22.5 C
Bangalore, IN
Friday, October 19, 2018

ರಾಮಾ ರಾಮಾ ರೇ …ಸೋಲಿಸಬ್ಯಾಡ ಗೆಲಿಸಯ್ಯಾ

ಕೆಲವು ಚಿತ್ರಗಳೇ ಹಾಗೆ ಮಾತು ಸಾಕು ಮಥಿಸು ಅಂದುಬಿಡುತ್ತವೆ. ರಾಮಾ ರಾಮಾ ರೇ ಕೂಡ ಅಂಥದ್ದೇ . ಸಿನಿಮಾ ನೋಡಿ ಎರಡು ದಿನವಾದ್ರು ಸನ್ನಿವೇಶಗಳು, ಪಾತ್ರಗಳು ಕಾಡುತ್ತಲೇ ಇವೆ. ನಾನಿಲ್ಲಿ ಇಡೀ ಚಿತ್ರದ ಚಿತ್ರವನ್ನು ಯಥಾವತ್ತಾಗಿ ಹೇಳುವುದಿಲ್ಲ. ನೀವು ನೋಡಿ ಅನುಭವಿಸಿದಾಗ್ಲೇ
ಅದರ ನಿಜವಾದ ದರ್ಶನ ನಿಮಗಾಗುವುದು.

ಒಂದು ಸಣ್ಣ ಹೊಡೆದಾಟ , ಬಡಿದಾಟದ ಸುದ್ದಿ ಸಿಕ್ಕರೂ ಬಗೆಬಗೆಯಲ್ಲಿ ಬಿತ್ತರಿಸುವ ಮಾಧ್ಯಮಗಳು ಅದ್ರಲ್ಲೂ ಸುದ್ದಿ ವಾಹಿನಿಗಳು ಗಲ್ಲು ಶಿಕ್ಷೆಗೆ ಗುರಿಯಾದ ಖೈದಿಯೊಬ್ಬ ಜೈಲಿನಿಂದ ಪರಾರಿಯಾದ ಸುದ್ದಿ ಸಿಕ್ಕ್ರೆ ಬಿಟ್ಟಾರೆಯೇ. ಯಾರ್ಯಾರ್ ಬಾಯಿಗೆ ಎಲ್ಲೆಲ್ಲಿ ಮೈಕ್ ಹಿಡೀತಾರೆ ಅನ್ನುವುದನ್ನ ತೆರೆ ಮೇಲೆ ಮಾಧ್ಯಮ ಮಿತ್ರರೇ ನೋಡಿದ್ರೂ ತಮ್ಮ ಕೆಲ್ಸಕ್ಕೆ ತಾವೇ ನಕ್ಕು ಬಿಡುವಂತೆ ದೃಶ್ಯ, ಹಾಡು(ನ್ಯೂಸ್ ನೋಡಿ..ನ್ಯೂಸ್ ನೋಡಿ..) ಕಟ್ಟಿರುವ ನಿರ್ದೇಶಕನ ಜಾಣ್ಮೆ ಮೆಚ್ಚಲೇ ಬೇಕು.

ಗಲ್ಲು ಶಿಕ್ಷೆಗೆ ಗುರಿಯಾದ ಸ್ಯಾಂಡಲ್ ರಾಜ ಜೀವದಾಸೆಯಿಂದ ಜೈಲಿನಿಂದ ಹಾರಿ ತಲೆಮರೆಸಿಕೊಳ್ಳಲು ತಿಣುಕಾಡುತ್ತಾನೆ. ಗೊತ್ತು ಗುರಿಯಿಲ್ಲದ ಪಯಣದಲ್ಲಿ ಟ್ರಕ್ ನಿಂದ ಜೀಪಿಗೆ ಸೇರುವ ತನಕ ಬಸ್ಸಿನಲ್ಲಿ ಕೂತಾಗ ಸರಿದು ಹೋಗುವ ದೃಶ್ಯಗಳಂತೆ ಸರಸರನೆ ಚಿತ್ರ ಸರಿದು ಹೋಗುತ್ತದೆ. ಅಲ್ಲಲ್ಲಿ ನಗ್ತಾ , ಇದೇನಿದು ಇವ್ನ್ ಕಥೆ ಅಂತ ಅವನ ಪಯಣದಲ್ಲಿ ನಾವೂ ಜೊತೆಯಾಗ್ತಾ ಅರ್ಧ ಸಿನಿಮಾ ನೋಡೇಬಿಟ್ಟಿರ್ತೀವಿ.

ಮಧ್ಯಂತರ ಮುಗಿದ ಮೇಲೆ ಪ್ರತೀ ಸಣ್ಣ ಸಣ್ಣ ದೃಶ್ಯಗಳು ನಮ್ಮನ್ನು ಕಲವುದಿಕ್ಕೆ ಶುರುವಿಟ್ಟು ಕೊಳ್ಳುತ್ತವೆ. ಚಿತ್ರ ಕಳೆಗಟ್ಟುತ್ತಾ ಕ್ಷಣಕ್ಷಣಕ್ಕೂ ಆವರಿಸಿಕೊಳ್ಳುತ್ತಾ ಹೋಗುತ್ತದೆ. ಎಲ್ಲಿಗೇ ಪಯಣ ಯಾವುದೋ ದಾರಿ ಅನ್ನುವಂತೆ ಅಲೆಯುವ ಕೈದಿಗೆ ಯಾರನ್ನೂ ನಂಬಲಾಗದ ಸ್ಥಿತಿ, ತಪ್ಪಿಸಿಕೊಂಡ ಸುದ್ದಿ ಹರಡಿ, ತನ್ನ ತಲೆಗೆ ಹತ್ತು ಲಕ್ಷ ಕಟ್ಟಿರುವಾಗ ಕಂಡವರು ಬಿಟ್ಟಾರೆಯೇ ಅನ್ನುವ ಮಡುಗಟ್ಟಿದ ಆತಂಕ, ಅನುಮಾನಗಳನ್ನ ಅಭಿವ್ಯಕ್ತಿಸುವ ಕಲೆಯಲ್ಲಿ ನಟರಾಜ್ ಅವರ ಅಭಿನಯಕ್ಕೆ ನೀವು ಮಣಿಯದೆ ವಿಧಿಯಿಲ್ಲ.

ಗಲ್ಲು ಶಿಕ್ಷೆಯ ನಿರ್ವಾಹಕ ರಾಮಣ್ಣನಿಗೆ ತನ್ನ ಜೀಪಿನಲ್ಲಿ ಪಕ್ಕದಲ್ಲಿ ಕುಳಿತಿರುವಾತ ಜೈಲಿನಿಂದ ಹಾರಿ ಬಂದ ಹಕ್ಕಿ ಅನ್ನುವುದು ತಿಳಿದಾಗ ಅದನ್ನು ಸೂಕ್ಷ್ಮವಾಗಿ ನಿಭಾಯಿಸುವ ರೀತಿ , ಸಣ್ಣ ಸಣ್ಣ ಹಾವಭಾವಗಳು ಈತ ನಿರ್ದೇಶಕನ ನಟ ಅನ್ನಿಸಿಡುತ್ತದೆ. ಪಾತ್ರ ಕಟ್ಟುವ ಸತ್ಯ ಪ್ರಕಾಶ್ ಸೂಕ್ಷ್ಮತೆ ಇಲ್ಲಿ ಎದ್ದು ಕಾಣುತ್ತದೆ.

ಪ್ರೀತಿಸಿದ ಹುಡುಗಿ ಸುಬ್ಬಿಯೊಂದಿಗೆ ಎಲ್ಲರನ್ನು ಎದುರು ಹಾಕಿಕೊಂಡು ಊರಿನಿಂದ ಓಡಿ ಬಂದು ಭಂಡತನದಿಂದ ರಾಮಣ್ಣನ ಜೀಪಿನಲ್ಲಿ ತೂರಿಕೊಳ್ಳುವ ಧರ್ಮನ ಉಡಾಫೆ, ಸ್ವಾರ್ಥದ ಪಾತ್ರದಲ್ಲಿ ಧರ್ಮ ಕಡೂರರ ಸಹಜ ಅಭಿನಯ ಇಷ್ಟವಾಗುತ್ತದೆ. ಅಪ್ಪನ ಹಣ ಕದ್ದು ನಿಯತ್ತಾಗಿ ಪತ್ರ ಬರೆದಿಟ್ಟು ,ಹರೆಯದ ಹುಮ್ಮಸ್ಸಿನಲ್ಲಿ ಪ್ರೀತಿಗೆ ಬೀಳುವ ಅಭಿನಯದಲ್ಲಿ ಬಿಂಬಶ್ರೀಯೂ ಇಷ್ಟವಾಗುತ್ತಾರೆ.

ಓಡಿ ಹೋದ ಜೋಡಿಯನ್ನ ಹಿಡಿಯಲು ಬೈಕಿನಲ್ಲಿ ಬಂದು ಬಾಟಲಿ ಕಂಡಾಕ್ಷಣ ಬಾಯ್ ಬಾಯ್ ಬಿಡುವ ನಟನೆಯಲ್ಲಿ ಮಠ ಮನಸ್ಸಿಗೆ ಇಳಿಯುತ್ತಾರೆ. ಪಾತ್ರ ಚಿಕ್ಕದಾದ್ರು ಚೊಕ್ಕತನವಿದೆ.

ಇಡೀ ಕಥೆ, ಸಿನಿಮಾ ಹರಳುಗಟ್ಟುವ ಹಂತವೆಂದರೆ ದಾರಿಯಲ್ಲಿ ಆಟೋ ಕೆಟ್ಟು ಹೆರಿಗೆ ನೋವಿನಿಂದ ನರಳುತ್ತಿರುವ ತನ್ನ ಕೂಸಿನ ಜೀವ ಉಳಿಸಿ.. ಎಂದು ಅಂಗಾಲಾಚಿ ಬರುವ ಸೈನಿಕನ ಅತ್ತೆಯ ಪ್ರವೇಶ. ಅಷ್ಟೊತ್ತಿಗಾಗಲೇ ರಾಮಣ್ಣ ಹಾಗು ಕೈದಿ ಒಬ್ಬರನ್ನೊಬ್ಬರು ಬಡಿದುಕೊಂಡು ಹೈರಾಣಾಗಿದ್ದವರು ಈ ತಾಯಿಯ ಗೋಗರೆತಕ್ಕೆ ಕರಗಿ ಕೈಕೈ ಸೇರಿಸಿ ಗರ್ಭಿಣಿಯನ್ನ ಹೊತ್ತು ತಂದು ಜೀಪಿನಲ್ಲಿ ಕೂರಿಸುತ್ತಾರೆ. ಹೆರಿಗೆಯೂ ಜೀಪಿನಲ್ಲೇ ಜರುಗುತ್ತದೆ. ಒಂದು ಹುಟ್ಟು ಮತ್ತೊಂದರ ನಾಶಕ್ಕೆ ನಾಂದಿ ಹಾಡುವಂತೆ ಕಾಠಿಣ್ಯ, ಕ್ರೌರ್ಯ ವ ಕರಗಿಸಿ ಮನುಷ್ಯತ್ವದ ಸೆಲೆ ಉಕ್ಕುವುದು ಇಲ್ಲೇ.

ಜೀವ ಉಳಿಸಿದ ಜೀವಗಳಿಗೆ ಕೈತುತ್ತು ಇಟ್ಟು ಮನಕಲಕುವ ಮಾತನಾಡುವ ಸೈನಿಕನ ತಾಯಿಯ ತಾಯ್ತನ ಮುನಿದ ಮನಸುಗಳನ್ನು ಬೆಸೆಯುತ್ತದೆ. ಮಗುವನ್ನು ವರ್ಣಿಸುವಾಗ ”ಕೋಪವಿಲ್ಲ , ದ್ವೇಷವಿಲ್ಲ ಗಾಂಧೀ ತಾತನ ಹಾಗಿದ್ದಾನೆ” ಅಂದುಬಿಡುತ್ತಾಳಲ್ಲ ಅಜ್ಜಿ ಅದು ಒಂದು ಕ್ಷಣ ಅವಾಕ್ಕಾಗಿಸುತ್ತದೆ. ಎರಡೇ ಪದಗಳಲ್ಲಿ ಗಾಂಧಿಯವರನ್ನ ತೋರಿದ ಸಂಭಾಷಣಾಕಾರನಿಗೆ ಶಬ್ಬಾಸ್ !!

ಅಜ್ಜಿ ಅಡುಗೆ ಮಾಡುತ್ತಾ , ತುತ್ತಿಡುತ್ತಾ ” ಈ ಮುನುಷ್ಯ ಭೂಮಿಯಿಂದ ಆಚೆ ಹೋಗೋದನ್ನ ಕಲಿತರೂ ಜಾತಿಯಿಂದ ಆಚೆ ಹೋಗೋದನ್ನ ಕಲೀಲಿಲ್ಲ ” ಅನ್ನುವುದು ಎಂಥಾ ಮಾತಲ್ಲವಾ !? ಮನುಷ್ಯತ್ವ ಮರೆತು ಜಾತಿಯ ಹೆಸರಲ್ಲಿ ಕಚ್ಚಾಡುವವರೆಲ್ಲ ಮುಟ್ಟಿ ನೋಡಿಕೊಳ್ಳಬೇಕು.

ನೇಣು ಬಿಗಿವವ , ಕುತ್ತಿಗೆ ಒಡ್ಡುವವ ಇಬ್ಬರೂ ಜೊತೆಯಾಗಿ ನೇಣಿಗೆ ಬಳಸುವ ಹಗ್ಗವನ್ನು ಕಂದನನ್ನ ತೂಗುವ ಜೋಲಿಗೆ ಕಟ್ಟುವಾಗ ಬರುವ ” ಬದುಕೇ ಬದುಕ ಕಲಿಸು ” ಹಾಡು ಸಮಂಜಸವಾಗಿದೆ. ಆಪ್ತವಾಗಿದೆ. ಇದು ಕಲ್ಲು ಕರಗುವ ಸಮಯ!!

ಮುಂದುವರೆದ ಕೈದಿ ಮತ್ತು ರಾಮಣ್ಣನ ಪಯಣದಲ್ಲಿ ಮತ್ತೆ ಮುಖಾಮುಖಿಯಾಗುವ ಟ್ರೆಕ್ ಡ್ರೈವರ್ “ಪಾಪ ಮಾಡೋದ್ರಲ್ಲೂ ಪುಣ್ಯವಿದೆ ” ಅಂದು ಹೊಟ್ಟೆಪಾಡಿಗಾಗಿ ವೇಷಧರಿಸುವ ಹಾಡುಗಾರರ ಪುಟ್ಟ ತಂಡವನ್ನು ಜೀಪಿಗೆ ಹತ್ತಿಸುತ್ತಾನೆ. ಅವರು ಹಾಡುವ ಭಗವತ್ಗೀತೆಯ ಕೃಷ್ಣ ಅರ್ಜುನ ಸಂಭಾಷಣೆಯಂಥಾ ಸಾಲುಗಳು “ಕೇಳು ಕೃಷ್ಣ .. (ಪಕ್ಕ ಹಳ್ಳಿಗರ ಶೈಲಿಯ ) ಇವರಿಬ್ಬರ ಮನಸ್ಸಿನ ತಳಮಳ, ತೊಯ್ದಾಟ, ಪ್ರಶ್ನೆ, ಉತ್ತರಗಳಿಗೆ ಕನ್ನಡಿಯಂತಿವೆ.

ಇಲ್ಲಿ ಬಹುತೇಕ ಎಲ್ಲವೂ ಆಕಸ್ಮಿಕಗಳ ಸರಣಿ . ಸಮಯ,ಸನ್ನಿವೇಶ , ಸಂದರ್ಭ ನಮ್ಮನ್ನ ಹೇಗೆಲ್ಲ ಆಡಿಸುತ್ತವೆ, ಅಲುಗಾಡಿಸುತ್ತವೆ ,ಅರಳಿಸುತ್ತವೆ ಅನ್ನುವುದನ್ನ ನೋಡಬೇಕು ನೀವಿಲ್ಲಿ.
ಕನ್ನಡದಲ್ಲಿ ವಿಭಿನ್ನ ಪ್ರಯತ್ನ ರಾಮಾ ರಾಮಾ ರೇ .. ರಸ್ತೆಯಲ್ಲೇ ಬಹುಪಾಲು ಚಿತ್ರ ರೂಪಿಸಿದ ಸೂತ್ರದಾರ ಸತ್ಯಪ್ರಕಾಶ ಸಾಹಸ ಪ್ರಶಂಸೆಗೆ ಅರ್ಹ. ಸಂಗೀತ,ಹಾಡುಗಳಿಗೆ ಸತ್ಯಪ್ರಕಾಶ್ ವಾಸುಕಿ ವೈಭವ್ ,ಅನನ್ಯ ಭಟ್ ಎಲ್ಲರೂ ಪ್ರೀತಿಗೆ ಪಾತ್ರರು.

ಹಾಗಾದ್ರೆ ಈ ಸಿನಿಮಾದಲ್ಲಿ ದೋಷಗಳೇ ಇಲ್ಲವೇ ಪರ್ಫೆಕ್ಟ್ ಚಿತ್ರವೇ ಅಂದ್ರೆ ಖಂಡಿತಾ ಇದೆ. ಆದ್ರೆ ಎಣಿಸುವ ಕಾಲವಿದಲ್ಲ. ಹಣ ತೆತ್ತು ಬರುವ ಪ್ರೇಕ್ಷಕ ಮಹಾಪ್ರಭುವಿಗೆ ರಂಜನೆ ,ಬೋಧನೆ ಎರಡನ್ನೂ ಕೊಟ್ಟು ಇಗೋ ನಮ್ಮ ಶ್ರಮ ಬಸಿದಿದ್ದೇವೆ ಒಪ್ಪಿಸಿಕೊಳ್ಳಿ ಅನ್ನುವ ಶ್ರದ್ಧೆ, ಶ್ರಮ, ಪ್ರತಿಭೆಯ ಮುಂದೆ ಉಳಿದೆಲ್ಲವೂ ಪಕ್ಕಕ್ಕೆ ಸರಿಯುತ್ತವೆ.

ರಾಮಾ ರಾಮಾ ರೇ.. ನೀವು ನೋಡಿ ,ಗೆಲ್ಲಿಸಲೇಬೇಕಾದ ಚಿತ್ರ. ನೋಡ್ತಿರಲ್ಲ .

ಹೊಂಬಣ್ಣ ದಲ್ಲಿ ಬಂತು ಜೋಗಿ ಸುನೀತಾ ಜಬರ್ದಸ್ತ್ ಹಾಡು !

ಆ ಧ್ವನಿ ಮಾತ್ರ ನಿಮ್ಮನ್ನು ಕಾಡದೆ ಬಿಡಲಾರದು. ಹೊಂಬಣ್ಣದಲ್ಲಿ ಒಂಭತ್ತು ಹಾಡುಗಳಿದ್ದರೂ “ಘಟ್ಟದಾ ಮೇಲೇರಿ”  ಹಾಡು ಮತ್ತೆ ಕೇಳು ,ಇನ್ನೊಮ್ಮೆ ಕೇಳು ಎನ್ನುವಂತೆ ಮಾಡಿಬಿಡುವುದು.

ಸಾವಿರಾರು ಮಧುರ ಗೀತೆಗಳನ್ನ ಹಾಡಿದ್ದರೂ ಈಕೆಯ ಖಡಕ್ ಕಂಠಕ್ಕೆ ಜನ ಮಾರು ಹೋಗಿದ್ದು ಸುಳ್ಳಲ್ಲ.  ಉತ್ತುಪ್ ಗಿತ್ತುಪ್ ಎಲ್ಲ ಪಕ್ಕಕ್ಕಿಡ್ರಿ ನಾನಿಲ್ವಾ ಕನ್ನಡದ  ಕಂಚಿನ ಕಂಠ ಅಂತ ‘ಎಲ್ಲೋ ಜೋಗಪ್ಪ ನಿನ್ ಅರಮನೆ’ ಹಾಡು ಹಾಡಿ ಜೋಗಿ ಸುನೀತಾ ಅಂತಾನೇ ಸುವಿಖ್ಯಾತರಾದ ಸುನೀತಾ ‘ಹೊಂಬಣ್ಣ’ ಚಿತ್ರದ ಹಾಡಿಗೆ ಹೊಳಪು  ತುಂಬಿದ್ದಾರೆ.

‘ಅಂಬಿಗನಿರದೆ ಸಾಗನೆ  ಬಲುದೂರ’ ಅನುರಾಧಭಟ್ ಕಂಠದಲ್ಲಿ ಕೇಳುವುದು ಹಿತವೆನಿಸುತ್ತದೆ. ‘ನವಭಾವದ ಅಲೆಯ ಏರಿ ಬಂದು’ ಮಾದಕ ಧ್ವನಿಯ ಮಾನಸ ಹೊಳ್ಳ ಚಂದ ಹಾಡಿದ್ದಾರೆ .’ ನೋವಿರದ ಸಾವಿಲ್ಲ ,ಸಾವಿರದ ಬದುಕಿಲ್ಲ , ಪ್ರೀತಿಗೆ ಇದು ಹೊರತಲ್ಲ’ ಗೀತೆಯಲ್ಲಿ ಸಂತೋಷ್ ವೆಂಕಿ ಮನಮುಟ್ಟುತ್ತಾರೆ. ಉಳಿದ ಹಾಡುಗಳನ್ನ ಕೇಳುವುದು ನಿಮಗೆ ಬಿಟ್ಟದ್ದು. ಎಲ್ಲ ಗಾಯಕರು ಕನ್ನಡದವರೇ .  ವಿನು ಮನಸು ಸಂಗೀತ ನಿರ್ದೇಶನ ಕೇಳಿದ ಕಿವಿಗಳಿಗೆ ತಂಪುಣಿಸುವುದಂತೂ ನಿಜ.

”ಹೊಂಬಣ್ಣ ” ಹೊಸಬರ ಚಿತ್ರ . ಆದ್ರೆ ಶ್ರದ್ದೆ ಯಿಂದ ಪ್ರೇಕ್ಷಕರ ಮಡಿಲಿಗಿಡುವ ಪ್ರಯತ್ನ ಮಾಡಿದ್ದೇವೆ.  ಕಥೆಯೇ ಚಿತ್ರದ ನಿಜ ನಾಯಕ. ಬಹುತೇಕ ಮಲೆನಾಡ ದಟ್ಟ ಅರಣ್ಯದ ನಡುವೆ ಚಿತ್ರೀಕರಿಸಿದ್ದೇವೆ. ಸುಚೇಂದ್ರ ಪ್ರಸಾದ್ ,ದತ್ತಾತ್ರೇಯ ಅಂಥಾ ಕೆಲವರನ್ನ ಹೊರತು ಪಡಿಸಿದರೆ ಉಳಿದವರೆಲ್ಲ ಮಲೆನಾಡ ಕಲಾವಿದರೆ. ಅರಣ್ಯ ಒತ್ತುವರಿಯ ಸಾಧಕ -ಭಾಧಕಗಳೇ ಸಿನಿಮಾದ ಜೀವಾಳ ಅಂತಾರೆ ನಿರ್ದೇಶಕ  ರಕ್ಷಿತ್ ತೀರ್ಥಹಳ್ಳಿ .

ಕಥೆ ಕೇಳಿ ಪ್ರೇರಿತರಾದ ಸಾಫ್ಟ್ವೇರ್ ಉದ್ಯೋಗಿ ಬಾಗಲಕೋಟೆಯ ರಾಮಕೃಷ್ಣ ನಿಗಡೆ ಹಣ ಹೂಡಿ ಒಳ್ಳೆ ಚಿತ್ರ ಮಾಡಿದ್ದೇವೆ ಅನ್ನುವ ಹುಮ್ಮಸ್ಸಿನಲ್ಲಿದ್ದಾರೆ.

ಬಿಗ್ ಬಜೆಟ್ ಚಿತ್ರಗಳೆಲ್ಲ ಬದಿಗೆ ಸರಿದ ಮೇಲೆ ಚಿತ್ರ ಬಿಡುಗಡೆ ಮಾಡುವ ಯೋಜನೆ ತಂಡದ್ದು. ನವೆಂಬರ್ ತಿಂಗಳ ಕೊನೆಯಲ್ಲಿ ತೆರೆಗೆ ತರುತ್ತೇವೆ ಅಲ್ಲಿವರೆಗೂ “ಹೊಂಬಣ್ಣ “ದ ಹಾಡುಗಳನ್ನ ಕೇಳುತ್ತಲಿರಿ ಅನ್ನುವುದು ಅವ್ರ ಮನವಿ.

ಕೇಳಿ .. ಇಷ್ಟವಾದ್ರೆ ಉಳಿದವರಿಗೂ ಕೇಳಿಸಿ.

ನಾಗರಹಾವು ಬಿಗಿನಿಂಗ್ ಬುಸ್ಸ್ .. ಎಂಡಿಂಗ್ ?

ವಿಷ್ಣುವರ್ಧನ್ ಅಭಿಮಾನಿಗಳು ಮತ್ತೆ ಸಾಹಸಸಿಂಹನನ್ನು ತೆರೆಯ ಮೇಲೆ  ಕಂಡು ಕಣ್ತುಂಬಿಕೊಳ್ಳುವ ಆಸೆಯಿಂದ  ಹೋದ್ರೆ ಅವ್ರಿಗೆ ಸಿಕ್ಕಿದ್ದೇನು?

ನಾಗರಹಾವು ಚಿತ್ರದ ಪ್ರಾರಂಭದಲ್ಲಿ” ನಾಗರಹಾವು “ಹಾಡಿಗೆ ಹೆಜ್ಜೆ ಹಾಕುವ ದರ್ಶನ್ ಆಮೇಲೆ ಏನಾದ್ರೂ ಅನ್ನುವುದು ಯಾರಿಗಾದ್ರೂ ಗೊತ್ತಾಗಿದ್ರೆ ಅದು ಅವರ ಪುಣ್ಯ ಅಂತಷ್ಟೇ ಹೇಳ್ಬಹುದು. ಇದು ಅಮಾಯಕ ಪ್ರೇಕ್ಷಕರನ್ನು ಯಾಮಾರಿಸುವ ಮೊದಲ ಗಿಮಿಕ್ .

ಕಥೆಯ ವಿಚಾರಕ್ಕೆ ಬಂದ್ರೆ ಇದು ಓಬಿರಾಯನ ಕಾಲದ್ದೇ. ನಮ್ಮ ವಾಹಿನಿಗಳಲ್ಲಿ ಬರುವ ನಾಗಿಣಿ ತರಹದ  ಧಾರಾವಾಹಿಗಳೇ ವಾಸಿ ಅನ್ನಬಹುದೇನೋ . ಒಂದಿಷ್ಟಾದ್ರು ಕುತೂಹಲ ಹುಟ್ಟಿಸದ ಕಥಾಹಂದರ. ಜನರ ನಂಬಿಕೆಯನ್ನು ಬಳಸಿ ಮತ್ತಷ್ಟು ಮೌಢ್ಯಕ್ಕೆ ತಳ್ಳುವ ಚಿತ್ರ.

ಟ್ರಾಯ್ , ೩೦೦ ನಂಥ ಹಾಲಿವುಡ್ ಸಿನಿಮಾ ನೋಡಿದವರಿಗೆ ಇವ್ರ್ ಕಾಪಿ ಕಲೆ ಬಹಳ ಚೆನ್ನಾಗಿ ಅರ್ಥವಾಗಿಬಿಡತ್ತೆ. ಈ ತಂಡ ಕೊಟ್ಟ ಹೈಪ್ ಗೆ ಹೋಲಿಸಿದ್ರೆ ಅದ್ರ ಕಾಲು ಭಾಗಕ್ಕೂ ನಿಲುಕುವುದಿಲ್ಲ.

ಇಲ್ಲಿ ಕೊಟ್ಟ ದುಡ್ಡಿಗೆ ಮೋಸವಿಲ್ಲ ಅನ್ನಿಸುವುದು ರಮ್ಯಾ ಅಭಿನಯ. ಮೋಹಕ ತಾರೆ ಹೆಸರಿಗೆ ತಕ್ಕಂತೆ ಸಮ್ಮೋಹಗೊಳಿಸಿಬಿಡುತ್ತಾರೆ. ಇಂಥಾ ಪ್ರತಿಭೆ ಇರುವಾಗ ನಾಯಕರಿಗೆ ಕೊಡುವಷ್ಟೇ ಸಂಭಾವನೆ ನಂಗೂ ಕೊಡಿ ಅಂಥಾ ಕೇಳೋದ್ರಲ್ಲಿ ತಪ್ಪೇನು ಇಲ್ಲ ಬಿಡಿ. ಬಹುಶಃ ಕಳೆದ ಬಾರಿ ಚುನಾವಣೆಯ ಸಮಯದಲ್ಲೇನಾದ್ರು ಈ ಚಿತ್ರದ ಜನಪರವಾದ ರಮ್ಯಾ ಡೈಲಾಗ್ಗಳನ್ನ ಮಂಡ್ಯದ  ಅಭಿಮಾನಿಗಳು ಕೇಳಿದ್ರೆ  ಗೆಲ್ಲಿಸೇ  ಬಿಡ್ತಿದ್ರೋ  ಏನೋ . ಒಂದೇ ಒಂದು ಸಿನಿಮಾದಲ್ಲೂ ಜನರ ಪರವಾಗಿ ಹೋರಾಟ ಮಾಡುವ ಪಾತ್ರ ಮಾಡಿರದಿದ್ದ ರಮ್ಯಾರನ್ನ ಮೊದಲ ಬಾರಿಗೇ ಸಂಸತ್ತಿಗೆ ಕಳುಹಿಸಿದ ಮಂಡ್ಯದ ಮುಗ್ಧ ಜನ ಇಂಥಾ ಪಾತ್ರಕ್ಕೆ ಮೆಚ್ಚಿ ಮನ್ನಣೆ ಕೊಟ್ಟಿದ್ದರೂ ಆಶ್ಚರ್ಯವಿಲ್ಲ.

ದಿಗಂತ್  ನಟನೆಗೆ ರೈಟ್ ಮಾರ್ಕ್ ಕೊಡಬಹುದು. ಪೋಷಕರ ನಟನೆಯೂ ಓಕೆ .  ಇಂಟರ್ನ್ಯಾಷನಲ್ ಕಾಂಪಿಟೇಷನ್ ನಲ್ಲಿ ಹಾಡುವ ಹಾಡು ಮತ್ತದರ  ಸಂಗೀತವಂತೂ ಸಪ್ಪೆ ಸಪ್ಪೆ .

ಪೋಸ್ಟರ್ ,ಬ್ಯಾನರ್ಗಳಲ್ಲಿ ಆ ಪಾಟಿ ವಿಷ್ಣು ದಾದಾರನ್ನ ತೋರಿಸಿದ್ದಾರಲ್ಲ ಅದನ್ನ ನಂಬಿಕೊಂಡು  ಅವರೇ ಪ್ರಮುಖ ಪಾತ್ರದಲ್ಲಿ ಮಿಂಚಿದ್ದಾರೇನೋ ಅನ್ನೋ ಆಸೆಯಲ್ಲಿ ಹೋದವರಿಗೆ ನಿರಾಸೆ ಕಟ್ಟಿಟ್ಟ ಬುತ್ತಿ. ಈಗ ಬರಬಹುದು ಆಗ ಬರಬಹುದು ಅಂತ ಕಾಯುತ್ತಿದ್ದವರಿಗೆ ಕೊನೇ ಘಳಿಗೆಯವರೆಗೂ ಕಾಯಬೇಕಾದ  ಸ್ಥಿತಿ . ಸದ್ಯ ಬಂದ್ರಲ್ಲ ನಮ್ ಆರಾಧ್ಯ ದೈವ ಅಂತ ಅಭಿಮಾನಿಗಳು ಭಾವುಕರಾಗಿ ಕಣ್ತುಂಬಿಕೊಳ್ಳೋ ಹೊತ್ತಿಗೆ ಮಿಂಚಿ ಮರೆಯಾಗಿ ಹೋಗುತ್ತಾರೆ. ಜೊತೆಗೆ ಅದು ಗ್ರಾಫಿಕ್ಸ್ ಆಗಿರೋದ್ರಿಂದ ಮುಖಭಾವದಲ್ಲಿ ಆಪ್ತತೆ ಕಾಣುವುದಿಲ್ಲ. ವಿಷ್ಣುರ  ಮುದ್ದಾದ ಮುಖಭಾವ ಕಂಡವರಿಗೆ ಛೆ .. ಛೆ.. ಅನ್ನಿಸುವುದು ಖಂಡಿತ . ತಂತ್ರಜ್ಞಾನಕ್ಕೆ ಹೆಚ್ಚು ಹಣ ಬೇಕು ಅನ್ನುವುದು ನಿಜವಾದ್ರೂ  ಇನ್ನು ಎಫೆಕ್ಟಿವ್ ಆಗಿ ತರಬಹುದಿತ್ತೇನೋ ಅನ್ನಿಸದೇ ಇರದು.

ನಾಗರಹಾವು ಅಂದಾಕ್ಷಣ ನೆನಪಾಗುತಿದ್ದದ್ದು ವಿಷ್ಣು ಅಭಿನಯದ ಮರೆಯಲಾಗದ ಸಿನಿಮಾ . ಬಾಲಿವುಡ್ ಘಟಾನುಘಟಿಗಳು ನೋಡಿ ಮೆಚ್ಚಿ  ಶಹಬ್ಬಾಶ್ ಗಿರಿ ಕೊಟ್ಟ ಅದ್ಭುತ ಚಿತ್ರ. ಚಾಮಯ್ಯ ಮೇಷ್ಟ್ರು, ಜಲೀಲ ಮನದಲ್ಲಿ ಇವತ್ತಿಗೂ ಕಾಡುವ ಪಾತ್ರಗಳು. ಹಾಡುಗಳು ಓಹ್ !! ಬಾರೇ  .. ಬಾರೇ.. ಚೆಂದದ ಚೆಲುವಿನ ತಾರೆ ಎಷ್ಟು ಕೇಳಿದ್ರೂ ಮತ್ತೆ ಮತ್ತೆ ಆವಾಹಿಸಿಕೊಳ್ಳುವುದು ನಿಜವಲ್ಲವೇ . ಈ  ನಾಗರಹಾವು ಚಿತ್ರದಲ್ಲಿ ಕಾಡುವಂಥದ್ದು ಕಣ್ಣಿಗೇನು ಬೀಳಲಿಲ್ಲ.  ಮುಂದಿನ ಪೀಳಿಗೆಯವರು ನಾಗರಹಾವು ಸಿನಿಮಾ ಅಂದಾಕ್ಷಣ ಹೊಸ ಸಿನಿಮಾವನ್ನೇ ನೆನಪಿಟ್ಟುಕೊಂಡ್ರೆ ಅದು ಕನ್ನಡ ಚಿತ್ರರಂಗದ ದುರದೃಷ್ಟವೇ ಸರಿ.

ಜನರ ಭಾವನೆಗಳನ್ನು ಬಳಸಿಕೊಳ್ಳುವುದು  ಅಂದ್ರೆ ಇದೇ ಅನಿಸುತ್ತದೆ. ವಿಷ್ಣುವರ್ಧನ್ರನ್ನ ಮುಂದಿಟ್ಟುಕೊಂಡು ಹಳಸಿದ ಕಥೆಗೆ ಕಲರ್ ಕಟ್ಟಿ ಹಣ ಗಳಿಸುವ  ಹುನ್ನಾರವಿದಷ್ಟೆ . ಅಮಾಯಕರ ಭಾವನೆಗಳು ಬಲಿಪಶುಗಳಾಗಿವೆ.

ಹೀಗಿದೆ ನೋಡಿ “ಇದೊಳ್ಳೆ ರಾಮಾಯಣ”

 

ತಾನು ಗಂಡು ,ಯಜಮಾನ ತನ್ನ ಮಾತೇ ಅಂತಿಮ ಅನ್ನುವ ಹಾಗೆ ಮೆರೆದ ನಾಯಕನಿಗೆ ಕತ್ತಲ ಕೋಣೆಯಲ್ಲಿ ಹೆಸರೇ ಗೊತ್ತಿಲ್ಲದ ಹೆಣ್ಣಿನ ಜೊತೆಗೆ ಕಳೆದ ಘಳಿಗೆಗಳು ಮನಸ್ಸನ್ನೇ ತೆರೆಸಿಬಿಡುತ್ತವೆ.   ಪ್ರಕಾಶ್ ರೈರಂಥ ಪ್ರಖರ ಪ್ರತಿಭೆಯ ಎದುರಿಗೆ  ಪಕ್ಕಾ ಪ್ರೊಫೆಷನಲ್  ಲೈಂಗಿಕ ಕಾರ್ಯಕರ್ತೆಯಾಗಿ ನಟಿಸುವುದು ಕಷ್ಟ ಕಷ್ಟ . ಆದ್ರೆ ಪ್ರಿಯಾಮಣಿ  ಸೇರಿಗೆ  ಸವ್ವಾ ಸೇರು ಅನ್ನುವಂತೆ ಸಹಜ ಅಭಿನಯದಿಂದ ಗೆದ್ದಿದ್ದಾರೆ.

ಮೊದಮೊದಲು ಗಯ್ಯಾಳಿಯ ಹಾಗೆ  ಗಂಟೆಗಿಷ್ಟು ಗಂಟು ಇಟ್ಟು ಮಾತಾಡು ಅನ್ನುವ ಆಕೆ ಭುಜಂಗಯ್ಯನ ಭಯ, ಒಂದಿಷ್ಟು ಒಳ್ಳೆಯ ನಡವಳಿಕೆಗಳನ್ನ ಗಮನಿಸುತ್ತಾ ಹೋದಂತೆ ಮಮತಾಮಯಿಯೇ ಆಗಿಬಿಡುತ್ತಾಳೆ . ಹೆಂಡತಿ, ಮಗಳನ್ನು  ಕಂಡಾಗ ಅವಳು ಕೇಳುವ ಪ್ರಶ್ನೆಗಳು ,ಕೊಟ್ಟ  ಸಲಹೆಗಳು  ಭುಜಂಗಯ್ಯನ ಅಹಮಿಕೆಯನ್ನೇ ಅಲ್ಲಾಡಿಸುತ್ತವೆ. ತಾನೂ  ಕರಗಿ ಆತನನ್ನೂ ಕರಗಿಸಿ ಮೈಯ್ಯ  ಹಂಗಿಲ್ಲದೆ ಮನಸ್ಸನ್ನು ಅರಳಿಸಿ ಹೊರಡುತ್ತಾಳೆ .

ಮಾತಿನ ಮಧ್ಯೆ  ಬರುವ  ಸಂದ  ಹಿನ್ನೆಲೆ ಸಂಗೀತ ಮೌನದಲ್ಲೇ ಮನವನ್ನ ಮಥಿಸುತ್ತದೆ. ಸಂಗೀತ ನಿರ್ದೇಶಕ ಸೂಕ್ಷ್ಮಜ್ಞನಾಗಿದ್ದಾಗ ಮಾತ್ರ ಇದು ಸಾಧ್ಯ .

ಸಾಮರ್ಥ್ಯ ಇದ್ದರೂ ಹೀರೋಗಳ ಹಿಂದೆ ಅಲೆಯುವ ನಿರ್ದೇಶಕನ ಪಾತ್ರದಲ್ಲಿ ಅಚ್ಯುತ ಎಂದಿನಂತೆ ತಮ್ಮ ಅಚ್ಚೊತ್ತಿದ್ದಾರೆ . ರಂಗಾಯಣ ರಘು ಇದ್ದಲ್ಲಿ ನಗು ಇರಲೇಬೇಕಲ್ಲ .

ಆಟೋ ಶಿವನ ಮುಗ್ದತೆ ,ಹುಂಬತನ ,ಸ್ವಾಮಿನಿಷ್ಠೆ ಮನಸೆಳೆಯುತ್ತವೆ. ನಿರ್ದೇಶನದ ಜೊತೆಗೆ ನಟನೆಯ ಪಾಠವನ್ನೂ ಶಿವನಿಗೆ ಕಲಿಸಿದ್ದಾರೆ ರೈ .

ಇಂಥಾದ್ದೊಂದು ಕಥೆಯನ್ನ ಕನ್ನಡದ ಪ್ರೇಕ್ಷಕ ಮಹಾಶಯರಿಗೆ ಕೊಡಲಿಕ್ಕೆ ಸೂಕ್ಷ್ಮ ಸಂವೇದನೆಯ ನಟ ,ನಿರ್ದೇಶಕರಿಂದ ಮಾತ್ರ ಸಾಧ್ಯ . ಪ್ರಕಾಶ್ ರೈ ಸಾಧಿಸಿ ತೋರಿಸಿದ್ದಾರೆ . ಅವ್ರ ದೇಹಭಾಷೆ ,ಧ್ವನಿಯ ಏರಿಳಿತ ಮೆಚ್ಚದೆ ಬೇರೆ ದಾರಿ ಇಲ್ಲ.

ಪೋಸ್ಟರ್ಗಳಲ್ಲಿ ಪ್ರಕಾಶ್ ರೈ ಪ್ರಮುಖವಾಗಿ ಕಂಡರೂ ಕಥೆಯ ಆಳಕ್ಕೆ ಹೋದಂತೆಲ್ಲಾ ಕಾಣುವುದು ಹೆಣ್ಣಿನ ಹೆಗ್ಗಳಿಕೆಯೇ .  ಭುಜಂಗಯ್ಯನ ಅಹಮ್ಮಿನ ಅಟ್ಟದಿಂದ ಇಳಿಸಿ ಮನುಷ್ಯನನ್ನಾಗಿಸುವವರು ಮೂವರು ಹೆಣ್ಣು ಮಕ್ಕಳೆ .

ಕನ್ನಡಕ್ಕೊಂದು ಕುಟುಂಬವೆಲ್ಲಾ ಕುಳಿತು ನೋಡುವಂಥಾ ಸದಭಿರುಚಿಯ ಚಿತ್ರ ‘ಇದೊಳ್ಳೆ ರಾಮಾಯಣ ” ಸಿಕ್ಕಿರುವುದು ಸುಳ್ಳಲ್ಲ .

 

ದನ ಕಾಯೋನಿಗೆ ಕಾದು ಕಾದು ಸಿಟ್ಟಿಗೆದ್ದ ಸಿನಿ ರಸಿಕರು. ಏನಂದ್ರು ಭಟ್ಟ್ರು ?

ಮಾಡೋದಿಕ್ಕೆ ಬೇರೆ ಕೆಲಸವಿಲ್ಲದೇ ಬೆಳಿಗ್ಗೆನೇ ಬಂದಿದ್ದೀವಾ ? ನಮ್ ಟಿಕೆಟ್ ಹಣ ವಾಪಾಸ್ ಕೊಡು ಇಲ್ಲ ಈಗಿಂದೀಗಲೇ ಪಿಕ್ಚರ್ ಬಿಡು ಅಂತ ಕೂಗಾಡಿದ್ರು . ಇನ್ನೇನು ಬಂತು ಬಂತು ತಡೀರಿ ಅಂತ ಸಮಾಧಾನ ಮಾಡೋದ್ರಲ್ಲಿ ಟಿಕೆಟ್ ಹಂಚುವವರು ಸುಸ್ತಾಗಿದ್ದಾರೆ.
ದನಕಾಯೋನು ಬರ್ತಾನೋ ಇಲ್ವೋ ಹೇಳಿ ಸ್ವಾಮಿ ಅಂತ ಮ್ಯಾನೇಜರ್ ಬೆನ್ನು ಬಿದ್ದ ಜನ ಕೊನೆಗೂ ನಿರಾಸೆ ಅನುಭವಿಸುವಂತಾಗಿದೆ . i am sorry ನಮಗೆ ಬಾಂಬೆ ಇಂದ ಕೀ ಅಂದ್ರೆ ಪಾಸ್ವರ್ಡ್ ಬರ್ಬೇಕು ಬಂದಿಲ್ಲ. ನಿಮ್ಮ ಹಣ ವಾಪಾಸ್ ಕೊಡ್ತೀವಿ ಹೊರಡಿ ಅಂದ್ರು. ಜೊತೆಗೆ ನಮ ಕನ್ನಡ ಚಿತ್ರಗಳ ಹಣೆಬರಹ ಯಾವಾಗಲೂ ಇದೇನೇ ಅನ್ನೋ ಮಾತನ್ನೂ ಸೇರಿಸಿದ್ರು.
ಯಾಕ್ ಸ್ವಾಮಿ ಹಂಗಂತೀರಾ ಅಂದ್ರೆ ಇನ್ನೇನ್ ಮತ್ತೆ ಈ ಪ್ರೊಡ್ಯೂಸರ್ಗಳು ದುಡ್ಡು ಕೊಟ್ಟಿರಲ್ಲ .ತಕರಾರು ಮಾಡ್ಕೊಂಡಿರ್ತಾರೆ. ಬಾಂಬೆ ಯವರು ಬೀಗದ ಕೀ ಕೊಡಲ್ಲ ಅಷ್ಟೆ . ನಮಗೆ 6 ಗಂಟೆಗೆ ತಾವರೆಕೆರೆ ಲಕ್ಷ್ಮಿ ಥೇಟರ್ನವರು ಕಾಲ್ ಮಾಡಿದ್ರು. ಕೀ ಬಂದಿಲ್ಲ ನೋಡ್ಕೊಳಿ ಅಂತ. ಅವ್ರುಗೂ ಇಲ್ಲ ನಮಗೂ ಇಲ್ಲ. ನಿಮಗೂ ಇಲ್ಲ.11 ಗಂಟೆ ಶೋ ಹೊತ್ತಿಗೆ ಬರುತ್ತಾ ಅದೂ ಗೊತ್ತಿಲ್ಲ ಅಂದ್ರು.
ಥೂ ಥ ರೀ ಕೆ ಈ “ದನಕಾಯೋನು” ನಮ್ಮನ್ನ ಥಿಯೇಟರ್ ಕಾಯೋ ಹಾಗ್ ಮಾಡಿದ್ನಲ್ಲ ಥೂ..ಥೂ ..ಅಂತ ಜನ ಮನೆ ಕಡೆಗೆ ಮುಖ ಮಾಡಿದ್ರು.

20161007_080657

ಹಣ ವಾಪಾಸ್ ಕೊಡ್ತೀರಾ ಸರಿ ನಮ್ಮ ಪ್ರೇಕ್ಷಕ ಪ್ರಭುವಿನ ಸಮಯ ಕೊಡಿ ನೋಡೋಣ. ಕೆಲಸ ಕಾರ್ಯಬಿಟ್ಟು ಕನ್ನಡ ಸಿನಿಮಾ ನೋಡಲಿಕ್ಕೆ ಬಂದವರ ಟೈಮ್ ಖಾಲಿ ಮಾಡಿ ಕಳ್ಸಿದ್ರಲ್ಲ ಅನ್ನುವುದು ಬೇಸರದ ವಿಷಯ.
ನಿಜಕ್ಕೂ ಏನಾಗಿದೆ ಸರ್ ಅಭಿಮಾನಿಗಳಿಗೆ ನಿರಾಶೆ ಆಯಿತಲ್ಲ ಅಂತ ciniadda .com ಯೋಗರಾಜ್ ಭಟ್ಟರನ್ನು ವಿಚಾರಿಸಿದಾಗ,ಅದು ಥಿಯೇಟರ್ ಟೆಕ್ನಿಕಲ್ ಸಮಸ್ಯೆ ಜಾಗ್ವಾರ್ ಗೂ ಸೈನ್ ಮಾಡಿ ನಮಗೂ ಸೈನ್ ಮಾಡಿದ್ದಾರೆ . ಬೇರೆ ಎಲ್ಲಾ ಕಡೆ ಶುರು ಆಗ್ತಾ ಇದೆ. ತೊಂದ್ರೆ ಆಗಿದ್ದಕ್ಕೆ ಕ್ಷಮೆ ಇರಲಿ. ಸಿನಿಮಾ ನೋಡಿ ಅಂತ ಅಭಿಮಾನಿಗಳಿಗೆ ಕೇಳಿಕೊಳ್ತೀನಿ ಅಂದ್ರು .
ಭಟ್ಟರು ಮತ್ತೆ ಜನಮನ ಗೆಲ್ಲಲಿ. ಕನ್ನಡದ ಸಿನಿಮಾಗಳು ಸಮಯಕ್ಕೆ ಸರಿಯಾಗಿ ಸಿನಿರಸಿಕರನ್ನ ತಲುಪಲಿ .

ಜಾಗ್ವಾರ್ ಝಲಕ್

ಕನ್ನಡದ ಬಹುಕೋಟಿ ಬಜೆಟ್ ನ ಅದ್ದೂರಿ ಸಿನಿಮಾ ಜಾಗ್ವಾರ್ ತೆರೆಯ ಮೇಲೆ ಝಗಮಗಿಸಿದೆ.
ನಿಖಿಲ್ ಮೊದಲ ಸಿನೆಮಾ ಆದರು ಆಕ್ಷನ್ ,ಡಾನ್ಸ್ ಚೆನ್ನಾಗಿ ಮೂಡಿ ಬಂದಿದೆ. ನಟನೆ ಒಂದೇ ಸಿನೆಮಾಕ್ಕೆ ದಕ್ಕುವ ಕಲೆಯಲ್ಲ. ಆಡ್ತಾ ಆಡ್ತಾ ರಾಗ ಅನ್ನೋ ಹಾಗೆ ಮಾಡ್ತಾ ಮಾಡ್ತಾ ಒಲಿಸಿಕೊಳ್ಳುವೆ ಅನ್ನುವ ಆಕಾಂಕ್ಷೆ ಎದ್ದು ಕಾಣುತ್ತೆ. ರಾಜಣ್ಣನವರ ಬೇಡರ ಕಣ್ಣಪ್ಪ ಸಿನಿಮಾಗೂ ಭಕ್ತಪ್ರಹ್ಲಾದ ಚಿತ್ರದ ಅಭಿನಯಕ್ಕೂ ಅಜಗಜಂತಾರ ವ್ಯತ್ಯಾಸವಿದೆಯಲ್ಲ ಹಾಗೆ.

ನಿಖಿಲ್ ಲುಕ್ ,ಸ್ಟೈಲ್, ಕಾಸ್ಟ್ಯೂಮ್ ಎಲ್ಲದ್ದರಲ್ಲೂ ಎಕ್ಸ್ಪರ್ಟ್ ಗಳ ಕೆಲಸ ಜೋರಾಗಿದೆ.
ನಿಜಕ್ಕೂ ನೋಡುಗರಿಗೆ ಮಸ್ತ್ ಮಜಾ ಕೊಡ್ತಾ ಥ್ರಿಲ್ ಹುಟ್ಟಿಸುವ ಕ್ಯಾಮೆರಾ ವರ್ಕ್ಗೆ ಮನೋಜ್ ಪರಮಹಂಸಗೆ
ಒಂದು ಸೆಲ್ಯೂಟ್ ಹೇಳಲೇಬೇಕು.
ವಿದ್ಯಾರ್ಥಿ ನಾಯಕ ಆರ್ಯ ಅಭಿನಯ ಚೆನ್ನಾಗಿದೆ. ಹುಡುಗನಿಗೆ ಇನ್ನು ಒಳ್ಳೆ ಅವಕಾಶಗಳು ಸಿಗಲಿ.
ಇನ್ನು ಕಥೆ ಟಿವಿ ನ್ಯೂಸ್ ಚಾನೆಲ್ ಗಳು, ಆಸ್ಪತ್ರೆಗಳ ಮುಖಕ್ಕೆ ಕನ್ನಡಿ ಹಿಡಿದ ಹಾಗಿದೆ. ವ್ಯಾಪಾರೀ ಮನೋಭಾವದ ಚಾನೆಲ್ಗಳು ಜನರನ್ನ ಹೇಗೆ ಮುರ್ಖರನ್ನಾಗಿಸುತ್ತಿವೆ ಅನ್ನೋದನ್ನ ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ. “ಸುಳ್ಳನ್ನೇ ಹತ್ತಾರು ಬಾರಿ ಹೇಳ್ತಾನೆ ಇದ್ರೆ ಜನ ಅದನ್ನೇ ಸತ್ಯ ಅಂತ ನಂಬಿಬಿಡ್ತಾರೆ ” ಸಿನಿಮಾ ಗಿಂತ ಚೆನ್ನಾಗಿ ಒಳ್ಳೆ ಮ್ಯೂಸಿಕ್” ,”visulas ಹಾಕಿ ತೋರ್ಸಿ ಜನರನ್ನ ಯಾಮಾರಿಸೋದು ಸುಲಭ”, “ಮಾಸ್ ಮೆಮೊರಿ ಈಸ್ ವೆರಿ ಶಾರ್ಟ್ ” ಜನ ಬೇಗ ಮರಿತಾರೆ ಮುಂದಿನ ಸುದ್ದಿ ನೋಡಿ “, ಕ್ರೈಂ ವಿಜೃಂಭಣೆ ಇಂಥವೆಲ್ಲ ನೋಡ್ತಾ ಜನ ಮುಗಿಬಿದ್ದು ಚಪ್ಪಾಳೆ ಹೊಡಿತಾ ನೋಡೋದಂತು ಸುಳ್ಳಲ್ಲ .
ಆಸ್ಪತ್ರೆಗಳು ಅಮಾಯಕರನ್ನ ಸುಲಿಯುವ, ಬಂದಷ್ಟು ಬರಲಿ ಎನ್ನುವ ಬಾಕತನದಿಂದ ಬಡವ ,ಬಲ್ಲಿದರನ್ನು ಬಲೆಗೆ ಬೀಳಿಸಿಕೊಳ್ಳುವ ನೈಜ ಸಂಗತಿಗಳು ಇಲ್ಲಿ ಬಯಲಾಗಿವೆ.
ರಾಜಕಾರಿಣಿಗಳು ,ಅವ್ರ ಪುತ್ರರ ರು ಹಣಬಲದಿಂದ ಹೇಗೆಲ್ಲ ವ್ಯವಸ್ಥೆಯನ್ನ ತಮ್ಮ ಕೈಗೊಂಬೆ ಮಾಡಿಕೊಳ್ಳುತ್ತಾರೆ ಅನ್ನುವುದು ಎಂಥವರಿಗೂ ಅರ್ಥವಾಗುವಷ್ಟು ಸರಳವಾಗಿ ತೆರೆಗೆ ಬಂದಿದೆ.
ರಮ್ಯಾ ಕೃಷ್ಣ ಅಮ್ಮನ ಪಾತ್ರದಲ್ಲಿ ಎಂದಿನಂತೆ ತಮ್ಮ ಅಭಿನಯ ಚಾತುರ್ಯ ಮೆರೆದಿದ್ದಾರೆ.

ಒಟ್ಟಿನಲ್ಲಿ ಜಾಗ್ವಾರ್ ಕೊಟ್ಟ ದುಡ್ಡಿಗೆ ಮೋಸ ಮಾಡದ ಒಳ್ಳೆ ಸಿನಿಮಾ .ತಾಂತ್ರಿಕವಾಗಿ ಬಾಲಿವುಡ್ ಸಿನಿಮಾ ನೋಡಿದ ಅನುಭವ ನಿಮ್ಮದಾಗೋದಂತೂ ಗ್ಯಾರಂಟಿ. ನಿರ್ದೇಶಕ ಮಹಾದೇವ ಕೈಗೆ ಚಿತ್ರದ ಜವಾಬ್ದಾರಿ ಕೊಟ್ಟಿದ್ದು ಸಾರ್ಥಕ ಅನ್ನೋವಷ್ಟು ಸಕ್ಕತ್ತಾಗಿದೆ . ಹೋಗಿ ಜುಮ್ ಜುಮ್ ಅಂತ ಜಾಗ್ವಾರ್ ನೋಡ್ಕೊಂಡ್ ಬನ್ನಿ.
-ಬಿ ಸಿ ಭಾನುಮತಿ

ಸವಾರಿ ಮಾಡೋದು ಬೇಡ ಅಂದ್ರು ಅಂಬಿ

ಮಂಡ್ಯದ ಜನ ಮಾತಿನಲ್ಲಿ ಒರಟರಾದ್ರು ಮನಸ್ಸಿನಲ್ಲಿ ಮೃದು ಅನ್ನೋದನ್ನ ಮೊನ್ನೆಯಷ್ಟೇ ಸಾಬೀತು ಪಡಿಸಿದ್ದಾರೆ.
ಕಳೆದ ಒಂದು ತಿಂಗಳಿಂದ ನಾಪತ್ತೆಯಾಗಿದ್ದ ಅಂಬರೀಷರ ಮೇಲಿನ ಕೋಪ ಮರೆತು ದೊಡ್ಮನೆ ಹುಡುಗ ಸಿನಿಮಾ ನೋಡಿದ್ದಾರೆ.
ಆಳುದ್ದ ಕಟೌಟ್ ನೋಡಿ ಸಂಭ್ರಮಿಸಿದ್ದಾರೆ.

ಕಾವೇರಿಯ ಹೋರಾಟದಲ್ಲಿ ಕಂಗೆಟ್ಟಾಗ ಕ್ಯಾರೇ ಅನ್ನದ ಅಂಬಿ ಮಾರ್ಲಾಮ್ಮಿ ಹೊತ್ತಿಗೆ ಮನೆ ನೆನಪು ಮಾಡಿಕೊಂಡು ಅಯ್ಯೋ “ಅಕ್ಕ”ನ ನೋಡಕ್ಕೆ ಹೋಗಿದ್ದೆ ಬರೋದು ತಡವಾಯ್ತು ಬ್ಯಾಸರ ಮಾಡ್ಕಬೇಡಿ ಅಂದ್ರಪ್ಪ. ತಪ್ಪು ಮಾಡದವ್ರ್ ಯಾರ್ ಅವ್ರೆ ತಪ್ಪೇ ಮಾಡದವ್ರ್ ಯಾರ್ ಅವ್ರೆ ಹಾಡು ನೆನಪಾಯ್ತೋ ಏನೂ ಮಂಡ್ಯದ ಜನ ಮನೆ ಮಗನ ತಪ್ಪನ್ನ ಹೊಟ್ಟೆಗೆ ಹಾಕೊಂಡು ಸದ್ಯಕ್ಕೆ ಸುಮ್ಮನಾಗಿದ್ದಾರೆ.

30ra ತೀರ್ಪು ನೋಡ್ಕೊಂಡು ಮಂಡ್ಯಕ್ಕೆ ಬರ್ತೀನಿ ಅಂದವರು 30 ಮುಗಿದು ಮೂರ್ ದಿನ ಕಳೆದ್ರೂ ಮಂಡ್ಯಕ್ಕೆ ಮುಖ ತೋರ್ಸಿಲ್ಲ.
ರೈತರ ಬೆಳೆಗೆ ನೀರು ಹರಿಸಲಿಕ್ಕೆ ವಿಶೇಷ ಅಧಿವೇಶನ ಕರೆದಾಗ ನಾ ಬಂದೆ ಅಂತ ಮುಂದಿರಬೇಕಿದ್ದ ಅಂಬರೀಷ್ ಅಧಿವೇಶನ ಶುರುವಾಗಿ ಅರ್ಧ ದಿವಸ ಆದಮೇಲೆ ಸದನಕ್ಕೆ ಕಾಲಿಟ್ಟಿದ್ದಾರೆ. ಆದರು ಕಾಳಜಿ ಇಂದ ಮಾತಾಡಿದ್ದಾರೆ ಕಾವೇರಿ ನೀರು ನಂಬಿರೋ ರೈತರು ಬೆಳೆ ಬೆಳೆಯೋಕೆ ಆಗತಾ ಇಲ್ಲ, ನೀರಿಲ್ಲ. ಹೆಂಡತಿಗೆ ಸೀರೆ ಕೊಡ್ಸಕ್ಕಾಗಲ್ಲ aಅವನು ಪಂಚೆ ತಗಳಕ್ಕೂ ಕಾಸಿಲ್ಲದ ಸ್ಥಿತಿ ಬಂದಿದೆ. ತಮಿಳು ನಾಡವರು ಬೇಕಿದ್ರೆ ಸಮುದ್ರ ಸೇರೋ ನೀರನ್ನ ಇನ್ನೊಂದು ಆಣೆಕಟ್ಟು ಕಟ್ಟಿ ಹಿಡಿದಿಟ್ಟು ಕೊಳ್ಳಲಿ.ನಮ್ ಮೇಲೆ ಸವಾರಿ ಮಾಡೋದಲ್ಲ. ಕಾವೇರಿ ನಿರ್ವಹಣಾ ಮಂಡಳಿ ಆಗ್ಬಾರ್ದು ನಮ ಮಹಾರಾಜರು ಒಡವೆ ಅ ಡ ಇಟ್ಟು ಡ್ಯಾಮ್ ಕಟ್ಟಿಸಿರೋದು ನಮ್ ಜನರಿಗೋಸ್ಕರ ಅದನ್ನ ಬೋರ್ಡ್ ಕೈಲಿ ಕೊಡೋಕ್ಕಾಗಲ್ಲ ಅಂತ ಖಡಕ್ಕಾಗಿ ಹೇಳಿ ಕೂತ್ರು.

ಒಟ್ಟಿನಲ್ಲಿ ಅಂಬರೀಷ್ ಕೊನೆಗಾದ್ರೂ ಬಂದ್ರಲ್ಲ ಅನ್ನೋದೇ ಅಭಿಮಾನಿಗಳಿಗೆ ಸಮಾಧಾನ.

“ದೊಡ್ಮನೆ ಹುಡುಗ”ನ ರಾಜೀವನಂತೆ ತಾನು ಬೆಳೆದು ಬಂದ ದಾರಿ ,ಬೆಳೆಸಿದವರನ್ನ ಮರೆಯದೆ ಮತ್ತೆ ನಮ್ ಜೊತೆಗೆ ನಿಂತು ರೈತರ, ಮತದಾರರ ಹಿತ ಕಾಯಲಿ ಅನ್ನುವುದು ನಮ್ಮ ಆಶಯ.

ಈಗ ಬೇಡ ಅಂದ್ರೆ ತಪ್ಪಾ ? “ಇದೊಳ್ಳೆ ರಾಮಾಯಣ” ಕಣ್ರಿ

ಕನ್ನಡ ಚಿತ್ರರಂಗ ಅನೇಕ ಬಾರಿ ಸ್ಥಳೀಯ ಪ್ರತಿಭೆಗಳನ್ನು ಗುರುತಿಸುವಲ್ಲಿ ಸೋತಿದೆ. ವಿವಿಧ ನಿದರ್ಶನಗಳು ಇದನ್ನು ಪ್ರತಿಬಿಂಬಿಸುತ್ತವೆ. ಅನುಷ್ಕಾ ಶೆಟ್ಟಿ, ಐಶ್ವರ್ಯ ರೈ, ಶಿಲ್ಪಾ ಶೆಟ್ಟಿ, ರಜನೀಕಾಂತ್, ಜಯಲಲಿತ… ಹೀಗೆ ಹುಡುಕುತ್ತಾ ಹೋದರೆ ಕೇವಲ ನಟ ನಟಿಯರಷ್ಟೇ ಅಲ್ಲದೆ ಕಥೆಗಾರರು, ನಿರ್ದೇಶಕರು ಮುಂತಾದ ಸಾಕಷ್ಟು ಉದಾಹರಣೆಗಳು ಸಿಗುತ್ತವೆ. ಅವರೆಲ್ಲ ಕನ್ನಡದಲ್ಲಿ ಛಾಪು ಮೂಡಿಸಲಾಗದೆ ಪರಭಾಷೆಗಳಲ್ಲಿ ಭರ್ಜರಿ ಯಶಸ್ಸು ಸಾಧಿಸಿದ್ದಾರೆ. ಅಂತವರ ಪೈಕಿ ಸರ್ವತೋಮುಖ ಪ್ರಜ್ಞೆಯ ನಟ ಪ್ರಕಾಶ್ ರೈ ಕೂಡಾ ಒಬ್ಬರು.

ಇತ್ತೀಚೆಗೆ ಪ್ರಕಾಶ್ ರೈಯವರನ್ನು ಅಡಕತ್ತರಿಯಲ್ಲಿ ಸಿಲುಕಿಸಲಾಯಿತು. ಕರ್ನಾಟಕ ಅವರ ಜನ್ಮಭೂಮಿಯಾಗಿದ್ದಿರಬಹುದು. ಆದರೆ ತಮಿಳುನಾಡು ಅವರ ಕರ್ಮಭೂಮಿ. ಅನ್ನ, ಪ್ರೀತಿ ಎರಡನ್ನೂ ಪ್ರಕಾಶ್ ರೈ ಅಲ್ಲಿನ ಜನರಿಂದ ಪಡೆದಿದ್ದಾರೆ. ಈ ಕುರಿತು ಫೇಸ್‍ಬುಕ್‍ನಲ್ಲಿ ಸಕ್ರಿಯರಾಗಿರುವ ವಿದ್ಯಾ ರಾವ್ ಒಂದು ಅಭಿಪ್ರಾಯ ಹಂಚಿಕೊಂಡಿದ್ದರು. “ಕೃತಜ್ಞತೆಯ ಭಾರ ಹೊತ್ತು ಎಲ್ಲದರಿಂದ ದೂರ ಉಳಿಯುವ ಆಯ್ಕೆಯ ಹಕ್ಕನ್ನು ಪ್ರಶ್ನಿಸುವುದು ಎಷ್ಟು ಸರಿ? ಆತನ ಹೊಸ ಚಿತ್ರದ ಸಂದರ್ಶನದ ಮಧ್ಯದಲ್ಲಿ ಈ ಪ್ರಶ್ನೆ ತೂರಿಸಿದ್ದೇ ಅಲ್ಲದೆ ಅದನ್ನು ಇಡೀ ದಿನ ವಿವಾದವಾಗಿ ಬಳಸಿಕೊಳ್ಳಲಾಗುತ್ತಿಲ್ಲವೇ? ಆದಾಗ್ಯೂ ಆತ ಹೇಳಿದ್ದು ಕಾವೇರಿ ವಿವಾದ ಆಳವಾದ ವಿಷಯ, ಅದನ್ನು ಆತ ಇಲ್ಲಿ ಚರ್ಚಿಸಲು ಬಯಸುವುದಿಲ್ಲವೆಂದಷ್ಟೆ. ಆತನ ಹೇಳಿಕೆಯಿಂದ ಸಮಸ್ಯೆ ಇತ್ಯರ್ಥವಾಗಿಬಿಡುತ್ತದೆಯೇ? ಏನಿದೆಲ್ಲ? ಆತನನ್ನು ಹಣಿಯುವ ಅವಕಾಶವೇ?” ಎಂಬ ಅವರ ಪ್ರಶ್ನೆಗಳು ನನಗೂ ಕಾಡಿದವು.
ಒಂದುವೇಳೆ ಯಾವುದೋ ಸಾರ್ವಜನಿಕ ಕಾರ್ಯಕ್ರಮದಲ್ಲಿ ಈ ರೀತಿ ಪ್ರಕಾಶ್ ರೈ ಮಾತನಾಡಿದ್ದರೆ ಅದಕ್ಕೆ ವಿವಾದದ ರೂಪ ಕೊಟ್ಟು ಚರ್ಚಿಸುವುದು ಅಷ್ಟೊಂದು ಅಸಂಬದ್ಧ ಎನ್ನಿಸುತ್ತಿರಲಿಲ್ಲ. ಆದರೆ ತೀರ ಪಾಪ ಅತಿಥಿಯಾಗಿ ಬಂದ ವ್ಯಕ್ತಿಯ ಜತೆ ಸ್ನೇಹದಿಂದ ವರ್ತಿಸುವ ಬದಲು ಆತನನ್ನು ಹರಕೆಯ ಕುರಿ ಮಾಡಲು ಹೊರಟಿದ್ದು ಆ ವಾಹಿನಿಯ ಕೆಟ್ಟ ಬುದ್ಧಿಯಲ್ಲದೆ ಬೇರೇನಲ್ಲ. ಒಂದು ವೇಳೆ ಅವರು ಮಾತಾಡಿದ್ದು ತಪ್ಪೇ ಆಗಿದ್ದರೂ ಸಹ ಆ ವಾಹಿನಿ ಈ ರೀತಿ ನಡೆದುಕೊಳ್ಳಬಾರದಿತ್ತು. ತನ್ನ ಆತಿಥ್ಯ ಧರ್ಮವನ್ನು ಮರೆತದ್ದು ಮೊದಲನೆಯ ತಪ್ಪು. ಅವರ ಅಭಿಪ್ರಾಯ ಸ್ವಾತಂತ್ರ್ಯದ ಮೇಲೆ ಅಟ್ಯಾಕ್ ಮಾಡಿದ್ದು ಎರಡನೆಯ ತಪ್ಪು. ಈ ವಾಹಿನಿ ಎಷ್ಟು ವಿಶ್ವಾಸಾರ್ಹ ಅನ್ನುವುದು ಇದರಿಂದ ತಿಳಿಯುತ್ತದೆ.

ಇಲ್ಲಿ ಒಂದು ಸೂಕ್ಷ್ಮ ಸಂಗತಿ ನಮಗೆ ಅರ್ಥವಾಗಬೇಕು. ರಾಷ್ಟ್ರಖ್ಯಾತಿಯ ಕಲಾವಿದನೊಬ್ಬ ತನ್ನ ಚಿತ್ರದ ಪ್ರಚಾರಕ್ಕೋಸ್ಕರ ಬಂದಾಗ ಅವನ ವ್ಯಕ್ತಿತ್ವದ ಗಾಂಭೀರ್ಯವನ್ನು ಉಳಿಸುವುದರ ಜತೆಗೆ ಅವನ ಭಾವನೆಗಳನ್ನೂ ಗೌರವಿಸಬೇಕಾದ್ದು ಆತಿಥ್ಯ ವಹಿಸಿದವರ ಕರ್ತವ್ಯ. ಪ್ರಕಾಶ ರೈ ಕಲಾವಿದನಾಗಿ ಕನ್ನಡಕ್ಕೆ ಮಾತ್ರ ಸೀಮಿತನಲ್ಲವಲ್ಲ? ಹೀಗಿರುವಾಗ ವಿಷಯ ಎಷ್ಟೇ ಗಂಭೀವಾಗಿದ್ದಾಗಿರಲಿ, ಅವರು ಯಾತಕ್ಕೆ ಬಂದಿದ್ದಾರೆ ಎಂಬ ಕಾರಣ ಮರೆತು ಅನ್ಯ ವಿಷಯಗಳೆಡೆಗೆ ಚರ್ಚೆಯನ್ನು ಗಕ್ಕಂತ ತಿರುಗಿಸಿಬಿಡುವುದು ಸಮಂಜಸವಲ್ಲ. ಸ್ವತಃ ರೈ “ಇದು ತುಂಬಾ sensitive ವಿಚಾರ. ಈ ಸಂದರ್ಭ ಅದಕ್ಕೆ ಸೂಕ್ತವಲ್ಲ” ಅಂತ ಹೇಳಿದ ಮೇಲೂ ಆ ಪ್ರಶ್ನೆ ಪ್ರಸ್ತುತವಾಗಲಾರದು. ಆದರೆ ನಿರೂಪಕಿ ಹಟಕ್ಕೆ ಬಿದ್ದವಳಂತೆ ಅದನ್ನು ಡ್ರ್ಯಾಗ್ ಮಾಡಲು ಶುರು ಮಾಡಿದಳು. ಸನ್ನಿವೇಶಕ್ಕೆ ಯುಕ್ತವಾಗಿ ಏನೇ ಮಾತನಾಡಿದರೂ ದೊಡ್ಡ ವಿವಾದವಾಗಿಬಿಡುವ ಸಾಧ್ಯತೆಯಿರುವಾಗ ಮಾತನಾಡದೆ ಉಳಿಯುವುದು ಉತ್ತಮ ಅನ್ನಿಸಿ ರೈ ನಿರಾಕರಿಸಿದ್ದಿರಬಹುದು. ವ್ಯಕ್ತಿಗತ ನೆಲೆಯಲ್ಲಿ ಅದು ಸರಿ. ಅವರಿಂದ ಇದೇ ಉತ್ತರ ಬರಬೇಕು ಎಂದು ನಿರೀಕ್ಷಿಸುವುದೂ ತಪ್ಪು. ಈ ಬಗೆಯ ಪ್ರಶ್ನೆಗಳು ಎಂಥವರಿಗೂ ಪೇಚಿಗೆ ಸಿಲುಕಿಸುತ್ತವೆ. ರೈ ಕೊಡುವ ಉತ್ತರದ ಸಾಧಕ-ಬಾಧಕಗಳ ವಿಮರ್ಶೆಯೂ ಅನುಚಿತ ಎಂದು ಹೇಳಬೇಕಾಗುತ್ತದೆ. ಸಂದರ್ಭ-ಸಮಯ-ಸನ್ನಿವೇಶಕ್ಕೆ ಸರಿಯಾಗಿ ನಮ್ಮ ಅಭಿವ್ಯಕ್ತಿಯೂ ತಕ್ಕುದಾಗಿರಬೇಕು. ರೈ ಕನ್ನಡದವರೇ ಎಂದು ಒಪ್ಪಿದರೂ, ಅವರಾಗಿಯೇ ಅಂಥ ವಿಷಯದ ಬಗ್ಗೆ ಮಾತಾಡಿದಾಗ ನಾವು ಅದನ್ನು ಜಿಜ್ಞಾಸೆಗೋ ವಿಮರ್ಶೆಗೋ ಒಳಪಡಿಸುವುದುತ್ತಮ.

ವ್ಯಕ್ತಿಶಃ ಎಲ್ಲರೂ ಒಂದೇ ಗುಣ ಸ್ವಭಾವದವರಾಗಲು ಸಾಧ್ಯವಿಲ್ಲ. ಆದರೆ ಸಮಷ್ಟಿಯ ಚಿಂತನೆ ಮಹತ್ವದ್ದು. ಹೀಗಾಗಿ ರೈ ಪ್ರತಿಕ್ರಿಯೆ ವೈಯಕ್ತಿಕವಾದದ್ದು ಎಂಬ ಪರಿಜ್ಞಾನ ನಮಗಿರಬೇಕು. ಸಹನೆಗೆಡದೆ ರೈ ನಿರುತ್ತರಿಯಾಗಬಹುದಿತ್ತು ಎಂಬ ಅನಿಸಿಕೆ ಕೂಡಾ ನನ್ನದಾಗಿದೆ. ಹಾಗೆಯೇ ಗೌರವಾನ್ವಿತ ವ್ಯಕ್ತಿಯನ್ನು ಸಂದರ್ಶನ ಮಾಡುವ ಬಗೆಯನ್ನೂ ಅರಿತುಕೊಳ್ಳಬೇಕು. ಭಾವಪಾತ ಆಗಬಹುದಾದ ವಿಷಯಗಳನ್ನು ನಮ್ಮಲ್ಲಿಯೇ ಉತ್ಪತ್ತಿ ಮಾಡಿಕೊಳ್ಳಬಾರದು ಎಂಬ ಎಚ್ಚರ ಇರಬೇಕು. ಸಮಾಜದ ಸ್ವಾಸ್ಥ್ಯ ಕೆಡಿಸುವುದು ನಮ್ಮ ಉದ್ದೇಶ ಆಗಬಾರದು.

ಇನ್ನೊಂದು ಅಸಮಾಧಾನವೆಂದರೆ, ಕೇವಲ ಅಷ್ಟಕ್ಕೇ ವಿವಾದವನ್ನು ತಣ್ಣಗಾಗಲು ಬಿಡದ ಜನಶ್ರೀ ಚಾನೆಲ್ “Imprudent and unprecedented behaviour of Senior Actor Prakash Rai when asked about his views on Cauvery issue! Shouldn’t we Kannadigas refrain from watching his movies for his indifference! #Cauveryissue #cauvery #RaiRagale” ಎಂಬ ಬರಹದೊಂದಿಗೆ ಆ ವೀಡಿಯೋವನ್ನು ಸಾಮಾಜಿಕ ಜಾಲತಾಣವಾದ ಫೇಸ್ಬುಕ್ಕಿಗೆ ಹರಿಯಬಿಟ್ಟಿತು. ಪ್ರತ್ಯೇಕವಾದ panel discussion ಏರ್ಪಡಿಸಿತು. ಅಲ್ಲಿ ಫಿಲಂ ಛೇಂಬರಿನವರು, ಕನ್ನಡ ಪರ ಹೋರಾಟಗಾರರೆಂಬ ಕೆಲವೊಂದಷ್ಟು ಮಂದಿ ಬಾಯಿಗೆ ಸಿಕ್ಕಂತೆ ಮಾತನಾಡಿ ಹೋದರು. ನನ್ನ ಮನರಂಜನೆಯ ಜತೆಗೆ ರಾಜಕೀಯವನ್ನು ಮಿಶ್ರಿಸುವ ಅಗತ್ಯವಿತ್ತಾ ಎಂಬುದು. ಬರೀ ಜನರ ಭಾವನೆಗಳನ್ನು ಕೆರಳಿಸುವ ಮುಖಾಂತರ ಟಿಆರ್ಪಿ ಗಳಿಸುವ ಗೀಳಿಗೆ ಬಿದ್ದರೆ ಅದು ಪತ್ರಿಕೋದ್ಯಮದ ಹೊಸ ಅಧಃಪತನ ಎಂದು ನಾನು ತಿಳಿಯುತ್ತೇನೆ.
ಮಳೆ ಚೆನ್ನಾಗಿ ಆದ ವರ್ಷ ಕೂಡಾ ರೈತರ ಆತ್ಮಹತ್ಯೆ ನಿಲ್ಲಲಿಲ್ಲ. ರಸಗೊಬ್ಬರ, ಬೆಲೆ-ಮಾಹಿತಿ, ಕ್ಲುಪ್ತ ಸಮಯದಲ್ಲಿ ಮಾರುಕಟ್ಟೆಗೆ ಸರಬರಾಜು, ಬೆಳೆ-ವಿಮೆ …. ಇವು ಯಾವೊಂದರ ಬಗ್ಗೆ ಮಾತನಾಡದೆ ಕೇವಲ ಭಾವನೆಗಳನ್ನು ಕೆರಳಿಸುವ ಟಿವಿ ವಕ್ತಾರರ ಧೋರಣೆ ತುಂಬಾ ಅಪ್ರಬುದ್ಧ.

ಮದುವೆಯಾದ ಹೆಣ್ಣು ತವರುಮನೆಗಿಂತ ಗಂಡನ ಮನೆಯ ಮನೆವಾರ್ತೆಗೆ ಹೆಚ್ಚು ಗಮನ ಕೊಡುವುದರಲ್ಲಿ ಏನು ಹೊಸತಿದೆ? ಸಮಸ್ಯೆ ಇರುವುದು ನಾಡಿನ ತೊಂದರೆಯನ್ನ ಸರ್ವೋಛ್ಚ ನ್ಯಾಯಾಲಯದಲ್ಲಿ ಮನಮುಟ್ಟುವಂತೆ ವಿವರಿಸಲಾಗದ್ದು.

ಇದನ್ನು ಹಲವರು ಪೂರ್ವಯೋಜಿತ ಡ್ರಾಮ ಎಂದೇ ವಿಶ್ಲೇಷಿಸಿದ್ದಾರೆ. ಆಕಾಶ ನೋಡಲು ನೂಕು ನುಗ್ಗಲು ಬೇಕಿಲ್ಲ. ಇದರಿಂದ ತಮ್ಮ ಟಿ.ಆರ್.ಪಿ ಹೆಚ್ಚಿಸಿಕೊಳ್ಳಲು ತಕ್ಕ ಮಟ್ಟಿಗೆ ಪ್ರಯತ್ನಿಸಿ ಚಾನೆಲ್ ಸೋತಿತು.
ಪ್ರಕಾಶ್ ರೈ ಅತ್ಯಂತ ಪ್ರತಿಭಾವಂತ ನಟ. ಚಿತ್ರರಂಗದಲ್ಲಿ ಅನೇಕ ದಶಕಗಳಿಂದ ತನ್ನದೇ ವಿಶಿಷ್ಟವಾದ ಚರೀಸ್ಮಾ ಹೊಂದಿರುವ ಧೀಮಂತ ಕಲಾವಿದ. ಯಾವುದೇ ಪಾತ್ರವನ್ನು ಲೀಲಾಜಾಲವಾಗಿ ನಿರ್ವಹಿಸುವ ಸಾಮರ್ಥ್ಯ ಹೊಂದಿರುವವರು. ಭಾರತದ ಬಹುಭಾಷೆಗಳಲ್ಲಿ ನಟಿಸಿ ಸೈ ಎನ್ನಿಸಿಕೊಂಡವರು. ಕನ್ನಡ ಸಾಹಿತ್ಯವನ್ನು ಸಾಕಷ್ಟು ಅಧ್ಯಯನ ಮಾಡುತ್ತಿರುವವರು. ಅಂತರಾಷ್ಟ್ರೀಯ ಮಟ್ಟದಲ್ಲಿ ತಮ್ಮನ್ನು ಕನ್ನಡಿಗ ಎಂದು ಗುರುತಿಸಿಕೊಳ್ಳಲು ಹೆಮ್ಮೆ ಪಡುವಂತವರು. ಅವರನ್ನು ಧರ್ಮಸಂಕಟಕ್ಕೆ ಸಿಗೆ ಬಡಿದು ಕಾವೇರಿ ನದಿ ವಿವಾದದ ಕಾವೇರಿಸುವ ಪ್ರಯತ್ನವನ್ನು ಜನಶ್ರೀ ಮಾಡಿತು. ಏಕೆಂದರೆ ಪ್ರಕಾಶ್ ರೈರವರನ್ನು ಕರ್ನಾಟಕದ ಜನತೆಯಂತೆ ತಮಿಳುನಾಡಿನ ಜನತೆ ಸಹ ಅರಿತಿರುವರು. ಅವರ ನಟನೆಯನ್ನು ಮೆಚ್ಚಿರುವರು. ಇಲ್ಲಿ ನಾವು ಗಮನಿಸಬೇಕಾದ ಅಂಶವೇನೆಂದರೆ ಒಂದು ಸಿನಿಮಾವನ್ನು ಅದರಲ್ಲಿರುವ ಪಾತ್ರಗಳ ಮೂಲಕ ಇಷ್ಟ ಪಡುತ್ತೇವೆಯೇ ಹೊರತು ಆ ವ್ಯಕ್ತಿಯಿಂದಾಗಿ ಖಂಡಿತ ಅಲ್ಲ. ಆ ಪಾತ್ರಗಳ ಮೂಲಕ ನಟ ನೆನಪಾಗುತ್ತಾನೆ ಮತ್ತು ನೆನಪಿನಲ್ಲಿ ಉಳಿಯುತ್ತಾನೆ. ಒಬ್ಬ ವ್ಯಕ್ತಿ ಒಂದು ಪ್ರದೇಶ, ಭಾಷೆ, ಜಾತಿಗೆ ಸೀಮಿತನಾದಷ್ಟೂ ಆತ ಮಾನಸಿಕವಾಗಿ ಕುಬ್ಜನಾಗುತ್ತಾ ಹೋಗುತ್ತಾನೆ. ಹಿಂದೆ ದೇಶ ಸುತ್ತಿ ನೋಡು; ಕೋಶ ಓದಿ ನೋಡು ಎಂದು ಹಿರಿಯರು ಹೇಳುತ್ತಿದ್ದರು. ಪ್ರಕಾಶ್ ರೈಗೆ ಸಾಕಷ್ಟು ಓದುವ ಹವ್ಯಾಸವಿದೆ. ಹಾಗೆ ಅವರು ಸಾಕಷ್ಟು ಊರುಗಳನ್ನು ನೋಡಿದವರು. ಒಬ್ಬ ಅಪೂರ್ವ ಪ್ರಜ್ಞಾವಂತ. ಕಾವೇರಿ ನದಿ ವಿವಾದವು ಮೇಲ್ಮಟ್ಟದಲ್ಲಿ ಅವಲೋಕಿಸುವ ಸಮಸ್ಯೆಯಲ್ಲ. ಮಂಜುಗಡ್ಡೆಯು ಮೇಲ್ನೋಟಕ್ಕೆ ಚಿಕ್ಕ ತೇಲುವ ಬರ್ಫದ ಬಿಲ್ಲೆಯಂತೆ ಕಂಡರೂ ನೀರಿನ ಆಳದಲ್ಲಿ ಬೃಹದಾಕಾರವಾಗಿರುತ್ತದೆ. ಅದನ್ನು ನಿರ್ಲಕ್ಷಿಸಿ ಡಿಕ್ಕಿ ಹೊಡೆದವನು ಪಾತಾಳ ಸೇರುವುದು ಸತ್ಯ. ಇದು ಪ್ರಕಾಶ್ ರೈರವರಿಗೆ ಅತ್ಯಂತ ಹೆಚ್ಚು ಗೊತ್ತು ಅಲ್ಲದೆ ಕನ್ನಡ ಮತ್ತು ತಮಿಳು ಮಾಧ್ಯಮಗಳಲ್ಲಿ ಬರುವ ಪರ ಮತ್ತು ವಿರೋಧ ಸಿದ್ಧಾಂತಗಳ ಪೂರ್ಣ ಅರಿವು ಅವರಿಗಿದೆ. ಆದ್ದರಿಂದ ಪ್ರಾರಂಭದಲ್ಲಿ ಅವರು ಸೂಚ್ಯವಾಗಿ ಸಂದರ್ಶಕಿಗೆ ಅದನ್ನು ಮನವರಿಕೆ ಮಾಡಲು ಪ್ರಯತ್ನಿಸಿದರು. “ರಾಜಕೀಯವಾಗಿ ದೊಡ್ಡ ವಿಷಯ, ಆಳವಾದದ್ದು, ರೈತರಿಗಿರುವುದು ನೀರಿನ ಸಮಸ್ಯೆ ಮಾತ್ರ ಅಲ್ಲ. ಇದು ಗಂಭೀರವಾದ್ದು” ಅಂದರು. ಹಾಗೆಯೆ ಫೋನ್‍ ಮುಖಾಂತರ ಮಾತನಾಡುವಾಗಲೂ ಸಹಿತ ಅವರ ಮಾತುಗಳಲ್ಲಿ ಸ್ಪಷ್ಟತೆ, ನಿಖರತೆ ಇತ್ತು. ಕರ್ನಾಟಕದ ಬಗ್ಗೆ, ಇಲ್ಲಿನ ಜನತೆಯ ಬಗ್ಗೆ ವಾತ್ಸಲ್ಯವಿತ್ತು. ರೈತರ ಬಗ್ಗೆ ಕಾಳಜಿ ಸಹ ವ್ಯಕ್ತವಾಗುತ್ತಿತ್ತು.

“ನಾನೊಬ್ಬ ಪ್ರಜೆ, ನಾಡಿನ ಸಮಸ್ಯೆಗಳನ್ನು ಸರಿಪಡಿಸಲು, ಜನಪ್ರತಿನಿಧಿಗಳನ್ನು ಆಯ್ಕೆ ಮಾಡಿದ್ದೇವೆ. ಅವರ ಮಟ್ಟದಲ್ಲಿ ಚರ್ಚಿಸಿ ನ್ಯಾಯ ಒದಗಿಸುವುದು ಮಂತ್ರಿಗಳ ,ಜನಪ್ರತಿನಿಧಿಗಳ ಕರ್ತವ್ಯ.” ಈ ಮಾತುಗಳನ್ನು ನಿರ್ಲಕ್ಷ್ಯಿಸಲಾಗುತ್ತದೆಯೇ? ಸಿನಿಮಾದಲ್ಲಿ ನಟಿಸುವವರು ಹೋರಾಟ ಮಾಡುವುದರಿಂದ ಸಮಸ್ಯೆಗೆ ಪರಿಹಾರ ಸಿಗುವುದಿಲ್ಲ. ಒಬ್ಬ ಕಲಾವಿದ, ಸಾಹಿತಿ, ರಾಜಕಾರಣಿ ಅಥವಾ ಸಮಾಜದಲ್ಲಿ ಗಣ್ಯ ಎನಿಸಿಕೊಂಡವರು ತಮ್ಮ ಅಭಿಪ್ರಾಯಗಳನ್ನು ಮಂಡಿಸುವಾಗ ವಿವೇಚನೆ ಅತ್ಯಗತ್ಯ. ಇಲ್ಲದೆ ಹೋದರೆ ಅದರಿಂದ ಬೆಂಕಿ ನಂದದೆ ಇನ್ನಷ್ಟು ಸುಡುವ ಜ್ವಾಲೆಗಳನ್ನು ಹೊರಚೆಲ್ಲಬಹುದು. ಇದರಿಂದ ಇನ್ನಷ್ಟು ಜೀವಗಳನ್ನು ಬಲಿ ತೆಗೆದುಕೊಳ್ಳಬಹುದು. ಆಸ್ತಿ ನಷ್ಟವಾಗಬಹುದು. ವೈಮನಸ್ಯ ಹೆಚ್ಚಬಹುದು. ಇದನ್ನು ಮಾಧ್ಯಮಗಳು ಜವಾಬ್ದಾರಿಯುತವಾಗಿ ನಿರ್ವಹಿಸಬೇಕು. ಎಲ್ಲಾ ಪಕ್ಷಗಳು ಏಕ ಮನಸ್ಸಿನಿಂದ ಸೇರಬೇಕು. ನಾಡಿನ ನೈಸರ್ಗಿಕ ಸಂಪನ್ಮೂಲಗಳನ್ನು ಅಭಿವೃದ್ಧಿ ಪಡಿಸುವ ಕೆಲಸವಾಗಬೇಕು. ಅದಕ್ಕೆ ತಂತ್ರಜ್ಞರಿಂದ ರೂಪುರೇಷೆಗಳು ಸಿದ್ದವಾಗಬೇಕು. ಅಲ್ಲದೆ ಒಬ್ಬ ಪ್ರಕಾಶ್ ರೈಯನ್ನು ಇಕ್ಕಟ್ಟಿಗೆ ಸಿಲುಕಿಸಿ, ಅವಹೇಳನ ಮಾಡಿ ತಮ್ಮ ವಾದವನ್ನು ಪ್ರತಿಪಾದಿಸಿ ದೊಡ್ಡವರನ್ನು ಸೋಲಿಸಿದೆ ಎಂದು ಬೀಗುವುದು ಮಾಧ್ಯಮ ನಿಷ್ಠೆಯಲ್ಲ. ಈಗ ನನಗೆ ನೆನಪಾಗುವುದು ಜೀಸಸ್ ಅನ್ನು ಮಾತಿನಲ್ಲಿ ಸಿಲುಕಿಸಲು ರೋಮ್ ಚಕ್ರಾಧಿಪತಿಗೆ ಕಂದಾಯ ಕಟ್ಟುವುದು ಸರಿಯೋ ಎಂದು ಮಾತಿನಲ್ಲಿ ಸಿಕ್ಕಿಸಲು ಹೊರಟ ಫರಿಸಾಯರನ್ನು. ಅವರ ಕಪಟತನವನ್ನು ಮನಗಂಡು ಜೀಸಸ್ ಸರಿಯಾಗಿ ಉತ್ತರಿಸುತ್ತಾನೆ. ಸೀಸರ್‍ನಿಗೆ ಗೊಡಬೇಕಾದದ್ದನ್ನು ಸೀಸರನಿಗೂ, ದೇವರಿಗೆ ಸಲ್ಲಬೇಕಾದದ್ದನ್ನು ದೇವರಿಗೆ ಕೊಡಿ ಎಂದು.

ಕಾವೇರಿ ವಿವಾದದ ಸಲುವಾಗಿ ಅನೇಕ ತಮಿಳು ಸಿನಿಮಾಗಳನ್ನು ಕರ್ನಾಟಕದಲ್ಲಿ ನಿಲ್ಲಿಸಲಾಯಿತು. ಅಷ್ಟೇ ಏಕೆ, ಕನ್ನಡದ ಪ್ರಸಿದ್ಧ ನಟ ಸುದೀಪ್‍ನ ಕೋಟಿಗೊಬ್ಬ-2 ಚಿತ್ರದ ಪೋಸ್ಟರ್ ಹರಿದು ಸುಟ್ಟ ಹಾಕಲಾಯ್ತು. ತಕ್ಷಣ ಕಾವೇರಿ ಬಗೆಗಿನ ತನ್ನ ಕನ್ನಡಪರ ನಿಲುವನ್ನು ಸುದೀಪ್ ಟ್ವೀಟ್ ಮಾಡುವ ಮೂಲಕ ಉದ್ರಿಕ್ತರನ್ನು ಸಮಾಧಾನಪಡಿಸಿದರು. ಕೆಲ ಸಿನೆಮಾಗಳ ಶೂಟಿಂಗ್ ನಿಲ್ಲಿಸಲಾಯಿತು. ಒಟ್ಟಿನಲ್ಲಿ ಚಿತ್ರರಂಗ ಈ ಸಂದರ್ಭದಲ್ಲಿ ಕನ್ನಡದ ಐಡೆಂಟಿಟಿ ಮೆರೆಯಲೇಬೇಕಾದ ಅನಿವಾರ್ಯತೆಗೆ ಸಿಲುಕಿದ್ದರು. ಯಾರಿಗೂ ಚಾನ್ಸ್ ತೆಗೆದುಕೊಳ್ಳುವ ಇಚ್ಛೆಯಿರಲಿಲ್ಲ.

ಇನ್ನೊಂದೆಡೆ ತಮಿಳುನಾಡು ಸಿಎಂ ಜಯಲಲಿತಾರನ್ನೇ ತೆಗೆದುಕೊಳ್ಳಿ. ಆಕೆಯ ತವರು ಮಂಡ್ಯ ಜಿಲ್ಲೆ. ಪ್ರಸ್ತುತ ತಮಿಳು ವಿರೋಧಿ ಚಳವಳಿಯಲ್ಲಿ ಗ್ರೌಂಡ್ ಜೀರೋ! ಎಂಜಿಆರ್ ಜತೆ ಜಯಲಲತೆ ನಟಿಸಿದ ಚಿತ್ರಗಳು ಅಲ್ಲಿ ಒಂದಕ್ಕಿಂತ ಒಂದು ಅಭೂತಪೂರ್ವಾಗಿ ಸ್ವೀಕರಿಸಲ್ಪಡುತ್ತಿದ್ದವು. ಆದರೆ ಕಾವೇರಿ ರಾಜಕೀಯದಲ್ಲಿ communication gap ಇರಲೇಬೇಕೆಂಬ ಹಟ ನಮ್ಮ ತಥಾಕಥಿತ ಕನ್ನಡಪರ ಹೋರಾಟಗಾರರಿಗೆ ಇದ್ದಂತಿದೆ. ಹಿಂದೆ ಹೊಗೇನಕಲ್ ವಿವಾದದ ಸಂದರ್ಭದಲ್ಲಿ ರಜನೀಕಾಂತ್ ಕೂಡಾ ಉಭಯ ಸಂಕಟಕ್ಕೆ ಸಿಲುಕಿದ್ದರು. ಅವರು ‘KICK THEM’ ಅಂದದ್ದು ಕನ್ನಡಿಗರನ್ನು ಕೆರಳಿಸಿತ್ತು. ಆಗ ಕರವೇ ರಜನಿಯ ಸಿನೆಮಾಗಳನ್ನು ಕರ್ನಾಟಕದಲ್ಲಿ ಬಹಿಷ್ಕರಿಸುವುದಾಗಿ ಎಚ್ಚರಿಕೆ ನಿಡಿತು. ಇದಕ್ಕೆ ರಜನಿ ಸ್ಪಷ್ಟೀಕರಣ ಕೊಟ್ಟಾಗ ಅದು ತಮಿಳರನ್ನು ಕೆರಳಿಸಿತ್ತು. ಹೀಗಾದರೆ ಕಲಾವಿದರು ಏನು ಮಾಡಬೇಕು? ಕಲೆಯನ್ನು ಹಾಗೂ ಕಲಾವಿದರನ್ನು ಸಂಕುಚಿತಾರ್ಥದಲ್ಲಿ ಕಾಣುವ ಮನೋಧರ್ಮ ನಿಜಕ್ಕೂ ಅಪಾಯಕಾರಿ.

-ಜಿಎಸ್ ಯುಧಿಷ್ಠಿರ

ಬಾಲಿವುಡ್ ‘ಕೋಟಿಗೊಬ್ಬ’ ಕಿಲಾಡಿ ಅಕ್ಷಯ್

ಬಾಲಿವುಡ್’ನಲ್ಲಿ ಬ್ಯಾಕ್ ಟು ಬ್ಯಾಕ್ ಸೂಪರ್ ಹಿಟ್ ಚಿತ್ರಗಳನ್ನು ನೀಡುತ್ತಿರುವ ಆ್ಯಕ್ಷನ್-ಕಿಲಾಡಿ ಅಕ್ಷಯ್ ಕುಮಾರ್ ಬಿಟೌನ್’ನ ಕೋಟಿಗೊಬ್ಬನಾಗಿ ಮೆರೆದಿದ್ದಾರೆ.

2012ರ ರೌಡಿ ರಾಥೋಡ್ ಚಿತ್ರದೊಂದಿಗೆ ಬಾಕ್ಸಾಫೀಸ್’ನಲ್ಲಿ ಕೋಟಿಯಾಟ ಆರಂಭಿಸಿದ ಬಾಲಿವುಡ್ ಕಿಲಾಡಿ ಭಾರತೀಯ ಸಿನಿರಂಗದಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದ್ದಾರೆ. ಇತ್ತೀಚೆಗೆ ತೆರೆಕಂಡ ಅಕ್ಷಯ್ ಅಭಿನಯದ ರುಸ್ತುಂ ಚಿತ್ರ 100ಕೋಟಿ ಕಲೆಕ್ಷನ್ ಮಾಡುವ ಮೂಲಕ ತಮ್ಮ ಸಿನಿ ಕೆರಿಯರ್’ನಲ್ಲಿ 3000ಕೋಟಿ ನೆಟ್ ಬಾಕ್ಸಾಫೀಸ್ ಕಲೆಕ್ಷನ್ ಮಾಡಿದ ಏಕೈಕ ನಟನೆಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ. 25 ವರ್ಷಗಳ ಚಿತ್ರ ವಿಚಿತ್ರ ವೇಷಗಳಲ್ಲಿ ‘ಕಿಲಾಡಿ’ ನಟ ಒಟ್ಟು 108 ಸಿನೆಮಾಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ರುಸ್ತುಂ ಚಿತ್ರವು ಅಕ್ಕಿಯ 108ನೇ ಚಿತ್ರವಾಗಿದೆ. ಈ ಚಿತ್ರದ ಬಾಕ್ಸಾಫೀಸ್ ಆರ್ಭಟ ಮುಂದುವರಿದ್ದು ಒಟ್ಟು 3010ಕೋಟಿ ರೂ. ಅಕ್ಷಯ್ ನಿರ್ಮಾಪಕರ ಜೇಬಿಗಿಳಿಸಿದ್ದಾರೆ.

ಬಾಲಿವುಡ್’ನ ಈ ಹೊಸ ದಾಖೆಯನ್ನು ಮುರಿಯಲು ಖಾನ್ ತ್ರಯರು ಹಿಂದೆ ಬಿದ್ದಿದ್ದಾರೆ. ಬಿಟೌನ್ ಭಾಯಿಜಾನ್ ಸಲ್ಮಾನ್ ಖಾನ್’ಗೆ 3000 ಕೋಟಿ ಕ್ಲಬ್ ಸೇರಲು ಒಂದೇ ಚಿತ್ರದ ಸಾಕಾಗಿದೆ ಎನ್ನಲಾಗುತ್ತಿದೆ. ಸಲ್ಲು ಭಾಯ್ ಒಟ್ಟು 71 ಚಿತ್ರಗಳ ಮೂಲಕ 2928ಕೋಟಿ ಗಳಿಸಿದ್ದಾರೆ. ಹಾಗೆಯೇ ಕಿಂಗ್ ಖಾನ್ ಶಾರೂಕ್ 71 ಚಿತ್ರದೊಂದಿಗೆ 2100ಕೋಟಿ ಬಾಚಿದ್ದಾರೆ. 39 ಚಿತ್ರಗಳಲ್ಲಿ ಅಭಿನಯಿಸಿರುವ ಬಾಲಿವುಡ್’ನ ಮಿಸ್ಟರ್ ಫರ್ಫೆಕ್ಸನಿಷ್ಟ್ ಅಮೀರ್ ಖಾನ್ 1497ಕೋಟಿ ನೆಟ್ ಬಾಕ್ಸಾಫೀಸ ಕಲೆಕ್ಷನ್ ಮಾಡುವ ಮೂಲಕ ನಾಲ್ಕನೇ ಸ್ಥಾನದಲ್ಲಿದ್ದಾರೆ.

ಬಿಟೌನಲ್ಲಿ ಭಾರೀ ನಿರೀಕ್ಷೆ ಮೂಡಿಸಿರುವ ಚಿತ್ರಗಳ ಪಟ್ಟಿಯಲ್ಲಿ ಅಕ್ಷಯ್ ಅಭಿನಯಿಸಲಿರುವ ‘ಟಾಯ್ಲೆಟ್, ಜಾಲಿ ಎಲ್.ಎಲ್.ಬಿ 2, ಕ್ರಾಕ್ ಸ್ಥಾನ ಪಡೆದಿದೆ. ಹಾಗೆಯೇ ಸೂಪರ್ ಸ್ಟಾರ್ ರಜನೀಕಾಂತ್ ಮತ್ತು ಅನಿಯನ್ ಶಂಕರ್ ಜೋಡಿಯ ರೋಬೊ2 ಚಿತ್ರದಲ್ಲಿ ಅಕ್ಷಯ್ ಕುಮಾರ್ ವಿಲನ್ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಎಲ್ಲಾ ಚಿತ್ರಗಳು ಬ್ಯಾಕ್ ಟು ಬ್ಯಾಕ್ ತೆರೆಗೆ ಬರಲಿದ್ದು, ಹೀಗಾಗಿ ಅಕ್ಕಿಯ ಬಾಕ್ಸಾಫೀಸ್ ಕಲೆಕ್ಷನ್ ನಾಗಾಲೋಟ ಮುಂದುವರಿಯಲಿದೆ ಎಂಬ ಮಾತು ಬಾಲಿವುಡ್’ನಿಂದ ಕೇಳಿ ಬರುತ್ತಿದೆ.maxresdefault

ಸದ್ಯ ಸಲ್ಮಾನ್ ಖಾನ್ ಮತ್ತು ಭಜರಂಗಿ ಭಾಯಿಜಾನ್ ನಿರ್ದೇಶಕ ಕಬೀರ್ ಖಾನ್ ‘ಟ್ಯೂಬ್ ಲೈಟ್’ನಲ್ಲಿ ಜೊತೆಗಿಯಾದ್ದಾರೆ. ಅತ್ತಕಡೆ ಅಕ್ಷಯ್ ಕುಮಾರ್ ಮತ್ತು ‘ಹಾಲಿಡೇ’ ಚಿತ್ರ ನಿರ್ದೇಶಕ ಮುರುಗದಾಸ್ ‘ಇಕ್ಕಾ’ದಲ್ಲಿ ಒಂದುಗೂಡಿದ್ದಾರೆ. ಅಕ್ಕಿ ಮತ್ತು ಸಲ್ಲುನ ಮುಂಬರುವ ಈ ಎರಡು ಚಿತ್ರಗಳು 3000 ಕೋಟಿಯ ನಂಬರ್ 1 ನಟ ಯಾರೆಂಬುದನ್ನು ನಿರ್ಧರಿಸಲಿದೆ ಎಂಬುದು ಸಿನಿಪಂಡಿತರ ಅಭಿಪ್ರಾಯ.

★ ಕಪ್ಪು ಮೂಗುತ್ತಿ

ಮತ್ತೆ ಬಂದ .. ಕಟ್ಟಪ್ಪ ಬಾಹುಬಲಿಯನ್ನೇಕೆ ಕೊಂದ..?

ಬಾಹುಬಲಿ ದಿ ಕನ್‍ಕ್ಲೂಷನ್ ಸಿನಿಮಾ ರಿಲೀಸ್ ಡೇಟ್ ಕನ್ಫರ್ಮ್ ಆಗಿದೆ… ಕಟ್ಟಪ್ಪ ಬಾಹುಬಲಿಯನ್ನೇಕೆ ಕೊಂದ..? ಅನ್ನೊ ಪ್ರಶ್ನೆಗುತ್ತರ ಕೂಡ ಅಂದೇ ರಿವೀಲ್ ಆಗುತ್ತೆ.. ಅಲ್ಲಿವರೆಗೂ ಈ ಪ್ರಶ್ನೆಗುತ್ತರ ಯಾರಿಗೂ ತಿಳಿಯದಂತೆ ನೋಡಿಕೊಳ್ತಿದೆ ರಾಜಮೌಳಿ ಅಂಡ್ ಟೀಮ್.. ಇದೇ ಕಾರಣಕ್ಕೆ ಸಿಕ್ಕಾಪಟ್ಟೆ ಸೆಕ್ಯೂರಿಟಿ ತಗೊಂಡು ಚಿತ್ರದ ಶೂಟಿಂಗ್ ನಡೆಸಲಾಗ್ತಿದೆ… ನಿರ್ದೇಶಕರ ಅನುಮತಿ ಇಲ್ಲದೇ ಶೂಟಿಂಗ್ ಸೆಟ್ಟಿಗೆ ಯಾರೊಬ್ಬರಿಗೂ ಪ್ರವೇಶವಿಲ್ಲವಂತೆ…

ಕಳೆದ ವರ್ಷ ತೆರೆಕಂಡ ಬಾಹುಬಲಿ ದಿ ಬಿಗಿನಿಂಗ್ ಚಿತ್ರದ ಮುಂದುವರೆದ ಭಾಗ ಬಾಹುಬಲಿ ದಿ ಕನ್‍ಕ್ಲೂಷನ್.. ಪ್ರೀಕ್ವೆಲ್‍ಗಿಂತ ಸೀಕ್ವೆಲನ್ನ ಅದ್ದೂರಿಯಾಗಿ ತೆರೆಗೆ ತರೋ ಪ್ರಯತ್ನ ನಡೀತಿದೆ..ಈ ಚಿತ್ರದ ಕುರಿತು ಸಣ್ಣ ಮಾಹಿತಿ ಸೋರಿಕೆಯಾದ್ರೂ ಅದಕ್ಕೆ ರೆಕ್ಕೆಪುಕ್ಕ ಕಟ್ಟಿ ದೊಡ್ಡದಾಗಿ ಪ್ರಚಾರ ಮಾಡಲಾಗುತ್ತದೆ.. ಇದೇ ಕಾರಣಕ್ಕೆ ಭಾರಿ ಭದ್ರತೆ ನಡುವೆ ಚಿತ್ರದ ಶೂಟಿಂಗ್ ನಡೆಸಲಾಗ್ತಿದೆ.. ಅದ್ಯಾವ ಮಟ್ಟಿಗಂದ್ರೆ ಬಾಹುಬಲಿಯನ್ನ ಕಟ್ಟಪ್ಪ ಯಾಕೆ ಕೊಂದ ಅನ್ನೋ ಸೀನ್ ಶೂಟ್ ಮಾಡ್ಬೇಕಾದ್ರೆ ಕೇವಲ ಮೂರುಮಂದಿಯಷ್ಟೆ ಇದ್ರಂತೆ….

ಮೊದಲ ಪಾರ್ಟ್‍ಗಿಂತ ಬಾಹುಬಲಿ ಎರಡನೇ ಪಾರ್ಟ್ ಬಗ್ಗೆ ಕುತೂಹಲ ಜಾಸ್ತಿಯಿದೆ..ಆ ಕುತೂಹಲವನ್ನ ಕೊನೆವರೆಗೂ ಉಳಿಸಿಕೊಳ್ಳೊ ಪ್ರಯತ್ನದಲ್ಲಿದೆ ಚಿತ್ರತಂಡ.. ಬಾಹುಬಲಿ ದಿ ಕನ್‍ಕ್ಲೂಷನ್ ಪ್ರೀ ರಿಲೀಸ್ ಬಿಸಿನೆಸ್ 300ಕೋಟಿ ದಾಟೋ ಸಾಧ್ಯತೆಗಳಿವೆ.. ಈಗಾಗಲೇ ತಮಿಳು ರೈಟ್ಸ್ 50ಕೋಟಿ, ಓವರ್‍ಸೀಸ್ ಹಕ್ಕುಗಳು 37ಕೋಟಿಗೆ ಸೇಲಾಗಿದೆಯಂತೆ…. ಇನ್ನೂ ಆಂಧ್ರದಲ್ಲೂ ಭಾರಿ ಬೆಲೆಗೆ ಚಿತ್ರದ ಹಕ್ಕುಗಳು ಮಾರಾಟವಾಗೊ ಸಾಧ್ಯತೆಯಿದ್ದು, ಒಂದು ಅಂದಾಜಿನ ಪ್ರಕಾರ ಬಾಹುಬಲಿ 2000ಕೋಟಿ ಗಳಿಸುತ್ತೆ ಅನ್ನಲಾಗ್ತಿದೆ…

ಬಾಹುಬಲಿ 2 ಚಿತ್ರದ ಕೀ ಸೀಕ್ವೆನ್ಸ್‍ಗಳನ್ನ ಚಿತ್ರೀಕರಿಸೋವಾಗ ಯಾರೊಬ್ಬರನ್ನೂ ಹತ್ತಿರಕ್ಕೆ ಬಿಟ್ಟುಕೊಳ್ಳುತ್ತಿಲ್ಲವಂತೆ… ಕೆಲವೊಮ್ಮೆ ಬರೀ ಕ್ಯಾಮರಾಮನ್ ಸೆಂಥಿಲ್ ಕುಮಾರ್, ರಾಜಮೌಳಿ ಮತ್ತು ಆ ಸೀನ್‍ನಲ್ಲಿರೋ ಕಲಾವಿದರನ್ನ ಹೊರತುಪಡಿಸಿ ಮತ್ಯಾರಿಗೂ ಅಲ್ಲಿ ಕಾಲಿಡೋಕೆ ಬಿಡ್ತಿಲ್ಲವಂತೆ.. ಯಾಕಂದ್ರೆ ಚೂರು ಮಾಹಿತಿ ಲೀಕಾದ್ರೂ ಅದು ಚಿತ್ರದ ಕಲೆಕ್ಷ್ ಮೇಲೆ, ದಾಖಲೆಗಳ ಮೇಲೆ ಪ್ರಭಾವ ಬೀರಲಿದೆ…ಇದೇ ಕಾರಣಕ್ಕೆ ಇಷ್ಟೊಂದು ಸರ್ಕಸ್ ಮಾಡ್ತಿದ್ದಾರೆ ನಿರ್ದೇಶಕ ರಾಜಮೌಳಿ…

ಬಹಳ ಮುಖ್ಯವಾದ ಸೀಕ್ವೆನ್ಸ್‍ಗಳ ಶೂಟಿಂಗ್ ಟೈಮ್ನಲ್ಲಿ ನೀರು ತಂದುಕೊಡೊರನ್ನಾಗ್ಲಿ, ಟಚ್‍ಅಪ್ ಬಾಯ್ ಆಗ್ಲಿ, ಬೇಕಾಗಿರೋ ಟೆಕ್ನೀಷಿಯನ್ಸ್‍ಗಳೇ ಆಗ್ಲೀ ಹೀಗೆ ಯಾರೊಬ್ಬರನ್ನೂ ಹತ್ತಿರ ಬರದಂತೆ ತಾವೇ ಎಲ್ಲವನ್ನ ವ್ಯವಸ್ಥೆ ಮಾಡಿಕೊಂಡು ಶೂಟಿಂಗ್ ನಡೆಸ್ತಿದ್ದಾರಂತೆ… ಅಷ್ಟರಮಟ್ಟಿಗೆ ಮುತುವರ್ಜಿ ವಹಿಸಿ ಬಾಹುಬಲಿ ಚಿತ್ರದ ಒಂದೊಂದು ದೃಶ್ಯವನ್ನೂ ಸೆರೆಯಿಡಿಯಲಾಗ್ತಿದೆ.. ಥಿಯೇಟರ್‍ಗೆ ಬರೋವರ್ಗೂ ಸಿನಿಮಾದ ಯಾವುದೇ ವಿಚಾರ ಹೊರಬರಬಾರದು ಅನ್ನೋದಕ್ಕೆ ಇಷ್ಟೆಲ್ಲಾ ರಹಸ್ಯ ಕಾಪಾಡಿಕೊಳ್ಳಲಾಗ್ತಿದೆ….

ನಿರ್ದೇಶಕರ ಅನುಮತಿ ಇಲ್ಲದೇ ಚಿತ್ರೀಕರಣದ ಸ್ಥಳಕ್ಕೆ ಒಂದು ನೊಣ ಕೂಡ ಬರುವಂತಿಲ್ಲ..ಸಿನಿಮಾಗೆ ಸಂಬಂಧಿಸಿದ ಫೋಟೋ ಅಥವಾ ವಿಡಿಯೋಗಳು ಲೀಕ್ ಆಗಬಹುದು ಅನ್ನೋ ಕಾರಣಕ್ಕೆ ಮೊಬೈಲನ್ನ ಅಲೋ ಮಾಡ್ತಿಲ್ಲವಂತೆ.. ಚಿತ್ರದಲ್ಲಿ ನಟಿಸ್ತಿರೋ ಕಲಾವಿದರಿಗೂ, ತಂತ್ರಜ್ಞರಿಗೆ ಯಾವುದೇ ಮಾಹಿತಿ ಸೋರಿಕೆ ಮಾಡದಂತೆ ಎಚ್ಚರಿಸಿದ್ದಾರಂತೆ ರಾಜಮೌಳಿ.. ಇಷ್ಟೆಲ್ಲಾ ಸೆಕ್ಯೂರಿಟಿ ಮಧ್ಯೆ ತಯಾರಾಗ್ತಿರೋ ಸಿನಿಮಾ ಥಿಯೇಟರ್‍ಗೆ ಬರೋವರ್ಗೂ ಇದೇ ಕುತೂಹಲವನ್ನ ಉಳಿಸಿಕೊಳ್ಳತ್ತಾ ನೋಡ್ಬೇಕು….

Like Us, Follow Us !

120,526FansLike
1,826FollowersFollow
1,409FollowersFollow
3,304SubscribersSubscribe

Trending This Week