬರುತ್ತೆ ಕಣ್ರೋ” ಅಂದ್ರು.

“ಸಾರ್, ಅವರು ಹೀರೋ, ಅವರಿಗೆ ಹೆಸರು ಬರುತ್ತೆ ಅಂದ್ರೆ ನಂಬ್ಕೊಬಹುದು, ಅದ್ರಲ್ಲಿ ಅರ್ಥ ಇದೆ. ನಾನು ಬರ್ತೀನಿ, ಚುಡಾಯಿಸ್ತೀನಿ, ಏಟ್ ತಿಂತೀನಿ, ಹೋಗ್ತೀನಿ. ನನಗೆಂಗೆ ಹೆಸರು ಬರುತ್ತೆ” ಅಂದೆ.

“ಇಲ್ಲಾ ಕಣೋ ಮರಿ.. ನೋಡ್ತಾಯಿರು. ನಿಂಗೂ ಒಳ್ಳೆ ಹೆಸರು ಬರುತ್ತೆ” ಅಂದ್ರು.

ಕೊನೆಗೆ ಚಿತ್ರ ರಿಲೀಸ್ ಆದಮೇಲೆ ಅದು ಎಷ್ಟು ಅದ್ಭುತವಾದ ಚಿತ್ರ ಅಂತಾ ನಂಗೆ ಅರ್ಥ ಆಯ್ತು. ಪ್ರೀಮಿಯರ್ ಶೋ ಮುಗಿಸ್ಕೊಂಡು ನಾನು ಮೈಸೂರಿಗೆ ಹೋರಟೋದೆ. ಬಾಬು ಮನೆಯಲ್ಲಿ ಕೂತ್ಕೊಂಡು ಮಾತಾಡ್ತಾಯಿದ್ವಿ. ಆಮೇಲೆ ಮತ್ತೆ ಸಿನಿಮಾ ನೋಡಬೇಕು ಅನ್ನಿಸ್ತು. ಸರಿ ಎಲ್ಲಾ ಹೋದ್ವಿ.

ನಾನು ಮಾಡಿದ್ದುದ್ದು ಸಣ್ಣ ಪಾತ್ರನೇ ಆದ್ರೂ, ನನ್ ಸೀನಲ್ಲಿ ಎಂಟ್ರಿಗೆ ಮೊದಲು ಸೈಕಲ್ ದು ಸ್ಪೋಕ್ಸ್ ತೋರಿಸ್ತಾರೆ. ಆಗ ಜನ ಜೋರಾಗ್ ಚಪ್ಪಾಳೆ ಹೊಡೀಯೋಕ್ ಶುರು ಮಾಡ್ಬಿಟ್ರು. ಅದುವರೆಗೂ ಸಿನೆಮಾದಲ್ಲಿ ಹೀರೋ ಎಂಟ್ರಿಗೆ ಹಿಂಗೆಲ್ಲಾ ಬಿಲ್ಡಪ್ ಕೊಡ್ತಾಯಿದ್ರು. ಹೀರೋ ಕೈ ತೋರಿಸಿ, ಕಾಲ್ ತೋರಿಸಿ, ಅವನು ನಡ್ಕೊಂಡು ಬರೋದು ತೋರಿಸಿಸ್ತಾರೆ. ಆಗ ಜನ ಚಪ್ಪಾಳೆ ಹೊಡಿತಿದ್ರು. ಆದ್ರೆ ಒಬ್ಬ ಖಳನಾಯಕನ ಎಂಟ್ರಿಗೆ ಚಪ್ಪಾಳೆ ಹೊಡೆದಿದ್ದು ಅಂದ್ರೆ ನಾಗರಹಾವು ಫಿಲಂನಲ್ಲಿ. ಅದೂ ಪುಟ್ಟಣ್ಣ ಅವರ ಪವರ್.

ಆಮೇಲೆ .. ಪುಟ್ಟಣ್ಣ ಅವರ ಸುಮಾರು ಚಿತ್ರಗಳಲ್ಲಿ ನಾನು ಇದ್ದೀನಿ. ನಾನು ಅಂದ್ರೆ ಸ್ವಲ್ಪ ಸಲುಗೆನೂ ಇತ್ತು ಅವರಿಗೆ. ಅವರನ್ನ ಹೆಂಗೆಲ್ಲಾ ರೇಗಿಸ್ತಿದ್ದೆ ಅಂತಾ ಒಂದು ಘಟನೆ ಹೇಳ್ತೀನಿ, ನೀವೆಲ್ಲಾ ನಗ್ತೀರಾ.

ambareesh with puttanna kanagaal in sets
ಪುಟ್ಟಣ್ಣ ಜೊತೆ ಅಂಬರೀಷ್, ಚಿತ್ರವೊಂದರ ಸೆಟ್ಟಲ್ಲಿ

ಮಸಣದ ಹೂ ಚಿತ್ರದಲ್ಲಿ ಒಂದು ಸೀನ್. ಜಯಂತಿ ಅವರು ಬರ್ತಾರೆ. ನಾನು ಸಿಂಗಾರು ಪಾತ್ರದಲ್ಲಿ ಅವರ ಹತ್ರ ಹೋಗಿ,

“ಒಂದು ಕೆಲ್ಸ ಕೊಡಿ” ಅಂತಾ ಕೇಳ್ತೀನಿ.

“ಯಾವ್ ಕೆಲ್ಸ ಬೇಕಾದ್ರೂ ಮಾಡ್ತೀಯೇನಪ್ಪಾ ಅಂತಾ..?” ಅಂತಾ ಅವ್ರು ಕೇಳ್ತಾರೆ.

“ನೀವೇನ್ ಕೇಲ್ಸಾ ಕೊಟ್ರು ಮಾಡ್ತೀನಿ” ಅಂತೀನಿ.

ಅದಕ್ಕೆ ಅವರು “ಎಲ್ಲಿ.. ನನಗೆ ಒಂದು ಮುತ್ತು ಕೊಡು” ಅಂತಾರೆ. ಆಗ ನಾನು ತಬ್ಬಿಬ್ಬಾಗಿ ನಿಂತುಬಿಡ್ತೀನಿ. ಆಗ ಜಯಂತಿ

“ಹೇಯ್ ಹೋಗೋ.. ಒಂದು ಮುತ್ತು ಕೊಡೋಕೆ ಯೋಗ್ಯತೆ ಇಲ್ಲ, ಇನ್ನು ಏನ್ ಕೆಲ್ಸ ಮಾಡ್ತೀಯಾ ನೀನು” ಅಂತಾರೆ. ಅವರು ಆ ಡೈಲಾಗ್ ಹೇಳೀ ಹೋಗೋ ಅಂತಾ ತೋರಿಸಿದ್ದ ಕೈಯನ್ನೇ ಹಿಡ್ಕೊಂಡು ನಾನು ಮುತ್ತು ಕೊಡ್ತೀನಿ. ಆವಾಗ “ಡೈರೆಕ್ಟೆಡ್ ಬೈ ಪುಟ್ಟಣ್ಣ” ಅಂತಾ ನಿಮ್ಮ ಹೆಸರು ಬರಬೇಕು ಸಾರ್ ಚೆನ್ನಾಗಿರುತ್ತೆ ಅಂತಿದ್ದೆ. ಅದಕ್ಕೆ ಅವರು “ಹೇಯ್ ಹೋಗೋ, ನೀನು ಮುತ್ತು ಕೊಟ್ರೆ, ಅಲ್ಲಿ ನನ್ನ ಹೆಸರು ಬರಬೇಕಾ” ಅಂತಾ ಬೈತಿದ್ರು. ಅಷ್ಟು ಸಲುಗೆ ನನ್ನ ಕಂಡ್ರೆ.

ಪುಟ್ಟಣ್ಣ ನವರ  ಒಡನಾಟ ಮತ್ತು ಆತ್ಮೀಯತೆ ಎಂದೂ ಮರೆಯಲಾಗದ್ದು

ನಿಲ್ಲದಿರಲಿ “ಸುಹಾನಾ” ಸುಮಧುರ ಗಾನಯಾನ …

ಇವತ್ತು ವಿಶ್ವ ಮಹಿಳಾ ದಿನಾಚರಣೆ, ಮಹಿಳೆ ಕುಟುಂಬ ನಿರ್ವಹಣೆ ಜೊತೆಗೆ ಸಮಾಜದ ಹಾಗೂ ಹೋಗುಗಳಲ್ಲೂ ಪುರುಷನೊಂದಿಗೆ ಕೈಜೋಡಿಸಿದ್ದಾಳೆ. ಆಕೆಯ ಸಾಮರ್ಥ್ಯ ಹರಿದಷ್ಟೂ ವಿಸ್ತಾರವಾಗುವ ಕಡಲಿನಂತಹುದ್ದು.

suhana1

ಮುಂದುವರೆದಿದ್ದೇವೆ ಎಂದು ಭುಜ ಕುಣಿಸುವ ನಮ್ಮವರ ಇಂದಿನ  ವಿಪರ್ಯಾಸ ಅಂದ್ರೆ ಕರ್ನಾಟಕದಲ್ಲಿ ಓರ್ವ ಯುವತಿಯ ಎದೆಗಾರಿಕೆಯನ್ನು ಪ್ರಶ್ನಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಅವಹೇಳ ಮಾಡಲಾಗುತ್ತಿದೆ.. ತಾವು ಮಾಡುತ್ತಿರುವ ಘನಂಧಾರಿ ಕೆಲಸ ಏನೆಂದು ತಿಳಿದುಕೊಳ್ಳಲಾಗದ ಮೂರ್ಖರೆಲ್ಲಾ ಇಂದು ಬೇಕಾಬಿಟ್ಟಿಯಾಗಿ ಮಾತನಾಡುತ್ತಿದ್ದಾರೆ..
ಸುಹಾನಾ, ಈಕೆ ಹೆಸರು ಕರುನಾಡಿನಲ್ಲಿ ಈಗ ಜನಜನಿತ.. ಹೌದು ಕಳೆದ ಶನಿವಾರ ಜೀ ಕನ್ನಡ ವಾಹಿನಿಯ ಸರಿಗಮಪ ಸೀಸನ್ 13ರಲ್ಲಿ ಸ್ಪರ್ಧಿಯಾಗಿ ಆಯ್ಕೆಯಾಗುವ ಮೂಲಕ ಇಡೀ ಕರ್ನಾಟಕದ ಕಣ್ಣು ತೆರೆಸಿದ್ದಾರೆ.. ಜೊತೆಗೆ ಕೆಲವೊಂದಿಷ್ಟು ಧರ್ಮಾಂಧರಿಗೆ ಆಹಾರವಾಗಿದ್ದಾರೆ.. ಮೂಲತಃ ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಭೀಮನಕೋಣೆಯ ಹುಡುಗಿ ಮಾತನಾಡಿದ್ದರಲ್ಲಿ ಯಾವುದೇ ತಪ್ಪಿಲ್ಲ.. ಹಾಗಿದ್ದರೂ ಧರ್ಮ, ಆಚಾರ ವಿಚಾರ ಅಂತಾ ಬೊಗಳೆ ಬಿಡುವ ಮಂದಿ ಒಂದು ಹೆಣ್ಣು ಅನ್ನೋದನ್ನು ಬಿಟ್ಟು ಬಾಯಿಗೆ ಬಂದಂತೆ ಬೊಗಳುತ್ತಿದ್ದಾರೆ..

suhana4ವಿಷಯಕ್ಕೆ ಬರೋಣ, ಮುಸ್ಲಿಂ ಧರ್ಮದಲ್ಲಿ ಕೆಟ್ಟದನ್ನು ಮಾಡಬಾರದು ಅನ್ನೋ ನಿಯಮಗಳಿವೆ.. ಅದಕ್ಕಾಗಿ ಅವರು ಕುಡಿತದ ಚಟಕ್ಕೆ ದಾಸರಾಗುವುದಿಲ್ಲ, ವೇಶ್ಯಾವಟಿಕೆ ನಿಷಿದ್ಧ, ಹಾಗೆಯೇ ಹೆಣ್ಣು ಮಕ್ಕಳು ಸಮಾಜದಲ್ಲಿ ಕೆಟ್ಟ ರೀತಿಯಲ್ಲಿ ಕಾಣಿಸಿಕೊಳ್ಳಬಾರದು ಅನ್ನೋ ಕಾರಣಕ್ಕೆ ಮುಖ ಮುಚ್ಚಿಕೊಂಡು ಓಡಾಡಲು ಸ್ಕಾರ್ಪ್, ಹಿಜಾಬು, ಬುರ್ಖಾ ಧರಿಸುವಂತೆ ಸಲಹೆ ನೀಡ್ತಾರೆ ಇದನ್ನ ಪಾಲಿಸ್ತಾರೆ ಕೂಡ.. ಇದನ್ನು ನಾವು ಅಂದ್ರೆ ಹೆಣ್ಣು ತೋರಿಕೆ ವಸ್ತುವಲ್ಲ ಅಂತಾ ನಂಬಿರುವ ನಾವೆಲ್ಲ ಒಪ್ಪಿಕೊಳ್ಳೋಣ.. ಆದ್ರೆ ಈ ಯುವತಿ ಮಾಡಿದ ಅಪರಾಧವಾದ್ರು ಏನು..? ಬುರ್ಖಾ, ಸ್ಕಾರ್ಪ್, ಹಿಜಾಬು ಎಲ್ಲವನ್ನೂ ಧರಿಸಿ ಬಂದು ತನ್ನ ಪ್ರತಿಬೆಯನ್ನು ಅನಾವರಣ ಮಾಡಿದ್ದೇ ತಪ್ಪಾಯಿತೆ..? ಇಲ್ಲಾ ಮುಸ್ಲಿಂ ಬಾಲಕಿ ಹಿಂದೂಗಳ ಭಕ್ತಿ ಗೀತೆಯನ್ನು ಹಾಡಿದ್ದು ನಿಮಗೆ ನೋವು ತರಿಸಿದೆಯೇ..? ಕಲೆಗೇಕೆ ಸ್ವಾಮಿ ಧರ್ಮದ ಸಂಕೋಲೆ ?

suhana3ಅದು ಆ ಕಡೆಗೆ ಇರಲಿ, ನಮ್ಮ ಸಮುದಾಯದ ಯುವತಿ ಒಂದು ಭಕ್ತಿ ಗೀತೆಯನ್ನು ಹಾಡಿದಳಲ್ಲಾ ಅನ್ನೋ ಹೆಮ್ಮೆ ಇರಬೇಕಿತ್ತು ಆದ್ರೆ ನಿಮಗೆ ಸಹಿಸಲಾರದ ದುಖಃ ತರಿಸಿದೆ ಅನ್ನೋದೆ ದುರಂತ.. ಆದ್ರೆ ಸುಹಾನಾ ಛಲಗಾತಿ, ಯಾಕಂದ್ರೆ ಆಡಿಷನ್ ನಡೆಯುವಾಗಲೇ ಒಂದು ಮಾತನ್ನಾಡಿದ್ದಾಳೆ.. ನನಗೆ ಯಾವುದೇ ಕಟ್ಟುಪಾಡುಗಳಿಲ್ಲ, ನನ್ನ ಪ್ರತಿಭೆಯನ್ನು ತೋರಿಸಿಕೊಳ್ಳಲು ಯಾವುದೇ ಹಿಂಜರಿಕೆ ಇಲ್ಲ.. ನನ್ನನ್ನು ನೋಡಿದ ಮೇಲಾದ್ರು ಇನ್ನೂ ಹಲವಾರು ಪ್ರತಿಭೆಗಳು ಬೆಳಕಿಗೆ ಬರಲಿ, ಕತ್ತಲಲ್ಲೇ ಕಮರಿ ಹೋಗಬಾರದು ಅನ್ನೋ ಅರ್ಥದಲ್ಲಿ ಹೇಳಿದ್ದಾರೆ.. ಇದು ಅಪ್ಪಟ ಸತ್ಯ.. ಯಾಕಂದ್ರೆ ಎಲ್ಲಾ ಸಮುದಾಯಗಳಲ್ಲೂ ಇತ್ತೀಚಿನ ದಿನಗಳಲ್ಲಿ ಸಾಕಷ್ಟು ಬದಲಾವಣೆ ಆಗಿದ್ದರೂ, ಮುಸ್ಲಿಂ ಸಮುದಾಯದಲ್ಲಿ ಮಾತ್ರ ಅದೇ ಕಟ್ಟುಪಾಡುಗಳನ್ನು ಪಾಲಿಸಲಾಗ್ತಿದೆ..

suhana2

ಸುಹಾನಾ ತಂದೆ ತಾಯಿ ಶಿಕ್ಷಿತ ಕುಟುಂಬದಿಂದ ಬಂದಿದ್ದು, ಪೋಷಕರಿಬ್ಬರೂ ಶಿಕ್ಷಕರಾಗಿದ್ದಾರೆ.. ಅವರಿಗೆ ತಮ್ಮ ಮಗಳನ್ನು ಏನನ್ನು ಮಾಡುತ್ತಿದ್ದಾಳೆ ಅನ್ನೋ ಅರಿವು ಚೆನ್ನಾಗಿದೆ.. ಅಷ್ಟೆಲ್ಲಾ ಇದ್ದರೂ ಧರ್ಮ ಅನ್ನೋ ಏಕೈಕೆ ಅಸ್ತ್ರ ಹಿಡಿದುಕೊಂಡು ಒಂದು ಹೆಣ್ಣನ್ನು ಅಪಮಾನ ಮಾಡುತ್ತಿದ್ದೀನಿ.. ಈ ನಿಮ್ಮ ಮಾತಿಗೆ ಆ ಅಲ್ಲಾಹು ಶಿಕ್ಷೆ ಕೊಡುವುದಿಲ್ಲವೇ..? ಹೆಣ್ಣನ್ನು ಗೌರವಿಸಿ ಅಂತಾ ಕುರಾನ್‍ನಲ್ಲಿ ಸ್ಪಷ್ಟವಾಗಿ ಹೇಳಿದ್ದಾರೆ ಅಲ್ಲವೇ..? ಪಾಕಿಸ್ತಾನದಲ್ಲಿ ಮಲಾಲಾ ಎಂಬಾಕೆ ಶಿಕ್ಷಣ ನಿರಾಕರಿಸುವ ಜನರನ್ನು ಎದುರಿಸಿ ಬಂದು ಹೆಣ್ಣು ಮಕ್ಕಳಿಗೆ ಶಿಕ್ಷಣ ನೀಡಿ ಎಂದಾಗ ತಾಲೀಬಾನಿಗಳು ತೀವ್ರವಾಗಿ ವಿರೋಧಿಸಿದ್ದರು.. ಅವರು ಅಲ್ಲಿ ಮಾಡಿದ ತಪ್ಪನ್ನೇ ನೀವು ಇಲ್ಲಿ ಮಾಡುತ್ತಿದ್ದೀರಿ ಎಂದರೆ ತಾಲಿಬಾನಿಗಳಿಗೂ ನಿಮಗೂ ಇರುವ ವ್ಯತ್ಯಾಸವಾದರೂ ಏನು..? ಒಮ್ಮೆ ನೀವೇ  ಪ್ರಶ್ನೆ ಮಾಡಿಕೊಳ್ಳಿ ಸ್ನೇಹಿತರೇ..!

malalaಅಭಿನಯಿಸುವುದು , ಟಿವಿಯಲ್ಲಿ ಬಂದು ಬಹಿರಂಗವಾಗಿ ಮಾತನಾಡುವುದು ಧರ್ಮ ವಿರೋಧ ಎನ್ನುವ ನೀವುಗಳು ಅದೇ ಸಲ್ಮಾನ್ ಖಾನ್, ಶಾರುಖ್ ಖಾನ್, ಅಮೀರ್ ಖಾನ್ ತೆರೆ ಮೇಲೆ ಬಂದಾಗ ಶಿಳ್ಳೆ ಹೊಡೆದು ಕೇಕೆ ಹಾಕುವುದಿಲ್ಲವೇ..? ಪವಿತ್ರ ಇಸ್ಲಾಂ ಧರ್ಮ ಪುರುಷರಿಗೆ ಒಂದು ರೀತಿ, ಹೆಣ್ಣು ಮಕ್ಕಳಿಗೆ ಒಂದು ರೀತಿ ಇದೆಯೇ..?ಭಗವಂತ ಪಕ್ಷಪಾತಿಯಾಗಲು ಸಾಧ್ಯವೇ ? ಭೇಧವೆಣಿಸದ ಉದಾತ್ತನಲ್ಲವೇ ?

ಹೆಣ್ಣಾದ ಮಾತ್ರಕ್ಕೆ ಸಮಾಜದಲ್ಲಿ ಮಾತನಾಡುವುದು ತಪ್ಪು ಎಂದರೆ ಸಂವಿಧಾನ ಕೊಟ್ಟಿರುವ ಹಕ್ಕನ್ನು ಕಿತ್ತುಕೊಂಡಂತೆ ಆಗುವುದಿಲ್ಲವೇ.. ಇಂದು ಒಬ್ಬ ಸುಹಾನ ಎತ್ತಿರುವ ಪ್ರಶ್ನೆಯನ್ನು ಸಮಾಜದ ಎಲ್ಲಾ ಮನೆಯ ಹೆಣ್ಣು ಮಕ್ಕಳು ಕೇಳಿದರೆ ತಂದೆ ತಾಯಿಗಳಾದ ನೀವುಗಳು ಒಪ್ಪುವುದಿಲ್ಲವೇ..? ಕೆಟ್ಟ ಕೆಲಸ ಮಾಡುವುದಕ್ಕೆ ಎಲ್ಲಾ ಧರ್ಮದಲ್ಲೂ ವಿರೋಧವಿದೆ.. ಹಾಗಂದ ಮಾತ್ರಕ್ಕೆ ಕೆಟ್ಟ ಕೆಲಸಗಳು ನಿಂತಿವೆ ಎಂದರ್ಥವೇ..? ಇಲ್ಲ ಗೆಳೆಯರೇ ಎಲ್ಲಾ ಧರ್ಮದಲ್ಲೂ ಒಳ್ಳಯವರು ಕೆಟ್ಟವರು ಇದ್ದೇ ಇರುತ್ತಾರೆ.. ಅದೇ ರೀತಿ ಕೆಟ್ಟವರು ಇರುತ್ತಾರೆ.. ಇದನ್ನು ಬಹಿರಂಗವಾಗಿ ಒಪ್ಪಿಕೊಳ್ಳಲು ಆಗದಿದ್ದರೆ ನಿಮ್ಮ ಮನಸ್ಸನ್ನು ಒಮ್ಮೆ ಮುಟ್ಟಿ ಕೇಳಿಕೊಳ್ಳಿ ಸತ್ಯ ಗೊತ್ತಾಗುತ್ತದೆ..
ಸುಹಾನಾ ಎಂದರೆ ಸುಮಧುರ ಹಾಡುಗಳನ್ನು  ಹಾಡುವ ನಾರಿ ಎಂದರ್ಥ.. ಮಲೆನಾಡಿನ ಸೈಯದ್ ಮುನೀರ್ ಹಾಗೂ ನಸ್ರೀನ್ ಪರ್ವಿನ್ ಅವರ ಪುತ್ರಿ ಯಾವುದೋ ಘೋರ ಅಪರಾಧ ಮಾಡಿದ್ದಾರೆ ಎಂದು ಹೆಣ್ಣನ್ನು ಕೀಳಾಗಿ ಕಾಣುವ ಬದಲು ಆಕೆ ನಿಮ್ಮ ಮನೆ ಹುಡುಗಿ ಎಂದು ಪ್ರೀತಿಸಿ, ಸಾಧ್ಯವಾದರೆ ಆಕೆಯನ್ನು ಬೆಂಬಲಿಸಿ.. ಇಲ್ಲದಿದ್ದರೆ ತೆಪ್ಪಗೆ ನಿಮ್ಮ ಕೆಲಸವನ್ನು ನೀವು ನೋಡಿಕೊಳ್ಳಿ.. ಇನ್ನೊಬ್ಬರನ್ನು ಹಿಯ್ಯಾಳಿಸುವುದಕ್ಕಿಂತ ತಾನು ಸಮಾಜಕ್ಕೆ ಏನು ಕೊಡುಗೆ ಕೊಟ್ಟಿದ್ದೇನೆ ಅನ್ನೋದನ್ನು ನೋಡಿಕೊಳ್ಳಿ.. ಈಗಾಗಲೇ ಹಿಂದಿ ಸರಿಗಮಪ ಕಾರ್ಯಕ್ರಮದಲ್ಲಿ ಅನೇಕ ಮುಸ್ಲಿಂ ಹೆಣ್ಣು ಮಕ್ಕಳು ಹಾಡಿದ್ದಾರೆ, ಅದೇ ರೀತಿ ಅದೆಷ್ಟೋ ಪಾಕಿಸ್ತಾನಿ ಯುವತಿಯರು ಬಂದು ಹಾಡಿ ಹೋಗಿದ್ದಾರೆ.. ಕಲೆಗೆ ಧರ್ಮ, ಜಾತಿ, ಸಂಪ್ರದಾಯ, ಉಡುಗೆ ತೊಡುಗೆಯ ಅಡ್ಡಿಯಿಲ್ಲ.. ಅವರು ರಾಮನನ್ನು ಭಜಿಸಿದ್ರೆ ಹಿಂದು, ಅಲ್ಲಾಹುನನ್ನ ನೆನೆದರೆ ಮುಸ್ಲಿ, ಯೇಸುವನ್ನು ಆರಾಧಿಸಿದರೆ ಏಸು..
ಇನ್ನೊಂದು ನೀವು ಹೆಮ್ಮೆ ಪಡುವ ವಿಚಾರ ಅಂದ್ರೆ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತದ ಮೂಲ ಇಸ್ಲಾಂ.. ಅದೂ ಅಲ್ಲದೆ ಮುಸ್ಲಿಂ ಹಾಡುಗಾರರ ಪಟ್ಟಿ ನೋಡುವುದಾದರೆ ಮಹೇರ್ ಜಾಯ್ನ್, ಸಮಿ ಯೂಸಫ್, ಮಹಮದ್ ರಫಿ, ಜಾಯ್ನ್ ಮಲ್ಲಿಕ್,  ಇಮ್ರಾನ್ ಖಾನ್, ಅತೀಫ್ ಅಸ್ಲಾಮ್ ಹೀಗೆ ಪಟ್ಟಿ ಬೆಳೆಯುತ್ತಲೇ ಸಾಗುತ್ತದೆ.. ಈ ಹಾಡುಗಾರರ ಮಕ್ಕಳು, ಹೆಣ್ಣುಮಕ್ಕಳು ನಾನು ಹಾಡು ಹಾಡುತ್ತೇನೆ ಎಂದರೆ ಬೇಡ ಎನ್ನುತ್ತಾರೆಯೇ..? ಯೋಚನೆ ಮಾಡಿ ಉತ್ತರ ಕಂಡುಕೊಳ್ಳುವ ಪ್ರಯತ್ನ ಮಾಡಿ..

suhana5

ನಾನು ಬರೆದಿರುವ ಅಭಿಪ್ರಾಯ ಸರಿಯಾಗಿದೆ ಎನ್ನುವುದಾದರೆ ನೀವು ನೂರಾರು ಜನರಿಗೆ ಇದನ್ನು ಶೇರ್ ಮಾಡುವ ಮೂಲಕ ಬೆಂಬಲಿಸಿ.. ಸುಹಾನ ನೀನು ಹಾಡುವಷ್ಟೂ ದಿವಸ ನಾನು ಸರಿಗಮ ನೋಡುತ್ತೇನೆ ಗೆಳತಿ.. ನೀನಿಟ್ಟ ಹೆಜ್ಜೆ ಹಿಂದಿಡಬೇಡ.. ಮುನ್ನುಗ್ಗು ನಿನ್ನ ಸಾಧನೆಯ ಹಾದಿ ದೊಡ್ಡದಾಗಿರಲಿ.. ನೀನಂದು ಹೇಳಿದ ಮಾತುಗಳು, ಶಿವಮೊಗ್ಗದಲ್ಲಿ ಸೃಷ್ಠಿಯಾಗಿದ್ದ ಕೋಮು ವಿಚಾರ, ಸ್ಕಾರ್ಪ್ ಕಟ್ಟಿಕೊಳ್ಳುವ ವಿಚಾರವನ್ನು ಮರೆಸಿ ನಾವೆಲ್ಲರೂ ಒಂದು ಅನ್ನೋ ಭಾವನೆಯನ್ನು ಹುಟ್ಟು ಹಾಕಿದೆ.. ಇದೇ ನೀನು ಸಾಧಿಸಿದ್ದು.. ನಿನ್ನ ದಾರಿ ಸರಿಯಾಗಿದೆ. ಕಹಿಗಳನ್ನು ಕರಗಿಸುವ ಕಲೆಯ ಮೂಲಕ ಮುನ್ನಡೆ.. ನಾವಿದ್ದೇವೆ ಸದಾ ನಿನ್ನೊಂದಿಗೆ.. 

ಜೋಮ, ಶಿವಮೊಗ್ಗ

‘ಕಬಾಲಿ’ ಹಿಟ್ಟಾ.. ತೋಪಾ .. ???

ಕಲೆ, ಮನೋರಂಜನೆ, ಮಾಧ್ಯಮ ಹೀಗೆ ಅನೇಕ ರೂಪಗಳನ್ನು ಪಡೆದ ಸಿನಿಮಾ, ಇಂದು ಅವೆಲ್ಲವನ್ನೊ ಮೀರಿ ಒಂದು ಮಹಾ ವ್ಯಾವಹಾರಿಕ ಉದ್ಯಮವಾಗಿ ಬೆಳೆದು ನಿಂತಿದೆ.ಹಾಗಾಗಿ ಚಿತ್ರನಿರ್ಮಾಪಕರು ಸಿನಿಮಾದ ಕಥೆಗೆ ತಲೆಕೆಡಿಸಿಕೊಳ್ಳಲು ಶುರು ಮಾಡಿದ ದಿನದಿಂದಲೇ ಅದರ  ಪ್ರಚಾರ ಕಾರ್ಯಕ್ಕೂ ನಿಲ್ಲುತ್ತಿದ್ದಾರೆ.

ಅಂದು ‘ಬಾಹುಬಲಿ’ ತನ್ನ ತಾಂತ್ರಿಕತೆಯಿಂದ ಭಾರತ ಚಿತ್ರರಂಗದ ಲೆಕ್ಕಾಚಾರಗಳನ್ನೆಲ್ಲಾ ಬುಡಮೇಲು ಮಾಡಿಬಿಟ್ಟರೆ, ಇಂದು ಬಂದ ‘ಕಬಾಲಿ’ ತಲೈವನ ಹೆಸರಿನಲ್ಲೇ ಬಿರುಗಾಳಿ ಎಬ್ಬಿಸಿ ಮರೆಯಾಯ್ತು.

‘ಕಬಾಲಿ’ ಬಂದ ಬಿರುಸಿನಲ್ಲಿ ಬಿಚ್ಚಿಟ್ಟು ಹೋದ ಪ್ರಶ್ನೆ ಹಾಗು ಗೊಂದಲಗಳು ಒಂದೆರಡಲ್ಲ.

ಒಂದು ಚಲನಚಿತ್ರವನ್ನು ಹೇಗೆ ಅಳಿಯಬೇಕೋ ಹಾಗೆ ಅಳಿಯಲು ತಿಳಿಯದ ತೀರದಲ್ಲಿ “ಕಬಾಲಿ” ನಿಂತಿದೆ. ಭಾರತ ಚಿತ್ರರಂಗದಲ್ಲೇ ಮೊದಲನೇ ಬಾರಿಗೆ ಇಷ್ಟೊಂದು ರೀತಿಯ  “mixed opinion”ಗಳನ್ನು ಚಿತ್ರ “ಕಬಾಲಿ” ಹುಟ್ಟುಹಾಕಿದೆ.

B Suresh, Film Maker

1ಬಿ. ಸುರೇಶ್

ಕಬಾಲಿ ಮಲೇಶಿಯಾದ ಭಾರತೀಯ ವಲಸಿಗರ ಬಗ್ಗೆ ಮಾಡಿರುವ ಅದ್ಬುತ ಚಿತ್ರ. ಸೂಪರ್ ಸ್ಟಾರ್ ಫಾರ್ಮುಲಾಗೆ ಜೋತು ಬೀಳದೆ ಚಿತ್ರವನ್ನು ರೂಪಿಸಿದ್ದಾರೆ. 70 ಕೋಟಿ ರೂಪಾಯಿಯಲ್ಲಿ ಅಚ್ಚುಕಟ್ಟಾಗಿ ನಿರ್ಮಾಣವಾದ ಈ ಚಿತ್ರದ ಪ್ರಚಾರಕ್ಕೆ ಖರ್ಚಾಗಿದ್ದು ಸುಮಾರು 50 ಕೋಟಿ. ಚಿತ್ರ ಗಳಿಸಿದ್ದು ಭರ್ಜರಿ 600 ಕೋಟಿ. ಇದು ಸಮಕಾಲೀನ ಅದ್ಭುತ ಯಶಸ್ಸಿನ ಚಿತ್ರ ಎಂದು ನಾನು ನಂಬುತ್ತೇನೆ.

Shreenidhi DS, Fiction Head, Udaya TV

2ಶ್ರೀನಿಧಿ ಡಿ.ಎಸ್.

‘ಕಬಾಲಿ’ ಹಂಚಿಕೆದಾರರಿಗೆ ಲಾಭ ತಂದುಕೊಟ್ಟಿರಬಹುದು! ಆದರೆ ನೋಡಿದೋರಿಗೆ ಖುಷಿ ಆಗಿದೆಯಾ?

ಆಮೇಲೆ- ಸಿನಿಮಾಕ್ಕೆ ನಿಜವಾದ ಖರ್ಚಾದ ದುಡ್ಡೆಷ್ಟು ಅನ್ನೋದು ಜನಸಾಮಾನ್ಯನಿಗೆ ಗೊತ್ತಾಗಲ್ಲ, ಆತನಿಗೆ ಇದೊಂದು ದೊಡ್ಡ ಚಿತ್ರ, ಕೋಟ್ಯಂತರ ರೂಪಾಯಿಗಳ ವೆಚ್ಚ ಆಗಿದೆ ಎಂದು ಬಿಂಬಿಸಿ – ಆ ಚಿತ್ರವನ್ನು ಮಿಸ್ ಮಾಡ್ಕೊಳೋದೇ ಅಪರಾಧ ಎಂಬಂತೆ ಬಿಂಬಿಸಿ, ಒತ್ತಾಯ ಪೂರ್ವಕವಾಗಿ ನೋಡೋ ಹಾಗೆ ಮಾಡಲಾಗತ್ತೆ. ಜನಕ್ಕೆ ಈ ಕ್ಷಣದ ಸಂಭ್ರಮ- ಯಶಸ್ಸು ಅಷ್ಟೇ ಬೇಕು. ಸುಮ್ಮನೆ ನೂರಾರು ಥಿಯೇಟರ್ ಗಳಲ್ಲಿ ರಿಲೀಸ್ ಮಾಡಿ, ಧೂಳೆಬ್ಬಿಸಿ-ಗೌಜಿ ಮಾಡಿ ಹೋ ಅಂತ ಅಬ್ಬರ…. ಆಮೇಲೆ ಹೇಳೋರು ಕೇಳೋರು ಇಲ್ಲ!

Aravind SD, Film Maker

3ಅರವಿಂದ್ ಎಸ್. ಡಿ.

ಕಬಾಲಿ ನಿಜಕ್ಕೂ path breaking cinema. ಆದರೆ ಅತಿಯಾಗಿ ಪ್ರಚಾರ ಹಾಗು ನಿರೀಕ್ಷೆಗಳನ್ನು ಹುಟ್ಟಿಸಿತ್ತು. ವ್ಯಯಕ್ತಿಕವಾಗಿ ನನಗೆ ಚಿತ್ರ ಇಷ್ಟವಾಯ್ತು. ರಜನಿ ಅಂಥಾ ಸೂಪರ್ ಸ್ಟಾರ್ ಪ್ರಭೆಯನ್ನು ಮರೆಮಾಡಿ ನಿಜವಾದ ನಟನನ್ನು ತೋರಿಸಿದ್ದಾರೆ. ಒಬ್ಬ ಖ್ಯಾತ ನಾಯಕನನ್ನು ದಲಿತ ನಾಯಕನನ್ನಾಗಿ ಹೆಣೆದಿರುವ  ಕಥೆ ಅದ್ಭುತ. ಇದು ಕೇವಲ ರಜನಿ ಚಿತ್ರವಾಗಿ ಉಳಿಯದೆ, ನೈಜವಾಗಿ ಚಿತ್ರ ಕಟ್ಟಿರುವುದು ಪ್ರಸಂಶನೀಯ.

Vanitha Sathish, Software professional

4 ವನಿತಾ ಸತೀಶ್

ಹೊಸತನ ಬರಿ ಲೊಕೇಶನ್   ಮತ್ತು ಕಥೆಯ ಎಳೆಯಲ್ಲಿದೆ. ಕೆಲವು ನಿರೂಪಣೆ; ಸತ್ತ ಹೆಂಡತಿ  ಎಲ್ಲ ಕಡೆ ಕಾಣಿಸಿ ಅವನನ್ನು ಕಾಡುವುದು ತುಂಬಾ ಸುಂದರವಾಗಿದೆ. ಚಿತ್ರ ಕಥೆ ಪ್ರೇಕ್ಷಕರನ್ನು ಹಿಡಿದು ಕೂರಿಸುವಷ್ಟು ಕಾತುರ ಮತ್ತು ಆಸಕ್ತಿ ಹುಟ್ಟಿಸುವಲ್ಲಿ ಸೋತಿದೆ. ಕಬಾಲಿ ಪಾತ್ರ ಕೂಡ ನಾಯಕನ ದಿಟ್ಟ ಗುಣ ಮತ್ತು ವ್ಯಕ್ತಿತ್ವ ಪ್ರೇಕ್ಷಕರ ಮನದಲ್ಲಿ ನೆಡುವಂಥ ಯಾವುದೇ ದೃಶ್ಯ ಕಟ್ಟಿ ಕೊಟ್ಟಿಲ್ಲ. ನಾವೆ ಪಟ್ಟು ಹಿಡಿದು ಚಿತ್ರದಲ್ಲಿ ಧನಾತ್ಮಕ ಅಂಶಗಳನ್ನು ಹುಡುಕಿದರೆ ಕೆಲವು ಮಾತ್ರ ಸಿಗುತ್ತವೆ. ಒಟ್ಟಾರೆ ಕೊಟ್ಟ ದುಡ್ಡಿಗೆ 80% paisa vasool ಕಾರಣ, ಹೊರ ದೇಶದ ಲೊಕೇಶನ್, ಹೊಸ ನಟ ನಟಿಯರು ಮತ್ತ ರಜನಿ ಸರ್.ಜನರ ಮನ ಮುಟ್ಟುವಲ್ಲಿ ಸಂಪೂರ್ಣವಾಗಿ ಸೋತಿದೆ.

ChandraShekar Shrivastav, Film director

5ಚಂದ್ರಶೇಖರ್ ಶ್ರೀವಾತ್ಸವ್

ರಜನಿಕಾಂತ್ ಸಿನಿಮಾದಲ್ಲಿ ಇದ್ದಮೇಲೆ ಮುಗೀತು, ಅಲ್ಲಿ ಒಪೀನಿಯನ್ ಗಳ ಅವಶ್ಯಕತೆನೇ ಇಲ್ಲ. ಆ ಸಿನಿಮಾ ಸೂಪರ್ ಹಿಟ್ಚೇ.

Vidya Rao, Writer

6ವಿದ್ಯಾ ರಾವ್

ನಾನು ಚಿತ್ರವನ್ನು ನೋಡಿಲ್ಲ.. ಆದರೂ, ಒಬ್ಬ ನಟನ ಪಾಪುಲಾರಿಟಿಯನ್ನೇ ಬಂಡವಾಳವಾಗಿ ಇಟ್ಟುಕೊಂಡು ಮೀಡಿಯಾ ಮೂಲಕ ಅತಿಯಾಗಿ ಪ್ರಚಾರ ಮಾಡಿ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಕರೆತರಲಾಗುತ್ತಿದೆ. ಆದರೆ ಒಂದು ಚಿತ್ರಕ್ಕೆ ಅದರ ಕಥೆ, ದೃಶ್ಯಿಕರಣ, ನಟರ ನಟನೆ ಮುಂತಾದವುಗಳೇ ಮೂಲ ಮಾನದಂಡವಾಗಿರಬೇಕು. ಬಿಡುಗಡೆಯ ಮುನ್ನವೇ ಈ ಚಿತ್ರಗಳು ಎಷ್ಟು ಸುದ್ದಿ ಮಾಡುತ್ತವೆ ಎಂದರೆ, ನೈಜ ಮನಸ್ಸಿನಿಂದ ಪ್ರೇಕ್ಷಕ ಚಿತ್ರವನ್ನು ನೋಡಲು ಆಗುವುದೇ ಇಲ್ಲ. ಒಬ್ಬನು ಸಾಧಾರಣವಾಗಿ ಚಿತ್ರವನ್ನು ನೋಡಿ ಅಭಿಪ್ರಾಯ ಹೇಳುವ ಮುನ್ನವೇ ಮೀಡಿಯಾದಲ್ಲಿ ಸೂಪರ್ ಹಿಟ್ ಎಂದು ಬಣ್ಣಿಸಿ ಆಗಿರುತ್ತದೆ. ಕಬಾಲಿ ಎಷ್ಟೇ ಹೈಪ್ ಸೃಷ್ಟಿಸಿದರೂ, ಚಿತ್ರಕಥೆಯ ಬಗ್ಗೆ ಹೆಚ್ಚು ಚರ್ಚೆ ನಡೆಯಲಿಲ್ಲ.

Srinidhi Srivatsa, Software professional

7ಶ್ರೀನಿಧಿ ಶ್ರೀವಾತ್ಸವ್

ಬಾಕ್ಸ್ ಆಫೀಸ್ ಅಬ್ಬರ ನೋಡಿದರೆ ಕಬಾಲಿ ಸೂಪರ್ ಹಿಟ್ , ಅನ್ನುದರಲ್ಲಿ ಸಂಶಯ ಇಲ್ಲ. ಕಥೆಯು ತುಂಬಾ ಪರಿಣಾಮಕಾರಿ ಆಗಿಲ್ಲದಿದ್ದರೂ, ಕೆಟ್ಟ ಕಥೆ ಎನ್ನುವಂತಿಲ್ಲ. ಇಂದಿನ ರಾಜಕೀಯ ಸಾಮಾಜಿಕ ಸ್ಥಿತಿಯನ್ನು ಗಮನದಲ್ಲಿ ಇಟ್ಟುಕೊಂಡು ಹೇಳುವುದಾದರೆ, ದಲಿತನಾಯಕ ಮೂಲಕ ಕಥೆ ಹೇಳಲು ಹೊರಟಿದ್ದು ಕಥಾವಸ್ತುವನ್ನು ಕೆಡಿಸಿದೆ ಎನಿಸುತ್ತದೆ.

Abhishek SN, Film Maker

8ಅಭಿಷೇಕ್ ಎಸ್ ಎನ್

ಹಣ ಗಳಿಕೆಯೇ ಮೇಲೆ ಯಶಸ್ಸನ್ನು ಅಳೆಯುವುದಾದರೆ, ಕಬಾಲಿ ಸಾಧನೆಯ ಅಂಕಿ ಅಂಶಗಳು ನಮ್ಮ ಮುಂದೆಯೇ ಇವೆ. ಆದರೆ ವ್ಯಕ್ತಿಗತವಾಗಿ ಈ ಚಿತ್ರ ಮಿಶ್ರ ಪ್ರತಿಕ್ರಿಯೆಗಳನ್ನು ಪಡೆದಿದೆ. ಒಟ್ಟಾರೆ, ಚಿತ್ರಕಥೆ ಇನ್ನಷ್ಟು ಜವಾಬ್ದಾರಿಯುತವಾಗಿ ಇರಬೇಕಾಗಿತ್ತು ಎಂದು ನನಗೆ ಅನಿಸುತ್ತದೆ. ಆಗ ಕಬಾಲಿಗೆ ಕಲಾತ್ಮಕ ಹಾಗು ಮನೋರಂಜಕ ಚಿತ್ರವಾಗಿಯೂ ಹೆಚ್ಚು ಮನ್ನಣೆ ಸಿಗುತ್ತಿತ್ತು.

 

 

Apoorva, Actress

9ಅಪೂರ್ವ

ರಜನಿ ವ್ಯಕ್ತಿತ್ವವೇ ಸೂಪರ್ ಸ್ಟಾರ್. ಹಾಗಾಗಿ ಕಬಾಲಿ ಕೂಡ ಸೂಪರ್ ಹಿಟ್. ನನಗೆ ಅನಿಸುವಂತೆ ಅವರ ಅಭಿಮಾನಿಗಳು ರಜನಿಗೊಸ್ಕರವೇ ಈ ಚಿತ್ರವನ್ನು ನೋಡುತ್ತಾರೆ. ಮಿಕ್ಕಿದ್ದೆಲ್ಲವೂ ಅವರಿಗೆ ಗೌಣ. ಸೂಪರ್ ರಜನಿ..

Ashok GK, Business consultant

10ಅಶೋಕ್ ಜಿಕೆ

ಕಬಾಲಿ ಚಿತ್ರದ ಬ್ರಾಂಡ್ ವ್ಯಾಲ್ಯೂ ಹಾಗು ಮಾರ್ಕೆಟಿಂಗ್ ಸ್ಟ್ರಾಟಜಿಯನ್ನು ಮೆಚ್ಚಲೇಬೇಕು. ಆದರೆ ಒಂದು ಒಳ್ಳೆಯ ಕಥೆ ಇಲ್ಲದೆ ಇರುವಾಗ ಯಶಸ್ಸು ಸಾಧ್ಯವೂ ಇಲ್ಲ. ಇಂದಿನ ಪ್ರೇಕ್ಷಕರು ಬಲು ಸೂಕ್ಷ್ಮ. ಕಬಾಲಿಗೆ ರಜನಿ ಎಂಬ ಸೂಪರ್ ಸ್ಟಾರ್ ನ ಬ್ರಾಂಡಿಂಗ್ ಇತ್ತು. ಆದರೂ ಇದು ರಜನಿ ಅಭಿಮಾನಿಗಳಿಗೆ ಮೀಸಲಾದ ಚಿತ್ರವಾಗಿ ಉಳಿಯಿತು. ನಾನೂ ಈ ಚಿತ್ರವನ್ನು ನೋಡಿದ್ದು ರಜನಿ ಅಭಿಮಾನಿಯಾಗಿಯೇ.

ನಿಜಕ್ಕೂ ನನಗೆ ನಿರಾಶೆ ಆಯ್ತು. ರಜನಿಯ ಹಳೆ ಚಿತ್ರಗಳಲ್ಲಿನ ವಿಶೇಷತೆ ಇದರಲ್ಲಿ ಕಾಣಲಿಲ್ಲ. ಸ್ಕ್ರಿಪ್ಟ್ ನಲ್ಲಿ ಏನು ಹಿಡಿತ ಇರಲಿಲ್ಲ ಎನಿಸಿತು.

Rashmi Kulakarni, Actress

11ರಶ್ಮಿ ಕುಲಕರ್ಣಿ

ಒಂದ್ಸಲಾ ಖಂಡಿತ ನೋಡ್ಬೇಕು ಯಾಕಂದ್ರೆ ಇದು ರಜನಿಕಾಂತ್ ಅವರ ಚಿತ್ರ. ದೊಡ್ಡ ಬಜೆಟ್ ನ ಸಿನಿಮಾ ಮತ್ತೆ ಅವರು ಈ ವಯಸ್ಸಲ್ಲೂ ಯುವನಟರ ಎನರ್ಜಿಯ ಮೇಲೆ ಸವಾಲ್ ಆಗೋ ರೀತಿಯಲ್ಲಿ ಅಭಿನಯಿಸಿದ್ದಾರೆ. ನೆರುಪ್ಪು ಡಾ ಹಾಡಿಗಾಗಿ ಕಾಯುತಿದ್ದೆ, ಆ ವಿಷಯದಲ್ಲಿ ಸ್ವಲ್ಪ ನಿರಾಸೆ ಆಯ್ತು.

 

ಹೇಳೋದು ಕಷ್ಟ  !

ಪ್ರತಿ ಕ್ಷೇತ್ರದಲ್ಲಿರುವ ಪ್ರತಿಯೊಬ್ಬರ ಅನಿಸಿಕೆ “ಕಬಾಲಿ” ವಿಷಯದಲ್ಲಿ ಬೇರೆ ಆಗಿದೆ. ಸೂಪರ್ ಸ್ಟಾರ್ ರಜನಿ ಸಾರ್ ಅವರ ಎಷ್ಟೋ ಸೂಪರ್ ಡೂಪರ್ ಸಿನಿಮಾಗಳ ಮುಂದೆ “ಕಬಾಲಿ” ಎಲ್ಲಿ ನಿಂತಿದೆ ಅನ್ನೋದು ಕಷ್ಟಕರ ಎಣಿಕೆಯಾಗಿದೆ.

ಕಡೆಯದಾಗಿ “ಕಬಾಲಿ” ಸಿನಿಮಾಗಾಗಿ ಜನ ಥಿಯೇಟರ್ ಮುಂದೆ ನೂಕುನುಗ್ಗಲು ಮಾಡುತ್ತಿದ್ದಾರೋ ಇಲ್ವೋ ಗೊತ್ತಿಲ್ಲ ಆದರೆ ರಜನಿ ಸಾರ್ ಅವರ ಸ್ಟೈಲ್ ಹಾಗು ಖದರ್ ನೋಡಲಂತೂ ಖಂಡಿತ ಮುಂದೆಯೂ ಜನ ಹಾತೊರೆಯುತಿರುತ್ತಾರೆ.

ಅಂದಹಾಗೆ ನೀವೇನಂತೀರಾ?

“ಟಗರು” ಬೈಕ್‍ನ ಅಸಲಿ ಕಹಾನಿ

ಸ್ಯಾಂಡಲ್‍ವುಡ್‍ನ ಟಾಕ್ ಆಫ್ ದ ಟೌನ್ ಆಗಿರೋದು ಮತ್ತೊಮ್ಮೆ ದುನಿಯಾ ಸೂರಿ ಹಾಗು ಶಿವಣ್ಣ ಒಂದಾಗಿರೋದು.. ದುನಿಯಾ ಸೂರಿ ಟಗರು ಅಂತಾ ಟೈಟಲ್‍ ಇಟ್ಟು, ಮೈಯೆಲ್ಲಾ ಪೊಗರು ಅಂತಾ ಹೇಳಿದನ್ನ ಕಂಡು ಅವ್ರ ಫ್ಯಾನ್ಸ್ ಫುಲ್ ಥ್ರಿಲ್ ಆಗಿದ್ದಾರೆ.. ಆದ್ರೆ ಎಲ್ಲದಕ್ಕಿಂತ ಹೆಚ್ಚಾಗಿ ಕಳೆದೆರಡು ದಿನಗಳಿಂದ ಸೋಷಿಯಲ್ ನೆಟ್‍ವರ್ಕ್‍ನಲ್ಲಿ ಓಡಾಡ್ತಿರೊ ಟಗರು ಬೈಕ್ ನೋಡಿ ಮತ್ತಷ್ಟು ಖುಷ್ ಆಗಿದ್ದಾರೆ.. ಆದ್ರೆ ಆ ಬೈಕ್ ಬಗ್ಗೆ ಚಿತ್ರತಂಡ ಹೇಳ್ತಿರೋದೆ ಬೇರೆ.. ಹಾಗಾದ್ರೆ ಈ ಬೈಕ್ ಹಿಂದಿರೊ ಅಸಲಿ ಕಹಾನಿಯಾದ್ರು ಏನು..? ಅಂತೀರಾ..

7ce49102c2caea88dbab91df1e971039
ಸ್ಯಾಂಡಲ್‍ವುಡ್‍ನಲ್ಲಿ ಸಿಕ್ಕಾಪಟ್ಟೆ ಸುದ್ದಿ ಮಾಡ್ತಿರೊ ಸಿನಿಮಾ ಟಗರು. ಕಾರಣ ದುನಿಯಾ ಸೂರಿ ಮತ್ತು ಸೆಂಚುರಿಸ್ಟಾರ್ ಶಿವಣ್ಣ ಮತ್ತೊಮ್ಮೆ ಜೊತೆಯಾಗಿರೋದು ಒಂದಾದ್ರೆ, ಮತ್ತೊಂದು ಅವರಿಬ್ಬರ ಫ್ಯಾನ್ಸ್‍ಗೂ ಕಿಕ್ ಏರಿಸ್ತಿರೊ ಟಗರು ಅನ್ನೋ ಟೈಟಲ್. ಹೌದು ಚಿತ್ರಕ್ಕೆ ಅದ್ಯಾವಾಗ ಟಗರು ಅಂತಾ ಹೆಸ್ರನ್ನ ಫಿಕ್ಸ್ ಮಾಡಿದ್ರೊ ನೋಡಿ, ಅದಿಂನಿಂದಲೇ ಸಿನಿಮಾ ಮೇಲೆ ಏನೋ ಒಂಥರ ಕ್ರೇಜ್. ಹಾಗಾಗಿನೆ ಶಿವಣ್ಣನ ಬರ್ತ್‍ಡೆಗೆ ಅವ್ರ ಅಭಿಮಾನಿಗಳು ಟಗರನ್ನೆ ಗಿಫ್ಟ್ ಮಾಡಿ ಖುಷಿ ಪಟ್ಟಿದ್ರು.

a8e5406b-f8be-43ce-9bb0-0d3c86700a68 (1)
ಆದ್ರೆ ಇದೆಲ್ಲದಕ್ಕಿಂತ ಗಾಂಧಿನಗರದಲ್ಲಿ ಸೆನ್ಸೇಷನಲ್ ಹುಟ್ಟುಹಾಕಿದ್ದು ಟಗರುನಂತಿರೊ ಬೈಕು..
ಹೌದು ಈ ಬೈಕ್ ಅಂತೂ ಸೋಷಿಯಲ್ ನೆಟ್‍ವರ್ಕ್‍ನಲ್ಲಿ ಸಿಕ್ಕಾಪಟ್ಟೆ ಸುದ್ದಿ ಆಯ್ತು.. ಈ ಬೈಕನ್ನು ಟಗರು ಚಿತ್ರಕ್ಕಾಗಿ ಸ್ಪೇಷಲ್ ಆಗಿ ರೆಡಿ ಮಾಡಿಸಿದ್ದಾರೆ. ಶಿವಣ್ಣ ಸಿನಿಮಾದಲ್ಲಿ ಈ ಬೈಕ್‍ನಲ್ಲಿಯೇ ರೌಂಡ್ ಹಾಕೋದು ಅಂತೆಲ್ಲಾ ಮಾತಾಡಿಕೊಂಡ್ರು. ಯಾಕೆಂದ್ರೆ ಜಾಕಿ ಸಿನಿಮಾದಲ್ಲಿ ಅಪ್ಪುಗಾಗಿ ಸ್ಪೆಷಲ್ ಬೈಕ್ ರೆಡಿ ಮಾಡಿಸಿದ್ದ ದುನಿಯಾ ಸೂರಿ ಇಲ್ಲೂ ಅಂತಾ ಬೈಕ್ ಮಾಡಿಸಿರಬಹುದು ಅನ್ನೊ ಯೋಚನೆ ಗಾಂಧಿನಗರ ಮಂದಿಯದ್ದಾಗಿತ್ತು.

ಅಸಲಿಗೆ ದುನಿಯಾ ಸೂರಿ ಮತ್ತೆ ಈ ಬೈಕ್‍ನ ಹಿಂದೆ ಬಿದ್ದಿರೋದು ಯಾಕೆ, ಅನ್ನೋ ಮಾಹಿತಿಯನ್ನ ಕಲೆಹಾಕಲು ಹೋದಾಗ, ಸಿಕ್ಕ ಮ್ಯಾಟ್ರೇ ಬೇರೆ.. ಹೌದು ಚಿತ್ರಕ್ಕೂ ಈ ಬೈಕ್‍ಗೂ ಯಾವುದೇ ಸಂಬಂದವಿಲ್ಲ.. ಜಸ್ಟ್ ಅಭಿಮಾನಿಗಳು ಇದನ್ನ ಮಾಡಿಕೊಂಡಿರ್ಬೇಕು, ಅದು ಇಷ್ಟೊಂದು ಸುದ್ದಿಯಾಗ್ತಿದೆ ಅನ್ನೊದನ್ನ ಸ್ಪಷ್ಟಪಡಿಸಿದ್ರು. ಇವೆಲ್ಲಾ ಏನೇ ಇದ್ರೂ, ಟಗರು ಚಿತ್ರದ ಬಗ್ಗೆ ಸಿನಿ ಅಭಿಮಾನಿಗಳಲ್ಲಿ ಎಷ್ಟೋಂದು ಕ್ರೇಜ್  ಇದೆ ಅನ್ನೋದಿಕ್ಕೆ ಇದೊಂದು ಸ್ಮಾಲ್ ಎಕ್ಸಾಂಪಲ್..

ನಾಟಕಕ್ಕೆ ಟಿಕೆಟ್ ಹರಿದು, ಪ್ರೇಕ್ಷಕರಿಗೆ ಬ್ಯಾಟರಿ ಹಿಡಿದು …

ನಾಟಕಕ್ಕೆ ಟಿಕೆಟ್ ಹರಿದು, ಪ್ರೇಕ್ಷಕರಿಗೆ ಬ್ಯಾಟರಿ ಹಿಡಿದು ಸೀಟು ತೋರಿಸುತ್ತಾ, ಬಣ್ಣದ ಲೋಕಕ್ಕೆ ಎಂಟ್ರಿ ಕೊಟ್ಟಾಗ ..

 

443479-PrakashBelawadiNew-1348760982-299-640x480

ಪ್ರಕಾಶ್ ಬೆಳವಾಡಿ

 

ಹೌದು, ಇಂದು ಪ್ರಕಾಶ್ ಬೆಳವಾಡಿ ಕನ್ನಡ ರಂಗಭೂಮಿಯಲ್ಲಿ ಬಹಳ ದೊಡ್ಡ ಹೆಸರು.

ರಂಗಭೂಮಿ ಕಲಾವಿದೆ ಭಾರ್ಗವಿ ನಾರಾಯಣ್ ಮತ್ತು ಹಿರಿಯ ಮೇಕಪ್ ಕಲಾವಿದ ನಾಣಿ ಅವರ ಪುತ್ರರಾದ ಇವರು ಚಿಕ್ಕಿಂದಿನಿಂದಲೆ ರಂಗಭೂಮಿಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದರು.

ನಟ, ನಿರ್ದೇಶಕರಾಗುವುದಕ್ಕಿಂತ ಮುಂಚೆ ಬೆಂಗಳೂರು ಲಿಟ್ಲ್ ಥಿಯೆಟರ್‌ನ ಒಂದು ನಾಟಕಕ್ಕೆ ಟಿಕೆಟ್ ಹರಿದು ನಂತರ ಬ್ಯಾಟರಿ ಹಿಡಿದು ಪ್ರೇಕ್ಷಕರಿಗೆ ಸೀಟು ತೋರಿಸುತ್ತಾ ರಂಗಭೂಮಿಗೆ ಅಧಿಕೃತವಾಗಿ ಎಂಟ್ರಿಕೊಟ್ಟ ಪ್ರಕಾಶ್, ಅಲ್ಲಿಂದ ಇಲ್ಲಿಯವರೆಗೆ  ರಂಗಭೂಮಿಯಲ್ಲಿ ತಿರುಗಿ ನೋಡಿಯೇ ಇಲ್ಲ.

೧೯೭೮ರಲ್ಲಿ ಮಾಲಿನಿ ಮತ್ತು ಎಡ್ವರ್ಡ್ ವೈಟ್ ಅವರ ನಿರ್ದೇಶನದ – ಅನ್‌ಗ್ರೇಟ್‌ಫುಲ್ ಮ್ಯಾನ್ ಎಂಬ ನಾಟಕದಲ್ಲಿ ಚಿಕ್ಕ ಪಾತ್ರ ಮಾಡಿದ್ದರು. ಅದಾದ ಮೇಲೆ ಕನ್ನಡದ ಯಶಸ್ವಿ ರಂಗಪ್ರಯೋಗ ಮುಖ್ಯಮಂತ್ರಿ ನಾಟಕದಲ್ಲಿ ಒಂದು ಪಾತ್ರ, ಹಾಗು ಸಾಕಷ್ಟು ನಾಟಕಗಳಲ್ಲಿ ಅಭಿನಯಿಸಿದ್ದಾರೆ.  ವರ್ಷಕ್ಕೆ ಸುಮಾರು ಹತ್ತು ನಾಟಕಗಳಿಗೆ ಕೆಲಸ ಮಾಡುತ್ತಾರೆ. “ನಾನು ಬೇಸಿಕಲಿ  ನಾನು ನಟನಲ್ಲ, ನೇಪಥ್ಯದ ವ್ಯಕ್ತಿ” ಎನ್ನುವ ಪ್ರಕಾಶ್ ಅವರು ಪ್ರಾರಂಭದಲ್ಲಿ ಸಾಕಷ್ಟು ನಾಟಕಗಳಿಗೆ ಮೇಕಪ್ ಹಾಗು ಲೈಟಿಂಗ್ ಕೂಡ ಮಾಡಿದ್ದಾರೆ.

೧೯೮೫ರಲ್ಲಿ ಬಿಎಲ್‌ಟಿಗಾಗಿಯೇ  ‘ಸೀಸ್ರಮ್ ಸೋವಿಟೊ’ ಎಂಬ ಇಂಗ್ಲೀಷ್ ನಾಟಕವನ್ನು ನಿರ್ದೇಶಿಸಿದ್ದಾರೆ. ಈ ನಾಟಕದ ಮೂಲಕ ಇಂಗ್ಲೀಷ್ ರಂಗಭೂಮಿಗೆ ಕಾಲಿಟ್ಟ ಇವರು ಇದುವರೆಗೂ ೩೦ಕ್ಕೂ ಹೆಚ್ಚು ಇಂಗ್ಲೀಷ್ ನಾಟಕಗಳನ್ನು ನಿರ್ದೇಶಿಸಿದ್ದಾರೆ.

ogqifeqhuqonkkgm5kjh

ಪತ್ರಕರ್ತರಾಗಿಯೂ ಸೇವೆ

ಬೆಂಗಳೂರಿನಲ್ಲಿ ವಿಶ್ವೇಶ್ವರಯ್ಯ  ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಪದವಿ ಮುಗಿಸಿ ಯಾವುದಾದರೂ ಖಾಸಗಿ ಸಂಸ್ಥೆಗೆ ಹೋಗಿದ್ದರೆ, ಇಷ್ಟು ಹೊತ್ತಿಗೆ ಲಕ್ಷಾಂತರ ರೂಪಾಯಿ ಸಂಬಳ ಪಡೆಯುತ್ತಿದ್ದರು, ಅದನ್ನು ಬಿಟ್ಟು ಲಂಕೇಶ್ ಪತ್ರಿಕೆಗೆ ಕೆಲಸಕ್ಕಾಗಿ ಅರ್ಜಿ ಹಾಕುತ್ತಾರೆ, ಆದರೆ  ಮೇಷ್ಟ್ರು ಬಳಿ ಅವರಿಗೆ ಕೆಲಸ ಸಿಗಲಿಲ್ಲ.  ಆ ನಂತರ ಇಂಡಿಯನ್ ಎಕ್ಸಪ್ರೆಸ್ ಪತ್ರಿಕೆಯಲ್ಲಿ  ಇಂಟರ್ನಿ ಪತ್ರಕರ್ತನಾಗಿ ಕೆಲಸಕ್ಕೆ ಸೇರಿದ ಅವರು ತಿಂಗಳಿಗೆ ೬೩೦ ರೂಪಾಯಿ ಸಂಬಳ ಪಡೆಯುತ್ತಿದ್ದರು.  ಹಿರಿಯ ಪತ್ರಕರ್ತ ಅರುಣ್ ಶೌರಿಯವರು ೮೦ರ ದಶಕದಲ್ಲಿ ಬರೆದ ಸಾಕಷ್ಟು ಲೇಖನಗಳಿಂದ ಪ್ರಭಾವಿತರಾಗಿ ಪತ್ರಿಕೋದ್ಯಮಕ್ಕೆ ಕಾಲಿಟ್ಟು, ಕೆಲ ವರ್ಷಗಳ ಕಾಲ ಕೆಲಸ ಮಾಡಿದರು.

ಸಿನಿಮಾ ಪಯಣದ ಆರಂಭ

ಗಿರೀಶ್ ಕಾರ್ನಡ್ ಅವರ ‘ಅಗ್ನಿ ಮತ್ತು ಮಳೆ’ ನಾಟಕವನ್ನು, ಇಂಗ್ಲೀಷ್ ಅನುವಾದಿತ ‘ದಿ ರೈನ್ ಆ್ಯಂಡ್ ಫೈರ್’ ಎಂಬ ನಾಟಕದಲ್ಲಿ ರೇಬಾನಿ ಅನ್ನೋ ಪಾತ್ರ ಮಾಡಿದ್ದರು, ಅದನ್ನು  ನೋಡಿದ ಗಿರೀಶ್ ಅವರು ಕಾನೂರು ಸುಬ್ಬಮ್ಮ ಹೆಗ್ಗಡತಿ ಸಿನಿಮಾದಲ್ಲಿ ಓಬಯ್ಯನ ಪಾತ್ರ ಮಾಡಲು ಅವಕಾಶ ನೀಡಿದರು. ಅಲ್ಲಿಂದ ಅವರ ನಟನಾ ವೃತ್ತಿ ಆರಂಭವಾಯಿತು ಅಂತ ಹೇಳಬಹುದು. ಅದಾದ ಮೇಲೆ “ಸ್ಟಂಬಲ್” ಎಂಬ ಇಂಗ್ಲೀಷ್ ಸಿನಿಮಾ ನಿರ್ದೇಶನ ಮಾಡಿ ಅದಕ್ಕೆ ರಾಷ್ಟ್ರೀಯ ಪುರಸ್ಕಾರ ಪಡೆದರು.

43142d0e-f08c-45f5-99e6-667df3b4ea1a

“ಸ್ಟಂಬಲ್” ನಂತರ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದ ಅವರಿಗೆ ಒಮ್ಮೆ ಬಾಂಬೆಯಿಂದ ‘ಮದ್ರಾಸ್ ಕೆಫೆ’ ಚಿತ್ರದ ಸಹನಿರ್ದೇಶಕನೊಬ್ಬ ಕರೆ ಮಾಡಿ ಬರುವಂತೆ ಹೇಳುತ್ತಾರೆ . ಆ ನಂತರ ಅದರ ಬಾಲಾ ಪಾತ್ರಕ್ಕೆ ಆಯ್ಕೆಯಾಗಿ, ತಮ್ಮ ಅಮೋಘ ಅಭಿನಯದಿಂದ ಬಾಲಿವಡ್‌ನಲ್ಲಿ ಹೆಸರು ಮಾಡುತ್ತಾರೆ.

ಈಗ ಇದೆಲ್ಲವೂ ಇತಿಹಾಸ, ಹಿಂದಿ ಚಿತ್ರರಂಗದಲ್ಲಿ ಬೆಳವಾಡಿ ಅವರನ್ನು ಕರೆಯುತ್ತಾರೆ ಎಂದರೆ ಅದೊಂದು ಒಳ್ಳೆ ಪಾತ್ರವೆ ಆಗಿರುತ್ತದೆ, ಅಷ್ಟರ ಮಟ್ಟಿಗೆ ಬೆಳವಾಡಿ ಬಾಲಿವುಡ್ ಮಂದಿಯನ್ನು ತಮ್ಮ ಅಭಿನಯದಿಂದ ಆಕರ್ಷಿಸಿದ್ದಾರೆ. ಮದ್ರಾಸ್ ಕೆಫೆಯ ನಂತರ ತಲ್ವಾರ್, ಏರ್‌ಲಿಫ್ಟ್ ಹಾಗು ವಜೀರ್ ಇನ್ನು ಸಾಕಷ್ಟು ಸಿನಿಮಾಗಳನ್ನು ಅಭಿನಯಿಸಿದ್ದಾರೆ.

ಹಿಂದಿ ಚಿತ್ರಂಗದ ಆಫರ್‌ಗಳು ಹೆಚ್ಚಾದಂತೆ ಕನ್ನಡ ಚಿತ್ರರಂಗದಲ್ಲೂ ಅವರಿಗೆ ಬೇಡಿಕೆ ಸಾಕಷ್ಟು ಹೆಚ್ಚಾಯಿತು. ಎಷ್ಟರ ಮಟ್ಟಿಗೆ ಎಂದರೆ, ಅವರಿಗೆ ಸರಿಯಾಗಿ ನಿದ್ದೆ ಮಾಡಲು ಆಗದಷ್ಟು ಬ್ಯುಸಿ ಆಗಿದ್ದಾರೆ. ಕನ್ನಡದಲ್ಲಿ  ಕೆಂಡ ಸಂಪಿಗೆ, ಲಾಸ್ಟಬಸ್ , ಹಾಗು ಇತ್ತೀಚಿಗೆ ಬಿಡುಗಡೆಯಾದ ನಾಗತಿಹಳ್ಳಿ ಚಂದ್ರಶೇಖರ್ ರವರ ಇಷ್ಠಕಾಮ್ಯ  ಸೇರಿದಂತೆ ಮತ್ತಷ್ಟು ಸಿನಿಮಾಗಳಲ್ಲಿ ನಟಿಸಿದ್ದಾರೆ, ಆದರೆ ಅವರೆಂದಿಗೂ ಯಶಸ್ಸನ್ನು ತಲೆಗೇರಿಸಿಕೊಂಡಿಲ್ಲ ನಾನೇಂದಿಗೂ ಸಿನಿಮಾ ನಟ ಎಂದು ಹೇಳಿಕೊಳ್ಳುವುದಿಲ್ಲ. “ನಾನು ರಂಗಭೂಮಿಯವನೇ ಎಂದು ಹೇಳಿಕೊಳ್ಳಲು ಇಷ್ಟ ಪಡುತ್ತೇನೆ. ಅದರಲ್ಲೂ ನಾನೊಬ್ಬ ನಿರ್ದೇಶಕ ಮಾತ್ರ ನಟನಲ್ಲ” ಎಂದೇ ಹೇಳುತ್ತಾರೆ.

5th-bengaluru-international-film-festival_135590965513ಸಿನಿಮಾ ಕ್ಷೇತ್ರದಲ್ಲಿ ಉತ್ಸಾಹವಿರುವ ಯುವಜನರಿಗೆ ಮಾರ್ಗದರ್ಶನ ಮಾಡಲು, ಬೆಂಗಳೂರಿನ್ಲಲಿ ಹೊಸದಾಗಿ ಆರಂಭವಾಗಿರುವ “ವೈಟ್ ಪೆನ್ಸಿಲ್” (www.whitepencil.org.in) ಎಂಬ ಡಿಜಿಟಲ್ ಫಿಲಂ ಮೇಕಿಂಗ್ ಸ್ಕೂಲ್ ನಲ್ಲಿ ತಾಂತ್ರಿಕ ಸಲಹೆಗಾರರು  (Strategic Adviser) ಆಗಿ ಸಹಾಯ ಹಸ್ತನೀಡಲು ಒಪ್ಪಿದ್ದಾರೆ.

ತಮ್ಮ ಯಶಸ್ಸಿನ ಅಷ್ಟೂ ಕ್ರೆಡಿಟ್ಟನ್ನು  ಹೆಂಡತಿ ಮತ್ತು ಮಕ್ಕಳಿಗೆ ನೀಡುವ ಅವರ ಸಧ್ಯದ ಕನಸು ಸುಚಿತ್ರಾ ಆವರಣದಲ್ಲಿ ಒಂದೊಳ್ಳೆ ಸಿನಿಮಾ ನಿರ್ದೇಶನದ ಶಾಲೆ ಆರಂಭಿಸಬೇಕು ಎಂಬುದು.

ಪ್ರಕಾಶ್ ಬೆಳವಾಡಿಯವರ ಎಲ್ಲ ಕನಸುಗಳು ನನಸಾಗಲಿ, ಅವರು ಇನ್ನಷ್ಟು ಒಳ್ಳೆ ಪಾತ್ರಗಳಲ್ಲಿ ಮಿಂಚಲಿ ಮತ್ತಷ್ಟು ಪ್ರಕಾಶಮಾನವಾಗಿ ಚಿತ್ರರಂಗದ ಎಲ್ಲ ಆಯಾಮಗಳಲ್ಲಿ ಯಶಸ್ವಿಯಾಗಲಿ ಎಂದು ಆಶಿಶೋಣ.

ಸುಬ್ಬಯ್ಯ ನಾಯ್ಡು: ಕನ್ನಡ ಚಿತ್ರರಂಗದ ಮೊದಲ ನಾಯಕ ನಟ

ಸುಬ್ಬಯ್ಯ ನಾಯ್ಡು: ಕನ್ನಡ ಚಿತ್ರರಂಗದ ಮೊದಲ ನಾಯಕ ನಟ

ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ದಲ್ಲಿ ನಾಯಕನಟರಾಗಿ ಅಭಿನಯಿಸಿದ ಹೆಗ್ಗಳಿಕೆ ಸುಬ್ಬಯ್ಯ ನಾಯ್ಡು ಅವರದ್ದು. ಅವರು ಕನ್ನಡದ ಮೊದಲ ನಾಟಕ ನಟ ಅನ್ನುವುದು ಕೇವಲ ಅಂಕಿ-ಅಂಶಗಳ ಮೂಲಕ ಮಾತ್ರ ಗುರುತಿಸಲ್ಪಡೋ ಸಂಗತಿ ಅಲ್ಲ ನಾಯಕ ನಟರ ಅಭಿನಯಕ್ಕೆ ಒಂದು ರೀತಿಯಲ್ಲಿ ಮಾದರಿಯಾಗಿ ನಿಂತವರು ಅವರು. ವರನಟ ಡಾ.ರಾಜ್ ಕುಮಾರ್ ಅವರು ಸುಬ್ಬಯ್ಯ ನಾಯ್ಡು ಅವರ ಕಂಪನಿಯಲ್ಲಿ ಅಭಿನಯಿಸಿದ್ದವರು ಮಾತ್ರವಲ್ಲ ಅವರ ಅಭಿನಯ ಕ್ರಮವನ್ನೇ ಅನುಸರಿಸಿದವರೂ ಕೂಡ ಹೌದು. ಅಷ್ಟೇ ಅಲ್ಲ ಕನ್ನಡ ಚಿತ್ರರಂಗದ ಕನಿಷ್ಠ ಮೂರು ತಲೆಮಾರಿನ ಕಲಾವಿದರು ಸುಬ್ಬಯ್ಯ ನಾಯಡು ಅವರ ಅಭಿನಯ ಕ್ರಮವನ್ನೇ ಅನುಸರಿಸಿದ್ದರು.

ಎರಡನೇ ವಯಸ್ಸಿಗೆ ತಂದೆಯನ್ನು ಕಳೆದು ಕೊಂಡ ಸುಬ್ಬಯ್ಯ ನಾಯ್ಡು ಬಲು ಕಷ್ಟದ ಬಾಲ್ಯವನ್ನು ಕಂಡವರು. ಶಾಲೆಯ ಮುಖವನ್ನೇ ಕಾಣದೆ ಎಮ್ಮೆ ಮೇಯಿಸಿಕೊಂಡಿದ್ದರೂ ನಾಟಕಗಳನ್ನು ನೋಡಿ ಶುದ್ದ ಸಂಭಾಷಣೆಯನ್ನು ಬಾಲಕ ಸುಬ್ಬಯ್ಯ ನಾಯ್ಡು ಕಲಿತಿದ್ದರು. ಇದೇ ರಂಗಭೂಮಿಯ ಕಡೆ ಬರಲು ಪ್ರೇರಣೆ ನೀಡಿತು. ಗಿರಿಧರ್ಲಾಲ್ ಕಂಪನಿ ಮೂಲಕ ಪ್ರವೇಶ ಪಡೆದರೂ ಹೆಸರು ಮಾಡಿದ್ದು ಸುಬ್ಬು ಗುರಿಕಾರ್ ಅವರ ‘ಭಾರತ ಜನ ಮನೋವಿಲಾಸಿನಿ’ಕಂಪನಿಯ ಮೂಲಕ. ಅದರಲ್ಲೂ ‘ವಿರಾಟ ಪರ್ವ’ನಾಟಕದ ಸುದೇಷ್ಟೆ ಪಾತ್ರ ಹೆಸರು ತಂದು ಕೊಟ್ಟಿತು. ಇದನ್ನು ಮಾಡೋಳು ಹುಡುಗಿ ಅಂದುಕೊಂಡು ಮೋಹಿಸಿದ ಶ್ರೀಮಂತರೂ ಕೂಡ ಇದ್ದರು. ಗಂಗಾಧರ ರಾಯರ ಕಂಪನಿಯಲ್ಲಿ ನಾಯಕನ ಪಾತ್ರಗಳ ಮೂಲಕ ಹೆಸರು ಮಾಡಿದರು. ಇಲ್ಲಿಂದ ಮುಂದಿನ ಸ್ಟಾಪ್ ಗುಬ್ಬಿ ಕಂಪನಿ. ಇಲ್ಲಂತೂ ‘ಸುಭದ್ರಾ ಕಲ್ಯಾಣ’ದ ಶ್ರೀಕೃಷ್ಣನಾಗಿ ಹೆಸರು ಮಾಡಿದರು. ಅಷ್ಟು ಹೊತ್ತಿಗಾಗಲೇ ನಾಯಕನ ಪಾತ್ರವನ್ನು ನಿರ್ವಹಿಸುವುದರಲ್ಲಿ ಅವರು ಮಾದರಿ ಆಗಿ ಬಿಟ್ಟಿದ್ದರು. ಗುಬ್ಬಿ ಕಂಪನಿಯವರೇ ನಿರ್ಮಿಸಿದ ‘ಹಿಸ್ ಲವ್ ಆಪೇರ್’ ಅನ್ನೋ ಮೂಕಿ ಚಿತ್ರದಲ್ಲಿ ಕೂಡ ಸುಬ್ಬಯ್ಯ ನಾಯ್ಡು ಅಭಿನಯಿಸಿದರು.

ಈ ವೇಳೆಗೆ ಸುಬ್ಬಯ್ಯ ನಾಯ್ಡು ಅವರಿಗೆ ಆರ್.ನಾಗೇಂದ್ರ ರಾಯರ ಪರಿಚಯವಾಯಿತು. ರಾಯರು ಮುಂಬೈಗೆ ತೆರಳಿ ವಾಕ್ಚಿತ್ರಗಳಲ್ಲಿ ಅಭಿನಯಿಸಿ ಅನುಭವವನ್ನು ಪಡೆದುಕೊಂಡು ಬಂದಿದ್ದರು.ರಂಗಭೂಮಿಯ ಕುರಿತೂ ಅವರಿಗೆ ಹೊಸ ಐಡಿಯಾಗಳಿದ್ದವು. ಇದನ್ನು ಕೇಳಿ ಸುಬ್ಬಯ್ಯ ನಾಯ್ಡು ಅವರಿಗೆ ಅವರಿವರ ಕಂಪನಿಯಲ್ಲಿ ಕೆಲಸ ಮಾಡೋ ಬದಲಿಗೆ ರಾಯರ ಜೊತೆಯಲ್ಲಿ ಸ್ವಂತ ಕಂಪನಿ ಮಾಡಬಾರದು ಏಕೆ ಅನ್ನೋ ವಿಚಾರ ಬಂದಿತು. ರಾಯರ ಮೊದಲಿಗೆ ಒಪ್ಪದಿದ್ದರೂ ತಾಯಿ ರುಕ್ಮಿಣಿ ಬಾಯಿ ಮಾತಿಗೆ ಕಟ್ಟು ಬಿದ್ದು ಒಪ್ಪಿಕೊಂಡರು. ಹೀಗೆ ‘ಶ್ರೀಸಾಮ್ರಾಜ್ಯ ನಾಟಕ ಮಂಡಳಿ’ರೂಪುಗೊಂಡಿತು. ಇಲ್ಲಿ ರೂಪುಗೊಂಡ ‘ಭೂಕೈಲಾಸ’ ನಾಟಕ ಕನ್ನಡ ರಂಗಭೂಮಿಯ ಇತಿಹಾಸದಲ್ಲೇ ಮೈಲಿಗಲ್ಲು ಎನ್ನಿಸಿಕೊಂಡಿತು. ರಂಗದ ಮೇಲೆ ಮೊಟ್ಟ ಮೊದಲ ಸಲ ಡಿಮ್ಮರ್ಗಳು ಸ್ಪಾಟ್ ಲೈಟ್ಗಳು ಬಳಕೆಯಾದವು. ರಾವಣನಾಗಿ ಸುಬ್ಬಯ್ಯ ನಾಯ್ಡು ಅವರು ಅಭಿನಯದಲ್ಲಿ ಹೊಸತನವನ್ನು ತಂದಿದ್ದರು.

 15bg_bgkpm_SUCH_17_1847890e

ಇದೇ ವೇಳೆಗೆ ಚಮನ್ ಲಾಲ್ ಡುಂಗಾಜಿಯವರು ನಾಗೇಂದ್ರ ರಾಯರ ಬಳಿ ಕನ್ನಡ ಚಿತ್ರವನ್ನು ನಿರ್ಮಿಸುವ ಪ್ರಸ್ತಾಪವನ್ನು ಮುಂದಿಟ್ಟಿದ್ದರು. ನಾಗೇಂದ್ರ ರಾಯರು ಹಾಕಿದ್ದು ಒಂದೇ ಶರತ್ತು ‘ಸುಬ್ಬಯ್ಯ ನಾಯ್ಡು ಅವರು ನಾಯಕರಾಗ ಬೇಕು’ ಹೀಗೆ ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ದಲ್ಲಿ ನಾಯಕ ಇಂದ್ರಜಿತುವಿನ ಪಾತ್ರವನ್ನು ಸುಬ್ಬಯ್ಯ ನಾಯ್ಡು ನಿರ್ವಹಿಸಿದರು. ರಂಗ ಭೂಮಿಗಿಂತಲೂ ಸಿನಿಮಾ ಭಿನ್ನ ಕ್ಷೇತ್ರವಾಗಿದ್ದು. ಆಗ ಕಲಾವಿದರು ಅಭಿನಯಿಸುತ್ತಲೇ ಹಾಡ ಬೇಕಿತ್ತು. ಸ್ಟುಡಿಯೋ ಇರಲೇ ಇಲ್ಲ. ಇಂತಹ ಸವಾಲಿನಲ್ಲಿ ಸುಬ್ಬಯ್ಯ ನಾಯ್ಡು ತಮ್ಮ ಸ್ವಂತಿಕೆಯನ್ನು ತೋರಿಸಿದರು ಅಲ್ಲಿಂದ ಮುಂದೆ ‘ವಸಂತ ಸೇನ’ ‘ಹರಿಶ್ಚಂದ್ರ’ ‘ಮಹಾತ್ಮ ಕಬೀರ್’ಚಿತ್ರಗಳ ನಾಯಕರಾಗಿ ಸುಬ್ಬಯ್ಯ ನಾಯ್ಡು ಅಭಿನಯಿಸಿ ಅಪಾರ ಜನಪ್ರಿಯತೆ ಪಡೆದರು. ಆದರೆ ಅವರ ಒಲವು ಇದ್ದಿದ್ದು ರಂಗಭೂಮಿಯ ಕಡೆಗೇ.

ಮದ್ರಾಸಿನಲ್ಲಿ ‘ಶ್ರೀಸಾಮ್ರಾಜ್ಯ ಮಂಡಳಿ’ ಕ್ಯಾಂಪ್ ಹಾಕಿದ್ದಾಗ. ಚಾಂಮ್ರವರ್ಣ ಅಣೆಕಟ್ಟು ಒಡೆದು ಅಪಾರ ನಷ್ಟವಾಯಿತು. ನಾಗೇಂದ್ರ ರಾಯರು ರಂಗಭೂಮಿ ಸಾಕು ಎಂದು ನಿರ್ಧರಿಸಿ ಚಿತ್ರರಂಗದಲ್ಲಿ ಭವಿಷ್ಯವನ್ನು ಕಾಣಲು ತೀರ್ಮಾನಿಸಿದರು. ಆದರೆ ಸುಬ್ಬಯ್ಯ ನಾಯಡು ಅವರು ರಂಗಭೂಮಿಯಲ್ಲೇ ಇಳಿಯಲು ಬಯಸಿದರು. ಇಲ್ಲಿ ಗೆಳೆಯರ ಹಾದಿ ಬೇರೆಯಾಯಿತು. ಇದರಿಂದ ಕನ್ನಡ ಚಿತ್ರರಂಗಕ್ಕೆ ದೊರಕ ಬಹುದಾಗಿದ್ದ ಸುಬ್ಬಯ್ಯ ನಾಯ್ಡು ಅವರ ವಿಶಿಷ್ಠ ಪಾತ್ರಗಳು ತಪ್ಪಿ ಹೋದವು. ಮುಂದೆ ಅವರು ಚಿತ್ರ ನಿರ್ಮಿಸಿದ್ದು ಮಗ ಲೋಕೇಶ್ಗಾಗಿ. ‘ಭಕ್ತಪ್ರಹ್ಲಾದ’ಚಿತ್ರವನ್ನು ನಿರ್ಮಿಸಿ ತಾವೇ ಹಿರಣ್ಯ ಕಶಪುವಿನ ಪಾತ್ರವನ್ನು ಅಮೋಘವಾಗಿ ಮಾಡಿದರು. ಅಲ್ಲಿ ಕೂಡ ಅವರ ಪ್ರತಿಭೆಯನ್ನು ಗುರುತಿಸುವ ಮನೋಭಾವ ಕೆಲಸ ಮಾಡಿತ್ತು. ಲೀಲಾವತಿಯವರು ಚಿತ್ರರಂಗಕ್ಕೆ ಬಂದಿದ್ದು ಈ ಚಿತ್ರದ ಮೂಲಕವೇ.

ರಂಗಭೂಮಿಯಲ್ಲೇ ಉಳಿಯಲು ತೀರ್ಮಾನಿಸಿದ ಸುಬ್ಬಯ್ಯ ನಾಯಡು ಹಲವು ಹೊಸ ಪ್ರಯೋಗಗಳನ್ನು ಮಾಡಿದರು. ‘ತಿರುಗುವ ರಂಗಸಜ್ಜಿಕೆ’ಮಾಡಿದರು. ರಾಷ್ಟ್ರಮಟ್ಟದಲ್ಲೇ ಇಂತಹ ಪ್ರಯೋಗ ನಡೆದಿದ್ದು ಅದೇ ಮೊದಲು. ಹೊಸ ಕಲಾವಿದರನ್ನು ಹುಡುಕಿದರು. ಶ್ರೀಕಂಠ ಮೂರ್ತಿಗಳು ಅವರ ಕಂಪನಿಯ ಪ್ರಮುಖ ನಟರಾಗಿದ್ದರು.

ಒಮ್ಮೆ ಅವರಿಗೆ ಅನಾರೋಗ್ಯ ಉಂಟಾಯಿತು. ನಾಟಕಕ್ಕೆ ಟಿಕೇಟ್ ವಿತರಿಸಿಯಾಗಿತ್ತು. ಒಬ್ಬ ಕಲಾವಿದನ ಸಲುವಾಗಿ ನಾಟಕ ನಿಲ್ಲಿಸುವುದು ಸರಿಯಲ್ಲ ಎಂದು ಸುಬ್ಬಯ್ಯ ನಾಯಡು ನಿರ್ಧರಿಸಿದರು. ಆದರೆ ‘ಭಕ್ತ ಅಂಬರೀಷ’ದಲ್ಲಿ ರಮಾಕಾಂತನ ಪಾತ್ರವನ್ನು ವಹಿಸುವುದು ಸುಲಭವಾಗಿರಲಿಲ್ಲ. ಯೋಚಿಸಿ ನಾಯಡು ಅವರು ತಮ್ಮ ಕಂಪನಿಯಲ್ಲಿದ್ದ ಗಾಯನವನ್ನೂ ಬಲ್ಲ ಸುಂದರ ಯುವಕನಿಂದ ಆ ಪಾತ್ರವನ್ನು ಮಾಡಿಸಿದರು. ಆ ಯುವಕ ಮುತ್ತುರಾಜ್ ಮುಂದೆ ಡಾ.ರಾಜ್ ಕುಮಾರ್ ಆಗಿ ಹೆಸರು ಮಾಡಿದರು. ವೈವಿಧ್ಯಮಯ ಪಾತ್ರಗಳನ್ನು ನೀಡಿ ರಾಜ್ ಕುಮಾರ್ ಅವರು ಮೇರು ಕಲಾವಿದರಾಗಿ ಬೆಳೆಯುವಲ್ಲಿ ಸುಬ್ಬಯ್ಯ ನಾಯಡು ಅವರ ಕೊಡುಗೆ ಬಹಳ ದೊಡ್ಡದು. ಅದರಂತೆ ನರಸಿಂಹ ರಾಜು, ಬಾಲಕೃಷ್ಣ, ಢಿಕ್ಕಿ ಮಾದವರಾವ್, ಬೇಲೂರು ರಾಘವೇಂದ್ರ ರಾವ್ ಸೇರಿದಂತೆ ಅನೇಕ ಪ್ರಮುಖ ಕಲಾವಿದರನ್ನು ಅವರು ಬೆಳೆಸಿದರು.

1962ರ ಜುಲೈ 21ರಂದು ಮಂಡ್ಯದಲ್ಲಿ ಅಭಿನಯಿಸುತ್ತಿರುವಾಗಲೇ ಹೃದಯಾಘಾತದಿಂದ ಸುಬ್ಬಯ್ಯ ನಾಯಡು ನಿಧನರಾದರು. ಅಭಿನಯದ ಅನುಪಮ ತಾರೆ ಕಳಚಿತು. ಅವರ ತಾರಾಪತ್ನಿ ಲಕ್ಷ್ಮಿಬಾಯಿ. ಮೂಕಿ ಚಿತ್ರದ ಸ್ಟಾರ್ ಎನ್ನಿಸಿಕೊಂಡಿದ್ದರು. ಚಿತ್ರರಂಗದಲ್ಲಿ ಕೂಡ ಮಹತ್ತರ ಪಾತ್ರಗಳನ್ನು ಅಭಿನಯಿಸಿದ್ದರು. ಮೊದಲ ಮಡದಿ ವೆಂಕಟಮ್ಮ ಗಂಡನ ಸಾವಿನ ಸುದ್ದಿ ಕೇಳಿದ ಕೂಡಲೇ ಸಾವನ್ನಪ್ಪಿದರು. ಈ ದಂಪತಿಗಳ ಜೋಡಿ ಪಾರ್ಥಿವ ಶರೀರದ ಮೆರವಣಿಗೆ ನೋಡಿ ಕಣ್ಣೀರು ಸುರಿಸದವರೇ ಇಲ್ಲ. ಸುಬ್ಬಯ್ಯ ನಾಯಡು ಅವರ ಮಗ ಲೋಕೇಶ್ ಕನ್ನಡ ಚಿತ್ರರಂಗದ ಪ್ರಮುಖ ಕಲಾವಿದರಾಗಿದ್ದರು. ಸೊಸೆ ಗಿರಿಜಾ ಲೋಕೇಶ್, ಮೊಮ್ಮಕ್ಕಳಾದ ಸೃಜನ್ ಲೋಕೇಶ್, ಪೂಜಾ ಚಿತ್ರರಂಗದಲ್ಲಿ ಹಿರಿಯ ಪರಂಪರೆಯನ್ನು ಮುಂದುವರಿಸಿದ್ದಾರೆ.

ಮುಖಭಾವದಲ್ಲೇ ಹೊಸ ಸಾಧ್ಯತೆ ನೀಡುವ ಕ್ರಮ, ಸಂಭಾಷಣೆ ಹೇಳುವ ಶೈಲಿ, ನಡಿಗೆಯ ಗತ್ತು ಎಲ್ಲವೂ ಸುಬ್ಬಯ್ಯ ನಾಯಡು ಅವರಿಂದ ನಾಯಕ ಪಾತ್ರಕ್ಕೆ ಮಾದರಿಯಾಗಿ ಬಂದಿತು. ಅವರ ಮಗಳು ಬಂಗಾರಮ್ಮ ತಂದೆಯ ಕುರಿತು ‘ನಟ ರತ್ನ’ಎನ್ನು ಕೃತಿಯನ್ನು ಬರೆದಿದ್ದಾರೆ. ಅದು ಒಂದು ರೀತಿಯಲ್ಲಿ ರೂಪಕ ಕೂಡ ಹೌದು.

ಡಾ.ರಾಜ್ ಕುಮಾರ್ ಕೊನೆಯವರೆಗೂ ಸುಬ್ಬಯ್ಯ ನಾಯಡು ಅವರ ಮಾದರಿಯಿಂದ ತಾನು ಚಿತ್ರನಟನಾಗಿ ಬೆಳೆದೆ ಎಂದು ಹೇಳಿ ಕೊಳ್ಳುತ್ತಿದ್ದರು.

ಕನ್ನಡಕ್ಕೆ ಡಬ್ ಆಗ್ಬೇಕಿರೋದು ಏನ್ ಗೊತ್ತಾ ?

ಡಬ್ಬಿಂಗ್ ಡಬ್ಬ ಆಗಾಗ ಬಡಿದು ಕನ್ನಡ ಚಿತ್ರರಂಗ ಅಷ್ಟೇ ಅಲ್ಲ ಮನರಂಜನಾ ವಾಹಿನಿಗಳಲ್ಲಿ ದುಡಿಯುವವರನ್ನು ಕಂಗೆಡಿಸಿದೆ. ಹಾಗೇ ನಮ್ಮ ಸಿನಿಮಾ ಕ್ಷೇತ್ರದ ಇತಿಮಿತಿಗಳನ್ನು ಬಲ್ಲ, ಮುಂದಾಲೋಚಿಸುವ ಬುದ್ದಿಮತ್ತೆಯುಳ್ಳ ಕೆಲವರು ತೀವ್ರವಾಗಿ ಡಬ್ಬಿಂಗ್ ಯಾಕೆ ಬೇಕಿಲ್ಲ ಎಂಬ ಬಗ್ಗೆ ಎಚ್ಚರಿಸುವ ಪ್ರಯತ್ನ ಮಾಡಿದ್ದಾರೆ. ಕನ್ನಡ ಚಿತ್ರ ಜಗತ್ತನ್ನು ಅರಿತಿರುವ ಮಾಯಾಲೋಕದಲ್ಲಿ ಪೂರ್ಣಚಂದ್ರ  ಡಬ್ಬಿಂಗ್ ಬೇಕಿರುವುದು ಎಲ್ಲಿಗೆ ?  ಎನ್ನುವ ಕೆಲವು  ಅರ್ಥಪೂರ್ಣ ಸಂಗತಿಗಳನ್ನಿಲ್ಲಿ  ಹಂಚಿದ್ದಾರೆ .

national geography

1)ಕನ್ನಡಕ್ಕೆ ಡಬ್ಬಿಂಗ್ ಆಗಬೇಕಾಗಿದ್ದುdiscovery ಮತ್ತು national georgaphic channelsನ programs ಹೊರತು ಸಿನಿಮಾ ಮತ್ತು ಧಾರಾವಾಹಿಗಳಲ್ಲ.

2)ತಮಿಳು ಮತ್ತು ತೆಲುಗಿನಲ್ಲಿ ಸಿನಿಮಾ ಮತ್ತು ರಾಜಕೀಯ ರಕ್ತಗತವಾಗಿ ಬಂದಿದೆ. ತಮಿಳಿನಲ್ಲಿ 36%, ತೆಲುಗಿನಲ್ಲಿ 39%, ಸಿನಿಮಾ viewers ಇದ್ದಾರೆ, ಆದರೆ ಕರ್ನಾಟಕ ದಲ್ಲಿ 14% viewers ಇರುವುದು.ಹಾಗಾಗಿ ಅಲ್ಲಿ ಡಬ್ಬಿಂಗ್ ನಿಂದ ಯಾವುದೇ ಸಮಸ್ಯೆ ಆಗಲಿಲ್ಲ.

3)ಗಡಿ ಭಾಗದಲ್ಲಿ ಪರಭಾಷೆ ಸಿನಿಮಾ ಪ್ರದರ್ಶಕರ ಹಿಡಿತ ಇರುವುದರಿಂದ ಡಬ್ ಆದರೂ ಅಲ್ಲಿ ಬಿಡುಗಡೆ ಆಗಲು ಸಾಧ್ಯವೇ ಇಲ್ಲ.

4)ಇಲ್ಲಿ ಡಬ್ಬಿಂಗ್ ಪರ ವಕಾಲತ್ತು ವಹಿಸಿಕೊಂಡ ನಿರ್ಮಾಪಕರ್ಯಾರು ಬೌದ್ಧಿಕ ಬೆಳವಣಿಗೆಗೆ ಸಹಾಯ ಆಗುವಂತ ಸಿನಿಮಾ ಡಬ್ ಮಾಡುವುದಿಲ್ಲ.

5)ತಮ್ಮ ಜೇಬು ಬರ್ತಿಯಾಗುವಂತ ಪಕ್ಕ ಕಮರ್ಷಿಯಲ್ ಸಿನಿಮಾ ಮಾಡುತ್ತಾರೆ. ಅವುಗಳು ಬಿಡುಗಡೆ ಆಗುವುದು ಸಹ ಕನ್ನಡ ಸಿನಿಮಾ ಪ್ರದರ್ಶಿಸುವ ಚಿತ್ರಮಂದಿರಗಳಲ್ಲೆ.!

ಹಾಗಾಗಿ ಕನ್ನಡಕ್ಕೆ ಡಬ್ಬಿಂಗ್ ಅವಶ್ಯಕತೆ ಇಲ್ಲ.

ಇತಿಹಾಸ ಸೃಷ್ಟಿಸಿದ “ಭಾರತ ಭಾಗ್ಯ ವಿಧಾತ”

 ಭಾರತ ಭಾಗ್ಯ ವಿಧಾತ!!  ಹಿಂದೆಂದೂ ಕಂಡರಿಯದ ರೀತಿಯಲ್ಲಿ ಅಪರಿಮಿತ ಯಶಸ್ಸು ಕಂಡ  ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ಧ್ವನಿ -ಬೆಳಕು;ದೃಶ್ಯ ವೈಭವಗಳ ರೂಪಕ. ನಾಡಿನಾದ್ಯಂತ ಸಂಚರಿಸಿ ಜನಮನವನ್ನು ತಲುಪಿ ಬಂದು ಇಂದು ಮತ್ತು ನಾಳೆ  ಬೆಂಗಳೂರಿನ ಬಸವೇಶ್ವರ ನಗರದ ಡಾ. ಬಿ. ಆರ್. ಅಂಬೇಡ್ಕರ್ ಕ್ರೀಡಾಂಗಣದಲ್ಲಿ ಅಮೋಘ ಪ್ರದರ್ಶನಕ್ಕೆ ಸನ್ನದ್ಧವಾಗಿದೆ.

Inivitation2 ನಿಜಕ್ಕೂ “ಭಾರತ ಭಾಗ್ಯ ವಿಧಾತ” ಇತಿಹಾಸ ಸೃಷ್ಟಿಸಿದ ವಿನೂತನ ಕಾರ್ಯಕ್ರಮ. ದೂರದರ್ಶಿತ್ವ, ಸೃಜನಶೀಲತೆ, ಶ್ರದ್ಧೆ , ಬದ್ಧತೆಯ ಬಲದಿಂದ ರೂಪುಗೊಂಡಿರುವುದೇ ಇದರ ಯಶಸ್ಸಿನ ಗುಟ್ಟು. ಯಶದ  ಸೌಧದ  ಹುಟ್ಟಿನ ಘಳಿಗೆ ,ಬೆಳೆದ  ಪರಿ ಎಲ್ಲವನ್ನೂ ಅಕ್ಷರ ರೂಪದಲ್ಲಿ ಹರಿಸಿದ್ದಾರೆ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ನಿರ್ದೇಶಕರಾದ  ಎನ್ ಆರ್ ವಿಶುಕುಮಾರ್.

vish1

ಅಂಬೇಡ್ಕರ್ ಅವರ ಚಿತ್ರ ಸದಾ ನನ್ನ ಚಿತ್ತವನ್ನು ಕಾಡುತ್ತದೆ .ನಮ್ಮ ದೇಶ ಅವರನ್ನು ಏಕೆ ಒಮ್ಮನಸ್ಸಿನಿಂದ ಒಪ್ಪಿಕೊಳ್ಳುತ್ತಿಲ್ಲ? ಗಾಂಧೀಜಿಯವರನ್ನು ಮಹಾತ್ಮ ಎಂದು ಸಂಭೋದಿಸಿದ ಭಾರತ ಅವರನ್ನು ಏಕೆ ಕೇವಲ ‘ಸಂವಿಧಾನ ಶಿಲ್ಪಿ’ ಎಂದಷ್ಟೇ ಕರೆದು ಸುಮ್ಮನಾಗುತ್ತಿದೆ?

ಗಾಂಧಿ ಮತ್ತು ಅಂಬೇಡ್ಕರ್ ನಡುವೆ ಮಧುರ ಸಂಬಂಧ ಇರಲಿಲ್ಲ. ಅಂಬೇಡ್ಕರ್ ಅವರ ನಡೆಗಳಿಗೆ ಗಾಂಧಿ ತಡೆಗೋಡೆ ಇಡುತ್ತಿದ್ದರು. ಅಂಬೇಡ್ಕರ್ ಕೇವಲ ತಳವರ್ಗಗಳ ಸುಧಾರಣೆಗಾಗಿ ಹೋರಾಡಿದ ನಾಯಕರು. ಭಾರತದ ಜನಸಮುದಾಯವನ್ನು ಜಾತಿಯ ಆಧಾರದಲ್ಲಿ ವಿಭಜಿಸಲು ಪ್ರಯತ್ನಿಸಿದರು.. ಇತ್ಯಾದಿಯಾಗಿ ಅಂಬೇಡ್ಕರ್  ಮತ್ತು ಗಾಂಧಿ ನಡುವಣ ಗೊಂದಲಗಳು ದೇಶದ ಕೆಲವರ  ಮನದಲ್ಲಿರುವುದನ್ನು ಕಂಡು ನನಗೆ ನೋವು ಎನಿಸುತಿತ್ತು.

8ಅಂಬೇಡ್ಕರ್ ನಮ್ಮ ದೇಶದ ಒಬ್ಬ ಮಹಾನ್ ನಾಯಕರು, ಜಗತ್ತಿನ ಪ್ರತಿಭಾವಂತ ಅರ್ಥಶಾಸ್ತ್ರಜ್ಞರು, ಅಪರಿಮಿತವಾಗಿ ದೇಶವನ್ನು ಪ್ರೀತಿಸಿದವರು, ಸಮಾಜದ ಎಲ್ಲ ವರ್ಗದ ಜನರಿಗೂ ಒಳಿತಾಗುವಂತಹ ಕಾರ್ಯಗಳನ್ನು ಮಾಡಿದ್ದಾರೆ …ಇತ್ಯಾದಿ ವಿಷಯಗಳನ್ನು ಸಾಮಾನ್ಯ ಜನರಿಗೆ ಹೇಗೆ ಮನದಟ್ಟು ಮಾಡುವುದು ಎನ್ನುವ ವಿಷಯ ನನ್ನ ಮನಸ್ಸಿನಲ್ಲಿ ಹಲವಾರು ವರ್ಷಗಳಿಂದ ಕೊರೆಯುತ್ತಲೇ ಇತ್ತು.

ಕಳೆದ ವರ್ಷ ರಾಜ್ಯದಲ್ಲಿ ಅಂಬೇಡ್ಕರ್ ಅವರ 125 ನೇ ವರ್ಷಾಚರಣೆಯ ವಿಷಯ ಪ್ರಸ್ತಾಪವಾದಾಗ ನಮಗೆ ಒಂದು ಅಪರೂಪದ ಸಂದರ್ಭ ಒದಗಿ ಬಂತು.

bharata-bhagya-vidhaata

ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಅಂಬೇಡ್ಕರ್ 125 ನೇ ವರ್ಷಾಚರಣೆಯ ಅಂಗವಾಗಿ ಒಂದು ಧ್ವನಿ -ಬೆಳಕು ಕಾರ್ಯಕ್ರಮವನ್ನು ರೂಪಿಸಲಿದೆ ಎಂದು ಆಯ -ವ್ಯಯ ಭಾಷಣದಲ್ಲಿಯೇ ಘೋಷಿಸಲಾಯಿತು.

bharatha-bhagyavidhaataನಂತರ ಅದನ್ನು ಕಾರ್ಯರೂಪಕ್ಕೆ ಇಳಿಸುವ ಬಹು ದೊಡ್ಡ ಹೊಣೆಗಾರಿಕೆ ವಾರ್ತಾ ಇಲಾಖೆಯ ಮೇಲೆ ಬಿತ್ತು . ಈಗಾಗಲೇ ಜನರ ಮುಂದೆ ಒಂದು ಜನಜನಿತ ವಾಗಿರುವ ಸಂವಿಧಾನ ಶಿಲ್ಪಿ ಎನ್ನುವ ಅಂಬೇಡ್ಕರ್ ಚಿತ್ರ ಇದೆ. ಆ ಚಿತ್ರವನ್ನು ಒಡೆದು ಅವರು  ಕೇವಲ ಸಂವಿಧಾನದ ಶಿಲ್ಪಿ ಅಲ್ಲ, ಇಡೀ ದೇಶದ ಒಳಿತಿಗಾಗಿ ಶ್ರಮಿಸಿದವರು ಎನ್ನುವ ನಮ್ಮ ಹೊಸ ಕಲ್ಪನೆಯಅಂಬೇಡ್ಕರ್ ಚಿತ್ರವನ್ನು  ಜನರ ಮುಂದೆ ಹೇಗೆ ಇಡುವುದು ಎನ್ನುವ ಹೊಯ್ದಾಟ ಶುರುವಾಯ್ತು. ದಿನನಿತ್ಯ ಇದರ ಬಗ್ಗೆ ಯೋಚಿಸುತ್ತಿರುವಾಗಲೇ ನನಗೆ ಸಿಕ್ಕಿದ್ದು ಬಿ ಎಂ ಗಿರಿರಾಜ್ ಅವರ ಒಂದು ಪುಟ್ಟ ವಿಡಿಯೋ ಕ್ಲಿಪ್.

26ಕಳೆದ ಏಪ್ರಿಲ್ 14 ರಂದು ಅಂಬೇಡ್ಕರ್ ಜಯಂತಿಯ ಸಂದರ್ಭದಲ್ಲಿ ಬಿ. ಎಂ ಗಿರಿರಾಜ್, ಸಾಮಾಜಿಕ ಜಾಲತಾಣದಲ್ಲಿ ಅಂಬೇಡ್ಕರ್ ಬಗ್ಗೆ ಮೂರು ನಿಮಿಷಗಳ ಒಂದು ಕಿರುಚಿತ್ರವನ್ನು ಹಂಚಿಕೊಂಡಿದ್ದರು. ಇದು ಹುಡುಕುತ್ತಿದ್ದ ಬಳ್ಳಿ ನನ್ನ ಕಾಲಿಗೇ ತೊಡರಿ ಬಿದ್ದ ಪ್ರಸಂಗ. ಅದರಲ್ಲಿ ಗಿರಿರಾಜ್  ಅಂಬೇಡ್ಕರ್ ಅವರನ್ನು ನನ್ನಂತೆಯೇ ಯೋಚಿಸಿ ಅವರೊಬ್ಬ  ಮೇಧಾವಿ, ಆರ್ಥಿಕ ತಜ್ಞ, ಸಮಾಜದ ಎಲ್ಲ ಜನರಿಗೆ ಒಳಿತಾಗುವ ಕಾರ್ಯ ಮಾಡಿದ್ದಾರೆ ಎನ್ನುವುದನ್ನು ಚಿತ್ರಿಸಿದ್ದರು.

ಇದು ನನ್ನ ಗಮನ ಸೆಳೆದು ಮುಂದಿನ ನಡೆಗೆ ಕಾರಣವಾಯಿತು.

38ಧ್ವನಿ ಬೆಳಕು ಕಾರ್ಯಕ್ರಮ ರೂಪಿಸುವುದು ಸುಲುಭದ ಕಾರ್ಯವಲ್ಲ. ಸಾಹಿತ್ಯ ರಚನೆ, ಸಂಗೀತ ನಿರ್ದೇಶನಕ್ಕೆ ಸೂಕ್ತವಾದವರನ್ನು ಆಯ್ಕೆ ಮಾಡಬೇಕು. ಸುಮಾರು ನೂರು ಕಲಾವಿದರು, ತಂತ್ರಜ್ಞರಿಗೆ ಎರಡು ವಾರ ತರಬೇತಿ ಆಗಬೇಕು. ಅಗತ್ಯ ವೇಷಭೂಷಣ, ರಂಗಪರಿಕರ,ಬೆಳಕು ವಿನ್ಯಾಸ, ನೃತ್ಯ ಸಂಯೋಜನೆ, ಕಲಾವಿದರ ವಾಸ್ತವ್ಯ, ಊಟ ತಿಂಡಿ ಇತ್ಯಾದಿ ವ್ಯವಸ್ಥೆಯನ್ನು ಸರ್ಕಾರಿ ನಿಯಮಾವಳಿಗಳ ಚೌಕಟ್ಟಿನಲ್ಲಿ ರೂಪಿಸಬೇಕು.

6ಇದಕ್ಕೆಲ್ಲಾ ನಮ್ಮಲ್ಲಿ ಅಷ್ಟು ಸಮಯ ಇರಲಿಲ್ಲ. ಆದರೆ ನಾವು ಈ ಸವಾಲಿನ ಕಾರ್ಯವನ್ನು ಈ ಹಿಂದೆ ನಮ್ಮ ಇಲಾಖೆಯೇ ರೂಪಿಸಿದ್ದ “ಮನುಷ್ಯ ಜಾತಿ ತಾನೊಂದೇ ವಲಂ” ಧ್ವನಿ ಬೆಳಕು ಕಾರ್ಯಕ್ರಮದ ಅನುಭವದ ನೆಲೆಯಲ್ಲಿ ಸುಲಭವಾಗಿ ಮುಂದೆ ತೆಗೆದು ಕೊಂಡುಹೋದೆವು. ಅಂಬೇಡ್ಕರ್ ಅವರ ಬಗ್ಗೆ ಒಳನೋಟ ನೀಡಲು, ಅಧ್ಯಯನ ಆಧಾರಿತ ಹೊಳಹುಗಳನ್ನು ನೀಡಲು, ಈ ಕಾರ್ಯಕ್ರಮದ ಸಾಹಿತ್ಯ, ಸಂಗೀತ ರಚನೆಗೆ ಅನುಮೋದನೆ ಪಡೆಯಲು ನಾಡಿನ ಹಿರಿಯ ಸಾಹಿತಿಗಳಾದ ಸಿದ್ದಲಿಂಗಯ್ಯ, ಎಲ್ .ಹನುಮಂತಯ್ಯ , ಬಿ. ಟಿ. ಜಾಹ್ನವಿ, ಅಂಬೇಡ್ಕರ್ ಪ್ರಶಸ್ತಿ ವಿಜೇತರಾದ ಮಾಂಬಳ್ಳಿ  ಚಿನ್ನಸ್ವಾಮಿ, ಮೈಸೂರಿನ ಅಂಬೇಡ್ಕರ್ ಅಧ್ಯಯನ ಕೇಂದ್ರದ ನಿರ್ದೇಶಕ ನರೇಂದ್ರಸ್ವಾಮಿ ಹಾಗು ಸಮಾಜ ಕಲ್ಯಾಣ, ಮತ್ತು ವಾರ್ತಾ ಇಲಾಖೆಯ ಅಧಿಕಾರಿಗಳನ್ನು ಒಳಗೊಂಡ ಒಂದು ಸಮಿತಿಯನ್ನು ಸರಕಾರದಿಂದ ರಚಿಸಿಕೊಂಡೆವು.

ಇಲ್ಲಿಗೆ ಒಂದು ಹಂತದ ಕಾರ್ಯ ಮುಗಿಯಿತು. ಎರಡನೇ ಹಂತ; ಇದು ಸೃಜನ ಶೀಲತೆಯ ಕಾರ್ಯ.

33ಇಲ್ಲಿಂದಲೇ ನಮ್ಮ ನಿಜವಾದ ಸವಾಲುಗಳು ಆರಂಭವಾದವು. ಕುಳಿತಲ್ಲಿ ನಿಂತಲ್ಲಿ ಇದರದ್ದೇ ಚರ್ಚೆ. ಕಡೆ ಕಡೆಗೆ ಇದು ಯಾವ ಹಂತಕ್ಕೆ ತಲುಪಿತೆಂದರೆ ಮನೆಯಲ್ಲಿದ್ದಾಗಲೂ ಇದರ ಆಳ ವಿಸ್ತಾರಗಳು, ಅದನ್ನು ಜನರಿಗೆ ಮನಸ್ಸಿಗೆ ಮುದ ನೀಡುವಂತೆ ಹೇಗೆ ರೂಪಿಸುವುದು ಎನ್ನುವ ಚರ್ಚೆಗಳು ಶುರುವಾದವು. ಒಂದು ದಿನ ಬಾಳ ಸಂಗಾತಿಯೊಡನೆ ನಡೆದ ಇಂತಹದೇ ಚರ್ಚೆಯಲ್ಲಿ , ಅಂಬೇಡ್ಕರ್ ತಳಸಮುದಾಯದ ಒಳಿತಿಗಾಗಿ ದುಡಿದ ಜನ ನಾಯಕರು. ಆ ತಳಸಮುದಾಯಗಳ ಜೀವಸೆಲೆಯಾದ ಜಾನಪದ ಕಲೆ ಮತ್ತು ಸಂಗೀತ ಇವುಗಳನ್ನೇ ಪ್ರಧಾನವಾಗಿಟ್ಟುಕೊಂಡು ಧ್ವನಿ ಬೆಳಕು ಕಾರ್ಯಕ್ರಮ ರೂಪಿಸುವುದೇ ಒಳ್ಳೆಯದು’ ಎನ್ನುವ ಹೊಳಹು ಧಕ್ಕಿತು. ಈ ಎಳೆಯನ್ನೇ ಹಿಡಿದು ನಾವು ಮುಂದುವರಿದೆವು.

bbv3ಈ ಹಿಂದೆ ನಮ್ಮ ಇಲಾಖೆಗಾಗಿ ‘ಮನುಷ್ಯ ‘ಜಾತಿ ತಾನೊಂದೇ ವಲಂ ‘ ಧ್ವನಿ ಬೆಳಕು ಕಾರ್ಯಕ್ರಮ ನನ್ನ ಪರಿಕಲ್ಪನೆಯಲ್ಲಿ ಮೂಡಿ ಬಂದಾಗ ನಮ್ಮ ಜೊತೆಗಿದ್ದ ಹಿರಿಯ ರಂಗ ನಿರ್ದೇಶಕ ಸಿ . ಬಸವಲಿಂಗಯ್ಯ, ಖ್ಯಾತ ಸಂಗೀತ ನಿರ್ದೇಶಕ ಹಂಸಲೇಖ, ಜನಪರ ಸಾಹಿತಿ ಕೆ.ವೈ ನಾರಾಯಣಸ್ವಾಮಿ, ಹಿರಿಯ ರಂಗ ವಿನ್ಯಾಸಕ ಶಶಿಧರ ಅಡಪ ಹಾಗು ನಾವು ಕುಳಿತು ಚರ್ಚೆ ನಡೆಸಿದೆವು.

51b746d4-8adf-4c50-9321-95eb2e6e4f14ಇಲಾಖೆಯ ಹೆಮ್ಮೆ ಹಾಗು ಪ್ರತಿಷ್ಠಿತ ‘ಅಂಬೇಡ್ಕರ್ ‘ಧ್ವನಿ ಬೆಳಕು ಕಾರ್ಯಕ್ರಮವನ್ನು ಈ ಸಾರಿ ಯುವ ಪ್ರತಿಭಾನ್ವಿತ ತಂಡದಿಂದ ಮಾಡಿಸಬೇಕು . ನಮ್ಮ ಕಣ್ಣ ಮುಂದೆಯೇ ನಮ್ಮ ಮಾರ್ಗದರ್ಶನದಲ್ಲಿ ಯುವ ತಂಡ ಇದನ್ನ ನಿಜಗೊಳಿಸಬೇಕು ಎನ್ನುವ ನನ್ನ ಸಲಹೆಯನ್ನು ಹಿರಿಯರೆಲ್ಲರೂ ಮುಕ್ತ ಮನಸ್ಸಿನಿಂದ ಸ್ವೀಕರಿಸಿದರು. ಮಹೋನ್ನತ ಆಶಯದ ಈ ಧ್ವನಿ ಬೆಳಕು ಕಾರ್ಯಕ್ರಮಕ್ಕೆ ಬಸವಲಿಂಗಯ್ಯನವರು ನಮ್ಮ ಪ್ರೀತಿಯ ‘ಬಸು ‘ ಭಾರತ ಭಾಗ್ಯ ವಿಧಾತ” ಎನ್ನುವ ಅರ್ಥವತ್ತಾದ ಹಾಗು ಆಕರ್ಷಕವಾದ ಶೀರ್ಷಿಕೆ ಸೂಚಿಸಿದರು. ಗೆಳೆಯ ಕೆ ವೈ ಎನ್ ಮುಂದೆ ಬಂದು ಶೀರ್ಷಿಕೆ ಗೀತೆ ರಚಿಸಿಕೊಟ್ಟರು. ಶಶಿ ಮನ ಸೆಳೆಯುವ ರಂಗ ವಿನ್ಯಾಸ ಮಾಡಿಕೊಟ್ಟರು. ಹಿರಿಯರ ಹಾರೈಕೆಯಲ್ಲಿ ಪ್ರತಿಭಾವಂತ ಕಿರಿಯರ ತಂಡ ರೂಪುಗೊಂಡ ಪರಿ ಇದು.

09246c69-91f3-45ca-aba8-c01ea3a9f701ಈ ಹಿರಿಯರ ಗೌರವ ಸಲಹಾ ಮಂಡಳಿಯ ಒಪ್ಪಿಗೆಯಂತೆ ಯುವ ನಿರ್ದೇಶಕ ಬಿ. ಎಂ ಗಿರಿರಾಜ್ ಸಾಹಿತ್ಯ, ನಿರ್ದೇಶನ, ಪೂರ್ಣಚಂದ್ರ ತೇಜಸ್ವಿ ಸಂಗೀತ, ಪದ್ಮಿನಿ ಅಚ್ಚಿ ನೃತ್ಯ ಸಂಯೋಜನೆ ಹಾಗು ಇನ್ನಿತರ ತಜ್ಞರ ಸಹಕಾರದಿಂದ ‘ಭಾರತ ಭಾಗ್ಯ ವಿಧಾತ’ ಕಾರ್ಯಕ್ರಮ ರೂಪಿಸುವುದು ಎಂದು ತೀರ್ಮಾನವಾಯಿತು. ಇನ್ನು ಮುಂದಿನದೆಲ್ಲ ಈಗ ನಮ್ಮ  ಕಣ್ಣ ಮುಂದೆಯೇ ಇದೆ.

“ಮನುಷ್ಯ ಜಾತಿ ತಾನೊಂದೇ ವಲಂ ” ನ ಬಹು ದೊಡ್ಡ ಪ್ರಭಾವಳಿಯಿಂದ ಹೊರಬಂದು. ” ಭಾರತ ಭಾಗ್ಯ ವಿಧಾತ ” ವನ್ನು ಕಟ್ಟಿಕೊಡುವ ಹೊಣೆಗಾರಿಕೆಯನ್ನು ನಮ್ಮ ಯುವ ತಂಡ ಸಮರ್ಥವಾಗಿ ನಿರ್ವಹಿಸಿದೆ. ನನ್ನ ಪರಿಕಲ್ಪನೆಯ ಪ್ರತಿಯೊಂದು ಆಶಯಗಳನ್ನು ಈ ಯುವ ಪ್ರತಿಭಾವಂತ ತಂಡ ಜನರ ಮನ ಮುಟ್ಟುವಂತೆ ಕಟ್ಟಿಕೊಟ್ಟಿದೆ. ಇದೆಲ್ಲಕ್ಕಿಂತ ಮಿಗಿಲಾಗಿ ನಾಡಿನ ಪ್ರಜ್ಞಾವಂತ ಜನತೆ ವಾರ್ತಾ ಇಲಾಖೆಯ ಹೆಮ್ಮೆಯ ಪ್ರಯೋಗವನ್ನು ತೆರೆದ ಹೃದಯದಿಂದ, ತುಂಬು ಮನಸ್ಸಿನಿಂದ ಸ್ವೀಕರಿಸಿದೆ . ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲಿ ಪ್ರದರ್ಶನಗೊಳ್ಳುತ್ತಿರುವ “ಭಾರತ ಭಾಗ್ಯ ವಿಧಾತ” ಕಾರ್ಯಕ್ರಮ ಈಗಾಗಲೇ ಜನಮನ ಸೂರೆಗೊಂಡಿದೆ. ನಮ್ಮ ಇಲಾಖೆಯ ಅಧಿಕಾರಿ, ಸಿಬ್ಬಂದಿಗಳು ಕಾರ್ಯಕ್ರಮದ ಯಶಸ್ಸಿನಿಂದ ಉಬ್ಬಿಹೋಗಿದ್ದಾರೆ . ವಾರ್ತಾ ಇಲಾಖೆಯ ಇತಿಹಾಸದಲ್ಲಿಯೇ ಪ್ರಥಮವಾಗಿ ಇಂತಹದೊಂದು ಮಹೋನ್ನತ ಆಶಯದ ಕಾರ್ಯಕ್ರಮವನ್ನು ನಾಡಿಗೆ ಕೊಡುಗೆಯಾಗಿ ನೀಡಿದ ಸಂಭ್ರಮ ಸಡಗರಗಳಲ್ಲಿ ಮುಳುಗಿ ಹೋಗಿದ್ದಾರೆ.

78eeeb2c-06f1-46ed-b2b1-218201b51dfcನನಗಂತೂ ನಾಡಿನ ಜನತೆಯ ಪ್ರೀತಿ ವಿಶ್ವಾಸದ ಮಾತುಗಳಿಂದ ಕೊರಳುಬ್ಬಿ ಬರುತ್ತಿದೆ . ಕಣ್ಣಂಚಿನಲ್ಲಿ ಸಂತೋಷದ ಹನಿಗಳು ಹನಿಯುತ್ತಿವೆ . ಸರ್ಕಾರಿ ಸೇವೆಯಲ್ಲಿ ಇಂತಹ ಸಾರ್ಥಕ ಸೇವೆಗಳನ್ನು ಮಾಡಲು ಅವಕಾಶ ಸಿಕ್ಕಿತಲ್ಲ ಎನ್ನುವ ಸಂತಸದಿಂದ ಮಾತುಗಳೇ ಹೊರಬರುತ್ತಿಲ್ಲ.

ಈ ಸಾಧನೆಯಲ್ಲಿ ನನ್ನ ಸಹೋದ್ಯೋಗಿಗಳ ಸಹಕಾರ ದೊಡ್ಡದು . ‘ಭಾರತ ಭಾಗ್ಯ ವಿಧಾತ ‘ ಕಾರ್ಯಕ್ರಮದ ಸಾಮಾಜಿಕ ಕಳಕಳಿಯನ್ನು ಅರ್ಥ ಮಾಡಿಕೊಂಡು ಅದನ್ನು ಹೆಚ್ಚು ಹೆಚ್ಚು ಜನರಿಗೆ ತಲುಪಿಸಲು ಹಗಲಿರುಳು ಶ್ರಮಿಸಿದ್ದಾರೆ . ಅವರಿಗೆ ನನ್ನ ಅಭಿನಂದನೆ ಹಾಗೂ ಕೃತಜ್ಞತೆಗಳು .

bfc27fb3-5e23-4bfa-bc09-3877e09ce086ಇವೆಲ್ಲಕ್ಕೂ ಕಳಸಪ್ರಾಯವಿಟ್ಟಂತೆ ನಾಡಿನ ಎಲ್ಲೆಡೆಯಿಂದ ಆಯ್ಕೆಯಾಗಿ ಬಂದಿರುವ ಯುವ ಕಲಾವಿದರು ನಮ್ಮ ಅಂಬೇಡ್ಕರ್ ಆಶಯವನ್ನು ಮೈದುಂಬಿಕೊಂಡು ಅಭಿನಯಿಸುತ್ತಾ ರಂಗದ ಮೇಲೆ ಮಿಂಚಿನ ಸಂಚಾರ ಮೂಡಿಸಿದ್ದಾರೆ . “ಭಾರತ ಭಾಗ್ಯ ವಿಧಾತ” ಕಾರ್ಯಕ್ರಮದ ಯಶಸ್ಸು ರಾಜ್ಯದ ನೆಚ್ಜಿನ ಮುಖ್ಯಮಂತ್ರಿಗಳಾದ ಶ್ರೀ ಸಿದ್ದರಾಮಯ್ಯ ಅವರ ಕಿವಿ ತಲುಪಿದೆ. ಹಾಸನ ಜಿಲ್ಲೆಯಲ್ಲಿ ಈ ಕಾರ್ಯಕ್ರಮ ಉದ್ಘಾಟಿಸಿದ ಪಶು ಸಂಗೋಪನಾ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರಾದ ಶ್ರೀ ಎ. ಮಂಜುರವರು ಈ ಕಾರ್ಯಕ್ರಮವನ್ನು ಮೆಚ್ಚಿ ಇದನ್ನು ರಾಜ್ಯದ ಎಲ್ಲಾ ತಾಲೂಕು ಕೇಂದ್ರಗಳಲ್ಲಿಯೂ ಪ್ರದರ್ಶಿಸುವಂತೆ ಮುಖ್ಯ ಮಂತ್ರಿಗಳಿಗೆ ಅವರ ಶಾಸಕಾಂಗ ಪಕ್ಷದ ಸಭೆಯಲ್ಲೇ ಒತ್ತಾಯಿಸಿದ್ದರು.. ಸದಾ ಸಾಮಾಜಿಕ ನ್ಯಾಯದ ಪ್ರತಿಪಾದನೆ  ಮಾಡುವ ಮಾನ್ಯ ಮುಖ್ಯ ಮಂತ್ರಿಗಳು ಇದಕ್ಕೆ ಒಪ್ಪಿ ಪ್ರತಿ ತಾಲ್ಲೂಕಿನಲ್ಲಿಯೂ ‘ಭಾರತ ಭಾಗ್ಯ ವಿಧಾತ ‘ ಪ್ರದರ್ಶನಕ್ಕೆ ಹಸಿರು ನಿಶಾನೆ ನೀಡಿದ್ದರು.

16ಒಟ್ಟಾರೆಯಾಗಿ ನಮ್ಮಇಲಾಖೆಯ ಹೆಮ್ಮೆ ಹಾಗೂ ಪ್ರತಿಷ್ಠಿತ “ಭಾರತ ಭಾಗ್ಯ ವಿಧಾತ” ಧ್ವನಿ ಬೆಳಕು ಕಾರ್ಯಕ್ರಮ ನಾಡಿನಾದ್ಯಂತ ಪ್ರದರ್ಶನಗೊಂಡು ಜನರಿಂದ ಅಪಾರ ಮನ್ನಣೆ ಗಳಿಸಿದೆ.

ಕೃಪೆ -ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ

ಮಹತ್ವಾಕಾಂಕ್ಷೆಯ ಸಂಚಾರಿಗಳಿಗಾಗಿ “ಜೋಗಿ” ಹೆಕ್ಕಿ ಕೊಟ್ಟ ಮುತ್ತು !!

ಸಿನಿಮಾ ಕನಸುಗಾರರ ಕಣ. ಕಾಣದೂರಿನಿಂದ ಬಂದು ಕನಸ ಬಿತ್ತಿಬೆಳೆದವರೆಷ್ಟೋ !!  ಒಂದರ ಗೆಲುವನ್ನೇ ಸವಿಯುತ್ತಾ ಸವೆದು ಸವಕಲಾಗಿ ಹೋದವರು ಕಣ್ಣೆದುರಿಗಿದ್ದಾರೆ. ಮತ್ತೊಂದೆಡೆ ಒಂದೇ ಯಶಕ್ಕೆ ಬಿಗಿದುಕೊಳ್ಳದೆ ಏಳು- ಬೀಳಿಗೆ ಬಗ್ಗದೆ ಹೊಸದನ್ನು ಹುಡುಕಿ ಕೊಡುವ ಹುಮ್ಮಸ್ಸಿಗರು ಬೆರಳೆಣಿಕೆಯಷ್ಟಾದರೂ ಇದ್ದಾರೆ. ೨೦೦ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿ ನಟ ಸಾರ್ವಭೌಮ, ಅಭಿಮಾನಿಗಳ ಆರಾಧ್ಯದೈವವಾದವರು ಡಾ. ರಾಜ್ಕುಮಾರ್.

raajkumar-images

ಅಂಥಾದ ಮೇಲು ಅವರಿಗೆ ಮಾಡಿದ್ದು ಏನೇನು ಅಲ್ಲ. ಮತ್ತೇನೋ ಮಾಡಬೇಕು ಇನ್ನಷ್ಟು ಬೇರೆ ರೀತಿಯ ಪಾತ್ರ ಮಾಡಬೇಕು ಅನ್ನಿಸಿತ್ತಲ್ಲ. ಅದು ಮಹತ್ವಾಕಾಂಕ್ಷಿಯ ಮನದ ತುಡಿತವಲ್ಲದೆ ಮತ್ತೇನು?  ಕ್ರಿಯಾಶೀಲ ಮನಸ್ಸು ಹಿಮಗಟ್ಟಿದ ನದಿಯಂತೆ ಹೊರನೋಟಕ್ಕೆ ಕಂಡರೂ ಒಳಹರಿವು ಬಿಡದು. ಕಾದ ಕಾವಿನ ಕಿಚ್ಚಿಗೆ ಬಿದ್ದಂತೆ ಧುಮಿಕ್ಕಿ ಹರಿವುದ ಕಂಡಿದ್ದೇವಲ್ಲ. ಅಂಥಾ ಕಿಚ್ಚು ಹತ್ತಿಸುವ, ಹೊಸ ಹುರುಪಿಗೆ ಊಡುವ ಜೋಗಿಯವರ ಅಕ್ಷರ ಗಂಗೆ ಇಲ್ಲಿದ್ದಾಳೆ.  ತೋಯುವ , ಮೀಯುವ , ಮುಳುಗುವ ಸರದಿ ನಿಮ್ಮದು. ಹಳೆಯದಕ್ಕೆ ಜೋತು ಬಿದ್ದವರು, ಹೊಸದಕ್ಕೆ ಹಂಬಲಿಸುವ ಸಿನಿಮಾ ಪ್ರೇಮಿಗಳು ಓದಲೇ ಬೇಕಾದದ್ದಿದು ಓದಿಕೊಳ್ಳಿ. 

img-20170104-wa0114ಮತ್ತೆ ಅಡಿಗರಿಂದಲೇ ಆರಂಭಿಸಬೇಕು!

ಒಂದೊಂದು ಭಾಷೆಗೆ ಹಾಗೆ ಒಬ್ಬೊಬ್ಬ ಕವಿ ಕೀಲಿಕೈ. ಹುಡುಕುತ್ತಾ ಹೋದರೆ ಒಬ್ಬೊಬ್ಬನೂ ಕೀಲಿ ಕೈ. ಆಲ್ರ್ಪೆಡ್ ಟೆನಿಸನ್‌ನ ಯೂಲಿಸಿಸ್’ ಕವಿತೆ ಓದುತ್ತಿದ್ದಾಗ ನೆನಪಾದದ್ದು ಅಡಿಗರ ಅದೇ ಹಳೇ ಸಾಲು: ಇರುವುದೆಲ್ಲವ ಬಿಟ್ಟು ಇರದುದರೆಡೆಗೆ ತುಡಿವುದೆ ಜೀವನ?
ಅವನಿಗಾದದ್ದು ಅದೇ. ಅಗಾಧವಾದ ರಾಜ್ಯವನ್ನು ತನ್ನದಾಗಿಸಿಕೊಂಡಿದ್ದಾನೆ. ವೀರ ಎಂದು ಕರೆಸಿಕೊಂಡಿದ್ದಾನೆ. ಬಂಧು ಮಿತ್ರರಿದ್ದಾರೆ, ಖ್ಯಾತಿಯಿದೆ. ಅವನು ಸುಖವಾಗಿರಬಹುದಿತ್ತು ಅಲ್ಲೇ, ಹಾಗೇ, ಇದ್ದ ಹಾಗೆ. ಆದರೆ ಅವನು ಸುಖವಾಗಿಲ್ಲ. ಮತ್ತೇನೋ ಸೆಳೆತ, ಮತ್ತೇನೋ ತುಡಿತ. ಅವನು ಹೇಳುತ್ತಾನೆ:
ಇಲ್ಲ, ಸುಖವಿಲ್ಲ
ಕೆಲಸವಿಲ್ಲದ ಆಲಸಿ ದೊರೆ
ಪಾಳುಬಿದ್ದ ನೆಲದಲ್ಲಿ ಯೌವನ ಸಂದ ಹೆಂಡತಿಯ ಜೊತೆ
ಅಗ್ಗಿಷ್ಟಿಕೆಯ ಮುಂದೆ ಕೂತಿದ್ದೇನೆ.
ಉಣ್ಣುತ್ತಾ, ಮಲಗುತ್ತಾ, ಮೇಯುತ್ತಾ
ಸ್ವಂತಿಕೆಯ ಅರಿವಿಲ್ಲದ
ಈ ಅನಾಗರಿಕರಿಗೆ ಅಪರ ನ್ಯಾಯದ
ಪಾಠ ಹೇಳುತ್ತಾ..

ಶೂರನಾದ ನಾಯಕನಿಗೆ ತನ್ನ ಪ್ರಜೆಗಳ ಬಗ್ಗೆ ಅನ್ನಿಸುವುದಿಷ್ಟು. ಅವರು ಆಳಿಸಿಕೊಳ್ಳುವುದಕ್ಕೇ ಲಾಯಕ್ಕು. ಸ್ವಯಂಪ್ರಭೆಯಿಲ್ಲದ ಮೂರ್ಖರು ಅವರು. ದಂಡಿಸಿ ಅವರನ್ನು ದಾರಿಗೆ ತರಬೇಕು, ಆದರೆ ಯಾವ ಪುರುಷಾರ್ಥಕ್ಕೆ. ಅವರು ಯಾವ ಜನ್ಮಕ್ಕೆ ಉದ್ಧಾರವಾದಾರು? ಅವರನ್ನು ಉದ್ಧರಿಸಿದರೂ ದಕ್ಕುವುದೆಷ್ಟು?
ಅವನ ಮುಂದೆ ಪ್ರಶ್ನೆಗಳ ಸರಪಣಿ. ಅದರ ಜೊತೆಗೇ ತಾನು ಇವರಂತಲ್ಲ ಎಂಬ ನಂಬಿಕೆ. ಸಾಧಿಸಬೇಕಾದದ್ದು ಇನ್ನೆಷ್ಟೋ ಇದೆ ಎಂಬ ನಿರೀಕ್ಷೆ. ಮಹತ್ವಾಕಾಂಕ್ಷೆಯ ಹಡಗಿನಲ್ಲಿ ಸಂಚಾರ ಹೊರಟಿದೆ ಅವನ ಮನಸ್ಸು.

ಇಲ್ಲ, ನಾನು ನೆಲೆ ನಿಲ್ಲಲಾರೆ
ಬದುಕನ್ನು ತಳಮಟ್ಟ ಹೀರಬೇಕು ನಾನು
ಎಲ್ಲ ಕಂಡಿದ್ದೇನೆ,. ಸುಖಿಸಿದ್ದೇನೆ, ನೊಂದಿದ್ದೇನೆ.
ನನ್ನನ್ನು ಪ್ರೀತಿಸುವವರ ಜೊತೆಗೂ, ಒಬ್ಬಂಟಿಯಾಗಿಯೂ.
ಎತ್ತರಿಸಿ ನುಗ್ಗುವ ಕಡಲ ಅಲೆಗಳ
ಚಂಡಮಾರುತದ, ಮಬ್ಬು ಕವಿದ ಸಾಗರವ
ಮೆಟ್ಟಿ ಸಾಗಿದ್ದೇನೆ.
ಸಾಹಸಕ್ಕೊಂದು ಹೆಸರಾಗಿದ್ದೇನೆ.

ಕಳೆದ ಕಾಲವ ನೆನೆಯುತ್ತದೆ ಮನ. ಆ ಸಾಹಸ, ಆ ರೋಮಾಂಚ ಎಲ್ಲವೂ ಮುಗಿದಿದೆ. ನಿನ್ನ ಅವತಾರ ಪೂರ್ತಿಯಾಯಿತು ಎಂಬಂತೆ ಎಲ್ಲ ತಣ್ಣಗಾಗಿದೆ. ಆದರೆ ಮತ್ತೆ ಆ ರೋಚಕತೆ ಬೇಕೆನ್ನುತ್ತದೆ ಮನಸ್ಸು. ಕ್ರಿಯಾಶೀಲ ಜೀವ ಹಾಗೆ ತುಡಿಯುವುದು ತಪ್ಪೇ? ಹಾಗಿದ್ದರೆ ವಿಶ್ರಾಂತಿಯೇ ಬೇಡವೇ? ವಿಶ್ರಾಂತಿಯ ಸಮಯದಲ್ಲೂ ಕ್ರಾಂತಿಯ ಚಿಂತೆಯೇ?

ಹೊಸ ಅನುಭವಕ್ಕೆ ಹಸಿದವನಂತೆ
ಸುತ್ತಾಡಿದೆ, ಅಲೆಮಾರಿ ಬದುಕಲ್ಲಿ ಏನೇನೆಲ್ಲ ಕಂಡೆ.
ಆ ಊರು, ಆ ಜನ, ಆ ಮನ, ಆ ಪರಿಸರ, ಆ ಅಧಿಕಾರ
ಹೋದೆಡೆಯೆಲ್ಲ ನನಗೆ ಸಿಕ್ಕಿದ್ದು ಗೌರವದ ಸ್ವಾಗತ.
ನನ್ನ ಸಮಕಾಲೀನರ ಜೊತೆ ಕಾದಾಡಿದ ಉನ್ಮತ್ತ ಮತ್ತು.
ಗಾಳಿ ತೊನೆಯುವ ಟ್ರಾಯ್ ನೆಲದಲ್ಲಿ ಯುದ್ಧಾಸಕ್ತ ಕ್ಷಣ.
ನಾನು ಕಂಡದ್ದೆಲ್ಲ ನಾನೇ ಆದ ಜೀವನ.
ಪಡೆದ ಅನುಭವ, ನಡೆದ ಹಾದಿ
ತಂದು ನಿಲ್ಲಿಸಿದ್ದು ಮತ್ತೊಂದು ದಿಡ್ಡಿಬಾಗಿಲಿನ ಮುಂದೆ
ಅದರಾಚೆ ನಾನು ನಡೆಯದ ದಾರಿ.
ಸಾಗಿದಂತೆಲ್ಲ ಮಸುಕಾಗುವ ಸೀಮಾರೇಖೆ.
ಅಷ್ಟಕ್ಕೂ ಕೊನೆಯೆಂಬುದು ಎಷ್ಟು ನೀರಸ?
ನಿಷ್ಕ್ರಿಯತೆಯ ತುಕ್ಕು ಹಿಡಿಸಿಕೊಂಡು
ಕ್ರಿಯಾಶೀಲತೆಯಲ್ಲಿ ಥಳಥಳಿಸದೆ
ಉಸಿರಾಟವೇ ಬದುಕು ಎಂಬಂತೆ ಬದುಕುವುದೂ
ಒಂದು ಬದುಕಾ?

ಇಲ್ಲ , ಸುಖವಿಲ್ಲ. ಪುರುಷಾರ್ಥವಿಲ್ಲ. ಹಾಗನ್ನಿಸುವುದು ಬೆಳೆಯುವ ಸೂಚನೆಯಾ? ಎಷ್ಟು ಕಷ್ಟ ನಿರ್ಧರಿಸುವುದು ಯೋಚಿಸಿ. ಒಂದರಿಂದ ಇನ್ನೊಂದಕ್ಕೆ ಜಿಗಿಯುತ್ತಾ ಸಾಗುವವನು ಕೊನೆಗೆ ಎಲ್ಲಿಗೆ ತಲುಪುತ್ತಾನೆ. ಕೊನೆಯೆಂಬುದೇ ಇಲ್ಲದ ಬದುಕಿದೆಯಾ? ಇರಬೇಕಾ? ಎಲ್ಲಿಯೂ ನಿಲ್ಲದಿರು, ಕೊನೆಯನೆಂದು ಮುಟ್ಟದಿರು, ಮನೆಯನೆಂದು ಕಟ್ಟದಿರು ಅಂದಿದ್ದು ಅದಕ್ಕೇನಾ?

*****

One equal temper of heroic hearts,
Made weak by time and fate,
but strong in will
To strive, to seek, to find, and not to yield.
ಕಾಲ ಮತ್ತು ವಿಧಿ ವೀರಾವೇಶವನ್ನು ಮಂಕಾಗಿಸುತ್ತದೆ ನಿಜ, ಆದರೆ ದೃಢಮನಸ್ಸಿದ್ದರೆ ಸಾಕು, ಹುಡುಕುವುದಕ್ಕೆ, ಹೊರಡುವುದಕ್ಕೆ, ಗೆಲ್ಲುವುದಕ್ಕೆ. ಕಾಲಕ್ಕೆ ಬಲಿಯಾಗದೆ ಉಳಿಯುವುದಕ್ಕೆ. ಆಗಾಗ ಎದುರಾಗುವ ದುರ್ಬಲ ಕ್ಷಣಗಳನ್ನು ಮೀರುವುದಕ್ಕೆ ಅನ್ನುತ್ತಾನೆ ಟೆನಿಸನ್. ಆ ವೀರನ ಮೂಲಕ ನಮ್ಮೊಳಗೂ ಮತ್ತೆ ಚಿಗುರುವ, ಮತ್ತೆ ಎದುರಿಸುವ, ಮತ್ತೊಂದು ಹುಡುಕಾಟಕ್ಕೆ ಸಿದ್ಧರಾಗುವ ಹುಮ್ಮಸ್ಸನ್ನು ತುಂಬುತ್ತಾನೆ.
ಅಡಿಗರು ಹೇಳಿದ್ದು ಅದನ್ನೇನಾ?

ಬಾವಿಯೊಳಗಡೆ ನೀರು, ಮೇಲಕ್ಕಾವಿ
ಆಕಾಶದುದ್ದಕ್ಕೂ ಅದರ ಕಾರಣ ಬೀದಿ
ಕಾರ್ಮುಗಿಲ ಖಾಲಿ ಕೋಣೆಯ ಅಗೋಚರ ಬಿಂದು
ನವಮಾಸವೂ ಕಾವ ಭ್ರೂಣರೂಪಿ
ಭೂತ ರೂಪಕ್ಕೆ ಮಳೆ ವರ್ತಮಾನ
ಅಗೆದುತ್ತ ಗದ್ದೆಗಳ ಕರ್ಮಭೂಮಿಯ ವರಣ
ಭತ್ತಗೋಧುವೆ ಹಣ್ಣು ಬಿಟ್ಟ ಬೃಂದಾವನ
ಗುಡಿಗೋಪುರಗಳ ಬಂಗಾರ ಶಿಖರ

ಪದ್ಯಕ್ಕೆ ಹೊಸ ಅರ್ಥಗಳು ಹೊಳೆಯುತ್ತಾ ಹೋಗುವುದೇ ಹೀಗೆ. ಯಾವುದೋ ಒಂದು ಇಂಗ್ಲಿಷ್ ಕವಿತೆ ಕನ್ನಡದ ಒಂದು ಕವಿತೆ ಅರ್ಥವಾಗುವುದಕ್ಕೆ ನೆಪವಾಗಬಹುದು. ಭೂತರೂಪಕ್ಕೆ ಮಳೆ ವರ್ತಮಾನ ಎಂದರೆ ಮೋಡಗಟ್ಟಿದ್ದ ನಿಷ್ಕ್ರಿಯ ಮನಸ್ಸು ಮಳೆಯಾಗಿ ಕ್ರಿಯಾಶೀಲವೂ ಸೃಜನಶೀಲವೂ ಆಗುವುದಕ್ಕೆ ರೂಪಕವಾಗಬಹುದು.
ಇಲ್ಲಿ ನಾವು ತಳೆಯಬೇಕಾಗ ನಿಲುವು .ಯಾವುದು? ಸದಾ ಹೊಸದಕ್ಕೆ ಹೊಸ ಅನುಭವಕ್ಕೆ ತುಡಿಯುತ್ತಿರಬೇಕಾ? ಹಾಗೆ ತುಡಿಯುವುದೇ ಬದುಕಾಗಬೇಕಾ? ಅಥವಾ ಒಂದು ಯಶಸ್ಸನ್ನು ಸಾಧನೆಯನ್ನು ಸುಮ್ಮನೆ ಕೂತು ಸವಿಯಬೇಕಾ? ಸವಿಯುತ್ತಿರುವ ಹೊತ್ತಿಗೆ ನಾವು ಸವೆಯುತ್ತಲೂ ಇರುತ್ತೇವಲ್ಲ? ನಾಳೆ ಅದೇ ಗೆಲುವು ನಮ್ಮ ಪಾಲಿಗೆ ಏನೂ ಅಲ್ಲ ಅನ್ನಿಸಲಿಕ್ಕಿಲ್ಲವೇ?
ಮತ್ತೊಂದು ದಂಡಯಾತ್ರೆ, ಮತ್ತೊಂದು ದಿಗ್ವಿಜಯದ ಆಸೆ ಕೂಡ ಪ್ರಾಪಂಚಿಕವಾ ಅನ್ನುವ ಅನುಮಾನ? ಸುಮ್ಮನುಳಿಯುವುದು ಸರಿಯಾ ಎಂಬ ಗುಮಾನಿ. ಕ್ರಿಯೆಯ ರೋಚಕತೆಯಲ್ಲಿ ಬದುಕು ಅರಳಿಕೊಳ್ಳಬೇಕಾ ಅಥವಾ ಗುರಿಯತ್ತ ಧಾವಿಸುತ್ತಿರಬೇಕಾ ಎಂಬ ಪ್ರಶ್ನೆಯೊಂದಿಗೆ ಈ ಎರಡೂ ಕವಿತೆಗಳೂ ನಮ್ಮನ್ನು ಮತ್ತಷ್ಟು ಪ್ರಶ್ನೆಗಳಿಗೆ ಗುರಿಮಾಡುತ್ತವೆ.
ಉತ್ತರವೇ ಸಿಗದೇ ಕೂತಿದ್ದಾಗ ಅವಳು ಕೇಳುತ್ತಾಳೆ:
ಯೌವನ ಸಂದ ಹೆಂಡತಿಯ ಜೊತೆ ಕೂತಿದ್ದಾನಲ್ಲ ಅವನು. ಅವಳ ಯೌವನದಲ್ಲಿ ಅವನೆಲ್ಲಿದ್ದ? ಅವಳ ಜೊತೆಗಿದ್ದನಾ? ಇರಲಿಲ್ಲ ಅಂದ ಮೇಲೆ ಅವಳಿಗೆ ಅವನ ಸಾಹಸದಿಂದ ಯಶಸ್ಸಿನಿಂದ ಏನು ದಕ್ಕಿತು? ಅವನು ಗೆದ್ದು ಬರುತ್ತಾನೆಂಬ ನಿರೀಕ್ಷೆಯಲ್ಲಿ ಕುಳಿತ ಅವಳ ಬದುಕಿಗೆ ಅರ್ಥವೇನು? ಅವನಂತೆಯೇ ಅವಳ ಮನಸ್ಸು ಕೂಡ ಭೂತರೂಪದ ಮಳೆಯ ವರ್ತಮಾನಕ್ಕೆ ಕಾಯುವುದಿಲ್ಲವೇ?
ಅವಳು ಮಳೆಯಾಗುವುದು ಯಾವಾಗ?
ಆಗಸದಲ್ಲಿ ಮೋಡ ದಟ್ಟೈಸುತ್ತಿದೆ. ಅದನ್ನು ಯಾವುದೋ ಗಾಳಿ ಮತ್ತೆಲ್ಲಿಗೋ ಕೊಂಡೊಯ್ಯುತ್ತದೆ. ಅವಳ ಪ್ರಶ್ನೆಯೆಂಬ ಅಗಿಷ್ಟಿಕೆಯ ಮುಂದೆ ಮನಸ್ಸು ಕಾಯಿಸಿಕೊಳ್ಳುತ್ತಾ ಕೂತಿದ್ದೇನೆ.
ನಿಗಿನಿಗಿಕೆಂಡ ಕಾಯುತ್ತಿದೆ!

Like Us, Follow Us !

120,916FansLike
1,826FollowersFollow
1,563FollowersFollow
3,414SubscribersSubscribe

Trending This Week