27 C
Bangalore, IN
Wednesday, February 21, 2018

ರಮ್ಯಾ ಕೆಚ್ಚೆದೆ ಹೆಣ್ಣು ಅನ್ನೋದನ್ನು ಸಾರುತ್ತಿದ್ದಾರಾ..? 

ನಟಿ ರಮ್ಯಾ.. ಅಲ್ಲ ರಾಜಕಾರಣಿ ರಮ್ಯಾ ಇತ್ತೀಚಿಗೆ ಭಾರೀ ಸುದ್ದಿ ಆಗ್ತಿದ್ದಾರೆ. ಕಾರಣ ಏನೇ ಇರಬಹುದು ರಮ್ಯಾ ವಿಚಾರಕ್ಕೆ ಬಂದು ನಿಲ್ಲುತ್ತಿದೆ. ಪ್ರಧಾನಿ ನರೇಂದ್ರ ಮೋದಿ ಬೆಂಗಳೂರಿನ ಸಮಾವೇಶದಲ್ಲಿ ಹೇಳಿದ್ದ ಟಾಪ್ ಹೇಳಿಕೆಯನ್ನು ಉಲ್ಟಾ ಮಾಡಿ ಪಾಂಟ್ ಎಂದಿದ್ದ ರಮ್ಯಾ ಟ್ವೀಟ್ ಭಾರೀ ಪ್ರಚಾರ ಪಡೆದಿತ್ತು. ನಟ ಜಗ್ಗೇಶ್ ಸೇರಿದಂತೆ ಹಲವರು ಕಿಡಿಕಾರಿದ್ರು. ಆದ್ರೆ ರಮ್ಯಾ ಎಲ್ಲವನ್ನೂ ನಿಭಾಯಿಸಿದ ರೀತಿ ಹಿರಿಯ ನಾಯಕರನ್ನೂ ದಂಗುಬಡಿಸುವಂತಿದೆ. ಯಾಕಂದ್ರೆ ಮೊನ್ನೆ ಉತ್ತರ ಕೊಟ್ಟಿರುವ ರಮ್ಯಾ, ನಾನು ಮೋದಿ ಹೇಳಿದ್ದ ಮಾತುಗಳನ್ನೆ ರಿವರ್ಸ್ ಆರ್ಡರ್ ನಲ್ಲಿ ಹೇಳಿದ್ದೇನೆ ಹೊರತು ಬೇರೇನು ಇಲ್ಲ. ನೀವು ನಿಮಗೆ ಇಷ್ಟ ಬಂದ ರೀತಿಯಲ್ಲಜ ಅರ್ಥ ಮಾಡಿಕೊಂಡರೆ ನನ್ನ ತಪ್ಪಲ್ಲ ಎಂದಿದ್ದರು.
ನಿರ್ಲಕ್ಷ್ಯದ ಮೂಲಕವೇ ಬಿಸಿ ಮುಟ್ಟಿಸಿದ ನಾಯಕಿ
ಶ್ರಮವಿಲ್ಲದೆ ಪಲ್ಲಂಗ ಏರಿದವರು, ಕ್ಯಾಚ್ ಹಾಕಿ ಆಕ್ಟ್ ಗಿಟ್ಟಿಸಿದವರು, ಮೇಲೇರಲು ಹೈಕಮಾಂಡ್ ಗೆ ಕ್ಯಾಚ್ ಹಾಕಿದವರು ಅಂತ ತುಂಬಾ ಕೀಳುಮಟ್ಟದಲ್ಲಿ ವಾಗ್ದಾಳಿ ಮಾಡಿದ್ದ ಜಗ್ಗೇಶ್ ಬಗ್ಗೆ ರಮ್ಯಾ ಬುದ್ಧಿವಂತಿಕೆ ಮೆರೆದಿದ್ದಾರೆ. ಜಗ್ಗೇಶ್ ತುಂಬಾ ದೊಡ್ಡ ನಟರು ಅವರ ಬಗ್ಗೆ ನಾನು ಮಾತನಾಡುವುದಿಲ್ಲ ಎಂದು ಜಗ್ಗೇಶ್ ಹೇಳಿಕೆಯನ್ನು ಕಸದ ಬುಟ್ಟಿಗೆ ಹಾಕುವ   ಮೂಲಕ ಜಗ್ಗೇಶ್ ನನಗೆ ಸರಿಸಮನಾದ ನಾಯಕನಲ್ಲ ಎಂದು ಪರೋಕ್ಷವಾಗಿಯೇ ಚುಚ್ಚಿದ್ದಾರೆ.
ರಮ್ಯಾ ರಾಜಕೀಯದಲ್ಲಿ ಬೆಳೆಯಲು ಕಾರಣ ಏನು..?
ನಟಿಯಾಗಿದ್ದ ರಮ್ಯಾ ಅಚಾನಕ್ ಆಗಿ ಕಾಂಗ್ರೆಸ್ ಪಕ್ಷದ ಮೂಲಕ ಸಂಸದೆಯಾಗಿ ಆಯ್ಕೆಯಾದವರು. ಬಳಿಕ ತಮ್ಮ ವೃತ್ತಿಯಾದ ನಟನೆಯನ್ನು ಬಿಟ್ಟು ಪೂರ್ಣ ಪ್ರಮಾಣದ ರಾಜಕಾರಣಿ ಆಗಿದ್ದಾರೆ. ಬೇರೆಲ್ಲಾ ನಾಯಕರ ರೀತಿ ಜನಪ್ರತಿನಿಧಿಯಾಗಿ ಜನರ ಕೆಲಸ ಮಾಡುತ್ತಾ ಜನರ ಮನಸ್ಸು ಗೆದ್ದು, ಸ್ವಲ್ಪ ಹಣಾ ಮಾಡಿದ್ರೋ ಇಲ್ಲವೋ ಗೊತ್ತಿಲ್ಲ. ಆದರೆ ವಿದೇಶಕ್ಕೆ ತೆರಳಿ ತರಬೇತಿ ಪಡೆದು ರಾಜಕಾರಣದ ಪಟ್ಟುಗಳನ್ನು ತಿಳಿದುಕೊಂಡು ಬಂದರು. ಅದೇ ಅವರನ್ನು ಹೈಕಮಾಂಡ್ ಸನಿಹಕ್ಕೆ ಬಂದು ನಿಲ್ಲುವಂತೆ ಮಾಡಿತು. ಇದೀಗ ಸಾಮಾಜಿಕ ಜಾಲ ತಾಣದ ಎಐಸಿಸಿ ಅಧ್ಯಕ್ಷೆಯಾಗಿರುವ ರಮ್ಯಾ ರಾಜ್ಯಕ್ಕಿಂತ ಹೆಚ್ಚಾಗಿ ರಾಷ್ಟ್ರ ರಾಜಕಾರಣದಲ್ಲೇ ಉಳಿದುಕೊಂಡಿದ್ದಾರೆ. ವಿರೋಧಿಗಳು ಸೇರಿದಂತೆ ಸ್ವಪಕ್ಷದಲ್ಲೇ ಕಾಲೆಳೆಯುವ ಮಂದಿಗೂ ರೆಬೆಲ್ ಆಗಿಯೇ ಉತ್ತರ ನೀಡುತ್ತಾ ನಾನು ಕೆಚ್ಚೆದೆ ಹೆಣ್ಣು, ರಾಜಕೀಯ ನನಗೂ ಗೊತ್ತಿದೆ ಅನ್ನೋದನ್ನು ತೋರಿಸುತ್ತಿದ್ದಾರೆ. ಆದ್ರೆ ಅಖಾಡ ರಾಜಕೀಯ ಒಂದನ್ನು ಕರಗತ ಮಾಡಿಕೊಂಡ್ರೆ ರಮ್ಯಾಕಾಲ ಬರೋದ್ರಲ್ಲಿ ಯಾವುದೇ ಅನುಮಾನವಿಲ್ಲ. ನೀವೇನಂತೀರಿ..?
ಜ್ಯೋತಿ ಗೌಡ, ನಾಗಮಂಗಲ

ಶ್ರಮವಿಲ್ಲದೆ ಪಲ್ಲಂಗ ಏರಿದವರು ಯಾರು..? ಜಗ್ಗೇಶ್ ವಾಗ್ದಾಳಿ ಮಾಡಿದ್ದೇಕೆ ..?

ಶ್ರಮವಿಲ್ಲದೆ ಪಲ್ಲಂಗ ಏರಿದವರು ಯಾರನ್ನ ಬೇಕಾದರೂ ಹಂಗಿಸ್ತಾರೆ.. ಕನ್ನಡದ ಗೊತ್ತಿಲ್ಲದ ಕಾಡುಪಾಪ.. ಅಪ್ಪನ ದುಡ್ಡಲ್ಲಿ ಪಾರ್ಟಿ ಕೊಟ್ಟು ಪಾರ್ಟು ಗಿಟ್ಟಿಸಿದವರು ಹೀಗೆಲ್ಲಾ ಮನಸೋ ಇಚ್ಛೆ ಟ್ವೀಟ್ ಮಾಡಿ ವಾಗ್ದಾಳಿ ಮಾಡಿರೋದು ನವರಸ ನಾಯಕನೆಂದೇ ಖ್ಯಾತಿ ಗಳಿಸಿರುವ ಬಿಜೆಪಿ ನಾಯಕ ಜಗ್ಗೇಶ್​​.. ಈ ಟ್ವೀಟ್ ಯಾರಿಗೆ ಅನ್ನೋದನ್ನು ನೇರವಾಗಿ ಹೆಸರು ಹಾಕದೇ ಇದ್ದರು ಮಾಡಿರುವ ಟ್ವೀಟ್​ ಯಾರಿಗೆ ಅನ್ನೋದನ್ನು ಆ ಭಾಷೆಯೇ ಸಾರಿ ಹೇಳುತ್ತಿದೆ. ಟ್ವಿಟ್ಟರ್ ನಲ್ಲೇ ಮುಂದುವರಿದು, ದೊಡ್ಡವರ ನೆರಳಲ್ಲಿ ರಾಜಕೀಯಕ್ಕೆ ಬಂದ್ರಿ, ಮೆಟ್ಟಿಲು ಏರೋಕೆ ಹೆಡ್​ ಆಫೀಸ್​ಗೆ ಕ್ಯಾಚ್​ ಹಾಕಿದ್ರಿ.. ಕ್ಯಾಚ್​ ಹಾಕಿದವರಿಗೆ ಮೋದಿ ಆದರೇನು, ಗಾಂಧಿ ಆದರೇನು ಹಂಗಿಸ್ತಾರೆ.. ಶ್ರಮವಿಲ್ಲದೆ ಪಲ್ಲಂಗ ಏರಿದವರಲ್ಲವೇ ನೀವು ಎಂದು ನಟ ಜಗ್ಗೇಶ್​ ಪ್ರಶ್ನಿಸಿದ್ದಾರೆ..
ನರೇಂದ್ರ ಮೋದಿ ಬೆಂಗಳೂರಿನಲ್ಲಿ ಪ್ರಚಾರ ಮಾಡಿದ್ದಕ್ಕೆ ಟ್ವೀಟ್ ನಲ್ಲಿ ತಿರುಗೇಟು ನೀಡಿದ ರಮ್ಯಾ ಪ್ರಧಾನಿ ನಶೆಯಲ್ಲಿ ಮಾತನಾಡ್ತಿದ್ದಾರೆ ಎನ್ನುವ ಅರ್ಥದಲ್ಲಿ ವಾಗ್ದಾಳಿ ಮಾಡಿದ್ರು. ಅದೇ ಟ್ವಿಟರ್ ಗೆ ತಿರುಗೇಟು ಕೊಡುವ ರೀತಿಯಲ್ಲಿ ಟ್ವೀಟ್ ದಾಳಿ ಮಾಡಿರುವ ಜಗ್ಗೇಶ್, ರಮ್ಯಾ ಹೆಸರು ಹೇಳದೆ ವೈಯಕ್ತಿಕವಾಗಿ ದಾಳಿ ನಡೆಸಿದ್ದಾರೆ. ಪಾರ್ಟಿ ಕೊಟ್ಟು ಪಾರ್ಟು ಗಿಟ್ಟಿಸಿದ್ರಿ, ಹೆಡ್ ಆಫೀಸ್ ಅನ್ನೇ ಕ್ಯಾಚ್ ಹಾಕಿಕೊಂಡ್ರಿ,  ಮೋದಿ ಬಗ್ಗೆ ಮಾತನಾಡೋದಕ್ಕೆ ಈಕೆ ಯಾರು..? ಶ್ರಮವಿಲ್ಲದೆ ಪಲ್ಲಂಗ ಏರಿದವರು ಯಾರನ್ನು ಬೇಕಾದರೂ ಹಂಗಿಸ್ತಾರೆ ಅಂತಾ ಸಣ್ಣತನ ಪ್ರದರ್ಶನ ಮಾಡಿದ್ದಾರೆ.
ಜಗ್ಗೇಶ್ ವಾಗ್ದಾಳಿ ಹಿಂದಿನ ಕಾರಣ ಏನು..?
ನಟ ಜಗ್ಗೇಶ್ ರಮ್ಯಾ ಜೊತೆ ನೀರ್ ದೋಸೆ ಹಾಕಲು ರೆಡಿಯಾಗಿದ್ರು. ಆದ್ರೆ ಶೂಟಿಂಗ್ ಸ್ಪಾಟ್ ಗೆ ಹೋಗ್ತಿದ್ದ ಹಾಗೆ ರಮ್ಯಾ ಹೊಸ ವರಸೆ ಶುರು ಮಾಡಿದ್ರು. ನಾನು ಜಗ್ಗೇಶ್ ಜೊತೆಯಲ್ಲಿ ಸಿನಿಮಾ ಮಾಡೋದಿಲ್ಲ ಅಂತ ಅವತ್ತು ಕಿತ್ತು ಹೋದ ನೀರ್ ದೋಸೆ ಇಲ್ಲೀ ತನಕ ಕೂಡಿಸೋಕೆ ಆಗಿಲ್ಲ. ನೀರ್ ದೋಸೆಯನ್ನ ಬೇರೆಯವರು ಬಂದು ಹಾಕಿ ಬೇಯಿಸಿ ತಿಂದಿದ್ದೂ ಆಯ್ತು ಆದ್ರೆ‌ ಕಿತ್ತು ಹೋದ ನೀರ್ ದೋಸೆ ಹಾಗೇ ತಟ್ಟೆಯಲ್ಲೆ ಬಿದ್ದಿದ್ದು ಇಂದು ಹಳಸಿ ಗಬ್ಬುನಾಥ ಬೀರಿದೆ ಅಷ್ಟೇ ಅಂತಿದೆ ಗಾಂಧಿ ನಗರ.
 ಆದರೂ ವೈಯಕ್ತಿಕ ದ್ವೇಶ ಏನೇ ಇರಲಿ ಟೀಕೆ ಮಾಡಲು ಸಾವಿರ ದಾರಿಗಳಿದ್ದವು. ಅದೂ ಅಲ್ಲದೇ‌ ಹೆಣ್ಣುಮಕ್ಕಳಿಗೆ ಮಾತೃಭಾವ ತೋರುತ್ತೇವೆ ಅನ್ನುವ ಬಿಜೆಪಿ ಪಕ್ಷದಲ್ಲಿ ಇದ್ದುಕೊಂಡು ಓರ್ವ ಹೆಣ್ಣನ್ನು ಶ್ರಮವಿಲ್ಲದೆ ಮಂಚಕ್ಕೆ ಏರಿದವರಲ್ಲವೇ ಎಂದರೆ ಏನರ್ಥ..? ಓರ್ವ ಹೆಣ್ಣು ಮಗಳಿಗೆ ಗೌರವ ಕೊಡದ ಈ ರೀತಿಯ ವ್ಯಕ್ತಿಗಳನ್ನು ಬಿಜೆಪಿ ಇನ್ನೂ ಉಳಿಸಿಕೊಂಡಿದೆ ಅಂದರೆ, ಜಗ್ಗೇಶ್ ಮಾತಿಗೆ ಸಹಮತ ಇದೇ ಅಂತ ಅರ್ಥವೆ ಅನ್ನೊದು ಸಾಕಷ್ಟು ಜನರ ಪ್ರಶ್ನೆಯಾಗಿದೆ. ಪಾರ್ಟಿ ಕೊಟ್ಟು ಪಾರ್ಟು ಗಿಟ್ಟಿಸಿದವರು ಅಂದರೆ ರಮ್ಯಾಗೆ ಆಕ್ಟಿಂಗ್ ಬರೋದಿಲ್ಲ ಎಂದು ಅರ್ಥವೇ..? ಹೆಡ್ ಆಫೀಸ್ ಕ್ಯಾಚ್ ಹಾಕೊಂಡ್ರಿ ಅಂದ್ರೆ ಹೈಕಮಾಂಡ್ ರನ್ನೇ ಬುಟ್ಟಿಗೆ ಹಾಕಿಕೊಂಡಿರಿ ಅಂದ್ರೆ ಏನರ್ಥ.. ಹೆಣ್ಣಿನ ಬಗ್ಗೆ ಮಾತನಾಡುವಾಗ ಕನಿಷ್ಟ ಸೌಜನ್ಯ ತೋರುವ ಬುದ್ಧಿಯೂ ಇಲ್ಲ ಅಂದ್ರೆ ರಾಜಕೀಯದಲ್ಲಿ ಬದುಕೋದು ಕಷ್ಟ ಅಂತಿದೆ ರಾಜಕೀಯ ವಲಯ.. ಮುಂದೆ ಅದ್ಯಾವ ತಿರುವ ಪಡೆಯುತ್ತೋ ಅನ್ನೋ ಕುತೂಹಲ ಉಳಿದುಕೊಂಡಿದೆ
 ಜ್ಯೋತಿ ಗೌಡ, ನಾಗಮಂಗಲ

ನಾಳೆ ತೆರೆಕಾಣುವ “ಆ ಒಂದು ದಿನ”ದಲ್ಲಿ ಅಂಥಾದ್ದೇನಿದೆ ?

ಒಂದು ಸಿನಿಮಾ ನಿರ್ಮಾಣ ಮಾಡುವುದು ಎಂದರೆ ಅಷ್ಟು ಸುಲಭದ ಮಾತಲ್ಲ. ಆದರೆ ಇಂತಹ ಸಾಹಸವನ್ನು ಉತ್ತರ ಕರ್ನಾಟಕದ ದ್ರಾಕ್ಷಿ ಬೆಳೆಗಾರ ಒಬ್ಬರು ಮಾಡಿದ್ದಾರೆ. ಮೂಲತಃ ಕೃಷಿಕರಾಗಿದ್ದ ರವೀಂದ್ರ ಗೌಡ ಪಾಟೀಲ್ ‘ಆ ಒಂದು ದಿನ’ ಎಂಬ ಸಿನಿಮಾಗೆ ಬಂಡವಾಳ ಹಾಕಿದ್ದಾರೆ. ದೇಶಕ್ಕೆ ಏನಾದರೂ ಮಾಡಬೇಕು ಎಂಬ ಆಸೆ ಹೊಂದಿದ್ದ ಇವರು ಒಂದು ಸಿನಿಮಾ ಮಾಡಿ ಅದರ ಮೂಲಕ ಒಂದು ಒಳ್ಳೆಯ ಸಂದೇಶವನ್ನು ಹೇಳುವ ಪ್ರಯತ್ನ ಮಾಡಿದ್ದಾರೆ. ಇಂದಿನ ರಾಜಕೀಯ ವ್ಯವಸ್ಥೆ ಹಾಳಾಗಿದೆ, ಪ್ರಜಾಪ್ರಭುತ್ವವನ್ನು ಪ್ರಜೆಗಳೆ ಸರಿ ಮಾಡಬೇಕು. ಪ್ರತಿಯೊಂದು ಮತಕ್ಕೂ ಬೆಲೆ ಇದೆ. ಪ್ರಾಮಾಣಿಕರಿಗೆ ಮತ ಹಾಕಿ ಸುಂದರ ಸಮಾಜಕ್ಕೆ ಬುನಾದಿ ಹಾಕಬೇಕು. ರಾಜಕಾರಣಿಗಳು ಬದಲಾದರೆ ಮಾತ್ರ ವ್ಯವಸ್ಥೆ ಸುಧಾರಿಸಲು ಸಾಧ್ಯ. ಅವರನ್ನು ಬದಲಾಯಿಸುವ ಶಕ್ತಿ ಶ್ರೀಸಾಮಾನ್ಯನಿಗಿದೆ. ಅಂಥಹ ಸಾಮಾನ್ಯರ ಜವಾಬ್ದಾರಿಯ ಬಗ್ಗೆ ಎಚ್ಚರಿಸಲಿದೆ ಆ ಒಂದು ದಿನ  ಎನ್ನುವ ರವೀಂದ್ರ ಗೌಡ ಪಾಟೀಲ್ ತಮ್ಮ ‘ಆ ಒಂದು ದಿನ’ ಸಿನಿಮಾ ಮೂಲಕ ಜನಮಿತ್ರನಾಗಿ ಕಿವಿಮಾತು ಹೇಳಹೊರಟಿದ್ದಾರೆ . ಈ ಚಿತ್ರದ ಕಥೆ, ಚಿತ್ರಕಥೆ ಕೂಡ ಅವರೇ ಬರೆದಿದ್ದಾರೆ.

“ಆ ಒಂದು ದಿನ”ದ ಕಥಾಹಂದರ  

ಒಂದು ಹಳ್ಳಿ, ಆ ಹಳ್ಳಿಯಲ್ಲಿ ನಡೆಯುವ ಚುನಾವಣೆಯ ಭರಾಟೆ. ಅಲ್ಲಿನ ಗೌಡರ ನಡುವೆ ನಡೆಯುವ ಜಿದ್ದಾ ಜಿದ್ದಿ ಸ್ಪರ್ಧೆ. ಹಳ್ಳಿಯಲ್ಲಿರುವ ಎರಡು ಬಣಗಳ ನಡುವೆ ಇರುವ ಭಿನ್ನಾಭಿಪ್ರಾಯಗಳು ಏನೆಲ್ಲ ಅನಾಹುತಗಳಿಗೆ ಎಡೆಮಾಡಿಕೊಡುತ್ತದೆ ಎನ್ನುವುದೇ ಚಿತ್ರದ ತಿರುಳು. ಇವೆಲ್ಲವೂ ಚಿತ್ರದ ಕಥೆಯಲ್ಲಿ ಅಡಕವಾಗಿದೆ. ಕರ್ನಾಟಕ ವಿಧಾನಸಭೆ ಚುನಾವಣೆ ಹತ್ತಿರ ಬರುತ್ತಿದ್ದಂತೆ ಇಂತಹದೊಂದು ಸಿನಿಮಾ ರಿಲೀಸ್ ಆಗುತ್ತಿರುವುದು, ಜನರ ಮೇಲೆ ಎಷ್ಟರ ಮಟ್ಟಿಗೆ ಪ್ರಭಾವ ಬೀರುತ್ತೋ ಗೊತ್ತಿಲ್ಲ. ಆದ್ರೆ, ಈ ಚಿತ್ರದಿಂದ ಜನರಲ್ಲಿ ರಾಜಕೀಯದ ಬಗ್ಗೆ ಹೊಸ ಭಾವನೆ ಮೂಡಬೇಕು ಎನ್ನುವುದು ಚಿತ್ರತಂಡದ ಆಶಯ.

ಆ ಒಂದು ದಿನ”ದಲ್ಲಿ ಯಾರ್ಯಾರಿದ್ದಾರೆ ?

ಧಾರವಾಡ ಮೂಲದ ಬಾಂಬೆಯಲ್ಲಿ ಡಾನ್ಸರ್ ಆಗಿರುವ ಸಿಮ್ರಾನ್ ಚಿತ್ರದ ನಾಯಕಿ. ದ್ರಾಕ್ಷಿ ಬೆಳೆಗಾರ ರವೀಂದ್ರಗೌಡ ಎನ್‌.ಪಾಟೀಲ್ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ ಬರೆದು ನಿರ್ಮಾಣವನ್ನೂ ಮಾಡಿದ್ದಾರೆ. ಇನ್ನುಳಿದಂತೆ ಚಿತ್ರದಲ್ಲಿ ಎಲ್ಲ ಹೊಸ ಕಲಾವಿದರೇ ಅಭಿನಯಿಸಿದ್ದಾರೆ. ನಿರ್ದೇಶಕ ಸಂಜಯ್ ಈ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ. ಚಿತ್ರಕ್ಕೆ ಶ್ರೀಹರ್ಷ  ಸಂಗಿತ. ಸಾಮಾಜಿಕ ಅರಿವು ಮೂಡಿಸುವಂಥ ಒಂದು ಹಾಡನ್ನು ವಿಜಯ ಪ್ರಕಾಶ್‌ ಹಾಡಿದ್ದು, ಇನ್ನುಳಿದಂತೆ ಎರಡು ಐಟಂ ಹಾಡು ಚಿತ್ರದಲ್ಲಿದೆ. ದೇಶದ ಅಭಿವೃದ್ಧಿಗೆ ಬದಲಾವಣೆ ಮುಖ್ಯ ಎನ್ನುವ ಕಾರಣದಿಂದ ಈ ಚಿತ್ರವನ್ನು ಅವರು ಮಾಡಿದ್ದಾರೆ. ‘ಆ ಒಂದು ದಿನ’ ಸಿನಿಮಾದ ಹಾಡುಗಳು ಮತ್ತು ಟ್ರೇಲರ್ ಈಗಾಗಲೇ ರಿಲೀಸ್ ಆಗಿ ಒಳ್ಳೆಯ ಪ್ರತಿಕ್ರಿಯೆ ಪಡೆದುಕೊಂಡಿದೆ.

ಇದೇ ಫೆಬ್ರವರಿ 2 ರಂದು ರಾಜ್ಯಾದ್ಯಂತ ತೆರೆಗೆ ಬರಲಿದೆ

ನಾಳೆ ತೆರೆಕಾಣಲಿರುವ ಆಯಾ ಒಂದು ದಿನವನ್ನ ಪ್ರತಿಯೊಬ್ಬರೂ ನೋಡಲೇಬೇಕು. ಇದು ಜನರ ಹಿತಕ್ಕಾಗಿ ತಯಾರಾಗಿರುವ ಚಿತ್ರ ಎನ್ನುತ್ತಿದೆ ಚಿತ್ರ ತಂಡ. ಹೊಸಬರ ಹೊಸ ಆಲೋಚನೆಯ ಚಿತ್ರ ಪ್ರೇಕ್ಷಕರ ಪ್ರೀತಿಗಳಿಸಲಿದೆ ಎಂಬ ಭರವಸೆ ನಿರ್ದೇಶಕರದ್ದು.

 

 

ಕನ್ನಡ ಮೀಡಿಯಂನಲ್ಲಿ ಓದಿದ ರಾಜು ರಿಸಲ್ಟ್ ಏನಾಯ್ತು ?

ಕಥೆ – ಬದುಕಿನ ಸ್ಥಿತ್ಯಂತರಗಳಿಗೆ ಸಾಕ್ಷಿಪ್ರಜ್ಞೆಯಾದ ಹಳ್ಳಿಯ ಪೋರನೊಬ್ಬನ ಭವಿಷ್ಯದ ಅನ್ವೇಷಣೆಯಲ್ಲಿ ಆದ್ಯತೆಗಳು ಸಂದರ್ಭಕ್ಕೆ ಅನುಸಾರವಾಗಿ ಬದಲಾಗುತ್ತಾ ಹೋಗುತ್ತವೆ. ಮುಗ್ದ ಜೀವನಕ್ಕೆ  ತಿರುವ ಕೊಡುವ ಮೊದಲ ಪ್ರೀತಿಯನ್ನ ಕೈಗೆಟುಕಿಸಿಕೊಳ್ಳಬೇಕೆನ್ನುವುದರಲ್ಲೇ ಅದು ಕಳೆದುಹೋಗುತ್ತದೆ . ಆಗ ಆತನ ಆದ್ಯತೆ ಕುಟುಂಬದ ಪ್ರೀತಿಯತ್ತ ಹೊರಳುತ್ತದೆ. ತಾಯಿಯ ಅನಾರೋಗ್ಯ ರಕ್ತ ಸಂಬಂಧಿಗಳ ಸ್ವಾರ್ಥವನ್ನು ತೆರೆದಿಟ್ಟಾಗ ಆತನಿಗೆ ನೆರವಾಗುವ ಗೆಳೆಯರು ಕೂಡ ಬದುಕಿನ ಅನಿವಾರ್ಯತೆಗೆ ಒಬ್ಬೊಬ್ಬರಾಗಿ ಕರಗಿಹೋಗುತ್ತಾರೆ. ಬಾಳುವೆ ಅರಸಿ ಕಾಣದ ನಗರಕ್ಕೆ ಕಾಲಿಟ್ಟ ಕನ್ನಡದ  ಕಂದನನ್ನು ಮತ್ತೊಂದು ಪ್ರೀತಿ ಕೈಹಿಡಿಯುತ್ತದೆ .ಪ್ರೀತಿ ಸಾಗಲು ಭಾವನೆಗಳಷ್ಟೇ ಸಾಲದು ಕೈ ತುಂಬಾ ಹಣವೂ ಮುಖ್ಯವೆನ್ನುವುದು ಆದ ಅವಮಾನದಿಂದ ಅರಿವಾಗುತ್ತದೆ. ತಾನು ಐಶ್ವರ್ಯವಂತನಾಗಬೇಕೆಂದು ಬಯಸಿದಾಗ ಯಶಸ್ವಿ ಉದ್ಯಮಿಯೊಬ್ಬನ ಸಲಹೆಯೂ ಜೊತೆಯಾಗುತ್ತದೆ. ಅದರ ಬೆನ್ಹತ್ತಿ ಹೋದ ನಾಯಕ ಮತ್ತಷ್ಟು ಅನೀರೀಕ್ಷಿತ ,ಆಘಾತಕಾರಿ ತಿರುವುಗಳಿಗೆ ವಸ್ತುವಾಗುವುದೇ ರಾಜು ಕನ್ನಡ ಮೀಡಿಯಂ ಚಿತ್ರದ ತಿರುಳು.

ನಿರ್ದೇಶನ

ಮಧ್ಯಂತರದವರೆಗೆ  ಪ್ರೇಕ್ಷಕರನ್ನ ಅಲುಗದಂತೆ ಹಿಡಿದಿಟ್ಟುಕೊಳ್ಳುವ ನಿರ್ದೇಶಕ ನರೇಶ್ ಕುಮಾರ್ , ನಂತರ ಅನೀರೀಕ್ಷಿತ ತಿರುವುಗಳನ್ನು ಹೆಣೆಯುವ ಭರದಲ್ಲಿ ಕಳೆದುಹೋದಂತೆ ಭಾಸವಾಗುತ್ತಾರೆ . ವಿಶ್ವಮಾನ್ಯ ಆಂಗ್ಲ ಚಿತ್ರ ಕ್ಯಾಸ್ಟ್ಅವೇ ಯ ಬಹುಮುಖ್ಯ ತುಣುಕನ್ನು ತುರುಕಲು ಹೋಗಿ ನೈಜತೆಯನ್ನು ಕದಡಿದ್ದಾರೆ. ಆದರೆ ಒಂದಂತೂ ಸತ್ಯ ಹೊಸ ಪರಂಪರೆಯ ಪ್ರೇಕ್ಷಕರನ್ನು ಹುಟ್ಟುಹಾಕುವ ಪ್ರಾಮಾಣಿಕ ಪ್ರಯತ್ನ ಇಲ್ಲಿದೆ. ಪ್ರಥಮಾರ್ಧದ ಕಥೆಗೆ  ದ್ವಿತೀಯಾರ್ಧವೇ ಶತ್ರು !! ಹಾಗೆಂದ ಮಾತ್ರಕ್ಕೆ ನಿರ್ದೇಶಕ ಇಲ್ಲಿ ಸೋತಿದ್ದಾರೆ ಎಂದರ್ಥವಲ್ಲ. ಚಿತ್ರವನ್ನು ಹಿಗ್ಗಿಸುವ ಭರದಲ್ಲಿ ಕಥೆಯೊಳಗೆ ಉಪಕಥೆಗಳನ್ನು ಹೆಣೆಯುವಾಗ ಪ್ರೇಕ್ಷಕರ ಸಹನೆಗೊಂದು  ಸವಾಲು ಹಾಕಿದ್ದಾರೆ. ಇದೆಲ್ಲದರ ಹೊರತಾಗಿಯೂ ಚಿತ್ರದಲ್ಲಿ ನಿರ್ದೇಶಕನ ಕಲಾ ಕುಸುರಿ ಗಮನ ಸೆಳೆಯುತ್ತದೆ. ಪಂಚ್ ಗಳಿಂದ ತುಂಬಿರುವ ಬಿಗಿ ಸಂಭಾಷಣೆ ಮನಸ್ಸುಗಳನ್ನು ಸೆಳೆಯುತ್ತದೆಭವಿಷ್ಯದಲ್ಲಿ ಉತ್ತಮ ಚಿತ್ರಗಳನ್ನು ನೀಡುವ ಭರವಸೆಯನ್ನ ನರೇಶ್ ಕುಮಾರ್ ಮೂಡಿಸಿದ್ದಾರೆ.

ಕನ್ನಡ ಮೀಡಿಯಂನಲ್ಲಿ ಓದಿದವರಿಗೆ ನಗರ ಬದುಕಿನಲ್ಲಿರುವ ಇಂಗ್ಲೀಷ್ ಪಾರಮ್ಯದೊಂದಿಗೆ ಸೆಣೆಸುವಾಗ ಸಾಮಾನ್ಯವಾಗಿ ಕೀಳರಿಮೆ ಕಾಡುತ್ತದೆ. ಆದ್ರೆ ಕನ್ನಡ ಮೀಡಿಯಂ  ರಾಜುವನ್ನು ಇಂಥಹ ಕೀಳರಿಮೆಯಿಂದ ಹೊರತಂದ ಹೆಗ್ಗಳಿಕೆ ನಿರ್ದೇಶಕರದ್ದು.

ಅಭಿನಯ 

ಹಳ್ಳಿಯ ಹೈದ, ಮುಗ್ದ ಪ್ರೇಮಿ, ಛಲಗಾರ, ಕವಿ, ಕನ್ನಡಪ್ರೇಮಿ ಹೀಗೆ  ನಾನಾ ರೂಪಗಳಲ್ಲಿ ನಾಯಕ ಗುರುನಂದನ್ ನಟನೆ ಮನಸ್ಸಿಗಿಳಿಯುತ್ತದೆ. ಚೆಲ್ಲು ಹುಡುಗಿ , ಪ್ರೇಮಾನುರಾಗಿ,ವಿರಹಿಯ ಪಾತ್ರವನ್ನು ಅವಂತಿಕಾ ಶೆಟ್ಟಿ ನವಿರಾಗಿ ನಿರ್ವಹಿಸಿದ್ದಾರೆ.

ಯಶಸ್ವಿ ಉದ್ಯಮಿಯ  ಪಾತ್ರದಲ್ಲಿ ಬಂದು ವೀಪರೀತ ಬೋಧನೆ ಮಾಡದೆಯೂ ಗೆಲುವಿನ ಮಂತ್ರ ತಿಳಿಸುವಲ್ಲಿ ಸುದೀಪ್ ಅಭಿನಯ ಮನೋಜ್ಞವಾಗಿದೆ.

ಸಾಧುಕೋಕಿಲ,ಕುರಿಪ್ರತಾಪ್ , ಚಿಕ್ಕಣ್ಣ ಹೀಗೆ ಎಲ್ಲರ ಅಭಿನಯವು ಮೆಚ್ಚುವಂತಿದೆ.

ಸಂಗೀತ 

ಹಾಡುಗಳು ,ಹಿನ್ನೆಲೆ ಸಂಗೀತ ಇಂಪಾಗಿ ಚಿತ್ರಕ್ಕೆ ಮತ್ತಷ್ಟು ಮೆರಗು ತುಂಬಿವೆ.

ಛಾಯಾಗ್ರಹಣ

ಮಲೆನಾಡಿನ ಚಿತ್ರಗಳು, ಜಲಪಾತಗಳು, ಸಮುದ್ರ ,ದ್ವೀಪ, ಪಾತ್ರಧಾರಿಗಳನ್ನು ಸೆರೆಹಿಡಿಯುವಲ್ಲಿ ಶೇಖರ್ ಚಂದ್ರ ಪ್ರತಿಭೆ ಪ್ರಜ್ವಲಿಸಿದೆ.

ಎಲ್ಲ ವಯೋಮಾನದವರು ಕುಳಿತು ನೋಡಬಹುದಾದ ಚಿತ್ರ ರಾಜು ಕನ್ನಡ ಮೀಡಿಯಂ

 

 

 

 

 

ಕಳೆದು ಹೋದ ಪ್ರೇಮದ ನೆನಪು ತರುವ “ರಾಜರಥ”ದ ಕಾಲೇಜ್ ಡೇಸ್ !

ರಾಜರಥ ಸಾಕಷ್ಟು ಕುತೂಹಲ ಕೆರಳಿಸುತ್ತಿರುವ ಸಿನಿಮಾ. ಈಗಾಗ್ಲೇ ಈ ಚಿತ್ರದ ಟ್ರೈಲರ್ ರಿಲೀಸಾಗಿದೆ .ಇದೀಗ ಚಿತ್ರತಂಡ ಸಿನಿಮಾದ ಹಾಡೊಂದನ್ನು  ರಿವೀಲ್ ಮಾಡಿದ್ದಾರೆ.  ಈ ಹಾಡನ್ನ ಪ್ರೀತಿಯಲ್ಲಿ ಫೇಲ್ ಆದವರು ತಪ್ಪದೆ ಕೇಳಬಹುದು.
ಕಾಲೇಜು ದಿನಗಳ ಕುರಿತಾದ ಹಾಡಾಗಿರೋದ್ರಿಂದ ಸ್ಯಾಂಡಲ್‍ವುಡ್‍ನ ಕಾಲೇಜ್‍ಕುಮಾರ, ಸೆಂಚುರಿಸ್ಟಾರ್ ಶಿವರಾಜ್ ಕುಮಾರ್ ಅವರಿಂದಾನೇ ಬಿಡುಗಡೆ ಮಾಡಿಸಿದ್ದಾರೆ . ಕನ್ನಡ ಹಾಗೂ ತೆಲುಗು ಎರಡೂ ಭಾಷೆಗಳಲ್ಲೂ ಈ ಸಾಂಗನ್ನ ಬಿಡುಗಡೆ ಮಾಡಿದ್ದಾರೆ.
ಭಂಡಾರಿ ಬ್ರದರ್ಸ್ ಈಗಾಗ್ಲೇ ರಂಗಿತರಂಗ ಸಿನಿಮಾ ಮೂಲಕ ಸ್ಯಾಂಡಲ್‍ವುಡ್‍ನಲ್ಲಿ ಸಕ್ಸಸ್ ಸ್ಟೋರಿ ಬರೆದಿದ್ದಾರೆ . ಇದೀಗ ರಾಜರಥ ಚಿತ್ರದ ಮೂಲಕ ಚಂದನವನದಲ್ಲಿ ಮತ್ತೊಂದು ಸಂಚಲನ ಸೃಷ್ಟಿಸಲು ತಯಾರಾಗಿದ್ದಾರೆ .
ಅನೂಪ್ ಭಂಡಾರಿ ಆಕ್ಷನ್ ಕಟ್ ಹೇಳಿರುವ ಈ ಚಿತ್ರದಲ್ಲಿ, ನಿರೂಪ್ ಭಂಡಾರಿ, ಅವಂತಿಕಾ ಶೆಟ್ಟಿ ಮುಖ್ಯ ಭೂಮಿಕೆಯಲ್ಲಿದ್ದಾರೆ . ಇನ್ನು 4 ವರ್ಷದ ಲವ್‍ಸ್ಟೋರಿಯನ್ನ ಹೇಳುವ ಈ ಹಾಡು  ಲವ್‍ಫೇಲ್ಯೂರ್ ಆಗಿರೋ ಹುಡುಗರಿಗೆ ಬಹಳ ಆಪ್ತ ಅನ್ನಿಸುತ್ತೆ .  ಅನೂಪ್ ಭಂಡಾರಿ ಬರೆದಿರೋ ಈ ಹಾಡಿಗೆ ನಕುಲ್ ಅಭಯಂಕರ್ ಮ್ಯೂಸಿಕ್ ನೀಡಿದ್ದಾರೆ.

ಸೆಟ್ಟೇರಿತು ದರ್ಶನ್ 51ನೇ ಚಿತ್ರ !!

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ 51 ನೇ ಸಿನಿಮಾದ ಮುಹೂರ್ತ ನೆರವೇರಿದೆ. ಸಾಕಷ್ಟು ದಿನಗಳಿಂದ ಕುತೂಹಲ ಮೂಡಿಸಿದ್ದ  ದರ್ಶನ್ ಅವರ 51ನೇ ಚಿತ್ರಕ್ಕೆ ನಾಯಕಿಯರು ಯಾರು..? ಯಾರು ಆಕ್ಷನ್ ಕಟ್ ಹೇಳ್ತಾರೆ ? ಈ ಕುರಿತ ಕಂಪ್ಲೀಟ್ ಡೀಟೈಲ್ಸ್​ ಇಲ್ಲಿದೆ ನೋಡಿ..
ಸದ್ಯ ಸ್ಯಾಂಡಲ್‍ವುಡ್‍ನಲ್ಲಿ ಸಿಕ್ಕಾಪಟ್ಟೆ ಕ್ಯೂರಿಯಾಸಿಟಿ ಕ್ರಿಯೇಟ್ ಮಾಡಿರೋದು ಚಾಲೆಂಜಿಂಗ್ ಸ್ಟಾರ್ ಜೊತೆಗೆ ದೊಡ್ಡ ಸ್ಟಾರ್ಕಾಸ್ಟ್ ಸೇರಿ ಅಭಿನಯಿಸ್ತಿರೋ ಕುರುಕ್ಷೇತ್ರ ಸಿನಿಮಾ.. ಇದು ದಚ್ಚುವಿನ 50ನೇ ಸಿನಿಮಾ ಅನ್ನೋ ಖುಷಿ ಒಂದೆಡೆ ಆದ್ರೆ. ಇದೀಗ ಸಂಕ್ರಾಂತಿ ಹಬ್ಬದ ವಿಶೇಷವಾಗಿ ತಮ್ಮ ಅಭಿಮಾನಿಗಳಿಗೆ ಸ್ಪೆಷಲ್ ಗಿಫ್ಟ್ ಒಂದನ್ನ ಕೊಟ್ಟಿದ್ದಾರೆ. ದರ್ಶನ್‍ ಅಭಿನಯದ 51ನೇ ಸಿನಿಮಾ ಬಗ್ಗೆ ಇದ್ದ ಕುತೂಹಲಕ್ಕೆ ತೆರೆ  ಬಿದ್ದಿದೆ..
ಕಿರಿಕ್ ಪಾರ್ಟಿ ಬೆಡಗಿ ರಶ್ಮಿಕಾ ಮಂದಣ್ಣ, ದರ್ಶನ್ ಅಭಿನಯದ 51ನೇ ಸಿನಿಮಾದಲ್ಲಿ ಅಭಿನಯಿಸಲಿದ್ದಾರೆ. ಚಿತ್ರದ ಮುಹೂರ್ತ ನೆರವೇರಿದ್ದು, ಪಿ.ಕುಮಾರನ್ ಆಕ್ಷನ್ ಕಟ್ ಹೇಳ್ತಿದ್ದಾರೆ.. ಬಿ.ಸುರೇಶ್ ಹಾಗೂ ಶೈಲಜಾನಾಗ್ ಪ್ರೊಡ್ಯೂಸ್ ಮಾಡಲಿದ್ದು, ವಿ.ಹರಿಕೃಷ್ಣ ಸಂಗೀತ ಹಾಗೂ ಬಹದ್ದೂರ್ ಚೇತನ್ ಸಂಭಾಷಣೆ ಬರೆಯಲಿದ್ದಾರೆ. ಶ್ರೀಷಾ ಕುಡುವಳ್ಳಿ ಕ್ಯಾಮೆರಾ ಕೈಚಳಕ ದರ್ಶನ್​ರ 51ನೇ ಚಿತ್ರದಲ್ಲಿರಲಿದೆ..
ಒಟ್ನಲ್ಲಿ ದರ್ಶನ್ 51ನೇ ಸಿನಿಮಾ ಸಂಕ್ರಾಂತಿ ದಿನವೇ ಸೆಟ್ಟೇರಿದ್ದು, ಫೆಬ್ರವರಿಯಿಂದ ಸಿನಿಮಾ ಶೂಟಿಂಗ್ ಶುರುವಾಗಲಿದ್ಯಂತೆ.  ಚಿತ್ರತಂಡಕ್ಕೆ ಒನ್ಸ್ ಅಗೈನ್ ಆಲ್ ದಿ ಬೆಸ್ಟ್..

5 ಕೋಟಿ ಬೆಲೆಯ ಲ್ಯಾಂಬೋರ್ಗಿನಿ ಒಡೆಯರಾದ ಕನ್ನಡದ ಮೊದಲ ನಟ ದರ್ಶನ್ !

ಸಂಕ್ರಾಂತಿ ಹಬ್ಬ ದರ್ಶನ್  ಗೆ ಬಹಳ ಖುಷಿ ತಂದಿದೆ . ಲ್ಯಾಂಬೋರ್ಗಿನಿ ಎಂಬ ತಮ್ಮ ಹೊಸ ಕಾರಲ್ಲಿ  ಮೈಸೂರಿಗೆ ಹೋಗಿದ್ದಾರೆ ಚಾಲೆಂಜಿಂಗ್ ಸ್ಟಾರ್ .

ಲ್ಯಾಂಬೋರ್ಗಿನಿ

ವಿಶ್ವದ ಅತಿ ಅದ್ದೂರಿ ಮತ್ತು ಅತಿ ದುಬಾರಿ ಕಾರು. ಈ ಕಾರನ್ನು ಖರೀದಿಸಬೇಕು ಅನ್ನುವುದು ಬಿಡಿ. ಈ ಕಾರನ್ನೊಂದ್ಸಲ ನೋಡಬೇಕು ಅಂತ ಆಸೆ ಇಟ್ಟುಕೊಳ್ಳುವುದೇ ಕಷ್ಟ. ಅಷ್ಟು ದುಬಾರಿ ಕಾರು ಇದು. ಇಂಥಾ ಭಾರಿ ಕಾರನ್ನು ಖರೀದಿಸಿದ್ದಾರೆ ದರ್ಶನ್. ಅಚ್ಚ ಬಿಳಿಯ ಕಾರು ಸಂಕ್ರಾಂತಿಯ ದಿನ ಬೆಳಿಗ್ಗೆ ದರ್ಶನ್ ಮನೆ ಮುಂದೆ ನಿಂತಿತ್ತು.ಅಂದಹಾಗೆ ಈ ಸಂಕ್ರಾಂತಿಯಂದು ದರ್ಶನ್ ಗೆ ಎರಡು ಸಂಭ್ರಮ. ಒಂದು ತನ್ನ 51ನೇ ಚಿತ್ರದ ಮುಹೂರ್ತ. ಇನ್ನೊಂದು ಲ್ಯಾಂಬೋರ್ಗಿನಿ ಆಗಮನ. ಚಿತ್ರದ ಮುಹೂರ್ತ ಮುಗಿಸಿಕೊಂಡು ಬಂದ ದರ್ಶನ್ ಕಾರಿನ ಪೂಜೆ ಮಾಡಿಸಿದರು. ಹೇಳಿಕಳಿ ದರ್ಶನ್ ಮೊದಲೇ ಕಾರು ಪ್ರಿಯ. ಡ್ರೈವಿಂಗ್ ಅನ್ನು ಸಕತ್ ಇಷ್ಟ ಪಡುವ ಚಾಲೆಂಜಿಂಗ್ ಸ್ಟಾರ್ ಪೂಜೆ ಮುಗಿಸಿದ ತಕ್ಷಣ ಲ್ಯಾಂಬೋರ್ಗಿನಿ ಹತ್ತಿಕೊಂಡು ತಮ್ಮ ಇಷ್ಟದ ಮೈಸೂರಿಗೆ ಹೊರಟರು.

ಕನ್ನಡ ಚಿತ್ರರಂಗದಲ್ಲಿ ಇದುವರೆಗೆ ಯಾರೂ ಲ್ಯಾಂಬೋರ್ಗಿನಿ ಖರೀದಿಸಿಲ್ಲ. ಲ್ಯಾಂಬೋರ್ಗಿನಿ ಒಡೆಯರಾದ ಕನ್ನಡ ಕಲಾವಿದರಲ್ಲಿ ದರ್ಶನ್ ಮೊದಲಿಗರು. ಅವರಿಗೆ ಈ ಕಾರು ಕೊಳ್ಳಬೇಕೆಂದು ತುಂಬಾ ಆಸೆ ಇತ್ತಂತೆ. ಆ ಆಸೆ ಈಗ ನೆರವೇರಿದೆ ಎನ್ನುತ್ತದೆ ಮೂಲಗಳು.

ಕಿಚ್ಚನ ಸಂಕ್ರಾಂತಿ ಕಿಚ್ಚು ಹೇಗಿತ್ತು ಗೊತ್ತಾ..?

ಮಕರ ಸಂಕ್ರಾಂತಿ ವಿಶೇಷವಾಗಿ ಸ್ಯಾಂಡಲ್‌ವುಡ್ ಸ್ಟಾರ್ ಗಳು ಹಲವು ಕಾರ್ಯಕ್ರಮಕ್ಕೆ ಹಾಜರಾಗೋದು ಕಾಮನ್. ಆದ್ರೆ ಸದಾ  ಬ್ಯುಸಿ ಶೆಡ್ಯೂಲ್ ನಲ್ಲಿ ಕೆಲಸ ಮಾಡುವ ಕಿಚ್ಚ ಸುದೀಪ್ ಈ ಬಾರಿ ಸಂಕ್ರಾಂತಿಯನ್ನು ಕನಕಪುರದಲ್ಲಿ ನಡೆದ  ಕನಕೋತ್ಸವದಲ್ಲಿ ಆಚರಿಸಿದರು. ಇಂಧನ ಸಚಿವ ಡಿ.ಕೆ.ಶಿವಕುಮಾರ್ ನೇತೃತ್ವದಲ್ಲಿ ನಡೆದ ಐದು ದಿನಗಳ ಸಮಾರೋಪ ಸಮಾರಂಭದಲ್ಲಿ ಭಾಗಿಯಾಗಿದ್ದ ಅಭಿನಯ ಚರ್ಕವರ್ತಿ ಸುದೀಪ್ ಅಭಿಮಾನಿಗಳನ್ನು ರಂಜಿಸಿದ್ರು. ಸುಮಾರು 50 ಸಾವಿರಕ್ಕೂ ಹೆಚ್ಚು ಜನರು ಕಿಚ್ಚನ ಹಾಡು ಹಾಗೂ ಡೈಲಾಗ್ ಗೆ ಮನ ಸೋತು ಕೇಕೆ, ಶಿಳ್ಳೆ ಹಾಕಿ ಸಂಭ್ರಮಿಸಿದ್ರು.
 ಸೊಂಟದ ವಿಷ್ಯ, ಬ್ಯಾಡವೋ ಶಿಷ್ಯ ಎಂದು ಹಾಡಿನ ಸಾಹಿತ್ಯ ಹೇಳ್ತಿದ್ರೆ ಅಭಿಮಾನಿಗಳು ರನ್ನನಿಗೆ ದನಿಗೂಡಿಸಿದ್ರು.. ಕನಕೋತ್ಸವದಲ್ಲಿ ಕಿಚ್ಚನಿಗೆ ಸನ್ಮಾನಿಸಿದ  ಡಿ.ಕೆ.ಬ್ರದರ್ಸ್, ಕಿಚ್ಚನ ಅಭಿಮಾನಿಗಳು ರಚಿಸಿದ್ದ ಚಿತ್ರಗಳನ್ನ  ಉಡುಗೊರೆಯಾಗಿ ನೀಡಿದರು. ಸುದೀಪ್ ಗೆ ಸನ್ಮಾನಿಸಿ ಮಾತನಾಡಿದ ಇಂಧನ ಸಚಿವ ಡಿ.ಕೆ.ಶಿವಕುಮಾರ್, ಸುದೀಪ್‌ರವರು ಕನ್ನಡಕ್ಕೆ ಮಾತ್ರ ನಟನಲ್ಲ, ಅವರು ಇಡೀ ರಾಷ್ಟ್ರ ಮೆಚ್ಚಿರುವ ಅದ್ಭುತ ನಟ, ಅವರು ಕರ್ನಾಟಕದ ಆಸ್ತಿ ಅಂತಾ ಕೊಂಡಾಡಿದ್ರು.
 ಕಾರ್ಯಕ್ರಮದ ಕೇಂದ್ರಬಿಂದುವಾಗಿದ್ದ ನಟ ಕಿಚ್ಚ ಸುದೀಪ್ ಅಭಿಮಾನಿಗಳಿಗಾಗಿ ಹುಚ್ಚ ಸಿನಿಮಾದ
ಎವರ್‌ಗ್ರೀನ್ ಸಾಂಗ್ ಉಸಿರೇ ಉಸಿರೇ  ಹಾಡುತ್ತಿದ್ದಂತೆ ಅಭಿಮಾನಿಗಳ ಖುಷಿ ಮತ್ತಷ್ಟು ಹೆಚ್ಚಾಯ್ತು. ಇಡಿ ಮೈದಾನದ ತುಂಬ ನೆರೆದಿದ್ದ ಅಭಿಮಾನಿಗಳು, ತಮ್ಮ ಮೊಬೈಲ್ ಗಳಲ್ಲಿ ಕಿಚ್ಚನನ್ನ ಸೆರೆ ಹಿಡಿದರು. ಅಭಿಮಾನಿಗಳನ್ನು ಉದ್ದೇಶಿಸಿ ಮಾತನಾಡಿದ ಬಿಗ್ ಬಾಸ್ ಕನಕೋತ್ಸವ ಕಾರ್ಯಕ್ರಮಕ್ಕೆ ಬಂದಿದ್ದು ನನಗೆ ಬಹಳ ಸಂತಸವಾಗಿದೆ. ಹಿಂದೆ ಕನಕಪುರ ಹಳ್ಳಿಯ ರೀತಿ ಇತ್ತು, ಆದರೆ ಇಂದು ಕನಕಪುರ ನಗರವಾಗಿ ಬೆಳೆಯುತ್ತಿದೆ, ಅದಕ್ಕೆಲ್ಲ ಕಾರಣ ಡಿ.ಕೆ.ಬ್ರದರ್ಸ್ ಅಂದ್ರು.
ಜ್ಯೋತಿ ಗೌಡ, ನಾಗಮಂಗಲ

ಬಿಗ್ ಬಸ್ ಮನೆಯಲ್ಲಿ ಜೋಡಿ ವಿವಾಹ

 ಕಳೆದ ರಾತ್ರಿ ಪ್ರಸಾರವಾದ ಬಿಗ್ ಬಾಸ್ ಎಪಿಸೋಡ್ ನಲ್ಲಿ ಜೋಡಿ ವಿವಾಹ ಕಾರ್ಯಕ್ರಮ ನಡೀತು. ಒಂದು ಹಳೇ ಜೋಡಿಗೆ ಮರುವಿವಾಹ ಆದ್ರೆ, ಮತ್ತೊಂದು ಕನಸುಗಳನ್ನು ಕಾಣುತ್ತಿರುವ ನವ ಜೋಡಿಯ ವಿವಾಹ. ಒಂದು ಮದುವೆ ಪೂರ್ವ ನಿಯೋಜಿತವಾಗಿದ್ದು, ಮತ್ತೊಂದು ವಿವಾಹ ಊಹೆಗೂ ನಿಲುಕುದಂತೆ ನಡೆದು ಹೋಯ್ತು. ಮದುವೆ ಕಾರ್ಯಕ್ರಮ ಸಾಗುತ್ತಿದ್ದ ರೀತಿ ನೋಡಿ ಬಿಗ್ ಬಾಸ್ ಕೂಡ ಕ್ಷಣ ಮಾತ್ರ ಚಕಿತರಾದ್ರು. ಮಧ್ಯೆ  ಮಧ್ಯೆ  ಕಾಮೆಂಟ್ ಮಾಡ್ತಿದ್ದ ಬಿಗ್ ಬಾಸ್ ಮದುವೆ ಮುಗಿಯೋ ತನಕ ಸೊಲ್ಲೆತ್ತಲಿಲ್ಲ. ಅದರಲ್ಲೂ ಬಿಗ್ ಬಾಸ್ ಮನೆಯಲ್ಲೇ ಕಲೆತಿದ್ದ ಎರಡು ಹೃದಯಗಳು ಬಿಗ್ ಬಾಸ್ ಮನೆಯಲ್ಲೇ ಒಂದಾಗಿದ್ದು ವಿಶೇಷ..
ಜಯರಾಮ್ ಕಾರ್ತಿಕ್ ಹಾಗೂ ಸಿಂಗರ್ ಶೃತಿ ಬಿಗ್ ಬಾಸ್ ಮನೆಯ ಪ್ರೇಮ ಪಕ್ಷಿಗಳು. ನೇರವಾಗಿ ಎಲ್ಲರ ಮುಂದೆ ಹೇಳಿಕೊಳ್ಳದಿದ್ದರು, ಒಂದಾದ ಹೃದಯಗಳು ಟಿವಿ ಪರದೆ ಮೇಲೆ ಜನರಿಗೆ ಕಾಣಿಸುತ್ತಿದೆ. ಒಬ್ಬರಿಗೊಬ್ಬರ ಸಹಕಾರ, ಮಮಕಾರ, ಪ್ರೀತಿ ವಾತ್ಸಲ್ಯ ತುಂಬಿರುತ್ತೆ. ನಿನ್ನೆ ಸ್ಟ್ಯಾಚ್ಯೂ ಪ್ಲೇ ಗೇಮ್ ನಡೆಯುವಾಗ ಶೃತಿ ಹಾಗೂ ಜೆಕೆ ಒಮ್ಮೆ ಎದುರು ಬದುರಾದರು. ಇಬ್ಬರನ್ನು ಬಿಗ್ ಬಾಸ್ ಸ್ಟ್ಯಾಚ್ಯೂ ಮಾಡಿದ್ರು. ಈ ವೇಳೆ ರ‌್ಯಾಪರ್ಸ್ ಚಂದನ್ ಶೆಟ್ಟಿ ಹಾಗೂ ನಿವೇದಿತಾ, ದಿವಾಕರ್ ಎಲ್ಲರೂ ಸೇರಿಕೊಂಡು ಆಚಾರ್ಯರನ್ನು ಪುರೋಹಿತರನ್ನಾಗಿ ಮಾಡಿಕೊಂಡು ಮದುವೆ ಶಾಸ್ತ್ರ ಮುಗಿಸಿದ್ರು.
ಇನ್ನೊಂದೆಡೆ ನಿನ್ನೆ ಬಿಗ್ ಬಾಸ್ ಮನೆಯೊಳಕ್ಕೆ ಹೋಗಿದ್ದ ಸಮೀರ್ ಆಚಾರ್ಯ ಪತ್ನಿ ಹೂಮಾಲೆ ಹಿಡಿದುಕೊಂಡೇ  ಹೋಗಿದ್ರು. ನಮ್ಮ ಮದುವೆಗೆ ನಿಮ್ಮನ್ನು ಕರೆಯಲಾಗಲಿಲ್ಲ. ಹಾಗಾಗಿ ಮತ್ತೆ ಬಿಗ್ ಬಾಸ್ ಮನೆಯೊಳಗೆ ಮದುವೆ ಮಾಡಿಕೊಳ್ತೀವಿ ಅಂತ ತಿಳಿಸಿ, ದೇವರಿಗೆ ಶಾಸ್ತ್ರೋಕ್ತವಾಗಿ ಪೂಜೆ ಸಲ್ಲಿ ಹಾರ ಬದಲಾವಣೆ ಮಾಡಿಕೊಂಡು ಮದುವೆಯಾದ್ರು. ಒಟ್ಟಾರೆ ಬಿಗ್ ಬಾಸ್ ಮನೆಯೊಳಗೆ ಎರಡು ಜೋಡಿ ಮದುವೆಯಾದ ಬಳಿಕ ಸಮೀರ್ ಪತ್ನಿ ಮನೆಯಿಂದ ಹೊರ ಬಂದಿದ್ದಾರೆ. ಇನ್ನೊಂದು ಜೋಡಿ ಮನೆಯೊಳಗೇ ಇದ್ದು, ಮುಂದಿನ ಶಾಸ್ತ್ರ ಗಳು ನಡೆಯುತ್ತಾ ಅನ್ನೋದು ಗೊತ್ತಿಲ್ಲ..
ಜ್ಯೋತಿ ಗೌಡ, ನಾಗಮಂಗಲ

ಹೊಸ ವರ್ಷಕ್ಕೆ ಸನ್ನಿ ಲಿಯೋನ್ ಬರಲಿಲ್ಲ ಯಾಕೆ ಗೊತ್ತಾ..? 

ಹೊಸ ವರ್ಷಕ್ಕೆ ಸನ್ನಿ‌ ಲಿಯೋನ್ ಕರೆಸಲು ನಿರ್ಧಾರ ಮಾಡಿದ್ದ ಟೈಮ್ಸ್ ಕ್ರಿಯೇಷನ್ ಸಾಕಷ್ಟು ಖರ್ಚು ಕೂಡ ಮಾಡಿತ್ತು. ಮುಂಬೈ ತನಕ ಹೋಗಿ ಸನ್ನಿಯನ್ನು ಕಾರ್ಯಕ್ರಮಕ್ಕೆ ಒಪ್ಪಿಸಿದ್ರು. ಆದ್ರೆ ಆ ಬಳಿಕ ಆಗಿದೆಲ್ಲಾ ಇತಿಹಾಸ. ಕರವೇ ಯುವ ಸೇನೆಯವರು ವಿರೋಧ ಮಾಡಿದ್ರು ಅನ್ನೋ ಕಾರಣಕ್ಕೆ ಇಡೀ ರಾಜ್ಯ ಸರ್ಕಾರವೇ  ಮುಂದೆ ನಿಂತು ಕಾರ್ಯಕ್ರಮಕ್ಕೆ ಅನುಮತಿ ಕೊಡಲು ಸಾಧ್ಯವಿಲ್ಲ ಅಂತಾ ಹೇಳಿಕೆ ಕೊಟ್ಟು ಬಿಡ್ತು.. ಗೃಹ ಸಚಿವರೇ ಕಾರ್ಯಕ್ರಮಕ್ಕೆ ಅನುಮತಿ ಕೊಡುವುದಿಲ್ಲ ಅಂತಾ ಘೋಷಿಸಿದ ಬಳಿಕ ಪೊಲೀಸರು ಕೂಡ ಅನುಮತಿ ಕೊಡಲಿಲ್ಲ. ಬಳಿಕ ಆಯೋಜಕರು ಹೈಕೋರ್ಟ್ ಹೆ ಹೋದರೂ ಕೂಡ ಸರ್ಕಾರ ಅನುಮತಿ ಕೊಡಲಿಲ್ಲ. ಇಲ್ಲಸಲ್ಲದ ಕಾರಣ ಹುಡುಕಿ ಅನುಮತಿ ನೀಡಲಿ ನಿರಾಕರಿಸಿತ್ತು.
ಜನರೆಲ್ಲ ಸರ್ಕಾರ ಹಾಗೂ ಪೊಲೀಸರು ಅನುಮತಿ ನಿರಾಕರಿಸಿದ್ರಿಂದ ಕಾರ್ಯಕ್ರಮ ರದ್ದಾಯ್ತು ಅಂತ ತಿಳ್ಕೊಂಡಿದ್ರು. ಆದ್ರೆ ಕಾರ್ಯಕ್ರಮ ರದ್ದಾಗಿರೋದೇ ಬೇರೆ ವಿಚಾರಕ್ಕೆ ಅನ್ನೋದು ಈಗ ಬಹಿರಂಗ ಆಗಿದೆ. ಕನ್ನಡ ಪರ ಸಂಘಟನೆಯ ಸದಸ್ಯರೊಬ್ಬರು ಕಾರ್ಯಕ್ರಮ ನಡೆಯಲು ಬೇಕಾದ ವ್ಯವಸ್ಥೆ ಮಾಡ್ತೀವಿ ಅಂತ ಆಯೋಜಕರ ಬಳಿ ಹಣಕ್ಕಾಗಿ ಡೀಲ್ ಮಾಡಿದ್ರಂತೆ. ಅವರು ಕೇಳಿದಷ್ಟು ಹಣವನ್ನು ಆಯೋಜಕರು ಕೊಡಲು ನಿರಾಕರಿಸಿದ್ರಿಂದ ಕಾರ್ಯಕ್ರಮ ನಡೆಯದಂತೆ ನೋಡಿಕೊಳ್ಳಲಾಗಿದೆ ಅನ್ನೋ ಅನುಮಾನ ಮೂಡಿದೆ. 5 ಸಾವಿರವೋ 10 ಸಾವಿರವೋ ಆಗಿದ್ರೆ ಆಯೋಜಕರು ಕೂಡ ಕೊಟ್ಟು ಕೈ ತೊಳೆದು ಕೊಳ್ತಿದ್ರೇನೋ ಆದ್ರೆ ಕನ್ನಡಪರ ಸಂಘಟನೆಯವರು ಕೇಳಿದ್ದು ಬರೋಬ್ಬರಿ 30 ಲಕ್ಷ ರೂಪಾಯಿ ಎನ್ನಲಾಗಿದೆ.
ಕರವೇ ನಾರಾಯಣ ಗೌಡ ಬಣದ ಸದಸ್ಯರೊಬ್ಬರ ಸನ್ನಿ ಲಿಯೋನ್ ಕಾರ್ಯಕ್ರಮಕ್ಕೆ ಯಾವುದೇ ಅಡ್ಡಿ ಬರದಂತೆ ನೋಡಿಕೊಳ್ತೇವೆ. 30 ಲಕ್ಷ ರೂಪಾಯಿ ಕೊಡಿ ಅಂತ ಕೇಳಿರೋದು ರಾಷ್ಟೀಯ ಸುದ್ದಿ ವಾಹಿನಿ ಇಂಡಿಯಾ ಟುಡೇಯಲ್ಲಿ ಪ್ರಸಾರವಾಗಿದೆ. ಆಯೋಜಕರ ಸೋಗಿನಲ್ಲಿ ಕನ್ನಡಪರ ಹೋರಾಟಗಾರರನ್ನು ಖೆಡ್ಡಕ್ಕೆ ಬೀಳಿಸಿರುವ ರಾಷ್ಟ್ರೀಯ ಸುದ್ದಿ ವಾಹಿನಿ ಇಂಡಿಯಾ ಟುಡೇ, ಕನ್ನಡಪರ ಸಂಘಟನೆ ಸದಸ್ಯ 30 ಲಕ್ಷ ರೂಪಾಯಿ ಹಣವನ್ನು ಕೇಳಿರುವ ದೃಶ್ಯಗಳನ್ನು ಪ್ರಸಾರ ಮಾಡಿದೆ. ಈ ಮೂಲಕ ಕರ್ನಾಟಕ ಹಾಗೂ ಕನ್ನಡ ಪರ ಎಂದು ಹೇಳಿಕೊಳ್ಳುವ ಕರವೇ ಸಂಘಟನೆಯ ಮಾನವನ್ನು ಹರಾಜು ಹಾಕಿದೆ.
ಜ್ಯೋತಿ ಗೌಡ, ನಾಗಮಂಗಲ

Like Us, Follow Us !

122,752FansLike
1,819FollowersFollow
1,385FollowersFollow
2,295SubscribersSubscribe

Trending This Week