18 C
Bangalore, IN
Tuesday, December 19, 2017

“ರಾಜ್ ಲೀಲಾ ವಿನೋದ ” ಕಥೆ -ವ್ಯಥೆ

ಇದು ಹೆತ್ತೊಡಲ ಕಿಚ್ಚಲ್ಲದೆ ಮತ್ತೇನು? ಮಗುವಿನ ತಂದೆ ಯಾರೆಂಬುದು ಹೆತ್ತ ತಾಯಿಗೆ ಮಾತ್ರ ಗೊತ್ತಿರುವ ಆತ್ಯಂತಿಕ ಸತ್ಯ. ಅದನ್ನಿಲ್ಲಿ ಲೀಲಾವತಿ ಹೇಳಿಕೊಂಡಿದ್ದಾರೆ. ಅವರದೇ ಧ್ವನಿಯ ದಾಖಲೆಗಳು, ರಾಜ್ಕುಮಾರ್ ಅವರು ಬರೆದ ಆತ್ಮೀಯ ಪತ್ರಗಳು ರವಿ ಬೆಳಗೆರೆಯವರು ಅಕ್ಷರ ರೂಪ ಕೊಟ್ಟ  ” ರಾಜ್ ಲೀಲಾ ವಿನೋದ” ಪುಸ್ತಕದಲ್ಲಿದೆ.

raaj-leelavinoda-cover

ನಟನೆಯಿಂದಲೇ ನಟಸಾರ್ವಭೌಮ, ಜನರೊಂದಿಗಿನ ನಯ-ವಿನಯ, ವಿಧೇಯತೆ , ವೃತ್ತಿ ನಿಷ್ಠೆ ಯಿಂದ ದೇವತಾ ಮನುಷ್ಯನೆನಿಸಿಕೊಂಡವರು  ಡಾ .ರಾಜ್ಕುಮಾರ್ . ರಾಜ್ಕುಮಾರ್ ತಮ್ಮ  ಜೀವಿತಾವಧಿಯಲ್ಲಿ ಹೇಳಲೇಬೇಕಿದ್ದ , ಹೇಳಲಾಗದ ಪರಮಸತ್ಯವನ್ನು ತಾನು ಅಳಿದು ಹೋಗುವ ಮುನ್ನ ಹೇಳಿ ಹೋಗುವ ಕಟ್ಟಕಡೆಯ ಪ್ರಯತ್ನ ಲೀಲಾವತಿಯವರದ್ದು.

leelavati

ಸತ್ಯ ಗೊತ್ತಿರುವ ಕೆಲವರ ಬಾಯಿಗೆ ಬೀಗ ಜಡಿಯಲಾಗಿದೆ. ಮತ್ತಲವರು ದೊಡ್ಡವರ ಉಸಾಬರಿ ತಮಗೇಕೆ ಅಂತ ಬಿಗಿದುಕೊಂಡಿದ್ದಾರೆ. ಅವರ ಆಪ್ತವಲಯದಲ್ಲಿದ್ದ ಅನೇಕರಿಗೆ ಗೊತ್ತಿರುವ ವಿಷಯವಾದರೂ ಗುಸು ಗುಸು -ಪಿಸು ಮಾತಿನಲ್ಲೇ ಬೂದಿಮುಚ್ಚಿದೆ ಕೆಂಡವಾಗಿದೆ ವಿನೋದ್ ರಾಜ್ ನ ಹುಟ್ಟಿನ ಗುಟ್ಟು.

ಆಕೆ ಹೆಣ್ಣು . ರಾಜ್ಕುಮಾರ್ ಅವರಿಗೆ ಇದ್ದ ,ಇರುವ ಅಭಿಮಾನಿ ಬಳಗವಿಲ್ಲ . ಅಲ್ಪಸ್ವಲ್ಪವಿದ್ದರೂ ಅವರ್ಯಾರು ಸಂಕಟ ಬಂದಾಗ ವೆಂಕಟ ರಮಣ.. ಎಂದು  ಆರ್ತನಾದ ಮಾಡಿದರೂ ಬಂದು ನಿಲ್ಲುವ ದೇವರುಗಳಲ್ಲ. ಕಾಳಗಕ್ಕಿಳಿಯುವ ಕಾರ್ಯಕರ್ತರಿಲ್ಲ. ಇವತ್ತಿಗೂ ಕನ್ನಡದ  ಯಾವ ಕಲಾವಿದೆಯ ಪಾಲಿಗೂ ಅಂತಹ  ದಂಡು ದಕ್ಕಿಲ್ಲ.ಭೀತಿಯಲ್ಲೇ ಕಾಲ ಸವೆಸಿದ ಕಲಾವಿದೆ ಲೀಲಾವತಿ .  ಎಂದೋ ತೆರೆದಿಡಬೇಕಾದ ಮಗನ ಹುಟ್ಟಿನ ರಹಸ್ಯವನ್ನು ಇಷ್ಟು ಕಾಲ  ಗಟ್ಟಿ ದನಿಯಲ್ಲಿ ಹೇಳಲಾಗದಿದ್ದಕ್ಕೆ ಇದೂ ಒಂದು ಕಾರಣ.

Actor Leelavati and son Vinodraj seen at Upparpet Police Station after an attack on their car in Bangalore on Saturday. --KPN
Actor Leelavati and son Vinodraj seen at Upparpet Police Station after an attack on their car in Bangalore on Saturday. –KPN

ವಿನೋದ್ ರಾಜ್ಗೆ ರಾಜ್ಕುಮಾರ್ ಅವರೇ ತಂದೆ. ಮಗನೆಂಬ ಹಕ್ಕು ಸ್ಥಾಪಿಸಿ ಆಸ್ತಿಯಲ್ಲಿ ಪಾಲು ಕೊಡಿ ಅಂತ ಇಲ್ಲಿ ಲೀಲಾವತಿ ಕೇಳಿಲ್ಲವಲ್ಲ. “ನನಗೂ ವಯಸ್ಸಾಯಿತು ಈಗ..ಈಗಲಾದರೂ ಒಂದೇ ಒಂದು ಸಾರಿ ವಿನು ನಿಮ್ಮ ಮಗನೆಂಬ ಸತ್ಯಸಂಗತಿಯನ್ನು ಜಗತ್ತಿಗೆ ಹೇಳಿಬಿಡಿ.ತನ್ನ ತಂದೆ ನೀವೇ ಎಂದು  ಗೊತ್ತಿದ್ದರೂ ನಿಮ್ಮ ಪ್ರೀತಿಯ ನೆರಳಲ್ಲಿ ವಿನು ಬಾಳಲಾಗಲಿಲ್ಲ. ಯಾರ ಮುಂದೆಯೂ ಇವರೇ.. ಈ ಮಹಾನುಭಾವರೇ ನನ್ನ ತಂದೆ ಎಂದು ಹೇಳಿಕೊಳ್ಳಲಾಗದೆ ದಿನದಿನವೂ ಕೊರಗುವ ನಮ್ಮ ಒಂದೇ ಒಂದು ಕರುಳ ಕುಡಿಯ ಯಾತನೆಗೆ ಕೊನೆಯಾಡಿಬಿಡಿ” ಹೀಗೆ ಅಂಗಲಾಚಿ ಬೇಡಿಕೊಳ್ಳೋಣವೆಂದರೆ ಅಪ್ಪಾ.. ಎನಿಸಿಕೊಳ್ಳದೆ ಬರಿಯ ಬಸಿರುಗಟ್ಟಿಸಿದ ದೊಡ್ಡವರೆಂಬ ದೊಡ್ಡ ಜೀವ ಉಳಿದಿಲ್ಲವಲ್ಲ. ಲೀಲಾವತಿಯಲ್ಲದೆ ಮತ್ಯಾರು ಹೇಳಿಯಾರು ಬಚ್ಚಿಟ್ಟ , ಮುಚ್ಚಿಟ್ಟ ಕುದಿವ ಸತ್ಯವನ್ನು ?

ಅವರೇಕೆ ಹೇಳಲಿಲ್ಲ?

ಅವರು ಅಗಲಿದ ಮೇಲಿರಿಲಿ ,ಬದುಕಿದ್ದಾಗಲೇ ಅವರನ್ನೊಂದು ಪ್ರೇಮಿನಲ್ಲಿಟ್ಟು (ಚೌಕಟ್ಟು) ನೀವು ಹೀಗೆಯೇ ಇರಬೇಕು. ನೀವು ಹೀಗಿದ್ದರೇ  ಸರಿ ಎನ್ನುವಂತೆ ನೋಡಿದ ಮಂದಿ ಇಂಥದೊಂದು ಸತ್ಯವನ್ನು ಬಿಚ್ಚಿಡಲು ಬಿಟ್ಟಾರೆಯೇ ? ಪಾತ್ರಗಳಲ್ಲೇ ಇಮೇಜ್ ಮೀರಲಾಗದೆ ಚಡಪಡಿಸಿದ ರಾಜ್ಕುಮಾರ್ ಸಮಾಜದ ಕಟ್ಟಳೆಗಳನ್ನೂ ಮೀರಿ ನಿಲ್ಲಲು ಸಾಧ್ಯವಿತ್ತೇ ? ಎಲ್ಲಕ್ಕೂ ಮಿಗಿಲಾಗಿ  ಗಂಡನ ಶ್ರೇಯಸ್ಸು ,  ಮಕ್ಕಳ ಹಿತಕ್ಕಾಗಿ ಸಂಸಾರದ ನೊಗದ ಜೊತೆಗೆ  ಚಿತ್ರಗಳ ಚುಕ್ಕಾಣಿ ಹಿಡಿದ ಪಾರ್ವತಮ್ಮ ಎಂಬ ಮಡದಿಯನ್ನು ಒಪ್ಪಿಸಿ, ಲೀಲಾವತಿಯವರನ್ನು ಉಳಿಸಿಕೊಳ್ಳುವುದು ಸಾಧ್ಯವಿತ್ತೇ ? ರಾಜ್ಕುಮಾರ್ ಪಾಲಿನ ಭಾಗ್ಯ ಲಕ್ಷ್ಮಿ ಪಾರ್ವತಮ್ಮ.  ತನ್ನ ಗಂಡ ತನಗೆ ಮಾತ್ರ ಮೀಸಲಾಗಿರಬೇಕು ಎಂಬ ಆಸೆಯಲ್ಲಿ ಮತ್ತೊಬ್ಬರ ಪ್ರವೇಶಕ್ಕೆ ತಡೆಯೊಡ್ಡಿದ್ದರೆ ತಪ್ಪೆನ್ನುವುದಾದರೂ ಹೇಗೆ ? ಆಕೆಗೆ ವೈಶಾಲ್ಯತೆಯ ಪಾಠ ಬೋಧಿಸಲು ನಾವ್ಯಾರು ? ಆದರೆ ತನ್ನದಲ್ಲದ ತಪ್ಪಿಗೆ ಇಷ್ಟುಕಾಲ ತಲೆತಗ್ಗಿಸಿ ಬದುಕಿದ ವಿನೋದ್ ರಾಜ್ ಗೆ ನ್ಯಾಯ ಸಿಗಲೇಬೇಕು. 

ಕತ್ತಲ್ಲಲ್ಲಿ ಕರಗುತ್ತಿದ್ದ ಸತ್ಯಕ್ಕೆ ಬೆಳಕು 

ravi-leelavati

ಒತ್ತಡಗಳು ಏನೇ ಇರಲಿ ಇದು ಕೇವಲ ಹೆಣ್ಣಿನ ಸಂಬಂಧದ ವಿಷಯವಲ್ಲ ಮಗನ ಭವಿಷ್ಯದ ವಿಷಯ. ಅವರಿರುವಾಗ ಇದೊಂದು ವಿಷಯ ಹೇಳಿಬಿಡಬೇಕಿತ್ತು ಅಂತ ರಾಜ್ಕುಮಾರ್ ಆಪ್ತವಲಯದ ಅನೇಕರಿಗೆ ಅನ್ನಿಸಿದ್ದರು ಯಾರಿಗೂ ಹೇಳುವ ಧೈರ್ಯ  ಬರಲೇ ಇಲ್ಲ. ಇದೀಗ ಅಂಥದ್ದೊಂದು ಧೈರ್ಯಕ್ಕೆ,ಸಾಹಸಕ್ಕೆ  ನಿಂತಿದ್ದು ಹಿರಿಯ ಪತ್ರಕರ್ತ ರವಿ ಬೆಳಗೆರೆ.

ravi-lelavati-vinod

ತಂದೆ ಇದ್ದೂ ,ಇಲ್ಲದಂತೆ ಕಣ್ಣೆದುರಿನಲ್ಲೇ ಸುಳಿದಾಡಿದರೂ, ಒಡನಾಡಿದರೂ ಹೊರ ಜಗತ್ತಿಗೆ ಹೇಳಿಕೊಳ್ಳಲಾಗದೆ ಒಳಗೊಳಗೇ ಬೆಂದ ಜೀವ ಬೆಳಗೆರೆ. ಇವತ್ತಿಗೂ ಅವರ ಸಾಧನೆಯ ಎತ್ತರದ ಬುಡಕ್ಕೂ ನಿಲುಕದ ಒಂದಿಷ್ಟು ಜನ ಅವ್ರ  ಹುಟ್ಟಿನ ಬಗ್ಗೆ ಕೀಳಾಗಿ ಮಾತಾಡುವುದನ್ನು ಪ್ರಶ್ನಿಸುವುದನ್ನು ಬಿಟ್ಟಿಲ್ಲ. ಅವಮಾನವನ್ನು ನುಂಗಿ ಅಕ್ಷರವನ್ನೇ ಅಪ್ಪಿ ಅಪಾರ ಮನ್ನಣೆ ಗಳಿಸಿದ್ದು ಶ್ರದ್ದೆ ಶ್ರಮದ ಬಲದಿಂದ. ಅಪ್ಪನಿಗಾಗಿ ಹಂಬಲಿಸಿದ ರವಿಬೆಳೆಗೆರೆ ಮಾತ್ರ ಇಂಥ ಒಂದು ಗಾಢ ನೋವಿಗೆ ಕಿವಿಯಾಗಬಲ್ಲರು. ಅಕ್ಷರವಾಗಿಸಿಬಲ್ಲರು.

ಅಪ್ಪ ಸತ್ತು ಅಮ್ಮನ ಆಸರೆಯಲ್ಲೇ ಬೆಳೆದಾಗ ತಂದೆಯಿಲ್ಲದ ನೋವು ಕಾಡುವುದು ಬೇರೆ .ಕಣ್ಣೆದುರಿಗೇ ಇದ್ದು ,ಉಳಿದ ಮಕ್ಕಳೊಂದಿಗೆ ಬೆರೆಯುವ, ಅಪ್ಪಿ ಮುದ್ದಾಡುವ ಅಪ್ಪನನ್ನು ಅಪ್ಪಾ .. ಎಂದು ಕರೆಯಲಾಗದ, ಅಪ್ಪಿಕೊಳ್ಳಲಾಗದ ಒಡಲ ಸಂಕಟವೇ ಬೇರೆ. ಅನುಭವಿಸಿಯಲ್ಲದೆ ಅರ್ಥವಾಗದ ರಣ ಗಾಯದ ಹಸಿ ಹಸಿ ನೋವಿದು.

babruvaahana

ಲಂಕೇಶರ ಮಡದಿ(ಹುಳಿಮಾವು ಮತ್ತು ನಾನು ) ಹೇಳಿರುವಂತೆ “ನೀಲು ಕವನಗಳಂತೂ ಹೆಣ್ಣಿನ ಮನಸ್ಸು ಏನೆಲ್ಲಾ ಯೋಚಿಸುತ್ತದೆ, ಅನುಭವಿಸುತ್ತದೆ ಎಂಬುದನ್ನು ಸ್ಪಷ್ಟವಾಗಿ ಬಿಂಬಿಸುತ್ತಿದ್ದವು. ಮಹಿಳೆಯರ ಮನಸ್ಸನ್ನು ಇಷ್ಟು ಚೆನ್ನಾಗಿ ತಿಳಿದಿದ್ದ ಲಂಕೇಶರು ನನ್ನ ಮನಸ್ಸನ್ನು ಯಾಕೆ ಅರ್ಥ ಮಾಡಿಕೊಳ್ಳಲಿಲ್ಲ ಎಂದು ನನಗನ್ನಿಸುತ್ತಿತ್ತು”.  ಬಬ್ರುವಾಹನ ಚಿತ್ರದಲ್ಲಿ ತಂದೆ ಇಲ್ಲದೆ ಬೆಳೆದು ,ಕೊನೆಗೆ ತಂದೆ ಯಾರೆಂದು ತಿಳಿದ ಮೇಲೂ ಅನುಭವಿಸಿದ ಅವಮಾನವನ್ನೆಲ್ಲಾ   ಬಬ್ರುವಾಹನನೇ ಮೈವೆತ್ತಂತೆ, ಹೃದಯಕ್ಕೆ ಮುಟ್ಟುವಂತೆ ಅಭಿನಯಿಸಿದ ರಾಜ್ಕುಮಾರ್ ಅವರಿಗೆ ತನಗಾಗಿ , ತನ್ನ ಪ್ರೀತಿಗಾಗಿ ಹಂಬಲಿಸುವ ಮಗನ ನೋವು ಅರ್ಥವಾಗದೆ ಹೋಯಿತಲ್ಲ ಎಂದು ವಿನೋದ್ ರಾಜ್ ಗೆ ಅನ್ನಿಸದೆ ಇದ್ದೀತೆ ?

File photo of actor Leelavati and son Vinodraj, seen at Vidhana Soudha on Jan 26 09, in Bangalore. --KPN

ಇದೆಲ್ಲ ಒಂದೆಡೆಗಾದರೆ ಈ “ರಾಜ್ ಲೀಲಾ ವಿನೋದ” ಪುಸ್ತಕ ಬಂದ  ಮಾತ್ರಕ್ಕೆ ಅವರ ಮೇಲಿನ ಅಭಿಮಾನಕ್ಕೇಕೆ ಧಕ್ಕೆಯಾಗಬೇಕು ? ತೆರೆಯ ಮೇಲೆ ಅವರ ಬದುಕಿನ ಬಹುದೊಡ್ಡ ಭಾಗವನ್ನು ನೋಡಿ ಆನಂದಿಸಿ, ಅನುಭವಿಸಿಯಾಗಿದೆ. ಬಂಗಾರದ ಮನುಷ್ಯನನ್ನು ಒಪ್ಪಿಕೊಂಡವರು ಹಿರಣ್ಯಕಶಿಪುವನ್ನು ಒಪ್ಪಿಕೊಂಡಿದ್ದೆವಲ್ಲ. ಹಾಗೆಯೇ ಅವರ ಬದುಕಿನ ಮತ್ತೊಂದು ಮಗ್ಗುಲನ್ನು ನೋಡುವುದು ಕಷ್ಟವೇ?

ಈ ಪುಸ್ತಕದಲ್ಲಿ ಬೇರೇನಿದೆಯೋ ಇಲ್ಲವೋ ವಿನೋದ್ ರಾಜ್ ,ರಾಜ್ಕುಮಾರ್ ಅವರ ಪುತ್ರ ಎಂಬುದನ್ನು ದಾಖಲಿಸುವ ಪ್ರಾಮಾಣಿಕ ಪ್ರಯತ್ನವಿರುವುದನ್ನು ಒಪ್ಪಲೇಬೇಕು. ಲೀಲಾವತಿ ತನ್ನ ಸುತ್ತಲಿನ ಸಂಗತಿಗಳನ್ನು ಬಿಚ್ಚಿಟ್ಟಿರುವ ಉದ್ದೇಶವೇ ಅದು. ರವಿ ಬೆಳಗೆರೆಯಲ್ಲದೆ ಮತ್ಯಾರೂ ಬರೆದು ಬಯಲಾಗಿಸಲಾಗದ  ಸತ್ಯವಿದು.

-ಭಾನುಮತಿ ಬಿ ಸಿ

 

ದಿ ವಿಲನ್ ಫಸ್ಟ್ ಲುಕ್ ನಲ್ಲಿ ವಿಶೇಷ ಏನಿದೆ ಗೊತ್ತಾ?

ನೋಡಿದಾಕ್ಷಣ ಸೆಳೆಯುವ ಹಸಿರು -ನೀಲಿ ಕಣ್ಣು.
ಕಿವಿ ಮೇಲೆ ಎಕ್ಸ್ ಮಾರ್ಕು.
ಮುಖದಲ್ಲಿ ಚಿಮ್ಮುವ ರೋಷ
ಕಿವಿಯಲ್ಲಿ ಓಲೆ
ಸಿಡಿದು ನಿಂತಿರೋ ಮುಂದಲೆ
ಬಿಗಿದ ತುಟಿಗಳು
ಅಟ್ಯಾಕ್ ಲೈಕ್ ಎ  ಟೈಗರ್ ತರಹದ ಮುಖಭಾವ
 ಎದುರು ನಿಂತವರನ್ನ ಹಿರಿಯುವಂಥ ಸೀಳು ನೋಟ
ಅದು ಸುದೀಪ್!!
ಜಗ ಜಟ್ಟಿಯಂತೆ  ಜುಟ್ಟು ಕಟ್ಟಿರುವ  ಕೂದಲು.
ಗ್ರೀಕ್ ಯೋಧನಂತಹ ತೀಕ್ಷ್ಣ ಗುರಿಕಾರನ ಕಣ್ಣೋಟ.
ಬಿಟ್ಟೂ  ಬಿಡದೆ ಕಾಡುವುದು ಆ  ನೋಟ.
ಪಕ್ಕಾ ಲೆಕ್ಕ ಹಾಕಿ ಎದುರಾಳಿಯನ್ನ ಬಡಿಯುವ ಬಿರುಸು
ಅದು ಹ್ಯಾಟ್ರಿಕ್ ಹೀರೊ ಶಿವರಾಜಕುಮಾರ್ !!
ದಿ ವಿಲನ್ ಎಂಬ ಬಹುನಿರೀಕ್ಷಿತ ಸಿನಿಮಾದ ಫಸ್ಟ್ ಲುಕ್ ನಲ್ಲಿ ಏನೋ ಅಡಗಿದೆ. ಮತ್ತೆ ಮತ್ತೆ ನೋಡುವಂತಿದೆ. ಇಬ್ಬರ ಮುಖ ಕುತ್ತಿಗೆಯ ಸುತ್ತ ಚೈನೀಸ್ ಅಕ್ಷರಗಳು , ಇಂಗ್ಲಿಷ್ ಅಂಕಿಗಳು ಕಾಣ್ತಾ ಇವೆ. ಒಳಗೆ ಏನೇನು ಅಡಗಿದೆಯೋ ಕಾದು ನೋಡೋದಷ್ಟೇ ಚಿತ್ರರಸಿಕರ ಕೆಲಸ .ನಿರ್ದೇಶಕ ಪ್ರೇಮ್ ಸಿನಿಮಾ ಪ್ರೇಮಿಗಳಿಗೆ ಮಸ್ತ್ ಮೋಡಿ ಮಾಡೋ ಮುನ್ಸೂಚನೆಯಂತೂ ಫಸ್ಟ್ ಲುಕ್ ನಲ್ಲಿ ಜೋರಾಗೆ ಕಾಣ್ತಾ ಇದೆ.
 ಸಿನಿಮಾ  ಕಾಡುವಂತಿರಲಿ , ಸೂಪರ್ ಹಿಟ್ ಆಗಲಿ ಅನ್ನೋದು ciniadda.com  ಹಾರೈಕೆ.

ಪ್ರಥಮ್ ಮಾಳವಿಕಾ ‘ಸೀಕ್ರೆಟ್” ರೂಮ್ ಸೀಕ್ರೆಟ್ .

ಕಲರ್ಸ್ ವಾಹಿನಿಯ ಬಿಗ್ ಬಾಸ್ ನಲ್ಲಿ ಪ್ರಥಮ್ , ಮಾಳವಿಕಾ ಒಟ್ಟಿಗೆ ಎಲಿಮಿನೇಟ್ ಆಗಿದ್ದಾರಂತೆ ಅನ್ನುವ ಸುದ್ದಿ ಹರಿದಾಡುತ್ತಿದೆ. ಆದ್ರೆ ಆಗಿರುವುದು ಇಷ್ಟೇ.

ಮಾಳವಿಕಾ, ಪ್ರಥಮ್ ಇಬ್ಬರನ್ನೂ ಮನೆಯಿಂದ ಹೊರಗೆ ಅಂದ್ರೆ ಸೀಕ್ರೆಟ್ ರೂಮಿನಲ್ಲಿ ಇರಿಸಲಾಗಿದೆ. ತಾವಿಲ್ಲದ ಹೊತ್ತಲ್ಲಿ ಇಡೀ ಮನೆಯ ಜನ ಏನು ಮಾತಾಡಿಕೊಳ್ತಾರೆ ಅನ್ನುವಂಥದ್ದು ಇಬ್ಬರಿಗು ತಿಳಿಯಲಿದೆ. ಇತ್ತೀಚಿಗೆ ಮಾಳವಿಕಾ ಸ್ವಲ್ಪ ಬದಲಾದಂತೆ ಕಾಣುತ್ತಿದ್ದಾರೆ. ಅದೂ ಕೂಡ ಗೆಲ್ಲುವ ಗೇಮ್ ಪ್ಲಾನ್ ಅಷ್ಟೇ ಅನ್ನುವುದು ಬಲ್ಲವರ ಅನಾಲಿಸಿಸ್.

bigboss-pratham-malavika

“ಮಾಳವಿಕಾ ಗೆಲುವು ಈಗಾಗಲೇ ನಿರ್ಧಾರವಾಗಿದೆ. ಇದೆಲ್ಲ ಸುಮ್ಮನೆ ಗಿಮಿಕ್ ಅಷ್ಟೇ “ಅನ್ನುವುದು ಹೆಸರು ಹೇಳಲು  ಇಚ್ಚಿಸದ ಬಿಗ್ ಬಾಸ್ ಟೀಮ್  ಸದಸ್ಯರೊಬ್ಬರು ciniadda.com ಗೆ ನೀಡಿದ ಸುಳಿವು. ಇದರ ಸತ್ಯಾಸತ್ಯತೆ ಎಷ್ಟಿದೆಯೋ ಕಾದು ನೋಡಬೇಕು.

ಇನ್ನೇನು ಮುಗಿದೇ ಹೋಯ್ತು ಬಿಗ್ ಬಾಸ್ ಅಂದುಕೊಳ್ಳುವಷ್ಟರಲ್ಲೇ ಇಲ್ಲ ಇಲ್ಲ ಇದೇ ತಿಂಗಳು 29ರ ತನಕ ಮುಂದುವರೆಯಲಿದೆ ಅಂತ ಶೂಟಿಂಗ್ ವೇಳೆ  ಸುದೀಪ್ ಘೋಷಿಸಿದ್ದಾರಂತೆ.

ಒಂದಂತೂ ನಿಜ ಕಳೆದ ಸೀಸನ್ಗಳಿಗೆ ಹೋಲಿಸಿದರೆ  ಈ ಬಾರಿಯ ಬಿಗ್ ಬಾಸ್ ನೋಡುವವರ ಸಂಖ್ಯೆ ಕಡಿಮೆಯಾಗಿ ಟಿಆರ್ಪಿ ಕುಸಿದು ಬಿದ್ದಿರುವುದಂತೂ ಸತ್ಯ. ಕಡೆ ದಿನದವರೆಗೂ ಇನ್ನು ಏನೇನು ಗಿಮಿಕ್ ಗಳು ಸೃಷ್ಟಿಯಾಗುತ್ತವೋ ನೋಡಬೇಕು.

 

 

ಇಂದಿಗೆ ಬೇಕಿರುವುದು ರಾಮಮಂದಿರವಲ್ಲ “ರಾಮರಾಜ್ಯ “

ಬೆಳೆಯುವ ಪೈರು ಮೊಳಕೆಯಲ್ಲಿ ಅಂತಾರೆ . ಆದ್ರೆ ಮೊಳಕೆಯೊಡೆದು ಹೆಮ್ಮರವಾಗಲಿಕ್ಕೆ   ಕಾಲಕಾಲಕ್ಕೆ ಒಳ್ಳೆಯ ಗೊಬ್ಬರ , ನೀರು, ಔಷಧಿ ಉಣಿಸದಿದ್ದರೆ ಮೊಳಕೆಯಲ್ಲೇ ಸಸಿ ರೋಗಗ್ರಸ್ತವಾಗುವುದಿಲ್ಲವೇ ? ಹಾಗೆಯೇ ಮಕ್ಕಳು ನಾಳಿನ ಹೆಮ್ಮೆಯ ಪ್ರಜೆಗಳಾಗಬೇಕಾದರೆ ನ್ಯಾಯ -ನೀತಿ ,ಧ್ಯೇಯ , ಅಂತಃಕರುಣೆ , ಸಹಾನುಭೂತಿಗಳ ಮೌಲ್ಯ ತಿಳಿಸಿ ಬೆಳೆಸಬೇಕು. ಮಕ್ಕಳ ಬಗ್ಗೆ ಏನೆಲ್ಲಾ ಮಾತನಾಡುವ ನಾವು ಮಕ್ಕಳಿಗಾಗಿ ಸಿನಿಮಾ ಮಾಡುವ ವಿಷಯದಲ್ಲಿ ಮಾತ್ರ ಹಿಂದಿದ್ದೇವೆ. ಬೆರಳೆಣಿಕೆಯಷ್ಟು ನೆನಪಲ್ಲಿ ಉಳಿಯುವ  ಸಿನಿಮಾಗಳು ಮಾತ್ರ ನಮ್ಮ ಕನ್ನಡ ಚಿತ್ರರಂಗದಲ್ಲಿವೆ. ಅನ್ಯಾಯದ ವಿರುದ್ದ ಸಿಡಿದು ನಿಲ್ಲುವ ಪ್ರಚಂಡ ಪುಟಾಣಿಗಳು,ಪುಟಾಣಿ ಏಜೇಂಟ್ 123, ಚಿನ್ನಾರಿ ಮುತ್ತ  ಇನ್ನೂ ನಮ್ಮ ಮನಸ್ಸಿನಲ್ಲಿವೆ. ಯಾವುದೇ ವಯಸ್ಸಿನವರು ಬೇಕಾದರೂ ಇವತ್ತಿಗೂ ನೋಡಿ ಆನಂದಿಸಬಹುದಾದ ಸಿನಿಮಾಗಳವು. ಅಂಥಾ ಸಿನಿಮಾಗಳ ಸಂಖ್ಯೆ ಹೆಚ್ಚಾಗದಿರುವುದು ಕನ್ನಡ ಚಿತ್ರರಂಗದ ಸೃಜನಶೀಲತೆ,ಆಸಕ್ತಿಯ  ಕೊರತೆಯಲ್ಲದೆ ಮತ್ತೇನು ?

ರಾಮನವಮಿಯ ಈ ಹೊತ್ತಿನಲ್ಲಿ ಮಕ್ಕಳ ಸಿನಿಮಾ ರಾಮರಾಜ್ಯ ರೂಪುಗೊಳ್ಳುತ್ತಿರುವುದು ಸಂತಸದ ವಿಷಯ. ಇವತ್ತಿಗೆ ನಿಜಕ್ಕೂ ಬೇಕಿರುವುದು ರಾಮ ಮಂದಿರವಲ್ಲ. ರಾಮರಾಜ್ಯ .

ರಾಮರಾಜ್ಯದ ಸಾರಥಿ  ನೀಲ್ ಕೆಂಗಾಪುರ್  ಡಕೋಟಾ ಎಕ್ಸ್ ಪ್ರೆಸ್ ,ವಿಜಯಸಿಂಹ ಸೇರಿದಂತೆ ಹಲವು ಚಿತ್ರಗಳಿಗೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ಅರಗಿಣಿ ಧಾರಾವಾಹಿಯ ಸಂಚಿಕೆ ನಿರ್ದೇಶಕನಾಗಿ ದುಡಿದ ಅನುಭವ ಇದೆ. ಪುನೀತ್  ನೀಲ್ ಕೆಂಗಾಪುರ್  ನಿರ್ದೇಶಿಸಿದ ಮೊದಲ ಸಿನಿಮಾ. ದೊಡ್ಡವರ ಚಿತ್ರಕ್ಕಿಂತ ಮಕ್ಕಳಿಗಾಗಿ ಮಾಡಬೇಕು ಅದು ದೊಡ್ಡವರೂ ನೋಡುವಂತಿರಬೇಕು ಎನ್ನುವುದು ಬಹುದಿನದ ಆಸೆಯಾಗಿತ್ತಂತೆ.

ಅದಕ್ಕೆ ಪೋಷಣೆ ಸಿಕ್ಕದ್ದು ಮಂಡ್ಯದಿಂದ ಬಣ್ಣದಲೋಕದ ಗೀಳಿನಿಂದ  ಬೆಂಗಳೂರಿಗೆ ಬಂದು ಪಡಬಾರದ ಕಷ್ಟಪಟ್ಟು ಕೊನೆಗೂ ನಿರ್ಮಾಪಕನಾಗುವ ಹಂತಕ್ಕೆ ಬೆಳೆದ ಶಂಕರೇಗೌಡರು. ಹಣ ಹೂಡಿ ಸುಮ್ಮನಾಗದೆ ಸಿನಿಮಾದ ಅನಿವಾರ್ಯ ಸಂದರ್ಭದಲ್ಲಿ ಅಭಿನಯವನ್ನೂ  ಮಾಡಿದ್ದಾರಂತೆ.

ನೀಲ್ ಕೆಂಗಾಪುರ್  ಪ್ರಕಾರ ರಾಮರಾಜ್ಯ ಇಂದಿನ ಮಕ್ಕಳಿಗೆ ಆತ್ಮಸ್ಟೈ ರ್ಯ ತುಂಬುವಂಥ  ಸಿನಿಮಾ. ಅನ್ಯಾಯದ ವಿರುದ್ಧ ಸೆಟೆದು ನಿಂತು, ದೊಡ್ಡವರನ್ನು ಎಚ್ಚರಿಸಿ ರಾಮರಾಜ್ಯವನ್ನು ಕಟ್ಟುವ ದಿಟ್ಟ ಮನಸ್ಸ್ಸಿನ ಮಕ್ಕಳ ಕಥೆ ಇಲ್ಲಿದೆ. ಬರಿಯ ಬೋಧನೆ ಮಾತ್ರವಲ್ಲದೆ ಪ್ರಚೋದನೆ ನೀಡುತ್ತಾ ..ಎಲ್ಲರನ್ನು ರಂಜಿಸುವ ಪ್ರಯತ್ನವಿದೆ.

ಇದುವರೆಗೆ ಬಂದ ಕನ್ನಡದ ಯಾವ ಮಕ್ಕಳ ಸಿನಿಮಾದಲ್ಲೂ ಗ್ರೀನ್ ಮ್ಯಾಟ್ ಬಳಸಿ 3D ಎಫೆಕ್ಟ್ ನಲ್ಲಿ  ತೋರಿಸುವ ಪ್ರಯತ್ನಗಳು ಬಂದಿಲ್ಲ. ಅದಕ್ಕೆ ಹಣ ಹೆಚ್ಛೇ ಬೇಕು .ನಾವಿಲ್ಲಿ ಒಂದು ಹಾಡಿನಲ್ಲಿ ಅಂಥಾ ಪ್ರಯೋಗ ಮಾಡಿದ್ದೇವೆ. ಕಾರಣವಿಷ್ಟೇ ಮಕ್ಕಳ ಸಿನಿಮಾ ಮಾಡಿ ಬರೀ ಅವಾರ್ಡ್ ಗೆ ಕಳಿಸೋದಲ್ಲ. ಎಲ್ಲರು ನೋಡುವಂಥ ಗುಣಮಟ್ಟವೂ ಇರಬೇಕು. ಜನರನ್ನು ತಲುಪದಿದ್ದರೆ ಮಕ್ಕಳ ಚಿತ್ರ ಮಾಡಿಯಾದರೂ ಏನು ಪ್ರಯೋಜನ ? ಮೂಲತಃ ಧಾರಾಳಿಯಾದ ನಿರ್ಮಾಪಕ ಶಂಕರೇಗೌಡರು ಮಕ್ಕಳ ಚಿತ್ರ ಶ್ರೀಮಂತವಾಗಿರಲಿ ಅಂತ ಎಲ್ಲ ರೀತಿಯ ಸಹಕಾರ ಕೊಟ್ಟಿದ್ದಾರೆ.

ವಿ ನಾಗೇಂದ್ರಪ್ರಸಾದ್ ಲಾಯರ್ ಪಾತ್ರದಲ್ಲಿ ಪ್ರೀತಿಯಿಂದ ಮಕ್ಕಳ ಒಡನಾಡಿಯಂತೆ ಸಹಜವಾಗಿ ಅಭಿನಯಿಸಿದ್ದಾರೆ. ಅಶ್ವಿನಿಗೌಡ ತಾಯಿಯ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಕಥೆ ಕೇಳಿದ ಮೇಲೆ ಅರೆಕ್ಷಣವು ಯೋಚಿಸದೆ ಒಪ್ಪಿಕೊಂಡ ಕಲಾವಿದೆ ಅವರು. ಹನುಮಂತೇಗೌಡರ ಅಭಿನಯ ನಿಮಗೆ ಎಂದಿನಂತೆ ಇಷ್ಟವಾಗಲಿದೆ . ಯತಿರಾಜ್ ಸಾಥ್ ಮರೆಯೋಲ್ಲ.

ನಟ ಪ್ರೇಮ್ ಕೂಡ ಕಥೆ ಕೇಳಿದ ತಕ್ಷಣ ತಮ್ಮ ಮಗನನ್ನ ರಾಮರಾಜ್ಯಕ್ಕೆ ಕಳುಹಿಸಲು ಒಪ್ಪಿಕೊಂಡ್ರು .ಅವರ ಪತ್ನಿ ಸದಾ ಸಹಕಾರಿ. ಎಲ್ಲಕಿಂತ ಮುಖ್ಯವಾಗಿ ಚಿನಕುರಳಿಯಂಥ ಮಕ್ಕಳ ಅಭಿನಯ ಎಂದು ಮರೆಯಲಾರೆ. ತೆರೆಯ ಮೇಲೆ ನೋಡಿದಾಗ ನಿಮಗೂ ಮಕ್ಕಳು ಮನಸ್ಸಿನಲ್ಲಿ ಉಳಿದುಬಿಡುತ್ತಾರೆ.

ಏಕಾಂತ್ ಪ್ರೇಮ್(ಪ್ರೇಮ್ ಪುತ್ರ ), ಪುಟಾಣಿ ಪಂಟ್ರು ವಿಜೇತ ಹೇಮಂತ್ , ಹರಿವು ಚಿತ್ರದಲ್ಲಿ ಸಂಚಾರಿ ವಿಜಯ್ ಜೊತೆ ನಟಿಸಿದ ಸೋಹಿಬ್, ಕಾರ್ತಿಕ್ (ದೊಡ್ಮನೆ ಹುಡುಗ ಚಿತ್ರದಲ್ಲಿ ಪುಟ್ಟ ಪುನೀತ್ ) ಇವರೆಲ್ಲ ಐದು -ಆರನೇ ಕ್ಲಾಸ್ ನಲ್ಲಿ ಓದ್ತಿರೋ ಹನ್ನೆರಡು ಹದಿಮೂರು ವಯಸ್ಸಿನವರು. ಆದ್ರೆ ಅವರ ಬದ್ಧತೆ ಮೆಚ್ಚಲೇಬೇಕು.

ಒಂದಂತೂ ಸತ್ಯ ಮಕ್ಕಳ ಸಿನಿಮಾ ಸಂದೇಶ ಹೊತ್ತು ತರುತ್ತಿದೆ.ದೊಡ್ಡವರೆಲ್ಲ ಜಾಣರಲ್ಲ ಚಿಕ್ಕವರೆಲ್ಲ ಕೋಣರಲ್ಲ ಅನ್ನುವುದನ್ನು ಹೇಳುತ್ತೆ. ಜೊತೆಜೊತೆಗೆ ಅನ್ಯಾಯದ ವಿರುದ್ಧ ಹೋರಾಡಲು ಶಾಲೆಯಲ್ಲಿ ಕಲಿತ ಗಾಂಧೀಜಿಯ ತತ್ವ  ದಿವ್ಯ ಮಂತ್ರವಾದ ರೀತಿಯನ್ನು ತೋರಿಸುತ್ತೆ.

ಮಕ್ಕಳಿಗೆ ಮನರಂಜನೆಯನ್ನೂ ಕೊಟ್ಟು ,ಮನುಷ್ಯತ್ವ ಬೆಳೆಸುವ ,ಪ್ರೀತಿ ಹಂಚುವ , ದಿಟ್ಟತನದ ಕಡೆಗೆ ಸೆಳೆಯುವ ಸಿನಿಮಾ ರಾಮರಾಜ್ಯ . ಮುಂದಿನ ತಿಂಗಳು ತೆರೆಗೆ ತರಲಿದ್ದೇವೆ. ನಿಮ್ಮ ಸಹಕಾರವಿರಲಿ.

ನೀಲ್ ಕೆಂಗಾಪುರ್  ಮಾತಿನಲ್ಲಿ ವಿಶ್ವಾಸವಂತೂ  ಕಾಣುತ್ತಿದೆ ನಾವು ಕಾದು ನೋಡೋಣ. ಕನ್ನಡದಲ್ಲಿ ಮಕ್ಕಳ ಸಿನಿಮಾಗಳು ಹೆಚ್ಚೆಚ್ಚು ಬರಲಿ . ವ್ಯಾವಹಾರಿಕ ದೃಷ್ಟಿಯಿಂದಲೂ ಲಾಭ ತರಲಿ. ರಾಮ  ಮಂದಿರಕ್ಕೆ ಮಾತ್ರ ಸೀಮಿತವಾಗದೆ ಸಹನೆ ,ಪ್ರೀತಿಯ  ಸಂಕೇತವಾಗಿ ರಾಮ ಬದುಕಿನ ಆದರ್ಶವಾಗಲಿ. 

ರಾಮನವಮಿಯ ಶುಭಾಶಯಗಳು.

ಮಂದಿರದಲ್ಲಿ “ರಂಗ”ಣ್ಣನನ್ನೇ ಮಖಾಡೆ ಮಲಗಿಸಿದ ಮುಕುಂದ-ಮುರಾರಿ

‘ಉಪ್ಪಿಗಿಂತ ರುಚಿ ಬೇರೆ ಇಲ್ಲ ಒಪ್ಪಿಕೊಂಡೋರು ದಡ್ಡರಲ್ಲ’ ಅಂದು ತನ್ನ ಪ್ರೇಕ್ಷಕರನ್ನು ಬುದ್ಧಿವಂತರೆಂದ , ನಿರಂತರ ಹುಡುಕಾಟದ ಉಪೇಂದ್ರ ಒಂದು ಕಡೆ,” ದುರಂಹಕಾರಿ ” ಪಟ್ಟ ಕಟ್ಟಿದವರಿಗೆ ಕ್ಯಾರೇ ಅನ್ನದೆ ತನ್ನ ಪ್ರತಿಭೆಯನ್ನೇ ಪಣಕ್ಕಿಟ್ಟು ಬೆಳೆದ ಸುದೀಪ್ ಮತ್ತೊಂದು ಕಡೆ . ಇವರಿಬ್ಬರ ಎದುರಿಗೆ ಬಹುತೇಕ ರಾಜಕಾರಣಿಗಳ ನೀರಿಳಿಸುವ, ಸೂಟುಬೂಟಿನ ಹಂಗಿಲ್ಲದೆಯೂ ತೆರೆಯಲ್ಲಿ ಆವರಿಸಿಕೊಂಡ  ಪ್ರಜ್ಞಾವಂತ (ಇತ್ತೀಚಿಗೆ ಪ್ರಜ್ಞೆ ಇಳಿಮುಖ ) ಪತ್ರಕರ್ತ ಎಚ್ ಆರ್ ರಂಗನಾಥ್ ಉರುಫ್ ರಂಗಣ್ಣ . ಇದು ”ರಂಗಮಂದಿರ”

ಸಾಮಾನ್ಯವಾಗಿ ಸಿನಿಮಾದವರು ಅಂದ್ರೆ ಅಯ್ಯೋ ಯಾರೋ ಬರಕೊಟ್ಟಿದ್ ಸ್ಕ್ರಿಪ್ಟ್ ಹೇಳೋದ್ರಲ್ಲಿ ಏನ್ ಮಹಾ ಬುದ್ಧಿವಂತಿಕೆ ಇದೆ ? ಯಾವುದಾದ್ರೂ ಸೋಶಿಯಲ್ ಇಶ್ಯೂ ಬಗ್ಗೆ ಕೇಳಿ ಬೆಬ್ಬೆ ಹೊಡೀತಾರೆ . ಈ ರೀತಿಯ ಮಾತುಗಳು ಮಾಧ್ಯಮ ವಲಯದಲ್ಲಂತೂ ಸರ್ವೇ ಸಾಮಾನ್ಯ . ಸಿನಿಮಾದವರನ್ನ ಸಂದರ್ಶನ ಮಾಡೋಕೆ ಎಡಿಟರ್ಗಳು ಬರೋದು ಅಷ್ಟರಲ್ಲೇ ಇದೆ.

ಹೆಚ್ಚು ಕಡಿಮೆ ಇಂಥದ್ದೇ ಮನಸ್ಥಿತಿಯಲ್ಲಿ ಕಾರ್ಯಕ್ರಮ ಶುರುಮಾಡಿದ ಶ್ರೀಮಾನ್ ರಂಗನಾಥ್ ಮೊದಲಲ್ಲೇ ಈ ರೀತಿಯ ಸಂದರ್ಶನ ನಾನು ಮಾಡುವುದಿಲ್ಲ ಆದರೂ ಹಾಕಿ ಬಿಟ್ಟಿದ್ದಾರೆ ಬಂದಿದ್ದೇನೆ ಅಂತಾನೆ ಹೇಳಿದ್ರು. ಸರೀನಪ್ಪಾ ಏನೀಗ ಮಾಡಿ ಯಾವ ಅಜೆಂಡಾ  ಇಲ್ಲದೆ ತಾವು ಇದನ್ನ ಮಾಡ್ತಿಲ್ಲ ಮಾಡಿ  ನೋಡೋಣ ಅಂತ ಅವರಂತೆ ವಿಶ್ಲೇಷಣಾ ಮನೋಭಾವದವರು ಅಂದುಕೊಂಡರೆ , ಅವ್ರು ಹೇಳಿದ್ದಕ್ಕೆಲ್ಲಾ ಗೋಣು ಆಡಿಸುವ ಮಂದಿ ಈಗ ನೋಡ್ತಾ ಇರಿ ನಮ್ ರಂಗಣ್ಣ ಹೆಂಗ್ ಬಡಿತಾರೆ ಇಬ್ಬರನ್ನು ಅಂತ ರಣೋತ್ಸಾಹದಲ್ಲಿ ಟೀವಿಗೆ ಕಣ್ಣು ನೆಟ್ಟಿದ್ದರು.

ಸರಿ .ಸಾಮಾನ್ಯವಾಗಿ ಅತಿಥಿಗಳನ್ನು ಪರಿಚಯ ಮಾಡಿಕೊಡಬೇಕು ಈ ಪ್ರಕರಣದಲ್ಲಿ ಅದರ ಅವಶ್ಯಕತೆ ಇಲ್ಲ.ಆದರೆ ನಿಮ್ಮ ಮುಂದೆ ಇಬ್ಬರನ್ನು ಹಾಜರು ಪಡಿಸಲೇಬೇಕು  ಎಂದ ಪ್ರಖಾಂಡ ಪತ್ರಕರ್ತರು ಅವರಿಬ್ಬರನ್ನು ಕಟಕಟೆಯಲ್ಲಿ ನಿಲ್ಲಿಸಿ ನೋಡಿ ಹ್ಯಾಗ್ ಬಡಿತೀನಿ ನಿಮ್ಮ ಹೀರೊಗಳನ್ನ ಅನ್ನುವಂಥ ಬಿಲ್ಡ್ ಅಪ್ ಅದ್ಯಾಕೆ ಕೊಟ್ಕೊಂಡ್ರೋ ಅವ್ರಿಗೇ ಗೊತ್ತು. ಪ್ರಕರಣ ಅನ್ನುವುದಿಕ್ಕೆ ಅಂಥಾ ಯಾವ ಘಟನೆಯೂ ನಡೆದಿರಲಿಲ್ಲ.

ದೇವರನ್ನ ನಂಬುತ್ತೀರಾ?

ಮೊದಲ ಪ್ರಶ್ನೆಗೆ ಉಪೇಂದ್ರ -“ಸಿನಿಮಾದಲ್ಲಾ ? ರಿಯಲ್ಲಾಗಾ ?   ದೇವರು ಅಂದ್ರೆ ಏನು ಅನ್ನೋದು ಮೊದಲು ಚರ್ಚೆಯಾಗಬೇಕು” ಅಂದುಬಿಟ್ಟು ಪ್ರತಿ ಅಸ್ತ್ರ ನಮ್ ಹತ್ರಾನು ಇದೆ ಸ್ವಾಮಿ ಅನ್ನುವಂತ ಸೂಚನೆ ಕೊಟ್ರಲ್ಲ.

ಸುದೀಪ್ ಮಾತ್ರ ಕೇಳಿದ ಪ್ರಶ್ನೆಗೆ ಕ್ಲಿಯರ್ ಕಟ್ ಆಗಿ ದೇವ್ರು ಅಂದ್ರೆ ನನ್ನ ಪಾಲಿಗೆ ನನ್ನ ತಂದೆ ತಾಯಿ ಅಂದ್ರಪ್ಪ.

ಅಲ್ಲಲಲಲ್ಲಾ ..ರಾಘವೇಂದ್ರಸ್ವಾಮಿ  ಪಾತ್ರ ಮಾಡ್ಬೇಕಾದ್ರೆ ರಾಜಕುಮಾರ್ಗೆ ಹೆಂಗೆಗೆ ಆಯ್ತು ಅಂತ ಅವ್ರು ಹೇಳಿದ್ದನ್ನ ಕೇಳಿದ್ದೀವಿ . ನಿಮಗೂ ಆ ಥರ ವೈಬ್ರೇಷನ್ನು ಏನಾರ ಆಯ್ತಾ ?

“ದೇವ್ರು ಅಂದಮೇಲೆ ನಂಗೆ ಎಲ್ಲ ಗೊತ್ತಿರಬೇಕಲ್ಲ . ಇವ್ರು ಹೇಳಕ್ಕಿಂತ ಮುಂಚೆನೇ ಗೊತ್ತಿರ್ಬೇಕು ” ಸುದೀಪ್ ಕೊಟ್ಟ ಉತ್ತರಕ್ಕೆ ರಂಗಣ್ಣ ಕಕ್ಕಾಬಿಕ್ಕಿಯಾಗಿದ್ದು  ಅವರ ಹ್ಹೆ ..ಹ್ಹೆ.. ತೋರಿಸ್ತಪ್ಪ.

ಹೀರೋಗಳು ಕೆಲವು ಸಾರಿ ದೇವ್ರಿಗಿಂತ ಮೇಲೆ ಅನ್ನೋ ಥರ ಆಡ್ತಾರಪ್ಪ ಯಾಕೆ ?

ಹೀರೋಗಳು ಅಂದ್ರೆ ? ಮತ್ತೆ ಪ್ರಶ್ನೆಗೇ ಪ್ರಶ್ನೆ ಎಸೆದ ಉಪೇಂದ್ರ ಅದ್ಸರಿ ಒಂದು ಮಾತು ಕೇಳ್ದೆ ಸಿನಿಮಾದವರ ಬಗ್ಗೆ ನಿಮಗೆ ಅಷ್ಟಕಷ್ಟೆ ಅಂತಲ್ಲ ಯಾಕೆ ? ಸ್ವಲ್ಪ ಹೇಳಿ ಸಾರ್ ಅಂದ್ರೆ ರಂಗಣ್ಣ ಮತ್ತೊಂದು ಪ್ರಶ್ನೆಯ ಮೊರೆಹೊಕ್ಕರಲ್ಲ .

ಈಗ ಜನರಲ್ ಆಗಿ ಕೇಳಿದ್ದೀರಾ ಜನರಲ್ ಆಗೇ ಹೇಳ್ತಿನಿ ಒಬ್ಬೊಬ್ಬರದು ಒಂದೊಂದು ದೃಷ್ಟಿ ಇರುತ್ತಪ್ಪಾ ಅಂತ ಉಪೇಂದ್ರ  ಬಗೆಬಗೆಯ ಉದಾಹರಣೆ ಕೊಡ್ತಿರ್ಬೇಕಾದ್ರೆ ಯಥಾಪ್ರಕಾರ ತನಗೆ ಬೇಕಾದ ಉತ್ತರ ಸಿಗದಿದ್ದಾಗ ಮಾತುಗಳನ್ನ ಮಧ್ಯಕ್ಕೆ ಕತ್ತರಿಸುವ ಚಾಳಿ (ಇದ್ದುದ್ದರಲ್ಲಿ ಬೇರೆ ಪತ್ರಕರ್ತರಿಗಿಂತ ವಾಸಿ ) ಮುಂದುವರೆಸಿ ಮತ್ತೊಂದು ದಾಳ ಬಿಟ್ಟರಲ್ಲ

“ನಮಗೂ ನಿಮಗೂ ಲವ್ ಅಂಡ್ ಹೇಟ್ ರಿಲೇಷನ್ ಶಿಪ್ ಬಿಡಿ “ಮತ್ತೆ ಒದ್ದೆ ಕಡ್ಡಿಗೀರಿದ ರಂಗಣ್ಣ

ಸರ್ ಲವ್ ಯಾಕೆ ಬರುತ್ತೆ  ? ಹೇಟ್ ಯಾಕೆ ಬರುತ್ತೆ  ? ಅದನ್ನ ಹೇಳ್ಬಿಡಿ ಈಗ ಅಂದ ಉಪೇಂದ್ರ ವೇಗಕ್ಕೆ ದಾರಿ ಕಾಣದಾಗಿದೆ ರಾಘವೇಂದ್ರನೆ ಅನ್ನೋ ಥರ  ರಂಗಣ್ಣ ಪಕ್ಕದ ಪ್ರಶ್ನೆಗೆ ಪಲ್ಟಿ ಹೊಡೆದು ಕಾವೇರಿ ಕಾಪಾಡು ಅಂತ ಹಳೆ ಕಥೆ ಕಡೆ ತಿರುಗಿ ಬಿಡೋದೆ !?

ಅದ್ಸರಿ ee hero thought that they are elivated to gods position .hence they treat everybody smaller mortals ಎಲ್ಲರನ್ನು ಅವರಿಗಿಂತ ಕೆಳಗಿನವರು ಅನ್ನೋ ಥರ ಅನ್ಕೋಡಿದ್ದಾರೆ ಹೀರೋಗಳು ಅಂತ ನಾವು ಅನ್ಕೊಂಡಿದ್ದೀವಿ

ಅಲ್ಲ ಸಾರ್ ಅನ್ಕೋಳ್ಳೋವರಿಗೇನು ಏನು ಬೇಕಾದ್ರು ಅನ್ಕೋತಾರೆ .ಈಗ ನೀವು ಯಾರಿಗಾದ್ರೂ ಬೈತಿದ್ರೆ ಏನಪ್ಪಾ ಇದು ಹಿಂಗ್ ಮಾತಾಡ್ತಾರೆ ಅಂತ ನಿಮ್ಮನ್ನೇ ಅನ್ನಲ್ವಾ ? ಈಗ ಹತ್ತಿರದಿಂದ ನಿಮ್ಮನ್ನ ತಿಳ್ಕೊಂಡ್ ಮೇಲೆ ತಾನೇ ರಂಗನಾಥ್ ಏನು ಅಂತ ಗೊತ್ತಾಗೋದು ? judgmental ಆಗಿರೋದೇ ದೊಡ್ಡ ಪ್ರಾಬ್ಲಮ್ಮು. ಅದ್ಕೆ ದೊಡ್ಡವರು ಒಂದು ಬೆರಳು ಬೇರೆಯವರ ಕಡೆ ತೋರಿಸಿದ್ರೆ ಉಳಿದ ನಾಲ್ಕು ಬೆರಳು ನಿನ್ನ ಕಡೆಗೇ ತೋರಿಸುತ್ತವೆ .ಪ್ರಪಂಚದ ಬಗ್ಗೆ ಮಾತಾಡೋಕ್ಕಿಂತ ನಮ್ಮನ್ನ ನಾವು ಕರೆಕ್ಟ್ ಮಾಡ್ಕಳಾಣ ಅನ್ನಿಸುತ್ತೆ ಅಲ್ವಾ ಸರ್ ?

ಮತ್ತೆ ಉತ್ತರದೊಳಗೆ ಪ್ರಶ್ನೆ ಹುಟ್ಟಿಸಿ ನಗ್ತಾ ನಗ್ತಾ ಕಾಲೆಳಿತಿದ್ದ ಉಪ್ಪಿಯ ಬುದ್ಧಿವಂತಿಕೆಗೆ ಮಂದಿರದ ರಂಗನೂ ತಲೆದೂಗಲೇ ಬೇಕು ಅಂದಮೇಲೆ ನರಮಾನವ ನಮ್ಮ ರಂಗುರಂಗು ಮಾತಿನ ರಂಗಣ್ಣ ಮಂಕಾಗಿ “ಟ್ರೂ ” ಅನ್ನದೆ ಬೇರೆ ದಾರಿ ಏನಿತ್ತು ?

ಕೆಳಗೆ ಬಿದ್ದರು ಜಟ್ಟಿ ಮೀಸೆ ಮಣ್ಣಾಗಲಿಲ್ಲ ಜಾತಿಯ ರಂಗಣ್ಣ ಹಾ .. ಆರಂಭದಲ್ಲಿ ಎಲ್ಲಾ ಚೆನ್ನಾಗೇ ಇರತ್ತೆ.middle ನಲ್ಲಿ ಒಂದು ನಾಲ್ಕೈದು ಫಿಲಂ ಆದ್ಮೇಲೆ ಏನೋ ಆಟ ಆಡ್ತಾರಪ್ಪ ಅನ್ನಿಸತ್ತೆ . ನಿಮಗನ್ನಿಸಲ್ವಾ ? (ಇತ್ತೀಚಿನ ಬೆಳವಣಿಗೆ ಗಮನಿಸಿದ ಎಲ್ಲರಿಗು ಅರ್ಥವಾಗುವ ಯಶೋಬಾಣವಿದು )

ಸ್ವಲ್ಪ ಖಡಕ್ ಆಗಿ ಸುದೀಪ್ ಯಾರು ಆಟ ಆಡ್ತಾರೆ ? ಅಂದರೂ ಉಪೇಂದ್ರ ಮಾತ್ರ “ಚೆನ್ನಾಗೇ ಇರುತ್ತಲ್ಲ ಸಾರ್ . ಈಗ ಒಂದು ಪಿಕ್ಚರ್ ಬಿಗಿನಿಂಗ್ ಇಂದ ಕಡೆವರೆಗೂ ಎಲ್ಲಾ ಚೆನ್ನಾಗಿದ್ರೆ ನೀವು ನೋಡ್ತೀರಾ ? ಪ್ರಾಬ್ಲೆಮ್ಸ್ ಬರ್ಬೇಕು .ಘಟನೆಗಳಿಗೆ ತಿರುವು ಸಿಗ್ಬೇಕು .ಆಮೇಲೆ ಸರಿಹೋಗಬೇಕು ಆಗ್ಲೇ ಅಲ್ವ ಚೆನ್ನಾಗಿದೆ ಅನ್ನೋದು ಜನ. ಲೈಫು ಅದೇ ಥರ ಅಲ್ವಾ? ಒಬ್ಬೊಬ್ಬರೂ ಒಂದೊಂದು ರೀತಿ ಅದೇ ಮಜಾ ಅಲ್ವಾ ? ಇಲ್ಲದಿದ್ರೆ ಮಾತಾಡಕ್ಕೆ ವಿಷಯಾನೇ ಸಿಕ್ತಾ ಇರಲಿಲ್ಲ . ಮಾರ್ಮಿಕವಾಗಿ ಹೇಳಿದರೂ ಮಾತಿನ ಚಾಟಿ ಸರಿಯಾಗೇ ಬಡಿದಿತ್ತು .

ಆದರೂ ಪಟ್ಟು ಬಿಡದ ಪತ್ರಕರ್ತರು ನಾನಿಲ್ಲದಿದ್ದರೆ ನಿಮ್ಮ ಟೀವಿಗೆ trpನೇ ಇಲ್ಲ ಅಂತ ನನಗೇ ಹೇಳಿದ್ರು ಗೊತ್ತಾ?

ಅದೂ ಕೂಡ ಮಜಕ್ಕೆ ಹೇಳಿದ್ದಾರೆ ಸರ್ ಉಪ್ಪಿ ವರಸೆ ಗೆ ತಬ್ಬಿಬ್ಬಾದರು ತೋರಿಸಿಕೊಳ್ಳದೆ ಈಗ.. ನನ್ನ ಕಲ್ಪನೆಯಲ್ಲಿ ಹೀರೋ ಈ ಥರ ಇರ್ಬೇಕು ಅಂತ ಇದೆಯಾ ನಿಮಗೆ  ಹೇಳಿ ?

ನೋಡಿ ನೋಡಿ ಸಾಕಾಗಿದ್ದ ಸುದೀಪ್ ನನಗೆ ೨ ನಿಮಿಷ ಯಾವುದೇ ಡಿಸ್ಟಿರ್ಬೇನ್ಸ್ ಇಲ್ಲದ ರೀತಿ ಮಾತಾಡೋಕೆ ಬಿಟ್ರೆ ಉತ್ತರ ಕೊಡ್ತೀನಿ .ಆವಾಗಿಂದ ಯಾವ ಉತ್ತರವನ್ನು ಕಂಪ್ಲೀಟ್ ಮಾಡಕ್ಕೆ ಆಗಿಲ್ಲ .

ಸರಕ್ಕನೆ ಬಂದ ಸುದೀಪ್ ಅಸ್ತ್ರಕ್ಕೆ ಪೆನ್ನು ಪಕ್ಕಕ್ಕಿಟ್ಟು ಬೊಂಬಾಯಿ  ಬಾಯಿಗೆ ಬೀಗ ಜಡಿದು  ಕೈ ಕಟ್ ಬಾಯ್ ಮು ಚ್  ಆದರಲ್ಲ ರಂಗಣ್ಣ !

ನಾನು ಒಳ್ಳೆ ಸಿನಿಮಾ ಮಾಡಿದ್ದಕೆ ಫ್ಯಾನ್ಸ್ ಬಂದರೇ ಹೊರತು ಫ್ಯಾನ್ಸ್ ಬಂದ ಮೇಲೆ ನಾನು ಸಿನಿಮಾ ಮಾಡಲಿಲ್ಲ. ಬೇರೆ ಕಡೆ ಡೈವರ್ಟ್  ಆಗೋಕೆ ಹೋದ್ರೆ ಎಲ್ಲ ಕಳೆದು ಕೊಳ್ತೀನಿ . ನಂಗೊತ್ತಿರೋದು ಸಿನಿಮಾ ಚೆನ್ನಾಗಿ ಮಾಡ್ಬೇಕು ಅಷ್ಟೆ .ಫ್ಯಾನ್ಸ್ ಮತ್ತು ಹೀರೋಗಳು ಒಟ್ಟಿಗೆ ಬೆಳೀತಾರೆ .ಆಮೇಲೆ ಹೀರೋಗೆ ಲಾಯಲ್ ಆಗ್ತಾರೆ. ನಾನು ದರ್ಶನ್ ,ಪುನೀತ್ ಒಟ್ಟಿಗೆ ಬಂದ್ವಿ. ಸ್ಪರ್ಧೆ ಇದೆ ಆದ್ರೆ ಟಾಂಟ್ ಗೀನ್ಟ್ ಕೊಟ್ಕೊಂಡು ಬೆಳೀಲಿಲ್ಲ. ಕನ್ನಡ ಚಿತ್ರರಂಗದಲ್ಲಿ ನಾವೆಲ್ಲ ಒಂದೇ .

ಸುದೀಪ್ ಇಂಥಾ ನಿಖರ ಉತ್ತರ ಕೊಟ್ಟ ಮೇಲೆ ಮುಂದಿನ  ವಿವಾದದ ಹುಟ್ಟಿಸುವ middle ಲೀಡರ್ ,ಜೂನಿಯರ್ ಲೀಡರ್ ಪ್ರಶ್ನೆಗಳು ಬಂದ ದಾರಿಗೆ ಸುಂಕವಿಲ್ಲದೆ  ಖಾಲಿ ಕೈಯಲ್ಲಿ ಹೋದವಲ್ಲ .

ಉಪೇಂದ್ರ ವ್ಯವಸ್ಥೆ ಯ ಬಗ್ಗೆ ಸಿನಿಮಾದಲ್ಲಿ ಮಾತಾಡ್ತಿರಲ್ಲ ಲೀಡರ್ ಆಗ್ಬೇಕು ಅಂದ್ಕೊಂಡಿದ್ದೀರಾ ?

ಲೀಡರು ನಾವ್ ಆಗೋದಲ್ಲ . ಎಲ್ಲ ತಿಳ್ಕೊಂಡಿರೋದು ಲೀಡರ್ ಅನ್ನೋದು ನಾವ್ ಮಾಡ್ಕೊಳ್ಳೋದು  ಅಂತ .ಆದ್ರೆ ಅದು ಆಗೋದು . ಜನ ಮಾಡೋದು .ಆ ಗುಣಗಳು ಬರ್ತಿದ್ದ ಹಾಗೆ ಆ ದಾರಿಯಲ್ಲಿ ಹೋಗ್ಬಿಡ್ತಾರೆ .ಇದೆಂಗಪ್ಪ ಮತ್ತೆ ಕನ್ಫ್ಯೂಷನ್ನು ಅನ್ನಬೇಡಿ .ಸತ್ಯ ಹೇಳಿದಾಗೆಲ್ಲ ಕನ್ಫ್ಯೂಶನ್ನೇ . ಇನ್ನು ಸ್ವಲ್ಪ ಕನ್ಫ್ಯೂಶನ್ ಮಾಡ್ಲಾ ?

ಇನ್ನು ನನ್ನ ಲೈಫನಲ್ಲಿ ನಾನು ನಿಮ್ಮ ಹತ್ತಿರ ಕನ್ಫ್ಯೂಶನ್ ಪದ ಬಳಸಲ್ಲ ಆಯ್ತಾ ಅಂತ ಕೈ ಚೆಲ್ಲಿ ಠುಸ್ ಆಯಿತಲ್ಲ ನಮ್ಮ  ಬಿಗ್ ಬುಲೆಟು !!

ಹೀಗೆ ಒಂದಾ? ಎರಡಾ ? ರಂಗಮಂದಿರದೊಳೆಗೆ ರಂಗಣ್ಣನನ್ನೇ ಕಟ್ಟಿ ಹಾಕಿದರು ಮುಕುಂದ ಮುರಾರಿ . ರಂಗಣ್ಣ  ಅನುಭವ,ಅಧ್ಯಯನದಿಂದ ಎದುರಿದ್ದವರ ಎಡೆಮುರಿ ಕಟ್ಟಿರುವುದು ಉಂಟು . ಅನೇಕ ಜನಸಾಮಾನ್ಯರ ಅಚ್ಚುಮೆಚ್ಚಿನ ಪತ್ರಕರ್ತ ನಾಗಿರುವುದು ನಿಜ. ಆದ್ರೆ ಈ ಮಂದಿರದಲ್ಲಿ ರಂಗನೆದುರಿಗೆ ಇದ್ದವರು ರಂಗನಾಥ್ ಜೀ ಇವತಿಂದಿವ್ಸ ಏನಾಗಿದೆ ಅಂದ್ರೆ .. ಅಂತ ಮಾತು ಮಾತಿಗೆ ನೀರು ಬಿಡುವ ಸಚಿವರಾಗಲಿ , ಬ್ರದರ್ ಬ್ರದರ್ ಅಂತ ಪತರ್ ಗುಟ್ಟುವ ರಾಜಕಾರಣಿಗಳಾಗಲಿ ಇರಲಿಲ್ಲ . ಇದ್ದವರು ಸ್ವಂತ ಶಕ್ತಿ ಇಂದ  ಹಲವಾರು ಏಳುಬೀಳುಗಳನ್ನು ಕಂಡು ಕಲೆಯಲ್ಲೇ ಬದುಕನ್ನು ಅರಳಿಸಿಕೊಂಡ ಪ್ರತಿಭಾವಂತ ಕಲಾವಿದರು . ಚಿತ್ರ ನೋಡದೆ , ವಿಷಯ ತಿಳಿದುಕೊಳ್ಳದೆ ಮಾತಾಡುವ ಎಷ್ಟೋ ಜನ ಪತ್ರಕರ್ತರಿಗೆ ಹೋಲಿಸಿದರೆ ರಂಗಣ್ಣ ನೂರು ಪಾಲು ವಾಸಿ . ತಲೆಯಲ್ಲಿ ಬುದ್ದಿ ಇದ್ದರೆ , ಮೈ ಮೇಲೆ ಸಾಧಾರಣ ಬಟ್ಟೆ ಇದ್ದರೂ ತೆರೆಯ ಮೇಲೆ ಬೆಳಗಬಹುದು ಅನ್ನುವುದನ್ನು ಸಾಧಿಸಿರುವುದೂ ನಿಜವೇ . ಆದ್ರೆ ಇತ್ತೀಚೆಗೆ ಯಾಕೋ ಬುದ್ಧಿ ಮಂಕಾದ ಹಾಗೆ ಕಾಣುತ್ತಿದೆ. ಯಾರೋ ಹೇಳಿದ್ದು ಕೇಳಿ 2000ದ ಹೊಸ ನೋಟಿನೊಳಗೆ ನ್ಯಾನೋ ಚಿಪ್ ಸೇರಿದೆ ಅಂತ ನಗ್ನಗ್ತಾ ಹೇಳಿ ನಂಬಿದವರನ್ನ ಬೆಪ್ಪು ತಕಡಿಗಳನ್ನಾಗಿಸಿದರಲ್ಲ . ಅದೇ ಹಾದಿ ಮುಂದುವರೆದಂತೆ ರಂಗಮಂದಿರದಲ್ಲಿ ತಾವೇ ಎಸೆದ ಪ್ರಶೆಗಳ ಒಳಗೆ ತಮ್ಮನ್ನೇ ಸಿಕ್ಕಿಸುತ್ತಾ ಪ್ರಶ್ನೆಗೆ ಪ್ರತಿ ಪ್ರಶ್ನೆ ಎಸೆದ ಬುದ್ಧಿವಂತರ ಮುಂದೆ ಮಖಾಡೆ ಮಲಗುವಂತಾಯ್ತಲ್ಲ!!

-ಭಾನುಮತಿ ಬಿ ಸಿ

 

 

 

 

 

ಪ್ರಥಮ – ಪಾಪ!

ಪ್ರಥಮ್ -ಸಂಜನಾ ನಡುವೆ  ಅಫೇರ್ ಇತ್ತಾ ಅನ್ನುವ ಸುದ್ದಿ ಎಗ್ಗಿಲ್ಲದಂತೆ ಹರಿದಾಡುತ್ತಿದೆ . ಅದರ ಸತ್ಯಾಸತ್ಯತೆ ಒಂದು ಕಡೆಗಿರಲಿ. ಪ್ರಥಮ್ ನ ಮಾತು ,ಉಡಾಫೆ ಗಳ ಪ್ರದರ್ಶನವನ್ನ  ಗಮನಿಸುತ್ತಾ  ಬಂದ ಆಶಾ ವಿಶ್ವನಾಥ್ ಆತನ ಹುಚ್ಚಾಟಗಳ ಹಿಂದಿನ ಮನಃಸ್ಥಿತಿಯ ಬಗ್ಗೆ ತಮ್ಮ ಅನಿಸಿಕೆ ದಾಖಲಿಸಿದ್ದಾರೆ ಓದಿ ನೋಡಿ .
ಒಳ್ಳೇ ಹುಡುಗ, ಲೋಕಲ್, ಮೆಂಟಲ್, ಕಿರಿಕ್, ಹುಚ್ಚ , ಕಿಚ್ಚ……….
ಇಂಥ ಹತ್ತು ಹಲವು ಚಿತ್ರ ವಿಚಿತ್ರ ಟೈಟಲ್‍ಗಳನ್ನ ಹೆಸರಿನ ಹಿಂದೆ ಅಂಟಿಸೋದು ಯಾರು?
ಹೀಗೆ ಕೇವಲ ಹೆಸರುಗಳ ಬೆನ್ನು ಹತ್ತಿ ಪ್ರಸಿದ್ಢಿ ಪಡೆಯೋದಕ್ಕೆ ಸಾಧ್ಯವಾ?
ಏನಾದ್ರೂ ಮಾಡಿ ಒಟ್ಟಾರೆ famous ಆಗ್ಬೇಕು ಅನ್ನೋ ಹಪಹಪಿಯಲ್ಲಿ extraordinary ಮಾರ್ಗದಲ್ಲಿ ಹೋಗಿ ಪಡೆದುಕೊಳ್ಳೋ publicity ಎಷ್ಟು ದಿನ ಸಾಥ್ ಕೊಡುತ್ತೆ?
ನಾಲ್ಕು ಜನರ ಮಧ್ಯೆ ನಾನೇ ಬೇರೆ, ನನ್ನ ಸ್ಟೈಲೇ ಬೇರೆ ಅಂತ ಛಾಪು ಮೂಡಿಸಬೇಕು ಅನ್ನೋ ತರಾತುರಿಯಲ್ಲಿ ಉತ್ತೇಜಿತರಾಗಿ ಮುನ್ನಡೆದ್ರೆ famous ಆಗಬಹುದೇನೋ ಆದ್ರೆ ಆ ಪ್ರಸಿದ್ಢಿ, ಹೆಸರು ಎಷ್ಟು ದಿನ ನಮ್ಮೊಂದಿಗಿರುತ್ತೆ?
ರಿಯಾಲಿಟಿ ಷೋಗಳಲ್ಲಿ ಗೆದ್ದ ಮಾತ್ರಕ್ಕೆ ಜೀವನ ಗೆಲ್ಲುವ ಕಲೆ ಕರಗತವಾಗುತ್ತಾ?
ರಾತ್ರೋರಾತ್ರಿ ದಕ್ಕುವಂಥ popularity ಯ ಸತ್ವ ಎಷ್ಟು?
ಉಫ಼್……………….. ಇಂಥ ಹಲವಾರು ಪ್ರಶ್ನೆಗಳು ನನ್ನನ್ನು ಕಳೆದ 2 ದಿನಗಳಿಂದ ಮತ್ತೆ ಕಾಡ್ತಿರೋದಕ್ಕೆ ಕಾರಣ once again, BIGG BOSS ಮತ್ತು ಈ ಸೀಸನ್ನಿನ ವಿಜೇತ ಪ್ರಥಮ.
ಪಾಪ, ಇನ್ನೂ ಮಾಗದ ವಯಸ್ಸು, ಜೀವನದ ಜಂಜಾಟದಲ್ಲಿ ಏನೇನೂ ಇಲ್ಲದ ಅನುಭವ, ಆಗಸಕ್ಕೇ ಲಗ್ಗೆ ಇಟ್ಟು ಕೆಳಗೆ ಕಂಡಿದನ್ನೆಲ್ಲವನ್ನ ಖಂಡಿಸಿ ದಕ್ಕಿಸಿಕೊಳ್ಳಬಲ್ಲೆ ಎಂಬ ಹುಚ್ಚು ಹುಂಬತನ. ಇವೆಲ್ಲವೂ ಮೇಳೈಸಿರುವ ಪ್ರಥಮನ ಈಗಿನ ಸ್ಥಿತಿಗೆ ಅವನಿಗೆ ಓಟು ಹಾಕಿ ಗೆಲ್ಲಿಸಿ ತಪ್ಪು ಮಾರ್ಗ ತೋರಿಸಿದ ನಮ್ಮೆಲ್ಲರ ಬೇಜವಾಬ್ದಾರಿಯೇ ಕಾರಣ ಅನ್ನಿಸೋಲ್ವಾ?
ಏನೇನೂ ಸತ್ವವೇ ಇಲ್ಲದೆ ಕೇವಲ ಜೊಳ್ಳು ಆರ್ಭಟದ ಮಾತುಗಾರಿಕೆಯನ್ನೇ ಬಂಡವಾಳ ಮಾಡಿಕೊಂಡವನನ್ನು ಗೆಲ್ಲಿಸಿ ಹುಚ್ಚು ಆಸೆಯ ಮರೀಚಿಕೆಯ ಬೆನ್ನಮೇಲೇರಿಸಿದ್ದಕ್ಕೆ ಓಟು ಮಾಡಿದವರೇ ಕಾರಣವಾಗೋದಿಲ್ವೆ?
ಉದ್ಭವ ಮೂರ್ತಿಗಳೇ “ಉತ್ಸವ-ಮೂರ್ತಿ”ಗಳಾಗುತ್ತಿರುವ ಸಾಧ್ಯತೆ ಹೆಚ್ಚಾಗಿರುವ ಈ ದಿನಗಳಲ್ಲಿ,  ಕಲಾಕಾರನ ಕೈಗೆ ಸಿಕ್ಕು ನೊಂದು ಬೆಂದು ಕೆತ್ತಿಸಿಕೊಂಡು ಹೊರಹೊಮ್ಮಿದ ಮೂರ್ತಿಗಳು ಮಾತ್ರವೇ ನಿತ್ಯ ಪೂಜೆ ಮಾಡಿಸಿಕೊಳ್ಳಲು ಶ್ರೇಷ್ಠ ಅನ್ನೋದನ್ನು ನಾವು ಮರೆತಂತಿದೆ.
ಪ್ರಥಮ ಪಾಪ, attention seeking, extraordinary exhibition of self success,  ಕೀಳರಿಮೆ, ಅದನ್ನು ಮುಚ್ಚಿಕೊಳ್ಳಲೊಂದಿಷ್ಟು ಆರ್ಭಟಭರಿತ ಮಾತಿನ ಮೋಡಿ, ಎಲ್ಲವನ್ನೂ ಅತಿಯಾದ ವೈಭವಕ್ಕೆ ಒಳಗಾಗಿಸುವ ಬಾಲಿಶ ಮನಸ್ಸು, ಸಮಯೋಚಿತ ನಿರ್ಧಿಷ್ಟ ನಿರ್ಧಾರ ತೆಗೆದುಕೊಳ್ಳಲಾರದ ಡೋಲಾಯಮಾನತೆ, ಹೀಗೆ ತನ್ನೆಲ್ಲ ಸ್ವಂತಿಕೆ ಇಲ್ಲದ  ವ್ಯಕ್ತಿತ್ವ-ಕೊರತೆಗಳೊಂದಿಗೆ ಹೇಗೋ ನಾಲ್ಕರೊಳಗೊಂದಾಗಿ ತನ್ನ ಪಾಡಿಗೆ ತಾನಿದ್ದವ. ಬಿಗ್‍ಬಾಸ್ ಅನ್ನುವ ರಿಯಾಲಿಟಿ ಷೋಗೆ ಉಬ್ಬಿಸಿ ಕೊಬ್ಬಿಸಿ ಕರೆತಂದು ಗೆಲ್ಲಿಸಿ ಆಚೆಗಟ್ಟಿದ ಮಂದಿ ಈಗ ಅವನ ಜೀವನಕ್ಕೊದಗುವರೇ?
ಮುಖವಾಡದ ಜೀವನ ತುಂಬ ದಿನ ಜೊತೆಗೊದಗದು! ’ಪ್ರಸಿದ್ಧಿ’ಗಿಂತ ’ಸಾಧನೆ’ ಬೇಕು. ಪ್ರಥಮ, ಬಿಗ್‍ಬಾಸ್ ಅನ್ನೋ ಉಫ಼ಿ ಆಟದಲ್ಲಿ ಗೆದ್ದೆ. ಬದುಕೆಂಬ ಲೆಕ್ಕಾಚಾರದ ಆಟದಲ್ಲೂ ಗೆದ್ದು ಸಮತೋಲನದ ಸಂತಸದ ನೆಮ್ಮದಿಯ ಬಾಳು ಬಾ………………..
-ಆಶಾ ವಿಶ್ವನಾಥ್
ಮಾನಸಿಕ ಸಲಹೆಗಾರರು .

ಮಜಾ ಟಾಕೀಸ್ .. ಈಗ ಹೊಸ ಟಾಕೀಸ್.

ಯಾವುದೇ ಸೂಪರ್ ಹಿಟ್ ರಿಯಾಲಿಟೀ ಶೋ ಅನ್ನು ಕನ್ನಡಕ್ಕೆ ತಂದು ಗೆಲ್ಲುವುದು ಸುಲಭದ ಮಾತಲ್ಲ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ, ಲೋಕೇಶ್ ಪ್ರೋಡಕ್ಷನ್ಸ್ ಮೂಲಕ ಸೃಜನ್ ಲೋಕೇಶ್ “ಮಜಾ ಟಾಕೀಸ್” ಕಾರ್ಯಕ್ರಮವನ್ನು ನೀಡಿ ಗೆದ್ದು ತೋರಿಸಿದ್ದಾರೆ. ಅಪರ್ಣ, ಮನೋಹರ್ ಹಾಗೂ ಇಂದ್ರಜೀತ್ ಅಂತಹ ಗಂಭೀರ ವ್ಯಕ್ತಿಗಳನ್ನು ಹಾಸ್ಯಮಯ ಪಾತ್ರಗಳಲ್ಲಿ ಯಶಸ್ವಿಯಾಗಿ ಬಿಂಬಿಸಿದ್ದಾರೆ. ಶ್ವೇತಾ, ದಯಾನಂದ್, ಪವನ್, ವಂದನ  ಹಾಗೂ ರೇಮೋ ಅವರನ್ನೊಳಗೊಂಡ “ಮಜಾ ಟಾಕೀಸ್” ಒಂದು ಅಪರೂಪದ ತಂಡ. ಮಂಡ್ಯ ರಮೇಶ್ ಮತ್ತು ಕುರಿ ಪ್ರತಾಪ್ ಸೇರಿಕೊಂಡ ಮೇಲಂತೂ ಪ್ರೇಕ್ಷಕರಿಗೆ ಡಬ್ಬಲ್ ಬೋನಸ್. ಇತ್ತೀಚಿನ ಸೇರ್ಪಡೆ ನವೀನ್ ಪಡೀಲ್ ಕೂಡ ಅಸಾಮಾನ್ಯ ಪ್ರತಿಭೆ.

DSC_0486

ಮೊದಮೊದಲು ಮಿಶ್ರ ಪ್ರತಿಕ್ರಿಯೆಗಳನ್ನು ಎದುರಿಸಿದ ಮಜಾಟಾಕೀಸ್, ನಂತರದ ದಿನಗಳಲ್ಲಿ  ನಂಬರ್ ಒನ್ ರಿಯಾಲಿಟಿ ಶೋ ಆಗಿ ನಿಂತದ್ದು ಮಾತ್ರ ಪ್ರಶಂಸನೀಯ.

ಕಿರುತೆರೆಯಲ್ಲಿ ಎಂದಿಗೂ ಕಾಮಿಡಿ ಮಾಡದ ಚಿತ್ರರಂಗದ ಅತಿರಥ-ಮಹಾರಥರು ಮಜಾಟಾಕೀಸಿಗೆ ಬಂದು ಮಜಾ ಮಾಡಿ ಹೋಗಿದ್ದಾರೆ.

mt ciniadda

25ನೇ ಎಪಿಸೋಡಿನಲ್ಲಿ ಸುದೀಪ್, 50ನೇ ಎಪಿಸೋಡಿನಲ್ಲಿ ದರ್ಶನ್, 75ನೇ ಎಪಿಸೋಡಿನಲ್ಲಿ ಅರ್ಜುನ್ ಸರ್ಜಾ ಹಾಗೂ ಸೆಂಚುರಿ ಎಪಿಸೋಡಿನಲ್ಲಿ ಸೆಂಚುರಿ ಸ್ಟಾರ್ ಶಿವರಾಜ್ ಕುಮಾರ್ ಅವರನ್ನು ಕರೆತಂದು ಪ್ರೇಕ್ಷಕರಿಗೆ ಮನೋರಂಜನೆ ನೀಡಿದ ಹೆಗ್ಗಳಿಕೆ ಸೃಜನ್ ಅವರದು. ಅರಳು ಹುರಿದಂತೆ ಪಟಪಟನೆ ಮಾತನಾಡುವ ಲೋಕೇಶ್, ಎಣ್ಣೆ ಸಿಡಿದಂತೆ ಚಿಟಚಿಟನೆ ನಗುವ ಲಂಕೇಶ್ ಜೋಡಿ ಇಂದು ಕರ್ನಾಟಕದಲ್ಲಿ ಮಾತ್ರವಲ್ಲ ವಿಶ್ವದಾದ್ಯಂತ ಖ್ಯಾತಿ ಪಡೆದ ಜೋಡಿಯಾಗಿದೆ. ಪ್ರಪಂಚದ ನಾನಾ ದೇಶದಲ್ಲಿ ಬದುಕು ಕಂಡುಕೊಂಡಿರುವ ಕನ್ನಡಿಗರು ತಮ್ಮ ತವರಿಗೆ ಬಂದಾಗ ಮಜಾಟಾಕೀಸ್ ಕಾರ್ಯಕ್ರಮಕ್ಕೂ ಭೇಟಿ ಕೊಡುವುದು ಅವರ ಪ್ರಮುಖ ಆದ್ಯತೆ ಆಗಿರುತ್ತದೆ ಎನ್ನುವುದು ಕಲರ್ಸ್ ಕನ್ನಡ ವಾಹಿನಿಗೆ ಒಂದು ಹಿರಿಮೆಯೇ ಸರಿ.

Desktop19

ನೂರರ ನಂತರ ನೂರೈವತ್ತು ಎಪಿಸೋಡ್ ಗಳನ್ನು ಮಿಂಚಿಸಿ ಕಿರುತೆರೆಯಲ್ಲಿ ಹೊಸ ದಾಖಲೆಯನ್ನು ಸೃಷ್ಟಿಸಿ ಮುನ್ನಡೆಯುತ್ತಿರುವ ಮಜಾಟಾಕೀಸ್ ಮನೆ ಈಗ ಸಂಪೂರ್ಣ ಹೊಸ ರೂಪ ಪಡೆದು ಹೊಸ ಮನೆಯಲ್ಲಿ ಕನ್ನಡದ ಪ್ರೇಕ್ಷಕರನ್ನು ರಂಜಿಸಲಿದೆ. ಹೊಸ ಮನೆಯ ಗೃಹಪ್ರವೇಶಕ್ಕೆ ಸೃಜನ್ ಲೋಕೇಶ್ ಅವರ ಆತ್ಮಿಯರಾದ ನಿರ್ದೇಶಕ ಯೋಗರಾಜ್ ಭಟ್ ಜೊತೆಯಲ್ಲಿ ನಭಾ ನಟೇಶ್, ಶುಭಾ ಪೂಂಜ, ಇಂದು-ಬಿಂದು ನಾಗರಾಜ್ ಮತ್ತು ಹಲವರು ಬರಲಿದ್ದಾರೆ.

ಎಂದಿನಂತೆ ಶನಿವಾರ ಮತ್ತು ಭಾನುವಾರ ರಾತ್ರಿ 8 ಗಂಟೆಗೆ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರೇಕ್ಷಕರಿಗೆ ಅದ್ಧೂರಿಯಾಗಿ ಸೆಟ್ಟೇರಿರುವ ಹೊಸ ಮಜಾಟಾಕೀಸ್ ನ ದರ್ಶನವಾಗಲಿದೆ.

ಜೋಗಿ ಕಂಡಂತೆ : ಕಿಚ್ಚ ಸುದೀಪ್

ಸರಿಯಾಗಿ ಹದಿನಾರು ವರುಷದ ಹಿಂದೆ ಸುದೀಪ್ ನಟಿಸಿದ ಸ್ಪರ್ಶ ಚಿತ್ರ ನೋಡಿ ಕನ್ನಡಪ್ರಭದಲ್ಲಿ ವಿಮರ್ಶೆ ಬರೆದಿದ್ದೆ. ಅದರ ಪತ್ರಿಕಾಗೋಷ್ಠಿಯಲ್ಲಿ ಸುದೀಪ್ ಸಂಕೋಚದಿಂದಲೇ ಮಾತಾಡಿದ್ದರು. ಗಾಡ್ ಫಾದರ್ ಇಲ್ಲದ, ಸಿನಿಮಾ ಹಿನ್ನೆಲೆಯೂ ಇಲ್ಲದ ಸುದೀಪ್ ಸಿನಿಮಾ ಪ್ರೀತಿಯಿಂದ ಚಿತ್ರರಂಗಕ್ಕೆ ಕಾಲಿಟ್ಟ ಆರಂಭದ ದಿನಗಳಲ್ಲಿ ತುಂಬ ಒದ್ದಾಡಿದ್ದುಂಟು.

ಈಗಿನ ಅನೇಕ ಹೀರೋಗಳ ಥರ ಮೂರು ಸಿನಿಮಾಕ್ಕೇ ಹೀರೋಯಿಸಮ್ ಮೈಗೂಡಿಸಿಕೊಂಡು ಕೆರವಾನ್ ಒಳಗೆ ಕೂತವರಲ್ಲ ಅವರು. ಮಾತು, ಆಲೋಚನೆ, ಅಭಿನಯ- ಎಲ್ಲದರಲ್ಲೂ ಸ್ಪಷ್ಟತೆ ಇದ್ದ ಸುದೀಪ್, ಅವರ ಸಮಕಾಲೀನರಂತೆ ಸಂಭಾವನೆ ತಗೊಂಡು ನಟಿಸಿ ತಮ್ಮ ಪಾಡಿಗೆ ಇದ್ದವರಲ್ಲ. ಸಿನಿಮಾ ಕಲಿಯಬೇಕು ಅಂತ ಹಗಲಿರುಳು ಕತೆ, ಚಿತ್ರಕತೆ, ನಿರ್ದೇಶನ, ತಾಂತ್ರಿಕತೆ, ಛಾಯಾಗ್ರಹಣ, ಎಡಿಟಿಂಗ್, ಪೋಸ್ಟರ್ ಡಿಸೈನ್, ಪ್ರಚಾರ- ಎಲ್ಲದರಲ್ಲೂ ಆಸಕ್ತಿಯಿಂದ ತೊಡಗಿಸಿಕೊಳ್ಳುತ್ತಿದ್ದವರು.

ಆರಂಭದ ದಿನದಿಂದಲೇ ಭಯಂಕರ ಆತ್ಮವಿಶ್ವಾಸ ಮೈದುಂಬಿಸಿಕೊಂಡವರಂತೆ ಕಾಣಿಸುತ್ತಿದ್ದ ಸುದೀಪ್ ಸೋಲಿಗೆ ಅಂಜಿದವರಲ್ಲ. ಸ್ವಾತಿಮುತ್ತು ಸೋತಾಗ ಮಾತ್ರ ತುಂಬ ಭಾವುಕರಾಗಿ ಹೋಟೆಲ್ ಸರೋವರದಲ್ಲಿ ಕಣ್ಣೀರು ಹಾಕಿದ್ದರು.

ಮೈ ಆಟೋಗ್ರಾಫ್ ಚಿತ್ರದ ನಂತರ ಸುದೀಪ್ ಸ್ವಲ್ಪ ಮಟ್ಟಿಗೆ ಏಕಾಂಗಿಯಾಗಿಬಿಟ್ಟರು. ತಮ್ಮ ಪಾಡಿಗೆ ತಾವು ಕೆಲಸ ಮಾಡುತ್ತಲೇ ಹೋದರು. ಆ ಏಕಾಗ್ರತೆಯೇ ಅವರನ್ನು ಇವತ್ತು ಈ ಹಂತಕ್ಕೆ ತಂದು ನಿಲ್ಲಿಸಿದೆ.

ಹದಿನೆಂಟು ವರುಷ ಕನ್ನಡ ಚಿತ್ರಗಳಲ್ಲಿ ನಟಿಸಿ, ಕನ್ನಡದ ನಟ ಅನ್ನಿಸಿಕೊಂಡ ನಂತರ ಸುದೀಪ್ ಪೂರ್ಣಪ್ರಮಾಣದ ತಮಿಳು ಚಿತ್ರವೊಂದರಲ್ಲಿ ನಾಯಕನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ರಜನೀಕಾಂತ್, ಕಮಲ್ ಹಾಸನ್, ಚಿರಂಜೀವಿ ಮುಂತಾದವರ ಯಶಸ್ವಿ ಸಿನಿಮಾಗಳನ್ನು ಕೊಟ್ಟ ಕೆ ಎಸ್ ರವಿಕುಮಾರ್ ಈ ಸಿನಿಮಾ ನಿರ್ದೇಶಿಸಿದ್ದಾರೆ. ತಮಿಳು ಚಿತ್ರರಂಗದಲ್ಲಿ ತಮಿಳು ನಾಯಕರ ನಡುವೆ ಕನ್ನಡದ ನಟನೊಬ್ಬ ದೊಡ್ಡ ಬಜೆಟ್ಟಿನ ಸಿನಿಮಾ ಮಾಡಿ, ದೇಶಾದ್ಯಂತ 700 ಚಿತ್ರಮಂದಿರಗಳಲ್ಲಿ , ಕರ್ನಾಟಕದ 300 ಚಿತ್ರಮಂದಿರಗಳಲ್ಲಿ ಅದನ್ನು ಬಿಡುಗಡೆ ಮಾಡುವ ಮಟ್ಟಕ್ಕೆ ಬೆಳೆದಿರುವುದೇ ಬಹುದೊಡ್ಡ ಸಾಧನೆ. ಇಂಥ ರಿಸ್ಕ್ ತೆಗೆದುಕೊಳ್ಳಬಲ್ಲ ಧೈರ್ಯ ಎಲ್ಲರಿಗೂ ಬರುವುದಕ್ಕೂ ಸಾಧ್ಯವಿಲ್ಲ. ಅನ್ಯನೆಲದಲ್ಲಿ ಕಾಲಿಡುವುದೇ ಬಹುದೊಡ್ಡ ರಿಸ್ಕು ಅಂತ ಅನೇಕ ಸಲ ಸಾಬೀತಾಗಿರುವಾಗ, ಸುದೀಪ್ ಅಂಥ ಸಾಹಸ ಮಾಡುತ್ತಿರುವುದನ್ನು ಹೆಮ್ಮೆಯಿಂದ ನೋಡಬೇಕು.

ವಿಜಯ್, ಅಜಿತ್, ಸೂರ್ಯ, ವಿಕ್ರಮ್, ಧನುಷ್ -ಮುಂತಾದವರ ಸಿನಿಮಾಗಳು ಕರ್ನಾಟಕದ ತುಂಬ ಸದ್ದು ಮಾಡುತ್ತಿರುವಾಗ, ಕನ್ನಡದ ಸ್ಟಾರ್ ತಮಿಳುನಾಡಲ್ಲಿ ದಿಟ್ಟತನದಿಂದ ಚಿತ್ರರಸಿಕರ ಎದುರು ನಿಲ್ಲುವುದು ಸಣ್ಣ ಸಂಗತಿ ಅಲ್ಲ. ಇದು ಕರ್ನಾಟಕದ ಮಾರುಕಟ್ಟೆಯನ್ನು ವಿಸ್ತರಿಸುವ ಮಾತಲ್ಲ, ಕನ್ನಡದ ಪ್ರತಿಭಾವಲಯದ ವಿಸ್ತಾರವನ್ನು ತೋರುವಂಥ ಕೆಲಸ.

Congrats and Good Luck Sudeep 🙂

13754609_10154336924094941_1318993591092698745_n

ಲೇಖನ ಕೃಪೆ :  ಜೋಗಿ, ಜನಪ್ರಿಯ ಲೇಖಕರು

ಪಾರ್ವತಮ್ಮ ಉರುಳಿಸಿದ ರಾಜಕುಮಾರ್ ಬದುಕಿನ ಮತ್ತೊಂದು ಮಗ್ಗುಲು

ಚಿತ್ತ ಕೆತ್ತಿದ ಚಿತ್ರ” ಹಿರಿಯ ಪತ್ರಕರ್ತೆ ಡಾ. ವಿಜಯ ಅವರ  ಅನುಭವದ ಅಕ್ಷರ ಮಾಲೆ. ಸಾಹಿತ್ಯ ದಿಗ್ಗಜರ ಎದುರು-ಬದಿರು ಕೂತು ಮನಸ್ಸಿನಾಳಕ್ಕಿಳಿದು ಅವರ ಒಳಮಾತುಗಳನ್ನು ಕೇಳಿಸಿಕೊಂಡ ಮೇಲೂ  ಹೇಳಿಯೂ ಹೇಳದಂತೆ, ವ್ಯಕ್ತಿ ಗೌರವಕ್ಕೆ ಧಕ್ಕೆಯಾಗದಂತೆ ದಾಖಲಿಸಿದ ಸೂಕ್ಷ್ಮಜ್ಞೆ ವಿಜಯಮ್ಮ. ಅಂದಿನ ಕಾಲಘಟ್ಟಕ್ಕೆ  ಹಿಡಿದ ಕನ್ನಡಿಯಂತಿರುವ ಲೇಖನಗಳು ಇಂದಿಗೂ ಮಾದರಿರೂಪದಲ್ಲಿವೆ. ಆಕೆ ಮಮತೆ ತುಂಬಿದ ತಾಯ್ತನದ ಖನಿ. ಹಾಗಿಲ್ಲದಿದ್ದರೆ ಪಾರ್ವತಮ್ಮ ರಾಜ್ಕುಮಾರ್ ಬದುಕಿನ ಕಟುಸತ್ಯವನ್ನ ಇಷ್ಟು ಸೂಕ್ಷ್ಮವಾಗಿ ತನ್ನ ಮನೆ ಮರ್ಯಾದೆಯನ್ನು ಕಾಯ್ದುಕೊಳ್ಳುವಷ್ಟೇ ಜತನದಿಂದ ಕಟ್ಟಿಕೊಡುವುದು ಸಾಧ್ಯವಿರಲಿಲ್ಲ. ಪಾರ್ವತಮ್ಮ ರಾಜ್ಕುಮಾರ್ ತೆರೆದಿಟ್ಟ ತನ್ನ ಒಳ ಬದುಕನ್ನು ವಿಜಯಮ್ಮ ಅಕ್ಷರಕ್ಕಿಳಿಸಿದ ರೀತಿಯನ್ನು ನೀವೇ ಓದಿಕೊಳ್ಳಿ ಅರಿವಾದೀತು.

parwathamma rajkumar vijayamma

ಚಿತ್ರ ಕೆತ್ತಿದ ಚಿತ್ರ- ನಾನು ಈ ಮನೆಯ ಸೊಸೆಯಾಗಿ ಬಂದದ್ದು ಆಕಸ್ಮಿಕವಲ್ಲ. ಎಂದೋ ಆಗಿದ್ದ ತೀರ್ಮಾನ. ಹದಿನೈದರ ಬಾಲೆ ಈ ಮನೆಯ ಹೊಸಿಲೊಳಗೆ ಬಂದಾಗ ಕೇವಲ ಮುಗ್ಧತೆ ಇತ್ತು. ಬೆರಗುಗಣ್ಣಿನಿಂದ ಎಲ್ಲವನ್ನೂ ನೋಡುತ್ತಾ ನಿಲ್ಲುವುದು ಮಾತ್ರ ಗೊತ್ತಿತ್ತು. ಎಂದಿನಂತೆ ಕುಂಟಾಬಿಲ್ಲೆಗೆ ಬರದೆ ದೂರ ಸರಿಯುತ್ತಿದ್ದ ಮುತ್ತುರಾಜರ ಬಗ್ಗೆ ಹುಸಿ ಮುನಿಸು ತುಂಬುತಿತ್ತು. ಆದರೂ ಗುಟ್ಟಾಗಿ ಕರೆದು “ಆಟ ಆಡೋಣ ಕಣ್ಣಾಮುಚ್ಚಾಲೆ…ಕುಂಟಾಬಿಲ್ಲೆ..ನಿನಗೆ ಯಾವುದು ಬೇಕಾದರೂ ಸರಿ …ಬೇಜಾರಾಗ್ತಿದೆ ” ಎಂದು ಗೋಗರೆದಾಗ ನಕ್ಕು, ತಲೆ ಸವರಿ “ತಂಗಿಯರು ಇದ್ದಾರಲ್ಲ, ಆಡಿಕೋ , ನನಗೆ ಹೊರಗೆ ಕೆಲಸವಿದೆ…”ಎಂದು ಬಿಟ್ಟಿದ್ದರು

ಆಟ ಆಡುತ್ತಾ ಖುಷಿಯಾಗಿರಬಹುದು ಅಂತ ಇವರ ಹಿಂದೆ ಬಂದರೆ ಹೀಗೆ ಮಾಡುವುದೇ? ಎಂಬ ಕೋಪ.

ರಾತ್ರಿ ಅವರು ತನ್ನ ತೋಳಲ್ಲಿ ತೆಗೆದುಕೊಂಡು “ನಿನಗೊಂದು ಗುಟ್ಟು ಹೇಳಲೇ ?” ಎಂದರು. ನನಗೆ ಕೋಪ ಹೋಗಿತ್ತು. ನಕ್ಕು ತಲೆ ಆಡಿಸಿದೆ. ಮತ್ತಷ್ಟು ಅವರ ಎದೆಯ ಹತ್ತಿರ… ಸಾಧ್ಯವಾದಷ್ಟು ಒಳಗೇ ತೂರಿಸಿ ಬಿಡುತ್ತೇನೆಂಬ ಹಾಗೆ ನನ್ನ ಮುಖ ತೂರಿಸಿ ಅವರು ಯಾವ ಕಾರಣಕ್ಕೂ ತಮ್ಮ ತೋಳಬಿಗಿಯನ್ನು ಸಡಿಲಿಸದಿರಲಿ ಎಂದು ಪ್ರಾರ್ಥಿಸುತ್ತ ಅವರಿಗೆ ಕಿವಿಯಾದೆ.

ಪ್ರೀತಿಯಿಂದ ಪಿಸುಗುಡುತ್ತ “ಪಾರ್ವತಿ ನಾವು ಬರೀ ಸತಿ-ಪತಿಯರಲ್ಲ ಗೆಳೆಯರು ಕೂಡಾ. ನಾನು ತಪ್ಪು ಮಾಡಿದರೂ, ನೀನು ತಪ್ಪು ಸಂಭವಿಸದಂತೆ ಜಾಗರೂಕಳಾಗಿರು. ನನ್ನ ತಂಗಿಯರು ತಮ್ಮಂದಿರು,ಅಮ್ಮ,ಅಪ್ಪ ಈ ದೊಡ್ಡ ಕುಟುಂಬ. ಹೀಗೇ ನಂದಗೋಕುಲದ ಹಾಗೆ ಇರುವಂತೆ ನೋಡಿಕೊಳ್ಳುವ ಹೊಣೆ ನಿನ್ನದು. ಕಷ್ಟ ಸುಖದಲ್ಲಿ ನಾನು ಜೊತೆಗಿದ್ದೇನೆ.

ಮೊದಲ ರಾತ್ರಿಯ ಮರೆಯಲಾಗದ ಮಾತು 

ಇವತ್ತಿಗೂ ನನ್ನ ಮನಸ್ಸಲ್ಲಿ ಆ ಮಾತು, ಆ ಪ್ರೀತಿ ಅಚ್ಚಳಿಯದೆ ನಿಂತಿದೆ. ನನ್ನ ಮೊದಲ ರಾತ್ರಿಯ ಮಾತಾಗಿ ಅವರು ಹೇಳಿದ್ದು “ಕುಟುಂಬ ಒಡೆಯಬಾರದು”. ನನಗದೇ ತಾರಕ ಮಂತ್ರವಾಗಿತ್ತು. ಇವೆಲ್ಲ ಹೇಳಿದಷ್ಟು ಸುಲಭವಾಗಿ ಸಾಧಿಸಲು ಆಗುವುದಿಲ್ಲ. ಇದಕ್ಕಾಗಿ ದೊಡ್ಡ ತ್ಯಾಗದ ಬೆಲೆ ಇದೆ. ಅಪ್ರಿಯರಿಗೂ ಪ್ರಿಯವಾದದ್ದನ್ನು ಮಾಡಲು ನಿರಂತರ ಶ್ರಮಿಸುತ್ತ ಯಾವುದೇ ಕೀಸರು, ಬಾಸರುಗಳನ್ನು ಹೊರಹಾಕದೆ, ಹೊಟ್ಟೆಯಲ್ಲಿ ತುಂಬಿಕೊಂಡು ಎಲ್ಲರ ಒಳಿತಿಗಾಗಿ ಅಗತ್ಯ ಕಂಡರೆ ನಿಷ್ಠುರವಾಗಿ ವರ್ತಿಸಬೇಕಾಗುತ್ತದೆ ಎಂಬುದನ್ನು ನಾನು ಅರ್ಥಮಾಡಿಕೊಂಡೆ. ಆದರೆ ನಾನು ಅದಕ್ಕಾಗಿ ಬಹಳಷ್ಟು ಕಾಲ ಕಾಯಬೇಕಾಯ್ತು.

ಸಿಕ್ಕಷ್ಟೇ ಸುಖ 

ಚಿತ್ರ ಕೆತ್ತಿದ ಚಿತ್ರ- ಸುಮಾರು ಏಳು ವರ್ಷಗಳ ಕಾಲ ಆ ತೋಳ ಆಸರೆಯಲ್ಲಿ ಎಡಬಿಡದೆ ನೆರಳಾಗಿ ವಾಗರ್ಥಗಳ ಹಾಗೆ, ಅರ್ಧನಾರೀ ನಟೇಶ್ವರರ ಹಾಗೆ ಸಾಗಿದೆವು. ಅದೇ ಇವತ್ತಿಗೂ ನನ್ನ ಬಾಳ ಬುತ್ತಿ.ಅದು ಮುಗಿಯದ್ದು. ಅಕ್ಷಯ…ಅಕ್ಷಯ… ಆ ಪ್ರೀತಿಯ ಶಕ್ತಿಯೇ ನನ್ನನ್ನು ಇಲ್ಲಿಯವರೆಗೆ ನಡೆಸಿಕೊಂಡು ಬಂದಿದೆ.

ಬಿಟ್ಟರೂ ಬಿಡದ ಬಂಧ ! ( ಗಮನವಿಟ್ಟು ಓದಿಕೊಳ್ಳಿ )

ಚಿತ್ರ ಕೆತ್ತಿದ ಚಿತ್ರ- ಕಲಾವಿದರು, ಕ್ಷೇತ್ರವೇ ಅಂಥದ್ದು. ಆಕರ್ಷಣೆಗಳ ಗೊಂದಲ. ಬೇಡವೆಂದರೂ ಬಿಡದ ನಂಟುಗಳು… ನನ್ನ ಚಿಕ್ಕಮಾವನವರು ನನಗೆ ಸದಾ ಹೇಳುತ್ತಿದ್ದರು, “ಬಿಟ್ಟು ಕೊಡಬೇಕು, ಸಡಿಲವಾದರೇನಂತೆ ಪ್ರೀತಿಯ ಕೊಂಡಿ ನಿನ್ನ ಬಳಿ ಇದ್ದರಾಯಿತು…ಅತಿಯಾದ ಹಿಡಿತ-ಬಿಗಿ ಮತ್ತು ಸ್ವಾರ್ಥದ ಏಕತಾನತೆ ಚಲನಶೀಲತೆಯನ್ನೇ ಕುಗ್ಗಿಸಿ ಬಿಡಬಹುದು -ಹೊಸ ಹವೆಗೆ ಮುಖ ಒಡ್ಡಿದರೆ ಮುನಿಯಬೇಡ ; ಮುದ್ದಿಸು” ಎಂತ. ಆತ ಮಹಾ ರಸಿಕರು. ಎಲ್ಲ ಮಾತೂ ಧ್ವನಿಪೂರ್ಣ. ಅಂದು ಹಿರಿಯರ ಮಾತಿಗೆ ತಲೆಬಾಗಿದೆ. ಇವತ್ತು ಆ ಮಾತಿನ ಹಿಂದಿನ ಅರ್ಥ ಮನದಟ್ಟಾಗುತ್ತಿದೆ.

ಆ ಗುಲಾಬಿಯ ಹಿಂದಿನ ಕಥೆ ?(ನಿಮ್ಮಲ್ಲಿ ಸೂಕ್ಷ್ಮತೆ ಇದ್ರೆ ಈ ಮಾತುಗಳ ಒಳಾರ್ಥ ಗ್ರಹಿಸಿಬಿಡಬಲ್ಲಿರಿ) 

ಚಿತ್ರ ಕೆತ್ತಿದ ಚಿತ್ರ-ನಾನು ಶಿವಣ್ಣನನ್ನು ಗರ್ಭ ಧರಿಸಿದ್ದ ಕ್ಷಣ. ವೈದ್ಯರ ಬಳಿ ಹೋಗಿ ಬಂದಾಗ ಹಿಗ್ಗು… ಇವರು ವರದಣ್ಣ ಸಿಹಿ ತಂದರು. ಇವರ ಬಾಯಿಗಿಟ್ಟು ಖುಷಿ ಪಟ್ಟು ಹಾಡಿದ್ದೇ ಹಾಡಿದ್ದು.

ಅಂದೇ ಎಕ್ಸಿಬಿಷನ್ಗೆ ಹೊರಟೆವು. ದಾರಿಯಲ್ಲಿ ನನ್ನ ‘ಗೆಳತಿಯ’ ಮನೆಗೆ ನಾನೇ ಒತ್ತಾಯವಾಗಿ ಕರೆದೊಯ್ದೆ.ವರದಣ್ಣ ಬೇಡ ಎಂದರೂ ಬಿಡಲಿಲ್ಲ. ಸಿಹಿ ಕೊಟ್ಟೆ ಆಕೆಗೆ. ಆಕೆ ಏಕೋ ಗಂಭೀರವಾಗಿದ್ದಳು…ಒಂದು ದೊಡ್ಡ ಗುಲಾಬಿ ತಂದುಕೊಟ್ಟಳು. ಗುಲಾಬಿ ಚೆನ್ನಾಗಿತ್ತು. ಆದರೆ ಅದನ್ನು ನೋಡಿದಾಗಲೆಲ್ಲ ಆಕೆಯ ಖಿನ್ನವಾದ ಮುಖ ಕಣ್ಣೆದುರು ಬರುತ್ತಿತ್ತು. ಆ ಗುಲಾಬಿಯ ಹಿಂದಿನ ಕಥೆಯೇನೋ ನಾನರಿಯೆ…ನನಗೇಕೋ ಗುಲಾಬಿಯೇ ಬೇಡವಾಯಿತು. ಅದೆಷ್ಟೋ ವರುಷಗಳವರೆಗೆ ಗುಲಾಬಿಗೆ ನನ್ನ ಮುಡಿಯಲ್ಲೇ ಏಕೆ, ನನ್ನ ಆರಾಧ್ಯದೇವಿ ಲಲಿತ-ದುರ್ಗೆಯರ ಮುಡಿಗೂ ಸಲ್ಲಲಿಲ್ಲ. ಅದೇಕೋ ಪಾರ್ವತಿಗಿಂತ ‘ಗಂಗೆ’ಯರಿಗೇ ಅದು ಸೂಕ್ತ ಎಂದುಕೊಂಡಿತು ಮನಸ್ಸು.

ಹಾಗಿಲ್ಲದಿದ್ದರೆ ಬದುಕು ಮೂರಾಬಟ್ಟೆಯಾಗುತ್ತಿತ್ತಾ?

ಚಿತ್ರ ಕೆತ್ತಿದ ಚಿತ್ರ – ಹೌದು, ನಾನು ಶಿವನ ತೊಡೆಯೇರಿದ ಪಾರ್ವತಿ. ಅವನ ಅರ್ಧದೇಹ. ಆದರೆ ಮುಡಿಯೇರಿದ ‘ಗಂಗೆ’ಯರತ್ತ ವಾರೆಗಣ್ಣು ಹಾಕಿ ಹದ್ದುಬಸ್ತಿನಲ್ಲಿರಿ ಅನ್ನದೆ ಹೇಗಿರಲಿ ? 

( ಅಬ್ಬಾ.. ಎಂಥಾ ಮಾತು! ಅರಿವಾದವರಷ್ಟೇ ಅರ್ಥೈಸಿಕೊಳ್ಳಬಹುದಾದ ಮಾತು )

ಆತ್ಮಹತ್ಯೆ ಮಾಡಿಕೊಳ್ಳಲೇ ?

ಚಿತ್ರ ಕೆತ್ತಿದ ಚಿತ್ರ – ಇವರು ವಿಪರೀತ ಕೆಲಸದಲ್ಲಿ ತೊಡಗಿದ್ದರು. ಮೊದಲಿನ ಸಾಮಿಪ್ಯ ಇಲ್ಲ…ಸದಾ ತಿರುಗಾಟ. ನಾನೂ ಅವರ ಜತೆ ಹೋಗಲಾಗುತ್ತಿರಲಿಲ್ಲ. ಮನೆಯ ಜವಾಬ್ದಾರಿ…ಏನೋ ಕಳೆದುಕೊಂಡ ಹಾಗಾಗುತಿತ್ತು. ಅವರಿಲ್ಲದ ಕ್ಷಣಗಳು ನನಗೆ ಬೆಂಕಿಯ ಮೇಲೆ ನಡೆದಂತೆ ಕಂಡವು…ಅವರು ಹೀಗೆ ಸದಾ ಕೆಲಸದಲ್ಲಿರುವುದೇ ನಾನು,ಮಕ್ಕಳಿಗಾಗಿ ತಾನೇ…ನಾನೇ ಇಲ್ಲವಾದರೆ…ಅವರಿಗೆ ಈ ಬಿಡುವಿಲ್ಲದ ದುಡಿಮೆಯ ಶ್ರಮವಾದರೂ ತಪ್ಪಲಿ…ನಾನೇ ಹೋಗಿಬಿಡಬೇಕು… ಹೇಗೆ ? ಆತ್ಮಹತ್ಯೆಯೇ …

ವೈಯಕ್ತಿಕ ಮಾತು ಎಷ್ಟು ಹೇಳಿದರೂ ಅದೇ ಲೋಕದ ಪ್ರೀತಿಯ ಮಗುವಾದ ಅವರನ್ನು ನಾನು ಆ ಕ್ಷಣ ನನ್ನೊಬ್ಬಳದೇ ಸ್ವತ್ತು  ಎಂದು ಭಾವಿಸಿ ಹಟ ಮಾಡಿದ್ದರಲ್ಲೇ ತಪ್ಪಿತ್ತೇನೋ,ಕಡೆಗೊಮ್ಮೆ ನಿರ್ಧರಿಸಿದೆ. ನಾನೇ ಅವರಿಂದ ದೂರ ಇರುವುದು. ಹಾಗಿರುವ ಅರ್ಹತೆ ಸಂಪಾದಿಸುವುದು…

raajkumar vijayamma

ಇಂಥಾ ಎಷ್ಟೋ ಅಂತರಂಗದ ಮಾತುಗಳು ಡಾ. ವಿಜಯಾರ  ಚಿತ್ತ ಕೆತ್ತಿದ ಚಿತ್ರ ಪುಸ್ತಕದಲ್ಲಿವೆ. ನೀವೇ ಕೊಂಡು ಓದಿ ನೋಡಿ ಅದರ  ಆಳ, ಅಗಲ, ವಿಸ್ತಾರ ತಿಳಿದೀತು.

ಫೋಟೋ ಕೃಪೆ-ವ್ಯಕ್ತಿತ್ವದ ಹಿಂದಿರುವ ವ್ಯಕ್ತಿ

 

 

 

 

ಅಲ್ಲಮನಿಗೆ ಒಲಿಯಲಿಲ್ಲ ಬಾಪು ಕೈ ಬಿಡಲಿಲ್ಲ ರಾಷ್ಟ್ರ ಪ್ರಶಸ್ತಿ.ಇನ್ನಾದರೂ ಬದಲಾದೀತೆ ನಿರ್ದೇಶಕರ ಮನಃಸ್ಥಿತಿ ?

64 ನೇ ಚಲನಚಿತ್ರ ರಾಷ್ಟ್ರ ಪ್ರಶಸ್ತಿಗಳು  ಪ್ರಕಟವಾಗಿವೆ .ಇತ್ತೀಚೆಗೆ  ರಾಜಕೀಯವಾಗಿ ಸಂಚಲನ ಮೂಡಿಸಿರುವ ಉತ್ತರಪ್ರದೇಶ “ಸಿನಿಮಾ ಸ್ನೇಹಿ” ರಾಜ್ಯ ಹೆಗ್ಗಳಿಕೆಗೆ ಪಾತ್ರವಾಗಿದೆ .ಕನ್ನಡ ನಾಡಿಗೆ ಆ ಭಾಗ್ಯ ವೆಂದು ಬರುವುದೋ ? ಇರಲಿ. ಕನ್ನಡದ  ಪಾಲಿಗೆ  ಅತೀವ ಸಂತಸ ಅಲ್ಲದಿದ್ದರೂ ಕರ್ನಾಟಕದ ಮಟ್ಟಿಗೆ  ಸಣ್ಣ ಸಮಾಧಾನ ಸಿಕ್ಕಿದೆ. ತುಳುವಿನ ಮದಿಪು ,ಕೊಂಕಣಿಯ ಕೆ ಸೆರಾ ಸೆರಾ ಪ್ರಶಸ್ತಿ ಬಾಚಿಕೊಂಡಿವೆ. ಅಲ್ಲಮ ಅತ್ಯುತ್ತಮ ಚಲನ ಚಿತ್ರ ಪ್ರಶಸ್ತಿ ಹೊತ್ತು ತರುತ್ತಾನೆಂಬ ನಿರೀಕ್ಷೆ ಸುಳ್ಳಾಗಿದೆ . ಆದರೂ ಚಿತ್ರದ ಹಾಡುಗಳು- ಹಿನ್ನೆಲೆ ಸಂಗೀತಕ್ಕೆ ಬಾಪು ಪದ್ಮನಾಭ ,ಅತ್ಯುತ್ತಮ ಪ್ರಸಾದನಕ್ಕೆ ಹಿರಿಯ ಕಲಾವಿದ ರಾಮಕೃಷ್ಣ ಪ್ರಶಸ್ತಿ ಪಡೆದಿರುವುದು  ಅಲ್ಪತೃಪ್ತಿ .

ಕಳೆದ ಬಾರಿ ರಾಜ್ಯ ಪ್ರಶಸ್ತಿ ಪಡೆದ ಹಜ್ ಚಿತ್ರದ ನಿರ್ದೇಶಕ ನಿಖಿಲ್ ಮಂಜು ಈ ಬಾರಿ “Reservation” ಚಿತ್ರಕ್ಕೆ ರಾಷ್ಟ್ರಪ್ರಶಸ್ತಿಯನ್ನೇ ಗೆದ್ದು ತಂದಿದ್ದಾರೆ.  ಆದ್ರೆ ಹಜ್ ಚಿತ್ರವಾಗಲಿ,  “Reservation” ಆಗಲಿ ಎಷ್ಟು ಜನರನ್ನ ತಲುಪಿದೆ ?ತಲುಪಲಿದೆ ? ಅನ್ನುವುದು ಕಾಡುತ್ತಿರುವ ಪ್ರಶ್ನೆ. ಪ್ರಶಸ್ತಿ ಬಂದರೆ ಸಾಕೆ ? ಸಿನಿಮಾ ಜನರನ್ನು ತಲುಪುವುದು ಬೇಡವೇ ?

ಇರಲಿ , ಒಮ್ಮೆ ಬಾಲಿವುಡ್ ಕಡೆಗೆ ಕಣ್ಣಾಯಿಸಿದರೆ ನಮ್ಮ ನೆಲೆಯ ಅರಿವಾದೀತು .

ನೀರ್ಜಾ -ಈ ಬಾರಿಯ ಅತ್ಯುತ್ತಮ ಹಿಂದಿ ಚಲಚಿತ್ರ . ಅನೇಕ ದಾಖಲೆಗಳನ್ನು ತನ್ನದಾಗಿಸಿಕೊಂಡ ಹೆಗ್ಗಳಿಗೆ ಅದರದ್ದು. ನೈಜ ಕಥೆ ಆಧರಿಸಿ ಪ್ರೇಕ್ಷಕರನ್ನು ಕ್ಷಣಕ್ಷಣಕ್ಕೂ ಅವರಿಸಿಕೊಳ್ಳುವಂತೆ ಉಸಿರು ಬಿಗಿ ಹಿಡಿಯುವಂತೆ,  ಅದೂ  ನಾಯಕಿ ಪ್ರಧಾನವಾಗಿ  ಹಿಡಿದಿಡುವುದು ಸುಲಭದ ಮಾತಲ್ಲ. ನಿರ್ದೇಶಕ ಸಮರ್ಥನಿದ್ದರೆ ಮಾತ್ರ ಇದು ಸಾಧ್ಯವಾಗುವಂತಹದ್ದು.ಬೆರಳೆಣಿಕೆಯಷ್ಟು ಮಂದಿ ಹೊಸರೀತಿಯ ಪ್ರಯತ್ನದಲ್ಲಿದ್ದರೂ ರಾಷ್ಟ್ರಮಟ್ಟ ತಲುಪಿಲ್ಲ. ಮೂರ್ನಾಲು ಮಂದಿಗೇ ಮತ್ತೆ ಮತ್ತೆ ಪ್ರಶಸ್ತಿಗಳು . ಬಂದರೂ ಜನ ನೋಡಿ ಅರ್ಥಮಾಡಿಕೊಳ್ಳಲಾಗದ ಚಿತ್ರಗಳು.  ಕನ್ನಡದಲ್ಲಿ ನಿರ್ಜಾ ರೀತಿಯ  ಪ್ರಯತ್ನಗಳು ಯಾವ ಕಾಲಕ್ಕೋ? ನಮ್ಮಲ್ಲಿ ಸೃಜನಶೀಲತೆ, ಬದ್ಧತೆ , ಗೆದ್ದೇ ತೀರುವ ಛಲದ ಕೊರತೆ ಎದ್ದು ನಿಂತಿದೆ. ಮನರಂಜಿಸುತ್ತಲೇ ಸಾಮಾನ್ಯನನ್ನು ಅಸಾಮಾನ್ಯ ಚಿಂತನೆಯ ಕಡೆಗೆ ಕರೆದೊಯ್ಯುವ ,ಅದರ ರುಚಿ ಹತ್ತಿಸುವ  ತಾಕತ್ತು ಸದ್ಯಕ್ಕಂತೂ ಯಾರಲ್ಲೂ ಕಂಡಿಲ್ಲ. ಪ್ರೇಕ್ಷಕರನ್ನು ಪ್ರಬುದ್ಧರಾಗಿಸುವ ಇಚ್ಚಾಶಕ್ತಿ ಯಾವಕಾಲಕ್ಕೆ ಬರುವುದೋ?  ನಮ್ಮ ಮಾರ್ಕೆಟ್ ಚಿಕ್ಕದು ಎನ್ನುವ ಕಾರಣ ಅವರಿಗಿರುವ ಚಿಂತನೆಯ ಪರಿಧಿಯಷ್ಟೇ ಸಣ್ಣದು.

ಪಿಂಕ್ -ಸಾಮಾಜಿಕ ಪಿಡುಗನ್ನ ಆಧರಿಸಿದ ಅತ್ತ್ಯತ್ತಮ ಚಿತ್ರ ಪಟ್ಟಿಯಲ್ಲಿ ಪ್ರಥಮ ಸ್ಥಾನ ಗಳಿಸಿದೆ.ಹೆಣ್ಣು  ಇಲ್ಲ ಅಂದ್ರೆ ಇಲ್ಲ ಅಂತ ಅರ್ಥ ಅಷ್ಟೆ . ಪೂರ್ವಗ್ರಹ ಪೀಡಿತರಾದ  ಗಂಡು-ಹೆಣ್ಣು ಮನಸ್ಸುಗಳಿಗೂ “ಹೌದು” ನೀವು ಹೇಳುತ್ತಿರುವುದರಲ್ಲಿ ಅರ್ಥವಿದೆ ಅನ್ನಿಸಿದ ಚಿತ್ರ.

ಈ ಎರಡು ಚಿತ್ರಗಳನ್ನ ಅಕಸ್ಮಾತ್ ನೋಡಿಲ್ಲದಿದ್ದರೆ ಮಿಸ್ ಮಾಡದೆ ನೋಡಿಬಿಡಿ. ಕೇವಲ ಪ್ರಶಸ್ತಿಯ ಗೌರವ,ಹಣಕ್ಕಾಗಿ ಸಿನಿಮಾ ಮಾಡದೆ ಜನರ ಮನಸ್ಸಿನಲ್ಲಿ ಉಳಿಯುವ,ಪ್ರೇರೇಪಿಸುವ ,ರಂಜಿಸುವ ಸಿನಿಮಾಕ್ಕೆ ಇವು ಮಾದರಿ.

ಉಳಿದ ಚಿತ್ರಗಳ ಪಟ್ಟಿ ಇಲ್ಲಿದೆ .

 

ಅತ್ಯುತ್ತಮ ಪರಿಸರ ಚಿತ್ರ -The Tiger Who Crossed the Line

ಅತ್ಯುತ್ತಮ ನಟ -ಅಕ್ಷಯ್ ಕುಮಾರ್ (ರುಸ್ತುಮ್ )

ಅತ್ಯುತ್ತಮ ಶೈಕ್ಷಣಿಕ ಚಿತ್ರ – The Waterfalls

ಅತ್ಯುತ್ತಮ ಆತ್ಮಕಥಾನಕ ಚಿತ್ರ -Zikr Uss Parivash Ka

ಅತ್ಯುತ್ತಮ ಸಿನಿಮಾ ಪುಸ್ತಕ -Lata Mangeshkar (ಜೀವನಗಾಥೆ )

ಅತ್ಯುತ್ತಮ ಅನಿಮೇಟೆಡ್ ಚಿತ್ರ -Hum Chitra Banate Hain

ಅತ್ಯುತ್ತಮ ತಮಿಳು ಚಿತ್ರ -ಜೋಕರ್ 

ಅತ್ಯುತ್ತಮ ಗುಜರಾತಿ ಚಿತ್ರ -Wrong Side Raju

ಅತ್ಯುತ್ತಮ ಮರಾಠಿ ಚಿತ್ರ -Dashakriya

ಅತ್ಯುತ್ತಮ ಬಂಗಾಳಿ ಚಿತ್ರ – Bisarjan

ಅತ್ಯುತ್ತಮ ಮಕ್ಕಳ ಚಿತ್ರ -Dhanak, Hindi

ಅತ್ಯುತ್ತಮ ಹಿನ್ನೆಲೆ ಗಾಯಕಿ -Iman Chakraborty

ಅತ್ಯುತ್ತಮ ಹಿನ್ನೆಲೆ ಗಾಯಕ -Sunder Iyer

ಅತ್ಯುತ್ತಮ ಮಲೆಯಾಳಂ ಚಿತ್ರ -Maheshinite Pratikaram

 

 

 

 

Like Us, Follow Us !

121,086FansLike
1,817FollowersFollow
1,347FollowersFollow
1,653SubscribersSubscribe

Trending This Week