31 C
Bangalore, IN
Tuesday, May 22, 2018
Home ಸಿನಿಮಾ ನ್ಯೂಸ್ ಸಿನಿಮಾ ರಿವ್ಯೂ / ವಿಮರ್ಶೆ

ಸಿನಿಮಾ ರಿವ್ಯೂ / ವಿಮರ್ಶೆ

ಟಗರು ವಿಡಿಯೋ ವಿಮರ್ಶೆ

‘ಟಗರು’ ರೀಲು ಬರಹದಲ್ಲಿ ನಟನೆಯೇ ಹೀರೋ, ಕತೆಯೇ ವಿಲನ್!

‘ರೀಲು ಬರಹ’ ಒಂಚೂರು ಚೇಂಜ್ ಆಗಿರೋ ಪ್ರಯುಕ್ತ ಲಾಂಗ್ ಕಲಾಕಾರ್ ಶಿವಣ್ಣ ಮತ್ತು ದುನಿಯಾ ಸೂರಿ ಕಾಂಬಿನೇಷನ್ “ಕಡ್ಡಿಪುಡಿ’ ಸಿನಿಮಾದಲ್ಲಿ ಮಾಡಿದ ಮೋಡಿ ‘ಟಗರು’ ಚಿತ್ರದಲ್ಲಿ ಕಂಡು ಬಂದಿಲ್ಲ. ಹಾಗಂಥ ಸಿನಿಮಾ ಸಾರಸಗಟು ಚನ್ನಾಗಿಲ್ಲ ಅಂತ ಅರ್ಥ ಅಲ್ಲ. ಆದರೆ ಕಥಾಹಂದರ ನೋಡಿದಾಗ ಕೇಸರಿಬಾತ್ಗೆ ಚಟ್ನಿ ಬೆರೆಸಿ ಕೊಟ್ಟಂಗಿದೆ. ಹೀರೋ ಶಿವು ರೌಡಿ ಚಿಟ್ಟೆ ಪಾತ್ರದ ವಶಿಷ್ಠನನ್ನು ಕೊಚ್ಚಿ ಮಚ್ಚಿನ ತುದಿಯಲ್ಲಿ ಕಾಲರ್ ಸಿಕ್ಕಿಸಿಕೊಂಡು ಬಾಡಿ ಎಳೆದುಕೊಂಡು ಹೋದಂತೆ ಸೂರಿಯೇನಾದರೂ ಪ್ರೇಕ್ಷಕರ ಕುತೂಹಲ ಮತ್ತು ಭಾವನೆಯನ್ನು ಆರಂಭದಿಂದ ಅಂತ್ಯದವರೆಗೂ ಕಾಪಿಟ್ಟುಕೊಂಡಿದ್ದರೆ ಚಿತ್ರ ಸೂಪರ್ ಹಿಟ್ ಆಗುತ್ತಿದ್ದುದರಲ್ಲಿ ಯಾವುದೇ ಅನುಮಾನ ಇರಲಿಲ್ಲ.

ಆದರೆ ಆಗಿರುವುದೇ ಬೇರೆ. ಮಧ್ಯಂತರದವರೆಗೆ ಸಿನಿಮಾ ಯಾವ ದಿಕ್ಕಿನಲ್ಲಿ ಓಡುತ್ತಿದೆ ಎಂದೇ ಅರ್ಥವಾಗುವುದಿಲ್ಲ. ನಂತರ ಕತೆಯ ಎಳೆಗಳು ಒಂದಕ್ಕೊಂದು ಬೆರೆತು ಅರ್ಥ ಆಗುವಷ್ಟರಲ್ಲಿ ಸಿನಿಮಾ ಮುಗಿದು ಹೋಗಿರುತ್ತದೆ. ಇಲ್ಲೇನು ಮಿಸ್ ಹೊಡೀತು ಎಂಬ ಭಾವದೊಂದಿಗೆ ಪ್ರೇಕ್ಷಕ ಹೊರಬಂದಿರುತ್ತಾನೆ. ಇದರ ಸಂಪೂರ್ಣ ಹೊಣೆಗಾರರು ಸೂರಿಯೇ!

ಓಂ, ಜೋಗಿ, ಕಡ್ಡಿಪುಡಿಯಂತೆಯೇ ಟಗರುವಿನಲ್ಲೂ ಮಚ್ಚೇ ಹೀರೋ, ಮಚ್ಚೇ ವಿಲನ್. ಶಿವಣ್ಣ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿರುವುದರಿಂದ ಪಿಸ್ತೂಲಿಗೂ ಗೌರವವಿದೆ. ಸ್ಟೈಲೀಸ್ ಬಳಕೆಯಲ್ಲಿ ಮಚ್ಚು, ಪಿಸ್ತೂಲು ಎರಡಕ್ಕೂ ನ್ಯಾಯ ಒದಗಿಸಿರುವ ಶಿವಣ್ಣನ ನಟನೆ ಬಗ್ಗೆ ಮಾತಾಡುವಂತಿಲ್ಲ. ಆದರೆ ವಿಲನ್ ಪಾತ್ರದ ಧನಂಜಯ ಮತ್ತು ವಶಿಷ್ಟ ಪೈಪೋಟಿಗೆ ಬಿದ್ದು ಭೇಷ್, ವಾಹ್ ಅಂತೆನ್ನಿಸಿಕೊಳ್ಳುವಂತೆ ನಟಿಸಿದ್ದಾರೆ. ಧನಂಜಯ ಅವರಂತೂ ತೆಲುಗಿನ ರಾಣಾ ದಗ್ಗುಬಾಟಿ ಹಾಗೂ ಹಿಂದಿಯ ರಣವೀರ್ ಸಿಂಗ್ ದಾರಿಯಲ್ಲಿದ್ದಾರೆ ಎಂದರೆ ಅತಿಶಯೋಕ್ತಿ ಆಗಲಾರದು. ಸ್ವೇಚ್ಛೆಯನ್ನೇ ತನ್ನಿಚ್ಚೆ ಮಾಡಿಕೊಂಡ ಫ್ರೀಬರ್ಡ್ ಹುಡುಗಿ ಪಾತ್ರದಲ್ಲಿ ಮಾನ್ವಿತಾ ರೆಕ್ಕೆ ಮುರಿದು ಬಿದ್ದಿದ್ದಾರೆ .ಅದಕ್ಕೆ ತದ್ವಿರುದ್ಧ ಅಕ್ಕನ ಪಾತ್ರದಲ್ಲಿ ಭಾವನಾ  ಉತ್ತಮ ನಟನೆ ಕೊಟ್ಟಿದ್ದಾರೆ. ಬೇಸಿಗೆ ಮಳೆಯಂತೆ ಚಿತ್ರದಲ್ಲಿ ಸುಳಿಯುವ ಪ್ರೇಮಕತೆ ರೌಡಿಸಂ ಮುಂದೆ ಸೊರಗಿದ ಹೀರೆಕಾಯಿಯಂತಾಗುತ್ತದೆ.

ಕತೆ ವಿಚಾರಕ್ಕೆ ಮರಳುವುದಾದರೆ ಅಮಾಯಕ ಹುಡುಗಿಯರನ್ನು ಪಟಾಯಿಸಿ ಮುಗಿಸುವ ಹನಿ ಟ್ರಾಪ್ ದಂಧೆಗೆ ಕನೆಕ್ಟ್ ಆಗುವ ರೌಡಿಸಂ ವಾರಸುದಾರರಾದ ಕಾಕ್ರೋಚ್ , ಅವರಣ್ಣ ಡಾಲಿ, ‘ರಕ್ತಗೆಳೆಯ’ ಚಿಟ್ಟೆ ಇವರನ್ನೆಲ್ಲ ಕಪಿಮುಷ್ಟಿಯಲ್ಲಿಟ್ಟುಕೊಂಡು ತನ್ನ ಕುಯುಕ್ತಿಯಿಂದಲೇ ಆಳುವ ಅಂಕಲ್ ಬಾಸ್, ಇವರನ್ನೆಲ್ಲ ಮಟ್ಟ ಹಾಕಲು ನಿಯೋಜಿತರಾಗುವ ಪೊಲೀಸ್ ಅಧಿಕಾರಿ ಶಿವು ಒಬ್ಬೊಬ್ಬರನ್ನೇ ಸಫಾ ಮಾಡುವ ಮೊದಲು ಹೊಡೆಯುವ ಡೈಲಾಗ್ ಗಳು ಶಿಳ್ಳೆ, ಚಪ್ಪಾಳೆ ಗಿಟ್ಟಿಸುತ್ತವೆ. ಕೂದಲು ಬಿಟ್ಟೊರೆಲ್ಲ ಗಂಡಸೇ ಆಗುವುದಿದ್ದರೆ ಕರಡಿ ದೊಡ್ಡ ಗಂಡಸು ಆಗಬೇಕಿತ್ತು, ನೀನಾರಿಗಾದೆಯೋ ಎಲೆ ಮಾನವ ಗೀತೆ ರಚನೆಕಾರರ ಹೆಸರೇಳಿದರೇ ಜೀವ ತೆಗೆಯದೇ ಬಿಡುತ್ತೇನೆ ಎಂದು ರೌಡಿಗಳಿಗೆ ಕೊಡುವ ಆಫ್ಸನ್  ಸೇರಿದಂತೆ ರೌಡಿಗಳ ಜತೆ ಶಿವಣ್ಣನ ಶಬ್ದವೈಡೂರ್ಯ ಕತೆ ಮೀರಿ ಪ್ರೇಕ್ಷಕನ ಮನದಲ್ಲಿ ನಿಲ್ಲುತ್ತದೆ. ಜಯಂತ್ ಕಾಯ್ಕಿಣಿ ಅವರ ‘ಗುಮ್ಮ ಬಂದ ಗುಮ್ಮ’ ಸೇರಿದಂತೆ ಕೆಲ ಹಾಡುಗಳು ಸ್ತೃತಿಪಟಲದಲ್ಲಿ ಮಾರ್ಧನಿಸುತ್ತವೆ. ಸಂಗೀತ ಸೊಂಪಾಗಿದೆ. ಮಹೇಂದ್ರ ಸಿಂಹ ಅವರ ಛಾಯಾಗ್ರಹಣ ಹಿತವಾಗಿದೆ. ಆದರೆ ಚಿತ್ರಕ್ಕೆ ಕತೆಯ ಓಘವೇ ವಿಲನ್. ನಟನೆಯೇ ಹೀರೋ. ಹೀಗಾಗಿ ನಿರೀಕ್ಷೆ ಪಕ್ಕಕ್ಕಿಟ್ಟು ಸಿನಿಮಾ ನೋಡಬಹುದು. ಆದರೆ ಯಾವುದೇ ಕಾರಣಕ್ಕೂ ‘ಬಂಗಾರ ಪಂಜರ’ದ ಅಣ್ಣಾವ್ರ ‘ಮೈಲಾರಿ’ ನೆನೆಸಿಕೊಂಡು ‘ಟಗರು’ ಕಲ್ಪಿಸಿಕೊಳ್ಳಬೇಡಿ. ಹಾಗೇನಾದರೂ ಕಲ್ಪಿಸಿಕೊಂಡರೆ ಟಗರುವಿನಿಂದ ಗುದ್ದಿಸಿಕೊಳ್ಳೋದು ಗ್ಯಾರಂಟಿ!
-ಭಾನುಮತಿ

ಕನ್ನಡ ಮೀಡಿಯಂನಲ್ಲಿ ಓದಿದ ರಾಜು ರಿಸಲ್ಟ್ ಏನಾಯ್ತು ?

ಕಥೆ – ಬದುಕಿನ ಸ್ಥಿತ್ಯಂತರಗಳಿಗೆ ಸಾಕ್ಷಿಪ್ರಜ್ಞೆಯಾದ ಹಳ್ಳಿಯ ಪೋರನೊಬ್ಬನ ಭವಿಷ್ಯದ ಅನ್ವೇಷಣೆಯಲ್ಲಿ ಆದ್ಯತೆಗಳು ಸಂದರ್ಭಕ್ಕೆ ಅನುಸಾರವಾಗಿ ಬದಲಾಗುತ್ತಾ ಹೋಗುತ್ತವೆ. ಮುಗ್ದ ಜೀವನಕ್ಕೆ  ತಿರುವ ಕೊಡುವ ಮೊದಲ ಪ್ರೀತಿಯನ್ನ ಕೈಗೆಟುಕಿಸಿಕೊಳ್ಳಬೇಕೆನ್ನುವುದರಲ್ಲೇ ಅದು ಕಳೆದುಹೋಗುತ್ತದೆ . ಆಗ ಆತನ ಆದ್ಯತೆ ಕುಟುಂಬದ ಪ್ರೀತಿಯತ್ತ ಹೊರಳುತ್ತದೆ. ತಾಯಿಯ ಅನಾರೋಗ್ಯ ರಕ್ತ ಸಂಬಂಧಿಗಳ ಸ್ವಾರ್ಥವನ್ನು ತೆರೆದಿಟ್ಟಾಗ ಆತನಿಗೆ ನೆರವಾಗುವ ಗೆಳೆಯರು ಕೂಡ ಬದುಕಿನ ಅನಿವಾರ್ಯತೆಗೆ ಒಬ್ಬೊಬ್ಬರಾಗಿ ಕರಗಿಹೋಗುತ್ತಾರೆ. ಬಾಳುವೆ ಅರಸಿ ಕಾಣದ ನಗರಕ್ಕೆ ಕಾಲಿಟ್ಟ ಕನ್ನಡದ  ಕಂದನನ್ನು ಮತ್ತೊಂದು ಪ್ರೀತಿ ಕೈಹಿಡಿಯುತ್ತದೆ .ಪ್ರೀತಿ ಸಾಗಲು ಭಾವನೆಗಳಷ್ಟೇ ಸಾಲದು ಕೈ ತುಂಬಾ ಹಣವೂ ಮುಖ್ಯವೆನ್ನುವುದು ಆದ ಅವಮಾನದಿಂದ ಅರಿವಾಗುತ್ತದೆ. ತಾನು ಐಶ್ವರ್ಯವಂತನಾಗಬೇಕೆಂದು ಬಯಸಿದಾಗ ಯಶಸ್ವಿ ಉದ್ಯಮಿಯೊಬ್ಬನ ಸಲಹೆಯೂ ಜೊತೆಯಾಗುತ್ತದೆ. ಅದರ ಬೆನ್ಹತ್ತಿ ಹೋದ ನಾಯಕ ಮತ್ತಷ್ಟು ಅನೀರೀಕ್ಷಿತ ,ಆಘಾತಕಾರಿ ತಿರುವುಗಳಿಗೆ ವಸ್ತುವಾಗುವುದೇ ರಾಜು ಕನ್ನಡ ಮೀಡಿಯಂ ಚಿತ್ರದ ತಿರುಳು.

ನಿರ್ದೇಶನ

ಮಧ್ಯಂತರದವರೆಗೆ  ಪ್ರೇಕ್ಷಕರನ್ನ ಅಲುಗದಂತೆ ಹಿಡಿದಿಟ್ಟುಕೊಳ್ಳುವ ನಿರ್ದೇಶಕ ನರೇಶ್ ಕುಮಾರ್ , ನಂತರ ಅನೀರೀಕ್ಷಿತ ತಿರುವುಗಳನ್ನು ಹೆಣೆಯುವ ಭರದಲ್ಲಿ ಕಳೆದುಹೋದಂತೆ ಭಾಸವಾಗುತ್ತಾರೆ . ವಿಶ್ವಮಾನ್ಯ ಆಂಗ್ಲ ಚಿತ್ರ ಕ್ಯಾಸ್ಟ್ಅವೇ ಯ ಬಹುಮುಖ್ಯ ತುಣುಕನ್ನು ತುರುಕಲು ಹೋಗಿ ನೈಜತೆಯನ್ನು ಕದಡಿದ್ದಾರೆ. ಆದರೆ ಒಂದಂತೂ ಸತ್ಯ ಹೊಸ ಪರಂಪರೆಯ ಪ್ರೇಕ್ಷಕರನ್ನು ಹುಟ್ಟುಹಾಕುವ ಪ್ರಾಮಾಣಿಕ ಪ್ರಯತ್ನ ಇಲ್ಲಿದೆ. ಪ್ರಥಮಾರ್ಧದ ಕಥೆಗೆ  ದ್ವಿತೀಯಾರ್ಧವೇ ಶತ್ರು !! ಹಾಗೆಂದ ಮಾತ್ರಕ್ಕೆ ನಿರ್ದೇಶಕ ಇಲ್ಲಿ ಸೋತಿದ್ದಾರೆ ಎಂದರ್ಥವಲ್ಲ. ಚಿತ್ರವನ್ನು ಹಿಗ್ಗಿಸುವ ಭರದಲ್ಲಿ ಕಥೆಯೊಳಗೆ ಉಪಕಥೆಗಳನ್ನು ಹೆಣೆಯುವಾಗ ಪ್ರೇಕ್ಷಕರ ಸಹನೆಗೊಂದು  ಸವಾಲು ಹಾಕಿದ್ದಾರೆ. ಇದೆಲ್ಲದರ ಹೊರತಾಗಿಯೂ ಚಿತ್ರದಲ್ಲಿ ನಿರ್ದೇಶಕನ ಕಲಾ ಕುಸುರಿ ಗಮನ ಸೆಳೆಯುತ್ತದೆ. ಪಂಚ್ ಗಳಿಂದ ತುಂಬಿರುವ ಬಿಗಿ ಸಂಭಾಷಣೆ ಮನಸ್ಸುಗಳನ್ನು ಸೆಳೆಯುತ್ತದೆಭವಿಷ್ಯದಲ್ಲಿ ಉತ್ತಮ ಚಿತ್ರಗಳನ್ನು ನೀಡುವ ಭರವಸೆಯನ್ನ ನರೇಶ್ ಕುಮಾರ್ ಮೂಡಿಸಿದ್ದಾರೆ.

ಕನ್ನಡ ಮೀಡಿಯಂನಲ್ಲಿ ಓದಿದವರಿಗೆ ನಗರ ಬದುಕಿನಲ್ಲಿರುವ ಇಂಗ್ಲೀಷ್ ಪಾರಮ್ಯದೊಂದಿಗೆ ಸೆಣೆಸುವಾಗ ಸಾಮಾನ್ಯವಾಗಿ ಕೀಳರಿಮೆ ಕಾಡುತ್ತದೆ. ಆದ್ರೆ ಕನ್ನಡ ಮೀಡಿಯಂ  ರಾಜುವನ್ನು ಇಂಥಹ ಕೀಳರಿಮೆಯಿಂದ ಹೊರತಂದ ಹೆಗ್ಗಳಿಕೆ ನಿರ್ದೇಶಕರದ್ದು.

ಅಭಿನಯ 

ಹಳ್ಳಿಯ ಹೈದ, ಮುಗ್ದ ಪ್ರೇಮಿ, ಛಲಗಾರ, ಕವಿ, ಕನ್ನಡಪ್ರೇಮಿ ಹೀಗೆ  ನಾನಾ ರೂಪಗಳಲ್ಲಿ ನಾಯಕ ಗುರುನಂದನ್ ನಟನೆ ಮನಸ್ಸಿಗಿಳಿಯುತ್ತದೆ. ಚೆಲ್ಲು ಹುಡುಗಿ , ಪ್ರೇಮಾನುರಾಗಿ,ವಿರಹಿಯ ಪಾತ್ರವನ್ನು ಅವಂತಿಕಾ ಶೆಟ್ಟಿ ನವಿರಾಗಿ ನಿರ್ವಹಿಸಿದ್ದಾರೆ.

ಯಶಸ್ವಿ ಉದ್ಯಮಿಯ  ಪಾತ್ರದಲ್ಲಿ ಬಂದು ವೀಪರೀತ ಬೋಧನೆ ಮಾಡದೆಯೂ ಗೆಲುವಿನ ಮಂತ್ರ ತಿಳಿಸುವಲ್ಲಿ ಸುದೀಪ್ ಅಭಿನಯ ಮನೋಜ್ಞವಾಗಿದೆ.

ಸಾಧುಕೋಕಿಲ,ಕುರಿಪ್ರತಾಪ್ , ಚಿಕ್ಕಣ್ಣ ಹೀಗೆ ಎಲ್ಲರ ಅಭಿನಯವು ಮೆಚ್ಚುವಂತಿದೆ.

ಸಂಗೀತ 

ಹಾಡುಗಳು ,ಹಿನ್ನೆಲೆ ಸಂಗೀತ ಇಂಪಾಗಿ ಚಿತ್ರಕ್ಕೆ ಮತ್ತಷ್ಟು ಮೆರಗು ತುಂಬಿವೆ.

ಛಾಯಾಗ್ರಹಣ

ಮಲೆನಾಡಿನ ಚಿತ್ರಗಳು, ಜಲಪಾತಗಳು, ಸಮುದ್ರ ,ದ್ವೀಪ, ಪಾತ್ರಧಾರಿಗಳನ್ನು ಸೆರೆಹಿಡಿಯುವಲ್ಲಿ ಶೇಖರ್ ಚಂದ್ರ ಪ್ರತಿಭೆ ಪ್ರಜ್ವಲಿಸಿದೆ.

ಎಲ್ಲ ವಯೋಮಾನದವರು ಕುಳಿತು ನೋಡಬಹುದಾದ ಚಿತ್ರ ರಾಜು ಕನ್ನಡ ಮೀಡಿಯಂ

 

 

 

 

 

“ಚಮಕ್” ಚಿತ್ರ ವಿಮರ್ಶೆ ವೀಡಿಯೊ

ಹೇಗಿದೆ ಗೊತ್ತಾ ಅಂಜನಿಪುತ್ರ? ಸಿನಿಅಡ್ಡ ಚಿತ್ರವಿಮರ್ಶೆ ಇಲ್ಲಿದೆ ನೋಡಿ…

ಕೆಂಪಿರ್ವೆ ಸಿನಿಮಾ ವಿಮರ್ಶೆ ವಿಡಿಯೋ

ಕಾಲೇಜ್ ಕುಮಾರ ಪಾಸು !

ಚಿತ್ರ: ಕಾಲೇಜ್ ಕುಮಾರ್
ನಿರ್ದೇಶನ: ಹರಿ ಸಂತೋಷ್
ತಾರಾಗಣ: ವಿಕ್ಕಿ ವರುಣ್, ಸಂಯುಕ್ತ ಹೆಗಡೆ, ರವಿಶಂಕರ್, ಶ್ರುತಿ, ಪ್ರಕಾಶ್ ಬೆಳವಾಡಿ, ಅಚ್ಯುತ, ಸಾಧು ಕೋಕಿಲ, ರಾಕ್ ಲೈನ್ ಸುಧಾಕರ್, ಪ್ರಶಾಂತ್ ಸಿದ್ಧಿ, ಅಶ್ವಿನ್ ರಾವ್ ಪಲ್ಲಕ್ಕಿ ಮತ್ತಿತರರು.
ಧಾರಾಕಾರ ಮಳೆ ಸುರಿಯುವ ರಾತ್ರಿ ಒಂದು ಅವಮಾನದಿಂದ ಹುಟ್ಟುವ ಕತೆ ಇದು. ಅಲ್ಲೊಬ್ಬ ಬಾಸು, ಅವನ ಕೈಕೆಳಗೆ ಕೆಲಸ ಮಾಡುವ ಒಬ್ಬ ಮಧ್ಯಮ ವರ್ಗದ ಪ್ರಜೆ. ಆ ಬಾಸ್ ಮಾಡುವ ಅವಮಾನಕ್ಕೆ ಪ್ರತೀಕಾರ ತೀರಿಸಬೇಕು ಅನ್ನುವುದು ಅವನ ಆಸೆ. ಎಲ್ಲಾ ಮಧ್ಯಮ ವರ್ಗದ ತಂದೆಯರಂತೆ ತನ್ನ ಮಗ ತನ್ನ ಆಸೆಯನ್ನು ತೀರಿಸಬೇಕು ಅನ್ನುವುದು ಅವನಿಚ್ಛೆ.
ತನ್ನ ಮಗ ತನ್ನ ಕನಸನ್ನು ನನಸು ಮಾಡಬೇಕು ಅನ್ನುವ ಕಾರಣಕ್ಕೆ ಎಂಥಾ ಕಷ್ಟ ಬಂದರೂ ಎದುರಿಸುವೆ ಅನ್ನುವ ತ್ಯಾಗಮಯಿ ಮಿಡ್ಲ್ ಕ್ಲಾಸ್ ತಂದೆ ಅವನು. ಆದರೆ ಯಾವಾಗ ತನ್ನ ಕನಸು ನೆರವೇರದು ಎಂದು ಅರಿವಾಗಿ ಆರಡಿ ಪ್ರತಿಭೆ, ಮಾತಿನ ಮಲ್ಲ ಅಪ್ಪ ರವಿಶಂಕರ್ ಮಾತು ಸೋತು ಕುಸಿದು ಕೂರುತ್ತಾನೋ ಆಗ ನಿರ್ದೇಶಕ ಹರಿ ಸಂತೋಷ್ ಗೆಲ್ಲುತ್ತಾರೆ.
ಅಪ್ಪ ರವಿಶಂಕರ್ ಆತಂಕದಲ್ಲಿ, ಅಮ್ಮ ಶ್ರುತಿ ಕಳವಳದಲ್ಲಿ, ಮಗ ವಿಕ್ಕಿ ವರುಣ್ ಆಕ್ರೋಶದಲ್ಲಿ ಒಂದು ತಣ್ಣನೆಯ ಮೌನವಿದೆ. ವಿಷಾದವಿದೆ. ಅವೆಲ್ಲವೂ ಪ್ರೇಕ್ಷಕನಿಗೆ ನಾಟುತ್ತದೆ. ಅದು ನಿರ್ದೇಶಕರ ಶಕ್ತಿ.
ಇಲ್ಲಿ ಎರಡು ಜನರೇಷನ್ ಇದೆ. ಒಂದು ತಂದೆ ಒಬ್ಬ ಮಗ. ಅತ್ತ ಪೋಷಕರು ಇತ್ತ ಮಕ್ಕಳು. ಆಕಡೆ ಹಳೇ ಜನರೇಷನ್ ಈ ಕಡೆ ಹೊಸ ಜನರೇಷನ್. ಅವರ ತಳಮಳ, ಇವರ ಒತ್ತಡ, ಅವರ ಆಕಾಂಕ್ಷೆ, ಇವರ ಒದ್ದಾಟ, ಅವರ ಕನಸು, ಇವರ ಟೆನ್ಷನ್, ಅವರ ಶ್ರಮ, ಇವರ ಮೋಜು ಎಲ್ಲವೂ ಇಲ್ಲಿ ಬಂದು ಹೋಗುತ್ತದೆ. ಅವರು ತಪ್ಪಿದ್ದಾರೋ ಇವರು ತಪ್ಪಿದ್ದಾರೋ ಅನ್ನುವುದನ್ನು ನೇರವಾಗಿ ಹೇಳುವುದಿಲ್ಲ. ಒಂದೊಮ್ಮೆ ಪಾತ್ರ ಬದಲಾದಾಗ ಅವರಿಗೆ ಇವರಿಗೆ ಎಲ್ಲರಿಗೂ ಜ್ಞಾನೋದಯ ಮಾಡಿಸುತ್ತಾರೆ ನಿರ್ದೇಶಕರು. ಆದರೆ ಈ ಹಂತದಲ್ಲಿ ಸ್ವಲ್ಪ ಎಡವುತ್ತಾರೆ.
ಕೆಲವು ಕತೆಗಳನ್ನು ತಣ್ಣಗೆ ಹೇಳಿದರೆ ಸೊಗಸು. ಸಣ್ಣ ದನಿಯಲ್ಲಿ ಕಾಡುವಂತೆ ಹೇಳಬೇಕು. ಆದರೆ ಹರಿ ಸಂತೋಷ್ ಇಲ್ಲಿ ಸಣ್ಣ ದನಿಯಲ್ಲಿ ಮೆಲ್ಲಗೆ ಕತೆ ಹೇಳುವ ಹೊತ್ತಲ್ಲಿ ದೊಡ್ಡ ದನಿಯಲ್ಲಿ ಕತೆ ಹೇಳುತ್ತಾರೆ. ಅದು ಕತೆಗೆ ಒಳ್ಳೆಯದಲ್ಲ.
ಮಂದ್ರ ಸ್ಥಾಯಿಯಲ್ಲಿ ಸ್ವಲ್ಪ ಸೂಕ್ಷ್ಮವಾಗಿ ಕತೆ ಹೇಳಿದ್ದರೆ ಬೇರೆಯದೇ ಹಂತಕ್ಕೆ ಹೋಗಬಹುದಾಗಿದ್ದ ಕತೆಗೆ ಮೆಲೋಡ್ರಾಮಾಟಿಕ್ ಗುಣ ದಯಪಾಲಿಸಿ ಅಲ್ಲೇ ನಿಲ್ಲಿಸುತ್ತಾರೆ ಮತ್ತು ಮುಗಿಸುತ್ತಾರೆ. ಅದನ್ನು ಹೊರತು ಪಡಿಸಿದರೆ ನಿರ್ದೇಶಕರು ನಿಜಕ್ಕೂ ಮೆಚ್ಚುಗೆಗೆ ಪಾತ್ರರು.
ವಿಲನ್ ಗಳನ್ನು ಇಷ್ಟ ಪಡುವ ಸಂಯುಕ್ತ ಹೆಗಡೆ, ದುರಹಂಕಾರಿ ಆಡಿಟರ್ ಪ್ರಕಾಶ್ ಬೆಳವಾಡಿ, ಮಗಳನ್ನು ಸಿಕ್ಕಾಪಟ್ಟೆ ಇಷ್ಟಪಡುವ ಮತ್ತು ಅದನ್ನು ತೋರಿಸಿಕೊಳ್ಳದ ತಂದೆ ಅಚ್ಯುತ್, ಗಂಡನ ನೋವಿಗೆ ಹೆಗಲು ಕೊಟ್ಟು ನಗುತ್ತಲೇ ನಿಟ್ಟುಸಿರಾಗುವ ಪತ್ನಿ ಶ್ರುತಿ, ಗೆದ್ದು ಸೋಲುವ ಸೋತು ಗೆಲ್ಲುವ ವಿಕ್ಕಿ ವರುಣ್ ಇಷ್ಟವಾಗುತ್ತಾರೆ. ಅದರಲ್ಲೂ ರವಿಶಂಕರ್ ಎಲ್ಲವನ್ನೂ ಮೀರಿಸಿ ತಾನೇ ಆವರಿಸಿಕೊಳ್ಳುತ್ತಾರೆ. ಕನಸು ನುಚ್ಚುನೂರಾದಾಗ ಅವರ ಹಣೆಯಲ್ಲಿ ಮೂಡುವ ನೆರಿಗೆಗಳು ಸಾಕು ಅವರೊಬ್ಬ ಅದ್ಭುತ ನಟ ಎಂದು ಹೇಳಲು. ಅವರು ಡೈಲಾಗ್ ರಾಜನಷ್ಟೇ ಅಲ್ಲ, ಎಕ್ಸ್ ಪ್ರೆಷನ್ ಬಾದ್ ಷಹಾ ಕೂಡ ಹೌದು. 
ಇನ್ನಿಬ್ಬರನ್ನು ಇಲ್ಲಿ ನೆನೆಯಬೇಕು. ಅವರು ಛಾಯಾಗ್ರಾಹಕ ಅಝಗನ್ ಮತ್ತು ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯಾ. ಈ ಚಿತ್ರದ ಮಧ್ಯಂತರದ ದೃಶ್ಯದಲ್ಲಿ ರವಿಶಂಕರ್, ಶ್ರುತಿ, ವಿಕ್ಕಿಯಷ್ಟೇ ಕಾಡುವುದು ಅಝಗನ್ ಮತ್ತು ಅರ್ಜುನ್. ಆ ದೃಶ್ಯವನ್ನು ಅಝಗನ್ ಎಷ್ಟು ಪರಿಣಾಮಕಾರಿಯಾಗಿ ಚಿತ್ರೀಕರಿಸುತ್ತಾರೆ ಅಂದರೆ ಆ ದೃಶ್ಯದಲ್ಲಿ ಪಾತ್ರಧಾರಿ ತಲೆ ತಗ್ಗಿಸಿದಾಗ ನೋಡುಗ ನಿಟ್ಟುಸಿರು ಬಿಡುತ್ತಾನೆ.
ಹರಿ ಸಂತೋಷ್ ನಿರ್ದೇಶನದ ಈ ಕಾಲೇಜ್ ಕುಮಾರನ ಕತೆ ಕಾಲೇಜ್ ನಲ್ಲಿ ಕಳೆದ ದಿನಗಳಷ್ಟೇ ಖುಷಿ ಮತ್ತು ವಿಷಾದವನ್ನು ದಯಪಾಲಿಸುತ್ತದೆ. ಈ ಸಿನಿಮಾ ಸ್ವಲ್ಪ ನಿಧಾನವಾಗಿದ್ದರೂ ಬೋರ್ ಹೊಡೆಸುವುದಿಲ್ಲ.
– ರಿಚ್ಚೀ

ಕಾಲೇಜ್ ಕುಮಾರ್ ಸಿನಿಮಾ ವಿಮರ್ಶೆ ವೀಡಿಯೋ ಇಲ್ಲಿದೆ

ಅಮಾಯಕ ನಟರಿಗೆ ಮತ್ತೊಬ್ಬ ನಿರ್ದೇಶಕನ “ಹಾಲುತುಪ್ಪ”

ಗಡ್ಡಪ್ಪ ಮತ್ತು ಸೆಂಚುರಿ ಗೌಡ ಎಂಬಿಬ್ಬರು ಅಮಾಯಕ ನಟರು ಕನ್ನಡ ಚಿತ್ರರಂಗಕ್ಕೆ ಸಿಕ್ಕಿದ್ದು ತಿಥಿ ಚಿತ್ರದ ಮೂಲಕ. ಅನಂತರ ಅನೇಕ ನಿರ್ದೇಶಕರು ಅವರನ್ನು ನಾನಾ ರೀತಿಯಲ್ಲಿ ಬಳಸಿಕೊಂಡಿದ್ದಾರೆ. ಕಡೆಯದಾಗಿ ಈಗ ಹಾಲು ತುಪ್ಪ ಕೂಡ ಆಗಿ ಹೋಗಿದೆ.

ಈ ಇಬ್ಬರನ್ನು ಬಳಸಿಕೊಂಡು ಹಾಲು ತುಪ್ಪ ಸಿನಿಮಾ ಮಾಡುತ್ತಾರೆ ಅಂತನ್ನುವಾಗಲೇ ನಿರ್ದೇಶಕ ಶಶಾಂಕ್ ರಾಜ್ ಎಂತಹ ಸಿನಿಮಾ ಪ್ರೇಮಿ ಅನ್ನುವ ಅಂದಾಜು ಸಿನಿಮಾ ಪ್ರೇಮಿಗಳಿಗೆ ಸಿಕ್ಕಿರಬಹುದು. ಅದನ್ನು ಒಂದಿಷ್ಟೂ  ಬದಲಿಸುವ ಪ್ರಯತ್ನವನ್ನು ನಿರ್ದೇಶಕರು ಮಾಡಿಲ್ಲ.

ಇಲ್ಲೊಂದು ಹಳ್ಳಿ ಇದೆ. ಹಳ್ಳಿಯಲ್ಲಿ ನಾಲ್ಕೈದು ಮಂದಿ ಪ್ರತಿಷ್ಟಿತ ವ್ಯಕ್ತಿಗಳಿದ್ದಾರೆ. ಅವರಲ್ಲಿ ಗಡ್ಡಪ್ಪ, ಸೆಂಚುರಿ ಗೌಡ, ಕೋಟೆ ನಾಗರಾಜ್, ತಮ್ಮಣ್ಣ, ಹೊನ್ನವಳ್ಳಿ ಕೃಷ್ಣ ಮುಖ್ಯರು. ಅವರೊಂದಿಗೆ ಆಗೊಮ್ಮೆ ಈಗೊಮ್ಮೆ ಬರುವ ನಾಯಕ ಪವನ್ ಸೂರ್ಯ ಇರುತ್ತಾರೆ. ಲವ್ವಿಗೆ ಪಕ್ಕದೂರಿನ ಹುಡುಗಿ ಮೌನ ಇದ್ದಾಳೆ. ಈ ಹಳ್ಳಿಗೂ ಆ ಹಳ್ಳಿಗೂ ದ್ವೇಷವಿದೆ ಅಂತಲೇ ಕತೆ ಶುರು ಮಾಡುವ ನಿರ್ದೇಶಕರು ಅನಂತರ ಈ ಹಳ್ಳಿಗೊಂದು ಕಂಪ್ಯೂಟರ್ ಟೀಚರ್ ಅನ್ನು ಕರೆದುಕೊಂಡು ಬರುತ್ತಾರೆ. ನಿರ್ದೇಶಕರ ಕಲ್ಪನೆ ಎಷ್ಟು ಅದ್ಭುತವಾಗಿದೆ ಎಂದರೆ ಆ ಟೀಚರ್ ಶಾಲೆಗೆ ಹೋಗುವುದೇ ಇಲ್ಲ. ಅದರ ಬದಲಿಗೆ ಹಳ್ಳಿಯ ಪ್ರತಿಷ್ಟಿತರ ಜೊತೆ ತೋಟ ಸುತ್ತುತ್ತಾ ಕಂಪ್ಯೂಟರ್ ಪಾಠ ಹೇಳುತ್ತಾ ಕಾಲ ಕಳೆಯುತ್ತಾರೆ. ಯಾವ ಊರಲ್ಲೂ ಸಿಗದ ಕಂಪ್ಯೂಟರ್ ಟೀಚರ್ ಇಲ್ಲಿ ಸಿಗುತ್ತಾರೆ ಅಂದರೆ ಲೆಕ್ಕ ಹಾಕಿ ಎಂಥಾ ತಲೆ ಈ ಚಿತ್ರದ ನಿರ್ದೇಶಕರದು ಎಂದು.

ಆ ಪಾತ್ರಗಳಂತೂ ಟೀಚರ್‌ನ ಹಿಂದಕ್ಕೂ ಮುಂದಕ್ಕೂ ಓಡಾಡಿ ,ಅಡ್ಡಾಡಿ, ಮಾತಾಡಿ.. ನುಲಿದಾಡಿ ನೋಡುತ್ತಿದ್ದವರನ್ನು ಗಾಬರಿಗೊಳಿಸಿಬಿಡುತ್ತಾರೆ. ಇವನ್ನೆಲ್ಲಾ ನೋಡುತ್ತಿದ್ದರೆ ಸಹೃದಯ ನೋಡುಗರು ಸಂಕಟ ಬಂದಾಗ ವೆಂಕಟರಮಣ ಅನ್ನೋ ಥರ ನಿರ್ದೇಶಕರನ್ನು ನೂರಾರು ಬಾರಿ ನೆನೆಯದೇ(ಉಗಿಯುತ್ತಾ ) ಇದ್ದರೆ ಕೇಳಿ. ಅದು ಶಶಾಂಕ್ ರಾಜ್ ಅವರ ಶಕ್ತಿ.

ಇಲ್ಲಿ ಗಡ್ಡಪ್ಪ ಪಾತ್ರವೊಂದನ್ನು ಬಿಟ್ಟರೆ ಯಾವ ಪಾತ್ರಕ್ಕೂ ಘನತೆ ಇಲ್ಲ. ಕತೆ, ಚಿತ್ರಕತೆಯ ಮೇಲಂತೂ ಕಿಂಚಿತ್ತೂ  ಗೌರವ ಇಲ್ಲ. ಟಾರ್ಚ್ ಹಾಕಿ ಹುಡುಕಿದರೂ ಒಳ್ಳೆಯ ದೃಶ್ಯ ಸಿಗುವುದಿಲ್ಲ. ನಗಿಸಬೇಕೆಂದೇ ಹೇಳುವ ಡಬಲ್ ಮೀನಿಂಗ್ ಡೈಲಾಗ್‌ಗಳನ್ನು ಕೇಳಿದರೆ ನಗು ಬರುವುದಿಲ್ಲ.ಮೈ ಉರಿದುಹೋಗತ್ತೆ ಅಷ್ಟೇ . ಕೀಳು ಅಭಿರುಚಿಯ ಪ್ರತೀಕವಷ್ಟೇ . ಹಾಗಾಗಿ ಈ ಸಿನಿಮಾಗೆ ಹಾಲು ತುಪ್ಪ ಎಂಬ ಟೈಟಲ್ಲು ಸರಿಯಾಗಿ ಹೊಂದುತ್ತದೆ.

ಈ ಚಿತ್ರದಲ್ಲಿ ನಿಮಗೆ ಏನಾದರೂ ಇಷ್ಟವಾದರೆ ಅದು ಇಬ್ಬರೇ. ಅದು ಗಡ್ಡಪ್ಪ ಮತ್ತು ಸೆಂಚುರಿ ಗೌಡ. ಅವರ ಉಪಸ್ಥಿತಿಯೇ ಖುಷಿ ಕೊಡುವುದು. ಆದರೆ ಅವರನ್ನು ನೋಡುವಾಗ ಪಾಪ ಅನ್ನಿಸುತ್ತದೆ. ತಿಥಿ ಸಿನಿಮಾದಲ್ಲಿ ಅವರು ನಟಿಸಿರಲಿಲ್ಲ, ಕಾಣಿಸಿಕೊಂಡಿದ್ದರು. ಆದರೆ ಅನಂತರ ಬಂದ ಎಲ್ಲಾ ಸಿನಿಮಾದಲ್ಲೂ ಅವರಿಂದ ನಟನೆ ತೆಗೆಯುವ ಪ್ರಯತ್ನ ನಡೆಯಿತು. ಅಲ್ಲದೇ ಈ ಸಿನಿಮಾದಲ್ಲಿ ಸೆಂಚುರಿ ಗೌಡರನ್ನು ನೋಡಿದರೆ ಪಾಪ ಅನ್ನಿಸದೇ ಇರದು.

ಕಡೆಯದಾಗಿ ಹೇಳುವುದಾದರೆ ಈ ಸಿನಿಮಾದ ಕತೆಯಲ್ಲೇ ದೋಷವಿದೆ. ಚಿತ್ರಕತೆಯಂತೂ ರಾಮಾ .. ರಾಮಾ.. ಕನ್ನಡ ಚಿತ್ರರಂಗಕ್ಕೆ ಎಂಥೆಂಥ ಅರೆಬೆಂದವರು ಬರ್ತಾರಪ್ಪ ಅನ್ನಿವಷ್ಟು ಕಷ್ಟ ಕಷ್ಟ. ಯಾರೇ ಆಗಲಿ ಸಿನಿಮಾ ಮಾಡುವವರು ಮೊದಲು ಶ್ರದ್ಧೆಯಿಂದ ಕತೆ, ಚಿತ್ರಕತೆ ಮಾಡಿಕೊಳ್ಳಬೇಕು. ಅದರಲ್ಲಿ ಸೋಮಾರಿತನ- ತೋರಿಸಬಾರದು.ಸಿನಿಮಾ ಮಾಡುವ ಕಲೆ  ಗೊತ್ತಿರಬೇಕು . ಇಲ್ಲಿ ಯಾವ ದೃಶ್ಯವೂ ನಿಮ್ಮನ್ನು ಕಾಡುವುದಿಲ್ಲ ಮತ್ತು ನೆನಪಲ್ಲಿ ಉಳಿಯುವುದಿಲ್ಲ. ಹಾಗಾಗಿ ನಾನು ಈ ಚಿತ್ರಕ್ಕೆ ಐದರಲ್ಲಿ ಒಂದು ಸ್ಟಾರ್ ನೀಡುತ್ತೇನೆ.

– ರಿಚ್ಚೀ

 

Like Us, Follow Us !

122,699FansLike
1,826FollowersFollow
1,409FollowersFollow
2,513SubscribersSubscribe

Trending This Week