28.1 C
Bangalore, IN
Sunday, November 18, 2018

ನಮ್ಮ ಆಯ್ಕೆ

“ನೀನು ಮುತ್ತು ಕೊಟ್ರೆ, ಅಲ್ಲಿ ನನ್ನ ಹೆಸರು ಬರಬೇಕಾ?” ಅಂತಾ ಬೈತಿದ್ರು ಪುಟ್ಟಣ್ಣ!

ವೀರಸ್ವಾಮಿಯವರು ಹಾಗು ಪುಟ್ಟಣ್ಣ ಅವರು ನಾಗರಹಾವು ಚಿತ್ರಕ್ಕಾಗಿ ಹೊಸ ಪ್ರತಿಭೆಗಳನ್ನು ಹುಡುಕ್ತಾಯಿದ್ರು. ಆಗ ರಾಜೇಂದ್ರಸಿಂಗ್ ಬಾಬು ಅವರು “ನಮ್ಮ ಫ್ಯಾಮಿಲಿ ಫೆಂಡ್ ಒಬ್ಬ ಇದ್ದಾನೆ .. ಒಳ್ಳೆ ಶತ್ರುಜ್ಞ ಸಿನ್ಹಾ ಥರಾ ಕಾಣಿಸ್ತಾನೆ’ ಅಂತಾ ನನ್ನ ಬಗ್ಗೆ ಹೇಳಿದ್ರಂತೆ. ಅದಕ್ಕೆ ಪುಟ್ಟಣ್ಣ ಅವರು “ಹೌದಾ.. ಸರಿ ನಾಳೆ ಕರ್ಕೊಂಡು ಬಾರಯ್ಯಾ, ಒಂದ್ ಮೇಕಪ್ ಟೆಸ್ಟ್ ಮಾಡ್ಸೋಣಾ”’ ಅಂತಾ ಹೇಳಿದ್ದಾರೆ.

ಬಾಬು ನನ್ನತ್ರ ಬಂದು .. “ಪುಟ್ಟಣ್ಣ ಅವರು  ನಿನ್ನ ಟೆಸ್ಟ್ ಗೆ ಬರೇಳಿದ್ದಾರೆ” ಅಂದಾ

“ಏನ್ ಟೆಸ್ಟ್ ಅಪ್ಪಾ ಅದು” ಅಂದೆ.

“ಮೇಕಪ್ ಟೆಸ್ಟು ” ಅಂದಾ

“ಎಷ್ಟೋತ್ತಿಗೆ”

“ಬೆಳಿಗ್ಗೆ ೯ ಘಂಟೆಗೆ, ನಾನೇ ಬಂದು ಕಾರಲ್ಲಿ ಕರ್ಕೊಂಡು ಹೋಗ್ತೀನಿ” ಅಂದಾ

ಆಯ್ತು ಎಂದು ತಲೆಯಾಡಿಸಿದ ನಾನು, ಬೆಳ್ಳಿಗ್ಗೆ ಬೇಗ ಎದ್ದು ಎಂಟು ಘಂಟೆಗೇ ಮನೆ ಖಾಲಿ ಮಾಡ್ಬಿಟ್ಟೆ. ಯಾಕಂದ್ರೆ, ಮೊದಲೇ ನಾನು ಸ್ವಲ್ಪ ಕೋಪಿಷ್ಟ, ಆಕ್ಟ್ ಮಾಡುವಾಗ ನನಗೆ ಏನಾದ್ರೂ ಬೈದು.. ನಾನು ಇನ್ನೇನಾದ್ರೂ ವಾಪಸ್ ಮಾತಾಡಿ, ಯಾಕ್ ಬೇಕು ಸುಮ್ಮನೆ ಕಿತಾಪತಿ ಅಂತಾ.. ಆಮೇಲೆ ಬಾಬು ಏನೇನೋ ಮಾಡಿ, ಅವನಿಗೆ ನಮ್ಮ ಅಡ್ಡಗಳೆಲ್ಲಾ ಗೊತ್ತಿದ್ದುದ್ರಿಂದ ನನ್ನ ಹುಡುಕಿ ೧೨ಘಂಟೆಗೆ ಪುಟ್ಟಣ್ಣ ಅವರ  ಹತ್ರಾ ಕರ್ಕೊಂಡು ಹೋದ.

ಪುಟ್ಟಣ್ಣ ಕಣಗಾಲ್, ಗಂಗಣ್ಣ, ಚಿಟ್ಟಿಬಾಬು ಅವರೆಲ್ಲಾ ಇದ್ರು. ಇನ್ನೊಂದ್ ಕಡೆ ವಿಷ್ಣುವರ್ಧನ್, ಚಂದ್ರಶೇಖರ್ ಕೂಡಾ ಇದ್ರು. ನನ್ನ ನೋಡಿ ವಿಷ್ಣು ಕೇಳಿದ್ರು

“ಏನ್ರೀ, ನಿಮಗೆ ಶತ್ರುಜ್ಞ ಸಿನ್ಹಾ ಥರಾ ಮಾತಾಡೋಕೆ ಬರುತ್ತಾ”

“ಇಲ್ಲಾ ಸಾರ್. ನನಗೆ ಅದೇಲ್ಲಾ ಬರಲ್ಲಾ” ಅಂದೆ.

ಆಮೇಲೆ ನನಗೆ ಪುಟ್ಟಣ್ಣ ನನಗೆ ಮೇಕಪ್ ಮಾಡಿಸಿದ್ರು. ಆಗ ನಾನು

“ಸರ್, ನನಗೆ ಆಕ್ಟಿಂಗ್ ಎಲ್ಲಾ ಗೊತ್ತಿಲ್ಲ, ನೀವು ಹೇಳ್ಕೊಟ್ರೆ ಮಾಡ್ತೀನಿ ಸರ್” ಅಂದೆ.

ಅದಕ್ಕೆ ಪುಟ್ಟಣ್ಣ, “ಆಯ್ತು ಸರಿ, ನೋಡಿ ಅಲ್ಲಿಂದ ಇಲ್ಲಿ ತಂಕಾ ನಡ್ಕೊಂಡು ಬಂದು ನಿಂತಕೊಂಡು, ’ಹೇಯ್ ಹೋಗೋ ರಾಮಾಚಾರಿ’ ಅಂತಾ ಒಂದು ಡೈಲಾಗ್ ಹೇಳು” ಅಂದ್ರು.

ಅವರು ಹೇಳಿದ ಹಾಗೆ ಬಂದು ಡೈಲಾಗ್ ಹೇಳಿ ಸಿಗರೇಟ್ ಬಾಯಿಗ್ ಎಸ್ಕೊಂಡೆ. ಒಂದೇ ಟೇಕ್ ನಲ್ಲಿ ಓಕೆ ಆಯ್ತು. ನಾನ್ ಯಾಕೆ ಈ ಮಾತು ಹೇಳ್ತಾಯಿದ್ದೀನಿ ಅಂದ್ರೆ.. ನಾನು ಶತ್ರುಜ್ಞ ಸಿನ್ಹಾ ಥರಾ ಇದ್ದೇ ಅನ್ನೋದಕ್ಕಿಂತಾ, ನನ್ನ ನೋಡಿದ ತಕ್ಷಣ ಅವರಿಗೆ ನಾನು ಜಲೀಲನ ಪಾತ್ರಕ್ಕೆ ಸೂಟ್ ಆಗ್ತೀನಿ ಅಂತಾ ಗೊತ್ತಾಗೋಗಿತ್ತು.

ನಂತರ ಹೇಳಿದ್ದ ದಿನ ಶೂಂಟಿಂಗ್ ಹೋದೆ. ಅಲ್ಲಿ ಎಮ್.ಜಿ.ಆರ್.. ಅವರ ಮಾಸ್ಟರ್ ಶ್ಯಾಮ್ ಸುಂದರ್ ಅಂತಾ ನಮಗೆ ಫೈಟಿಂಗ್ ಹೆಂಗ್ ಮಾಡೋದು ಅಂತಾ ಹೇಳ್ಕೊಡ್ತಾಯಿದ್ರು. ಆಮೇಲೆ ಊಟದ ಬ್ರೇಕ್ ಆಯ್ತು. ನಾನು ಒಂದು ಕಡೆ ವಿಷ್ಣು ಒಂದು ಕಡೆ ಊಟ ಮಾಡ್ತಾಯಿದ್ವಿ. ಆಗ ಪುಟ್ಟಣ್ಣ ಬಂದು,

“ನಿಮ್ಮಿಬ್ರಿಗೂ ಒಳ್ಳೇ ಹೆಸರು ಬರುತ್ತೆ ಕಣ್ರೋ” ಅಂದ್ರು.

“ಸಾರ್, ಅವರು ಹೀರೋ, ಅವರಿಗೆ ಹೆಸರು ಬರುತ್ತೆ ಅಂದ್ರೆ ನಂಬ್ಕೊಬಹುದು, ಅದ್ರಲ್ಲಿ ಅರ್ಥ ಇದೆ. ನಾನು ಬರ್ತೀನಿ, ಚುಡಾಯಿಸ್ತೀನಿ, ಏಟ್ ತಿಂತೀನಿ, ಹೋಗ್ತೀನಿ. ನನಗೆಂಗೆ ಹೆಸರು ಬರುತ್ತೆ” ಅಂದೆ.

“ಇಲ್ಲಾ ಕಣೋ ಮರಿ.. ನೋಡ್ತಾಯಿರು. ನಿಂಗೂ ಒಳ್ಳೆ ಹೆಸರು ಬರುತ್ತೆ” ಅಂದ್ರು.

ಕೊನೆಗೆ ಚಿತ್ರ ರಿಲೀಸ್ ಆದಮೇಲೆ ಅದು ಎಷ್ಟು ಅದ್ಭುತವಾದ ಚಿತ್ರ ಅಂತಾ ನಂಗೆ ಅರ್ಥ ಆಯ್ತು. ಪ್ರೀಮಿಯರ್ ಶೋ ಮುಗಿಸ್ಕೊಂಡು ನಾನು ಮೈಸೂರಿಗೆ ಹೋರಟೋದೆ. ಬಾಬು ಮನೆಯಲ್ಲಿ ಕೂತ್ಕೊಂಡು ಮಾತಾಡ್ತಾಯಿದ್ವಿ. ಆಮೇಲೆ ಮತ್ತೆ ಸಿನಿಮಾ ನೋಡಬೇಕು ಅನ್ನಿಸ್ತು. ಸರಿ ಎಲ್ಲಾ ಹೋದ್ವಿ.

ನಾನು ಮಾಡಿದ್ದುದ್ದು ಸಣ್ಣ ಪಾತ್ರನೇ ಆದ್ರೂ, ನನ್ ಸೀನಲ್ಲಿ ಎಂಟ್ರಿಗೆ ಮೊದಲು ಸೈಕಲ್ ದು ಸ್ಪೋಕ್ಸ್ ತೋರಿಸ್ತಾರೆ. ಆಗ ಜನ ಜೋರಾಗ್ ಚಪ್ಪಾಳೆ ಹೊಡೀಯೋಕ್ ಶುರು ಮಾಡ್ಬಿಟ್ರು. ಅದುವರೆಗೂ ಸಿನೆಮಾದಲ್ಲಿ ಹೀರೋ ಎಂಟ್ರಿಗೆ ಹಿಂಗೆಲ್ಲಾ ಬಿಲ್ಡಪ್ ಕೊಡ್ತಾಯಿದ್ರು. ಹೀರೋ ಕೈ ತೋರಿಸಿ, ಕಾಲ್ ತೋರಿಸಿ, ಅವನು ನಡ್ಕೊಂಡು ಬರೋದು ತೋರಿಸಿಸ್ತಾರೆ. ಆಗ ಜನ ಚಪ್ಪಾಳೆ ಹೊಡಿತಿದ್ರು. ಆದ್ರೆ ಒಬ್ಬ ಖಳನಾಯಕನ ಎಂಟ್ರಿಗೆ ಚಪ್ಪಾಳೆ ಹೊಡೆದಿದ್ದು ಅಂದ್ರೆ ನಾಗರಹಾವು ಫಿಲಂನಲ್ಲಿ. ಅದೂ ಪುಟ್ಟಣ್ಣ ಅವರ ಪವರ್.

ಆಮೇಲೆ .. ಪುಟ್ಟಣ್ಣ ಅವರ ಸುಮಾರು ಚಿತ್ರಗಳಲ್ಲಿ ನಾನು ಇದ್ದೀನಿ. ನಾನು ಅಂದ್ರೆ ಸ್ವಲ್ಪ ಸಲುಗೆನೂ ಇತ್ತು ಅವರಿಗೆ. ಅವರನ್ನ ಹೆಂಗೆಲ್ಲಾ ರೇಗಿಸ್ತಿದ್ದೆ ಅಂತಾ ಒಂದು ಘಟನೆ ಹೇಳ್ತೀನಿ, ನೀವೆಲ್ಲಾ ನಗ್ತೀರಾ.

ambareesh with puttanna kanagaal in sets
ಪುಟ್ಟಣ್ಣ ಜೊತೆ ಅಂಬರೀಷ್, ಚಿತ್ರವೊಂದರ ಸೆಟ್ಟಲ್ಲಿ

ಮಸಣದ ಹೂ ಚಿತ್ರದಲ್ಲಿ ಒಂದು ಸೀನ್. ಜಯಂತಿ ಅವರು ಬರ್ತಾರೆ. ನಾನು ಸಿಂಗಾರು ಪಾತ್ರದಲ್ಲಿ ಅವರ ಹತ್ರ ಹೋಗಿ,

“ಒಂದು ಕೆಲ್ಸ ಕೊಡಿ” ಅಂತಾ ಕೇಳ್ತೀನಿ.

“ಯಾವ್ ಕೆಲ್ಸ ಬೇಕಾದ್ರೂ ಮಾಡ್ತೀಯೇನಪ್ಪಾ ಅಂತಾ..?” ಅಂತಾ ಅವ್ರು ಕೇಳ್ತಾರೆ.

“ನೀವೇನ್ ಕೇಲ್ಸಾ ಕೊಟ್ರು ಮಾಡ್ತೀನಿ” ಅಂತೀನಿ.

ಅದಕ್ಕೆ ಅವರು “ಎಲ್ಲಿ.. ನನಗೆ ಒಂದು ಮುತ್ತು ಕೊಡು” ಅಂತಾರೆ. ಆಗ ನಾನು ತಬ್ಬಿಬ್ಬಾಗಿ ನಿಂತುಬಿಡ್ತೀನಿ. ಆಗ ಜಯಂತಿ

“ಹೇಯ್ ಹೋಗೋ.. ಒಂದು ಮುತ್ತು ಕೊಡೋಕೆ ಯೋಗ್ಯತೆ ಇಲ್ಲ, ಇನ್ನು ಏನ್ ಕೆಲ್ಸ ಮಾಡ್ತೀಯಾ ನೀನು” ಅಂತಾರೆ. ಅವರು ಆ ಡೈಲಾಗ್ ಹೇಳೀ ಹೋಗೋ ಅಂತಾ ತೋರಿಸಿದ್ದ ಕೈಯನ್ನೇ ಹಿಡ್ಕೊಂಡು ನಾನು ಮುತ್ತು ಕೊಡ್ತೀನಿ. ಆವಾಗ “ಡೈರೆಕ್ಟೆಡ್ ಬೈ ಪುಟ್ಟಣ್ಣ” ಅಂತಾ ನಿಮ್ಮ ಹೆಸರು ಬರಬೇಕು ಸಾರ್ ಚೆನ್ನಾಗಿರುತ್ತೆ ಅಂತಿದ್ದೆ. ಅದಕ್ಕೆ ಅವರು “ಹೇಯ್ ಹೋಗೋ, ನೀನು ಮುತ್ತು ಕೊಟ್ರೆ, ಅಲ್ಲಿ ನನ್ನ ಹೆಸರು ಬರಬೇಕಾ” ಅಂತಾ ಬೈತಿದ್ರು. ಅಷ್ಟು ಸಲುಗೆ ನನ್ನ ಕಂಡ್ರೆ.

ಪುಟ್ಟಣ್ಣ ನವರ  ಒಡನಾಟ ಮತ್ತು ಆತ್ಮೀಯತೆ ಎಂದೂ ಮರೆಯಲಾಗದ್ದು

ಜೋಗಿ ಕಂಡಂತೆ : ಕಿಚ್ಚ ಸುದೀಪ್

ಸರಿಯಾಗಿ ಹದಿನಾರು ವರುಷದ ಹಿಂದೆ ಸುದೀಪ್ ನಟಿಸಿದ ಸ್ಪರ್ಶ ಚಿತ್ರ ನೋಡಿ ಕನ್ನಡಪ್ರಭದಲ್ಲಿ ವಿಮರ್ಶೆ ಬರೆದಿದ್ದೆ. ಅದರ ಪತ್ರಿಕಾಗೋಷ್ಠಿಯಲ್ಲಿ ಸುದೀಪ್ ಸಂಕೋಚದಿಂದಲೇ ಮಾತಾಡಿದ್ದರು. ಗಾಡ್ ಫಾದರ್ ಇಲ್ಲದ, ಸಿನಿಮಾ ಹಿನ್ನೆಲೆಯೂ ಇಲ್ಲದ ಸುದೀಪ್ ಸಿನಿಮಾ ಪ್ರೀತಿಯಿಂದ ಚಿತ್ರರಂಗಕ್ಕೆ ಕಾಲಿಟ್ಟ ಆರಂಭದ ದಿನಗಳಲ್ಲಿ ತುಂಬ ಒದ್ದಾಡಿದ್ದುಂಟು.

ಈಗಿನ ಅನೇಕ ಹೀರೋಗಳ ಥರ ಮೂರು ಸಿನಿಮಾಕ್ಕೇ ಹೀರೋಯಿಸಮ್ ಮೈಗೂಡಿಸಿಕೊಂಡು ಕೆರವಾನ್ ಒಳಗೆ ಕೂತವರಲ್ಲ ಅವರು. ಮಾತು, ಆಲೋಚನೆ, ಅಭಿನಯ- ಎಲ್ಲದರಲ್ಲೂ ಸ್ಪಷ್ಟತೆ ಇದ್ದ ಸುದೀಪ್, ಅವರ ಸಮಕಾಲೀನರಂತೆ ಸಂಭಾವನೆ ತಗೊಂಡು ನಟಿಸಿ ತಮ್ಮ ಪಾಡಿಗೆ ಇದ್ದವರಲ್ಲ. ಸಿನಿಮಾ ಕಲಿಯಬೇಕು ಅಂತ ಹಗಲಿರುಳು ಕತೆ, ಚಿತ್ರಕತೆ, ನಿರ್ದೇಶನ, ತಾಂತ್ರಿಕತೆ, ಛಾಯಾಗ್ರಹಣ, ಎಡಿಟಿಂಗ್, ಪೋಸ್ಟರ್ ಡಿಸೈನ್, ಪ್ರಚಾರ- ಎಲ್ಲದರಲ್ಲೂ ಆಸಕ್ತಿಯಿಂದ ತೊಡಗಿಸಿಕೊಳ್ಳುತ್ತಿದ್ದವರು.

ಆರಂಭದ ದಿನದಿಂದಲೇ ಭಯಂಕರ ಆತ್ಮವಿಶ್ವಾಸ ಮೈದುಂಬಿಸಿಕೊಂಡವರಂತೆ ಕಾಣಿಸುತ್ತಿದ್ದ ಸುದೀಪ್ ಸೋಲಿಗೆ ಅಂಜಿದವರಲ್ಲ. ಸ್ವಾತಿಮುತ್ತು ಸೋತಾಗ ಮಾತ್ರ ತುಂಬ ಭಾವುಕರಾಗಿ ಹೋಟೆಲ್ ಸರೋವರದಲ್ಲಿ ಕಣ್ಣೀರು ಹಾಕಿದ್ದರು.

ಮೈ ಆಟೋಗ್ರಾಫ್ ಚಿತ್ರದ ನಂತರ ಸುದೀಪ್ ಸ್ವಲ್ಪ ಮಟ್ಟಿಗೆ ಏಕಾಂಗಿಯಾಗಿಬಿಟ್ಟರು. ತಮ್ಮ ಪಾಡಿಗೆ ತಾವು ಕೆಲಸ ಮಾಡುತ್ತಲೇ ಹೋದರು. ಆ ಏಕಾಗ್ರತೆಯೇ ಅವರನ್ನು ಇವತ್ತು ಈ ಹಂತಕ್ಕೆ ತಂದು ನಿಲ್ಲಿಸಿದೆ.

ಹದಿನೆಂಟು ವರುಷ ಕನ್ನಡ ಚಿತ್ರಗಳಲ್ಲಿ ನಟಿಸಿ, ಕನ್ನಡದ ನಟ ಅನ್ನಿಸಿಕೊಂಡ ನಂತರ ಸುದೀಪ್ ಪೂರ್ಣಪ್ರಮಾಣದ ತಮಿಳು ಚಿತ್ರವೊಂದರಲ್ಲಿ ನಾಯಕನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ರಜನೀಕಾಂತ್, ಕಮಲ್ ಹಾಸನ್, ಚಿರಂಜೀವಿ ಮುಂತಾದವರ ಯಶಸ್ವಿ ಸಿನಿಮಾಗಳನ್ನು ಕೊಟ್ಟ ಕೆ ಎಸ್ ರವಿಕುಮಾರ್ ಈ ಸಿನಿಮಾ ನಿರ್ದೇಶಿಸಿದ್ದಾರೆ. ತಮಿಳು ಚಿತ್ರರಂಗದಲ್ಲಿ ತಮಿಳು ನಾಯಕರ ನಡುವೆ ಕನ್ನಡದ ನಟನೊಬ್ಬ ದೊಡ್ಡ ಬಜೆಟ್ಟಿನ ಸಿನಿಮಾ ಮಾಡಿ, ದೇಶಾದ್ಯಂತ 700 ಚಿತ್ರಮಂದಿರಗಳಲ್ಲಿ , ಕರ್ನಾಟಕದ 300 ಚಿತ್ರಮಂದಿರಗಳಲ್ಲಿ ಅದನ್ನು ಬಿಡುಗಡೆ ಮಾಡುವ ಮಟ್ಟಕ್ಕೆ ಬೆಳೆದಿರುವುದೇ ಬಹುದೊಡ್ಡ ಸಾಧನೆ. ಇಂಥ ರಿಸ್ಕ್ ತೆಗೆದುಕೊಳ್ಳಬಲ್ಲ ಧೈರ್ಯ ಎಲ್ಲರಿಗೂ ಬರುವುದಕ್ಕೂ ಸಾಧ್ಯವಿಲ್ಲ. ಅನ್ಯನೆಲದಲ್ಲಿ ಕಾಲಿಡುವುದೇ ಬಹುದೊಡ್ಡ ರಿಸ್ಕು ಅಂತ ಅನೇಕ ಸಲ ಸಾಬೀತಾಗಿರುವಾಗ, ಸುದೀಪ್ ಅಂಥ ಸಾಹಸ ಮಾಡುತ್ತಿರುವುದನ್ನು ಹೆಮ್ಮೆಯಿಂದ ನೋಡಬೇಕು.

ವಿಜಯ್, ಅಜಿತ್, ಸೂರ್ಯ, ವಿಕ್ರಮ್, ಧನುಷ್ -ಮುಂತಾದವರ ಸಿನಿಮಾಗಳು ಕರ್ನಾಟಕದ ತುಂಬ ಸದ್ದು ಮಾಡುತ್ತಿರುವಾಗ, ಕನ್ನಡದ ಸ್ಟಾರ್ ತಮಿಳುನಾಡಲ್ಲಿ ದಿಟ್ಟತನದಿಂದ ಚಿತ್ರರಸಿಕರ ಎದುರು ನಿಲ್ಲುವುದು ಸಣ್ಣ ಸಂಗತಿ ಅಲ್ಲ. ಇದು ಕರ್ನಾಟಕದ ಮಾರುಕಟ್ಟೆಯನ್ನು ವಿಸ್ತರಿಸುವ ಮಾತಲ್ಲ, ಕನ್ನಡದ ಪ್ರತಿಭಾವಲಯದ ವಿಸ್ತಾರವನ್ನು ತೋರುವಂಥ ಕೆಲಸ.

Congrats and Good Luck Sudeep 🙂

13754609_10154336924094941_1318993591092698745_n

ಲೇಖನ ಕೃಪೆ :  ಜೋಗಿ, ಜನಪ್ರಿಯ ಲೇಖಕರು

‘ಕಬಾಲಿ’ ಹಿಟ್ಟಾ.. ತೋಪಾ .. ???

ಕಲೆ, ಮನೋರಂಜನೆ, ಮಾಧ್ಯಮ ಹೀಗೆ ಅನೇಕ ರೂಪಗಳನ್ನು ಪಡೆದ ಸಿನಿಮಾ, ಇಂದು ಅವೆಲ್ಲವನ್ನೊ ಮೀರಿ ಒಂದು ಮಹಾ ವ್ಯಾವಹಾರಿಕ ಉದ್ಯಮವಾಗಿ ಬೆಳೆದು ನಿಂತಿದೆ.ಹಾಗಾಗಿ ಚಿತ್ರನಿರ್ಮಾಪಕರು ಸಿನಿಮಾದ ಕಥೆಗೆ ತಲೆಕೆಡಿಸಿಕೊಳ್ಳಲು ಶುರು ಮಾಡಿದ ದಿನದಿಂದಲೇ ಅದರ  ಪ್ರಚಾರ ಕಾರ್ಯಕ್ಕೂ ನಿಲ್ಲುತ್ತಿದ್ದಾರೆ.

ಅಂದು ‘ಬಾಹುಬಲಿ’ ತನ್ನ ತಾಂತ್ರಿಕತೆಯಿಂದ ಭಾರತ ಚಿತ್ರರಂಗದ ಲೆಕ್ಕಾಚಾರಗಳನ್ನೆಲ್ಲಾ ಬುಡಮೇಲು ಮಾಡಿಬಿಟ್ಟರೆ, ಇಂದು ಬಂದ ‘ಕಬಾಲಿ’ ತಲೈವನ ಹೆಸರಿನಲ್ಲೇ ಬಿರುಗಾಳಿ ಎಬ್ಬಿಸಿ ಮರೆಯಾಯ್ತು.

‘ಕಬಾಲಿ’ ಬಂದ ಬಿರುಸಿನಲ್ಲಿ ಬಿಚ್ಚಿಟ್ಟು ಹೋದ ಪ್ರಶ್ನೆ ಹಾಗು ಗೊಂದಲಗಳು ಒಂದೆರಡಲ್ಲ.

ಒಂದು ಚಲನಚಿತ್ರವನ್ನು ಹೇಗೆ ಅಳಿಯಬೇಕೋ ಹಾಗೆ ಅಳಿಯಲು ತಿಳಿಯದ ತೀರದಲ್ಲಿ “ಕಬಾಲಿ” ನಿಂತಿದೆ. ಭಾರತ ಚಿತ್ರರಂಗದಲ್ಲೇ ಮೊದಲನೇ ಬಾರಿಗೆ ಇಷ್ಟೊಂದು ರೀತಿಯ  “mixed opinion”ಗಳನ್ನು ಚಿತ್ರ “ಕಬಾಲಿ” ಹುಟ್ಟುಹಾಕಿದೆ.

B Suresh, Film Maker

1ಬಿ. ಸುರೇಶ್

ಕಬಾಲಿ ಮಲೇಶಿಯಾದ ಭಾರತೀಯ ವಲಸಿಗರ ಬಗ್ಗೆ ಮಾಡಿರುವ ಅದ್ಬುತ ಚಿತ್ರ. ಸೂಪರ್ ಸ್ಟಾರ್ ಫಾರ್ಮುಲಾಗೆ ಜೋತು ಬೀಳದೆ ಚಿತ್ರವನ್ನು ರೂಪಿಸಿದ್ದಾರೆ. 70 ಕೋಟಿ ರೂಪಾಯಿಯಲ್ಲಿ ಅಚ್ಚುಕಟ್ಟಾಗಿ ನಿರ್ಮಾಣವಾದ ಈ ಚಿತ್ರದ ಪ್ರಚಾರಕ್ಕೆ ಖರ್ಚಾಗಿದ್ದು ಸುಮಾರು 50 ಕೋಟಿ. ಚಿತ್ರ ಗಳಿಸಿದ್ದು ಭರ್ಜರಿ 600 ಕೋಟಿ. ಇದು ಸಮಕಾಲೀನ ಅದ್ಭುತ ಯಶಸ್ಸಿನ ಚಿತ್ರ ಎಂದು ನಾನು ನಂಬುತ್ತೇನೆ.

Shreenidhi DS, Fiction Head, Udaya TV

2ಶ್ರೀನಿಧಿ ಡಿ.ಎಸ್.

‘ಕಬಾಲಿ’ ಹಂಚಿಕೆದಾರರಿಗೆ ಲಾಭ ತಂದುಕೊಟ್ಟಿರಬಹುದು! ಆದರೆ ನೋಡಿದೋರಿಗೆ ಖುಷಿ ಆಗಿದೆಯಾ?

ಆಮೇಲೆ- ಸಿನಿಮಾಕ್ಕೆ ನಿಜವಾದ ಖರ್ಚಾದ ದುಡ್ಡೆಷ್ಟು ಅನ್ನೋದು ಜನಸಾಮಾನ್ಯನಿಗೆ ಗೊತ್ತಾಗಲ್ಲ, ಆತನಿಗೆ ಇದೊಂದು ದೊಡ್ಡ ಚಿತ್ರ, ಕೋಟ್ಯಂತರ ರೂಪಾಯಿಗಳ ವೆಚ್ಚ ಆಗಿದೆ ಎಂದು ಬಿಂಬಿಸಿ – ಆ ಚಿತ್ರವನ್ನು ಮಿಸ್ ಮಾಡ್ಕೊಳೋದೇ ಅಪರಾಧ ಎಂಬಂತೆ ಬಿಂಬಿಸಿ, ಒತ್ತಾಯ ಪೂರ್ವಕವಾಗಿ ನೋಡೋ ಹಾಗೆ ಮಾಡಲಾಗತ್ತೆ. ಜನಕ್ಕೆ ಈ ಕ್ಷಣದ ಸಂಭ್ರಮ- ಯಶಸ್ಸು ಅಷ್ಟೇ ಬೇಕು. ಸುಮ್ಮನೆ ನೂರಾರು ಥಿಯೇಟರ್ ಗಳಲ್ಲಿ ರಿಲೀಸ್ ಮಾಡಿ, ಧೂಳೆಬ್ಬಿಸಿ-ಗೌಜಿ ಮಾಡಿ ಹೋ ಅಂತ ಅಬ್ಬರ…. ಆಮೇಲೆ ಹೇಳೋರು ಕೇಳೋರು ಇಲ್ಲ!

Aravind SD, Film Maker

3ಅರವಿಂದ್ ಎಸ್. ಡಿ.

ಕಬಾಲಿ ನಿಜಕ್ಕೂ path breaking cinema. ಆದರೆ ಅತಿಯಾಗಿ ಪ್ರಚಾರ ಹಾಗು ನಿರೀಕ್ಷೆಗಳನ್ನು ಹುಟ್ಟಿಸಿತ್ತು. ವ್ಯಯಕ್ತಿಕವಾಗಿ ನನಗೆ ಚಿತ್ರ ಇಷ್ಟವಾಯ್ತು. ರಜನಿ ಅಂಥಾ ಸೂಪರ್ ಸ್ಟಾರ್ ಪ್ರಭೆಯನ್ನು ಮರೆಮಾಡಿ ನಿಜವಾದ ನಟನನ್ನು ತೋರಿಸಿದ್ದಾರೆ. ಒಬ್ಬ ಖ್ಯಾತ ನಾಯಕನನ್ನು ದಲಿತ ನಾಯಕನನ್ನಾಗಿ ಹೆಣೆದಿರುವ  ಕಥೆ ಅದ್ಭುತ. ಇದು ಕೇವಲ ರಜನಿ ಚಿತ್ರವಾಗಿ ಉಳಿಯದೆ, ನೈಜವಾಗಿ ಚಿತ್ರ ಕಟ್ಟಿರುವುದು ಪ್ರಸಂಶನೀಯ.

Vanitha Sathish, Software professional

4 ವನಿತಾ ಸತೀಶ್

ಹೊಸತನ ಬರಿ ಲೊಕೇಶನ್   ಮತ್ತು ಕಥೆಯ ಎಳೆಯಲ್ಲಿದೆ. ಕೆಲವು ನಿರೂಪಣೆ; ಸತ್ತ ಹೆಂಡತಿ  ಎಲ್ಲ ಕಡೆ ಕಾಣಿಸಿ ಅವನನ್ನು ಕಾಡುವುದು ತುಂಬಾ ಸುಂದರವಾಗಿದೆ. ಚಿತ್ರ ಕಥೆ ಪ್ರೇಕ್ಷಕರನ್ನು ಹಿಡಿದು ಕೂರಿಸುವಷ್ಟು ಕಾತುರ ಮತ್ತು ಆಸಕ್ತಿ ಹುಟ್ಟಿಸುವಲ್ಲಿ ಸೋತಿದೆ. ಕಬಾಲಿ ಪಾತ್ರ ಕೂಡ ನಾಯಕನ ದಿಟ್ಟ ಗುಣ ಮತ್ತು ವ್ಯಕ್ತಿತ್ವ ಪ್ರೇಕ್ಷಕರ ಮನದಲ್ಲಿ ನೆಡುವಂಥ ಯಾವುದೇ ದೃಶ್ಯ ಕಟ್ಟಿ ಕೊಟ್ಟಿಲ್ಲ. ನಾವೆ ಪಟ್ಟು ಹಿಡಿದು ಚಿತ್ರದಲ್ಲಿ ಧನಾತ್ಮಕ ಅಂಶಗಳನ್ನು ಹುಡುಕಿದರೆ ಕೆಲವು ಮಾತ್ರ ಸಿಗುತ್ತವೆ. ಒಟ್ಟಾರೆ ಕೊಟ್ಟ ದುಡ್ಡಿಗೆ 80% paisa vasool ಕಾರಣ, ಹೊರ ದೇಶದ ಲೊಕೇಶನ್, ಹೊಸ ನಟ ನಟಿಯರು ಮತ್ತ ರಜನಿ ಸರ್.ಜನರ ಮನ ಮುಟ್ಟುವಲ್ಲಿ ಸಂಪೂರ್ಣವಾಗಿ ಸೋತಿದೆ.

ChandraShekar Shrivastav, Film director

5ಚಂದ್ರಶೇಖರ್ ಶ್ರೀವಾತ್ಸವ್

ರಜನಿಕಾಂತ್ ಸಿನಿಮಾದಲ್ಲಿ ಇದ್ದಮೇಲೆ ಮುಗೀತು, ಅಲ್ಲಿ ಒಪೀನಿಯನ್ ಗಳ ಅವಶ್ಯಕತೆನೇ ಇಲ್ಲ. ಆ ಸಿನಿಮಾ ಸೂಪರ್ ಹಿಟ್ಚೇ.

Vidya Rao, Writer

6ವಿದ್ಯಾ ರಾವ್

ನಾನು ಚಿತ್ರವನ್ನು ನೋಡಿಲ್ಲ.. ಆದರೂ, ಒಬ್ಬ ನಟನ ಪಾಪುಲಾರಿಟಿಯನ್ನೇ ಬಂಡವಾಳವಾಗಿ ಇಟ್ಟುಕೊಂಡು ಮೀಡಿಯಾ ಮೂಲಕ ಅತಿಯಾಗಿ ಪ್ರಚಾರ ಮಾಡಿ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಕರೆತರಲಾಗುತ್ತಿದೆ. ಆದರೆ ಒಂದು ಚಿತ್ರಕ್ಕೆ ಅದರ ಕಥೆ, ದೃಶ್ಯಿಕರಣ, ನಟರ ನಟನೆ ಮುಂತಾದವುಗಳೇ ಮೂಲ ಮಾನದಂಡವಾಗಿರಬೇಕು. ಬಿಡುಗಡೆಯ ಮುನ್ನವೇ ಈ ಚಿತ್ರಗಳು ಎಷ್ಟು ಸುದ್ದಿ ಮಾಡುತ್ತವೆ ಎಂದರೆ, ನೈಜ ಮನಸ್ಸಿನಿಂದ ಪ್ರೇಕ್ಷಕ ಚಿತ್ರವನ್ನು ನೋಡಲು ಆಗುವುದೇ ಇಲ್ಲ. ಒಬ್ಬನು ಸಾಧಾರಣವಾಗಿ ಚಿತ್ರವನ್ನು ನೋಡಿ ಅಭಿಪ್ರಾಯ ಹೇಳುವ ಮುನ್ನವೇ ಮೀಡಿಯಾದಲ್ಲಿ ಸೂಪರ್ ಹಿಟ್ ಎಂದು ಬಣ್ಣಿಸಿ ಆಗಿರುತ್ತದೆ. ಕಬಾಲಿ ಎಷ್ಟೇ ಹೈಪ್ ಸೃಷ್ಟಿಸಿದರೂ, ಚಿತ್ರಕಥೆಯ ಬಗ್ಗೆ ಹೆಚ್ಚು ಚರ್ಚೆ ನಡೆಯಲಿಲ್ಲ.

Srinidhi Srivatsa, Software professional

7ಶ್ರೀನಿಧಿ ಶ್ರೀವಾತ್ಸವ್

ಬಾಕ್ಸ್ ಆಫೀಸ್ ಅಬ್ಬರ ನೋಡಿದರೆ ಕಬಾಲಿ ಸೂಪರ್ ಹಿಟ್ , ಅನ್ನುದರಲ್ಲಿ ಸಂಶಯ ಇಲ್ಲ. ಕಥೆಯು ತುಂಬಾ ಪರಿಣಾಮಕಾರಿ ಆಗಿಲ್ಲದಿದ್ದರೂ, ಕೆಟ್ಟ ಕಥೆ ಎನ್ನುವಂತಿಲ್ಲ. ಇಂದಿನ ರಾಜಕೀಯ ಸಾಮಾಜಿಕ ಸ್ಥಿತಿಯನ್ನು ಗಮನದಲ್ಲಿ ಇಟ್ಟುಕೊಂಡು ಹೇಳುವುದಾದರೆ, ದಲಿತನಾಯಕ ಮೂಲಕ ಕಥೆ ಹೇಳಲು ಹೊರಟಿದ್ದು ಕಥಾವಸ್ತುವನ್ನು ಕೆಡಿಸಿದೆ ಎನಿಸುತ್ತದೆ.

Abhishek SN, Film Maker

8ಅಭಿಷೇಕ್ ಎಸ್ ಎನ್

ಹಣ ಗಳಿಕೆಯೇ ಮೇಲೆ ಯಶಸ್ಸನ್ನು ಅಳೆಯುವುದಾದರೆ, ಕಬಾಲಿ ಸಾಧನೆಯ ಅಂಕಿ ಅಂಶಗಳು ನಮ್ಮ ಮುಂದೆಯೇ ಇವೆ. ಆದರೆ ವ್ಯಕ್ತಿಗತವಾಗಿ ಈ ಚಿತ್ರ ಮಿಶ್ರ ಪ್ರತಿಕ್ರಿಯೆಗಳನ್ನು ಪಡೆದಿದೆ. ಒಟ್ಟಾರೆ, ಚಿತ್ರಕಥೆ ಇನ್ನಷ್ಟು ಜವಾಬ್ದಾರಿಯುತವಾಗಿ ಇರಬೇಕಾಗಿತ್ತು ಎಂದು ನನಗೆ ಅನಿಸುತ್ತದೆ. ಆಗ ಕಬಾಲಿಗೆ ಕಲಾತ್ಮಕ ಹಾಗು ಮನೋರಂಜಕ ಚಿತ್ರವಾಗಿಯೂ ಹೆಚ್ಚು ಮನ್ನಣೆ ಸಿಗುತ್ತಿತ್ತು.

 

 

Apoorva, Actress

9ಅಪೂರ್ವ

ರಜನಿ ವ್ಯಕ್ತಿತ್ವವೇ ಸೂಪರ್ ಸ್ಟಾರ್. ಹಾಗಾಗಿ ಕಬಾಲಿ ಕೂಡ ಸೂಪರ್ ಹಿಟ್. ನನಗೆ ಅನಿಸುವಂತೆ ಅವರ ಅಭಿಮಾನಿಗಳು ರಜನಿಗೊಸ್ಕರವೇ ಈ ಚಿತ್ರವನ್ನು ನೋಡುತ್ತಾರೆ. ಮಿಕ್ಕಿದ್ದೆಲ್ಲವೂ ಅವರಿಗೆ ಗೌಣ. ಸೂಪರ್ ರಜನಿ..

Ashok GK, Business consultant

10ಅಶೋಕ್ ಜಿಕೆ

ಕಬಾಲಿ ಚಿತ್ರದ ಬ್ರಾಂಡ್ ವ್ಯಾಲ್ಯೂ ಹಾಗು ಮಾರ್ಕೆಟಿಂಗ್ ಸ್ಟ್ರಾಟಜಿಯನ್ನು ಮೆಚ್ಚಲೇಬೇಕು. ಆದರೆ ಒಂದು ಒಳ್ಳೆಯ ಕಥೆ ಇಲ್ಲದೆ ಇರುವಾಗ ಯಶಸ್ಸು ಸಾಧ್ಯವೂ ಇಲ್ಲ. ಇಂದಿನ ಪ್ರೇಕ್ಷಕರು ಬಲು ಸೂಕ್ಷ್ಮ. ಕಬಾಲಿಗೆ ರಜನಿ ಎಂಬ ಸೂಪರ್ ಸ್ಟಾರ್ ನ ಬ್ರಾಂಡಿಂಗ್ ಇತ್ತು. ಆದರೂ ಇದು ರಜನಿ ಅಭಿಮಾನಿಗಳಿಗೆ ಮೀಸಲಾದ ಚಿತ್ರವಾಗಿ ಉಳಿಯಿತು. ನಾನೂ ಈ ಚಿತ್ರವನ್ನು ನೋಡಿದ್ದು ರಜನಿ ಅಭಿಮಾನಿಯಾಗಿಯೇ.

ನಿಜಕ್ಕೂ ನನಗೆ ನಿರಾಶೆ ಆಯ್ತು. ರಜನಿಯ ಹಳೆ ಚಿತ್ರಗಳಲ್ಲಿನ ವಿಶೇಷತೆ ಇದರಲ್ಲಿ ಕಾಣಲಿಲ್ಲ. ಸ್ಕ್ರಿಪ್ಟ್ ನಲ್ಲಿ ಏನು ಹಿಡಿತ ಇರಲಿಲ್ಲ ಎನಿಸಿತು.

Rashmi Kulakarni, Actress

11ರಶ್ಮಿ ಕುಲಕರ್ಣಿ

ಒಂದ್ಸಲಾ ಖಂಡಿತ ನೋಡ್ಬೇಕು ಯಾಕಂದ್ರೆ ಇದು ರಜನಿಕಾಂತ್ ಅವರ ಚಿತ್ರ. ದೊಡ್ಡ ಬಜೆಟ್ ನ ಸಿನಿಮಾ ಮತ್ತೆ ಅವರು ಈ ವಯಸ್ಸಲ್ಲೂ ಯುವನಟರ ಎನರ್ಜಿಯ ಮೇಲೆ ಸವಾಲ್ ಆಗೋ ರೀತಿಯಲ್ಲಿ ಅಭಿನಯಿಸಿದ್ದಾರೆ. ನೆರುಪ್ಪು ಡಾ ಹಾಡಿಗಾಗಿ ಕಾಯುತಿದ್ದೆ, ಆ ವಿಷಯದಲ್ಲಿ ಸ್ವಲ್ಪ ನಿರಾಸೆ ಆಯ್ತು.

 

ಹೇಳೋದು ಕಷ್ಟ  !

ಪ್ರತಿ ಕ್ಷೇತ್ರದಲ್ಲಿರುವ ಪ್ರತಿಯೊಬ್ಬರ ಅನಿಸಿಕೆ “ಕಬಾಲಿ” ವಿಷಯದಲ್ಲಿ ಬೇರೆ ಆಗಿದೆ. ಸೂಪರ್ ಸ್ಟಾರ್ ರಜನಿ ಸಾರ್ ಅವರ ಎಷ್ಟೋ ಸೂಪರ್ ಡೂಪರ್ ಸಿನಿಮಾಗಳ ಮುಂದೆ “ಕಬಾಲಿ” ಎಲ್ಲಿ ನಿಂತಿದೆ ಅನ್ನೋದು ಕಷ್ಟಕರ ಎಣಿಕೆಯಾಗಿದೆ.

ಕಡೆಯದಾಗಿ “ಕಬಾಲಿ” ಸಿನಿಮಾಗಾಗಿ ಜನ ಥಿಯೇಟರ್ ಮುಂದೆ ನೂಕುನುಗ್ಗಲು ಮಾಡುತ್ತಿದ್ದಾರೋ ಇಲ್ವೋ ಗೊತ್ತಿಲ್ಲ ಆದರೆ ರಜನಿ ಸಾರ್ ಅವರ ಸ್ಟೈಲ್ ಹಾಗು ಖದರ್ ನೋಡಲಂತೂ ಖಂಡಿತ ಮುಂದೆಯೂ ಜನ ಹಾತೊರೆಯುತಿರುತ್ತಾರೆ.

ಅಂದಹಾಗೆ ನೀವೇನಂತೀರಾ?

ಕನ್ನಡಕ್ಕೆ ಡಬ್ ಆಗ್ಬೇಕಿರೋದು ಏನ್ ಗೊತ್ತಾ ?

ಡಬ್ಬಿಂಗ್ ಡಬ್ಬ ಆಗಾಗ ಬಡಿದು ಕನ್ನಡ ಚಿತ್ರರಂಗ ಅಷ್ಟೇ ಅಲ್ಲ ಮನರಂಜನಾ ವಾಹಿನಿಗಳಲ್ಲಿ ದುಡಿಯುವವರನ್ನು ಕಂಗೆಡಿಸಿದೆ. ಹಾಗೇ ನಮ್ಮ ಸಿನಿಮಾ ಕ್ಷೇತ್ರದ ಇತಿಮಿತಿಗಳನ್ನು ಬಲ್ಲ, ಮುಂದಾಲೋಚಿಸುವ ಬುದ್ದಿಮತ್ತೆಯುಳ್ಳ ಕೆಲವರು ತೀವ್ರವಾಗಿ ಡಬ್ಬಿಂಗ್ ಯಾಕೆ ಬೇಕಿಲ್ಲ ಎಂಬ ಬಗ್ಗೆ ಎಚ್ಚರಿಸುವ ಪ್ರಯತ್ನ ಮಾಡಿದ್ದಾರೆ. ಕನ್ನಡ ಚಿತ್ರ ಜಗತ್ತನ್ನು ಅರಿತಿರುವ ಮಾಯಾಲೋಕದಲ್ಲಿ ಪೂರ್ಣಚಂದ್ರ  ಡಬ್ಬಿಂಗ್ ಬೇಕಿರುವುದು ಎಲ್ಲಿಗೆ ?  ಎನ್ನುವ ಕೆಲವು  ಅರ್ಥಪೂರ್ಣ ಸಂಗತಿಗಳನ್ನಿಲ್ಲಿ  ಹಂಚಿದ್ದಾರೆ .

national geography

1)ಕನ್ನಡಕ್ಕೆ ಡಬ್ಬಿಂಗ್ ಆಗಬೇಕಾಗಿದ್ದುdiscovery ಮತ್ತು national georgaphic channelsನ programs ಹೊರತು ಸಿನಿಮಾ ಮತ್ತು ಧಾರಾವಾಹಿಗಳಲ್ಲ.

2)ತಮಿಳು ಮತ್ತು ತೆಲುಗಿನಲ್ಲಿ ಸಿನಿಮಾ ಮತ್ತು ರಾಜಕೀಯ ರಕ್ತಗತವಾಗಿ ಬಂದಿದೆ. ತಮಿಳಿನಲ್ಲಿ 36%, ತೆಲುಗಿನಲ್ಲಿ 39%, ಸಿನಿಮಾ viewers ಇದ್ದಾರೆ, ಆದರೆ ಕರ್ನಾಟಕ ದಲ್ಲಿ 14% viewers ಇರುವುದು.ಹಾಗಾಗಿ ಅಲ್ಲಿ ಡಬ್ಬಿಂಗ್ ನಿಂದ ಯಾವುದೇ ಸಮಸ್ಯೆ ಆಗಲಿಲ್ಲ.

3)ಗಡಿ ಭಾಗದಲ್ಲಿ ಪರಭಾಷೆ ಸಿನಿಮಾ ಪ್ರದರ್ಶಕರ ಹಿಡಿತ ಇರುವುದರಿಂದ ಡಬ್ ಆದರೂ ಅಲ್ಲಿ ಬಿಡುಗಡೆ ಆಗಲು ಸಾಧ್ಯವೇ ಇಲ್ಲ.

4)ಇಲ್ಲಿ ಡಬ್ಬಿಂಗ್ ಪರ ವಕಾಲತ್ತು ವಹಿಸಿಕೊಂಡ ನಿರ್ಮಾಪಕರ್ಯಾರು ಬೌದ್ಧಿಕ ಬೆಳವಣಿಗೆಗೆ ಸಹಾಯ ಆಗುವಂತ ಸಿನಿಮಾ ಡಬ್ ಮಾಡುವುದಿಲ್ಲ.

5)ತಮ್ಮ ಜೇಬು ಬರ್ತಿಯಾಗುವಂತ ಪಕ್ಕ ಕಮರ್ಷಿಯಲ್ ಸಿನಿಮಾ ಮಾಡುತ್ತಾರೆ. ಅವುಗಳು ಬಿಡುಗಡೆ ಆಗುವುದು ಸಹ ಕನ್ನಡ ಸಿನಿಮಾ ಪ್ರದರ್ಶಿಸುವ ಚಿತ್ರಮಂದಿರಗಳಲ್ಲೆ.!

ಹಾಗಾಗಿ ಕನ್ನಡಕ್ಕೆ ಡಬ್ಬಿಂಗ್ ಅವಶ್ಯಕತೆ ಇಲ್ಲ.

ಸುಬ್ಬಯ್ಯ ನಾಯ್ಡು: ಕನ್ನಡ ಚಿತ್ರರಂಗದ ಮೊದಲ ನಾಯಕ ನಟ

ಸುಬ್ಬಯ್ಯ ನಾಯ್ಡು: ಕನ್ನಡ ಚಿತ್ರರಂಗದ ಮೊದಲ ನಾಯಕ ನಟ

ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ದಲ್ಲಿ ನಾಯಕನಟರಾಗಿ ಅಭಿನಯಿಸಿದ ಹೆಗ್ಗಳಿಕೆ ಸುಬ್ಬಯ್ಯ ನಾಯ್ಡು ಅವರದ್ದು. ಅವರು ಕನ್ನಡದ ಮೊದಲ ನಾಟಕ ನಟ ಅನ್ನುವುದು ಕೇವಲ ಅಂಕಿ-ಅಂಶಗಳ ಮೂಲಕ ಮಾತ್ರ ಗುರುತಿಸಲ್ಪಡೋ ಸಂಗತಿ ಅಲ್ಲ ನಾಯಕ ನಟರ ಅಭಿನಯಕ್ಕೆ ಒಂದು ರೀತಿಯಲ್ಲಿ ಮಾದರಿಯಾಗಿ ನಿಂತವರು ಅವರು. ವರನಟ ಡಾ.ರಾಜ್ ಕುಮಾರ್ ಅವರು ಸುಬ್ಬಯ್ಯ ನಾಯ್ಡು ಅವರ ಕಂಪನಿಯಲ್ಲಿ ಅಭಿನಯಿಸಿದ್ದವರು ಮಾತ್ರವಲ್ಲ ಅವರ ಅಭಿನಯ ಕ್ರಮವನ್ನೇ ಅನುಸರಿಸಿದವರೂ ಕೂಡ ಹೌದು. ಅಷ್ಟೇ ಅಲ್ಲ ಕನ್ನಡ ಚಿತ್ರರಂಗದ ಕನಿಷ್ಠ ಮೂರು ತಲೆಮಾರಿನ ಕಲಾವಿದರು ಸುಬ್ಬಯ್ಯ ನಾಯಡು ಅವರ ಅಭಿನಯ ಕ್ರಮವನ್ನೇ ಅನುಸರಿಸಿದ್ದರು.

ಎರಡನೇ ವಯಸ್ಸಿಗೆ ತಂದೆಯನ್ನು ಕಳೆದು ಕೊಂಡ ಸುಬ್ಬಯ್ಯ ನಾಯ್ಡು ಬಲು ಕಷ್ಟದ ಬಾಲ್ಯವನ್ನು ಕಂಡವರು. ಶಾಲೆಯ ಮುಖವನ್ನೇ ಕಾಣದೆ ಎಮ್ಮೆ ಮೇಯಿಸಿಕೊಂಡಿದ್ದರೂ ನಾಟಕಗಳನ್ನು ನೋಡಿ ಶುದ್ದ ಸಂಭಾಷಣೆಯನ್ನು ಬಾಲಕ ಸುಬ್ಬಯ್ಯ ನಾಯ್ಡು ಕಲಿತಿದ್ದರು. ಇದೇ ರಂಗಭೂಮಿಯ ಕಡೆ ಬರಲು ಪ್ರೇರಣೆ ನೀಡಿತು. ಗಿರಿಧರ್ಲಾಲ್ ಕಂಪನಿ ಮೂಲಕ ಪ್ರವೇಶ ಪಡೆದರೂ ಹೆಸರು ಮಾಡಿದ್ದು ಸುಬ್ಬು ಗುರಿಕಾರ್ ಅವರ ‘ಭಾರತ ಜನ ಮನೋವಿಲಾಸಿನಿ’ಕಂಪನಿಯ ಮೂಲಕ. ಅದರಲ್ಲೂ ‘ವಿರಾಟ ಪರ್ವ’ನಾಟಕದ ಸುದೇಷ್ಟೆ ಪಾತ್ರ ಹೆಸರು ತಂದು ಕೊಟ್ಟಿತು. ಇದನ್ನು ಮಾಡೋಳು ಹುಡುಗಿ ಅಂದುಕೊಂಡು ಮೋಹಿಸಿದ ಶ್ರೀಮಂತರೂ ಕೂಡ ಇದ್ದರು. ಗಂಗಾಧರ ರಾಯರ ಕಂಪನಿಯಲ್ಲಿ ನಾಯಕನ ಪಾತ್ರಗಳ ಮೂಲಕ ಹೆಸರು ಮಾಡಿದರು. ಇಲ್ಲಿಂದ ಮುಂದಿನ ಸ್ಟಾಪ್ ಗುಬ್ಬಿ ಕಂಪನಿ. ಇಲ್ಲಂತೂ ‘ಸುಭದ್ರಾ ಕಲ್ಯಾಣ’ದ ಶ್ರೀಕೃಷ್ಣನಾಗಿ ಹೆಸರು ಮಾಡಿದರು. ಅಷ್ಟು ಹೊತ್ತಿಗಾಗಲೇ ನಾಯಕನ ಪಾತ್ರವನ್ನು ನಿರ್ವಹಿಸುವುದರಲ್ಲಿ ಅವರು ಮಾದರಿ ಆಗಿ ಬಿಟ್ಟಿದ್ದರು. ಗುಬ್ಬಿ ಕಂಪನಿಯವರೇ ನಿರ್ಮಿಸಿದ ‘ಹಿಸ್ ಲವ್ ಆಪೇರ್’ ಅನ್ನೋ ಮೂಕಿ ಚಿತ್ರದಲ್ಲಿ ಕೂಡ ಸುಬ್ಬಯ್ಯ ನಾಯ್ಡು ಅಭಿನಯಿಸಿದರು.

ಈ ವೇಳೆಗೆ ಸುಬ್ಬಯ್ಯ ನಾಯ್ಡು ಅವರಿಗೆ ಆರ್.ನಾಗೇಂದ್ರ ರಾಯರ ಪರಿಚಯವಾಯಿತು. ರಾಯರು ಮುಂಬೈಗೆ ತೆರಳಿ ವಾಕ್ಚಿತ್ರಗಳಲ್ಲಿ ಅಭಿನಯಿಸಿ ಅನುಭವವನ್ನು ಪಡೆದುಕೊಂಡು ಬಂದಿದ್ದರು.ರಂಗಭೂಮಿಯ ಕುರಿತೂ ಅವರಿಗೆ ಹೊಸ ಐಡಿಯಾಗಳಿದ್ದವು. ಇದನ್ನು ಕೇಳಿ ಸುಬ್ಬಯ್ಯ ನಾಯ್ಡು ಅವರಿಗೆ ಅವರಿವರ ಕಂಪನಿಯಲ್ಲಿ ಕೆಲಸ ಮಾಡೋ ಬದಲಿಗೆ ರಾಯರ ಜೊತೆಯಲ್ಲಿ ಸ್ವಂತ ಕಂಪನಿ ಮಾಡಬಾರದು ಏಕೆ ಅನ್ನೋ ವಿಚಾರ ಬಂದಿತು. ರಾಯರ ಮೊದಲಿಗೆ ಒಪ್ಪದಿದ್ದರೂ ತಾಯಿ ರುಕ್ಮಿಣಿ ಬಾಯಿ ಮಾತಿಗೆ ಕಟ್ಟು ಬಿದ್ದು ಒಪ್ಪಿಕೊಂಡರು. ಹೀಗೆ ‘ಶ್ರೀಸಾಮ್ರಾಜ್ಯ ನಾಟಕ ಮಂಡಳಿ’ರೂಪುಗೊಂಡಿತು. ಇಲ್ಲಿ ರೂಪುಗೊಂಡ ‘ಭೂಕೈಲಾಸ’ ನಾಟಕ ಕನ್ನಡ ರಂಗಭೂಮಿಯ ಇತಿಹಾಸದಲ್ಲೇ ಮೈಲಿಗಲ್ಲು ಎನ್ನಿಸಿಕೊಂಡಿತು. ರಂಗದ ಮೇಲೆ ಮೊಟ್ಟ ಮೊದಲ ಸಲ ಡಿಮ್ಮರ್ಗಳು ಸ್ಪಾಟ್ ಲೈಟ್ಗಳು ಬಳಕೆಯಾದವು. ರಾವಣನಾಗಿ ಸುಬ್ಬಯ್ಯ ನಾಯ್ಡು ಅವರು ಅಭಿನಯದಲ್ಲಿ ಹೊಸತನವನ್ನು ತಂದಿದ್ದರು.

 15bg_bgkpm_SUCH_17_1847890e

ಇದೇ ವೇಳೆಗೆ ಚಮನ್ ಲಾಲ್ ಡುಂಗಾಜಿಯವರು ನಾಗೇಂದ್ರ ರಾಯರ ಬಳಿ ಕನ್ನಡ ಚಿತ್ರವನ್ನು ನಿರ್ಮಿಸುವ ಪ್ರಸ್ತಾಪವನ್ನು ಮುಂದಿಟ್ಟಿದ್ದರು. ನಾಗೇಂದ್ರ ರಾಯರು ಹಾಕಿದ್ದು ಒಂದೇ ಶರತ್ತು ‘ಸುಬ್ಬಯ್ಯ ನಾಯ್ಡು ಅವರು ನಾಯಕರಾಗ ಬೇಕು’ ಹೀಗೆ ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ದಲ್ಲಿ ನಾಯಕ ಇಂದ್ರಜಿತುವಿನ ಪಾತ್ರವನ್ನು ಸುಬ್ಬಯ್ಯ ನಾಯ್ಡು ನಿರ್ವಹಿಸಿದರು. ರಂಗ ಭೂಮಿಗಿಂತಲೂ ಸಿನಿಮಾ ಭಿನ್ನ ಕ್ಷೇತ್ರವಾಗಿದ್ದು. ಆಗ ಕಲಾವಿದರು ಅಭಿನಯಿಸುತ್ತಲೇ ಹಾಡ ಬೇಕಿತ್ತು. ಸ್ಟುಡಿಯೋ ಇರಲೇ ಇಲ್ಲ. ಇಂತಹ ಸವಾಲಿನಲ್ಲಿ ಸುಬ್ಬಯ್ಯ ನಾಯ್ಡು ತಮ್ಮ ಸ್ವಂತಿಕೆಯನ್ನು ತೋರಿಸಿದರು ಅಲ್ಲಿಂದ ಮುಂದೆ ‘ವಸಂತ ಸೇನ’ ‘ಹರಿಶ್ಚಂದ್ರ’ ‘ಮಹಾತ್ಮ ಕಬೀರ್’ಚಿತ್ರಗಳ ನಾಯಕರಾಗಿ ಸುಬ್ಬಯ್ಯ ನಾಯ್ಡು ಅಭಿನಯಿಸಿ ಅಪಾರ ಜನಪ್ರಿಯತೆ ಪಡೆದರು. ಆದರೆ ಅವರ ಒಲವು ಇದ್ದಿದ್ದು ರಂಗಭೂಮಿಯ ಕಡೆಗೇ.

ಮದ್ರಾಸಿನಲ್ಲಿ ‘ಶ್ರೀಸಾಮ್ರಾಜ್ಯ ಮಂಡಳಿ’ ಕ್ಯಾಂಪ್ ಹಾಕಿದ್ದಾಗ. ಚಾಂಮ್ರವರ್ಣ ಅಣೆಕಟ್ಟು ಒಡೆದು ಅಪಾರ ನಷ್ಟವಾಯಿತು. ನಾಗೇಂದ್ರ ರಾಯರು ರಂಗಭೂಮಿ ಸಾಕು ಎಂದು ನಿರ್ಧರಿಸಿ ಚಿತ್ರರಂಗದಲ್ಲಿ ಭವಿಷ್ಯವನ್ನು ಕಾಣಲು ತೀರ್ಮಾನಿಸಿದರು. ಆದರೆ ಸುಬ್ಬಯ್ಯ ನಾಯಡು ಅವರು ರಂಗಭೂಮಿಯಲ್ಲೇ ಇಳಿಯಲು ಬಯಸಿದರು. ಇಲ್ಲಿ ಗೆಳೆಯರ ಹಾದಿ ಬೇರೆಯಾಯಿತು. ಇದರಿಂದ ಕನ್ನಡ ಚಿತ್ರರಂಗಕ್ಕೆ ದೊರಕ ಬಹುದಾಗಿದ್ದ ಸುಬ್ಬಯ್ಯ ನಾಯ್ಡು ಅವರ ವಿಶಿಷ್ಠ ಪಾತ್ರಗಳು ತಪ್ಪಿ ಹೋದವು. ಮುಂದೆ ಅವರು ಚಿತ್ರ ನಿರ್ಮಿಸಿದ್ದು ಮಗ ಲೋಕೇಶ್ಗಾಗಿ. ‘ಭಕ್ತಪ್ರಹ್ಲಾದ’ಚಿತ್ರವನ್ನು ನಿರ್ಮಿಸಿ ತಾವೇ ಹಿರಣ್ಯ ಕಶಪುವಿನ ಪಾತ್ರವನ್ನು ಅಮೋಘವಾಗಿ ಮಾಡಿದರು. ಅಲ್ಲಿ ಕೂಡ ಅವರ ಪ್ರತಿಭೆಯನ್ನು ಗುರುತಿಸುವ ಮನೋಭಾವ ಕೆಲಸ ಮಾಡಿತ್ತು. ಲೀಲಾವತಿಯವರು ಚಿತ್ರರಂಗಕ್ಕೆ ಬಂದಿದ್ದು ಈ ಚಿತ್ರದ ಮೂಲಕವೇ.

ರಂಗಭೂಮಿಯಲ್ಲೇ ಉಳಿಯಲು ತೀರ್ಮಾನಿಸಿದ ಸುಬ್ಬಯ್ಯ ನಾಯಡು ಹಲವು ಹೊಸ ಪ್ರಯೋಗಗಳನ್ನು ಮಾಡಿದರು. ‘ತಿರುಗುವ ರಂಗಸಜ್ಜಿಕೆ’ಮಾಡಿದರು. ರಾಷ್ಟ್ರಮಟ್ಟದಲ್ಲೇ ಇಂತಹ ಪ್ರಯೋಗ ನಡೆದಿದ್ದು ಅದೇ ಮೊದಲು. ಹೊಸ ಕಲಾವಿದರನ್ನು ಹುಡುಕಿದರು. ಶ್ರೀಕಂಠ ಮೂರ್ತಿಗಳು ಅವರ ಕಂಪನಿಯ ಪ್ರಮುಖ ನಟರಾಗಿದ್ದರು.

ಒಮ್ಮೆ ಅವರಿಗೆ ಅನಾರೋಗ್ಯ ಉಂಟಾಯಿತು. ನಾಟಕಕ್ಕೆ ಟಿಕೇಟ್ ವಿತರಿಸಿಯಾಗಿತ್ತು. ಒಬ್ಬ ಕಲಾವಿದನ ಸಲುವಾಗಿ ನಾಟಕ ನಿಲ್ಲಿಸುವುದು ಸರಿಯಲ್ಲ ಎಂದು ಸುಬ್ಬಯ್ಯ ನಾಯಡು ನಿರ್ಧರಿಸಿದರು. ಆದರೆ ‘ಭಕ್ತ ಅಂಬರೀಷ’ದಲ್ಲಿ ರಮಾಕಾಂತನ ಪಾತ್ರವನ್ನು ವಹಿಸುವುದು ಸುಲಭವಾಗಿರಲಿಲ್ಲ. ಯೋಚಿಸಿ ನಾಯಡು ಅವರು ತಮ್ಮ ಕಂಪನಿಯಲ್ಲಿದ್ದ ಗಾಯನವನ್ನೂ ಬಲ್ಲ ಸುಂದರ ಯುವಕನಿಂದ ಆ ಪಾತ್ರವನ್ನು ಮಾಡಿಸಿದರು. ಆ ಯುವಕ ಮುತ್ತುರಾಜ್ ಮುಂದೆ ಡಾ.ರಾಜ್ ಕುಮಾರ್ ಆಗಿ ಹೆಸರು ಮಾಡಿದರು. ವೈವಿಧ್ಯಮಯ ಪಾತ್ರಗಳನ್ನು ನೀಡಿ ರಾಜ್ ಕುಮಾರ್ ಅವರು ಮೇರು ಕಲಾವಿದರಾಗಿ ಬೆಳೆಯುವಲ್ಲಿ ಸುಬ್ಬಯ್ಯ ನಾಯಡು ಅವರ ಕೊಡುಗೆ ಬಹಳ ದೊಡ್ಡದು. ಅದರಂತೆ ನರಸಿಂಹ ರಾಜು, ಬಾಲಕೃಷ್ಣ, ಢಿಕ್ಕಿ ಮಾದವರಾವ್, ಬೇಲೂರು ರಾಘವೇಂದ್ರ ರಾವ್ ಸೇರಿದಂತೆ ಅನೇಕ ಪ್ರಮುಖ ಕಲಾವಿದರನ್ನು ಅವರು ಬೆಳೆಸಿದರು.

1962ರ ಜುಲೈ 21ರಂದು ಮಂಡ್ಯದಲ್ಲಿ ಅಭಿನಯಿಸುತ್ತಿರುವಾಗಲೇ ಹೃದಯಾಘಾತದಿಂದ ಸುಬ್ಬಯ್ಯ ನಾಯಡು ನಿಧನರಾದರು. ಅಭಿನಯದ ಅನುಪಮ ತಾರೆ ಕಳಚಿತು. ಅವರ ತಾರಾಪತ್ನಿ ಲಕ್ಷ್ಮಿಬಾಯಿ. ಮೂಕಿ ಚಿತ್ರದ ಸ್ಟಾರ್ ಎನ್ನಿಸಿಕೊಂಡಿದ್ದರು. ಚಿತ್ರರಂಗದಲ್ಲಿ ಕೂಡ ಮಹತ್ತರ ಪಾತ್ರಗಳನ್ನು ಅಭಿನಯಿಸಿದ್ದರು. ಮೊದಲ ಮಡದಿ ವೆಂಕಟಮ್ಮ ಗಂಡನ ಸಾವಿನ ಸುದ್ದಿ ಕೇಳಿದ ಕೂಡಲೇ ಸಾವನ್ನಪ್ಪಿದರು. ಈ ದಂಪತಿಗಳ ಜೋಡಿ ಪಾರ್ಥಿವ ಶರೀರದ ಮೆರವಣಿಗೆ ನೋಡಿ ಕಣ್ಣೀರು ಸುರಿಸದವರೇ ಇಲ್ಲ. ಸುಬ್ಬಯ್ಯ ನಾಯಡು ಅವರ ಮಗ ಲೋಕೇಶ್ ಕನ್ನಡ ಚಿತ್ರರಂಗದ ಪ್ರಮುಖ ಕಲಾವಿದರಾಗಿದ್ದರು. ಸೊಸೆ ಗಿರಿಜಾ ಲೋಕೇಶ್, ಮೊಮ್ಮಕ್ಕಳಾದ ಸೃಜನ್ ಲೋಕೇಶ್, ಪೂಜಾ ಚಿತ್ರರಂಗದಲ್ಲಿ ಹಿರಿಯ ಪರಂಪರೆಯನ್ನು ಮುಂದುವರಿಸಿದ್ದಾರೆ.

ಮುಖಭಾವದಲ್ಲೇ ಹೊಸ ಸಾಧ್ಯತೆ ನೀಡುವ ಕ್ರಮ, ಸಂಭಾಷಣೆ ಹೇಳುವ ಶೈಲಿ, ನಡಿಗೆಯ ಗತ್ತು ಎಲ್ಲವೂ ಸುಬ್ಬಯ್ಯ ನಾಯಡು ಅವರಿಂದ ನಾಯಕ ಪಾತ್ರಕ್ಕೆ ಮಾದರಿಯಾಗಿ ಬಂದಿತು. ಅವರ ಮಗಳು ಬಂಗಾರಮ್ಮ ತಂದೆಯ ಕುರಿತು ‘ನಟ ರತ್ನ’ಎನ್ನು ಕೃತಿಯನ್ನು ಬರೆದಿದ್ದಾರೆ. ಅದು ಒಂದು ರೀತಿಯಲ್ಲಿ ರೂಪಕ ಕೂಡ ಹೌದು.

ಡಾ.ರಾಜ್ ಕುಮಾರ್ ಕೊನೆಯವರೆಗೂ ಸುಬ್ಬಯ್ಯ ನಾಯಡು ಅವರ ಮಾದರಿಯಿಂದ ತಾನು ಚಿತ್ರನಟನಾಗಿ ಬೆಳೆದೆ ಎಂದು ಹೇಳಿ ಕೊಳ್ಳುತ್ತಿದ್ದರು.

ಪ್ರಥಮ್ ಗೆಲುವು ಹುಟ್ಟ್ಟಿಸಿದ ತಲ್ಲಣ

“ಬಿಗ್ ಬಾಸ್ “
Psychology ವಿದ್ಯಾರ್ಥಿಯಾಗಿ ನಾನು ಮಾನವ-ಭಾವನೆಗಳ, ನಡುವಳಿಕೆಗಳ ಸೂಕ್ಷ್ಮ ಅಧ್ಯಯನಕ್ಕಾಗಿ ಅತ್ಯಂತ ಕುತೂಹಲದಿಂದ ನೋಡಿದ, ನೋಡುವ ಕಾರ್ಯಕ್ರಮ. ಅಲ್ಲಿನ ಅನೇಕ housemateಗಳೇ ಹೇಳಿಕೊಳ್ಳುವಂತೆ ನನ್ನಮಟ್ಟಿಗೂ ಇದೊಂದು “ಬದುಕಿನೊಳಗೊಂದು ಬದುಕು”. ನಿತ್ಯಜೀವನದ ಒಡನಾಟದಲ್ಲಿ ಎದುರಾಗಬಹುದಾದ  ಎಲ್ಲ ಬಗೆಯ ಸಂದರ್ಭಗಳನ್ನು ಆ ಕ್ಷಣಕ್ಕೆ ಒದಗುವ ಅನುಕೂಲಗಳು ಮತ್ತು ಸವಲತ್ತುಗಳನ್ನು ಉಪಯೋಗಿಸಿಕೊಂಡು ಎಷ್ಟರಮಟ್ಟಿಗೆ ನಿಭಾಯಿಸಬಲ್ಲೆವು ಎಂಬುದನ್ನು ನಮಗೆ ನಾವೇ ಸಿಂಧುವಾಗಿಸಿಕೊಳ್ಳಬಲ್ಲ ಒಂದು opportunity!
ಕಾಲಕಾಲಕ್ಕೆ entry ಕೊಟ್ಟು exit ಆಗುವ ಕಾವ್ಯ, ವಾಣಿಶ್ರೀ, ಚೈತ್ರ, ದೊ.ಗಣೇಶನಂಥಾ ನಗಣ್ಯ characters..
ಜೊತೆಗೇ ಇದ್ದಂತಿದ್ದು ನಿಲುವು ತೆಗೆದುಕೊಳ್ಳಲರಿಯದೆ, ಬೆನ್ನಹಿಂದೆ losetalks ಮಾಡುವ ಮೋಹನ್ ಥರದ ಮನಸ್ಸುಗಳು..
ಕತ್ತೆ ಥರ ದುಡಿದೂ footage ತೊಗೋಳಕ್ಕೆ ಬರದ ಶಾಲಿನಿಯಂಥ ಅಪ್ಪಟ ಮನಸಿನ emotional foolಗಳು..
bigboss-shalinibigboss-malavika
ಜನರ ಸೇವೆಯೇ ಜನಾರ್ಧನ ಸೇವೆ, ನಾನಿರೋದೆ ಸಾರ್ವಜನಿಕರಿಗೆ ಜೀವ ಕೊಡೋದಕ್ಕೆ ಅನ್ನೋಥರ ಕೇವಲ pose ಮಾತ್ರ ಕೊಡೋ ಮಾಳವಿಕರಂಥ ಮಳ್ಳಿ ಮನಸುಗಳು..
ಇನ್ನೂ ಹುಚ್ಚುಮನಸಿನ ಹತ್ತಾರು ಗುಣವಿಶೇಷಣಗಳ ಜೊತೆ ನಾನೂ ನೀವೂ ನಿತ್ಯದ ಬದುಕಲ್ಲಿ ಏಗೋದು ಸತ್ಯ. ತಾನೇ??
ಈಗ ಈ ಬಿಗ್’ಬಾಸ್ ಅನ್ನೋ reality show ಕೊನೆಯ ಹಂತ ತಲುಪಿದ 3 characters ನೋಡಿ. ಮೇಲೆ ಹೇಳಿದ, ಹೇಳದ ಎಲ್ಲ ಬಗೆಯ ಅಷ್ಟವಕ್ರಗಳನ್ನು ಚಾಣಾಕ್ಷರಾಗಿ ಎದುರಿಸಬೇಕಾದರೆ, ಗೆದ್ದ ಮೂವರಲ್ಲಿ ಯಾರ ನೀತಿ ಅನುಸರಿಸಬೇಕು?
ಇದಮಿತ್ತಂ ಅಂತ ಎಲ್ಲರನ್ನ ಎಲ್ಲವನ್ನ ರೇಖ ಥರ ಶಾಂತವಾಗಿ ಎದುರಿಸ್ಬೇಕ? ಸೋಲು ಕಟ್ಟಿಟ್ಟ ಬುತ್ತಿ!
ಕರ್ಮಣ್ಯೇವಾಧಿಕಾರಸ್ತೆ….. ಅಂತ ನಿರೀಕ್ಷೆ ಬಿಟ್ಟು ಬಂದದ್ದೆಲ್ಲಾ ಬರಲಿ ಅಂತ ಕೀರ್ತಿ ಥರ ತೊಗೋಬೇಕ? ಅಸಮಾಧಾನ ನಿರಾಸೆ ನಿಮ್ಮದು ಸುಳ್ಳಲ್ಲ!
bigboss-pratham
ಅದೇನಾದ್ರೂ ಆಗ್ಲಿ, ಇನ್ನೊಬ್ಬ ನೋವಿನಿಂದ ಸತ್ಹೋಗ್ಲಿ, ನನಗೆ ಮಾತ್ರ ಕಂಡ ಮತ್ತು ನನಗೆ ಬೇಕಾದ ಸತ್ಯ ತಾನೇ ಹೇಳ್ತಿರೋದು, why should I care?! ಅಂತ ದಾಷ್ಟೀಕವಾಗಿ, hight of immaturity ಹಾವಭಾವಗಳನ್ನ ಪ್ರದರ್ಶಿಸ್ತಾ, ನಾನೇ right ಅಂತ ಬದುಕಿಬಿಡ್ಬೇಕ?
ಗೊತ್ತಿಲ್ಲ ಏನು ಹೇಳ್ಬೇಕಂತ!
ಇದು ಗೆಲುವಾ?! ಇದು ಬದುಕುವ ಪರಿಯಾ?!
ನಂಗ್ಯಾಕೋ ನಾನೇ ಸರಿಯಿಲ್ಲ ಅನ್ನಿಸೋಕೆ ಶುರುವಿಟ್ಟಿದೆ, ಬಹುಜನರ ಒಲವಿನ ದಿಕ್ಕು ನೋಡಿ!
ಯೋಚಿಸಿ…
ಅಯೋಗ್ಯ..
ನಿನ್ನ ಜನ್ಮಕ್ಕಿಷ್ಟ್ ಬೆಂಕಿಹಾಕ..
………..
ಇಂಥ ನಿಯಂತ್ರಣ ತಪ್ಪಿದ ಮಾತುಗಳು ಪದೇಪದೇ ಆಡುವಂಥ ಮನುಷ್ಯ, ತಪ್ ಮಾಡಿದೀನಿ ಕ್ಷಮಿಸಿಬಿಡಿ ಅಂದ್ರೆ ಎಷ್ಟು ಬಾರಿ ಕ್ಷಮಿಸಬಹುದು? ಹೆತ್ತವರನ್ನೇ ಗೌರವಿಸಲು ಗೊತ್ತಿಲ್ಲದವ ಪ್ರಪಂಚವನ್ನ ಗೌರವಿಸಲು ಸಾಧ್ಯವಾ?! ಆಟದ ಮಟ್ಟಿಗೆ ಸೋಲು ಗೆಲುವು ನಿಯಾಮಕವೂ ಹೌದು ನಿರ್ಣಾಯಕವೂ ಹೌದು. ಆದ್ದರ್ರೆ….
ಜೀವನವನ್ನ ಒಂದು ಪಾಠಶಾಲೆ, ನಾವೆಲ್ಲ ನಿತ್ಯ ಕಲಿವವರು ಅಂತ consider ಮಾಡೋದಾದ್ರೆ, ಜೀವನ second chance ಕೊಡೋದು ತುಂಬ ವಿರಳ. ಸಾಂಕೇತಿಕವಾಗಿ ಗೆದ್ದೋರು ಚೇತರಿಸಿಕೊಂಡು ತಿದ್ದಿಕೊಂಡ್ರೆ ಉತ್ತಮ.
ಇಂದಿನ ಬಹುಜನಾದೇಶ ಸಾಗುತ್ತಿರುವ ನಿಟ್ಟು ಮತ್ತು ಕೇವಲ ಮತ್ತು ಕೇವಲ TRPಗಾಗಿ ಮಾತ್ರ ಸಮಾಜವಿಮುಖೀ ಕೆಲಸಕ್ತೂ ಸೈ ಎನ್ನುತ್ತಿರುವ ಮಾಧ್ಯಮದ ನಡೆ ನನ್ನ ಮಟ್ಟಿಗಂತೂ ಆತಂಕಕಾರಿ!
ಏನಂತೀರ?
ನನಗಂತೂ ಇದು ಬದುಕಿನ  ಮತ್ತೊಂದು ಕಲಿಕೆ.
asha vishwanath 1
-ಆಶಾ ಆರ್.ವಿಶ್ವನಾಥ್

ನಿಲ್ಲದಿರಲಿ “ಸುಹಾನಾ” ಸುಮಧುರ ಗಾನಯಾನ …

ಇವತ್ತು ವಿಶ್ವ ಮಹಿಳಾ ದಿನಾಚರಣೆ, ಮಹಿಳೆ ಕುಟುಂಬ ನಿರ್ವಹಣೆ ಜೊತೆಗೆ ಸಮಾಜದ ಹಾಗೂ ಹೋಗುಗಳಲ್ಲೂ ಪುರುಷನೊಂದಿಗೆ ಕೈಜೋಡಿಸಿದ್ದಾಳೆ. ಆಕೆಯ ಸಾಮರ್ಥ್ಯ ಹರಿದಷ್ಟೂ ವಿಸ್ತಾರವಾಗುವ ಕಡಲಿನಂತಹುದ್ದು.

suhana1

ಮುಂದುವರೆದಿದ್ದೇವೆ ಎಂದು ಭುಜ ಕುಣಿಸುವ ನಮ್ಮವರ ಇಂದಿನ  ವಿಪರ್ಯಾಸ ಅಂದ್ರೆ ಕರ್ನಾಟಕದಲ್ಲಿ ಓರ್ವ ಯುವತಿಯ ಎದೆಗಾರಿಕೆಯನ್ನು ಪ್ರಶ್ನಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಅವಹೇಳ ಮಾಡಲಾಗುತ್ತಿದೆ.. ತಾವು ಮಾಡುತ್ತಿರುವ ಘನಂಧಾರಿ ಕೆಲಸ ಏನೆಂದು ತಿಳಿದುಕೊಳ್ಳಲಾಗದ ಮೂರ್ಖರೆಲ್ಲಾ ಇಂದು ಬೇಕಾಬಿಟ್ಟಿಯಾಗಿ ಮಾತನಾಡುತ್ತಿದ್ದಾರೆ..
ಸುಹಾನಾ, ಈಕೆ ಹೆಸರು ಕರುನಾಡಿನಲ್ಲಿ ಈಗ ಜನಜನಿತ.. ಹೌದು ಕಳೆದ ಶನಿವಾರ ಜೀ ಕನ್ನಡ ವಾಹಿನಿಯ ಸರಿಗಮಪ ಸೀಸನ್ 13ರಲ್ಲಿ ಸ್ಪರ್ಧಿಯಾಗಿ ಆಯ್ಕೆಯಾಗುವ ಮೂಲಕ ಇಡೀ ಕರ್ನಾಟಕದ ಕಣ್ಣು ತೆರೆಸಿದ್ದಾರೆ.. ಜೊತೆಗೆ ಕೆಲವೊಂದಿಷ್ಟು ಧರ್ಮಾಂಧರಿಗೆ ಆಹಾರವಾಗಿದ್ದಾರೆ.. ಮೂಲತಃ ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಭೀಮನಕೋಣೆಯ ಹುಡುಗಿ ಮಾತನಾಡಿದ್ದರಲ್ಲಿ ಯಾವುದೇ ತಪ್ಪಿಲ್ಲ.. ಹಾಗಿದ್ದರೂ ಧರ್ಮ, ಆಚಾರ ವಿಚಾರ ಅಂತಾ ಬೊಗಳೆ ಬಿಡುವ ಮಂದಿ ಒಂದು ಹೆಣ್ಣು ಅನ್ನೋದನ್ನು ಬಿಟ್ಟು ಬಾಯಿಗೆ ಬಂದಂತೆ ಬೊಗಳುತ್ತಿದ್ದಾರೆ..

suhana4ವಿಷಯಕ್ಕೆ ಬರೋಣ, ಮುಸ್ಲಿಂ ಧರ್ಮದಲ್ಲಿ ಕೆಟ್ಟದನ್ನು ಮಾಡಬಾರದು ಅನ್ನೋ ನಿಯಮಗಳಿವೆ.. ಅದಕ್ಕಾಗಿ ಅವರು ಕುಡಿತದ ಚಟಕ್ಕೆ ದಾಸರಾಗುವುದಿಲ್ಲ, ವೇಶ್ಯಾವಟಿಕೆ ನಿಷಿದ್ಧ, ಹಾಗೆಯೇ ಹೆಣ್ಣು ಮಕ್ಕಳು ಸಮಾಜದಲ್ಲಿ ಕೆಟ್ಟ ರೀತಿಯಲ್ಲಿ ಕಾಣಿಸಿಕೊಳ್ಳಬಾರದು ಅನ್ನೋ ಕಾರಣಕ್ಕೆ ಮುಖ ಮುಚ್ಚಿಕೊಂಡು ಓಡಾಡಲು ಸ್ಕಾರ್ಪ್, ಹಿಜಾಬು, ಬುರ್ಖಾ ಧರಿಸುವಂತೆ ಸಲಹೆ ನೀಡ್ತಾರೆ ಇದನ್ನ ಪಾಲಿಸ್ತಾರೆ ಕೂಡ.. ಇದನ್ನು ನಾವು ಅಂದ್ರೆ ಹೆಣ್ಣು ತೋರಿಕೆ ವಸ್ತುವಲ್ಲ ಅಂತಾ ನಂಬಿರುವ ನಾವೆಲ್ಲ ಒಪ್ಪಿಕೊಳ್ಳೋಣ.. ಆದ್ರೆ ಈ ಯುವತಿ ಮಾಡಿದ ಅಪರಾಧವಾದ್ರು ಏನು..? ಬುರ್ಖಾ, ಸ್ಕಾರ್ಪ್, ಹಿಜಾಬು ಎಲ್ಲವನ್ನೂ ಧರಿಸಿ ಬಂದು ತನ್ನ ಪ್ರತಿಬೆಯನ್ನು ಅನಾವರಣ ಮಾಡಿದ್ದೇ ತಪ್ಪಾಯಿತೆ..? ಇಲ್ಲಾ ಮುಸ್ಲಿಂ ಬಾಲಕಿ ಹಿಂದೂಗಳ ಭಕ್ತಿ ಗೀತೆಯನ್ನು ಹಾಡಿದ್ದು ನಿಮಗೆ ನೋವು ತರಿಸಿದೆಯೇ..? ಕಲೆಗೇಕೆ ಸ್ವಾಮಿ ಧರ್ಮದ ಸಂಕೋಲೆ ?

suhana3ಅದು ಆ ಕಡೆಗೆ ಇರಲಿ, ನಮ್ಮ ಸಮುದಾಯದ ಯುವತಿ ಒಂದು ಭಕ್ತಿ ಗೀತೆಯನ್ನು ಹಾಡಿದಳಲ್ಲಾ ಅನ್ನೋ ಹೆಮ್ಮೆ ಇರಬೇಕಿತ್ತು ಆದ್ರೆ ನಿಮಗೆ ಸಹಿಸಲಾರದ ದುಖಃ ತರಿಸಿದೆ ಅನ್ನೋದೆ ದುರಂತ.. ಆದ್ರೆ ಸುಹಾನಾ ಛಲಗಾತಿ, ಯಾಕಂದ್ರೆ ಆಡಿಷನ್ ನಡೆಯುವಾಗಲೇ ಒಂದು ಮಾತನ್ನಾಡಿದ್ದಾಳೆ.. ನನಗೆ ಯಾವುದೇ ಕಟ್ಟುಪಾಡುಗಳಿಲ್ಲ, ನನ್ನ ಪ್ರತಿಭೆಯನ್ನು ತೋರಿಸಿಕೊಳ್ಳಲು ಯಾವುದೇ ಹಿಂಜರಿಕೆ ಇಲ್ಲ.. ನನ್ನನ್ನು ನೋಡಿದ ಮೇಲಾದ್ರು ಇನ್ನೂ ಹಲವಾರು ಪ್ರತಿಭೆಗಳು ಬೆಳಕಿಗೆ ಬರಲಿ, ಕತ್ತಲಲ್ಲೇ ಕಮರಿ ಹೋಗಬಾರದು ಅನ್ನೋ ಅರ್ಥದಲ್ಲಿ ಹೇಳಿದ್ದಾರೆ.. ಇದು ಅಪ್ಪಟ ಸತ್ಯ.. ಯಾಕಂದ್ರೆ ಎಲ್ಲಾ ಸಮುದಾಯಗಳಲ್ಲೂ ಇತ್ತೀಚಿನ ದಿನಗಳಲ್ಲಿ ಸಾಕಷ್ಟು ಬದಲಾವಣೆ ಆಗಿದ್ದರೂ, ಮುಸ್ಲಿಂ ಸಮುದಾಯದಲ್ಲಿ ಮಾತ್ರ ಅದೇ ಕಟ್ಟುಪಾಡುಗಳನ್ನು ಪಾಲಿಸಲಾಗ್ತಿದೆ..

suhana2

ಸುಹಾನಾ ತಂದೆ ತಾಯಿ ಶಿಕ್ಷಿತ ಕುಟುಂಬದಿಂದ ಬಂದಿದ್ದು, ಪೋಷಕರಿಬ್ಬರೂ ಶಿಕ್ಷಕರಾಗಿದ್ದಾರೆ.. ಅವರಿಗೆ ತಮ್ಮ ಮಗಳನ್ನು ಏನನ್ನು ಮಾಡುತ್ತಿದ್ದಾಳೆ ಅನ್ನೋ ಅರಿವು ಚೆನ್ನಾಗಿದೆ.. ಅಷ್ಟೆಲ್ಲಾ ಇದ್ದರೂ ಧರ್ಮ ಅನ್ನೋ ಏಕೈಕೆ ಅಸ್ತ್ರ ಹಿಡಿದುಕೊಂಡು ಒಂದು ಹೆಣ್ಣನ್ನು ಅಪಮಾನ ಮಾಡುತ್ತಿದ್ದೀನಿ.. ಈ ನಿಮ್ಮ ಮಾತಿಗೆ ಆ ಅಲ್ಲಾಹು ಶಿಕ್ಷೆ ಕೊಡುವುದಿಲ್ಲವೇ..? ಹೆಣ್ಣನ್ನು ಗೌರವಿಸಿ ಅಂತಾ ಕುರಾನ್‍ನಲ್ಲಿ ಸ್ಪಷ್ಟವಾಗಿ ಹೇಳಿದ್ದಾರೆ ಅಲ್ಲವೇ..? ಪಾಕಿಸ್ತಾನದಲ್ಲಿ ಮಲಾಲಾ ಎಂಬಾಕೆ ಶಿಕ್ಷಣ ನಿರಾಕರಿಸುವ ಜನರನ್ನು ಎದುರಿಸಿ ಬಂದು ಹೆಣ್ಣು ಮಕ್ಕಳಿಗೆ ಶಿಕ್ಷಣ ನೀಡಿ ಎಂದಾಗ ತಾಲೀಬಾನಿಗಳು ತೀವ್ರವಾಗಿ ವಿರೋಧಿಸಿದ್ದರು.. ಅವರು ಅಲ್ಲಿ ಮಾಡಿದ ತಪ್ಪನ್ನೇ ನೀವು ಇಲ್ಲಿ ಮಾಡುತ್ತಿದ್ದೀರಿ ಎಂದರೆ ತಾಲಿಬಾನಿಗಳಿಗೂ ನಿಮಗೂ ಇರುವ ವ್ಯತ್ಯಾಸವಾದರೂ ಏನು..? ಒಮ್ಮೆ ನೀವೇ  ಪ್ರಶ್ನೆ ಮಾಡಿಕೊಳ್ಳಿ ಸ್ನೇಹಿತರೇ..!

malalaಅಭಿನಯಿಸುವುದು , ಟಿವಿಯಲ್ಲಿ ಬಂದು ಬಹಿರಂಗವಾಗಿ ಮಾತನಾಡುವುದು ಧರ್ಮ ವಿರೋಧ ಎನ್ನುವ ನೀವುಗಳು ಅದೇ ಸಲ್ಮಾನ್ ಖಾನ್, ಶಾರುಖ್ ಖಾನ್, ಅಮೀರ್ ಖಾನ್ ತೆರೆ ಮೇಲೆ ಬಂದಾಗ ಶಿಳ್ಳೆ ಹೊಡೆದು ಕೇಕೆ ಹಾಕುವುದಿಲ್ಲವೇ..? ಪವಿತ್ರ ಇಸ್ಲಾಂ ಧರ್ಮ ಪುರುಷರಿಗೆ ಒಂದು ರೀತಿ, ಹೆಣ್ಣು ಮಕ್ಕಳಿಗೆ ಒಂದು ರೀತಿ ಇದೆಯೇ..?ಭಗವಂತ ಪಕ್ಷಪಾತಿಯಾಗಲು ಸಾಧ್ಯವೇ ? ಭೇಧವೆಣಿಸದ ಉದಾತ್ತನಲ್ಲವೇ ?

ಹೆಣ್ಣಾದ ಮಾತ್ರಕ್ಕೆ ಸಮಾಜದಲ್ಲಿ ಮಾತನಾಡುವುದು ತಪ್ಪು ಎಂದರೆ ಸಂವಿಧಾನ ಕೊಟ್ಟಿರುವ ಹಕ್ಕನ್ನು ಕಿತ್ತುಕೊಂಡಂತೆ ಆಗುವುದಿಲ್ಲವೇ.. ಇಂದು ಒಬ್ಬ ಸುಹಾನ ಎತ್ತಿರುವ ಪ್ರಶ್ನೆಯನ್ನು ಸಮಾಜದ ಎಲ್ಲಾ ಮನೆಯ ಹೆಣ್ಣು ಮಕ್ಕಳು ಕೇಳಿದರೆ ತಂದೆ ತಾಯಿಗಳಾದ ನೀವುಗಳು ಒಪ್ಪುವುದಿಲ್ಲವೇ..? ಕೆಟ್ಟ ಕೆಲಸ ಮಾಡುವುದಕ್ಕೆ ಎಲ್ಲಾ ಧರ್ಮದಲ್ಲೂ ವಿರೋಧವಿದೆ.. ಹಾಗಂದ ಮಾತ್ರಕ್ಕೆ ಕೆಟ್ಟ ಕೆಲಸಗಳು ನಿಂತಿವೆ ಎಂದರ್ಥವೇ..? ಇಲ್ಲ ಗೆಳೆಯರೇ ಎಲ್ಲಾ ಧರ್ಮದಲ್ಲೂ ಒಳ್ಳಯವರು ಕೆಟ್ಟವರು ಇದ್ದೇ ಇರುತ್ತಾರೆ.. ಅದೇ ರೀತಿ ಕೆಟ್ಟವರು ಇರುತ್ತಾರೆ.. ಇದನ್ನು ಬಹಿರಂಗವಾಗಿ ಒಪ್ಪಿಕೊಳ್ಳಲು ಆಗದಿದ್ದರೆ ನಿಮ್ಮ ಮನಸ್ಸನ್ನು ಒಮ್ಮೆ ಮುಟ್ಟಿ ಕೇಳಿಕೊಳ್ಳಿ ಸತ್ಯ ಗೊತ್ತಾಗುತ್ತದೆ..
ಸುಹಾನಾ ಎಂದರೆ ಸುಮಧುರ ಹಾಡುಗಳನ್ನು  ಹಾಡುವ ನಾರಿ ಎಂದರ್ಥ.. ಮಲೆನಾಡಿನ ಸೈಯದ್ ಮುನೀರ್ ಹಾಗೂ ನಸ್ರೀನ್ ಪರ್ವಿನ್ ಅವರ ಪುತ್ರಿ ಯಾವುದೋ ಘೋರ ಅಪರಾಧ ಮಾಡಿದ್ದಾರೆ ಎಂದು ಹೆಣ್ಣನ್ನು ಕೀಳಾಗಿ ಕಾಣುವ ಬದಲು ಆಕೆ ನಿಮ್ಮ ಮನೆ ಹುಡುಗಿ ಎಂದು ಪ್ರೀತಿಸಿ, ಸಾಧ್ಯವಾದರೆ ಆಕೆಯನ್ನು ಬೆಂಬಲಿಸಿ.. ಇಲ್ಲದಿದ್ದರೆ ತೆಪ್ಪಗೆ ನಿಮ್ಮ ಕೆಲಸವನ್ನು ನೀವು ನೋಡಿಕೊಳ್ಳಿ.. ಇನ್ನೊಬ್ಬರನ್ನು ಹಿಯ್ಯಾಳಿಸುವುದಕ್ಕಿಂತ ತಾನು ಸಮಾಜಕ್ಕೆ ಏನು ಕೊಡುಗೆ ಕೊಟ್ಟಿದ್ದೇನೆ ಅನ್ನೋದನ್ನು ನೋಡಿಕೊಳ್ಳಿ.. ಈಗಾಗಲೇ ಹಿಂದಿ ಸರಿಗಮಪ ಕಾರ್ಯಕ್ರಮದಲ್ಲಿ ಅನೇಕ ಮುಸ್ಲಿಂ ಹೆಣ್ಣು ಮಕ್ಕಳು ಹಾಡಿದ್ದಾರೆ, ಅದೇ ರೀತಿ ಅದೆಷ್ಟೋ ಪಾಕಿಸ್ತಾನಿ ಯುವತಿಯರು ಬಂದು ಹಾಡಿ ಹೋಗಿದ್ದಾರೆ.. ಕಲೆಗೆ ಧರ್ಮ, ಜಾತಿ, ಸಂಪ್ರದಾಯ, ಉಡುಗೆ ತೊಡುಗೆಯ ಅಡ್ಡಿಯಿಲ್ಲ.. ಅವರು ರಾಮನನ್ನು ಭಜಿಸಿದ್ರೆ ಹಿಂದು, ಅಲ್ಲಾಹುನನ್ನ ನೆನೆದರೆ ಮುಸ್ಲಿ, ಯೇಸುವನ್ನು ಆರಾಧಿಸಿದರೆ ಏಸು..
ಇನ್ನೊಂದು ನೀವು ಹೆಮ್ಮೆ ಪಡುವ ವಿಚಾರ ಅಂದ್ರೆ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತದ ಮೂಲ ಇಸ್ಲಾಂ.. ಅದೂ ಅಲ್ಲದೆ ಮುಸ್ಲಿಂ ಹಾಡುಗಾರರ ಪಟ್ಟಿ ನೋಡುವುದಾದರೆ ಮಹೇರ್ ಜಾಯ್ನ್, ಸಮಿ ಯೂಸಫ್, ಮಹಮದ್ ರಫಿ, ಜಾಯ್ನ್ ಮಲ್ಲಿಕ್,  ಇಮ್ರಾನ್ ಖಾನ್, ಅತೀಫ್ ಅಸ್ಲಾಮ್ ಹೀಗೆ ಪಟ್ಟಿ ಬೆಳೆಯುತ್ತಲೇ ಸಾಗುತ್ತದೆ.. ಈ ಹಾಡುಗಾರರ ಮಕ್ಕಳು, ಹೆಣ್ಣುಮಕ್ಕಳು ನಾನು ಹಾಡು ಹಾಡುತ್ತೇನೆ ಎಂದರೆ ಬೇಡ ಎನ್ನುತ್ತಾರೆಯೇ..? ಯೋಚನೆ ಮಾಡಿ ಉತ್ತರ ಕಂಡುಕೊಳ್ಳುವ ಪ್ರಯತ್ನ ಮಾಡಿ..

suhana5

ನಾನು ಬರೆದಿರುವ ಅಭಿಪ್ರಾಯ ಸರಿಯಾಗಿದೆ ಎನ್ನುವುದಾದರೆ ನೀವು ನೂರಾರು ಜನರಿಗೆ ಇದನ್ನು ಶೇರ್ ಮಾಡುವ ಮೂಲಕ ಬೆಂಬಲಿಸಿ.. ಸುಹಾನ ನೀನು ಹಾಡುವಷ್ಟೂ ದಿವಸ ನಾನು ಸರಿಗಮ ನೋಡುತ್ತೇನೆ ಗೆಳತಿ.. ನೀನಿಟ್ಟ ಹೆಜ್ಜೆ ಹಿಂದಿಡಬೇಡ.. ಮುನ್ನುಗ್ಗು ನಿನ್ನ ಸಾಧನೆಯ ಹಾದಿ ದೊಡ್ಡದಾಗಿರಲಿ.. ನೀನಂದು ಹೇಳಿದ ಮಾತುಗಳು, ಶಿವಮೊಗ್ಗದಲ್ಲಿ ಸೃಷ್ಠಿಯಾಗಿದ್ದ ಕೋಮು ವಿಚಾರ, ಸ್ಕಾರ್ಪ್ ಕಟ್ಟಿಕೊಳ್ಳುವ ವಿಚಾರವನ್ನು ಮರೆಸಿ ನಾವೆಲ್ಲರೂ ಒಂದು ಅನ್ನೋ ಭಾವನೆಯನ್ನು ಹುಟ್ಟು ಹಾಕಿದೆ.. ಇದೇ ನೀನು ಸಾಧಿಸಿದ್ದು.. ನಿನ್ನ ದಾರಿ ಸರಿಯಾಗಿದೆ. ಕಹಿಗಳನ್ನು ಕರಗಿಸುವ ಕಲೆಯ ಮೂಲಕ ಮುನ್ನಡೆ.. ನಾವಿದ್ದೇವೆ ಸದಾ ನಿನ್ನೊಂದಿಗೆ.. 

ಜೋಮ, ಶಿವಮೊಗ್ಗ

ಕೆನಡಾ ಸೇರಿದರು ಕಾಡುವ “ನಟಸಾರ್ವಭೌಮ”ನ ನಂಟು

ಒಂದು ದೇಶ ಅಥವಾ ನಾಡು ಅಂದರೆ ಅದು ಕೇವಲ ಗಡಿರೇಖೆಗಳ ನಡುವೆ ಹರಡಿಕೊಂಡಿರುವ  ಒಂದಷ್ಟು ನೆಲ ಮಾತ್ರ  ಅಲ್ಲ !! ಅದು ,ವಾಸ್ತವವಾಗಿ ಆ ಒಂದು ಪ್ರದೇಶದ ಇತಿಹಾಸ, ಭಾಷೆ , ನಂಬಿಕೆಗಳು, ಅದರದೇ ಆದ ಜನಪದ, ಕಲೆ ,ಉಡುಪು ,ಆಹಾರ ಪದ್ದತಿ, ಪೂಜೆ , ಹಬ್ಬ ಹರಿದಿನ,  ಜಾತ್ರೆ  ಇತ್ಯಾದಿ ಆಚರಣೆಗಳು, ಮನುಷ್ಯಸಂಬಂಧಗಳ ಸ್ವರೂಪಗಳು , ಇಂಥ ಎಷ್ಟೋ   ಸೂಕ್ಷ್ಮ ಹಾಗೂ ಮಹತ್ವದ ಸಂಗತಿಗಳ  ಸಮ್ಮಿಲನದಿಂದ  ಹೊರಹೊಮ್ಮುವ ಒಂದು ನಿರ್ದಿಷ್ಟ “ಸಂಸ್ಕ್ರುತಿ” ಅನ್ನುವುದರ ಒಟ್ಟಾರೆ ಹೆಸರು  !  ” ದೇಶಮಂಟೆ ಮಟ್ಟಿ ಕಾದುರಾ ”  ! (ದೇಶವೆಂದರೆ ಬರೀ ಮಣ್ಣಲ್ಲವೋ !)ಅನ್ನುವ ತೆಲುಗಿನ ಖ್ಯಾತ ಕವಿಯೊಬ್ಬ ಇದೆಲ್ಲವನ್ನೂ ಒಂದೇ ಮಾತಿನಲ್ಲಿ ಎಷ್ಟು ಚೆನ್ನಾಗಿ ಹೇಳಿದ್ದಾನೆ ನೋಡಿ !!
ಹಾಗಾಗಿ , ಯಾವುದೇ ಒಂದು ನಾಡಿನ /ದೇಶದ  , ಸಾಹಿತ್ಯ ಸಂಗೀತ  ನೃತ್ಯ ನಾಟಕ ಸಿನಿಮಾ ಮೊದಲಾದ ಕಲಾ ಪ್ರಕಾರಗಳ ಬೇರುಗಳು ಅದರ ಸಂಸ್ಕ್ರುತಿಯಲ್ಲಿ   ಮಾತ್ರವೇ ಅಡಗಿರುವುದು , ಇರಲು ಸಾಧ್ಯವಾಗವುದು   ಇದೆಲ್ಲಾ ಸಹಜ ಸತ್ಯವೇ ತಾನೆ ?
ಆವೆಲ್ಲದರಲ್ಲಿ ಈ ಸಿನಿಮಾ ಅನ್ನುವ ಮಾಧ್ಯಮ, ತನ್ನ ಅತಿ  ಹೆಚ್ಚು ಜನರನ್ನು ತಲುಪುವ ಶಕ್ತಿ, ತನ್ನ ವ್ಯಾಪ್ತಿ, ಉಂಟುಮಾಡುವ ಪರಿಣಾಮ, ಒದಗಿಸುವ ಮನರಂಜನೆ ಈ ಎಲ್ಲ ಕಾರಣಗಳಿಂದ , ಉಳಿದೆಲ್ಲ ಮಾಧ್ಯಮಗಳಿಗಿಂತ ಅತ್ಯಂತ ಹೆಚ್ಚು ಪರಿಣಾಮಕಾರಿ ಹಾಗೂ ಪ್ರಭಾವಶಾಲೀ ಮಾಧ್ಯಮ ಅನ್ನಿಸಿಕೊಳ್ಳುತ್ತದೆ.! ಅದಕ್ಕೇ ಒಂದು ಸಿನಿಮಾ, ಆಯಾ ಕಾಲಘಟ್ಟದ ಬದುಕು, ಮನುಷ್ಯ ಸಂಬಂಧಗಳು, ಸಾಮಾಜಿಕ ನಂಬಿಕೆ ಮತ್ತು ಆಚರಣೆಗಳು ಇವೆಲ್ಲಕ್ಕೂ ಹಿಡಿದ ಕನ್ನಡಿ ಅನ್ನುವ ಒಂದು  ಮಾತಿದೆ !
ಈ ಎಲ್ಲ ಹಿನ್ನೆಲೆಯಲ್ಲಿ ನೋಡಿದಾಗಲಷ್ಟೇ , ಆಯಾ ಕಾಲಘಟ್ಟದ ಚಲನ ಚಿತ್ರ  ನಿರ್ಮಾಪಕರು , ಕಥಾ ಲೇಖಕರು, ಸಂಭಾಷಣೆಕಾರರು, ಸಂಗೀತ ಸಂಯೋಜಕರು, ಗೀತರಚನಕಾರರು, ಎಲ್ಲಕ್ಕೂ ಮುಖ್ಯವಾಗಿ ಆ ಚಿತ್ರಗಳ ಸೂತ್ರಧಾರರಾಗಿದ್ದ ನಿರ್ದೇಶಕರುಗಳು ,ಆ ಪಾತ್ರಗಳನ್ನು ತೆರೆಯಮೇಲೆ ಜೀವಂತಗೊಳಿಸುತ್ತಿದ್ದ ನಾಯಕ ನಟ ನಟಿಯರು , ಪೋಷಕ ನಟ ನಟಿಯರು ಹೀಗೆ ಇವರೆಲ್ಲರ ಪಾತ್ರ ಎಷ್ಟು ಮಹತ್ವದ್ದು ಅನ್ನುವುದು ಅರಿವಾಗುತ್ತದೆ ! ಹೀಗಾಗಿ , ಕಥಾನಾಯಕನ/ನಾಯಕಿಯ ಪಾತ್ರ ವಹಿಸುವ ನಟ ಅಥವಾ ನಟಿ ,ಅಥವಾ ಯಾವುದೇ  ಪೋಷಕಪಾತ್ರವನ್ನು ವಹಿಸುವ ನಟ ನಟಿಯರಿಗೆ , ಪ್ರತಿಭೆಯ ಜೊತೆಗೆ , ಆ ಪಾತ್ರವನ್ನು ಅದರ ಸಾಮಾಜಿಕ ಆರ್ಥಿಕ ಹಾಗೂ ಸಾಂಸ್ಕೃತಿಕ ನೆಲೆಗಟ್ಟಿನಲ್ಲಿ ಗ್ರಹಿಸಲು ಬೇಕಾಗುವ ಆ ಒಂದು ವಿಶಿಷ್ಟ ವ್ಯಕ್ತಿತ್ವ , ನೈಜ ಬದುಕಿನ ದರ್ಶನ ,ಅನುಭವ , ಇವೆಲ್ಲವೂ  ಇರಬೇಕಾದದ್ದು ಅವಶ್ಯ ಹಾಗೂ ಅನಿವಾರ್ಯ ಅನ್ನಿಸಿಕೊಳ್ಳುತ್ತದೆ !! ! ಆ ಗ್ರಹಿಕೆಯಿಲ್ಲದೆ ಹೋದರೆ ,ತನ್ನಲ್ಲಿ ಎಷ್ಟೇ ಪ್ರತಿಭೆಯಿದ್ದರೂ , ಆ  ಪಾತ್ರವೇ ಆಗಿಬಿಡುವ   ಪರಾಕಾಯಪ್ರವೇಶದಂಥ ಆ ನಿರ್ದಿಷ್ಟ ಪ್ರಕ್ರಿಯೆ , ವಿಫಲವಾಗಿ ಹೋಗುತ್ತದೆ !
ಈ ಕೋನದಿಂದ ನೋಡಿದಾಗ  ನಮ್ಮ ಚಲನಚಿತ್ರೋದ್ಯಮವನ್ನು  1954 ರಲ್ಲಿ ಪ್ರವೇಶಿಸಿ, ನಂತರ ಸತತ ಐದು ದಶಕಗಳ ಕಾಲ  ,ತನ್ನ ಅಪ್ರತಿಮ ಪ್ರತಿಭೆಯಿಂದ  ವೈವಿಧ್ಯಮಯ ಪಾತ್ರಗಳನ್ನು ಅತ್ಯಂತ ಸಮರ್ಥವಾಗಿ ನಿರ್ವಹಿಸಿದ ರಾಜ್ಕುಮಾರ್  ಅನ್ನುವ  ಒಬ್ಬ ನಟ  ,  ಕನ್ನಡ ಸಂಸ್ಕ್ರುತಿಗೆ ನೀಡಿದ ಕೊಡುಗೆ ಎಷ್ಟು ಅಮೂಲ್ಯ ಅನ್ನುವ ಸಂಗತಿ ಅರ್ಥವಾಗುತ್ತದೆ ! .
ರಾಜ್ಕುಮಾರ್ ಅವರ  ‘ ವ್ರುತ್ತಿಜೀವನದ ಅವಧಿ ‘ , ಮತ್ತು  ನಮ್ಮ ಕನ್ನಡದ ಶ್ರೇಷ್ಟ ಚಲನಚಿತ್ರ ನಿರ್ಮಾಪಕರು ,  ಸಾಹಿತಿಗಳು, ಸಂಭಾಷಣೆಕಾರರು, ಗೀತ ರಚನಕಾರರು, ಸಂಗೀತ ನಿರ್ದೇಶಕರುಗಳು, ಮತ್ತು ಎಲ್ಲಕ್ಕೂ ಮಖ್ಯವಾಗಿ  ಶ್ರೇಷ್ಠ ದರ್ಜೆಯ   ಚಿತ್ರನಿರ್ದೇಶಕರುಗಳು ಇದ್ದ ಆ ಅವಧಿ ,  ಈ ಎರಡೂ ಒಟ್ಟುಗೂಡಿದ್ದರಿಂದಲೇ  , ಅದು   ರಾಜ್ಕುಮಾರ್ ಪಾಲಿಗೂ ಮತ್ತು ಮತ್ತು ಕನ್ನಡ ಸಿನಿಮಾ ಪ್ರೇಕ್ಷಕರ ಪಾಲಿಗೂ ಸುವರ್ಣಯುಗ ಅನ್ನಿಸಿಕೊಳ್ಳಲು  ಸಾಧ್ಯವಾಯಿತು !
ಈ  ರಾಜ್ಕುಮಾರ್ , ಕನ್ನಡ ಚಿತ್ರರಂಗದ ಸುವರ್ಣ ಯುಗವಾದ 50 ರಿಂದ 90 ರ ದಶಕದ ಆರಂಭದವರೆಗೂ ಮೆರೆದ  ನಂಬರ್ ಒನ್ ನಾಯಕ ನಟ ಆಗಿದ್ದು ಆಕಸ್ಮಿಕವಲ್ಲ ! ಯಾಕೆಂದರೆ ,  ಆ ಐದು ದಶಕಗಳಲ್ಲಿ ಕನ್ನಡ ಚಿತ್ರರಂಗ ,  ಭಕ್ತಿಪ್ರಧಾನ, ಪೌರಾಣಿಕ, ಐತಿಹಾಸಿಕ, ಜಾನಪದ, ಸಾಮಾಜಿಕ , ಕೌಟುಂಬಿಕ ಹೀಗೆ ಎಲ್ಲ ಬಗೆಯ ಚಿತ್ರಗಳನ್ನು  ತಯಾರಿಸುತ್ತಿತ್ತು ! ಆ ಸಿನಿಮಾಗಳು ನಮ್ಮ ನಾಡಿನ ಕನ್ನಡತನವೆಂಬ ಒಂದು ನಿರ್ದಿಷ್ಟ  ಸಂಸ್ಕೃತಿಯ ಸೊಗಡಿನಿಂದ ಕೂಡಿರುತ್ತಿದ್ದವು ! ಆ ಕಥೆಗಳಾಗಲೀ ಪಾತ್ರಗಳಾಗಲೀ ಈ ಮಣ್ಣಿನಿಂದ ನೇರ ಹುಟ್ಟಿದಂತೆ ಇರುತ್ತಿದ್ದವು . ಅದೇ ಸಮಯಕ್ಕೆ ಸರಿಯಾಗಿ  ,ಈ ಎಲ್ಲ ವೈವಿಧ್ಯಮಯ ಪಾತ್ರಗಳನ್ನೂ ಅತ್ಯಂತ ಸಮರ್ಥವಾಗಿ ನಿರ್ವಹಿಸುವ ದೈತ್ಯ ಪ್ರತಿಭೆ , ರಾಜ್ಕುಮಾರ್ ಅನ್ನುವ ಆ ಒಬ್ಬ ನಟನಲ್ಲಿ ಇತ್ತು !! ! ಹೀಗೆ ,  ಈ ಎರಡೂ  ಸಂಗತಿಗಳ ಸಂಗಮದ ಫಲವಾಗಿ ಐದು ದಶಕಗಳ ಕಾಲ ,ಲೆಕ್ಕವಿಲ್ಲದಷ್ಟು   ಅದ್ಭುತ ಸಿನಿಮಾಗಳನ್ನು ನೋಡುವ ಭಾಗ್ಯವೂ ಕನ್ನಡ ಜನತೆಗೆ ಲಭ್ಯವಾಯ್ತು .
 ಅದರದೇ   ಆದ  ಒಂದು ವಿಶೇಷ ಮೌಲ್ಯ ವ್ಯವಸ್ಥೆಯ ಕಾರಣದಿಂದ   ,ಯಾವುದೇ ಸಮಾಜದ ಸಂಸ್ಕೃತಿಯಲ್ಲಿ, ಮಧ್ಯಮವರ್ಗದ ಸಂಸ್ಕೃತಿಗೆ  ಬಹಳ ಮಹತ್ವದ ಸ್ಥಾನವಿದೆ ! ಆ ಮಧ್ಯಮವರ್ಗದ ಮೌಲ್ಯಗಳಲ್ಲಿ ಅದ್ದಿ ತೆಗೆದಂಥ  ಸಾಮಾಜಿಕ ಚಿತ್ರಗಳ ಆ ಆದರ್ಶ ತಂದೆ ,ಮಗ ,ಅಣ್ಣ , ಸ್ನೇಹಿತ ,ಅಧಿಕಾರಿ , ಆದರ್ಶ ಪ್ರೇಮಿ ಇವೆಲ್ಲ ಪಾತ್ರಗಳಿಗೆ ರಾಜ್ಕುಮಾರ್ ಜೀವ ತುಂಬುತ್ತಿದ್ದ ಆ ಪರಿ ನಿಜಕ್ಕೂ ಮರೆಯಲಾಗದಂಥದ್ದು.
ಸುಖಜೀವನದ ಮಾನವ ಸಹಜ ಬಯಕೆಯ  ಕಾರಣದಿಂದ ,ಪಟ್ಟಣಕ್ಕೆ ವಲಸೆ ಬಂದು ,ಅಲ್ಲಿನ ಕೃತ್ರಿಮತೆಗೆ ಬಲಿಯಾಗಿ ಭ್ರಮನಿರಸನಹೊಂದುವ ,  “ದೂರದ ಬೆಟ್ಟ ‘  ಚಿತ್ರದ ಆ   ಮುಗ್ದ ಕಮ್ಮಾರ ಶಿವು , ಮುರಿದುಹೋದ ಅಕ್ಕನ ಬಾಳನ್ನು ಅವಳ ಸಂಸಾರವನ್ನು ಎತ್ತಿ ನಿಲ್ಲಿಸುವ ಛಲದಿಂದ ಹಳಿಯಲ್ಲೇ ನೆಲೆಗೊಂಡು ,ಕೃಷಿಕನಾಗಿ ದುಡಿದು , ಬಂಜರು ಭೂಮಿಯಲ್ಲಿ ಬಂಗಾರ ಬೆಳೆದು ,ಅಕ್ಕನ ಮಕ್ಕಳ ಬಾಳನ್ನು ಬೆಳಗಿ ಅಂತಿಮವಾಗಿ ಅವರ ಸಣ್ಣ ತನ , ಆರೋಪ , ದೂಷಣೆಯ  ಮಾತುಗಳಿಂದ  ನೊಂದು  ಮನೆಯಿಂದ ಶಾಶ್ವತವಾಗಿ ಎಲ್ಲಿಗೋ ಹೊರಟುಹೋಗುವ ಬಂಗಾರದ ಮನುಷ್ಯದ  ‘ರಾಜೀವ ‘ , ಈ ನೆಲದ ದೊರೆಗಳಾದ   ರಣಧೀರ ಕಂಠೀರವ , ಕೃಷ್ಣದೇವರಾಯ  ಪುಲಕೇಶಿ ಮಯೂರ , ಗಂಧದಗುಡಿಯ ಆ ಪ್ರಾಮಾಣಿಕ ಅಧಿಕಾರಿ ಆನಂದ್ , ಸಾಕ್ಷಾತ್ಕಾರದ  ಆದರ್ಶ ಮಮತಾಮಯಿ  ‘ಮಹೇಶ್ ‘ , ಹಾಲು ಜೇನುವಿನ ಆದರ್ಶ ಪ್ರೇಮಿ ‘ ರಂಗ ‘, ,ಸಮಯದ ಗೊಂಬೆಯ ಆದರ್ಶಮಯಿ ಅಣ್ಣ ,ಗುರು, ಎರಡು ಕನಸು ಸಿನಿಮಾದ ಭಗ್ನ ಪ್ರೇಮಿ ಲೆಕ್ಚರರ್  ರಾಮಚಂದ್ರರಾವ್ , ನಾನಿನ್ನ ಮರೆಯಲಾರೆಯ ಅದ್ಭುತ ಪ್ರೇಮಿ ಆನಂದ್ ,  ಸಾಹುಕಾರನ ಸಂಪತ್ತಿಗೆ ಸವಾಲೆಸೆದು ಗೆಲ್ಲುವ  ಸಂಪತ್ತಿಗೆ ಸವಾಲ್ ಸಿನಿಮಾದ , ಆ ನೇರ ನಡೆ ನುಡಿಯ ಪ್ರಾಮಾಣಿಕ  ಹಾಗೂ ಸ್ವಾಭಿಮಾನಿ ಭದ್ರ , ಒಂದೇ ಎರಡೇ ರಾಜ್ಕುಮಾರ್ ಜೀವಂತಗೊಳಿಸಿದ , ಮರೆಯಲಾರದ ಆ  ಪಾತ್ರಗಳು ! ಆ ಎಲ್ಲಾ ಪಾತ್ರಗಳಲ್ಲಿ   ವೇಷಭೂಷಣ , ಮಾತು , ಧೋರಣೆ , ಸಂಭಾಷಣೆಯ ಶೈಲಿ ,ಈ ಪಾತ್ರ ಪೋಷಣೆಯ ವಿವರಗಳಲ್ಲಿ  ಕನ್ನಡತನವೆನ್ನುವುದು ತುಂಬಿತುಳುಕುತ್ತಿತ್ತು .
ರಾಜ್ಕುಮಾರ್   ಆ ಪಾತ್ರಗಳನ್ನು ಎಷ್ಟುಚೆನ್ನಾಗಿ ಗ್ರಹಿಸುತ್ತಿದ್ದರು  ನೋಡಿ !    ಸೌಜನ್ಯದ ಮೂರ್ತಿಯಾಗಿದ್ದ  ಸತ್ಯಹರಿಶ್ಚಂದ್ರನಾಗಿದ್ದಾಗ   ಇರುವ ಬಾಡಿ ಲ್ಯಾನ್ಗ್ವೇಜ್ , ಮತ್ತು ಅದೇ ಹರಿಶ್ಚಂದ್ರ ಎಲ್ಲ ಕಳೆದುಕೊಂಡು      ಪುರಮಧ್ಯದಲ್ಲಿ ನಿಂತು ಹೆಂಡತಿಯನ್ನು  ಹರಾಜುಹಾಕುವಾಗ ,ಸ್ಮಶಾನ ಕಾಯುವ ಆಳಾಗಿ ತನ್ನ ದನಿಯೆದುರು ನಿಲ್ಲುವಾಗ ಅವರ ಬಾಡಿ ಲ್ಯಾನ್ಗ್ವೇಜ್  ಎಷ್ಟು ಅದ್ಭುತವಾಗಿ ಬದಲಾಗುತ್ತದೆ ಅಂದರೆ , ವಿನೀತ ಭಾವ ಅಂದರೆ ಏನು ,ಅದನ್ನ ನಟನೆಯಲ್ಲಿ ಹೇಗೆ ತೋರಿಸಬೇಕು ಅನ್ನುವುದಕೆ ಅದು ಉದಾಹರಣೆಯಂತಿದೆ !
ಎರಡು ಕನಸು ಸಿನಿಮಾದಲ್ಲಿ ಲೆಕ್ಚರರ್ ಆಗಿ ಕ್ಲಾಸ್ ರೂಮ್ ನಲ್ಲಿ ವಿದ್ಯಾರ್ಥಿಗಳ ಎದುರು ನಿಲ್ಲುವ ಭಂಗಿ ಯಾವ ನಿಜವಾದ ಲೆಕ್ಚರರ್ ಗೆ ಕಡಿಮೆಯಿದೆ ? ಒಲಗ ಊದುವವರು ಆ ಕೊಳವೆಯ ಬಾಯಿಗೆ ಇರುವ ಸಣ್ಣ ಪೀಪಿಯನ್ನು  ಆಗಾಗ  ಹೊರತೆಗೆದು ,ಅದರಲ್ಲಿ ಗಾಳಿ  ಊದಿ ಅದರೊಳಗೆ ಇರುವ ಎಂಜಲನ್ನುಹೊರತೆಗೆದು ಮತ್ತೆ ಅದನ್ನು ಓಲಗಕ್ಕೆ ಸಿಕ್ಕಿಸಿಕೊಂಡು  ಊದುತ್ತಾರಲ್ಲಾ ಆ ಸೂಕ್ಷ್ಮವನ್ನು ಕೂಡ ರಾಜ್ಕುಮಾರ್ ತಮ್ಮ ಅಭಿನಯದಲ್ಲಿ ಸೇರಿಸುತ್ತಾರೆಂದರೆ  ( ಶಹನಾಯಿ ನುಡಿಸುವ ಅಪ್ಪಣ್ಣ ನ ಪಾತ್ರದಲ್ಲಿ ) ಅದಿನ್ನೆಂಥ ಪಾತ್ರ ಗ್ರಹಿಕೆ ಆ ನಟನಿಗಿದ್ದಿರಬೇಕು !! ಇನ್ನು ಶಹನಾಯಿಯನ್ನು ಹಿಡಿದು ಕೂರುವ ಭಂಗಿ ,ನುಡಿಸುವಾಗ ಪಕ್ಕವಾದ್ಯದರ ಕಡೆ ನೋಡುವ ,ಮೆಲ್ಲಗೆ ದೇಹವನ್ನು ಊಗುವ ಆ ಅಭಿನಯ ಎಷ್ಟು ನೈಜ !!
ಅದೇ ಸಿನಿಮಾದಲ್ಲಿ ,ಅಪಣ್ಣನ ನುಡಿಸುವಿಕೆಯನ್ನು ಮೆಚ್ಚಿಕೊಂಡ  ಆ ಸಮಾರಂಭದ ಮುಖ್ಯ ಅತಿಥಿಯಾದ ಆ ಜಿಲ್ಲಾಧಿಕಾರಿಯು  ಊಟಕ್ಕೆ ಹೊರಡುವಾಗ – ” ನೀನೂ ಬಾ ಅಪ್ಪಣ್ಣ’  ಅಂತ ತಮ್ಮ ಜೊತೆ ಊಟಕ್ಕೆ ಕೂಡಲು ಕರೆದಾಗ  , ಎಷ್ಟೊಂದು ಸಂಕೋಚದಿಂದ ತನ್ನ ಸ್ಥಾನದ ಕೀಳರಿಮೆಯನ್ನು ತೋರಿಸುತ್ತಾ,ದೇಹವನ್ನು ಕುಗ್ಗಿಸಿ ,   ‘ ಇಲ್ಲ ತಾವು ದಯಮಾಡಿಸಿ ನಮ್ಮದು ಆಮೇಲೆ  ‘ ಅನ್ನುವ ಮಾತನ್ನು ಅಪ್ಪಣ್ಣನ ಪಾತ್ರದ ರಾಜುಕುಮಾರ್ ಆಡುತ್ತಾರೆ ಅಂದರೆ ,  ಅಯ್ಯೋ , ಒಲಗ ಊದುವ ಕೆಲಸದ ನಾನೆಲ್ಲಿ , ಜಿಲ್ಲಾಧಿಕಾರಿಯಾದ ನೀವೆಲ್ಲಿ ,ನಿಮ್ಮ ಜೊತೆ ಹೇಗೆ ಊಟಕ್ಕೆ ಕೂಡಲು ಸಾಧ್ಯ ಅನ್ನುವ  ಆ ಭಾವವನ್ನು ಕೇವಲ ಒಂದು ಸಾಲಿನ ಆ ಡೈಲಾಗ್ ನಲ್ಲಿ ರಾಜ್ಕುಮಾರ್ ತೋರಿಸುವ ಪರಿ ನಿಜಕ್ಕೂ ಅದ್ಭುತ ! ಒಬ್ಬ ನಟನಿಗೆ , ನಮ್ಮ ಸಮಾಜದ ಜಾತಿ ಅಂತಸ್ತು ಸಾಮಾಜಿಕ ಸ್ಥಾನಮಾನ ಇತ್ಯಾದಿ ವಾಸ್ತವಗಳ,ಜಾಡ್ಯಗಳ ,  ಒಟ್ಟಾರೆ ಈ ನೆಲದ ಸಂಸ್ಕೃತಿಯ ಆಳವಾದ ಹಾಗೂ  ಸೂಕ್ಷ್ಮವಾದ ಗ್ರಹಿಕೆಯಿದ್ದರೆ ಮಾತ್ರ ಅಂತ ನೈಜಾಭಿನಯ ,ಮತ್ತು ಪಾತ್ರವನ್ನು ತೆರೆಯಮೇಲೆ ಜೀವಂತಗೊಳಿಸುವಿಕೆ ಇವು ಸಾಧ್ಯ !
ಸಂಪತ್ತಿಗೆ ಸವಾಲ್ ಸಿನಿಮಾ . ಸಾಹುಕಾರನ ವಿರುದ್ಧ ಮಾತಾಡಿದ್ದಕ್ಕೆ ಅಣ್ಣನಿಂದ ಮನೆಯಿಂದ ಹೊರಹಾಕಲ್ಪಟ್ಟ ಭದ್ರ ನಿಗೆ ,ತಾಯಿ ಪ್ರೀತಿಯ ಅತ್ತಿಗೆ ,ಸಂಕಟ ಪಟ್ಟು ,ಕದ್ದು ಭದ್ರನ ಜೊತೆಗಾರನೊಬ್ಬನ ಮೂಲಕ ಊಟದ ಬುತ್ತಿ ಕಳಿಸಿರುತ್ತಾಳೆ . ಆಗ ಸ್ನೇಹಿತರ ಜೊತೆ ಕೂತಿದ್ದ ಭದ್ರನಿಗೆ ಅತ್ತಿಗೆಯ  ಆ ಮಮತೆ ಕಂಡು ಕಣ್ಣು ತುಂಬಿಬಂದು , ಬುತ್ತಿಯನ್ನು ಬಿಚ್ಚುತ್ತಾ  –  ‘ನಮ್ಮತ್ತಿಗೆಮ್ಮ ಅಂದ್ರೆ ದೇವ್ರು , ದೇವ್ರು  ಕಂಡ್ರೋ’  ಅನ್ನುವ ಮಾತು ಎಷ್ಟು ಹೃದಯಸ್ಪರ್ಷಿ !!
ಹೀಗೆ ಈ ಮಣ್ಣಿನಿಂದ ನೇರ ಹುಟ್ಟ್ಟಿದಂಥ ಆ ಎಲ್ಲ ಪಾತ್ರಗಳನ್ನೂ ಅತ್ಯಂತ ನೈಜವಾಗಿ ,ಸೂಕ್ತವಾದ  ಅಭಿನಯ ,ಭಾಷೆ ಮತ್ತು ದೇಹಭಾಷೆ ಇವುಗಳ ಮೂಲಕ ಅತ್ಯಂತ ಸಮರ್ಥವಾಗಿ ನಿರ್ವಹಿಸಿದ ರಾಜ್ಕುಮಾರ್ ಈ ನೆಲದ ಸಂಸ್ಕೃತಿಯ ರಾಯಭಾರಿಯೇ ಆಗಿಬಿಟ್ಟಿದ್ದರು ಅನ್ನುವುದು ಅತಿಶಯೋಕ್ತಿಯಾಗುವುದಿಲ್ಲ . ಕೆಲವಾರು ವರ್ಷಗಳ ಹಿಂದೆ, ನಮ್ಮ ಇಂಗ್ಲಿಷ್ ಪತ್ರಿಕೆಯೊಂದರ ಅಂಕಣಕಾರ , (Out look  ಪತ್ರಿಕೆಯ ಕಾಮತ್ ಅಥವಾ ಶೆನಾಯ್ ನೆನಪು ) ಆಗ ವಿಶ್ವ ಸುಂದರಿ ಪ್ರಶಸ್ತಿಗಳನ್ನು ಗೆದ್ದು ಭಾರೀ ಸುದ್ದಿಯಲ್ಲಿದ್ದ ಸುಶ್ಮಿತಾ ಸೇನ್ ಮತ್ತು ಐಶ್ವರ್ಯ ರೈ ಅವರನ್ನು ಹೊಗಳುವ ಭರದಲ್ಲಿ , ಅವರಿಬ್ಬರನ್ನು our cultural ambassadors ಅಂತ ಕರೆದಿದ್ದನ್ನು ಓದಿದಾಗ ನನಗೆ ಎಂಥ ಸಿಟ್ಟುಬಂದಿತ್ತು ಅಂತ ಈ ಲೇಖನ ಬರೆಯುವ ಈ ಕ್ಷಣ ನೆನಪಾಗುತ್ತಿದೆ ! ಅವರಿಬ್ಬರ ಸಾಧನೆಯನ್ನು ಗೌರವಿಸೋಣ . ಆದರೆ ,ಯಾವ ಭಾರತದ ಸಂಸ್ಕೃತಿಯ ರಾಯಭಾರವನ್ನು ಆ ಸ್ಪರ್ಧೆಯಲ್ಲಿ ಅವರು ಮಾಡಿದ್ದರೋ ?  ಒಂದು ಸಂಸ್ಕೃತಿ ಮತ್ತು ಅದನ್ನು ಪ್ರತಿನಿಧಿಸುವ  ಜನರ ಗುಣ ಪ್ರತಿಭೆಗಳು ಇವುಗಳ ಮಹತ್ವದ ಸ್ಪಷ್ಟ ಪರಿಕಲ್ಪನೆಯಿಲ್ಲದಿದ್ದರೆ  ಇಂಥ ಹಾಸ್ಯಾಸ್ಪದ ಮಾತು ಹುಟ್ಟದೆ ಇನ್ನೇನಾಗುತ್ತದೆ ?

ನೂರು ತುಂಬಿದರೂ ದೆಸೆ ಕಾಣದ ಮಲ್ಲಿಗೆಯ ಕವಿಮನೆ

ಹದಿನೆಂಟು ತುಂಬಿದರು ಶಾನುಭೋಗರ ಮಗಳಿಗೆ ಮದುವೆ ಇಲ್ಲ ಎಂದ ಕವಿ ನರಸಿಂಹಸ್ವಾಮಿಯವರು ಜನಿಸಿ ನೂರು ವರುಷವಾದರೂ ಅವರ ನೆನಪಿನಂಗಳ,ಆಡಿಬೆಳೆದ ಹುಟ್ಟಿದ ಮನೆ ಕಿಕ್ಕೇರಿಯಲ್ಲಿ ದೆಸೆಕಾಣದೆ ಉಳಿದಿದೆ. ಅದಕ್ಕೀಗ ವಯಸ್ಸಿನ ಭಾರ . ಪೊರೆವವರು ಇಲ್ಲದೆ ಈಗಲೋ ಆಗಲೋ ಎನ್ನುವ ಸ್ಥಿತಿ.

ksn house kikkeri

 

ನಾಡಿನ ತುಂಬೆಲ್ಲ ಮಲ್ಲಿಗೆಯ ಕಂಪನ್ನು ಕಾವ್ಯದಲ್ಲಿ ತುಂಬಿ ಪಸರಿಸಿದ ಕವಿ ನರಸಿಂಹಸ್ವಾಮಿ. ಅವರ ಕವಿತೆಗಳಿಗೆ ಮರುಳಾಗದವರು ಎಲ್ಲಿದ್ದಾರೆ ಹೇಳಿ? ದಾಂಪತ್ಯದಲ್ಲಿ ಪ್ರೇಮವೆಂದರೆ  ಕೆ ಎಸ್ ನ ಕವಿತೆಗಳ ಹಾಗಿರಬೇಕೆಂದು ಬಯಸಿದವರೆಷ್ಟೋ !! “ಒಂದು ಗಂಡಿಗೊಂದು ಹೆಣ್ಣು ಹೇಗೋ ಏನೋ  ಹೊಂದಿಕೊಂಡು ಕಾಣದೊಂದ ಕನಸ ಕಂಡು ಮಾತಿಗೊಲಿಯದಮೃತ ಉಂಡು ದುಃಖ ಹಗುರವೆನುತಿರೆ ಪ್ರೇಮವೆನಲು ಹಾಸ್ಯವೇನೆ ?” ಮರೆತ ಮನಸಿಗೂ ಮುದನೀಡುವ , ಕೇಳಿದಾಕ್ಷಣ ಅರಳಿಸುವ ಕವಿಗೆ ಇದ್ದಾಗಲೂ ನಾವು ಕೊಟ್ಟಿದ್ದು ಅಷ್ಟರಲ್ಲೇ ಇದೆ.

ksn with raj ಗೌರಿ ಚಿತ್ರದ “ಇವಳು ಯಾರು ಬಲ್ಲೆಯೇನು ” ಎಂಥ ಹಾಡು ! ಸಾಲದೆಂಬಂತೆ  ಮಲ್ಲಿಗೆ ಕವಿತೆಗಳನ್ನು ಆಧರಿಸಿ ಟಿ ಎಸ್ ನಾಗಾಭರಣ ನಿರ್ದೇಶಿಸಿದ “ಮೈಸೂರು ಮಲ್ಲಿಗೆ” ಚಿತ್ರ ಅನೇಕ ರಾಷ್ಟ್ರಪ್ರಶಸ್ತಿಗಳನ್ನು ಬಾಚಿಕೊಂಡಿತ್ತು. ಅದಕ್ಕೂ ಮುನ್ನ ಸಿ ಅಶ್ವತ್ ಸಂಗೀತ ನಿರ್ದೇಶಿಸಿ, ಹಾಡಿದ “ಮೈಸೂರು ಮಲ್ಲಿಗೆ” ಧ್ವನಿಸುರುಳಿ ಭರ್ಜರಿ ಜಯಭೇರಿ ಬಾರಿಸಿತ್ತು.”ಮೈಸೂರು ಮಲ್ಲಿಗೆ” ನಾಟಕವಾಗಿಯೂ ಯಶಸ್ಸು ಕಂಡಿತು. ಮುಟ್ಟಿದವರಿಗೆಲ್ಲ ಸುಗಂಧ ಸೂಸಿ ಕೀರ್ತಿಯನ್ನು ಮುಡಿಗೇರಿಸಿದ ಮಲ್ಲಿಗೆಯ ಕರ್ತೃವಿಗೆ ಮಾತ್ರ ಆರಕ್ಕೇರದ ಬದುಕೇ ಸಿಕ್ಕ ಸಂತೋಷ.

mysoremalligeksnashwath

ಸರಳ ಭಾಷೆಯಲ್ಲಿ  ಬರೆದು ಜನಮನವನ್ನು ಸೇರಿದ ಕವಿಗೆ “ಪುಷ್ಪಕವಿ” ಎಂದು ಜರಿದವರೆಷ್ಟೋ . “ಇಲ್ಲುಂಟು ಅಗೆವ  ಬುದ್ಧಿಗೆ ಅನಂತ ಅವಕಾಶ ಹೊಳೆದದ್ದೇ ತಾರೆ ಉಳಿದದ್ದು ಆಕಾಶ” ಎಂದ ಕವಿಯ ನೆನಪಾಗಿ ಉಳಿದಿರುವ ಹುಟ್ಟೂರಿನ ಮನೆ ಸ್ಮಾರಕವಾಗಿ ಅರಳಲು ಇನ್ನೂ  ಘಳಿಗೆ ಕೂಡಿ ಬಂದಿಲ್ಲವೆಂಬುದು ವಿಪರ್ಯಾಸ. 

“ಸಿರಿಗೆರೆಯ ನೀರಲ್ಲಿ ಬಿರಿದ ಸಂಪಿಗೆಯಲ್ಲಿ ಕೆಂಪಾಗಿ ನಿನ್ನ ಹೆಸರು ” ಗೀತೆಗೆ ಪ್ರೇರಕವಾದ ಅಮಾನಿಕೆರೆ ಮಂಡ್ಯ ಜಿಲ್ಲೆ ಕೆ ಆರ್ ಪೇಟೆ ತಾಲ್ಲೂಕಿನ  ಕಿಕ್ಕೇರಿಯಲ್ಲಿದೆ. ಮಾಳಿಗೆಯ ಕೆಳಗಿರುವ ತೊಟ್ಟಿಮನೆಯಲ್ಲಿ ಹಜಾರ , ಪೂಜಾಗೃಹಗಳು ಅವಸಾನದ ಅಂಚಿನಲ್ಲಿವೆ. ಹಿತ್ತಲಿನಲ್ಲಿರುವ ಮಲ್ಲಿಗೆಯ ಬನ ನೀರೆರೆದು ಪೋಷಿಸುವವರಿಲ್ಲದೆ ಸೊರಗುತ್ತಿದೆ. ಕವಿತೆಗಳ ಮೂಲಕ ಮನಸ್ಸುಗಳನ್ನು ತಂಪಾಗಿಸಿದ ಕವಿಯ ನೆನಪನ್ನು ಮುಂದಿನ ತಲೆಮಾರಿಗೆ ಕೊಂಡೊಯ್ಯಲಾರದಷ್ಟು ಕೃಪಣರೇ ನಾವು? ರಸಋಷಿ  ಕುವೆಂಪು ಆಡಿ  ಬೆಳೆದ ಮನೆಯನ್ನು “ಕವಿಮನೆ”ಯಾಗಿಸಿ ಸಾಹಿತ್ಯಾಸಕ್ತರನ್ನಷ್ಟೇ ಅಲ್ಲದೆ ಸಾಮಾನ್ಯ ಪ್ರವಾಸಿಗನನ್ನೂ ಕೈ ಬೀಸಿ ಕುಪ್ಪಳ್ಳಿಗೆ ಕರೆತರುವಲ್ಲಿ ಸರ್ಕಾರ ಹಾಗು ಪ್ರತಿಷ್ಠಾನದ ಪಾತ್ರವನ್ನು ಮೆಚ್ಚಲೇಬೇಕು. ವರಕವಿ ಬೇಂದ್ರೆಗೂ ಇಂಥಾ ಗೌರವ ಹೆಚ್ಚು-ಕಡಿಮೆ ದಕ್ಕಿದೆ. ಆದರೆ ಕೆ ಎಸ್ ನ ರಂಥ  ಪ್ರೇಮಕವಿಗೆ ಇಂಥಾ ತಾರತಮ್ಯವೇಕೋ ?

ಕೆ ಎಸ್ ನ ಜನಿಸಿ ನೂರು ತುಂಬಿದ ಮೇಲಾದರೂ ಸರ್ಕಾರ, ಜಿಲ್ಲಾಡಳಿತ, ಕೆ ಎಸ್ ನ ಟ್ರಸ್ಟ್ ಕವಿಗೆ ಗೌರವ ಸಲ್ಲಿಸುವ, ನೆನಪುಗಳನ್ನು ಹಸಿರಾಗಿ ಉಳಿಸುವ ಕಾಯಕದ ಕಡೆಗೆ ಗಮನ ಹರಿಸಲಿ. ಹಿರಿಕಿರಿಯ ಸಾಹಿತಿಗಳು, ಅಭಿಮಾನಿಗಳು,ಹಾಡುಗಾರರು ,ಸಮಾನತೆಯ ಬಗ್ಗೆ ಬರಿದೆ ಮಾತನಾಡುವವರೆಲ್ಲ ಸರ್ಕಾರವನ್ನು ಎಚ್ಚರಿಸಲಿ. ನಾಡಿನ ಜನರೆಲ್ಲಾ ಕಿಕ್ಕೇರಿಯ ಕವಿಮನೆಗೆ ಬಂದು ಮಲ್ಲಿಗೆಯ ಘಮವನ್ನು ಆಘ್ರಾಣಿಸುವಂತಾಗಲಿ.

ನಾಟಕಕ್ಕೆ ಟಿಕೆಟ್ ಹರಿದು, ಪ್ರೇಕ್ಷಕರಿಗೆ ಬ್ಯಾಟರಿ ಹಿಡಿದು …

ನಾಟಕಕ್ಕೆ ಟಿಕೆಟ್ ಹರಿದು, ಪ್ರೇಕ್ಷಕರಿಗೆ ಬ್ಯಾಟರಿ ಹಿಡಿದು ಸೀಟು ತೋರಿಸುತ್ತಾ, ಬಣ್ಣದ ಲೋಕಕ್ಕೆ ಎಂಟ್ರಿ ಕೊಟ್ಟಾಗ ..

 

443479-PrakashBelawadiNew-1348760982-299-640x480

ಪ್ರಕಾಶ್ ಬೆಳವಾಡಿ

 

ಹೌದು, ಇಂದು ಪ್ರಕಾಶ್ ಬೆಳವಾಡಿ ಕನ್ನಡ ರಂಗಭೂಮಿಯಲ್ಲಿ ಬಹಳ ದೊಡ್ಡ ಹೆಸರು.

ರಂಗಭೂಮಿ ಕಲಾವಿದೆ ಭಾರ್ಗವಿ ನಾರಾಯಣ್ ಮತ್ತು ಹಿರಿಯ ಮೇಕಪ್ ಕಲಾವಿದ ನಾಣಿ ಅವರ ಪುತ್ರರಾದ ಇವರು ಚಿಕ್ಕಿಂದಿನಿಂದಲೆ ರಂಗಭೂಮಿಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದರು.

ನಟ, ನಿರ್ದೇಶಕರಾಗುವುದಕ್ಕಿಂತ ಮುಂಚೆ ಬೆಂಗಳೂರು ಲಿಟ್ಲ್ ಥಿಯೆಟರ್‌ನ ಒಂದು ನಾಟಕಕ್ಕೆ ಟಿಕೆಟ್ ಹರಿದು ನಂತರ ಬ್ಯಾಟರಿ ಹಿಡಿದು ಪ್ರೇಕ್ಷಕರಿಗೆ ಸೀಟು ತೋರಿಸುತ್ತಾ ರಂಗಭೂಮಿಗೆ ಅಧಿಕೃತವಾಗಿ ಎಂಟ್ರಿಕೊಟ್ಟ ಪ್ರಕಾಶ್, ಅಲ್ಲಿಂದ ಇಲ್ಲಿಯವರೆಗೆ  ರಂಗಭೂಮಿಯಲ್ಲಿ ತಿರುಗಿ ನೋಡಿಯೇ ಇಲ್ಲ.

೧೯೭೮ರಲ್ಲಿ ಮಾಲಿನಿ ಮತ್ತು ಎಡ್ವರ್ಡ್ ವೈಟ್ ಅವರ ನಿರ್ದೇಶನದ – ಅನ್‌ಗ್ರೇಟ್‌ಫುಲ್ ಮ್ಯಾನ್ ಎಂಬ ನಾಟಕದಲ್ಲಿ ಚಿಕ್ಕ ಪಾತ್ರ ಮಾಡಿದ್ದರು. ಅದಾದ ಮೇಲೆ ಕನ್ನಡದ ಯಶಸ್ವಿ ರಂಗಪ್ರಯೋಗ ಮುಖ್ಯಮಂತ್ರಿ ನಾಟಕದಲ್ಲಿ ಒಂದು ಪಾತ್ರ, ಹಾಗು ಸಾಕಷ್ಟು ನಾಟಕಗಳಲ್ಲಿ ಅಭಿನಯಿಸಿದ್ದಾರೆ.  ವರ್ಷಕ್ಕೆ ಸುಮಾರು ಹತ್ತು ನಾಟಕಗಳಿಗೆ ಕೆಲಸ ಮಾಡುತ್ತಾರೆ. “ನಾನು ಬೇಸಿಕಲಿ  ನಾನು ನಟನಲ್ಲ, ನೇಪಥ್ಯದ ವ್ಯಕ್ತಿ” ಎನ್ನುವ ಪ್ರಕಾಶ್ ಅವರು ಪ್ರಾರಂಭದಲ್ಲಿ ಸಾಕಷ್ಟು ನಾಟಕಗಳಿಗೆ ಮೇಕಪ್ ಹಾಗು ಲೈಟಿಂಗ್ ಕೂಡ ಮಾಡಿದ್ದಾರೆ.

೧೯೮೫ರಲ್ಲಿ ಬಿಎಲ್‌ಟಿಗಾಗಿಯೇ  ‘ಸೀಸ್ರಮ್ ಸೋವಿಟೊ’ ಎಂಬ ಇಂಗ್ಲೀಷ್ ನಾಟಕವನ್ನು ನಿರ್ದೇಶಿಸಿದ್ದಾರೆ. ಈ ನಾಟಕದ ಮೂಲಕ ಇಂಗ್ಲೀಷ್ ರಂಗಭೂಮಿಗೆ ಕಾಲಿಟ್ಟ ಇವರು ಇದುವರೆಗೂ ೩೦ಕ್ಕೂ ಹೆಚ್ಚು ಇಂಗ್ಲೀಷ್ ನಾಟಕಗಳನ್ನು ನಿರ್ದೇಶಿಸಿದ್ದಾರೆ.

ogqifeqhuqonkkgm5kjh

ಪತ್ರಕರ್ತರಾಗಿಯೂ ಸೇವೆ

ಬೆಂಗಳೂರಿನಲ್ಲಿ ವಿಶ್ವೇಶ್ವರಯ್ಯ  ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಪದವಿ ಮುಗಿಸಿ ಯಾವುದಾದರೂ ಖಾಸಗಿ ಸಂಸ್ಥೆಗೆ ಹೋಗಿದ್ದರೆ, ಇಷ್ಟು ಹೊತ್ತಿಗೆ ಲಕ್ಷಾಂತರ ರೂಪಾಯಿ ಸಂಬಳ ಪಡೆಯುತ್ತಿದ್ದರು, ಅದನ್ನು ಬಿಟ್ಟು ಲಂಕೇಶ್ ಪತ್ರಿಕೆಗೆ ಕೆಲಸಕ್ಕಾಗಿ ಅರ್ಜಿ ಹಾಕುತ್ತಾರೆ, ಆದರೆ  ಮೇಷ್ಟ್ರು ಬಳಿ ಅವರಿಗೆ ಕೆಲಸ ಸಿಗಲಿಲ್ಲ.  ಆ ನಂತರ ಇಂಡಿಯನ್ ಎಕ್ಸಪ್ರೆಸ್ ಪತ್ರಿಕೆಯಲ್ಲಿ  ಇಂಟರ್ನಿ ಪತ್ರಕರ್ತನಾಗಿ ಕೆಲಸಕ್ಕೆ ಸೇರಿದ ಅವರು ತಿಂಗಳಿಗೆ ೬೩೦ ರೂಪಾಯಿ ಸಂಬಳ ಪಡೆಯುತ್ತಿದ್ದರು.  ಹಿರಿಯ ಪತ್ರಕರ್ತ ಅರುಣ್ ಶೌರಿಯವರು ೮೦ರ ದಶಕದಲ್ಲಿ ಬರೆದ ಸಾಕಷ್ಟು ಲೇಖನಗಳಿಂದ ಪ್ರಭಾವಿತರಾಗಿ ಪತ್ರಿಕೋದ್ಯಮಕ್ಕೆ ಕಾಲಿಟ್ಟು, ಕೆಲ ವರ್ಷಗಳ ಕಾಲ ಕೆಲಸ ಮಾಡಿದರು.

ಸಿನಿಮಾ ಪಯಣದ ಆರಂಭ

ಗಿರೀಶ್ ಕಾರ್ನಡ್ ಅವರ ‘ಅಗ್ನಿ ಮತ್ತು ಮಳೆ’ ನಾಟಕವನ್ನು, ಇಂಗ್ಲೀಷ್ ಅನುವಾದಿತ ‘ದಿ ರೈನ್ ಆ್ಯಂಡ್ ಫೈರ್’ ಎಂಬ ನಾಟಕದಲ್ಲಿ ರೇಬಾನಿ ಅನ್ನೋ ಪಾತ್ರ ಮಾಡಿದ್ದರು, ಅದನ್ನು  ನೋಡಿದ ಗಿರೀಶ್ ಅವರು ಕಾನೂರು ಸುಬ್ಬಮ್ಮ ಹೆಗ್ಗಡತಿ ಸಿನಿಮಾದಲ್ಲಿ ಓಬಯ್ಯನ ಪಾತ್ರ ಮಾಡಲು ಅವಕಾಶ ನೀಡಿದರು. ಅಲ್ಲಿಂದ ಅವರ ನಟನಾ ವೃತ್ತಿ ಆರಂಭವಾಯಿತು ಅಂತ ಹೇಳಬಹುದು. ಅದಾದ ಮೇಲೆ “ಸ್ಟಂಬಲ್” ಎಂಬ ಇಂಗ್ಲೀಷ್ ಸಿನಿಮಾ ನಿರ್ದೇಶನ ಮಾಡಿ ಅದಕ್ಕೆ ರಾಷ್ಟ್ರೀಯ ಪುರಸ್ಕಾರ ಪಡೆದರು.

43142d0e-f08c-45f5-99e6-667df3b4ea1a

“ಸ್ಟಂಬಲ್” ನಂತರ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದ ಅವರಿಗೆ ಒಮ್ಮೆ ಬಾಂಬೆಯಿಂದ ‘ಮದ್ರಾಸ್ ಕೆಫೆ’ ಚಿತ್ರದ ಸಹನಿರ್ದೇಶಕನೊಬ್ಬ ಕರೆ ಮಾಡಿ ಬರುವಂತೆ ಹೇಳುತ್ತಾರೆ . ಆ ನಂತರ ಅದರ ಬಾಲಾ ಪಾತ್ರಕ್ಕೆ ಆಯ್ಕೆಯಾಗಿ, ತಮ್ಮ ಅಮೋಘ ಅಭಿನಯದಿಂದ ಬಾಲಿವಡ್‌ನಲ್ಲಿ ಹೆಸರು ಮಾಡುತ್ತಾರೆ.

ಈಗ ಇದೆಲ್ಲವೂ ಇತಿಹಾಸ, ಹಿಂದಿ ಚಿತ್ರರಂಗದಲ್ಲಿ ಬೆಳವಾಡಿ ಅವರನ್ನು ಕರೆಯುತ್ತಾರೆ ಎಂದರೆ ಅದೊಂದು ಒಳ್ಳೆ ಪಾತ್ರವೆ ಆಗಿರುತ್ತದೆ, ಅಷ್ಟರ ಮಟ್ಟಿಗೆ ಬೆಳವಾಡಿ ಬಾಲಿವುಡ್ ಮಂದಿಯನ್ನು ತಮ್ಮ ಅಭಿನಯದಿಂದ ಆಕರ್ಷಿಸಿದ್ದಾರೆ. ಮದ್ರಾಸ್ ಕೆಫೆಯ ನಂತರ ತಲ್ವಾರ್, ಏರ್‌ಲಿಫ್ಟ್ ಹಾಗು ವಜೀರ್ ಇನ್ನು ಸಾಕಷ್ಟು ಸಿನಿಮಾಗಳನ್ನು ಅಭಿನಯಿಸಿದ್ದಾರೆ.

ಹಿಂದಿ ಚಿತ್ರಂಗದ ಆಫರ್‌ಗಳು ಹೆಚ್ಚಾದಂತೆ ಕನ್ನಡ ಚಿತ್ರರಂಗದಲ್ಲೂ ಅವರಿಗೆ ಬೇಡಿಕೆ ಸಾಕಷ್ಟು ಹೆಚ್ಚಾಯಿತು. ಎಷ್ಟರ ಮಟ್ಟಿಗೆ ಎಂದರೆ, ಅವರಿಗೆ ಸರಿಯಾಗಿ ನಿದ್ದೆ ಮಾಡಲು ಆಗದಷ್ಟು ಬ್ಯುಸಿ ಆಗಿದ್ದಾರೆ. ಕನ್ನಡದಲ್ಲಿ  ಕೆಂಡ ಸಂಪಿಗೆ, ಲಾಸ್ಟಬಸ್ , ಹಾಗು ಇತ್ತೀಚಿಗೆ ಬಿಡುಗಡೆಯಾದ ನಾಗತಿಹಳ್ಳಿ ಚಂದ್ರಶೇಖರ್ ರವರ ಇಷ್ಠಕಾಮ್ಯ  ಸೇರಿದಂತೆ ಮತ್ತಷ್ಟು ಸಿನಿಮಾಗಳಲ್ಲಿ ನಟಿಸಿದ್ದಾರೆ, ಆದರೆ ಅವರೆಂದಿಗೂ ಯಶಸ್ಸನ್ನು ತಲೆಗೇರಿಸಿಕೊಂಡಿಲ್ಲ ನಾನೇಂದಿಗೂ ಸಿನಿಮಾ ನಟ ಎಂದು ಹೇಳಿಕೊಳ್ಳುವುದಿಲ್ಲ. “ನಾನು ರಂಗಭೂಮಿಯವನೇ ಎಂದು ಹೇಳಿಕೊಳ್ಳಲು ಇಷ್ಟ ಪಡುತ್ತೇನೆ. ಅದರಲ್ಲೂ ನಾನೊಬ್ಬ ನಿರ್ದೇಶಕ ಮಾತ್ರ ನಟನಲ್ಲ” ಎಂದೇ ಹೇಳುತ್ತಾರೆ.

5th-bengaluru-international-film-festival_135590965513ಸಿನಿಮಾ ಕ್ಷೇತ್ರದಲ್ಲಿ ಉತ್ಸಾಹವಿರುವ ಯುವಜನರಿಗೆ ಮಾರ್ಗದರ್ಶನ ಮಾಡಲು, ಬೆಂಗಳೂರಿನ್ಲಲಿ ಹೊಸದಾಗಿ ಆರಂಭವಾಗಿರುವ “ವೈಟ್ ಪೆನ್ಸಿಲ್” (www.whitepencil.org.in) ಎಂಬ ಡಿಜಿಟಲ್ ಫಿಲಂ ಮೇಕಿಂಗ್ ಸ್ಕೂಲ್ ನಲ್ಲಿ ತಾಂತ್ರಿಕ ಸಲಹೆಗಾರರು  (Strategic Adviser) ಆಗಿ ಸಹಾಯ ಹಸ್ತನೀಡಲು ಒಪ್ಪಿದ್ದಾರೆ.

ತಮ್ಮ ಯಶಸ್ಸಿನ ಅಷ್ಟೂ ಕ್ರೆಡಿಟ್ಟನ್ನು  ಹೆಂಡತಿ ಮತ್ತು ಮಕ್ಕಳಿಗೆ ನೀಡುವ ಅವರ ಸಧ್ಯದ ಕನಸು ಸುಚಿತ್ರಾ ಆವರಣದಲ್ಲಿ ಒಂದೊಳ್ಳೆ ಸಿನಿಮಾ ನಿರ್ದೇಶನದ ಶಾಲೆ ಆರಂಭಿಸಬೇಕು ಎಂಬುದು.

ಪ್ರಕಾಶ್ ಬೆಳವಾಡಿಯವರ ಎಲ್ಲ ಕನಸುಗಳು ನನಸಾಗಲಿ, ಅವರು ಇನ್ನಷ್ಟು ಒಳ್ಳೆ ಪಾತ್ರಗಳಲ್ಲಿ ಮಿಂಚಲಿ ಮತ್ತಷ್ಟು ಪ್ರಕಾಶಮಾನವಾಗಿ ಚಿತ್ರರಂಗದ ಎಲ್ಲ ಆಯಾಮಗಳಲ್ಲಿ ಯಶಸ್ವಿಯಾಗಲಿ ಎಂದು ಆಶಿಶೋಣ.

Like Us, Follow Us !

120,916FansLike
1,826FollowersFollow
1,563FollowersFollow
3,414SubscribersSubscribe

Trending This Week