18 C
Bangalore, IN
Tuesday, December 19, 2017
Home ಸಿನಿಮಾ ನ್ಯೂಸ್ ಸಿನಿಮಾ ರಿವ್ಯೂ / ವಿಮರ್ಶೆ

ಸಿನಿಮಾ ರಿವ್ಯೂ / ವಿಮರ್ಶೆ

ರಾಮಾ ರಾಮಾ ರೇ …ಸೋಲಿಸಬ್ಯಾಡ ಗೆಲಿಸಯ್ಯಾ

ಕೆಲವು ಚಿತ್ರಗಳೇ ಹಾಗೆ ಮಾತು ಸಾಕು ಮಥಿಸು ಅಂದುಬಿಡುತ್ತವೆ. ರಾಮಾ ರಾಮಾ ರೇ ಕೂಡ ಅಂಥದ್ದೇ . ಸಿನಿಮಾ ನೋಡಿ ಎರಡು ದಿನವಾದ್ರು ಸನ್ನಿವೇಶಗಳು, ಪಾತ್ರಗಳು ಕಾಡುತ್ತಲೇ ಇವೆ. ನಾನಿಲ್ಲಿ ಇಡೀ ಚಿತ್ರದ ಚಿತ್ರವನ್ನು ಯಥಾವತ್ತಾಗಿ ಹೇಳುವುದಿಲ್ಲ. ನೀವು ನೋಡಿ ಅನುಭವಿಸಿದಾಗ್ಲೇ
ಅದರ ನಿಜವಾದ ದರ್ಶನ ನಿಮಗಾಗುವುದು.

ಒಂದು ಸಣ್ಣ ಹೊಡೆದಾಟ , ಬಡಿದಾಟದ ಸುದ್ದಿ ಸಿಕ್ಕರೂ ಬಗೆಬಗೆಯಲ್ಲಿ ಬಿತ್ತರಿಸುವ ಮಾಧ್ಯಮಗಳು ಅದ್ರಲ್ಲೂ ಸುದ್ದಿ ವಾಹಿನಿಗಳು ಗಲ್ಲು ಶಿಕ್ಷೆಗೆ ಗುರಿಯಾದ ಖೈದಿಯೊಬ್ಬ ಜೈಲಿನಿಂದ ಪರಾರಿಯಾದ ಸುದ್ದಿ ಸಿಕ್ಕ್ರೆ ಬಿಟ್ಟಾರೆಯೇ. ಯಾರ್ಯಾರ್ ಬಾಯಿಗೆ ಎಲ್ಲೆಲ್ಲಿ ಮೈಕ್ ಹಿಡೀತಾರೆ ಅನ್ನುವುದನ್ನ ತೆರೆ ಮೇಲೆ ಮಾಧ್ಯಮ ಮಿತ್ರರೇ ನೋಡಿದ್ರೂ ತಮ್ಮ ಕೆಲ್ಸಕ್ಕೆ ತಾವೇ ನಕ್ಕು ಬಿಡುವಂತೆ ದೃಶ್ಯ, ಹಾಡು(ನ್ಯೂಸ್ ನೋಡಿ..ನ್ಯೂಸ್ ನೋಡಿ..) ಕಟ್ಟಿರುವ ನಿರ್ದೇಶಕನ ಜಾಣ್ಮೆ ಮೆಚ್ಚಲೇ ಬೇಕು.

ಗಲ್ಲು ಶಿಕ್ಷೆಗೆ ಗುರಿಯಾದ ಸ್ಯಾಂಡಲ್ ರಾಜ ಜೀವದಾಸೆಯಿಂದ ಜೈಲಿನಿಂದ ಹಾರಿ ತಲೆಮರೆಸಿಕೊಳ್ಳಲು ತಿಣುಕಾಡುತ್ತಾನೆ. ಗೊತ್ತು ಗುರಿಯಿಲ್ಲದ ಪಯಣದಲ್ಲಿ ಟ್ರಕ್ ನಿಂದ ಜೀಪಿಗೆ ಸೇರುವ ತನಕ ಬಸ್ಸಿನಲ್ಲಿ ಕೂತಾಗ ಸರಿದು ಹೋಗುವ ದೃಶ್ಯಗಳಂತೆ ಸರಸರನೆ ಚಿತ್ರ ಸರಿದು ಹೋಗುತ್ತದೆ. ಅಲ್ಲಲ್ಲಿ ನಗ್ತಾ , ಇದೇನಿದು ಇವ್ನ್ ಕಥೆ ಅಂತ ಅವನ ಪಯಣದಲ್ಲಿ ನಾವೂ ಜೊತೆಯಾಗ್ತಾ ಅರ್ಧ ಸಿನಿಮಾ ನೋಡೇಬಿಟ್ಟಿರ್ತೀವಿ.

ಮಧ್ಯಂತರ ಮುಗಿದ ಮೇಲೆ ಪ್ರತೀ ಸಣ್ಣ ಸಣ್ಣ ದೃಶ್ಯಗಳು ನಮ್ಮನ್ನು ಕಲವುದಿಕ್ಕೆ ಶುರುವಿಟ್ಟು ಕೊಳ್ಳುತ್ತವೆ. ಚಿತ್ರ ಕಳೆಗಟ್ಟುತ್ತಾ ಕ್ಷಣಕ್ಷಣಕ್ಕೂ ಆವರಿಸಿಕೊಳ್ಳುತ್ತಾ ಹೋಗುತ್ತದೆ. ಎಲ್ಲಿಗೇ ಪಯಣ ಯಾವುದೋ ದಾರಿ ಅನ್ನುವಂತೆ ಅಲೆಯುವ ಕೈದಿಗೆ ಯಾರನ್ನೂ ನಂಬಲಾಗದ ಸ್ಥಿತಿ, ತಪ್ಪಿಸಿಕೊಂಡ ಸುದ್ದಿ ಹರಡಿ, ತನ್ನ ತಲೆಗೆ ಹತ್ತು ಲಕ್ಷ ಕಟ್ಟಿರುವಾಗ ಕಂಡವರು ಬಿಟ್ಟಾರೆಯೇ ಅನ್ನುವ ಮಡುಗಟ್ಟಿದ ಆತಂಕ, ಅನುಮಾನಗಳನ್ನ ಅಭಿವ್ಯಕ್ತಿಸುವ ಕಲೆಯಲ್ಲಿ ನಟರಾಜ್ ಅವರ ಅಭಿನಯಕ್ಕೆ ನೀವು ಮಣಿಯದೆ ವಿಧಿಯಿಲ್ಲ.

ಗಲ್ಲು ಶಿಕ್ಷೆಯ ನಿರ್ವಾಹಕ ರಾಮಣ್ಣನಿಗೆ ತನ್ನ ಜೀಪಿನಲ್ಲಿ ಪಕ್ಕದಲ್ಲಿ ಕುಳಿತಿರುವಾತ ಜೈಲಿನಿಂದ ಹಾರಿ ಬಂದ ಹಕ್ಕಿ ಅನ್ನುವುದು ತಿಳಿದಾಗ ಅದನ್ನು ಸೂಕ್ಷ್ಮವಾಗಿ ನಿಭಾಯಿಸುವ ರೀತಿ , ಸಣ್ಣ ಸಣ್ಣ ಹಾವಭಾವಗಳು ಈತ ನಿರ್ದೇಶಕನ ನಟ ಅನ್ನಿಸಿಡುತ್ತದೆ. ಪಾತ್ರ ಕಟ್ಟುವ ಸತ್ಯ ಪ್ರಕಾಶ್ ಸೂಕ್ಷ್ಮತೆ ಇಲ್ಲಿ ಎದ್ದು ಕಾಣುತ್ತದೆ.

ಪ್ರೀತಿಸಿದ ಹುಡುಗಿ ಸುಬ್ಬಿಯೊಂದಿಗೆ ಎಲ್ಲರನ್ನು ಎದುರು ಹಾಕಿಕೊಂಡು ಊರಿನಿಂದ ಓಡಿ ಬಂದು ಭಂಡತನದಿಂದ ರಾಮಣ್ಣನ ಜೀಪಿನಲ್ಲಿ ತೂರಿಕೊಳ್ಳುವ ಧರ್ಮನ ಉಡಾಫೆ, ಸ್ವಾರ್ಥದ ಪಾತ್ರದಲ್ಲಿ ಧರ್ಮ ಕಡೂರರ ಸಹಜ ಅಭಿನಯ ಇಷ್ಟವಾಗುತ್ತದೆ. ಅಪ್ಪನ ಹಣ ಕದ್ದು ನಿಯತ್ತಾಗಿ ಪತ್ರ ಬರೆದಿಟ್ಟು ,ಹರೆಯದ ಹುಮ್ಮಸ್ಸಿನಲ್ಲಿ ಪ್ರೀತಿಗೆ ಬೀಳುವ ಅಭಿನಯದಲ್ಲಿ ಬಿಂಬಶ್ರೀಯೂ ಇಷ್ಟವಾಗುತ್ತಾರೆ.

ಓಡಿ ಹೋದ ಜೋಡಿಯನ್ನ ಹಿಡಿಯಲು ಬೈಕಿನಲ್ಲಿ ಬಂದು ಬಾಟಲಿ ಕಂಡಾಕ್ಷಣ ಬಾಯ್ ಬಾಯ್ ಬಿಡುವ ನಟನೆಯಲ್ಲಿ ಮಠ ಮನಸ್ಸಿಗೆ ಇಳಿಯುತ್ತಾರೆ. ಪಾತ್ರ ಚಿಕ್ಕದಾದ್ರು ಚೊಕ್ಕತನವಿದೆ.

ಇಡೀ ಕಥೆ, ಸಿನಿಮಾ ಹರಳುಗಟ್ಟುವ ಹಂತವೆಂದರೆ ದಾರಿಯಲ್ಲಿ ಆಟೋ ಕೆಟ್ಟು ಹೆರಿಗೆ ನೋವಿನಿಂದ ನರಳುತ್ತಿರುವ ತನ್ನ ಕೂಸಿನ ಜೀವ ಉಳಿಸಿ.. ಎಂದು ಅಂಗಾಲಾಚಿ ಬರುವ ಸೈನಿಕನ ಅತ್ತೆಯ ಪ್ರವೇಶ. ಅಷ್ಟೊತ್ತಿಗಾಗಲೇ ರಾಮಣ್ಣ ಹಾಗು ಕೈದಿ ಒಬ್ಬರನ್ನೊಬ್ಬರು ಬಡಿದುಕೊಂಡು ಹೈರಾಣಾಗಿದ್ದವರು ಈ ತಾಯಿಯ ಗೋಗರೆತಕ್ಕೆ ಕರಗಿ ಕೈಕೈ ಸೇರಿಸಿ ಗರ್ಭಿಣಿಯನ್ನ ಹೊತ್ತು ತಂದು ಜೀಪಿನಲ್ಲಿ ಕೂರಿಸುತ್ತಾರೆ. ಹೆರಿಗೆಯೂ ಜೀಪಿನಲ್ಲೇ ಜರುಗುತ್ತದೆ. ಒಂದು ಹುಟ್ಟು ಮತ್ತೊಂದರ ನಾಶಕ್ಕೆ ನಾಂದಿ ಹಾಡುವಂತೆ ಕಾಠಿಣ್ಯ, ಕ್ರೌರ್ಯ ವ ಕರಗಿಸಿ ಮನುಷ್ಯತ್ವದ ಸೆಲೆ ಉಕ್ಕುವುದು ಇಲ್ಲೇ.

ಜೀವ ಉಳಿಸಿದ ಜೀವಗಳಿಗೆ ಕೈತುತ್ತು ಇಟ್ಟು ಮನಕಲಕುವ ಮಾತನಾಡುವ ಸೈನಿಕನ ತಾಯಿಯ ತಾಯ್ತನ ಮುನಿದ ಮನಸುಗಳನ್ನು ಬೆಸೆಯುತ್ತದೆ. ಮಗುವನ್ನು ವರ್ಣಿಸುವಾಗ ”ಕೋಪವಿಲ್ಲ , ದ್ವೇಷವಿಲ್ಲ ಗಾಂಧೀ ತಾತನ ಹಾಗಿದ್ದಾನೆ” ಅಂದುಬಿಡುತ್ತಾಳಲ್ಲ ಅಜ್ಜಿ ಅದು ಒಂದು ಕ್ಷಣ ಅವಾಕ್ಕಾಗಿಸುತ್ತದೆ. ಎರಡೇ ಪದಗಳಲ್ಲಿ ಗಾಂಧಿಯವರನ್ನ ತೋರಿದ ಸಂಭಾಷಣಾಕಾರನಿಗೆ ಶಬ್ಬಾಸ್ !!

ಅಜ್ಜಿ ಅಡುಗೆ ಮಾಡುತ್ತಾ , ತುತ್ತಿಡುತ್ತಾ ” ಈ ಮುನುಷ್ಯ ಭೂಮಿಯಿಂದ ಆಚೆ ಹೋಗೋದನ್ನ ಕಲಿತರೂ ಜಾತಿಯಿಂದ ಆಚೆ ಹೋಗೋದನ್ನ ಕಲೀಲಿಲ್ಲ ” ಅನ್ನುವುದು ಎಂಥಾ ಮಾತಲ್ಲವಾ !? ಮನುಷ್ಯತ್ವ ಮರೆತು ಜಾತಿಯ ಹೆಸರಲ್ಲಿ ಕಚ್ಚಾಡುವವರೆಲ್ಲ ಮುಟ್ಟಿ ನೋಡಿಕೊಳ್ಳಬೇಕು.

ನೇಣು ಬಿಗಿವವ , ಕುತ್ತಿಗೆ ಒಡ್ಡುವವ ಇಬ್ಬರೂ ಜೊತೆಯಾಗಿ ನೇಣಿಗೆ ಬಳಸುವ ಹಗ್ಗವನ್ನು ಕಂದನನ್ನ ತೂಗುವ ಜೋಲಿಗೆ ಕಟ್ಟುವಾಗ ಬರುವ ” ಬದುಕೇ ಬದುಕ ಕಲಿಸು ” ಹಾಡು ಸಮಂಜಸವಾಗಿದೆ. ಆಪ್ತವಾಗಿದೆ. ಇದು ಕಲ್ಲು ಕರಗುವ ಸಮಯ!!

ಮುಂದುವರೆದ ಕೈದಿ ಮತ್ತು ರಾಮಣ್ಣನ ಪಯಣದಲ್ಲಿ ಮತ್ತೆ ಮುಖಾಮುಖಿಯಾಗುವ ಟ್ರೆಕ್ ಡ್ರೈವರ್ “ಪಾಪ ಮಾಡೋದ್ರಲ್ಲೂ ಪುಣ್ಯವಿದೆ ” ಅಂದು ಹೊಟ್ಟೆಪಾಡಿಗಾಗಿ ವೇಷಧರಿಸುವ ಹಾಡುಗಾರರ ಪುಟ್ಟ ತಂಡವನ್ನು ಜೀಪಿಗೆ ಹತ್ತಿಸುತ್ತಾನೆ. ಅವರು ಹಾಡುವ ಭಗವತ್ಗೀತೆಯ ಕೃಷ್ಣ ಅರ್ಜುನ ಸಂಭಾಷಣೆಯಂಥಾ ಸಾಲುಗಳು “ಕೇಳು ಕೃಷ್ಣ .. (ಪಕ್ಕ ಹಳ್ಳಿಗರ ಶೈಲಿಯ ) ಇವರಿಬ್ಬರ ಮನಸ್ಸಿನ ತಳಮಳ, ತೊಯ್ದಾಟ, ಪ್ರಶ್ನೆ, ಉತ್ತರಗಳಿಗೆ ಕನ್ನಡಿಯಂತಿವೆ.

ಇಲ್ಲಿ ಬಹುತೇಕ ಎಲ್ಲವೂ ಆಕಸ್ಮಿಕಗಳ ಸರಣಿ . ಸಮಯ,ಸನ್ನಿವೇಶ , ಸಂದರ್ಭ ನಮ್ಮನ್ನ ಹೇಗೆಲ್ಲ ಆಡಿಸುತ್ತವೆ, ಅಲುಗಾಡಿಸುತ್ತವೆ ,ಅರಳಿಸುತ್ತವೆ ಅನ್ನುವುದನ್ನ ನೋಡಬೇಕು ನೀವಿಲ್ಲಿ.
ಕನ್ನಡದಲ್ಲಿ ವಿಭಿನ್ನ ಪ್ರಯತ್ನ ರಾಮಾ ರಾಮಾ ರೇ .. ರಸ್ತೆಯಲ್ಲೇ ಬಹುಪಾಲು ಚಿತ್ರ ರೂಪಿಸಿದ ಸೂತ್ರದಾರ ಸತ್ಯಪ್ರಕಾಶ ಸಾಹಸ ಪ್ರಶಂಸೆಗೆ ಅರ್ಹ. ಸಂಗೀತ,ಹಾಡುಗಳಿಗೆ ಸತ್ಯಪ್ರಕಾಶ್ ವಾಸುಕಿ ವೈಭವ್ ,ಅನನ್ಯ ಭಟ್ ಎಲ್ಲರೂ ಪ್ರೀತಿಗೆ ಪಾತ್ರರು.

ಹಾಗಾದ್ರೆ ಈ ಸಿನಿಮಾದಲ್ಲಿ ದೋಷಗಳೇ ಇಲ್ಲವೇ ಪರ್ಫೆಕ್ಟ್ ಚಿತ್ರವೇ ಅಂದ್ರೆ ಖಂಡಿತಾ ಇದೆ. ಆದ್ರೆ ಎಣಿಸುವ ಕಾಲವಿದಲ್ಲ. ಹಣ ತೆತ್ತು ಬರುವ ಪ್ರೇಕ್ಷಕ ಮಹಾಪ್ರಭುವಿಗೆ ರಂಜನೆ ,ಬೋಧನೆ ಎರಡನ್ನೂ ಕೊಟ್ಟು ಇಗೋ ನಮ್ಮ ಶ್ರಮ ಬಸಿದಿದ್ದೇವೆ ಒಪ್ಪಿಸಿಕೊಳ್ಳಿ ಅನ್ನುವ ಶ್ರದ್ಧೆ, ಶ್ರಮ, ಪ್ರತಿಭೆಯ ಮುಂದೆ ಉಳಿದೆಲ್ಲವೂ ಪಕ್ಕಕ್ಕೆ ಸರಿಯುತ್ತವೆ.

ರಾಮಾ ರಾಮಾ ರೇ.. ನೀವು ನೋಡಿ ,ಗೆಲ್ಲಿಸಲೇಬೇಕಾದ ಚಿತ್ರ. ನೋಡ್ತಿರಲ್ಲ .

ಜಾಗ್ವಾರ್ ಝಲಕ್

ಕನ್ನಡದ ಬಹುಕೋಟಿ ಬಜೆಟ್ ನ ಅದ್ದೂರಿ ಸಿನಿಮಾ ಜಾಗ್ವಾರ್ ತೆರೆಯ ಮೇಲೆ ಝಗಮಗಿಸಿದೆ.
ನಿಖಿಲ್ ಮೊದಲ ಸಿನೆಮಾ ಆದರು ಆಕ್ಷನ್ ,ಡಾನ್ಸ್ ಚೆನ್ನಾಗಿ ಮೂಡಿ ಬಂದಿದೆ. ನಟನೆ ಒಂದೇ ಸಿನೆಮಾಕ್ಕೆ ದಕ್ಕುವ ಕಲೆಯಲ್ಲ. ಆಡ್ತಾ ಆಡ್ತಾ ರಾಗ ಅನ್ನೋ ಹಾಗೆ ಮಾಡ್ತಾ ಮಾಡ್ತಾ ಒಲಿಸಿಕೊಳ್ಳುವೆ ಅನ್ನುವ ಆಕಾಂಕ್ಷೆ ಎದ್ದು ಕಾಣುತ್ತೆ. ರಾಜಣ್ಣನವರ ಬೇಡರ ಕಣ್ಣಪ್ಪ ಸಿನಿಮಾಗೂ ಭಕ್ತಪ್ರಹ್ಲಾದ ಚಿತ್ರದ ಅಭಿನಯಕ್ಕೂ ಅಜಗಜಂತಾರ ವ್ಯತ್ಯಾಸವಿದೆಯಲ್ಲ ಹಾಗೆ.

ನಿಖಿಲ್ ಲುಕ್ ,ಸ್ಟೈಲ್, ಕಾಸ್ಟ್ಯೂಮ್ ಎಲ್ಲದ್ದರಲ್ಲೂ ಎಕ್ಸ್ಪರ್ಟ್ ಗಳ ಕೆಲಸ ಜೋರಾಗಿದೆ.
ನಿಜಕ್ಕೂ ನೋಡುಗರಿಗೆ ಮಸ್ತ್ ಮಜಾ ಕೊಡ್ತಾ ಥ್ರಿಲ್ ಹುಟ್ಟಿಸುವ ಕ್ಯಾಮೆರಾ ವರ್ಕ್ಗೆ ಮನೋಜ್ ಪರಮಹಂಸಗೆ
ಒಂದು ಸೆಲ್ಯೂಟ್ ಹೇಳಲೇಬೇಕು.
ವಿದ್ಯಾರ್ಥಿ ನಾಯಕ ಆರ್ಯ ಅಭಿನಯ ಚೆನ್ನಾಗಿದೆ. ಹುಡುಗನಿಗೆ ಇನ್ನು ಒಳ್ಳೆ ಅವಕಾಶಗಳು ಸಿಗಲಿ.
ಇನ್ನು ಕಥೆ ಟಿವಿ ನ್ಯೂಸ್ ಚಾನೆಲ್ ಗಳು, ಆಸ್ಪತ್ರೆಗಳ ಮುಖಕ್ಕೆ ಕನ್ನಡಿ ಹಿಡಿದ ಹಾಗಿದೆ. ವ್ಯಾಪಾರೀ ಮನೋಭಾವದ ಚಾನೆಲ್ಗಳು ಜನರನ್ನ ಹೇಗೆ ಮುರ್ಖರನ್ನಾಗಿಸುತ್ತಿವೆ ಅನ್ನೋದನ್ನ ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ. “ಸುಳ್ಳನ್ನೇ ಹತ್ತಾರು ಬಾರಿ ಹೇಳ್ತಾನೆ ಇದ್ರೆ ಜನ ಅದನ್ನೇ ಸತ್ಯ ಅಂತ ನಂಬಿಬಿಡ್ತಾರೆ ” ಸಿನಿಮಾ ಗಿಂತ ಚೆನ್ನಾಗಿ ಒಳ್ಳೆ ಮ್ಯೂಸಿಕ್” ,”visulas ಹಾಕಿ ತೋರ್ಸಿ ಜನರನ್ನ ಯಾಮಾರಿಸೋದು ಸುಲಭ”, “ಮಾಸ್ ಮೆಮೊರಿ ಈಸ್ ವೆರಿ ಶಾರ್ಟ್ ” ಜನ ಬೇಗ ಮರಿತಾರೆ ಮುಂದಿನ ಸುದ್ದಿ ನೋಡಿ “, ಕ್ರೈಂ ವಿಜೃಂಭಣೆ ಇಂಥವೆಲ್ಲ ನೋಡ್ತಾ ಜನ ಮುಗಿಬಿದ್ದು ಚಪ್ಪಾಳೆ ಹೊಡಿತಾ ನೋಡೋದಂತು ಸುಳ್ಳಲ್ಲ .
ಆಸ್ಪತ್ರೆಗಳು ಅಮಾಯಕರನ್ನ ಸುಲಿಯುವ, ಬಂದಷ್ಟು ಬರಲಿ ಎನ್ನುವ ಬಾಕತನದಿಂದ ಬಡವ ,ಬಲ್ಲಿದರನ್ನು ಬಲೆಗೆ ಬೀಳಿಸಿಕೊಳ್ಳುವ ನೈಜ ಸಂಗತಿಗಳು ಇಲ್ಲಿ ಬಯಲಾಗಿವೆ.
ರಾಜಕಾರಿಣಿಗಳು ,ಅವ್ರ ಪುತ್ರರ ರು ಹಣಬಲದಿಂದ ಹೇಗೆಲ್ಲ ವ್ಯವಸ್ಥೆಯನ್ನ ತಮ್ಮ ಕೈಗೊಂಬೆ ಮಾಡಿಕೊಳ್ಳುತ್ತಾರೆ ಅನ್ನುವುದು ಎಂಥವರಿಗೂ ಅರ್ಥವಾಗುವಷ್ಟು ಸರಳವಾಗಿ ತೆರೆಗೆ ಬಂದಿದೆ.
ರಮ್ಯಾ ಕೃಷ್ಣ ಅಮ್ಮನ ಪಾತ್ರದಲ್ಲಿ ಎಂದಿನಂತೆ ತಮ್ಮ ಅಭಿನಯ ಚಾತುರ್ಯ ಮೆರೆದಿದ್ದಾರೆ.

ಒಟ್ಟಿನಲ್ಲಿ ಜಾಗ್ವಾರ್ ಕೊಟ್ಟ ದುಡ್ಡಿಗೆ ಮೋಸ ಮಾಡದ ಒಳ್ಳೆ ಸಿನಿಮಾ .ತಾಂತ್ರಿಕವಾಗಿ ಬಾಲಿವುಡ್ ಸಿನಿಮಾ ನೋಡಿದ ಅನುಭವ ನಿಮ್ಮದಾಗೋದಂತೂ ಗ್ಯಾರಂಟಿ. ನಿರ್ದೇಶಕ ಮಹಾದೇವ ಕೈಗೆ ಚಿತ್ರದ ಜವಾಬ್ದಾರಿ ಕೊಟ್ಟಿದ್ದು ಸಾರ್ಥಕ ಅನ್ನೋವಷ್ಟು ಸಕ್ಕತ್ತಾಗಿದೆ . ಹೋಗಿ ಜುಮ್ ಜುಮ್ ಅಂತ ಜಾಗ್ವಾರ್ ನೋಡ್ಕೊಂಡ್ ಬನ್ನಿ.
-ಬಿ ಸಿ ಭಾನುಮತಿ

ಹಿಂಗಿದ್ದಾನಪ್ಪ ನಮ್ “ರಾಜಕುಮಾರ”

“ರಾಜಕುಮಾರ” ನ ಕಥೆ 

ಸಿರಿವಂತ ಅಪ್ಪ-ಅಮ್ಮನ ಪ್ರೀತಿಯಲ್ಲಿ ಬೆಳೆದ ಅನಾಥನೊಬ್ಬ ಎಲ್ಲರನ್ನೂ ಅಪಘಾತದಲ್ಲಿ ಕಳೆದುಕೊಳ್ಳುತ್ತಾನೆ. ಬುದ್ದಿವಂತ, ಹಣವಂತನಾಗಿದ್ದರೂ ತನ್ನವರಿಲ್ಲದ ದೂರದೇಶದಲ್ಲಿ ಇರಲಾಗದೆ ಮತ್ತೆ ತನ್ನನ್ನು ಸಾಕಿದ  ಮೂಲನೆಲೆಗೇ ಬಂದು ನಿಲ್ಲುತ್ತಾನೆ. ಮಕ್ಕಳ ಅನಾಥಾಲಯವಾಗಿದ್ದ ಕಸ್ತೂರಿ ನಿವಾಸ ಮಕ್ಕಳಿಂದ ಅಸಡ್ಡೆಗೆ ಒಳಗಾದ ವೃದ್ಧರ ನೆಲೆಯಾಗಿರುತ್ತದೆ. ಅಲ್ಲಿನವರ ಜೊತೆಗೆ ಒಡನಾಡುತ್ತಾ, ಅವರ ಕಷ್ಟಗಳಿಗೆ ಕಿವಿಯಾಗುತ್ತಾ ಮತ್ತೆ ಮಕ್ಕಳ ಮನೆಗೆ ಸೇರಿಸುವ ಕಾಯಕದಲ್ಲಿ ಗೆಲ್ಲುತ್ತಾನೆ ರಾಜಕುಮಾರ(ಸಿದ್ದಾರ್ಥ ).ಜೊತೆಗೆ ಅನ್ಯಾಯದ  ವಿರುದ್ಧ ಸಿಡಿದು ಭ್ರಷ್ಟ ಮನಸ್ಥಿತಿಯನ್ನು ಪರಿವರ್ತಿಸುವ ಆದರ್ಶ ಯುವಕನ ಕಥೆ ರಾಜಕುಮಾರ .

ನಿರ್ದೇಶನ:

ಕನ್ನಡಿಗರ ಮನಸ್ಸಿನಲ್ಲಿ ಚಿರಸ್ಥಾಯಿಯಾಗಿರುವ ಡಾ. ರಾಜ್ಕುಮಾರ್  ಅಭಿನಯದ ಕಸ್ತೂರಿ ನಿವಾಸದ ಎಳೆಯನ್ನು  ಎಳೆದು ತಂದು ಭಾವನಾತ್ಮಕವಾಗಿ ಜನರನ್ನು ಗೆಲ್ಲುವ  ಪ್ರಯತ್ನವಿದೆ. ಆದರೆ ಅಲ್ಲಿನ ಕಥೆಯ ಮೇಲಿನ ಹಿಡಿತವಾಗಲಿ, ಮಡುಗಟ್ಟುವ ದುಃಖದ ಸನ್ನಿವೇಶಗಳನ್ನು, ಪ್ರೇಮದ ಪರಿತಾಪವನ್ನು ತೋರಿಸುವಲ್ಲಿ ನಿರ್ದೇಶಕ ಸಂತೋಷ್ ಆನಂದ್ ರಾಮ್ ಪರಿಣಿತಿಯ ಬರ ಎದ್ದು ಕಾಣುತ್ತದೆ. ಚಿತ್ರದ ಮೊದಲಾರ್ಧದಲ್ಲಂತೂ  ಪುನೀತ್ -ರಂಗಾಯಣ ರಘು ಹೊರತಾಗಿ ಮತ್ಯಾರ ಅಭಿನಯವು ಮನಸ್ಸಿಗಿಳಿಯುವುದಿಲ್ಲ. ರಂಗಾಯಣ ರಘು ಪ್ರತಿಭೆ ಬಳಕೆಯಾಗಿರುವುದು ಅಷ್ಟರಲ್ಲೇ ಇದೆ. ತನ್ನನ್ನು ಕಣ್ರೆಪ್ಪೆಯಂತೆ ಸಲಹಿದ ಸಾಕು ತಂದೆ-ತಾಯಿ ಇಡೀ ಕುಟುಂಬ ಇಲ್ಲವಾದಾಗ ನಾಯಕನ ಮುಖದಲ್ಲಿ ನೋವಿನ ತೀವ್ರತೆ ಕಾಣದಿರುವುದಾದರೂ ಹೇಗೆ ? ಮುಖದಲ್ಲೇ ಮುಗ್ದತೆ ತುಂಬಿರುವ ಪುನೀತ್ ರಂತಹ ನಟರಿಂದ ದುಃಖದ ಸನ್ನಿವೇಶಕ್ಕೆ ತಕ್ಕ ಭಾವವನ್ನು ತೆಗೆಯುವುದರಲ್ಲಿ ಸಂತೋಷ್ ನಿಜಕ್ಕೂ ಸೋತಿದ್ದಾರೆ.  ಕಥೆಯ ಕಥೆಯು ಗೋವಿಂದ ಗೋವಿಂದ ..

ಎರಡನೆಯ ಭಾಗದಲ್ಲಿ ಕಥೆಯನ್ನ ಹಿಡಿತಕ್ಕೆ ತೆಗೆದುಕೊಳ್ಳುವ ಪ್ರಯತ್ನ ಕಾಣುವುದು ನಿಜ. ಅನಂತ್ ನಾಗ್ ರಂಥಹ  ಅತ್ಯದ್ಭುತ ಪ್ರತಿಭೆಗೆ ಇನ್ನಷ್ಟು ಅವಕಾಶ ಕಲ್ಪಿಸಿದ್ದರೆ,ಕಥೆ ಹೇಳುವ ಕಲೆಯಲ್ಲಿ ಗಟ್ಟಿತನವಿದ್ದಿದ್ದರೆ ರಾಜಕುಮಾರ ಮತ್ತಷ್ಟು ಸಹನೀಯ. ಇಲ್ಲಿ ಸಂತೋಷ್ ಕಥೆ ಹೇಳುವಲ್ಲಿ,ಸನ್ನಿವೇಶ ಕಟ್ಟುವಲ್ಲಿ ತೋರಿದ ಪ್ರತಿಭೆಗಿಂತ ಹೆಚ್ಚಾಗಿ ಚಿತ್ರಪ್ರೇಮಿಗಳ ಹೃದಯದಲ್ಲಿ ನೆಲೆನಿಂತಿರುವ ಅಣ್ಣಾವ್ರನ್ನ ಕೆಲವೊಮ್ಮೆ ನೇರವಾಗಿ ಮತ್ತೊಮ್ಮೆ ಸಂಭಾಷಣೆಯ ಮೂಲಕ ನೆನಪಿಸಿ ನೋಡುಗರನ್ನ ಭಾವನಾತ್ಮಕವಾಗಿ ಹಿಡಿದಿಟ್ಟುಕೊಳ್ಳುವ ಪ್ರಯತ್ನವೇ ಎದ್ದುಕಾಣುತ್ತದೆ. ಅಲ್ಲಲ್ಲಿ ನಗೆಯುಕ್ಕ್ಕಿಸುವಂಥ ಸಂಭಾಷಣೆ ,ಹಾಸ್ಯಸನ್ನಿವೇಶಗಳನ್ನೂ ಕಟ್ಟಿ ಪ್ರೇಕ್ಷಕರನ್ನು ರಂಜಿಸುವಲ್ಲಿ ಗೆದ್ದಿರುವುದಂತೂ ನಿಜ.

 ಪುನೀತ್ ಅಭಿನಯದ ಕಾಣದಂತೆ ಮಾಯವಾದನು , ನನ್ನ ಉಡುಪು ನಿನ್ನದು ಹಾಡಿನ ದೃಶ್ಯಗಳು ನೋಡಿದಷ್ಟೂ ಖುಷಿಕೊಡುವಂಥವೇ. ಅಂಥವುಗಳನ್ನ ಬಳಸಿಕೊಂಡೇ ಭಾವುಕ,ಮುಗ್ದ ಸಿನಿಮಾ ಪ್ರೇಮಿಗಳನ್ನು ಗೆಲ್ಲುವ ಯೋಜನೆ  ಶುದ್ಧ ಸತ್ಯ. ಆ ಯೋಚನೆ ಸಂತೋಷ್ ಗೆ ಫಲ ಕೊಡುವುದರಲ್ಲೇನು ಸಂಶಯವಿಲ್ಲ. ಯಾಕೆಂದರೆ  ಕನ್ನಡದ ಕಣ್ಮಣಿ ರಾಜಣ್ಣ ಕನ್ನಡಿಗರ ಮನದಲ್ಲಿ ಇವತ್ತಿಗೂ ಮರೆಯಾಗದಿರುವ ಮಾಣಿಕ್ಯ. ಬಿಗಿ ಎನಿಸದ ಕಥಾಹಂದರ ಮಧ್ಯೆಯೂ ಹೆತ್ತಮಕ್ಕಳ ಪ್ರೀತಿಯಿಲ್ಲದೆ ನಲುಗುವ ವೃದ್ಧ ಜೀವಗಳ ಬಗ್ಗೆ ಕನಿಕರ ಹುಟ್ಟುವ ದೃಶ್ಯಗಳನ್ನು ಹೆಣೆದಿರುವ ಸಂತೋಷ್ ಪ್ರಯತ್ನವನ್ನು ಮೆಚ್ಚಲೇಬೇಕು.

 ಅಭಿನಯ:

ಪುನೀತ್ ನಗುವೊಂದೇ ಸಾಕು ಅಭಿಮಾನಿ ದೇವರುಗಳನ್ನು ಮೆಚ್ಚಿಸಲು. ಅಲ್ಲಿ ಮುಗ್ದತೆ ಇದೆ ನಿಜ. ಬಾಲ್ಯದಿಂದಲೂ ತನ್ನ ಮುಗ್ದ,ಸಹಜ ಅಭಿನಯದಿಂದ ಆಪ್ತನೆನಿಸುವ ಪುನೀತ್ ಈ ಚಿತ್ರದ  ಒಂದು ಸನ್ನಿವೇಶದಲ್ಲಿ ಮಾತ್ರ (ಅಪಘಾತದಲ್ಲಿ  ತನ್ನವರನ್ನು ಕಳೆದುಕೊಂಡು ಮತ್ತೆ ಅನಾಥತೆ ಅನುಭವಿಸುವಾಗ) ಇನ್ನು ಅಭಿನಯ ಮಡುಗಟ್ಟಬೇಕಿತ್ತು ಎನ್ನುವಂಥ ಅಸಮಾಧಾನ ಹುಟ್ಟಿಸುತ್ತಾರೆ. ಅದರ ಹೊರತಾಗಿ ಯಾವ ಸನ್ನಿವೇಶದಲ್ಲೂ ಅಪ್ಪು ಆಪ್ತರಾಗದೆ ಉಳಿಯುವುದಿಲ್ಲ. ಪವರ್ ಸ್ಟಾರ್ ಎಂಬ ಬಿರುದಿಗೆ ಕುಂದಿಲ್ಲದಂತಹ ಅಭಿನಯ  ಪ್ರೇಕ್ಷಕರಿಗೆ ಹಬ್ಬವೆನಿಸುವಂತಿವೆ. ಡಾನ್ಸ್ ವಿಷ್ಯ ಬಂದ್ರೆ ಮೆಚ್ಚದೆ ವಿಧಿಯಿಲ್ಲ.

ನಾಯಕಿ ಪ್ರಿಯಾ ಆನಂದ್ ಒಳ್ಳೆಯ ನಟಿ. ಇಂಗ್ಲಿಷ್ -ವಿಂಗ್ಲೀಷ್ ಚಿತ್ರದಲ್ಲಿ ಸೊಗಸಾಗಿ ನಟಿಸಿದ ಅನುಭವಸ್ಥೆ. ಆದ್ರೆ ನಿರ್ದೇಶಕರ ಕೃಪೆ ಅವಕಾಶಕ್ಕೆ ಕೊಕ್ಕೆ ಬಿದ್ದಂತಾಗಿದೆ.

ಅನಂತ್ ನಾಗ್ ಪ್ರಕಾಶ್ ರೈ, ಅಚ್ಯುತ್ ಕುಮಾರ್ , ದತ್ತಣ್ಣ ,ಚಿಕ್ಕಣ್ಣ ,ಭಾರ್ಗವಿ ಎಲ್ಲರದ್ದೂ ಎಂದಿನಂತೆ ಅಭಿನಯದಲ್ಲಿ ಮೇಲುಗೈ . 

ನೃತ್ಯ ನಿರ್ದೇಶನದಲ್ಲಿ  ಹರ್ಷರಿಗೆ ಫುಲ್ ಮಾರ್ಕ್ಸ್ ಕೊಡಲೇಬೇಕು.

ಹರಿಕೃಷ್ಣ ಹಾಡುಗಳಿಗೆ ಕೊಟ್ಟ ಸಂಗೀತ ಚೆನ್ನವಿದೆ. ಚಿತ್ರದ ಮೊದಲಾರ್ಧದ ಸನ್ನಿವೇಶಗಳಿಗೆ ಹಿನ್ನೆಲೆ ಸಂಗೀತದಿಂದ  ಮತ್ತಷ್ಟು ಮೆರೆಗು ತುಂಬಬಹುದಿತ್ತು.

ಪುನೀತ್ ಗಿರುವ ಪ್ರತಿಭೆ ಬಳಸಿ ಚಿತ್ರವನ್ನು ಇನ್ನಷ್ಟು ಗಟ್ಟಿಯಾಗಿ ರೂಪಿಸಬಹುದಿತ್ತು ಅನ್ನಿಸುವುದು ನಿಜ. ಡಾ. ರಾಜ್ಕುಮಾರ್ ತಮ್ಮನ್ನೇ ಮತ್ತೆ ಮತ್ತೆ ಹೊಗಳಿಕೊಳ್ಳುವ ಬಿಲ್ಡ್ ಅಪ್ ಡೈಲಾಗ್ ಗಳಿಂದ ನಟಸಾರ್ವಭೌಮ ಅನ್ನಿಸಿದವರಲ್ಲ. ಅವರ ಚಿತ್ರಗಳಲ್ಲಿ ಗಟ್ಟಿಯಾದ ಕಥಾಹಂದರದಜೊತೆಗೆ ಪ್ರೇಕ್ಷಕರನ್ನು ರಂಜಿಸುತ್ತಲೇ ಸುಸಂಕೃತರಾಗಿಸುವ ಎಲ್ಲ ರೀತಿಯ ಹೂರಣವಿತ್ತು. ಅದಿಲ್ಲಿ ಸಾಧ್ಯವಾಗಿದ್ದರೆ ರಾಜಕುಮಾರ  ಪ್ರೇಕ್ಷಕರು ಎಂದೆಂದೂ  ಮರೆಯದ ಮುತ್ತಿನ ಮಣಿಯಾಗುತ್ತಿದುದರಲ್ಲಿ ಸಂಶಯವಿಲ್ಲ.

ಇಷ್ಟೆಲ್ಲಾ ಹೇಳಿದ ಮೇಲೆ ಹೇಳಲೇಬೇಕಾದ ಬಹುಮುಖ್ಯ ವಿಷಯವೆಂದರೆ ರಾಜಕುಮಾರನನ್ನ ತಪ್ಪದೆ ನೋಡಿ. ಕೊರತೆಗಳ ನಡುವೆಯೂ ನೋಡಿ ಖುಶಿಪಡಬಹುದಾದ ಸಿನಿಮಾವಿದು. ಇಲ್ಲಿ ರಂಜನೆ -ಬೋಧನೆ ಎಲ್ಲವೂ ಇದೆ. ಮನೆಮಂದಿಯಲ್ಲಾ ನೋಡಿ ಮತ್ತೆ ಅಣ್ಣಾವ್ರನ್ನ ಮನತುಂಬಿಕೊಳ್ಳಿ. 

ಎದೆಗಾರಿಕೆ ಇದ್ದವರಿಗೆ ಮಾತ್ರ ”ಮಮ್ಮಿ”

ದೆವ್ವ, ಭೂತಗಳ ಸಿನಿಮಾ ಮಾಡಿ ಗೆಲ್ಲುವುದು ಅಷ್ಟೇನೂ ಸುಲಭದ ಮಾತಲ್ಲ.  ನೆಚ್ಚಿನ ನಾಯಕ , ನಾಯಕಿಗೆ ಮುಂದೇನಾಗುವುದೋ ? ಯಾರಿಗೇನು ಕೇಡೋ ? ಎಂಬ ಆತಂಕದಿಂದ ಕ್ಷಣಕ್ಷಣಕ್ಕೂ ಕೈಕೈ ಹಿಸುಕುತ್ತಾ, ಉಗುರು ಕಚ್ಚುತ್ತಾ, ಬಿಟ್ಟ ಕಣ್ಣು ಬಿಟ್ಟ ಹಾಗೆ ನೋಡುವಂತೆ ಪ್ರೇಕ್ಷಕ ಪ್ರಭುವನ್ನ ಹಿಡಿದಿಡುವುದಕ್ಕೆ  ಸಕ್ಕತ್ ತಾಕತ್ತೇ ಬೇಕು. ಇಂಥದೊಂದು ಸಾಹಸಕ್ಕ್ಕೆ ಮೊದಲ ನಿರ್ದೇಶನದಲ್ಲೇ ಅಡಿ ಇಟ್ಟಿದ್ದಾರೆ ಲೋಹಿತ್ .

ನಿರ್ದೇಶನ

lohit 

ಮೊದಲ ಸಲ ಸಾಮಾನ್ಯವಾಗಿ ಆಗುವ “ಲಿಂಕ್ ಮಿಸ್ಸಿಂಗ್ ” ಸಮಸ್ಯೆ ಅಲ್ಲಲ್ಲಿ ಕಾಣುತ್ತದೆ. ಸಣ್ಣ ಸಣ್ಣ ದೋಷಗಳನ್ನು ಮರೆಸುವಂತ ಸಂಗೀತ, ಸೌಂಡ್ ಎಫೆಕ್ಟ್ , ಸಿನಿಮಾಟೋಗ್ರಫಿ ಸಿನಿಮಾದೊಳಗೆ ಸೆಳೆದುಕೊಳ್ಳುತ್ತದೆ. ಪಾತ್ರದಾರಿಗಳು ಹೆದರಿ ನಡುಗುವ ದೃಶ್ಯಗಳು ಬಂದಾಗ ಇತ್ತೀಚಿನ ನೋಡುಗರು ‘ಅಯ್ಯೋ ಹೆದರ್ಕೋಬೇಡ ಡೈರೆಕ್ಟರ್ ಅಲ್ಲೇ ಅವ್ರೆ’ ಅಂತ ಕೂಗ್ತಿದ್ರು ತಾವು ಕೂತ ಕುರ್ಚಿ ಬಿಗಿಯಾಗಿ ಹಿಡ್ಕೊಂಡು ನೋಡುವ ಸಿನಿಮಾವಿದು. ನೋಡುವವರ ಜಂಘಾಬಲ ನಡುಗಿಸುವಂತ ಸೌಂಡ್ನ ಬಳಕೆ ಬೊಂಬಾಟ್! ಕಡೆಕಡೆಯ ದೃಶ್ಯಗಳಂತು ಭಯದಿಂದ ಅವಡುಗಚ್ಚುವಂತೆ ಮಾಡುತ್ತವೆ. ಕಥೆ ಹೇಳುವಲ್ಲಿ ಮತ್ತಷ್ಟು ಪರಿಣಿತಿ ಸಾಧಿಸಿದ್ರೆ ಕನ್ನಡಕೊಬ್ಬ ಒಳ್ಳೆ ನಿರ್ದೇಶಕನಾಗಲಿದ್ದಾರೆ ಲೋಹಿತ್ . ಅಂತರ ಪಿಶಾಚಿಯಾಗಿ ಅಲೆಯುವ ಕುಮಾರಿಯ ಬಗೆಗೂ ಅನುಕಂಪ ಮೂಡಿಸಿದ ಮೇಲೆ ಅಲ್ಲಿಗೇ ನಿಲ್ಲಿಸಿದ್ದರೆ ಸಮಾಧಾನವಿರುತ್ತಿತ್ತೇನೋ . ಮತ್ತೆ ಮೈಗೇರಿಸಿದ್ದು ನೋಡಿದರೆ ಪಾರ್ಟ್ -೨ ತರುವ ಯೋಚನೆ ಕಾಣಿಸುತ್ತದೆ. ಅಥವಾ ಎಂಜಾಯ್ ದಿ ಫಿಯರ್ ಅಂತಾನೂ ಇರಬಹುದು.  ಮೊದಲ ಪ್ರಯತ್ನ ನಿಜಕ್ಕೂ ಚೆನ್ನವಿದೆ.

ಕಲಾವಿದರ ಕರಾಮತ್ತು !!

pri1

ಪ್ರಿಯಾಂಕಾ ಉಪೇಂದ್ರ

ಚೆಲುವಷ್ಟೇ  ಅಷ್ಟೇ ಅಲ್ಲ ಬುದ್ಧಿಮತ್ತೆ ಇರುವ ಪ್ರತಿಭಾವಂತ ನಟಿ. ಚಿತ್ರ ನಿರ್ಮಿಸುವ ಬಹುತೇಕ ಎಲ್ಲ ಹಂತಗಳನ್ನು ಬಲ್ಲ ಅನುಭವಿ. ಹೊಸದನ್ನು ಕಲಿಯುವ , ತೆರೆದುಕೊಳ್ಳುವ ಮನಸುಳ್ಳ ನಟಿ. ಇಲ್ಲಿ ಬಂದು ಕನ್ನಡ ಕಲಿತು ಎಲ್ಲರಲ್ಲಿ ಒಂದಾಗಿ ಬೆರೆತಿದ್ದೆ ಅದಕ್ಕೆ ಸಾಕ್ಷಿ. ‘ಮಮ್ಮಿ ಸೇವ್ ಮಿ’ ಚಿತ್ರದಲ್ಲೂ ಅವರ ಇಂಥಾ ಗುಣವೇ ಕಾಣುತ್ತದೆ. ಪ್ರೀತಿಸಿ ಮದುವೆಯಾದ ಗಂಡನನ್ನು ಕಳೆದುಕೊಂಡು ಹೊಟ್ಟೆಯಲ್ಲೊಂದು ಜೀವ ಹೊತ್ತು, ಕಣ್ಣೆದುರಿನಲ್ಲೇ ಇರುವ ಮತ್ತೊಂದು ಕೂಸನ್ನು ಕಾಪಾಡಿಕೊಳ್ಳಲು ಪರದಾಡುವ ಪಾತ್ರದಲ್ಲಿ ಸಹಜ ಅಭಿನಯದಿಂದ ಇಷ್ಟವಾಗುತ್ತಾರೆ. ಕೆಟ್ಟ ಕನಸು ಬಿದ್ದಾಗ ಪ್ರಿಯಾಂಕಾ ಅಭಿನಯ ನೋಡುತ್ತಿದ್ದರೆ ನಮಗೇ ಅಂಥಾ ಕೆಟ್ಟಾತಿ ಕೆಟ್ಟ ಕನಸು ಬಿದ್ದಹಾಗೆ ಅನ್ನಿಸಿ ಭಯ ಆವರಿಸಿಕೊಳ್ಳುತ್ತದೆ. ಮಗು ತಪ್ಪು ಮಾಡಿದೆ ಅನ್ನಿಸಿದಾಗ ಹೊಡೆಯಲಿಕ್ಕೂ ಸಂಕಟ ಪಡುವ, ಸಂತೈಸುವ ದೃಶ್ಯಗಳಲ್ಲಿ ಸ್ವಂತ ತಾಯಿಯಂತೆ ಕಂಡುಬಿಟ್ಟಿದ್ದಾರೆ. ತನ್ನ ಮಗುವಿಗಾಗಿ ಕುಮಾರಿ ಆತ್ಮದ ಬಳಿ ಕೇಳುವಾಗಿನ ಸನ್ನಿವೇಶದಲ್ಲಿ ಪ್ರಿಯಾಂಕಾ ಮನಕಲಕುತ್ತಾರೆ . ಒಟ್ಟಿನಲ್ಲಿ ಮಮ್ಮಿ ಸೇವ್ ಮಿ ಯಲ್ಲಿ ಪ್ರಿಯಾಂಕಾ ಅಭಿನಯ ಮನೋಜ್ಞವಾಗಿದೆ. 

yuvina

ಮುದ್ದು ಮರಿ ಯುವಿನ ಅಭಿನಯ ಮುದ್ದುಮಾಡುವಷ್ಟು ಇಷ್ಟವಾಗುತ್ತದೆ.

ವತ್ಸಲಾ ಮೋಹನ್

vatsala-mohan

ರಂಗಭೂಮಿ, ಕಿರುತೆರೆ, ಬೆಳ್ಳಿತೆರೆಯಲ್ಲಿ ಹಲವು ವರ್ಷಗಳಿಂದ ಅಭಿನಯಿಸಿದ ಕಲಾವಿದೆ . ಅವ್ರಿಗೂ ಇದು ಮೊದಲ ಹಾರರ್ ಸಿನಿಮಾ. ಪ್ರಿಯಾಂಕಾ ತಾಯಿಯ ಪಾತ್ರದಲ್ಲಿ ನಟಿಸಿರುವ ವತ್ಸಲಾ ನಮ್ಮನೆಯ ಅಮ್ಮನಷ್ಟೇ ಇಷ್ಟವಾಗುತ್ತಾರೆ. ದೆವ್ವದ ವಿಷಯ ಗೊತ್ತಾಗಿ ಮೊಮ್ಮಗಳನ್ನು ಹುಡುಕಲು ಮನೆಗೆ ಬಂದು ಕಾಟಕ್ಕೆ ಒಳಗಾಗುವ ದೃಶ್ಯದಲ್ಲಿ ಅದ್ಭುತವಾಗಿ ಅಭಿನಯಿಸಿದ್ದಾರೆ ವತ್ಸಲಾ ಮೋಹನ್ .

ಲವಲವಿಕೆಯಿಂದ ಓಡಾಡುವ, ಪಟಪಟನೆ ಮಾತನಾಡುವ , ಭಯದಿಂದ ನಡುಗುವ , ಅಕ್ಕನನ್ನು ಸಂತೈಸುವ ತಂಗಿಯ ಪಾತ್ರದಲ್ಲಿ ಐಶ್ವರ್ಯ ಶಿಂಧಗಿ ಇಷ್ಟವಾಗುತ್ತಾರೆ.

ಜಾನ್ ಪಾತ್ರದಾರಿ ಸಂದೀಪ್ 14 ಚಿತ್ರಗಳಲ್ಲಿ, ಅನೇಕ ಧಾರಾವಾಹಿಗಳಲ್ಲಿ ಅಭಿನಯಿಸಿರುವ ಅನುಭವಿ. ಮೊದಲ ದೃಶ್ಯದಲ್ಲೇ ಇದು ಪಳಗಿದ ಪ್ರತಿಭೆ ಅನ್ನಿಸುತ್ತಾರೆ.

ಫಾದರ್ ಪಾತ್ರದಲ್ಲಿ ಮಧುಸೂದನ್  ನಟನೆ ಎಲ್ಲರಿಗು ಇಷ್ಟವಾಗುವುದರಲ್ಲಿ ಎರಡು ಮಾತಿಲ್ಲ.

ಕ್ಯಾಮೆರಾ ಖದರ್ !!

venu-h-c

ವೇಣು ನಾದ ಕೇಳಿದಾಗ ಮನಸ್ಸಿಗೆ ಮುದವಾಗುವಂತೆ ವೇಣು ಅವರ ಸಿನಿಮಾಟೋಗ್ರಫಿ ಪ್ರಾರಂಭದಲ್ಲೇ ಆವರಿಸಿಕೊಳ್ಳುತ್ತದೆ.ಸಮುದ್ರದ ಅಲೆಗಳ ಮೇಲೆ ಟೈಟಲ್ ಕಾರ್ಡ್ ತೋರಿಸುವ ಫಸ್ಟ್ ಶಾಟ್ ಗೆ ಫಿದಾ !! ಕಾಲ ಸರಿಯುವುದನ್ನ ತೋರಿಸಲಿಕ್ಕೆ ಆಕಾಶ ,ಮೋಡಗಳ ಚಲನೆ ತೋರಿಸಿರುವುದು ಅದ್ಭುತ!! ಕುಮಾರಿ ಭೂತವನ್ನು ತೋರಿಸಿರುವ ರೀತಿ, ಕ್ಲೈಮಾಕ್ಸ್ ದೃಶ್ಯಗಳು ಇಂಟರ್ವೆಲ್ನಲ್ಲಿ ಸೂಸು ಮಾಡಿ ಬಂದಿದ್ದರೂ ಭಯದಿಂದ ಮತ್ತೆ ಓಡಿಸುತ್ತವೆ. ಹೆದರಿಕೆಯನ್ನೂ ಎಂಜಾಯಬಲ್ ಆಗಿಸಿದ್ದಾರೆ. ಇಡೀ ಸಿನಿಮಾ ಕಳೆಗಟ್ಟುವಲ್ಲಿ ವೇಣು ಕ್ಯಾಮೆರಾ ಚಾತುರ್ಯಕ್ಕೆ ಫುಲ್ ಮಾರ್ಕ್ಸ್ !!

ಅಜನೀಶ್ ಸಂಗೀತಕ್ಕೆ ಒಂದು ಸಲಾಂ !

ಪ್ರೀತಿ-ಪ್ರೇಮ,ವಿರಹ-ಕೋಪ-ದ್ವೇಷ -ಭಯ ಯಾವುದನ್ನೇ ಆಗಲಿ ತೀವ್ರವಾಗಿ ಅನುಭವಿಸಿದಾಗಲೇ ಅದರ ಸುಖ ಸಿಗೋದು ಅಲ್ವಾ ? ಅಲ್ಪ ಸ್ವಲ್ಪ ಲಾಜಿಕ್ ಪಕ್ಕಕ್ಕಿಟ್ಟು ಭಯದ ತೀವ್ರತೆ ಅನುಭವಿಸುವ ಎದೆಗಾರಿಕೆ ಇದ್ದವರು ನೋಡಬಹುದಾದ ಚಿತ್ರ “ಮಮ್ಮಿ ಸೇವ್ ಮಿ”. 

ಹ್ಯಾಪಿ ಗಡಗಡ !!ಢವ ಢವ !! 

 

‘ಕಬಾಲಿ’ ಹಿಟ್ಟಾ.. ತೋಪಾ .. ???

ಕಲೆ, ಮನೋರಂಜನೆ, ಮಾಧ್ಯಮ ಹೀಗೆ ಅನೇಕ ರೂಪಗಳನ್ನು ಪಡೆದ ಸಿನಿಮಾ, ಇಂದು ಅವೆಲ್ಲವನ್ನೊ ಮೀರಿ ಒಂದು ಮಹಾ ವ್ಯಾವಹಾರಿಕ ಉದ್ಯಮವಾಗಿ ಬೆಳೆದು ನಿಂತಿದೆ.ಹಾಗಾಗಿ ಚಿತ್ರನಿರ್ಮಾಪಕರು ಸಿನಿಮಾದ ಕಥೆಗೆ ತಲೆಕೆಡಿಸಿಕೊಳ್ಳಲು ಶುರು ಮಾಡಿದ ದಿನದಿಂದಲೇ ಅದರ  ಪ್ರಚಾರ ಕಾರ್ಯಕ್ಕೂ ನಿಲ್ಲುತ್ತಿದ್ದಾರೆ.

ಅಂದು ‘ಬಾಹುಬಲಿ’ ತನ್ನ ತಾಂತ್ರಿಕತೆಯಿಂದ ಭಾರತ ಚಿತ್ರರಂಗದ ಲೆಕ್ಕಾಚಾರಗಳನ್ನೆಲ್ಲಾ ಬುಡಮೇಲು ಮಾಡಿಬಿಟ್ಟರೆ, ಇಂದು ಬಂದ ‘ಕಬಾಲಿ’ ತಲೈವನ ಹೆಸರಿನಲ್ಲೇ ಬಿರುಗಾಳಿ ಎಬ್ಬಿಸಿ ಮರೆಯಾಯ್ತು.

‘ಕಬಾಲಿ’ ಬಂದ ಬಿರುಸಿನಲ್ಲಿ ಬಿಚ್ಚಿಟ್ಟು ಹೋದ ಪ್ರಶ್ನೆ ಹಾಗು ಗೊಂದಲಗಳು ಒಂದೆರಡಲ್ಲ.

ಒಂದು ಚಲನಚಿತ್ರವನ್ನು ಹೇಗೆ ಅಳಿಯಬೇಕೋ ಹಾಗೆ ಅಳಿಯಲು ತಿಳಿಯದ ತೀರದಲ್ಲಿ “ಕಬಾಲಿ” ನಿಂತಿದೆ. ಭಾರತ ಚಿತ್ರರಂಗದಲ್ಲೇ ಮೊದಲನೇ ಬಾರಿಗೆ ಇಷ್ಟೊಂದು ರೀತಿಯ  “mixed opinion”ಗಳನ್ನು ಚಿತ್ರ “ಕಬಾಲಿ” ಹುಟ್ಟುಹಾಕಿದೆ.

B Suresh, Film Maker

1ಬಿ. ಸುರೇಶ್

ಕಬಾಲಿ ಮಲೇಶಿಯಾದ ಭಾರತೀಯ ವಲಸಿಗರ ಬಗ್ಗೆ ಮಾಡಿರುವ ಅದ್ಬುತ ಚಿತ್ರ. ಸೂಪರ್ ಸ್ಟಾರ್ ಫಾರ್ಮುಲಾಗೆ ಜೋತು ಬೀಳದೆ ಚಿತ್ರವನ್ನು ರೂಪಿಸಿದ್ದಾರೆ. 70 ಕೋಟಿ ರೂಪಾಯಿಯಲ್ಲಿ ಅಚ್ಚುಕಟ್ಟಾಗಿ ನಿರ್ಮಾಣವಾದ ಈ ಚಿತ್ರದ ಪ್ರಚಾರಕ್ಕೆ ಖರ್ಚಾಗಿದ್ದು ಸುಮಾರು 50 ಕೋಟಿ. ಚಿತ್ರ ಗಳಿಸಿದ್ದು ಭರ್ಜರಿ 600 ಕೋಟಿ. ಇದು ಸಮಕಾಲೀನ ಅದ್ಭುತ ಯಶಸ್ಸಿನ ಚಿತ್ರ ಎಂದು ನಾನು ನಂಬುತ್ತೇನೆ.

Shreenidhi DS, Fiction Head, Udaya TV

2ಶ್ರೀನಿಧಿ ಡಿ.ಎಸ್.

‘ಕಬಾಲಿ’ ಹಂಚಿಕೆದಾರರಿಗೆ ಲಾಭ ತಂದುಕೊಟ್ಟಿರಬಹುದು! ಆದರೆ ನೋಡಿದೋರಿಗೆ ಖುಷಿ ಆಗಿದೆಯಾ?

ಆಮೇಲೆ- ಸಿನಿಮಾಕ್ಕೆ ನಿಜವಾದ ಖರ್ಚಾದ ದುಡ್ಡೆಷ್ಟು ಅನ್ನೋದು ಜನಸಾಮಾನ್ಯನಿಗೆ ಗೊತ್ತಾಗಲ್ಲ, ಆತನಿಗೆ ಇದೊಂದು ದೊಡ್ಡ ಚಿತ್ರ, ಕೋಟ್ಯಂತರ ರೂಪಾಯಿಗಳ ವೆಚ್ಚ ಆಗಿದೆ ಎಂದು ಬಿಂಬಿಸಿ – ಆ ಚಿತ್ರವನ್ನು ಮಿಸ್ ಮಾಡ್ಕೊಳೋದೇ ಅಪರಾಧ ಎಂಬಂತೆ ಬಿಂಬಿಸಿ, ಒತ್ತಾಯ ಪೂರ್ವಕವಾಗಿ ನೋಡೋ ಹಾಗೆ ಮಾಡಲಾಗತ್ತೆ. ಜನಕ್ಕೆ ಈ ಕ್ಷಣದ ಸಂಭ್ರಮ- ಯಶಸ್ಸು ಅಷ್ಟೇ ಬೇಕು. ಸುಮ್ಮನೆ ನೂರಾರು ಥಿಯೇಟರ್ ಗಳಲ್ಲಿ ರಿಲೀಸ್ ಮಾಡಿ, ಧೂಳೆಬ್ಬಿಸಿ-ಗೌಜಿ ಮಾಡಿ ಹೋ ಅಂತ ಅಬ್ಬರ…. ಆಮೇಲೆ ಹೇಳೋರು ಕೇಳೋರು ಇಲ್ಲ!

Aravind SD, Film Maker

3ಅರವಿಂದ್ ಎಸ್. ಡಿ.

ಕಬಾಲಿ ನಿಜಕ್ಕೂ path breaking cinema. ಆದರೆ ಅತಿಯಾಗಿ ಪ್ರಚಾರ ಹಾಗು ನಿರೀಕ್ಷೆಗಳನ್ನು ಹುಟ್ಟಿಸಿತ್ತು. ವ್ಯಯಕ್ತಿಕವಾಗಿ ನನಗೆ ಚಿತ್ರ ಇಷ್ಟವಾಯ್ತು. ರಜನಿ ಅಂಥಾ ಸೂಪರ್ ಸ್ಟಾರ್ ಪ್ರಭೆಯನ್ನು ಮರೆಮಾಡಿ ನಿಜವಾದ ನಟನನ್ನು ತೋರಿಸಿದ್ದಾರೆ. ಒಬ್ಬ ಖ್ಯಾತ ನಾಯಕನನ್ನು ದಲಿತ ನಾಯಕನನ್ನಾಗಿ ಹೆಣೆದಿರುವ  ಕಥೆ ಅದ್ಭುತ. ಇದು ಕೇವಲ ರಜನಿ ಚಿತ್ರವಾಗಿ ಉಳಿಯದೆ, ನೈಜವಾಗಿ ಚಿತ್ರ ಕಟ್ಟಿರುವುದು ಪ್ರಸಂಶನೀಯ.

Vanitha Sathish, Software professional

4 ವನಿತಾ ಸತೀಶ್

ಹೊಸತನ ಬರಿ ಲೊಕೇಶನ್   ಮತ್ತು ಕಥೆಯ ಎಳೆಯಲ್ಲಿದೆ. ಕೆಲವು ನಿರೂಪಣೆ; ಸತ್ತ ಹೆಂಡತಿ  ಎಲ್ಲ ಕಡೆ ಕಾಣಿಸಿ ಅವನನ್ನು ಕಾಡುವುದು ತುಂಬಾ ಸುಂದರವಾಗಿದೆ. ಚಿತ್ರ ಕಥೆ ಪ್ರೇಕ್ಷಕರನ್ನು ಹಿಡಿದು ಕೂರಿಸುವಷ್ಟು ಕಾತುರ ಮತ್ತು ಆಸಕ್ತಿ ಹುಟ್ಟಿಸುವಲ್ಲಿ ಸೋತಿದೆ. ಕಬಾಲಿ ಪಾತ್ರ ಕೂಡ ನಾಯಕನ ದಿಟ್ಟ ಗುಣ ಮತ್ತು ವ್ಯಕ್ತಿತ್ವ ಪ್ರೇಕ್ಷಕರ ಮನದಲ್ಲಿ ನೆಡುವಂಥ ಯಾವುದೇ ದೃಶ್ಯ ಕಟ್ಟಿ ಕೊಟ್ಟಿಲ್ಲ. ನಾವೆ ಪಟ್ಟು ಹಿಡಿದು ಚಿತ್ರದಲ್ಲಿ ಧನಾತ್ಮಕ ಅಂಶಗಳನ್ನು ಹುಡುಕಿದರೆ ಕೆಲವು ಮಾತ್ರ ಸಿಗುತ್ತವೆ. ಒಟ್ಟಾರೆ ಕೊಟ್ಟ ದುಡ್ಡಿಗೆ 80% paisa vasool ಕಾರಣ, ಹೊರ ದೇಶದ ಲೊಕೇಶನ್, ಹೊಸ ನಟ ನಟಿಯರು ಮತ್ತ ರಜನಿ ಸರ್.ಜನರ ಮನ ಮುಟ್ಟುವಲ್ಲಿ ಸಂಪೂರ್ಣವಾಗಿ ಸೋತಿದೆ.

ChandraShekar Shrivastav, Film director

5ಚಂದ್ರಶೇಖರ್ ಶ್ರೀವಾತ್ಸವ್

ರಜನಿಕಾಂತ್ ಸಿನಿಮಾದಲ್ಲಿ ಇದ್ದಮೇಲೆ ಮುಗೀತು, ಅಲ್ಲಿ ಒಪೀನಿಯನ್ ಗಳ ಅವಶ್ಯಕತೆನೇ ಇಲ್ಲ. ಆ ಸಿನಿಮಾ ಸೂಪರ್ ಹಿಟ್ಚೇ.

Vidya Rao, Writer

6ವಿದ್ಯಾ ರಾವ್

ನಾನು ಚಿತ್ರವನ್ನು ನೋಡಿಲ್ಲ.. ಆದರೂ, ಒಬ್ಬ ನಟನ ಪಾಪುಲಾರಿಟಿಯನ್ನೇ ಬಂಡವಾಳವಾಗಿ ಇಟ್ಟುಕೊಂಡು ಮೀಡಿಯಾ ಮೂಲಕ ಅತಿಯಾಗಿ ಪ್ರಚಾರ ಮಾಡಿ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಕರೆತರಲಾಗುತ್ತಿದೆ. ಆದರೆ ಒಂದು ಚಿತ್ರಕ್ಕೆ ಅದರ ಕಥೆ, ದೃಶ್ಯಿಕರಣ, ನಟರ ನಟನೆ ಮುಂತಾದವುಗಳೇ ಮೂಲ ಮಾನದಂಡವಾಗಿರಬೇಕು. ಬಿಡುಗಡೆಯ ಮುನ್ನವೇ ಈ ಚಿತ್ರಗಳು ಎಷ್ಟು ಸುದ್ದಿ ಮಾಡುತ್ತವೆ ಎಂದರೆ, ನೈಜ ಮನಸ್ಸಿನಿಂದ ಪ್ರೇಕ್ಷಕ ಚಿತ್ರವನ್ನು ನೋಡಲು ಆಗುವುದೇ ಇಲ್ಲ. ಒಬ್ಬನು ಸಾಧಾರಣವಾಗಿ ಚಿತ್ರವನ್ನು ನೋಡಿ ಅಭಿಪ್ರಾಯ ಹೇಳುವ ಮುನ್ನವೇ ಮೀಡಿಯಾದಲ್ಲಿ ಸೂಪರ್ ಹಿಟ್ ಎಂದು ಬಣ್ಣಿಸಿ ಆಗಿರುತ್ತದೆ. ಕಬಾಲಿ ಎಷ್ಟೇ ಹೈಪ್ ಸೃಷ್ಟಿಸಿದರೂ, ಚಿತ್ರಕಥೆಯ ಬಗ್ಗೆ ಹೆಚ್ಚು ಚರ್ಚೆ ನಡೆಯಲಿಲ್ಲ.

Srinidhi Srivatsa, Software professional

7ಶ್ರೀನಿಧಿ ಶ್ರೀವಾತ್ಸವ್

ಬಾಕ್ಸ್ ಆಫೀಸ್ ಅಬ್ಬರ ನೋಡಿದರೆ ಕಬಾಲಿ ಸೂಪರ್ ಹಿಟ್ , ಅನ್ನುದರಲ್ಲಿ ಸಂಶಯ ಇಲ್ಲ. ಕಥೆಯು ತುಂಬಾ ಪರಿಣಾಮಕಾರಿ ಆಗಿಲ್ಲದಿದ್ದರೂ, ಕೆಟ್ಟ ಕಥೆ ಎನ್ನುವಂತಿಲ್ಲ. ಇಂದಿನ ರಾಜಕೀಯ ಸಾಮಾಜಿಕ ಸ್ಥಿತಿಯನ್ನು ಗಮನದಲ್ಲಿ ಇಟ್ಟುಕೊಂಡು ಹೇಳುವುದಾದರೆ, ದಲಿತನಾಯಕ ಮೂಲಕ ಕಥೆ ಹೇಳಲು ಹೊರಟಿದ್ದು ಕಥಾವಸ್ತುವನ್ನು ಕೆಡಿಸಿದೆ ಎನಿಸುತ್ತದೆ.

Abhishek SN, Film Maker

8ಅಭಿಷೇಕ್ ಎಸ್ ಎನ್

ಹಣ ಗಳಿಕೆಯೇ ಮೇಲೆ ಯಶಸ್ಸನ್ನು ಅಳೆಯುವುದಾದರೆ, ಕಬಾಲಿ ಸಾಧನೆಯ ಅಂಕಿ ಅಂಶಗಳು ನಮ್ಮ ಮುಂದೆಯೇ ಇವೆ. ಆದರೆ ವ್ಯಕ್ತಿಗತವಾಗಿ ಈ ಚಿತ್ರ ಮಿಶ್ರ ಪ್ರತಿಕ್ರಿಯೆಗಳನ್ನು ಪಡೆದಿದೆ. ಒಟ್ಟಾರೆ, ಚಿತ್ರಕಥೆ ಇನ್ನಷ್ಟು ಜವಾಬ್ದಾರಿಯುತವಾಗಿ ಇರಬೇಕಾಗಿತ್ತು ಎಂದು ನನಗೆ ಅನಿಸುತ್ತದೆ. ಆಗ ಕಬಾಲಿಗೆ ಕಲಾತ್ಮಕ ಹಾಗು ಮನೋರಂಜಕ ಚಿತ್ರವಾಗಿಯೂ ಹೆಚ್ಚು ಮನ್ನಣೆ ಸಿಗುತ್ತಿತ್ತು.

 

 

Apoorva, Actress

9ಅಪೂರ್ವ

ರಜನಿ ವ್ಯಕ್ತಿತ್ವವೇ ಸೂಪರ್ ಸ್ಟಾರ್. ಹಾಗಾಗಿ ಕಬಾಲಿ ಕೂಡ ಸೂಪರ್ ಹಿಟ್. ನನಗೆ ಅನಿಸುವಂತೆ ಅವರ ಅಭಿಮಾನಿಗಳು ರಜನಿಗೊಸ್ಕರವೇ ಈ ಚಿತ್ರವನ್ನು ನೋಡುತ್ತಾರೆ. ಮಿಕ್ಕಿದ್ದೆಲ್ಲವೂ ಅವರಿಗೆ ಗೌಣ. ಸೂಪರ್ ರಜನಿ..

Ashok GK, Business consultant

10ಅಶೋಕ್ ಜಿಕೆ

ಕಬಾಲಿ ಚಿತ್ರದ ಬ್ರಾಂಡ್ ವ್ಯಾಲ್ಯೂ ಹಾಗು ಮಾರ್ಕೆಟಿಂಗ್ ಸ್ಟ್ರಾಟಜಿಯನ್ನು ಮೆಚ್ಚಲೇಬೇಕು. ಆದರೆ ಒಂದು ಒಳ್ಳೆಯ ಕಥೆ ಇಲ್ಲದೆ ಇರುವಾಗ ಯಶಸ್ಸು ಸಾಧ್ಯವೂ ಇಲ್ಲ. ಇಂದಿನ ಪ್ರೇಕ್ಷಕರು ಬಲು ಸೂಕ್ಷ್ಮ. ಕಬಾಲಿಗೆ ರಜನಿ ಎಂಬ ಸೂಪರ್ ಸ್ಟಾರ್ ನ ಬ್ರಾಂಡಿಂಗ್ ಇತ್ತು. ಆದರೂ ಇದು ರಜನಿ ಅಭಿಮಾನಿಗಳಿಗೆ ಮೀಸಲಾದ ಚಿತ್ರವಾಗಿ ಉಳಿಯಿತು. ನಾನೂ ಈ ಚಿತ್ರವನ್ನು ನೋಡಿದ್ದು ರಜನಿ ಅಭಿಮಾನಿಯಾಗಿಯೇ.

ನಿಜಕ್ಕೂ ನನಗೆ ನಿರಾಶೆ ಆಯ್ತು. ರಜನಿಯ ಹಳೆ ಚಿತ್ರಗಳಲ್ಲಿನ ವಿಶೇಷತೆ ಇದರಲ್ಲಿ ಕಾಣಲಿಲ್ಲ. ಸ್ಕ್ರಿಪ್ಟ್ ನಲ್ಲಿ ಏನು ಹಿಡಿತ ಇರಲಿಲ್ಲ ಎನಿಸಿತು.

Rashmi Kulakarni, Actress

11ರಶ್ಮಿ ಕುಲಕರ್ಣಿ

ಒಂದ್ಸಲಾ ಖಂಡಿತ ನೋಡ್ಬೇಕು ಯಾಕಂದ್ರೆ ಇದು ರಜನಿಕಾಂತ್ ಅವರ ಚಿತ್ರ. ದೊಡ್ಡ ಬಜೆಟ್ ನ ಸಿನಿಮಾ ಮತ್ತೆ ಅವರು ಈ ವಯಸ್ಸಲ್ಲೂ ಯುವನಟರ ಎನರ್ಜಿಯ ಮೇಲೆ ಸವಾಲ್ ಆಗೋ ರೀತಿಯಲ್ಲಿ ಅಭಿನಯಿಸಿದ್ದಾರೆ. ನೆರುಪ್ಪು ಡಾ ಹಾಡಿಗಾಗಿ ಕಾಯುತಿದ್ದೆ, ಆ ವಿಷಯದಲ್ಲಿ ಸ್ವಲ್ಪ ನಿರಾಸೆ ಆಯ್ತು.

 

ಹೇಳೋದು ಕಷ್ಟ  !

ಪ್ರತಿ ಕ್ಷೇತ್ರದಲ್ಲಿರುವ ಪ್ರತಿಯೊಬ್ಬರ ಅನಿಸಿಕೆ “ಕಬಾಲಿ” ವಿಷಯದಲ್ಲಿ ಬೇರೆ ಆಗಿದೆ. ಸೂಪರ್ ಸ್ಟಾರ್ ರಜನಿ ಸಾರ್ ಅವರ ಎಷ್ಟೋ ಸೂಪರ್ ಡೂಪರ್ ಸಿನಿಮಾಗಳ ಮುಂದೆ “ಕಬಾಲಿ” ಎಲ್ಲಿ ನಿಂತಿದೆ ಅನ್ನೋದು ಕಷ್ಟಕರ ಎಣಿಕೆಯಾಗಿದೆ.

ಕಡೆಯದಾಗಿ “ಕಬಾಲಿ” ಸಿನಿಮಾಗಾಗಿ ಜನ ಥಿಯೇಟರ್ ಮುಂದೆ ನೂಕುನುಗ್ಗಲು ಮಾಡುತ್ತಿದ್ದಾರೋ ಇಲ್ವೋ ಗೊತ್ತಿಲ್ಲ ಆದರೆ ರಜನಿ ಸಾರ್ ಅವರ ಸ್ಟೈಲ್ ಹಾಗು ಖದರ್ ನೋಡಲಂತೂ ಖಂಡಿತ ಮುಂದೆಯೂ ಜನ ಹಾತೊರೆಯುತಿರುತ್ತಾರೆ.

ಅಂದಹಾಗೆ ನೀವೇನಂತೀರಾ?

ಹೀಗಿದೆ ನೋಡಿ “ಇದೊಳ್ಳೆ ರಾಮಾಯಣ”

 

ತಾನು ಗಂಡು ,ಯಜಮಾನ ತನ್ನ ಮಾತೇ ಅಂತಿಮ ಅನ್ನುವ ಹಾಗೆ ಮೆರೆದ ನಾಯಕನಿಗೆ ಕತ್ತಲ ಕೋಣೆಯಲ್ಲಿ ಹೆಸರೇ ಗೊತ್ತಿಲ್ಲದ ಹೆಣ್ಣಿನ ಜೊತೆಗೆ ಕಳೆದ ಘಳಿಗೆಗಳು ಮನಸ್ಸನ್ನೇ ತೆರೆಸಿಬಿಡುತ್ತವೆ.   ಪ್ರಕಾಶ್ ರೈರಂಥ ಪ್ರಖರ ಪ್ರತಿಭೆಯ ಎದುರಿಗೆ  ಪಕ್ಕಾ ಪ್ರೊಫೆಷನಲ್  ಲೈಂಗಿಕ ಕಾರ್ಯಕರ್ತೆಯಾಗಿ ನಟಿಸುವುದು ಕಷ್ಟ ಕಷ್ಟ . ಆದ್ರೆ ಪ್ರಿಯಾಮಣಿ  ಸೇರಿಗೆ  ಸವ್ವಾ ಸೇರು ಅನ್ನುವಂತೆ ಸಹಜ ಅಭಿನಯದಿಂದ ಗೆದ್ದಿದ್ದಾರೆ.

ಮೊದಮೊದಲು ಗಯ್ಯಾಳಿಯ ಹಾಗೆ  ಗಂಟೆಗಿಷ್ಟು ಗಂಟು ಇಟ್ಟು ಮಾತಾಡು ಅನ್ನುವ ಆಕೆ ಭುಜಂಗಯ್ಯನ ಭಯ, ಒಂದಿಷ್ಟು ಒಳ್ಳೆಯ ನಡವಳಿಕೆಗಳನ್ನ ಗಮನಿಸುತ್ತಾ ಹೋದಂತೆ ಮಮತಾಮಯಿಯೇ ಆಗಿಬಿಡುತ್ತಾಳೆ . ಹೆಂಡತಿ, ಮಗಳನ್ನು  ಕಂಡಾಗ ಅವಳು ಕೇಳುವ ಪ್ರಶ್ನೆಗಳು ,ಕೊಟ್ಟ  ಸಲಹೆಗಳು  ಭುಜಂಗಯ್ಯನ ಅಹಮಿಕೆಯನ್ನೇ ಅಲ್ಲಾಡಿಸುತ್ತವೆ. ತಾನೂ  ಕರಗಿ ಆತನನ್ನೂ ಕರಗಿಸಿ ಮೈಯ್ಯ  ಹಂಗಿಲ್ಲದೆ ಮನಸ್ಸನ್ನು ಅರಳಿಸಿ ಹೊರಡುತ್ತಾಳೆ .

ಮಾತಿನ ಮಧ್ಯೆ  ಬರುವ  ಸಂದ  ಹಿನ್ನೆಲೆ ಸಂಗೀತ ಮೌನದಲ್ಲೇ ಮನವನ್ನ ಮಥಿಸುತ್ತದೆ. ಸಂಗೀತ ನಿರ್ದೇಶಕ ಸೂಕ್ಷ್ಮಜ್ಞನಾಗಿದ್ದಾಗ ಮಾತ್ರ ಇದು ಸಾಧ್ಯ .

ಸಾಮರ್ಥ್ಯ ಇದ್ದರೂ ಹೀರೋಗಳ ಹಿಂದೆ ಅಲೆಯುವ ನಿರ್ದೇಶಕನ ಪಾತ್ರದಲ್ಲಿ ಅಚ್ಯುತ ಎಂದಿನಂತೆ ತಮ್ಮ ಅಚ್ಚೊತ್ತಿದ್ದಾರೆ . ರಂಗಾಯಣ ರಘು ಇದ್ದಲ್ಲಿ ನಗು ಇರಲೇಬೇಕಲ್ಲ .

ಆಟೋ ಶಿವನ ಮುಗ್ದತೆ ,ಹುಂಬತನ ,ಸ್ವಾಮಿನಿಷ್ಠೆ ಮನಸೆಳೆಯುತ್ತವೆ. ನಿರ್ದೇಶನದ ಜೊತೆಗೆ ನಟನೆಯ ಪಾಠವನ್ನೂ ಶಿವನಿಗೆ ಕಲಿಸಿದ್ದಾರೆ ರೈ .

ಇಂಥಾದ್ದೊಂದು ಕಥೆಯನ್ನ ಕನ್ನಡದ ಪ್ರೇಕ್ಷಕ ಮಹಾಶಯರಿಗೆ ಕೊಡಲಿಕ್ಕೆ ಸೂಕ್ಷ್ಮ ಸಂವೇದನೆಯ ನಟ ,ನಿರ್ದೇಶಕರಿಂದ ಮಾತ್ರ ಸಾಧ್ಯ . ಪ್ರಕಾಶ್ ರೈ ಸಾಧಿಸಿ ತೋರಿಸಿದ್ದಾರೆ . ಅವ್ರ ದೇಹಭಾಷೆ ,ಧ್ವನಿಯ ಏರಿಳಿತ ಮೆಚ್ಚದೆ ಬೇರೆ ದಾರಿ ಇಲ್ಲ.

ಪೋಸ್ಟರ್ಗಳಲ್ಲಿ ಪ್ರಕಾಶ್ ರೈ ಪ್ರಮುಖವಾಗಿ ಕಂಡರೂ ಕಥೆಯ ಆಳಕ್ಕೆ ಹೋದಂತೆಲ್ಲಾ ಕಾಣುವುದು ಹೆಣ್ಣಿನ ಹೆಗ್ಗಳಿಕೆಯೇ .  ಭುಜಂಗಯ್ಯನ ಅಹಮ್ಮಿನ ಅಟ್ಟದಿಂದ ಇಳಿಸಿ ಮನುಷ್ಯನನ್ನಾಗಿಸುವವರು ಮೂವರು ಹೆಣ್ಣು ಮಕ್ಕಳೆ .

ಕನ್ನಡಕ್ಕೊಂದು ಕುಟುಂಬವೆಲ್ಲಾ ಕುಳಿತು ನೋಡುವಂಥಾ ಸದಭಿರುಚಿಯ ಚಿತ್ರ ‘ಇದೊಳ್ಳೆ ರಾಮಾಯಣ ” ಸಿಕ್ಕಿರುವುದು ಸುಳ್ಳಲ್ಲ .

 

ನಿಧಾನಿಸಿ ಯೋಚಿಸಿದಾಗ ಆಳಕ್ಕಿಳಿಯುವ “ಬ್ಯುಟಿಫುಲ್ ಮನಸ್ಸುಗಳು”

“ಕೇಳಿದ್ದೂ ಸುಳ್ಳಾಗಬಹುದು ನೋಡಿದ್ದೂ ಸುಳ್ಳಾಗಬಹುದು ನಿಧಾನಿಸಿ ಯೋಚಿಸಿದಾಗ ನಿಜವು  ತಿಳಿವುದು” ಈ ಸಾಲನ್ನ ಮತ್ತೆ ಮತ್ತೆ ನೆನಪಿಸುವ ಸಿನಿಮಾ  “ಬ್ಯುಟಿಫುಲ್ ಮನಸ್ಸುಗಳು”. ಕಥೆಯೇ ಇಲ್ಲಿ ಜೀವಾಳ. ೨೦೧೩ರರಲ್ಲಿ ನಡೆದ ಸತ್ಯ ಘಟನೆಯನ್ನ ಅಬ್ಬರವಿಲ್ಲದೆ, ಹೊಡಿಬಡಿಗಳ ಹಾರಾಟವಿಲ್ಲದೆ ನಿಧನಿಧಾನವಾಗಿ ಒಳ ಒಳ.. ಒಳ ಮನಸ್ಸಿಗೆ ಮುಟ್ಟಿಸುವ ಚಿತ್ರವಿದು.

beautiful cinema 3

ನಿರ್ದೇಶನ:

ಮೊದಲಾರ್ಧದಲ್ಲಿ ಮಾಮೂಲಿ ಪ್ರೇಮ ಕಥೆ ಥರ ಇದೆಯಲ್ಲ ಅನ್ನಿಸುವ ಹಾಗೆ ತೋರಿಸುತ್ತ ಮಧ್ಯೆ ಮಧ್ಯೆ ಮಾಧ್ಯಮಗಳ  (ನ್ಯೂಸ್ ಚಾನೆಲ್) ಕೆಲವು ಮಕ್ಕಿಕಾಮಕ್ಕಿ, ಪೆಕರುತನದ  ಜೊತೆಗೆ “ಬ್ಯುಟಿಫುಲ್ ಮನಸ್ಸುಗಳು”ಅನ್ನೋ ಒಂದೊಳ್ಳೆ ಕಾರ್ಯಕ್ರಮವನ್ನು ತೆರೆಯ ಮೇಲೆ ತಿರುಗಾಡಿಸುತ್ತ ಕುತೂಹಲವನ್ನು ಕಾದಿಟ್ಟುಕೊಳ್ಳುತ್ತಾರೆ ಜಯತೀರ್ಥ.

jayathirtha

ಕೇವಲ ಮೊದಲ ನೋಟದ ಆಕರ್ಷಣೆಯೇ ಪ್ರೀತಿ . ಅಥವಾ ಇಷ್ಟ ಆಗಿಬಿಟ್ರೆ ಸಾಕು ಅದೇ ಪ್ರೀತಿ ಅನ್ನೋ ಭ್ರಮೆಯಲ್ಲಿ ಉಡಾಫೆ ಬದುಕು ದೂಡೋದು ಅಲ್ಲ. ಪ್ರೀತಿ ಅಂದ್ರೆ ನಂಬಿಕೆ, ಜವಾಬ್ದಾರಿ, ಪರಸ್ಪರ ಗೌರವ, ತಾಳುವಿಕೆ ಅನ್ನುವುದನ್ನು ಸಮರ್ಥವಾಗಿ ಕಟ್ಟಿದ್ದಾರೆ. ಯಾರದೋ ಮನೆಯ ಜಗಳ, ಮತ್ಯಾರದೋ ಬದಿಯ ಬದುಕನ್ನು ಬೀದಿಗೆ ತಂದು ಹಿಂದು -ಮುಂದು ಯೋಚಿಸದೆ ಪರಿಣಾಮವನ್ನು ಲೆಕ್ಕಿಸದೆ ಮತ್ತೆ ಮತ್ತೆ ದೃಶ್ಯರೂಪದಲ್ಲಿ ಬಿತ್ತರಿಸಿ ಸಾಮಾಜಿಕ ಬದ್ಧತೆಯನ್ನು ಬದಿಗೊತ್ತುವ ಕೆಲ ವಾಹಿನಿಗಳ ಪೊಳ್ಳುತನ, ಭ್ರಷ್ಟತನವನ್ನ ತೆರೆಗೆಳೆದು ತಂದಿದ್ದಾರೆ ಜಯತೀರ್ಥ.

beautiful cinema 5

ಹೆಣ್ಣುಮಕ್ಕಳ ಮೇಲೆ ಆರೋಪಗಳು ಬಂದಾಗ ಅದರಲ್ಲೂ ವೇಶ್ಯಾವಾಟಿಕೆಯಂಥವು ಕೇಳಿದಾಗ ಸ್ವಲ್ಪವೂ ವಿವೇಚಿಸದೆ ರೋಚಕವಾಗಿ ಪದೇ ಪದೇ ತೋರಿಸುವ ಕೆಲ ಮಾಧ್ಯಮಗಳ ಬಗ್ಗೆ ಅಸಹ್ಯವುಟ್ಟಿದರೂ ಹೆಣ್ಣುಮಕ್ಕಳ ವಿಷಯದಲ್ಲಿ ಸಣ್ಣ ಸತ್ಯವಲ್ಲದ ಚಾಡಿ ಮಾತು ಕೇಳಿದಾಗಲೂ  ಬಾಯಿಂದ ಬಾಯಿಗೆ ಹರಿಯಬಿಟ್ಟು ಅವಳ ಬಾಳಿನ ಬಣ್ಣಗೆಡಿಸುವ ನಮ್ಮ ಜನರ ಮನಸ್ಥಿತಿಯ ಮುಖಕ್ಕೂ ಭೂತಗಾಜು ಬಿಟ್ಟು ನೋಡಿಕೊಳ್ಳಿ ನಿಮ್ಮ ಕೊಳಕು ಮನಃಸ್ಥಿಯನ್ನ ಎನ್ನುವಂತೆ ತೋರಿಸಿದ್ದಾರೆ. ರಕ್ಷಕ ಭಕ್ಷಕನಾದಾಗ ಅಮಾಯಕರ ಪಾಡು ಇಲ್ಲಿ ಕಣ್ಣಿಗೆ ಕಟ್ಟುತ್ತದೆ. ಭಂಡರನ್ನ ಸರಿದಾರಿಗೆ ತರಲು ಮಾತಿನ ಪೆಟ್ಟಿಗಿಂತ ಬ್ರಹ್ಮಾಸ್ತ್ರದ ಪ್ರಯೋಗವೇ ಬೇಕು ಅನ್ನುವುದನ್ನೂ ಯಶಸ್ವಿಯಾಗಿ ಕಟ್ಟಿದ್ದಾರೆ. ಕೊಲೆಗಡುಕನ ಮನಸ್ಸನ್ನೂ  ಬದಲಿಸಿ ಬ್ಯುಟಿಫುಲ್ ಮನಸ್ಸುಗಳಾಗಿಸಿದ್ದಾರೆ. 

ಅಭಿನಯ :

beautiful cinema 4

ನೀನಾಸಂ ಸತೀಶ್ ಚಿತ್ರದಲ್ಲಿ ನಟಿಸಿದ್ದಾರೆ ಅಂತನ್ನಿಸುವುದಿಲ್ಲ. ನಮ್ಮೆದುರೇ ನಡೆಯುತ್ತಿರುವ ಘಟನೆಯಂತೆ, ಪಕ್ಕದಲ್ಲೇ ಇರುವ ಪೊರಕಿಯಂತೆ, ತಪ್ಪಾದಾಗ ತಿದ್ದಿಕೊಂಡು ಬೆಳೆವ ಒಳ್ಳೆ ಹುಡುಗನಂತೆ, ಪ್ರೀತಿಸಿದ ಜೀವಕ್ಕಾಗಿ ಏನನ್ನು ಬೇಕಾದರೂ ಮಾಡಿಬಿಡುವ ಧೈರ್ಯಸ್ಥನಂತೆ ಸಹಜವಾಗಿ ಕಾಣುತ್ತಾರೆ. ನಟಿಸಿದರೂ  ನಟಿಸದಂತೆ ಕಾಣುವುದು ಕಷ್ಟದ ಕೆಲಸ. ಇಷ್ಟ ಪಟ್ಟು ಸೊಗಸಾಗಿ ಮಾಡಿದಂತಿದೆ ಸತೀಶ್ ಅಭಿನಯ.

beautiful cinema 1

ಶ್ರುತಿ ಹರಿಹರನ್ ಪಾತ್ರಕ್ಕೆ ಹೇಳಿಮಾಡಿಸಿದ ನಟಿ. ಆಕೆಯ ಮುಖದಲ್ಲಿ, ಮಾತಿನಲ್ಲಿ ಪ್ರೌಢಿಮೆ ಮಿಂಚುತ್ತದೆ. ಹುಟ್ಟಿದ ಮನೆಯ ನೊಗ ಹೊತ್ತು, ಪ್ರೀತಿಯ ಕರೆಗೆ ಓಗೊಟ್ಟು ಮತ್ತೆ ಅವಮಾನಿತೆಯಾಗುವ ಸನ್ನಿವೇಶಗಳಲ್ಲೂ ಶ್ರುತಿಯದ್ದು ಮೆಚ್ಚುವ ಅಭಿನಯ.

ಅಚ್ಯುತ ಎಂದ್ರೆ ಮೆಚ್ಚುತಾ…

beautiful_manasugalu1

ಭ್ರಷ್ಟ ಪೊಲೀಸ್ ಅಧಿಕಾರಿಯಾಗಿದ್ದವ ತನ್ನದೇ ಮಗಳ ಜೀವಕ್ಕೆ ಕುತ್ತು ಬಂದಾಗ ಸಾಮಾನ್ಯ ಅಪ್ಪನಾಗಿಬಿಡುವ, ಪಶ್ಚಾತಾಪ ಪಡುವ ಪಾತ್ರದಲ್ಲಿ ಅಚ್ಚುತ ಅಭಿನಯಕ್ಕೆ ಮೆಚ್ಚುಗೆಯಲ್ಲದೆ ಮತ್ತೇನು !

ತಬಲಾ ನಾಣಿ, ಪ್ರಶಾಂತ್ ಸಿದ್ದಿ .. ಹೀಗೆ ಎಲ್ಲರು ಎಲ್ಲೂ ಎಲ್ಲೆಮೀರದೆ ಸಹಜವಾಗಿ ನಟಿಸಿದ್ದಾರೆ.

ತಾಂತ್ರಿಕವಾಗಿ ಅದ್ದೂರಿತನವಿಲ್ಲದಿದ್ದರೂ ಎಲ್ಲ.. ಎಲ್ಲರೂ ನೋಡಲೇಬೇಕಾದ ನೋಡಿ ಅರಿಯಬೇಕಾದ  ಸಿನಿಮಾ “ಬ್ಯುಟಿಫುಲ್ ಮನಸ್ಸುಗಳು”

ಕೋಟಿಗೊಬ್ಬ-2 , ಕಿಚ್ಚ ಸುದೀಪ್ ಅಭಿಮಾನಿಗಳಿಗೆ ಫುಲ್ ಮೀಲ್ಸ್ !

kotigobba-2-movie-review

ಕೋಟಿಗೊಬ್ಬ-2 ಅಭಿಮಾನಿಗಳಿಗೊಸ್ಕರವೇ ಹೇಳಿ ಮಾಡಿಸಿದ ಸಿನಿಮಾದಂತಿದೆ.

ಸತ್ಯ ಮಿಥ್ಯಗಳ ನಡುವೆ ನಡೆಯುವ ಒಂದು ಕಥೆಗೆ ಕೆ ಎಸ್ ರವಿಕುಮಾರ್ ಎಂಬ ಖ್ಯಾತ ನಿರ್ದೇಶಕರು ರಚಿಸಿರುವ ಸ್ಕ್ರೀನ್ ಪ್ಲೇ ಸಿನಿಮಾಕ್ಕೊಂದು ವೇಗ ನೀಡಿದೆ. ಸುದೀಪ್ ಅವರ ವಿಭಿನ್ನ ಮ್ಯಾನರಿಸಂ, ಸ್ಟೈಲ್ ನೋಡುಗರಿಗೆ ಕಿಕ್ ಕೊಡುತ್ತದೆ. ಕೆ ಎಸ್ ರವಿಕುಮಾರ್ ಅವರ ಚಿತ್ರಗಳಲ್ಲಿ ನಾಯಕರು ಸ್ಟೈಲ್ ಆಗಿ ಮಿಂಚುತ್ತಾರೆ ಎನ್ನುವುದಕ್ಕೆ ಕೋಟಿಗೊಬ್ಬ -2 ಸಾಕ್ಷಿ.

ದೊಡ್ಡ ಉದ್ಯಮಿಗಳ ಕೋಟಿಗಟ್ಟಲೆ ಕಪ್ಪುಹಣ ದರೋಡೆ ಮಾಡುವ ಶಿವ (ಸುದೀಪ್) ನೋಟಿನ ವಾಸನೆ ಎಂದರೆ ವಿಶ್ವದ ಅದ್ಭುತ ಪರ್ಫ್ಯೂಮ್ ಎಂದು ನಂಬಿರುವವನು. ದರೋಡೆಗೊಳಗಾದ ಉದ್ದಿಮೆದಾರನ ಭಂಟ ಪೊಲೀಸ್ ಅಕಾರಿ ಕಿಶೋರ್ (ರವಿಶಂಕರ್). ಉದ್ದಿಮೆದಾರ ದೂರು ನೀಡದೆ ಇದ್ದರೂ ಸಿಕ್ಕ ವಿಡಿಯೋವೊಂದರ ಆಧಾರದ ಮೇರೆಗೆ ರಿಯಲ್ ಎಸ್ಟೇಟ್ ಉದ್ಯಮ ನಡೆಸುವ ಸತ್ಯನನ್ನ (ಸುದೀಪ್), ಕಿಶೋರ್ ಕರೆತಂದು ಲಾಕಪ್ ನಲ್ಲಿ ಥಳಿಸುತ್ತಾನೆ. ಆದರೆ ತನ್ನ ಅವಳಿ ಸಹೋದರ ಶಿವ ಕಾಣೆಯಾದುದರ ಬಗ್ಗೆ ಸತ್ಯ ಮೊದಲೇ ದೂರು ನೀಡಿರುತ್ತಾನೆ. ಈ ಪಾತ್ರದ ಮುಗ್ಧತೆಯನ್ನು ನಂಬಿದ ಕಿಶೋರ್ ಹಿರಿಯ ಅಧಿಕಾರಿ ಸತ್ಯನಿಗೆ ಆಟೋಗು ಹಣ ಕೊಟ್ಟು ಕಳುಹಿಸುತ್ತಾರೆ.

ಮತ್ತೊಂದು ದೃಶ್ಯದಲ್ಲಿ ಕಿಶೋರ್ ಅವರ ಪೊಲೀಸ್ ಠಾಣೆಯಿಂದಲೇ ಸುರಂಗ ಕೊರೆದು ಮತ್ತೊಬ್ಬ ಉದ್ದಿಮೆದಾರನ ಕಪ್ಪುಹಣದ ದರೋಡೆ ನಡೆಯುತ್ತಾನೆ ಶಿವ. ಸತ್ಯ ಮತ್ತು ಶಿವ ವಿಭಿನ್ನ ವ್ಯಕ್ತಿಗಳೇ ಅಥವಾ ಒಬ್ಬ ವ್ಯಕ್ತಿಯ ವಿಭಿನ್ನ ವ್ಯಕ್ತಿತ್ವಗಳೇ ಎಂಬ ದ್ವಂದ್ವದೊಂದಿಗೆ ಸಿನೆಮಾ ಕಡೆಯವರೆಗೂ ನಡೆಯುತ್ತದೆ. ಇದನ್ನು ಕಂಡು ಹಿಡಿಯಲು ಪೊಲೀಸ್ ಅಧಿಕಾರಿ ಕಿಶೋರ್ ಚಿತ್ರದ ಕಡೇ ದೃಶ್ಯದವರೆಗೂ ಕಷ್ಟಪಡುತ್ತಲೇ ಇರುತ್ತಾನೆ. ಈ ನಡುವೆ ಸೈಟ್ ಕೊಳ್ಳಲು ಸತ್ಯನ ಬಳಿ ಬರುವ ಶುಭಾ(ನಿತ್ಯಾ ಮೆನನ್) ನಿಧಾನವಾಗಿ ಸತ್ಯನೊಂದಿಗೆ ಪ್ರೀತಿಯಲ್ಲಿ ಬೀಳುತ್ತಾಳೆ. ಮುಂದೆ ಸತ್ಯ ಶಿವ ಬೇರೆ ಬೇರೆಯವರಾ, ಶುಭಾ ಸತ್ಯನನ್ನು ಮದುವೆ ಆಗುತ್ತಾಳಾ ಎಂಬುದೇ ಚಿತ್ರದ ಸಸ್ಪೆನ್ಸ್.

ತಮಿಳಿನಲ್ಲಿ ರಜನಿಕಾಂತ್, ಕಮಲಹಾಸನ್‌ನಂತಹ ಸೂಪರ್ ಸ್ಟಾರ್‌ಗಳನ್ನು ನಿರ್ದೇಶಿಸಿ ಅವರಿಗೆ ಸೂಪರ್ ಹಿಟ್ ಕೊಟ್ಟಿದ್ದ ಕೆ ಎಸ್ ರವಿಕುಮಾರ್ ಸುದೀಪ್ ಅವರ ಮ್ಯಾನರಿಸಂನ್ನು ಕಥೆಯಲ್ಲಿ ಎನ್‌ಕ್ಯಾಶ್ ಮಾಡಿಕೊಂಡಿದ್ದಾರೆ. ಮನರಂಜನೆ-ಚಮತ್ಕಾರದ ಕಮರ್ಶಿಯಲ್ ಚಿತ್ರಗಳ ಫಾರ್ಮುಲಾ ಎಕ್ಸ್ಪರ್ಟ್ ನಿರ್ದೇಶಕ ರವಿಕುಮಾರ್ ಭರ್ಜರಿಯಾಗಿ ಕನ್ನಡಕ್ಕೆ ಎಂಟ್ರಿ ಕೊಟ್ಟಿದ್ದಾರೆ.

ತೆರೆಯ ಮೇಲೆ ನಿತ್ಯಾ ಮೆನನ್ ನೋಡುವುದೇ ಆನಂದ.ಅಭಿನಯ, ಕನ್ನಡ ಮಾತನಾಡುವ ಸ್ಪಷ್ಟತೆ ಎಲ್ಲದರಲ್ಲೂ ನಿತ್ಯಾ ಫುಲ್ ಮಾರ್ಕ್ಸ್ ಗಳಿಸುತ್ತಾರೆ. ಇನ್ನು ವಿಲನ್‌ಗಳಾಗಿ ಅಭಿನಯಿಸಿರುವ ಶರತ್ ಲೋಹಿತಾಶ್ವ, ರವಿಶಂಕರ್ ತಮ್ಮ ಆರ್ಭಟವನ್ನು ಎಂದಿನಂತೆ ಮುಂದುವರೆಸಿದ್ದಾರೆ. ಇದೆಲ್ಲವನ್ನೂ ಬಿಟ್ಟರೆ ಇಡೀ ಚಿತ್ರವನ್ನು ಸುದೀಪ್ ಆವರಿಸಿ ಬಿಡುತ್ತಾರೆ. ಹಾಡುಗಳ ಕೋರಿಯೋಗ್ರಾಫಿ ಹಾಡುಗಳಿಗಿಂತಲೂ ಹೆಚ್ಚು ಗಮನ ಸೆಳೆಯುತ್ತದೆ. ಚಿತ್ರದಲ್ಲಿ ಹೋದ ಪುಟ್ಟ ಬಂದ ಪುಟ್ಟ ಪಾತ್ರಗಳಂತೆ ಹಾಸ್ಯ ಪಾತ್ರಗಳು ಬಿಂಬಿತವಾಗಿವೆ. ಚಿಕ್ಕಣ್ಣ , ಸಾಧುಕೋಕಿಲಾ, ತಬಲಾ ನಾಣಿ ಅಲ್ಲಲ್ಲಿ ನಗಿಸುತ್ತಾರೆ ಅಷ್ಟೆ.

ಒಟ್ಟಿನಲ್ಲಿ ಸುದೀಪ್ ಅವರ ಅಭಿಮಾನಿಗಳಿಗೆ ರವಿಕುಮಾರ್ ಮತ್ತು ಸುದೀಪ್ ಜೋಡಿ ರಸದೌತಣ ನೀಡಿದೆ ಎಂದು ಹೇಳಬಹುದು.

“1/4 kg ಪ್ರೀತಿ” ಹಿಂಗೈತಪ್ಪ .

‘1/4 ಕೆಜಿ ಪ್ರೀತಿ” ಹದಿಹರೆಯದಲ್ಲಿ ಪುಟಿಯುವ ಪ್ರೀತಿಯ ಕಥಾನಕ. ಪ್ರೀತಿಯ  ಕಥೆಗಳು ಎಷ್ಟೇ ಬಂದರೂ ಒಂದೊಂದು ಭಾವಾಭಿವ್ಯಕ್ತಿಯು ವಿಭಿನ್ನ . ಇಲ್ಲಿ ಯವ್ವನದಲ್ಲಿ ಜಿಗಿಜಿಗಿವ ಪ್ರೀತಿಯನ್ನು ಪಯಣಿಸುತ್ತಾ ಬೆಳೆಸುವ ಪ್ರಯತ್ನವಿದೆ.

ನಿರ್ದೇಶನ:

16997850_1838088716408062_8961386620895110134_n

ಪ್ರವಾಸವೆಂದರೆ ಕಾಲಿಗೆ ಚಕ್ರ ಕಟ್ಟುವ ನಿರ್ದೇಶಕ ಸತ್ಯಶೌರ್ಯ ಸಾಗರ್ ಯೋಗರಾಜ್ ಭಟ್ಟರ ಸಲಹೆಯಂತೆ ಚಿತ್ರಕ್ಕೆ  ‘1/4 ಕೆಜಿ ಪ್ರೀತಿ” ಅಂತ ಹೆಸರಿಟ್ಟದ್ದು ಸರಿಯಾಗೇ ಇದೆ. ಇದೊಂಥರ ಕಾಲೇಜು ದಿನಗಳಲ್ಲಿ ಸಾಮಾನ್ಯವಾಗಿ ಎಲ್ಲ ಹುಡುಗರಲ್ಲೂ ಹುಟ್ಟುವ ಹಸಿ ಹಸಿ  ಪ್ರೀತಿ. ಅವಳ ಒಂದು ನೋಟಕ್ಕಾಗಿ, ನಗೆಗಾಗಿ, ಸಮ್ಮತಿಗಾಗಿ ಹಾತೊರೆಯುವ ಯುವಕರ ಮನಸ್ಸಿನ ಕನ್ನಡಿ. ಸಾಮಾನ್ಯವಾಗಿ ಕಾಲೇಜು ಅಂದಮೇಲೆ ಹೀರೋ ವಿಲನ್ ಮಧ್ಯೆ ಒಂದಿಷ್ಟು ಗಲಾಟೆ , ಗುದ್ದಾಟ, ಸೇಡು, ಪ್ರತಿಕಾರ ಇವೆಲ್ಲ ಸಿನಿಮಾದಲ್ಲಿ ನೋಡ್ತಾ ಬಂದಿದ್ದೇವಲ್ಲ.  ‘1/4 ಕೆಜಿ ಪ್ರೀತಿ”ಯಲ್ಲಿ ಅದ್ಯಾವುದು ಇಲ್ಲ. ತಣ್ಣಗೆ ಹರಿಯುತ್ತಾ  ಆಗೀಗ ಸಣ್ಣ ಗುಡ್ಡ ಹತ್ತಿಳಿವಾಗ ಕೊಸರಾಡುವ ನದಿಯಂಥಾ ಸಿನಿಮಾ. ಅತಿಯಾಗಿ ನಾಯಕನನ್ನು ವಿಜೃಂಭಿಸದೆ ಸಹಜತೆಗೆ ಒತ್ತುಕೊಡಲು ಪ್ರಯತ್ನಿಸಿದಂತಿದೆ. ಬದುಕಿನ ದೃಷ್ಟಿ ಕೋನವನ್ನೇ ಬದಲಿಸಬಲ್ಲ ಪಯಣದ  ಮೂಲಕ ಪ್ರೀತಿಯನ್ನು ಅರಳಿಸುವ ಪ್ರಯತ್ನಕ್ಕೆ ಸತ್ಯಶೌರ್ಯ ಸಾಗರ್ ಹೊರಟಿದ್ದರೂ  ನೋಡುಗರಿಗೆ ರೋಮಾಂಚನವೆನಿಸುವ ತಿರುವುಗಳನ್ನು ಹೆಣೆಯುವುದರಲ್ಲಿ ಯಶಸ್ಸು ಕಂಡಿಲ್ಲ. ದೃಶ್ಯ ಕಟ್ಟುವ ಕಲೆಯಲ್ಲೂ ಪರಿಣಿತಿ ಸಾಧಿಸಬೇಕಿದೆ. ಭಾವಲೋಕದಲ್ಲಿ ಹಿಡಿದಿಟ್ಟುಕೊಳ್ಳುವ ಸಂಭಾಷಣೆ ಸಾಧಿಸಿಕೊಂಡಿದ್ದರೆ ಚೆನ್ನವಿತ್ತು.

ನಿಹಾನ್ ಎಂಬ ಲವ್ ಲವಿಕೆಯ ನಟ

maxresdefault‘1/4 ಕೆಜಿ ಪ್ರೀತಿ” ಸಿನಿಮಾ ಅಲ್ಪಸ್ವಲ್ಪ ಇಷ್ಟವಾಗಿ ಸಿನಿಮಾ ಮುಗಿಯುವವರೆಗೂ ಪ್ರೇಕ್ಷಕರನ್ನ ಮಂದಿರದಲ್ಲಿ ಪಟ್ಟಾಗಿ ಕೂರಿಸೋ ಲವ್ ಲವಿಕೆಯ ಅಭಿನಯ ನಾಯಕ ನಿಹಾನ್ ಗೌಡ ಅವರದ್ದು.  ಮೂಗಿನ ತುದಿಯಲ್ಲೇ ಕೋಪ ಒಂಥರಾ ಬೇಕಾಬಿಟ್ಟಿ ಅಶಿಸ್ತಿನ ಅವತಾರ ಪುರುಷನಾಗಿದ್ದ ಕಾಲೇಜು ಹುಡುಗ ಗುರು ತಾನು ಮೆಚ್ಚಿದ ಹುಡುಗಿಗಾಗಿ ಶಿಸ್ತಿನ ಸಿಪಾಯಿ..ಕರೆದಲ್ಲಿಗೆ ಬರುವ ಕಾಮಧೇನು.. ಓಹ್ .. ಒಳ್ಳೆ ಹುಡುಗ ಹೀಗೆ ಬದಲಾಗುವ ಭಾವಗಳನ್ನು ಕಣ್ಣಲ್ಲೇ ಬಿಂಬಿಸಿದ್ದಾರೆ ನಿಹಾನ್. ಹುಟ್ಟಿದ ಪ್ರೀತಿಯನ್ನ ಹೇಳಿದರೆಲ್ಲಿ ಸರಿದು ಹೋದಿತೋ ಎಂಬ ಆತಂಕದ ಸನ್ನಿವೇಶದ ಜೊತೆಗೆ ಹೇಳದೆ ಇರಲಾರೆನೆಂಬ ತಹತಹದ ದೃಶ್ಯಗಳಲ್ಲೂ ನಿಹಾನ್ ನೀರು ಕುಡಿದಷ್ಟೇ ಸಹಜವಾಗಿ ಅಭಿನಯಿಸಿದ್ದಾರೆ. ಬಿಗಿದಪ್ಪಿ ಬಾಳಸಂಗಾತಿಯಾಗಬಾರದೇ ಎಂಬ ಕನಸಿನ ಕನ್ಯೆ ತನ್ನ ಪಕ್ಕದಲ್ಲೇ ಕುಳಿತು ಪಯಣಿಸುತ್ತಿದ್ದರೂ ಹೇಳಲಾರದ ,ತಾಳಲಾರದ ಚಡಪಡಿಕೆಯ ಘಳಿಗೆಗಳು, ತನ್ನ ಪ್ರೀತಿ ಗೊತ್ತಾದ ಮೇಲೆಯೂ ಆಟವಾಡಿಸುವ, ಅಪಹಾಸ್ಯ ಮಾಡುವ ನಾಯಕಿ ಶ್ರೀ ಯ ಜೊತೆಗಿನ ಕಚಕಚ ಕಿತ್ತಾಟ , ಸಿಟ್ಟು ,ಸೆಡವು , ಕಿರಿಕಿರಿಪಿರಿಪಿರಿ ಕ್ಷಣಗಳಲ್ಲೂ ವಿಹಾನ್ ನಟನೆ ಇಷ್ಟವಾಗುವಂಥದ್ದು . ಸೇರಿಗೆ ಸವ್ವಾಸೇರಿನಿಸುವಂಥ ಮಾತುಗಳನ್ನು ಪಟಪಟನೆ ಸಿಡಿಸುವಂಥ ಧ್ವನಿಯ ಏರಿಳಿತವಿರುವ ನಿಹಾನ್ ಗೆ ಗಟ್ಟಿ ಸಂಭಾಷಣೆ ಸಿಗಬೇಕಿತ್ತು. ಹೊಳೆಪುಗಣ್ಣಿನ ಚೆಲುವ ನಿಹಾನ್ ಕಣ್ಣಿನಲ್ಲೇ ಕಲೆ ಅರಳಿಸುವ ಕಲಾವಿದನಾಗುವ ಲಕ್ಷಣಗಳನ್ನಂತೂ ತೋರಿದ್ದಾರೆ. ಹಾವಭಾವಗಳು ಮತ್ತಷ್ಟು ಮಸೆಯಬೇಕಿದೆ. ಕಡೆಕಡೆದು ಕಲ್ಲು ಕಲಾಕೃತಿಯಾಗುವ ಹಾಗೆ ಪ್ರತಿಭೆಯನ್ನು ಪಳಗಿಸಿಕೊಳ್ಳಬೇಕಷ್ಟೆ.

ಹಿತವಾದ ಅಭಿನಯ

hqdefault ನಾಯಕಿ “ಶ್ರೀ” ಪಾತ್ರಧಾರಿ ಹಿತಾ ಚಂದ್ರಶೇಖರ್ ಅಭಿನಯ ಚುರುಕಾಗಿ, ಹಿತವಾಗಿಯೂ ಇದೆ. ಮಾತಿನ ಮಾಡ್ಯೂಲೇಷನ್ ಗೆ ಕಮ್ಮಿಯೇನು ಇಲ್ಲ. ತಾಯಿ ಸಿಹಿಕಹಿ ಗೀತಾ ಧ್ವನಿಯ ಪಡಿಯಚ್ಚಿನಂತಿದೆ. ಅಥವಾ ಗೀತಾ ಅವರೇ dabb ಮಾಡಿದ್ದಿರಬಹುದು. ತನ್ನ ರೂಪ, ನಡವಳಿಕೆಗೆ ಮನಸೋತು ಹಿಂದೆ ಬೀಳುವ ಹುಡುಗನನ್ನು ಗೋಳು ಹುಯ್ದುಕೊಳ್ಳುವ ತುಂಟತನದ ,ಆತ್ಮವಿಶ್ವಾಸ ತುಂಬಿದ ಒಳ್ಳೆ ಹುಡುಗಿಯ ಪಾತ್ರದಲ್ಲಿ ಹಿತ ಭಾವಾಭಿನಯ ಭರವಸೆ ಮೂಡಿಸುವಂತಿದೆ.

ಇದ್ದಿದ್ದ್ರೆ ಚೆನ್ನಾಗಿರ್ತಿತ್ತಪ್ಪ

. ಭಾವಕ್ಕೆ ತಕ್ಕ ಸಂಗೀತದ ಲೇಪನ

. ಚುರುಕು ಮುಟ್ಟಿಸುವ ಗಟ್ಟಿಯಾದ ಸಂಭಾಷಣೆ

.ಕಣ್ಣಿಗಬ್ಬವಾಗುವ ದೃಶ್ಯಗಳು

.ಭಾವತೀವ್ರತೆಯ ಸನ್ನಿವೇಶಗಳು

.ಕುತೂಹಲ ಹುಟ್ಟಿಸುವ ತಿರುವುಗಳು

ನೋಡ್ಬೇಕಾ ? ಯಾಕೆ ?

ಫೈಟು , ಕೇಡಿಗಳು, ಅಶ್ಲೀಲ ದೃಶ್ಯಗಳು ಇಲ್ಲದ ಸಿನಿಮಾ. ಚೆನ್ನಾದ ನಟನೆ ಇದೆ. ಕನ್ನಡದ ಹೊಸ ನಿರ್ದೇಶಕರ ಒಳ್ಳೆ  ಪ್ರಯತ್ನ.  ಒಂದ್ಸಲ ನೋಡಬಹುದು. ಕೊಟ್ಟ ಕಾಸಿಗೆ   ‘1/4 ಕೆಜಿ ಮನರಂಜನೆ ಗ್ಯಾರಂಟಿ.

 

 

 

ಕಿರಿಕ್ ಪಾರ್ಟಿ ಎಂಬ ಕಲರ್ ಕಲರ್ ಪಾರ್ಟಿ !!

2016ಕ್ಕೆ ವಿದಾಯ ಹೇಳುವ , ಹೊಸ ವರುಷವನ್ನು ಸ್ವಾಗತಿಸುವ ಹೊತ್ತಲ್ಲಿ ಬಂದಿದೆ ಕಿರಿಕ್ ಪಾರ್ಟಿ .ರಕ್ಷಿತ್ ಶೆಟ್ಟಿ ರಿಷಬ್ ಶೆಟ್ಟಿ ತಂಡ “ಥ್ಯಾಂಕ್ಸ್ ಹೇಳಿ  ವಯಸ್ಸಿಗೆ ಹೋಗೋಣ ಕಾಲೇಜಿಗೆ” (ಪ್ರೇಮಲೋಕ)ಅಂತ ಎಲ್ಲರನ್ನು ಕರೆದು ಕಿರಿಕ್ ಪಾರ್ಟಿ ಯಲ್ಲಿ ಕಿಲಕಿಲ ನಗುತುಂಬಿ ಕೊಡ್ತಿದ್ದಾರೆ.

kirik-2 ಕೊಂಚ ಮಟ್ಟಿಗೆ ಪ್ರೇಮಲೋಕ, ಥ್ರೀ ಈಡಿಯಟ್ಸ್ ನೆನಪಿಸುವ ಕಿರಿಕ್ ಪಾರ್ಟಿ  ಹೊಸತನದಿಂದ ತನ್ನ ತನವನ್ನೂ ಕಾಯ್ದುಕೊಂಡಿದೆ. ಕಾಲೇಜುರಂಗದಲ್ಲಿ ನಡೆಯುವ ಬಾಸಿಸಂ, ಎಲೆಕ್ಷನ್, ಒಬ್ಬಳೇ ಹುಡುಗಿಯ ಮೇಲೆ ಇದ್ದಬದ್ದವರೆಲ್ಲ ಕಣ್ಣು ಹಾಕುವುದು, ಆಟ-ಹುಡುಗಾಟ,ಹುಡುಕಾಟ ,ಹೊಡೆದಾಟ ,ಬಡಿದಾಟ  ಚೇಷ್ಟೆ ,ತುಂಟಾಟ, ಮೇಷ್ಟ್ರಿಗೆ ನಿಲ್ಲದ ಕಾಟ, ಎಲ್ಲ ಎಲ್ಲವನ್ನೂ ಒಂದು ಕ್ಷಣವೂ ಬೋರ್ ಎನಿಸದ ಹಾಗೆ ಕಟ್ಟಿಕೊಟ್ಟಿದೆ ಕಿರಿಕ್ ಪಾರ್ಟಿ. ನೀವು ಎಂಜಿನಿಯರ್ ಕಾಲೇಜ್ ಗಾದರೂ ಹೋಗಿ ಮೆಡಿಕಲ್ ಕಾಲೇಜ್ ಗಾದರೂ ಹೋಗಿ ಎಲ್ಲೇ ಹೋದರು ಮನಸ್ಥಿತಿಗಳೇನು ಬದಲಾಗಲ್ಲ. ಆ ವಯಸ್ಸೇ ಅಂಥಾದ್ದು. ಕಾಲೇಜು  ಮುಗಿದವರಿಗೆ ನೆನಪುಗಳ ಸಂತೆಗೆ ಕರೆದೊಯ್ಯುವ ಕಿರಿಕ್ ಪಾರ್ಟಿ ಈಗ ಕಾಲೇಜಿನ ಕಲರ್ ಕಲರ್ ದಿನಗಳಲ್ಲಿ ಇರೋವಂತವರಿಗೂ ಮಜಾ ಕೊಟ್ಟು ಮತ್ತೆ ಬನ್ನಿ ಅಂತ ಕರೆಯುತ್ತೆ.

ನಿರ್ದೇಶನ

kirik-rishab  ಕಥೆ ಹೇಳುವ ಕಲೆಗೆ ಮೆಚ್ಚುಗೆ ಕೊಡಲೇಬೇಕು. ಎರಡು ಗಂಟೆ ನಲವತ್ತು ನಿಮಿಷ ಸರಸರನೆ ಸರಿದು ಅಂಗೈಯೊಳಗಿನ ನೀರಿನಂತೆ ಹರಿದು ಹೋಗುವುದು ಗೊತ್ತೇ ಆಗುವುದಿಲ್ಲ. ಈ ಕಾಲದಲ್ಲಿ ಕನ್ನಡ ಪ್ರೇಕ್ಷಕನನ್ನ ಇಷ್ಟು ಕಾಲ ಹಿಡಿದಿಟ್ಟುಕೊಳ್ಳುವುದು ಸುಲಭವಲ್ಲ. ಪಾತ್ರವೊಂದನ್ನು ಬೆಳೆಸುತ್ತಾ ಹೋಗುವ ರೀತಿಯು ಪ್ರಶಂಸನೀಯ. ನಾಯಕ ಕರ್ಣನ ವ್ಯಕ್ತಿತ್ವ ವನ್ನು ಅರಳಿಸುವ ಸಣ್ಣ ಸಣ್ಣ ತಿರುವುಗಳು ಮನಸ್ಸಿಗೆ ತಟ್ಟುತ್ತವೆ. ಪ್ರತಿ ಪಾತ್ರವನ್ನು ಅದ್ಭುತವಾಗಿ ದುಡಿಸಿಕೊಂಡಿದ್ದಾರೆ ರಿಷಬ್. ಕರ್ಣ ,ಸಾನ್ವಿ ಪ್ರೀತಿ ಕ್ಷಣ ಕಾಲವಾದರು ಇಡೀ ಸಿನಿಮಾ ಆಕೆಯನ್ನು ಮಿಸ್ ಮಾಡಿಕೊಳ್ಳುವಂತೆ ಮಾಡುತ್ತದೆ. ಪ್ರೀತಿ ಶುರುವಾಗುವ ಘಳಿಗೆಯ ಮುಗ್ದತೆ ಆಹಾ..ಅಲ್ಲೊಂದು ಕಾಡುವ ತಂಗಾಳಿಯಂಥ ಎಚ್ ಎಸ್ ವೆಂಕಟೇಶ್ ಮೂರ್ತಿಯವರ “ತೂಗು ಮಂಚದಲ್ಲಿ ಕೂತು ” ಹಾಡು . ನಿಜಕ್ಕೂ ತಿಳಿಗಾಳಿ ಸವರಿದಂಥ  ಅನುಭವ ಕೊಡುವುದರಲ್ಲಿ ಸಂಶಯವಿಲ್ಲ.  ಆಕೆ  ಇಲ್ಲವಾದ  ಮೇಲೆ ಇಲ್ಲಸಲ್ಲದ ಅಪವಾದ, ಸಂಕುಚಿತ ಮನಸ್ಥಿತಿಯ ಮಾತುಗಳು ಇಂದಿನ ಸಮಾಜಕ್ಕೂ ಕನ್ನಡಿ. ಅಲ್ಲಿ ಬಳಸಿರುವ ಹಾಡು “ನೀಚ ಸುಳ್ಳು ಸುತ್ತೋ ನಾಲಿಗೆ ನಿನ್ನ ಸೀಳುವ ರೋಷ ಉಕ್ಕಿದೆ” ಅದ್ಬುತ. ಫೈಟಿಂಗ್ ದೃಶ್ಯದ ಕ್ರಿಕೆಟ್ ಕಾಮೆಂಟ್ರಿಯಂತೂ ಹೊಡೆದಾಟ ಬಡಿದಾಟ ಇಷ್ಟಪಡದವರಿಗೂ ಒಂದಿಷ್ಟು ಮಜಾ ಕೊಡುತ್ತವೆ. ಸದಭಿರುಚಿಯ ತಿಳಿತಿಳಿ ಹಾಸ್ಯ,ವಿನೋದ ಪ್ರಜ್ಞೆ ಹೇಗಿರಬೇಕು ಅನ್ನೋದಕ್ಕೆ ಈಗಿನ ಹಲವರಿಗೆ ಕಿರಿಕ್ ಪಾರ್ಟಿ ಅತ್ಯುತ್ತಮ ಮಾದರಿ. ಮುಜುಗರ ಅನ್ನೋ ಮಾತಿಗೆ ಇಲ್ಲ ತಾವಿಲ್ಲ.

ಅಭಿನಯ 

ರಕ್ಷಿತ್ ಶೆಟ್ಟಿ ಕನ್ನಡ ಸ್ವಲ್ಪ ತೇಲುಗನ್ನಡ. ರಶ್ಮಿಕಾ ಕನ್ನಡವೂ ಹಾಗೇ ಇದೆ. ಆದರೆ ಅದೆಲ್ಲವನ್ನೂ ಮೀರಿ ಮಿರಿ ಮಿರಿ ಮಿಂಚುವಂಥ  ನಟನೆ ರಕ್ಷಿತ್ ಶೆಟ್ಟಿಯದ್ದು. ಮೊದಲಾರ್ಧದ ತುಂಟ ಹುಡುಗನ ಪಾತ್ರದ ಹಾವಭಾವ ನಂಗೆ ನೀ ಇಷ್ಟ ಕಣೋ ಅಂತ ಚಿತ್ರ ನೋಡ್ತಿರೋ ಬಹುತೇಕರು ತಮ್ಮತಮ್ಮಲ್ಲೇ ಅಂದುಕೊಳ್ಳುವಂತೆ ಮಾಡುತ್ತದೆ. ದ್ವೀತೀಯಾರ್ಧದಲ್ಲಿ ಕಟ್ಟು ಮಸ್ತಾಗಿ ಖಡಕ್ ಆಗಿ ಕಾಣುವ ರಕ್ಷಿತ್ ಅಭಿನಯದಲ್ಲಿ ಸಿಕ್ಸ್ರರ್ ಬಾರಿಸಿದ್ದಾರೆ. ಸಿನಿಮಾ ನೋಡ್ತಾ ನೋಡ್ತಾ ಈ ಹುಡುಗ ಅಮೀರ್ ಖಾನ್ ಥರ ಬೆಳೀಬೇಕು ಅಂತನ್ನಿಸಿತು. ಆತನ ಬಾಡಿ ಲಾಂಗ್ವೆಜ್ ನಿಜಕ್ಕೂ ಚೆನ್ನ.

kirik-rashmika

ಸಾನ್ವಿಯಾಗಿ ರಶ್ಮಿಕಾದು ತುಂಬಾ ಒಳ್ಳೆಯ ಪಾತ್ರ. ಆಕೆಯ ಅಭಿನಯದ ಸೊಗಸು ಚೆಂದ. ನಾಯಕನ ಸಮಸಮಕ್ಕ್ಕೆ ನಟಿಸುತ್ತಿರುವಾಗ ಕನ್ನಡಕ್ಕೆ ಒಳ್ಳೆ ಸೊಗಸಾದ ನಟಿ ಸಿಕ್ತಿದ್ದಾಳೆ ಅನ್ನೋ ಭರವಸೆ ಮೂಡಿಸಿದ್ದಾರೆ.

kirik-party-heroins

ಆರ್ಯಳಾಗಿ ಪ್ರವೇಶ ಪಡೆದುಕೊಳ್ಳುವ ಸಂಯುಕ್ತಾ ಹೆಗಡೆ ಲವಲವಿಕೆಯಿಂದ ಸವಾಲು ಸ್ವೀಕರಿಸಿದಂತೆ ನಟಿಸಿದ್ದಾರೆ . ರಿಷಬ್ ಕನ್ನಡಕ್ಕೆ ಇಬ್ಬರು ಒಳ್ಳೆಯ ನಟಿಯರನ್ನು ಕೊಟ್ಟಂತಾಗಿದೆ.

kirik-hanumantekirik-achyuth

ಯಾವ ಪಾತ್ರ ಕೊಟ್ರು ಸೈ ಸೈ ಅನ್ನಿಸುವಂತೆ ನಟಿಸುವ ಅಚ್ಯುತ್ ಕುಮಾರ್ ಇಲ್ಲೂ ಇಷ್ಟವಾಗುತ್ತಾರೆ. ಮಂಗಳೂರಿನ ಉಚ್ಚಾರಣೆ ಇನ್ನು ಸ್ಪಷ್ಟವಾಗಿದ್ದರೆ ಹಿತವಿರುತ್ತಿತ್ತು. ಪ್ರಿನ್ಸಿಪಾಲ್ ಪಾತ್ರದ ಹನುಮಂತೇ ಗೌಡರು ಪಾತ್ರಕ್ಕೆ ಹೇಳಿ ಮಾಡಿಸಿದಂತಿದ್ದಾರೆ. ಅವರ ಧ್ವನಿ ಶಕ್ತಿಯ ಬಗ್ಗೆಯಂತೂ ಹೇಳಲೇ ಬೇಕಿಲ್ಲ.

kirik-party-team

ಕರ್ಣನ ಸ್ನೇಹಿತರ ಪಾತ್ರ ಮಾಡಿರುವ ಪ್ರತಿಯೊಬ್ಬರ ಅಭಿನಯವು ಚೆಂದ ಚೆಂದ . ಇಲ್ಲಿ ಎಲ್ಲರೂ ಮುಖ್ಯರಂತೆ ಕಾಣುತ್ತಾರೆ.

kirik-ajaneesh

ಸಂಗೀತ ನಿರ್ದೇಶನಕ್ಕೆ ಅಜನೀಶ್ ಗೆ ಒಂದು ನಮಸ್ಕಾರ . ಹಿತವಾದ ಹಿನ್ನೆಲೆ ಸಂಗೀತದ ಜೊತೆಗೆ ಹಾಡುಗಳ ಸಂಯೋಜನೆಯು ಮಧುರ. ಗೀತರಚನೆಕಾರರು, ಹಾಡುಗಾರರು ಮೆಚ್ಚುಗೆಗೆ  ಅರ್ಹರು.

ಪ್ರತೀ  ಫ್ರೇಮ್ ಇಷ್ಟವಾಗುವ ಹಾಗೆ ಪೋಣಿಸಿರುವ ಸಿನಿಮ್ಯಾಟೊಗ್ರಾಫರ್ ಮನೋಹರ್ , ಒಂದಿಷ್ಟೂ ಇರುಸು ಮುರುಸಾಗಿಸದೆ ನಗುವಿನ ಅಲೆಯಲ್ಲಿ ತೇಲಿಸುವ ಸಂಭಾಷಣಕಾರನಿಗೂ ಒಂದು ಸಲಾಂ.

ಈ ಹುಡುಗರು ಕನ್ನಡ ಚಿತ್ರರಂಗಕ್ಕೆ ಹೊಸತನ ತುಂಬಿಕೊಟ್ಟಿದ್ದಾರೆ. ಕಿರಿಕ್ ಪಾರ್ಟಿ ಅಂತ ಹೆಸರಿಟ್ಟು ಬಣ್ಣ ಬಣ್ಣಗಳ ಕಲರ್ ಫುಲ್ ಪಾರ್ಟಿ ಕೊಟ್ಟಿದ್ದಾರೆ. ಟ್ರೈಲರ್ ಬಿಡುಗಡೆ ಸಂದರ್ಭದಲ್ಲಿ ciniadda.com ಜೊತೆ ಮಾತಾಡಿದಾಗ  ಒಂದು  ಒಳ್ಳೆ  ಚಿತ್ರ ಕೊಡ್ತೀವಿ ಅಂತ ಹೇಳಿದ್ದ ರಕ್ಷಿತ್ ಶೆಟ್ಟಿ ಮಾತು ಉಳಿಸಿಕೊಂಡಿದ್ದಾರೆ . ಶುಭವಾಗಲಿ ತಂಡಕ್ಕೆ.

kirik-party-1 ಕಿರಿಕ್ ಪಾರ್ಟಿ ನೋಡಿ . ಕಿಲ ಕಿಲ ನಗು ತುಂಬಿಕೊಳ್ಳಿ. ಹಗುರಾಗಿ ಹೊಸ ವರುಷವನ್ನು ಸ್ವಾಗತಿಸಿ.

-ಭಾನುಮತಿ ಬಿ ಸಿ

 

Like Us, Follow Us !

121,086FansLike
1,817FollowersFollow
1,347FollowersFollow
1,653SubscribersSubscribe

Trending This Week