18 C
Bangalore, IN
Tuesday, December 19, 2017
Home ಸಿನಿಮಾ ನ್ಯೂಸ್ ಸಿನಿಮಾ ರಿವ್ಯೂ / ವಿಮರ್ಶೆ

ಸಿನಿಮಾ ರಿವ್ಯೂ / ವಿಮರ್ಶೆ

ಚಕ್ರವರ್ತಿ ಸಿನಿಮಾ ಹೇಗಿದೆ? ವಿಡಿಯೋ ರಿವ್ಯೂ ನೋಡಿ…

ಹಿಂಗಿದ್ದಾನಪ್ಪ ನಮ್ “ರಾಜಕುಮಾರ”

“ರಾಜಕುಮಾರ” ನ ಕಥೆ 

ಸಿರಿವಂತ ಅಪ್ಪ-ಅಮ್ಮನ ಪ್ರೀತಿಯಲ್ಲಿ ಬೆಳೆದ ಅನಾಥನೊಬ್ಬ ಎಲ್ಲರನ್ನೂ ಅಪಘಾತದಲ್ಲಿ ಕಳೆದುಕೊಳ್ಳುತ್ತಾನೆ. ಬುದ್ದಿವಂತ, ಹಣವಂತನಾಗಿದ್ದರೂ ತನ್ನವರಿಲ್ಲದ ದೂರದೇಶದಲ್ಲಿ ಇರಲಾಗದೆ ಮತ್ತೆ ತನ್ನನ್ನು ಸಾಕಿದ  ಮೂಲನೆಲೆಗೇ ಬಂದು ನಿಲ್ಲುತ್ತಾನೆ. ಮಕ್ಕಳ ಅನಾಥಾಲಯವಾಗಿದ್ದ ಕಸ್ತೂರಿ ನಿವಾಸ ಮಕ್ಕಳಿಂದ ಅಸಡ್ಡೆಗೆ ಒಳಗಾದ ವೃದ್ಧರ ನೆಲೆಯಾಗಿರುತ್ತದೆ. ಅಲ್ಲಿನವರ ಜೊತೆಗೆ ಒಡನಾಡುತ್ತಾ, ಅವರ ಕಷ್ಟಗಳಿಗೆ ಕಿವಿಯಾಗುತ್ತಾ ಮತ್ತೆ ಮಕ್ಕಳ ಮನೆಗೆ ಸೇರಿಸುವ ಕಾಯಕದಲ್ಲಿ ಗೆಲ್ಲುತ್ತಾನೆ ರಾಜಕುಮಾರ(ಸಿದ್ದಾರ್ಥ ).ಜೊತೆಗೆ ಅನ್ಯಾಯದ  ವಿರುದ್ಧ ಸಿಡಿದು ಭ್ರಷ್ಟ ಮನಸ್ಥಿತಿಯನ್ನು ಪರಿವರ್ತಿಸುವ ಆದರ್ಶ ಯುವಕನ ಕಥೆ ರಾಜಕುಮಾರ .

ನಿರ್ದೇಶನ:

ಕನ್ನಡಿಗರ ಮನಸ್ಸಿನಲ್ಲಿ ಚಿರಸ್ಥಾಯಿಯಾಗಿರುವ ಡಾ. ರಾಜ್ಕುಮಾರ್  ಅಭಿನಯದ ಕಸ್ತೂರಿ ನಿವಾಸದ ಎಳೆಯನ್ನು  ಎಳೆದು ತಂದು ಭಾವನಾತ್ಮಕವಾಗಿ ಜನರನ್ನು ಗೆಲ್ಲುವ  ಪ್ರಯತ್ನವಿದೆ. ಆದರೆ ಅಲ್ಲಿನ ಕಥೆಯ ಮೇಲಿನ ಹಿಡಿತವಾಗಲಿ, ಮಡುಗಟ್ಟುವ ದುಃಖದ ಸನ್ನಿವೇಶಗಳನ್ನು, ಪ್ರೇಮದ ಪರಿತಾಪವನ್ನು ತೋರಿಸುವಲ್ಲಿ ನಿರ್ದೇಶಕ ಸಂತೋಷ್ ಆನಂದ್ ರಾಮ್ ಪರಿಣಿತಿಯ ಬರ ಎದ್ದು ಕಾಣುತ್ತದೆ. ಚಿತ್ರದ ಮೊದಲಾರ್ಧದಲ್ಲಂತೂ  ಪುನೀತ್ -ರಂಗಾಯಣ ರಘು ಹೊರತಾಗಿ ಮತ್ಯಾರ ಅಭಿನಯವು ಮನಸ್ಸಿಗಿಳಿಯುವುದಿಲ್ಲ. ರಂಗಾಯಣ ರಘು ಪ್ರತಿಭೆ ಬಳಕೆಯಾಗಿರುವುದು ಅಷ್ಟರಲ್ಲೇ ಇದೆ. ತನ್ನನ್ನು ಕಣ್ರೆಪ್ಪೆಯಂತೆ ಸಲಹಿದ ಸಾಕು ತಂದೆ-ತಾಯಿ ಇಡೀ ಕುಟುಂಬ ಇಲ್ಲವಾದಾಗ ನಾಯಕನ ಮುಖದಲ್ಲಿ ನೋವಿನ ತೀವ್ರತೆ ಕಾಣದಿರುವುದಾದರೂ ಹೇಗೆ ? ಮುಖದಲ್ಲೇ ಮುಗ್ದತೆ ತುಂಬಿರುವ ಪುನೀತ್ ರಂತಹ ನಟರಿಂದ ದುಃಖದ ಸನ್ನಿವೇಶಕ್ಕೆ ತಕ್ಕ ಭಾವವನ್ನು ತೆಗೆಯುವುದರಲ್ಲಿ ಸಂತೋಷ್ ನಿಜಕ್ಕೂ ಸೋತಿದ್ದಾರೆ.  ಕಥೆಯ ಕಥೆಯು ಗೋವಿಂದ ಗೋವಿಂದ ..

ಎರಡನೆಯ ಭಾಗದಲ್ಲಿ ಕಥೆಯನ್ನ ಹಿಡಿತಕ್ಕೆ ತೆಗೆದುಕೊಳ್ಳುವ ಪ್ರಯತ್ನ ಕಾಣುವುದು ನಿಜ. ಅನಂತ್ ನಾಗ್ ರಂಥಹ  ಅತ್ಯದ್ಭುತ ಪ್ರತಿಭೆಗೆ ಇನ್ನಷ್ಟು ಅವಕಾಶ ಕಲ್ಪಿಸಿದ್ದರೆ,ಕಥೆ ಹೇಳುವ ಕಲೆಯಲ್ಲಿ ಗಟ್ಟಿತನವಿದ್ದಿದ್ದರೆ ರಾಜಕುಮಾರ ಮತ್ತಷ್ಟು ಸಹನೀಯ. ಇಲ್ಲಿ ಸಂತೋಷ್ ಕಥೆ ಹೇಳುವಲ್ಲಿ,ಸನ್ನಿವೇಶ ಕಟ್ಟುವಲ್ಲಿ ತೋರಿದ ಪ್ರತಿಭೆಗಿಂತ ಹೆಚ್ಚಾಗಿ ಚಿತ್ರಪ್ರೇಮಿಗಳ ಹೃದಯದಲ್ಲಿ ನೆಲೆನಿಂತಿರುವ ಅಣ್ಣಾವ್ರನ್ನ ಕೆಲವೊಮ್ಮೆ ನೇರವಾಗಿ ಮತ್ತೊಮ್ಮೆ ಸಂಭಾಷಣೆಯ ಮೂಲಕ ನೆನಪಿಸಿ ನೋಡುಗರನ್ನ ಭಾವನಾತ್ಮಕವಾಗಿ ಹಿಡಿದಿಟ್ಟುಕೊಳ್ಳುವ ಪ್ರಯತ್ನವೇ ಎದ್ದುಕಾಣುತ್ತದೆ. ಅಲ್ಲಲ್ಲಿ ನಗೆಯುಕ್ಕ್ಕಿಸುವಂಥ ಸಂಭಾಷಣೆ ,ಹಾಸ್ಯಸನ್ನಿವೇಶಗಳನ್ನೂ ಕಟ್ಟಿ ಪ್ರೇಕ್ಷಕರನ್ನು ರಂಜಿಸುವಲ್ಲಿ ಗೆದ್ದಿರುವುದಂತೂ ನಿಜ.

 ಪುನೀತ್ ಅಭಿನಯದ ಕಾಣದಂತೆ ಮಾಯವಾದನು , ನನ್ನ ಉಡುಪು ನಿನ್ನದು ಹಾಡಿನ ದೃಶ್ಯಗಳು ನೋಡಿದಷ್ಟೂ ಖುಷಿಕೊಡುವಂಥವೇ. ಅಂಥವುಗಳನ್ನ ಬಳಸಿಕೊಂಡೇ ಭಾವುಕ,ಮುಗ್ದ ಸಿನಿಮಾ ಪ್ರೇಮಿಗಳನ್ನು ಗೆಲ್ಲುವ ಯೋಜನೆ  ಶುದ್ಧ ಸತ್ಯ. ಆ ಯೋಚನೆ ಸಂತೋಷ್ ಗೆ ಫಲ ಕೊಡುವುದರಲ್ಲೇನು ಸಂಶಯವಿಲ್ಲ. ಯಾಕೆಂದರೆ  ಕನ್ನಡದ ಕಣ್ಮಣಿ ರಾಜಣ್ಣ ಕನ್ನಡಿಗರ ಮನದಲ್ಲಿ ಇವತ್ತಿಗೂ ಮರೆಯಾಗದಿರುವ ಮಾಣಿಕ್ಯ. ಬಿಗಿ ಎನಿಸದ ಕಥಾಹಂದರ ಮಧ್ಯೆಯೂ ಹೆತ್ತಮಕ್ಕಳ ಪ್ರೀತಿಯಿಲ್ಲದೆ ನಲುಗುವ ವೃದ್ಧ ಜೀವಗಳ ಬಗ್ಗೆ ಕನಿಕರ ಹುಟ್ಟುವ ದೃಶ್ಯಗಳನ್ನು ಹೆಣೆದಿರುವ ಸಂತೋಷ್ ಪ್ರಯತ್ನವನ್ನು ಮೆಚ್ಚಲೇಬೇಕು.

 ಅಭಿನಯ:

ಪುನೀತ್ ನಗುವೊಂದೇ ಸಾಕು ಅಭಿಮಾನಿ ದೇವರುಗಳನ್ನು ಮೆಚ್ಚಿಸಲು. ಅಲ್ಲಿ ಮುಗ್ದತೆ ಇದೆ ನಿಜ. ಬಾಲ್ಯದಿಂದಲೂ ತನ್ನ ಮುಗ್ದ,ಸಹಜ ಅಭಿನಯದಿಂದ ಆಪ್ತನೆನಿಸುವ ಪುನೀತ್ ಈ ಚಿತ್ರದ  ಒಂದು ಸನ್ನಿವೇಶದಲ್ಲಿ ಮಾತ್ರ (ಅಪಘಾತದಲ್ಲಿ  ತನ್ನವರನ್ನು ಕಳೆದುಕೊಂಡು ಮತ್ತೆ ಅನಾಥತೆ ಅನುಭವಿಸುವಾಗ) ಇನ್ನು ಅಭಿನಯ ಮಡುಗಟ್ಟಬೇಕಿತ್ತು ಎನ್ನುವಂಥ ಅಸಮಾಧಾನ ಹುಟ್ಟಿಸುತ್ತಾರೆ. ಅದರ ಹೊರತಾಗಿ ಯಾವ ಸನ್ನಿವೇಶದಲ್ಲೂ ಅಪ್ಪು ಆಪ್ತರಾಗದೆ ಉಳಿಯುವುದಿಲ್ಲ. ಪವರ್ ಸ್ಟಾರ್ ಎಂಬ ಬಿರುದಿಗೆ ಕುಂದಿಲ್ಲದಂತಹ ಅಭಿನಯ  ಪ್ರೇಕ್ಷಕರಿಗೆ ಹಬ್ಬವೆನಿಸುವಂತಿವೆ. ಡಾನ್ಸ್ ವಿಷ್ಯ ಬಂದ್ರೆ ಮೆಚ್ಚದೆ ವಿಧಿಯಿಲ್ಲ.

ನಾಯಕಿ ಪ್ರಿಯಾ ಆನಂದ್ ಒಳ್ಳೆಯ ನಟಿ. ಇಂಗ್ಲಿಷ್ -ವಿಂಗ್ಲೀಷ್ ಚಿತ್ರದಲ್ಲಿ ಸೊಗಸಾಗಿ ನಟಿಸಿದ ಅನುಭವಸ್ಥೆ. ಆದ್ರೆ ನಿರ್ದೇಶಕರ ಕೃಪೆ ಅವಕಾಶಕ್ಕೆ ಕೊಕ್ಕೆ ಬಿದ್ದಂತಾಗಿದೆ.

ಅನಂತ್ ನಾಗ್ ಪ್ರಕಾಶ್ ರೈ, ಅಚ್ಯುತ್ ಕುಮಾರ್ , ದತ್ತಣ್ಣ ,ಚಿಕ್ಕಣ್ಣ ,ಭಾರ್ಗವಿ ಎಲ್ಲರದ್ದೂ ಎಂದಿನಂತೆ ಅಭಿನಯದಲ್ಲಿ ಮೇಲುಗೈ . 

ನೃತ್ಯ ನಿರ್ದೇಶನದಲ್ಲಿ  ಹರ್ಷರಿಗೆ ಫುಲ್ ಮಾರ್ಕ್ಸ್ ಕೊಡಲೇಬೇಕು.

ಹರಿಕೃಷ್ಣ ಹಾಡುಗಳಿಗೆ ಕೊಟ್ಟ ಸಂಗೀತ ಚೆನ್ನವಿದೆ. ಚಿತ್ರದ ಮೊದಲಾರ್ಧದ ಸನ್ನಿವೇಶಗಳಿಗೆ ಹಿನ್ನೆಲೆ ಸಂಗೀತದಿಂದ  ಮತ್ತಷ್ಟು ಮೆರೆಗು ತುಂಬಬಹುದಿತ್ತು.

ಪುನೀತ್ ಗಿರುವ ಪ್ರತಿಭೆ ಬಳಸಿ ಚಿತ್ರವನ್ನು ಇನ್ನಷ್ಟು ಗಟ್ಟಿಯಾಗಿ ರೂಪಿಸಬಹುದಿತ್ತು ಅನ್ನಿಸುವುದು ನಿಜ. ಡಾ. ರಾಜ್ಕುಮಾರ್ ತಮ್ಮನ್ನೇ ಮತ್ತೆ ಮತ್ತೆ ಹೊಗಳಿಕೊಳ್ಳುವ ಬಿಲ್ಡ್ ಅಪ್ ಡೈಲಾಗ್ ಗಳಿಂದ ನಟಸಾರ್ವಭೌಮ ಅನ್ನಿಸಿದವರಲ್ಲ. ಅವರ ಚಿತ್ರಗಳಲ್ಲಿ ಗಟ್ಟಿಯಾದ ಕಥಾಹಂದರದಜೊತೆಗೆ ಪ್ರೇಕ್ಷಕರನ್ನು ರಂಜಿಸುತ್ತಲೇ ಸುಸಂಕೃತರಾಗಿಸುವ ಎಲ್ಲ ರೀತಿಯ ಹೂರಣವಿತ್ತು. ಅದಿಲ್ಲಿ ಸಾಧ್ಯವಾಗಿದ್ದರೆ ರಾಜಕುಮಾರ  ಪ್ರೇಕ್ಷಕರು ಎಂದೆಂದೂ  ಮರೆಯದ ಮುತ್ತಿನ ಮಣಿಯಾಗುತ್ತಿದುದರಲ್ಲಿ ಸಂಶಯವಿಲ್ಲ.

ಇಷ್ಟೆಲ್ಲಾ ಹೇಳಿದ ಮೇಲೆ ಹೇಳಲೇಬೇಕಾದ ಬಹುಮುಖ್ಯ ವಿಷಯವೆಂದರೆ ರಾಜಕುಮಾರನನ್ನ ತಪ್ಪದೆ ನೋಡಿ. ಕೊರತೆಗಳ ನಡುವೆಯೂ ನೋಡಿ ಖುಶಿಪಡಬಹುದಾದ ಸಿನಿಮಾವಿದು. ಇಲ್ಲಿ ರಂಜನೆ -ಬೋಧನೆ ಎಲ್ಲವೂ ಇದೆ. ಮನೆಮಂದಿಯಲ್ಲಾ ನೋಡಿ ಮತ್ತೆ ಅಣ್ಣಾವ್ರನ್ನ ಮನತುಂಬಿಕೊಳ್ಳಿ. 

‘ಕಬಾಲಿ’ ಹಿಟ್ಟಾ.. ತೋಪಾ .. ???

ಕಲೆ, ಮನೋರಂಜನೆ, ಮಾಧ್ಯಮ ಹೀಗೆ ಅನೇಕ ರೂಪಗಳನ್ನು ಪಡೆದ ಸಿನಿಮಾ, ಇಂದು ಅವೆಲ್ಲವನ್ನೊ ಮೀರಿ ಒಂದು ಮಹಾ ವ್ಯಾವಹಾರಿಕ ಉದ್ಯಮವಾಗಿ ಬೆಳೆದು ನಿಂತಿದೆ.ಹಾಗಾಗಿ ಚಿತ್ರನಿರ್ಮಾಪಕರು ಸಿನಿಮಾದ ಕಥೆಗೆ ತಲೆಕೆಡಿಸಿಕೊಳ್ಳಲು ಶುರು ಮಾಡಿದ ದಿನದಿಂದಲೇ ಅದರ  ಪ್ರಚಾರ ಕಾರ್ಯಕ್ಕೂ ನಿಲ್ಲುತ್ತಿದ್ದಾರೆ.

ಅಂದು ‘ಬಾಹುಬಲಿ’ ತನ್ನ ತಾಂತ್ರಿಕತೆಯಿಂದ ಭಾರತ ಚಿತ್ರರಂಗದ ಲೆಕ್ಕಾಚಾರಗಳನ್ನೆಲ್ಲಾ ಬುಡಮೇಲು ಮಾಡಿಬಿಟ್ಟರೆ, ಇಂದು ಬಂದ ‘ಕಬಾಲಿ’ ತಲೈವನ ಹೆಸರಿನಲ್ಲೇ ಬಿರುಗಾಳಿ ಎಬ್ಬಿಸಿ ಮರೆಯಾಯ್ತು.

‘ಕಬಾಲಿ’ ಬಂದ ಬಿರುಸಿನಲ್ಲಿ ಬಿಚ್ಚಿಟ್ಟು ಹೋದ ಪ್ರಶ್ನೆ ಹಾಗು ಗೊಂದಲಗಳು ಒಂದೆರಡಲ್ಲ.

ಒಂದು ಚಲನಚಿತ್ರವನ್ನು ಹೇಗೆ ಅಳಿಯಬೇಕೋ ಹಾಗೆ ಅಳಿಯಲು ತಿಳಿಯದ ತೀರದಲ್ಲಿ “ಕಬಾಲಿ” ನಿಂತಿದೆ. ಭಾರತ ಚಿತ್ರರಂಗದಲ್ಲೇ ಮೊದಲನೇ ಬಾರಿಗೆ ಇಷ್ಟೊಂದು ರೀತಿಯ  “mixed opinion”ಗಳನ್ನು ಚಿತ್ರ “ಕಬಾಲಿ” ಹುಟ್ಟುಹಾಕಿದೆ.

B Suresh, Film Maker

1ಬಿ. ಸುರೇಶ್

ಕಬಾಲಿ ಮಲೇಶಿಯಾದ ಭಾರತೀಯ ವಲಸಿಗರ ಬಗ್ಗೆ ಮಾಡಿರುವ ಅದ್ಬುತ ಚಿತ್ರ. ಸೂಪರ್ ಸ್ಟಾರ್ ಫಾರ್ಮುಲಾಗೆ ಜೋತು ಬೀಳದೆ ಚಿತ್ರವನ್ನು ರೂಪಿಸಿದ್ದಾರೆ. 70 ಕೋಟಿ ರೂಪಾಯಿಯಲ್ಲಿ ಅಚ್ಚುಕಟ್ಟಾಗಿ ನಿರ್ಮಾಣವಾದ ಈ ಚಿತ್ರದ ಪ್ರಚಾರಕ್ಕೆ ಖರ್ಚಾಗಿದ್ದು ಸುಮಾರು 50 ಕೋಟಿ. ಚಿತ್ರ ಗಳಿಸಿದ್ದು ಭರ್ಜರಿ 600 ಕೋಟಿ. ಇದು ಸಮಕಾಲೀನ ಅದ್ಭುತ ಯಶಸ್ಸಿನ ಚಿತ್ರ ಎಂದು ನಾನು ನಂಬುತ್ತೇನೆ.

Shreenidhi DS, Fiction Head, Udaya TV

2ಶ್ರೀನಿಧಿ ಡಿ.ಎಸ್.

‘ಕಬಾಲಿ’ ಹಂಚಿಕೆದಾರರಿಗೆ ಲಾಭ ತಂದುಕೊಟ್ಟಿರಬಹುದು! ಆದರೆ ನೋಡಿದೋರಿಗೆ ಖುಷಿ ಆಗಿದೆಯಾ?

ಆಮೇಲೆ- ಸಿನಿಮಾಕ್ಕೆ ನಿಜವಾದ ಖರ್ಚಾದ ದುಡ್ಡೆಷ್ಟು ಅನ್ನೋದು ಜನಸಾಮಾನ್ಯನಿಗೆ ಗೊತ್ತಾಗಲ್ಲ, ಆತನಿಗೆ ಇದೊಂದು ದೊಡ್ಡ ಚಿತ್ರ, ಕೋಟ್ಯಂತರ ರೂಪಾಯಿಗಳ ವೆಚ್ಚ ಆಗಿದೆ ಎಂದು ಬಿಂಬಿಸಿ – ಆ ಚಿತ್ರವನ್ನು ಮಿಸ್ ಮಾಡ್ಕೊಳೋದೇ ಅಪರಾಧ ಎಂಬಂತೆ ಬಿಂಬಿಸಿ, ಒತ್ತಾಯ ಪೂರ್ವಕವಾಗಿ ನೋಡೋ ಹಾಗೆ ಮಾಡಲಾಗತ್ತೆ. ಜನಕ್ಕೆ ಈ ಕ್ಷಣದ ಸಂಭ್ರಮ- ಯಶಸ್ಸು ಅಷ್ಟೇ ಬೇಕು. ಸುಮ್ಮನೆ ನೂರಾರು ಥಿಯೇಟರ್ ಗಳಲ್ಲಿ ರಿಲೀಸ್ ಮಾಡಿ, ಧೂಳೆಬ್ಬಿಸಿ-ಗೌಜಿ ಮಾಡಿ ಹೋ ಅಂತ ಅಬ್ಬರ…. ಆಮೇಲೆ ಹೇಳೋರು ಕೇಳೋರು ಇಲ್ಲ!

Aravind SD, Film Maker

3ಅರವಿಂದ್ ಎಸ್. ಡಿ.

ಕಬಾಲಿ ನಿಜಕ್ಕೂ path breaking cinema. ಆದರೆ ಅತಿಯಾಗಿ ಪ್ರಚಾರ ಹಾಗು ನಿರೀಕ್ಷೆಗಳನ್ನು ಹುಟ್ಟಿಸಿತ್ತು. ವ್ಯಯಕ್ತಿಕವಾಗಿ ನನಗೆ ಚಿತ್ರ ಇಷ್ಟವಾಯ್ತು. ರಜನಿ ಅಂಥಾ ಸೂಪರ್ ಸ್ಟಾರ್ ಪ್ರಭೆಯನ್ನು ಮರೆಮಾಡಿ ನಿಜವಾದ ನಟನನ್ನು ತೋರಿಸಿದ್ದಾರೆ. ಒಬ್ಬ ಖ್ಯಾತ ನಾಯಕನನ್ನು ದಲಿತ ನಾಯಕನನ್ನಾಗಿ ಹೆಣೆದಿರುವ  ಕಥೆ ಅದ್ಭುತ. ಇದು ಕೇವಲ ರಜನಿ ಚಿತ್ರವಾಗಿ ಉಳಿಯದೆ, ನೈಜವಾಗಿ ಚಿತ್ರ ಕಟ್ಟಿರುವುದು ಪ್ರಸಂಶನೀಯ.

Vanitha Sathish, Software professional

4 ವನಿತಾ ಸತೀಶ್

ಹೊಸತನ ಬರಿ ಲೊಕೇಶನ್   ಮತ್ತು ಕಥೆಯ ಎಳೆಯಲ್ಲಿದೆ. ಕೆಲವು ನಿರೂಪಣೆ; ಸತ್ತ ಹೆಂಡತಿ  ಎಲ್ಲ ಕಡೆ ಕಾಣಿಸಿ ಅವನನ್ನು ಕಾಡುವುದು ತುಂಬಾ ಸುಂದರವಾಗಿದೆ. ಚಿತ್ರ ಕಥೆ ಪ್ರೇಕ್ಷಕರನ್ನು ಹಿಡಿದು ಕೂರಿಸುವಷ್ಟು ಕಾತುರ ಮತ್ತು ಆಸಕ್ತಿ ಹುಟ್ಟಿಸುವಲ್ಲಿ ಸೋತಿದೆ. ಕಬಾಲಿ ಪಾತ್ರ ಕೂಡ ನಾಯಕನ ದಿಟ್ಟ ಗುಣ ಮತ್ತು ವ್ಯಕ್ತಿತ್ವ ಪ್ರೇಕ್ಷಕರ ಮನದಲ್ಲಿ ನೆಡುವಂಥ ಯಾವುದೇ ದೃಶ್ಯ ಕಟ್ಟಿ ಕೊಟ್ಟಿಲ್ಲ. ನಾವೆ ಪಟ್ಟು ಹಿಡಿದು ಚಿತ್ರದಲ್ಲಿ ಧನಾತ್ಮಕ ಅಂಶಗಳನ್ನು ಹುಡುಕಿದರೆ ಕೆಲವು ಮಾತ್ರ ಸಿಗುತ್ತವೆ. ಒಟ್ಟಾರೆ ಕೊಟ್ಟ ದುಡ್ಡಿಗೆ 80% paisa vasool ಕಾರಣ, ಹೊರ ದೇಶದ ಲೊಕೇಶನ್, ಹೊಸ ನಟ ನಟಿಯರು ಮತ್ತ ರಜನಿ ಸರ್.ಜನರ ಮನ ಮುಟ್ಟುವಲ್ಲಿ ಸಂಪೂರ್ಣವಾಗಿ ಸೋತಿದೆ.

ChandraShekar Shrivastav, Film director

5ಚಂದ್ರಶೇಖರ್ ಶ್ರೀವಾತ್ಸವ್

ರಜನಿಕಾಂತ್ ಸಿನಿಮಾದಲ್ಲಿ ಇದ್ದಮೇಲೆ ಮುಗೀತು, ಅಲ್ಲಿ ಒಪೀನಿಯನ್ ಗಳ ಅವಶ್ಯಕತೆನೇ ಇಲ್ಲ. ಆ ಸಿನಿಮಾ ಸೂಪರ್ ಹಿಟ್ಚೇ.

Vidya Rao, Writer

6ವಿದ್ಯಾ ರಾವ್

ನಾನು ಚಿತ್ರವನ್ನು ನೋಡಿಲ್ಲ.. ಆದರೂ, ಒಬ್ಬ ನಟನ ಪಾಪುಲಾರಿಟಿಯನ್ನೇ ಬಂಡವಾಳವಾಗಿ ಇಟ್ಟುಕೊಂಡು ಮೀಡಿಯಾ ಮೂಲಕ ಅತಿಯಾಗಿ ಪ್ರಚಾರ ಮಾಡಿ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಕರೆತರಲಾಗುತ್ತಿದೆ. ಆದರೆ ಒಂದು ಚಿತ್ರಕ್ಕೆ ಅದರ ಕಥೆ, ದೃಶ್ಯಿಕರಣ, ನಟರ ನಟನೆ ಮುಂತಾದವುಗಳೇ ಮೂಲ ಮಾನದಂಡವಾಗಿರಬೇಕು. ಬಿಡುಗಡೆಯ ಮುನ್ನವೇ ಈ ಚಿತ್ರಗಳು ಎಷ್ಟು ಸುದ್ದಿ ಮಾಡುತ್ತವೆ ಎಂದರೆ, ನೈಜ ಮನಸ್ಸಿನಿಂದ ಪ್ರೇಕ್ಷಕ ಚಿತ್ರವನ್ನು ನೋಡಲು ಆಗುವುದೇ ಇಲ್ಲ. ಒಬ್ಬನು ಸಾಧಾರಣವಾಗಿ ಚಿತ್ರವನ್ನು ನೋಡಿ ಅಭಿಪ್ರಾಯ ಹೇಳುವ ಮುನ್ನವೇ ಮೀಡಿಯಾದಲ್ಲಿ ಸೂಪರ್ ಹಿಟ್ ಎಂದು ಬಣ್ಣಿಸಿ ಆಗಿರುತ್ತದೆ. ಕಬಾಲಿ ಎಷ್ಟೇ ಹೈಪ್ ಸೃಷ್ಟಿಸಿದರೂ, ಚಿತ್ರಕಥೆಯ ಬಗ್ಗೆ ಹೆಚ್ಚು ಚರ್ಚೆ ನಡೆಯಲಿಲ್ಲ.

Srinidhi Srivatsa, Software professional

7ಶ್ರೀನಿಧಿ ಶ್ರೀವಾತ್ಸವ್

ಬಾಕ್ಸ್ ಆಫೀಸ್ ಅಬ್ಬರ ನೋಡಿದರೆ ಕಬಾಲಿ ಸೂಪರ್ ಹಿಟ್ , ಅನ್ನುದರಲ್ಲಿ ಸಂಶಯ ಇಲ್ಲ. ಕಥೆಯು ತುಂಬಾ ಪರಿಣಾಮಕಾರಿ ಆಗಿಲ್ಲದಿದ್ದರೂ, ಕೆಟ್ಟ ಕಥೆ ಎನ್ನುವಂತಿಲ್ಲ. ಇಂದಿನ ರಾಜಕೀಯ ಸಾಮಾಜಿಕ ಸ್ಥಿತಿಯನ್ನು ಗಮನದಲ್ಲಿ ಇಟ್ಟುಕೊಂಡು ಹೇಳುವುದಾದರೆ, ದಲಿತನಾಯಕ ಮೂಲಕ ಕಥೆ ಹೇಳಲು ಹೊರಟಿದ್ದು ಕಥಾವಸ್ತುವನ್ನು ಕೆಡಿಸಿದೆ ಎನಿಸುತ್ತದೆ.

Abhishek SN, Film Maker

8ಅಭಿಷೇಕ್ ಎಸ್ ಎನ್

ಹಣ ಗಳಿಕೆಯೇ ಮೇಲೆ ಯಶಸ್ಸನ್ನು ಅಳೆಯುವುದಾದರೆ, ಕಬಾಲಿ ಸಾಧನೆಯ ಅಂಕಿ ಅಂಶಗಳು ನಮ್ಮ ಮುಂದೆಯೇ ಇವೆ. ಆದರೆ ವ್ಯಕ್ತಿಗತವಾಗಿ ಈ ಚಿತ್ರ ಮಿಶ್ರ ಪ್ರತಿಕ್ರಿಯೆಗಳನ್ನು ಪಡೆದಿದೆ. ಒಟ್ಟಾರೆ, ಚಿತ್ರಕಥೆ ಇನ್ನಷ್ಟು ಜವಾಬ್ದಾರಿಯುತವಾಗಿ ಇರಬೇಕಾಗಿತ್ತು ಎಂದು ನನಗೆ ಅನಿಸುತ್ತದೆ. ಆಗ ಕಬಾಲಿಗೆ ಕಲಾತ್ಮಕ ಹಾಗು ಮನೋರಂಜಕ ಚಿತ್ರವಾಗಿಯೂ ಹೆಚ್ಚು ಮನ್ನಣೆ ಸಿಗುತ್ತಿತ್ತು.

 

 

Apoorva, Actress

9ಅಪೂರ್ವ

ರಜನಿ ವ್ಯಕ್ತಿತ್ವವೇ ಸೂಪರ್ ಸ್ಟಾರ್. ಹಾಗಾಗಿ ಕಬಾಲಿ ಕೂಡ ಸೂಪರ್ ಹಿಟ್. ನನಗೆ ಅನಿಸುವಂತೆ ಅವರ ಅಭಿಮಾನಿಗಳು ರಜನಿಗೊಸ್ಕರವೇ ಈ ಚಿತ್ರವನ್ನು ನೋಡುತ್ತಾರೆ. ಮಿಕ್ಕಿದ್ದೆಲ್ಲವೂ ಅವರಿಗೆ ಗೌಣ. ಸೂಪರ್ ರಜನಿ..

Ashok GK, Business consultant

10ಅಶೋಕ್ ಜಿಕೆ

ಕಬಾಲಿ ಚಿತ್ರದ ಬ್ರಾಂಡ್ ವ್ಯಾಲ್ಯೂ ಹಾಗು ಮಾರ್ಕೆಟಿಂಗ್ ಸ್ಟ್ರಾಟಜಿಯನ್ನು ಮೆಚ್ಚಲೇಬೇಕು. ಆದರೆ ಒಂದು ಒಳ್ಳೆಯ ಕಥೆ ಇಲ್ಲದೆ ಇರುವಾಗ ಯಶಸ್ಸು ಸಾಧ್ಯವೂ ಇಲ್ಲ. ಇಂದಿನ ಪ್ರೇಕ್ಷಕರು ಬಲು ಸೂಕ್ಷ್ಮ. ಕಬಾಲಿಗೆ ರಜನಿ ಎಂಬ ಸೂಪರ್ ಸ್ಟಾರ್ ನ ಬ್ರಾಂಡಿಂಗ್ ಇತ್ತು. ಆದರೂ ಇದು ರಜನಿ ಅಭಿಮಾನಿಗಳಿಗೆ ಮೀಸಲಾದ ಚಿತ್ರವಾಗಿ ಉಳಿಯಿತು. ನಾನೂ ಈ ಚಿತ್ರವನ್ನು ನೋಡಿದ್ದು ರಜನಿ ಅಭಿಮಾನಿಯಾಗಿಯೇ.

ನಿಜಕ್ಕೂ ನನಗೆ ನಿರಾಶೆ ಆಯ್ತು. ರಜನಿಯ ಹಳೆ ಚಿತ್ರಗಳಲ್ಲಿನ ವಿಶೇಷತೆ ಇದರಲ್ಲಿ ಕಾಣಲಿಲ್ಲ. ಸ್ಕ್ರಿಪ್ಟ್ ನಲ್ಲಿ ಏನು ಹಿಡಿತ ಇರಲಿಲ್ಲ ಎನಿಸಿತು.

Rashmi Kulakarni, Actress

11ರಶ್ಮಿ ಕುಲಕರ್ಣಿ

ಒಂದ್ಸಲಾ ಖಂಡಿತ ನೋಡ್ಬೇಕು ಯಾಕಂದ್ರೆ ಇದು ರಜನಿಕಾಂತ್ ಅವರ ಚಿತ್ರ. ದೊಡ್ಡ ಬಜೆಟ್ ನ ಸಿನಿಮಾ ಮತ್ತೆ ಅವರು ಈ ವಯಸ್ಸಲ್ಲೂ ಯುವನಟರ ಎನರ್ಜಿಯ ಮೇಲೆ ಸವಾಲ್ ಆಗೋ ರೀತಿಯಲ್ಲಿ ಅಭಿನಯಿಸಿದ್ದಾರೆ. ನೆರುಪ್ಪು ಡಾ ಹಾಡಿಗಾಗಿ ಕಾಯುತಿದ್ದೆ, ಆ ವಿಷಯದಲ್ಲಿ ಸ್ವಲ್ಪ ನಿರಾಸೆ ಆಯ್ತು.

 

ಹೇಳೋದು ಕಷ್ಟ  !

ಪ್ರತಿ ಕ್ಷೇತ್ರದಲ್ಲಿರುವ ಪ್ರತಿಯೊಬ್ಬರ ಅನಿಸಿಕೆ “ಕಬಾಲಿ” ವಿಷಯದಲ್ಲಿ ಬೇರೆ ಆಗಿದೆ. ಸೂಪರ್ ಸ್ಟಾರ್ ರಜನಿ ಸಾರ್ ಅವರ ಎಷ್ಟೋ ಸೂಪರ್ ಡೂಪರ್ ಸಿನಿಮಾಗಳ ಮುಂದೆ “ಕಬಾಲಿ” ಎಲ್ಲಿ ನಿಂತಿದೆ ಅನ್ನೋದು ಕಷ್ಟಕರ ಎಣಿಕೆಯಾಗಿದೆ.

ಕಡೆಯದಾಗಿ “ಕಬಾಲಿ” ಸಿನಿಮಾಗಾಗಿ ಜನ ಥಿಯೇಟರ್ ಮುಂದೆ ನೂಕುನುಗ್ಗಲು ಮಾಡುತ್ತಿದ್ದಾರೋ ಇಲ್ವೋ ಗೊತ್ತಿಲ್ಲ ಆದರೆ ರಜನಿ ಸಾರ್ ಅವರ ಸ್ಟೈಲ್ ಹಾಗು ಖದರ್ ನೋಡಲಂತೂ ಖಂಡಿತ ಮುಂದೆಯೂ ಜನ ಹಾತೊರೆಯುತಿರುತ್ತಾರೆ.

ಅಂದಹಾಗೆ ನೀವೇನಂತೀರಾ?

ಮನಸ್ಸನ್ನು ಮುಳುಗಿಸದೆ ತೇಲಿಸುವ ಪುಷ್ಪಕ ವಿಮಾನ

“ಸೂರ್ಯ ನ್ನ ನೋಡು ಅವನು ಕೂಡ ಒಂಟಿ. ಆದ್ರೆ ಎಷ್ಟು ಪ್ರಖರವಾಗಿ ಹೊಳೀತಾನೆ. ಹಾಗೆ ನೀನು ಒಂಟಿಯಾದರು ಅವನ ಹಾಗೆ ಹೊಳೆಯಬೇಕು.ಬೆಳಗಬೇಕು.” ಅಪ್ಪನ ಕಡೆಕ್ಷಣದ ಇಂಥಾ ಮಾತು ತಾನಿಲ್ಲದೆಯೂ ಮಗಳನ್ನ ಉಳಿಸಿ, ಬೆಳೆಸುವ ಮಂತ್ರದ ಕತೆ ಪುಷ್ಪಕ ವಿಮಾನ. ಮಮತೆ  ಎಂದರೆ ಮೊದಲು ನೆನಾಪಾಗುವುದೇ ಮಾತೆ ಅಂದ್ರೆ ಅಮ್ಮ. ಆದರಿಲ್ಲಿ ಅಪ್ಪ  ಅಮ್ಮನಂತೆ, ಕಣ್ರೆಪ್ಪೆಯಂತೆ  ಮಗಳನ್ನು ಕಾದು,ಪೊರೆದು ಅವಳಿಗಾಗಿ ತನ್ನ ಜೀವವನ್ನೇ ಅರ್ಪಿಸಿಬಿಡುವ, ಜೀವ ಹಿಂಡುವ ಕಥೆಯಿದೆ. ಬುದ್ಧಿಮಾಂದ್ಯ ತಂದೆ- ಮುದ್ದು ಮಗಳ ನಡುವಿನ ಭಾವುಕ ಕ್ಷಣಗಳನ್ನು ತೋರುವ ಸಿನಿಮಾ ಪುಷ್ಪಕ ವಿಮಾನ. 

pushpaka-vimana_1479274244190

ನಿರ್ದೇಶನ:

-ಮೈನಸ್ -ಪ್ಲಸ್ 

ಮೊದಲ ಚಿತ್ರಕ್ಕೇ ಪರದೇಶದ “ಮಿರಾಕಲ್ ಇನ್ ಸೆಲ್ ನಂ.7”  ಸಿನಿಮಾದ ಮೊರೆಹೋಗಿ ತಮ್ಮ ಕ್ರಿಯಾಶೀಲತೆಗೆ ಆದಷ್ಟೂ ಕಡಿಮೆ  ಕೆಲಸ ಕೊಟ್ಟಿದ್ದಾರೆ ನಿರ್ದೇಶಕ ರವೀಂದ್ರನಾಥ್. ಮಗಳೇ ತನ್ನ ಸರ್ವಸ್ವ ವೆಂದು ಭಾವಿಸಿಕೊಂಡ  ಬುದ್ದಿಮಾಂದ್ಯ ತಂದೆಯೊಬ್ಬ ಅಪಾರ್ಥಕ್ಕೆ ಒಳಗಾಗಿ ಅಪರಾಧಿಯಾಗಿ ಜೈಲು ಸೇರುತ್ತಾನೆ. ಅಲ್ಲಿಯೂ ತನ್ನ ಮುಗ್ದತೆ , ಒಳ್ಳೆಯತನಗಳಿಂದ ಜೈಲರ್ ಆದಿಯಾಗಿ ಸೆಲ್ ನಲ್ಲಿದ್ದ ಕ್ರೂರ ಮನಸ್ಸಿನವರನ್ನು ಗೆಲ್ಲುತ್ತಾನೆ.ಇಂಥ ಕಥೆಯನ್ನ ರವೀಂದ್ರನಾಥ್ ಇನ್ನೂ ಭಾವನಾತ್ಮಕಾವಾಗಿ ಹೆಣೆಯಬಹುದಿತ್ತು. ತೀವ್ರತೆಯ ಕೊರತೆ ಕಾಣುತ್ತದೆ. ಸೆಲ್ನಲ್ಲಿರುವ ಖೈದಿಗಳಿಗೆ ಯಾವತ್ತಿಗೂ ಕೊಳೆಯೇ ಆಗದಂತ ಬಟ್ಟೆ ತೊಡಿಸಿ ಸಹಜತೆಯಿಂದ ದೂರಸರಿದಿದ್ದಾರೆ. ಮೊದಲಾರ್ಧ ಮುಗಿಯುವವರೆಗೂ ಕಥೆ ಚೆನ್ನಾಗಿದೆ ಸರಿ ಆದ್ರೆ ಹೇಳುವ ರೀತಿಯಲ್ಲಿ ಅಲ್ಲಲ್ಲಿ ಬೋರ್ ಹೊಡೆಸುತ್ತಾರೆ.

ಚಿತ್ರದಲ್ಲಿ ಭಾವಗೀತೆಯಂತ ಸುಮಧುರ ಗೀತೆಗಳ ಬಳಕೆ ಮುದನೀಡುವಂತಿದೆ. ಕಡೆಯ ಕಡೆಯ ಸನ್ನಿವೇಶಗಳಂತು  ಕರುಳು ಹಿಂಡುತ್ತವೆ. ರವೀಂದ್ರನಾಥ್ ಮುಂದಿನ ಚಿತ್ರಗಳಲ್ಲಿ ಸಹಜತೆಗೆ,ಸ್ವಂತಿಕೆಯನ್ನು ದುಡಿಸಿಕೊಂಡರೆ ಇನ್ನು ಸೊಗಸಾದ ಚಿತ್ರ ಮಾಡಬಹುದು.

ಅಭಿನಯ

pushpaka-vimana_145310009350

ರಮೇಶ್ ಅರವಿಂದರ ಪಾಲಿಗೆ ನೂರನೇ ಚಿತ್ರ ಒಳ್ಳೆಯ ಕಥೆಯೇ ಸಿಕ್ಕಿದೆ ಅನ್ನಬಹುದು (ರಿಮೇಕ್ ) ಇದುವರೆಗೆ ಅವರ ಬಹುತೇಕ ಎಲ್ಲ ಚಿತ್ರಗಳು ಸದಭಿರುಚಿಯ ಚಿತ್ರಗಳೇ. ‘ತ್ಯಾಗರಾಜ” ನ ಪಟ್ಟ ಕಳಚಿ, ತಾನೇ ನಿರ್ದೇಶನಕ್ಕೂ ನಿಂತು,ಅಭಿನಯಿಸಿ ಪ್ರೇಕ್ಷಕರನ್ನು ನಗೆಯಲ್ಲಿ ತೇಲಿಸಿದವರು ರಮೇಶ್. ಪುಷ್ಪಕ ವಿಮಾನದ ಬುದ್ಧಿಮಾಂದ್ಯ, ಮುಗ್ದ ,ಒಳ್ಳೆಯತನವೇ ಮೈವೆತ್ತಂಥ ಅಪ್ಪನಾಗಿ ಚೆನ್ನಾಗಿ ಅಭಿನಯಿಸಿದ್ದಾರೆ. ಮಗಳು 1..2..3 ಅಂದಾಗ ಕುಣಿಯುವ ದೃಶ್ಯದಲ್ಲಂತೂ ಕಣ್ಣುತುಂಬಿಸುತ್ತಾರೆ ರಮೇಶ್. ತನ್ನ ಕಂದನಿಗಾಗಿ ತನ್ನನ್ನೇ ಅರ್ಪಿಸಿಕೊಳ್ಳುವ ಅಪ್ಪನಾಗಿ ರಮೇಶ್ರನ್ನು ನೋಡುವಾಗ ನಮಗೂ ಇಂಥಾ ಅಪ್ಪ ಬೇಕು ಅನ್ನಿಸುತ್ತದೆ. ತನ್ನ ಕಟ್ಟ ಕಡೆಯ ಘಳಿಗೆಯಲ್ಲಿ “ಇಬ್ಬರಾ ಋಣ ತೀರಿತೆಂದು ತಬ್ಬಿಕೊಂಡಿತು ಕಂದನ” ಪುಣ್ಯಕೋಟಿಯ ಹಾಡು ನೆನಪಾಗುವಂತೆ ಅಭಿನಯಿಸಿದ್ದಾರೆ. ತನ್ನ ಮಗಳ ಭವಿಷ್ಯಕ್ಕಾಗಿ ತಾನಿಲ್ಲದೆಯೂ ಅವಳನ್ನು ಉಳಿಸುವ ಸಲುವಾಗಿ ಆಡುವ ಮಾತು  ಆಳಕ್ಕಿಳಿಯುತ್ತದೆ. ಆದರೆ ಒಂದು ಮಾತು ನೂರನೇ ಚಿತ್ರಕ್ಕಾದರೂ ರಮೇಶ್ ಅರವಿಂದ್ ಗೆ ಇದ್ದು ಗೆದ್ದು ಬರುವ ಬಲಿಷ್ಠ ಅಪ್ಪನ ಪಾತ್ರ ಸಿಗಬೇಕಿತ್ತು. ಅವರೊಳಗಿನ ಅದ್ಭುತ ನಟನಿಗೆ ರೆಕ್ಕೆ ಬಿಚ್ಚಿ ಹಾರಾಡುವ ಅವಕಾಶ ದೊರೆಯಬೇಕಿತ್ತು.

pushpaka-vimana_145310009320

ಯುವಿನ – ಮುದ್ದಾದ ಮಗು ನಿಜ. ಆದ್ರೆ ಅಭಿನಯದಲ್ಲಿ ತಲ್ಲೀನತೆ ಕಾಣುವುದಿಲ್ಲ. ಬೇಬಿ ಇಂದಿರಾಗೆ ಇಂಥಾ ಚೆಲುವಿರಲಿಲ್ಲ ನಿಜ. ಆದರೆ ನಟನೆ ! ಕೆಲವೊಮ್ಮೆ ಕೊಂಚ ಅತಿಯೆನಿಸಿದರು ಭಾವಪೂರ್ಣ ಅಭಿನಯವಿತ್ತು. ಯುವಿನಾಳಲ್ಲಿ ಅಂತ ತೀವ್ರತೆ ಕಾಣುವುದಿಲ್ಲ.

ಜೈಲರ್ ಪಾತ್ರದಲ್ಲಿ ರವಿ ಕಾಳೆ ಅಭಿನಯ ಚೆಂದವಿದೆ. ಭಾವಗಳನ್ನು ಉಕ್ಕಿಸುವ ಕಲೆಯು ಚೆನ್ನವಿದೆ.ಲಾಯರ್ ಪಾತ್ರದಲ್ಲಿ ರಚಿತಾ ರಾಮ್ ಅಭಿನಯವು ಓಕೆ.  ಸಂಗೀತ – ಚರಣ್ ಸಂಗೀತದ ಇಂಪು ಕಾಡುತ್ತದೆ.

ಸಂಭಾಷಣೆ – ಅಲ್ಲಲ್ಲಿ ಅವಶ್ಯಕವಿಲ್ಲದ, ನಗೆಯು ತರಿಸದ ಕೆಲವು ಸಾಲುಗಳನ್ನ ಹೊರತು ಪಡಿಸಿದರೆ ಗುರುಪ್ರಸಾದ್ ಸಂಭಾಷಣೆ ಚೆನ್ನಾಗಿದೆ.  ಅಪ್ಪ ಮಗಳಿಗೆ ಹೇಳುವ “ಸೂರ್ಯನ” ಉದಾಹರಣೆ  ಅದ್ಬುತ.

ದೋಷಗಳ ನಡುವೆಯೂ ನೋಡಬಹುದಾದ ಸಿನಿಮಾ ಪುಷ್ಪಕ ವಿಮಾನ.

 

 

ಕಲ್ಪನಾ- ೨ ಮೂವೀ ಹೇಗಿದೆ?

ಕಲ್ಪನಾ- ೨ ಫೋಟೋ - ಕಲ್ಪನಾ- ೨ ಚಿತ್ರದಲ್ಲಿ ಉಪೇಂದ್ರ , ಪ್ರಿಯಾಮಣಿ
ಕಲ್ಪನಾ-೨ ಚಿತ್ರದಲ್ಲಿ ಉಪೇಂದ್ರ , ಪ್ರಿಯಾಮಣಿ

ಉಪೇಂದ್ರ ಅಭಿನಯದ ಕಲ್ಪನಾ-೨ ತೆರೆಗೆ ಬಂದಿದೆ.

ಕಲ್ಪನಾ-೨ ತಮಿಳಿನಲ್ಲಿ ಲಾರೆನ್ಸ್ ರಾಘವ ನಟಿಸಿದ್ದ ಕಾಂಚನಾ ಸಿನಿಮಾವನ್ನು ಈ ಹಿಂದೆ ‘ಕಲ್ಪನಾ’ ಹೆಸರಿನಲ್ಲಿ ರಿಮೇಕ್ ಮಾಡಿದ್ದರು. ಚಿತ್ರ ಯಶಸ್ವಿಯಾಗಿತ್ತು. ನಂತರ ಲಾರೆನ್ಸ್ ರಾಘವ ‘ಮುನಿ-೨ ಕಾಂಚನಾ’ ಎನ್ನುವ ಸಿನಿಮಾ ಮಾಡಿದ್ದರು. ಇಲ್ಲೂ ಅದನ್ನು ‘ಕಲ್ಪನಾ-೨’ ಹೆಸರಿನಲ್ಲಿ ತಯಾರು ಮಾಡಲಾಗಿದೆ.

ಈ ಚಿತ್ರವನ್ನು ರಿಮೇಕ್ ಸಿನಿಮಾಗೇ ಫೇಮಸ್ಸಾಗಿರುವ ಅನಂತರಾಜ ನಿರ್ದೇಶಿಸಿದ್ದಾರೆ.

ತಮಿಳಿನಲ್ಲಿ ಹಾಸ್ಯ ಸಿನಿಮಾ ಮಾಡಿದರೂ, ಕಾಮಿಡಿ ಚಿತ್ರ ತೆಗೆದರೂ ಅದರಲ್ಲೊಂದು ಸಾಮಾಜಿಕ ಸಂದೇಶವನ್ನು ಬೆರೆಸುವ ಸಂಪ್ರದಾಯವಿದೆ. ಹೀಗಾಗಿ ಚಿತ್ರ ಹಾರರ್ ಮತ್ತು ಕಾಮಿಡಿ ಬೆರೆತ ಚಿತ್ರವಾದರೂ ಅದರಲ್ಲೊಂದು ಮೆಸೇಜ್ ಇದೆ.

ಕಲ್ಪನಾ ಚಿತ್ರದಲ್ಲೂ ಮಂಗಳಮುಖಿಯರ ಸಮಸ್ಯೆಗಳನ್ನು ಹೇಳುತ್ತಲೇ, ಅವರಿಗಾದ ಅನ್ಯಾಯದ ವಿರುದ್ಧ ರಿವೇಂಜ್ ತೀರಿಸಿಕೊಳ್ಳುವ ಕಥೆ ಹೇಳಲಾಗಿತ್ತು.

ಕಲ್ಪನಾ-೨ ಕಥೆ – ನಿರ್ದೇಶನ

ಕಲ್ಪನಾ-೨ ರಲ್ಲಿ ಸಹಾ ಅಂಗವಿಕಲೆಯೊಬ್ಬಳನ್ನು ಮನೋವೇದನೆಯನ್ನು, ಅವರ ಸಂಕಟ, ಅಸಮಧಾನಗಳನ್ನು ತೆರೆದಿಡಲಾಗಿದೆ.

ತಾನೂ ಎಲ್ಲರಂತೆ ಮದುವೆಯಾಗಬೇಕು’ ಎಂದು ಬಯಸುವ ಕಲ್ಪನಾ ಪ್ರೀತಿಸಿದ ಹುಡುಗ ಜಡೆ ಶಿವ (ಉಪೇಂದ್ರ-೨) ಜೈಲು ಸೇರಿರುತ್ತಾನೆ.

ಅವಳಪ್ಪ ಮತ್ತೊಬ್ಬ ಹುಡುಗನೊಟ್ಟಿಗೆ ಮದುವೆ ಫಿಕ್ಸ್ ಮಾಡುತ್ತಾನೆ. ಕುತಂತ್ರಿಗಳಿಗೆ ಹೆದರಿದ ಹುಡುಗ ಹಸೆಮಣೆಯಿಂದ ಎದ್ದು ಮದುವೆಯನ್ನು ಧಿಕ್ಕರಿಸಿ ಹೊರಡುತ್ತಾನೆ.

ಕಲ್ಪನಾ-೨ ಚಿತ್ರದಲ್ಲಿ ಉಪೇಂದ್ರ ಹಾಗು ಪ್ರಿಯಾಮಣಿ
ಕಲ್ಪನಾ-೨ ಚಿತ್ರದಲ್ಲಿ ಉಪೇಂದ್ರ ಹಾಗು ಪ್ರಿಯಾಮಣಿ

ನಂತರ ಜೈಲಿನಿಂದ ಬಿಡುಗಡೆಯಾದ ಜಡೆ ಶಿವ ಇನ್ನೇನು ಆಕೆಯನ್ನು ಮದುವೆಯಾಗಬೇಕು ಎನ್ನುವಷ್ಟರಲ್ಲಿ ಕ್ರೂರಿಗಳ ಮೋಸಕ್ಕೆ ಬಲಿಯಾಗಿ ತನ್ನ ಹುಡುಗಿ ಸಮೇತ ಜೀವಬಿಡುತ್ತಾನೆ.

ಖಾಸಗಿ ವಾಹಿನಿಯಲ್ಲಿ ಕ್ಯಾಮೆರಾಮನ್ ಆಗಿ ಕಾರ್ಯನಿರ್ವಹಿಸುವ ರಾಘವ (ಉಪೇಂದ್ರ-೧) ಸ್ವಭಾವತಃ ಪರಮ ಪುಕ್ಕಲ, ಆದರೆ ಕಾರ್ಯಕ್ರಮವೊಂದರ ನಿರ್ದೇಶಕಿ ಅವಂತಿಕಾ ಶೆಟ್ಟಿ ಮೇಲಿನ ಪ್ರೀತಿಯ ಕಾರಣಕ್ಕೆ ಭೂತ ಬಂಗಲೆಯ ಕುರಿತ ಕಾರ್ಯಕ್ರಮ ಶೂಟ್ ಮಾಡಲು ತೆರಳುತ್ತಾನೆ.

ಅಲ್ಲಿ ಸತ್ತುಮಲಗಿದ ಕಲ್ಪನಾಳ ಪ್ರೇತ ಮತ್ತು ಜಡೆ ಶಿವನ ಆತ್ಮಗಳು ಒಟ್ಟು ಸೇರಿ ಈ ವಾಹಿನಿಯ ತಂಡದವರನ್ನು ಆಟಾಡಿಸಲು ಶುರು ಮಾಡುತ್ತವೆ.

ಈ ಪ್ರೇಮಿ ಪ್ರೇತಗಳಿಂದ ಎಲ್ಲರೂ ಹೇಗೆ ಪಾರಾಗುತ್ತಾರೆ ಅನ್ನೋದರ ನಡುವೆ ಭಯಂಕರ ಹಾರರ್ ಸನ್ನಿವೇಶಗಳೂ, ಕಾಮಿಡಿ ದೃಶ್ಯಗಳೂ, ಸೆಂಟಿಮೆಂಟೆಲ್ಲವೂ ಬಂದುಹೋಗುತ್ತವೆ.

ಕಲ್ಪನಾ-೨ ಪಾತ್ರವರ್ಗ ಹಾಗು ನಟನೆ

ಪ್ರಿಯಾಮಣಿ ಅಂಗವಿಕಲೆಯ ಪಾತ್ರದಲ್ಲಿ ಮನೋಜ್ಞವಾಗಿ ನಟಿಸಿದ್ದಾರೆ.

ಎರಡೋ ಮೂರೋ ದೃಶ್ಯಗಳಲ್ಲಿ ಕಂಡರೂ ನಟ ಪೆಟ್ರೋಲ್ ಪ್ರಸನ್ನ ನಟನೆ ಫೆಂಟಾಸ್ಟಿಕ್. ಪ್ರಕಾಶ್ ಹೆಗ್ಗೋಡು, ಮುನಿ, ಕುರಿ ರಂಗ, ಕುರಿ ಪ್ರತಾಪ, ಶೋಭರಾಜ್ ಎಲ್ಲರೂ ಎಷ್ಟೋ ಅಷ್ಟು ನಟಿಸಿದ್ದಾರೆ.

ಅವಂತಿಕಾ ತಮ್ಮ ಅಭಿನಯದಿಂದ ಮನ ಸೆಳೆಯುತ್ತಾರೆ.

ಈ ಚಿತ್ರದ ಕಲಾನಿರ್ದೇಶನ ಮಾಡಿರುವ ಬಾಬು ಖಾನ್ ಅವರಿಗೆ ಒಂದು ಮಾರ್ಕು ಹೆಚ್ಚೇ ನೀಡಬಹುದು.

ಚಿತ್ರದ ಮೊದಲರ್ಧ ವೇಗವಾಗಿದೆ ಅನಿಸಿದರು, ಉಳಿದರ್ಧ ಭಾಗ ಸ್ವಲ್ಪ ಹದ ತಪ್ಪಿದೆ  ಹಾಗು ಜಾಳು ಎನಿಸುತ್ತದೆ.

ಕ್ಲೈಮ್ಯಾಕ್ಸ್ ಹಾಡಿನ ಸೆಟ್ ಅಂತೂ ಸಖತ್ತಾಗಿದೆ. ಎಂ.ಆರ್.ಸೀನು ಕ್ಯಾಮೆರಾ ಕೂಡಾ ಸುಂದರವಾಗಿದೆ.

ಅರ್ಜುನ್ ಜನ್ಯ ಅವರ ಸಂಗೀತ ಮತ್ತು ಹಿನ್ನೆಲೆ ಸ್ವಲ್ಪ ಜಾಸ್ತಿ ಅನಿಸುತ್ತೆ. ನಿರ್ದೇಶಕರ ಬಗ್ಗೆ ಹೆಚ್ಚು ಹೇಳುವ ಅಗತ್ಯವಿಲ್ಲ. ಹೆಚ್ಚೂ ಕಮ್ಮಿ ಫ್ರೇಮ್ ಟು ಫ್ರೇಮ್ ಮೂಲ ಸಿನಿಮಾವನ್ನೇ ಯಥಾವತ್ತಾಗಿ ಇಳಿಸಿದ್ದಾರೆ ಎನ್ನಬಹುದು .

ಒಟ್ಟಾರೆ ಪರಿಪೂರ್ಣ ಮನರಂಜನಾ ಸಿನಿಮಾ ಇದಾಗಿದೆ.

ನೀವು ಚಿತ್ರ ನೋಡಿದಿರಾ? ಹೌದಾದರೆ ನಿಮ್ಮ ಅಭಿಪ್ರಾಯವನ್ನು ಕಾಮೆಂಟ್ ನಲ್ಲಿ ತಿಳಿಸಿ , ಧನ್ಯವಾದಗಳು.

ಸಿನಿಮಾ ಹಾಗು ಮನರಂಜನೆ ಸುದ್ದಿಗಳನ್ನು ಓದಲು ಸಿನಿಅಡ್ಡ.ಕಂ ಫಾಲೋ ಮಾಡಿ.

ಕಿರಿಕ್ ಪಾರ್ಟಿ ಎಂಬ ಕಲರ್ ಕಲರ್ ಪಾರ್ಟಿ !!

2016ಕ್ಕೆ ವಿದಾಯ ಹೇಳುವ , ಹೊಸ ವರುಷವನ್ನು ಸ್ವಾಗತಿಸುವ ಹೊತ್ತಲ್ಲಿ ಬಂದಿದೆ ಕಿರಿಕ್ ಪಾರ್ಟಿ .ರಕ್ಷಿತ್ ಶೆಟ್ಟಿ ರಿಷಬ್ ಶೆಟ್ಟಿ ತಂಡ “ಥ್ಯಾಂಕ್ಸ್ ಹೇಳಿ  ವಯಸ್ಸಿಗೆ ಹೋಗೋಣ ಕಾಲೇಜಿಗೆ” (ಪ್ರೇಮಲೋಕ)ಅಂತ ಎಲ್ಲರನ್ನು ಕರೆದು ಕಿರಿಕ್ ಪಾರ್ಟಿ ಯಲ್ಲಿ ಕಿಲಕಿಲ ನಗುತುಂಬಿ ಕೊಡ್ತಿದ್ದಾರೆ.

kirik-2 ಕೊಂಚ ಮಟ್ಟಿಗೆ ಪ್ರೇಮಲೋಕ, ಥ್ರೀ ಈಡಿಯಟ್ಸ್ ನೆನಪಿಸುವ ಕಿರಿಕ್ ಪಾರ್ಟಿ  ಹೊಸತನದಿಂದ ತನ್ನ ತನವನ್ನೂ ಕಾಯ್ದುಕೊಂಡಿದೆ. ಕಾಲೇಜುರಂಗದಲ್ಲಿ ನಡೆಯುವ ಬಾಸಿಸಂ, ಎಲೆಕ್ಷನ್, ಒಬ್ಬಳೇ ಹುಡುಗಿಯ ಮೇಲೆ ಇದ್ದಬದ್ದವರೆಲ್ಲ ಕಣ್ಣು ಹಾಕುವುದು, ಆಟ-ಹುಡುಗಾಟ,ಹುಡುಕಾಟ ,ಹೊಡೆದಾಟ ,ಬಡಿದಾಟ  ಚೇಷ್ಟೆ ,ತುಂಟಾಟ, ಮೇಷ್ಟ್ರಿಗೆ ನಿಲ್ಲದ ಕಾಟ, ಎಲ್ಲ ಎಲ್ಲವನ್ನೂ ಒಂದು ಕ್ಷಣವೂ ಬೋರ್ ಎನಿಸದ ಹಾಗೆ ಕಟ್ಟಿಕೊಟ್ಟಿದೆ ಕಿರಿಕ್ ಪಾರ್ಟಿ. ನೀವು ಎಂಜಿನಿಯರ್ ಕಾಲೇಜ್ ಗಾದರೂ ಹೋಗಿ ಮೆಡಿಕಲ್ ಕಾಲೇಜ್ ಗಾದರೂ ಹೋಗಿ ಎಲ್ಲೇ ಹೋದರು ಮನಸ್ಥಿತಿಗಳೇನು ಬದಲಾಗಲ್ಲ. ಆ ವಯಸ್ಸೇ ಅಂಥಾದ್ದು. ಕಾಲೇಜು  ಮುಗಿದವರಿಗೆ ನೆನಪುಗಳ ಸಂತೆಗೆ ಕರೆದೊಯ್ಯುವ ಕಿರಿಕ್ ಪಾರ್ಟಿ ಈಗ ಕಾಲೇಜಿನ ಕಲರ್ ಕಲರ್ ದಿನಗಳಲ್ಲಿ ಇರೋವಂತವರಿಗೂ ಮಜಾ ಕೊಟ್ಟು ಮತ್ತೆ ಬನ್ನಿ ಅಂತ ಕರೆಯುತ್ತೆ.

ನಿರ್ದೇಶನ

kirik-rishab  ಕಥೆ ಹೇಳುವ ಕಲೆಗೆ ಮೆಚ್ಚುಗೆ ಕೊಡಲೇಬೇಕು. ಎರಡು ಗಂಟೆ ನಲವತ್ತು ನಿಮಿಷ ಸರಸರನೆ ಸರಿದು ಅಂಗೈಯೊಳಗಿನ ನೀರಿನಂತೆ ಹರಿದು ಹೋಗುವುದು ಗೊತ್ತೇ ಆಗುವುದಿಲ್ಲ. ಈ ಕಾಲದಲ್ಲಿ ಕನ್ನಡ ಪ್ರೇಕ್ಷಕನನ್ನ ಇಷ್ಟು ಕಾಲ ಹಿಡಿದಿಟ್ಟುಕೊಳ್ಳುವುದು ಸುಲಭವಲ್ಲ. ಪಾತ್ರವೊಂದನ್ನು ಬೆಳೆಸುತ್ತಾ ಹೋಗುವ ರೀತಿಯು ಪ್ರಶಂಸನೀಯ. ನಾಯಕ ಕರ್ಣನ ವ್ಯಕ್ತಿತ್ವ ವನ್ನು ಅರಳಿಸುವ ಸಣ್ಣ ಸಣ್ಣ ತಿರುವುಗಳು ಮನಸ್ಸಿಗೆ ತಟ್ಟುತ್ತವೆ. ಪ್ರತಿ ಪಾತ್ರವನ್ನು ಅದ್ಭುತವಾಗಿ ದುಡಿಸಿಕೊಂಡಿದ್ದಾರೆ ರಿಷಬ್. ಕರ್ಣ ,ಸಾನ್ವಿ ಪ್ರೀತಿ ಕ್ಷಣ ಕಾಲವಾದರು ಇಡೀ ಸಿನಿಮಾ ಆಕೆಯನ್ನು ಮಿಸ್ ಮಾಡಿಕೊಳ್ಳುವಂತೆ ಮಾಡುತ್ತದೆ. ಪ್ರೀತಿ ಶುರುವಾಗುವ ಘಳಿಗೆಯ ಮುಗ್ದತೆ ಆಹಾ..ಅಲ್ಲೊಂದು ಕಾಡುವ ತಂಗಾಳಿಯಂಥ ಎಚ್ ಎಸ್ ವೆಂಕಟೇಶ್ ಮೂರ್ತಿಯವರ “ತೂಗು ಮಂಚದಲ್ಲಿ ಕೂತು ” ಹಾಡು . ನಿಜಕ್ಕೂ ತಿಳಿಗಾಳಿ ಸವರಿದಂಥ  ಅನುಭವ ಕೊಡುವುದರಲ್ಲಿ ಸಂಶಯವಿಲ್ಲ.  ಆಕೆ  ಇಲ್ಲವಾದ  ಮೇಲೆ ಇಲ್ಲಸಲ್ಲದ ಅಪವಾದ, ಸಂಕುಚಿತ ಮನಸ್ಥಿತಿಯ ಮಾತುಗಳು ಇಂದಿನ ಸಮಾಜಕ್ಕೂ ಕನ್ನಡಿ. ಅಲ್ಲಿ ಬಳಸಿರುವ ಹಾಡು “ನೀಚ ಸುಳ್ಳು ಸುತ್ತೋ ನಾಲಿಗೆ ನಿನ್ನ ಸೀಳುವ ರೋಷ ಉಕ್ಕಿದೆ” ಅದ್ಬುತ. ಫೈಟಿಂಗ್ ದೃಶ್ಯದ ಕ್ರಿಕೆಟ್ ಕಾಮೆಂಟ್ರಿಯಂತೂ ಹೊಡೆದಾಟ ಬಡಿದಾಟ ಇಷ್ಟಪಡದವರಿಗೂ ಒಂದಿಷ್ಟು ಮಜಾ ಕೊಡುತ್ತವೆ. ಸದಭಿರುಚಿಯ ತಿಳಿತಿಳಿ ಹಾಸ್ಯ,ವಿನೋದ ಪ್ರಜ್ಞೆ ಹೇಗಿರಬೇಕು ಅನ್ನೋದಕ್ಕೆ ಈಗಿನ ಹಲವರಿಗೆ ಕಿರಿಕ್ ಪಾರ್ಟಿ ಅತ್ಯುತ್ತಮ ಮಾದರಿ. ಮುಜುಗರ ಅನ್ನೋ ಮಾತಿಗೆ ಇಲ್ಲ ತಾವಿಲ್ಲ.

ಅಭಿನಯ 

ರಕ್ಷಿತ್ ಶೆಟ್ಟಿ ಕನ್ನಡ ಸ್ವಲ್ಪ ತೇಲುಗನ್ನಡ. ರಶ್ಮಿಕಾ ಕನ್ನಡವೂ ಹಾಗೇ ಇದೆ. ಆದರೆ ಅದೆಲ್ಲವನ್ನೂ ಮೀರಿ ಮಿರಿ ಮಿರಿ ಮಿಂಚುವಂಥ  ನಟನೆ ರಕ್ಷಿತ್ ಶೆಟ್ಟಿಯದ್ದು. ಮೊದಲಾರ್ಧದ ತುಂಟ ಹುಡುಗನ ಪಾತ್ರದ ಹಾವಭಾವ ನಂಗೆ ನೀ ಇಷ್ಟ ಕಣೋ ಅಂತ ಚಿತ್ರ ನೋಡ್ತಿರೋ ಬಹುತೇಕರು ತಮ್ಮತಮ್ಮಲ್ಲೇ ಅಂದುಕೊಳ್ಳುವಂತೆ ಮಾಡುತ್ತದೆ. ದ್ವೀತೀಯಾರ್ಧದಲ್ಲಿ ಕಟ್ಟು ಮಸ್ತಾಗಿ ಖಡಕ್ ಆಗಿ ಕಾಣುವ ರಕ್ಷಿತ್ ಅಭಿನಯದಲ್ಲಿ ಸಿಕ್ಸ್ರರ್ ಬಾರಿಸಿದ್ದಾರೆ. ಸಿನಿಮಾ ನೋಡ್ತಾ ನೋಡ್ತಾ ಈ ಹುಡುಗ ಅಮೀರ್ ಖಾನ್ ಥರ ಬೆಳೀಬೇಕು ಅಂತನ್ನಿಸಿತು. ಆತನ ಬಾಡಿ ಲಾಂಗ್ವೆಜ್ ನಿಜಕ್ಕೂ ಚೆನ್ನ.

kirik-rashmika

ಸಾನ್ವಿಯಾಗಿ ರಶ್ಮಿಕಾದು ತುಂಬಾ ಒಳ್ಳೆಯ ಪಾತ್ರ. ಆಕೆಯ ಅಭಿನಯದ ಸೊಗಸು ಚೆಂದ. ನಾಯಕನ ಸಮಸಮಕ್ಕ್ಕೆ ನಟಿಸುತ್ತಿರುವಾಗ ಕನ್ನಡಕ್ಕೆ ಒಳ್ಳೆ ಸೊಗಸಾದ ನಟಿ ಸಿಕ್ತಿದ್ದಾಳೆ ಅನ್ನೋ ಭರವಸೆ ಮೂಡಿಸಿದ್ದಾರೆ.

kirik-party-heroins

ಆರ್ಯಳಾಗಿ ಪ್ರವೇಶ ಪಡೆದುಕೊಳ್ಳುವ ಸಂಯುಕ್ತಾ ಹೆಗಡೆ ಲವಲವಿಕೆಯಿಂದ ಸವಾಲು ಸ್ವೀಕರಿಸಿದಂತೆ ನಟಿಸಿದ್ದಾರೆ . ರಿಷಬ್ ಕನ್ನಡಕ್ಕೆ ಇಬ್ಬರು ಒಳ್ಳೆಯ ನಟಿಯರನ್ನು ಕೊಟ್ಟಂತಾಗಿದೆ.

kirik-hanumantekirik-achyuth

ಯಾವ ಪಾತ್ರ ಕೊಟ್ರು ಸೈ ಸೈ ಅನ್ನಿಸುವಂತೆ ನಟಿಸುವ ಅಚ್ಯುತ್ ಕುಮಾರ್ ಇಲ್ಲೂ ಇಷ್ಟವಾಗುತ್ತಾರೆ. ಮಂಗಳೂರಿನ ಉಚ್ಚಾರಣೆ ಇನ್ನು ಸ್ಪಷ್ಟವಾಗಿದ್ದರೆ ಹಿತವಿರುತ್ತಿತ್ತು. ಪ್ರಿನ್ಸಿಪಾಲ್ ಪಾತ್ರದ ಹನುಮಂತೇ ಗೌಡರು ಪಾತ್ರಕ್ಕೆ ಹೇಳಿ ಮಾಡಿಸಿದಂತಿದ್ದಾರೆ. ಅವರ ಧ್ವನಿ ಶಕ್ತಿಯ ಬಗ್ಗೆಯಂತೂ ಹೇಳಲೇ ಬೇಕಿಲ್ಲ.

kirik-party-team

ಕರ್ಣನ ಸ್ನೇಹಿತರ ಪಾತ್ರ ಮಾಡಿರುವ ಪ್ರತಿಯೊಬ್ಬರ ಅಭಿನಯವು ಚೆಂದ ಚೆಂದ . ಇಲ್ಲಿ ಎಲ್ಲರೂ ಮುಖ್ಯರಂತೆ ಕಾಣುತ್ತಾರೆ.

kirik-ajaneesh

ಸಂಗೀತ ನಿರ್ದೇಶನಕ್ಕೆ ಅಜನೀಶ್ ಗೆ ಒಂದು ನಮಸ್ಕಾರ . ಹಿತವಾದ ಹಿನ್ನೆಲೆ ಸಂಗೀತದ ಜೊತೆಗೆ ಹಾಡುಗಳ ಸಂಯೋಜನೆಯು ಮಧುರ. ಗೀತರಚನೆಕಾರರು, ಹಾಡುಗಾರರು ಮೆಚ್ಚುಗೆಗೆ  ಅರ್ಹರು.

ಪ್ರತೀ  ಫ್ರೇಮ್ ಇಷ್ಟವಾಗುವ ಹಾಗೆ ಪೋಣಿಸಿರುವ ಸಿನಿಮ್ಯಾಟೊಗ್ರಾಫರ್ ಮನೋಹರ್ , ಒಂದಿಷ್ಟೂ ಇರುಸು ಮುರುಸಾಗಿಸದೆ ನಗುವಿನ ಅಲೆಯಲ್ಲಿ ತೇಲಿಸುವ ಸಂಭಾಷಣಕಾರನಿಗೂ ಒಂದು ಸಲಾಂ.

ಈ ಹುಡುಗರು ಕನ್ನಡ ಚಿತ್ರರಂಗಕ್ಕೆ ಹೊಸತನ ತುಂಬಿಕೊಟ್ಟಿದ್ದಾರೆ. ಕಿರಿಕ್ ಪಾರ್ಟಿ ಅಂತ ಹೆಸರಿಟ್ಟು ಬಣ್ಣ ಬಣ್ಣಗಳ ಕಲರ್ ಫುಲ್ ಪಾರ್ಟಿ ಕೊಟ್ಟಿದ್ದಾರೆ. ಟ್ರೈಲರ್ ಬಿಡುಗಡೆ ಸಂದರ್ಭದಲ್ಲಿ ciniadda.com ಜೊತೆ ಮಾತಾಡಿದಾಗ  ಒಂದು  ಒಳ್ಳೆ  ಚಿತ್ರ ಕೊಡ್ತೀವಿ ಅಂತ ಹೇಳಿದ್ದ ರಕ್ಷಿತ್ ಶೆಟ್ಟಿ ಮಾತು ಉಳಿಸಿಕೊಂಡಿದ್ದಾರೆ . ಶುಭವಾಗಲಿ ತಂಡಕ್ಕೆ.

kirik-party-1 ಕಿರಿಕ್ ಪಾರ್ಟಿ ನೋಡಿ . ಕಿಲ ಕಿಲ ನಗು ತುಂಬಿಕೊಳ್ಳಿ. ಹಗುರಾಗಿ ಹೊಸ ವರುಷವನ್ನು ಸ್ವಾಗತಿಸಿ.

-ಭಾನುಮತಿ ಬಿ ಸಿ

 

“1/4 kg ಪ್ರೀತಿ” ಹಿಂಗೈತಪ್ಪ .

‘1/4 ಕೆಜಿ ಪ್ರೀತಿ” ಹದಿಹರೆಯದಲ್ಲಿ ಪುಟಿಯುವ ಪ್ರೀತಿಯ ಕಥಾನಕ. ಪ್ರೀತಿಯ  ಕಥೆಗಳು ಎಷ್ಟೇ ಬಂದರೂ ಒಂದೊಂದು ಭಾವಾಭಿವ್ಯಕ್ತಿಯು ವಿಭಿನ್ನ . ಇಲ್ಲಿ ಯವ್ವನದಲ್ಲಿ ಜಿಗಿಜಿಗಿವ ಪ್ರೀತಿಯನ್ನು ಪಯಣಿಸುತ್ತಾ ಬೆಳೆಸುವ ಪ್ರಯತ್ನವಿದೆ.

ನಿರ್ದೇಶನ:

16997850_1838088716408062_8961386620895110134_n

ಪ್ರವಾಸವೆಂದರೆ ಕಾಲಿಗೆ ಚಕ್ರ ಕಟ್ಟುವ ನಿರ್ದೇಶಕ ಸತ್ಯಶೌರ್ಯ ಸಾಗರ್ ಯೋಗರಾಜ್ ಭಟ್ಟರ ಸಲಹೆಯಂತೆ ಚಿತ್ರಕ್ಕೆ  ‘1/4 ಕೆಜಿ ಪ್ರೀತಿ” ಅಂತ ಹೆಸರಿಟ್ಟದ್ದು ಸರಿಯಾಗೇ ಇದೆ. ಇದೊಂಥರ ಕಾಲೇಜು ದಿನಗಳಲ್ಲಿ ಸಾಮಾನ್ಯವಾಗಿ ಎಲ್ಲ ಹುಡುಗರಲ್ಲೂ ಹುಟ್ಟುವ ಹಸಿ ಹಸಿ  ಪ್ರೀತಿ. ಅವಳ ಒಂದು ನೋಟಕ್ಕಾಗಿ, ನಗೆಗಾಗಿ, ಸಮ್ಮತಿಗಾಗಿ ಹಾತೊರೆಯುವ ಯುವಕರ ಮನಸ್ಸಿನ ಕನ್ನಡಿ. ಸಾಮಾನ್ಯವಾಗಿ ಕಾಲೇಜು ಅಂದಮೇಲೆ ಹೀರೋ ವಿಲನ್ ಮಧ್ಯೆ ಒಂದಿಷ್ಟು ಗಲಾಟೆ , ಗುದ್ದಾಟ, ಸೇಡು, ಪ್ರತಿಕಾರ ಇವೆಲ್ಲ ಸಿನಿಮಾದಲ್ಲಿ ನೋಡ್ತಾ ಬಂದಿದ್ದೇವಲ್ಲ.  ‘1/4 ಕೆಜಿ ಪ್ರೀತಿ”ಯಲ್ಲಿ ಅದ್ಯಾವುದು ಇಲ್ಲ. ತಣ್ಣಗೆ ಹರಿಯುತ್ತಾ  ಆಗೀಗ ಸಣ್ಣ ಗುಡ್ಡ ಹತ್ತಿಳಿವಾಗ ಕೊಸರಾಡುವ ನದಿಯಂಥಾ ಸಿನಿಮಾ. ಅತಿಯಾಗಿ ನಾಯಕನನ್ನು ವಿಜೃಂಭಿಸದೆ ಸಹಜತೆಗೆ ಒತ್ತುಕೊಡಲು ಪ್ರಯತ್ನಿಸಿದಂತಿದೆ. ಬದುಕಿನ ದೃಷ್ಟಿ ಕೋನವನ್ನೇ ಬದಲಿಸಬಲ್ಲ ಪಯಣದ  ಮೂಲಕ ಪ್ರೀತಿಯನ್ನು ಅರಳಿಸುವ ಪ್ರಯತ್ನಕ್ಕೆ ಸತ್ಯಶೌರ್ಯ ಸಾಗರ್ ಹೊರಟಿದ್ದರೂ  ನೋಡುಗರಿಗೆ ರೋಮಾಂಚನವೆನಿಸುವ ತಿರುವುಗಳನ್ನು ಹೆಣೆಯುವುದರಲ್ಲಿ ಯಶಸ್ಸು ಕಂಡಿಲ್ಲ. ದೃಶ್ಯ ಕಟ್ಟುವ ಕಲೆಯಲ್ಲೂ ಪರಿಣಿತಿ ಸಾಧಿಸಬೇಕಿದೆ. ಭಾವಲೋಕದಲ್ಲಿ ಹಿಡಿದಿಟ್ಟುಕೊಳ್ಳುವ ಸಂಭಾಷಣೆ ಸಾಧಿಸಿಕೊಂಡಿದ್ದರೆ ಚೆನ್ನವಿತ್ತು.

ನಿಹಾನ್ ಎಂಬ ಲವ್ ಲವಿಕೆಯ ನಟ

maxresdefault‘1/4 ಕೆಜಿ ಪ್ರೀತಿ” ಸಿನಿಮಾ ಅಲ್ಪಸ್ವಲ್ಪ ಇಷ್ಟವಾಗಿ ಸಿನಿಮಾ ಮುಗಿಯುವವರೆಗೂ ಪ್ರೇಕ್ಷಕರನ್ನ ಮಂದಿರದಲ್ಲಿ ಪಟ್ಟಾಗಿ ಕೂರಿಸೋ ಲವ್ ಲವಿಕೆಯ ಅಭಿನಯ ನಾಯಕ ನಿಹಾನ್ ಗೌಡ ಅವರದ್ದು.  ಮೂಗಿನ ತುದಿಯಲ್ಲೇ ಕೋಪ ಒಂಥರಾ ಬೇಕಾಬಿಟ್ಟಿ ಅಶಿಸ್ತಿನ ಅವತಾರ ಪುರುಷನಾಗಿದ್ದ ಕಾಲೇಜು ಹುಡುಗ ಗುರು ತಾನು ಮೆಚ್ಚಿದ ಹುಡುಗಿಗಾಗಿ ಶಿಸ್ತಿನ ಸಿಪಾಯಿ..ಕರೆದಲ್ಲಿಗೆ ಬರುವ ಕಾಮಧೇನು.. ಓಹ್ .. ಒಳ್ಳೆ ಹುಡುಗ ಹೀಗೆ ಬದಲಾಗುವ ಭಾವಗಳನ್ನು ಕಣ್ಣಲ್ಲೇ ಬಿಂಬಿಸಿದ್ದಾರೆ ನಿಹಾನ್. ಹುಟ್ಟಿದ ಪ್ರೀತಿಯನ್ನ ಹೇಳಿದರೆಲ್ಲಿ ಸರಿದು ಹೋದಿತೋ ಎಂಬ ಆತಂಕದ ಸನ್ನಿವೇಶದ ಜೊತೆಗೆ ಹೇಳದೆ ಇರಲಾರೆನೆಂಬ ತಹತಹದ ದೃಶ್ಯಗಳಲ್ಲೂ ನಿಹಾನ್ ನೀರು ಕುಡಿದಷ್ಟೇ ಸಹಜವಾಗಿ ಅಭಿನಯಿಸಿದ್ದಾರೆ. ಬಿಗಿದಪ್ಪಿ ಬಾಳಸಂಗಾತಿಯಾಗಬಾರದೇ ಎಂಬ ಕನಸಿನ ಕನ್ಯೆ ತನ್ನ ಪಕ್ಕದಲ್ಲೇ ಕುಳಿತು ಪಯಣಿಸುತ್ತಿದ್ದರೂ ಹೇಳಲಾರದ ,ತಾಳಲಾರದ ಚಡಪಡಿಕೆಯ ಘಳಿಗೆಗಳು, ತನ್ನ ಪ್ರೀತಿ ಗೊತ್ತಾದ ಮೇಲೆಯೂ ಆಟವಾಡಿಸುವ, ಅಪಹಾಸ್ಯ ಮಾಡುವ ನಾಯಕಿ ಶ್ರೀ ಯ ಜೊತೆಗಿನ ಕಚಕಚ ಕಿತ್ತಾಟ , ಸಿಟ್ಟು ,ಸೆಡವು , ಕಿರಿಕಿರಿಪಿರಿಪಿರಿ ಕ್ಷಣಗಳಲ್ಲೂ ವಿಹಾನ್ ನಟನೆ ಇಷ್ಟವಾಗುವಂಥದ್ದು . ಸೇರಿಗೆ ಸವ್ವಾಸೇರಿನಿಸುವಂಥ ಮಾತುಗಳನ್ನು ಪಟಪಟನೆ ಸಿಡಿಸುವಂಥ ಧ್ವನಿಯ ಏರಿಳಿತವಿರುವ ನಿಹಾನ್ ಗೆ ಗಟ್ಟಿ ಸಂಭಾಷಣೆ ಸಿಗಬೇಕಿತ್ತು. ಹೊಳೆಪುಗಣ್ಣಿನ ಚೆಲುವ ನಿಹಾನ್ ಕಣ್ಣಿನಲ್ಲೇ ಕಲೆ ಅರಳಿಸುವ ಕಲಾವಿದನಾಗುವ ಲಕ್ಷಣಗಳನ್ನಂತೂ ತೋರಿದ್ದಾರೆ. ಹಾವಭಾವಗಳು ಮತ್ತಷ್ಟು ಮಸೆಯಬೇಕಿದೆ. ಕಡೆಕಡೆದು ಕಲ್ಲು ಕಲಾಕೃತಿಯಾಗುವ ಹಾಗೆ ಪ್ರತಿಭೆಯನ್ನು ಪಳಗಿಸಿಕೊಳ್ಳಬೇಕಷ್ಟೆ.

ಹಿತವಾದ ಅಭಿನಯ

hqdefault ನಾಯಕಿ “ಶ್ರೀ” ಪಾತ್ರಧಾರಿ ಹಿತಾ ಚಂದ್ರಶೇಖರ್ ಅಭಿನಯ ಚುರುಕಾಗಿ, ಹಿತವಾಗಿಯೂ ಇದೆ. ಮಾತಿನ ಮಾಡ್ಯೂಲೇಷನ್ ಗೆ ಕಮ್ಮಿಯೇನು ಇಲ್ಲ. ತಾಯಿ ಸಿಹಿಕಹಿ ಗೀತಾ ಧ್ವನಿಯ ಪಡಿಯಚ್ಚಿನಂತಿದೆ. ಅಥವಾ ಗೀತಾ ಅವರೇ dabb ಮಾಡಿದ್ದಿರಬಹುದು. ತನ್ನ ರೂಪ, ನಡವಳಿಕೆಗೆ ಮನಸೋತು ಹಿಂದೆ ಬೀಳುವ ಹುಡುಗನನ್ನು ಗೋಳು ಹುಯ್ದುಕೊಳ್ಳುವ ತುಂಟತನದ ,ಆತ್ಮವಿಶ್ವಾಸ ತುಂಬಿದ ಒಳ್ಳೆ ಹುಡುಗಿಯ ಪಾತ್ರದಲ್ಲಿ ಹಿತ ಭಾವಾಭಿನಯ ಭರವಸೆ ಮೂಡಿಸುವಂತಿದೆ.

ಇದ್ದಿದ್ದ್ರೆ ಚೆನ್ನಾಗಿರ್ತಿತ್ತಪ್ಪ

. ಭಾವಕ್ಕೆ ತಕ್ಕ ಸಂಗೀತದ ಲೇಪನ

. ಚುರುಕು ಮುಟ್ಟಿಸುವ ಗಟ್ಟಿಯಾದ ಸಂಭಾಷಣೆ

.ಕಣ್ಣಿಗಬ್ಬವಾಗುವ ದೃಶ್ಯಗಳು

.ಭಾವತೀವ್ರತೆಯ ಸನ್ನಿವೇಶಗಳು

.ಕುತೂಹಲ ಹುಟ್ಟಿಸುವ ತಿರುವುಗಳು

ನೋಡ್ಬೇಕಾ ? ಯಾಕೆ ?

ಫೈಟು , ಕೇಡಿಗಳು, ಅಶ್ಲೀಲ ದೃಶ್ಯಗಳು ಇಲ್ಲದ ಸಿನಿಮಾ. ಚೆನ್ನಾದ ನಟನೆ ಇದೆ. ಕನ್ನಡದ ಹೊಸ ನಿರ್ದೇಶಕರ ಒಳ್ಳೆ  ಪ್ರಯತ್ನ.  ಒಂದ್ಸಲ ನೋಡಬಹುದು. ಕೊಟ್ಟ ಕಾಸಿಗೆ   ‘1/4 ಕೆಜಿ ಮನರಂಜನೆ ಗ್ಯಾರಂಟಿ.

 

 

 

ನಿಧಾನಿಸಿ ಯೋಚಿಸಿದಾಗ ಆಳಕ್ಕಿಳಿಯುವ “ಬ್ಯುಟಿಫುಲ್ ಮನಸ್ಸುಗಳು”

“ಕೇಳಿದ್ದೂ ಸುಳ್ಳಾಗಬಹುದು ನೋಡಿದ್ದೂ ಸುಳ್ಳಾಗಬಹುದು ನಿಧಾನಿಸಿ ಯೋಚಿಸಿದಾಗ ನಿಜವು  ತಿಳಿವುದು” ಈ ಸಾಲನ್ನ ಮತ್ತೆ ಮತ್ತೆ ನೆನಪಿಸುವ ಸಿನಿಮಾ  “ಬ್ಯುಟಿಫುಲ್ ಮನಸ್ಸುಗಳು”. ಕಥೆಯೇ ಇಲ್ಲಿ ಜೀವಾಳ. ೨೦೧೩ರರಲ್ಲಿ ನಡೆದ ಸತ್ಯ ಘಟನೆಯನ್ನ ಅಬ್ಬರವಿಲ್ಲದೆ, ಹೊಡಿಬಡಿಗಳ ಹಾರಾಟವಿಲ್ಲದೆ ನಿಧನಿಧಾನವಾಗಿ ಒಳ ಒಳ.. ಒಳ ಮನಸ್ಸಿಗೆ ಮುಟ್ಟಿಸುವ ಚಿತ್ರವಿದು.

beautiful cinema 3

ನಿರ್ದೇಶನ:

ಮೊದಲಾರ್ಧದಲ್ಲಿ ಮಾಮೂಲಿ ಪ್ರೇಮ ಕಥೆ ಥರ ಇದೆಯಲ್ಲ ಅನ್ನಿಸುವ ಹಾಗೆ ತೋರಿಸುತ್ತ ಮಧ್ಯೆ ಮಧ್ಯೆ ಮಾಧ್ಯಮಗಳ  (ನ್ಯೂಸ್ ಚಾನೆಲ್) ಕೆಲವು ಮಕ್ಕಿಕಾಮಕ್ಕಿ, ಪೆಕರುತನದ  ಜೊತೆಗೆ “ಬ್ಯುಟಿಫುಲ್ ಮನಸ್ಸುಗಳು”ಅನ್ನೋ ಒಂದೊಳ್ಳೆ ಕಾರ್ಯಕ್ರಮವನ್ನು ತೆರೆಯ ಮೇಲೆ ತಿರುಗಾಡಿಸುತ್ತ ಕುತೂಹಲವನ್ನು ಕಾದಿಟ್ಟುಕೊಳ್ಳುತ್ತಾರೆ ಜಯತೀರ್ಥ.

jayathirtha

ಕೇವಲ ಮೊದಲ ನೋಟದ ಆಕರ್ಷಣೆಯೇ ಪ್ರೀತಿ . ಅಥವಾ ಇಷ್ಟ ಆಗಿಬಿಟ್ರೆ ಸಾಕು ಅದೇ ಪ್ರೀತಿ ಅನ್ನೋ ಭ್ರಮೆಯಲ್ಲಿ ಉಡಾಫೆ ಬದುಕು ದೂಡೋದು ಅಲ್ಲ. ಪ್ರೀತಿ ಅಂದ್ರೆ ನಂಬಿಕೆ, ಜವಾಬ್ದಾರಿ, ಪರಸ್ಪರ ಗೌರವ, ತಾಳುವಿಕೆ ಅನ್ನುವುದನ್ನು ಸಮರ್ಥವಾಗಿ ಕಟ್ಟಿದ್ದಾರೆ. ಯಾರದೋ ಮನೆಯ ಜಗಳ, ಮತ್ಯಾರದೋ ಬದಿಯ ಬದುಕನ್ನು ಬೀದಿಗೆ ತಂದು ಹಿಂದು -ಮುಂದು ಯೋಚಿಸದೆ ಪರಿಣಾಮವನ್ನು ಲೆಕ್ಕಿಸದೆ ಮತ್ತೆ ಮತ್ತೆ ದೃಶ್ಯರೂಪದಲ್ಲಿ ಬಿತ್ತರಿಸಿ ಸಾಮಾಜಿಕ ಬದ್ಧತೆಯನ್ನು ಬದಿಗೊತ್ತುವ ಕೆಲ ವಾಹಿನಿಗಳ ಪೊಳ್ಳುತನ, ಭ್ರಷ್ಟತನವನ್ನ ತೆರೆಗೆಳೆದು ತಂದಿದ್ದಾರೆ ಜಯತೀರ್ಥ.

beautiful cinema 5

ಹೆಣ್ಣುಮಕ್ಕಳ ಮೇಲೆ ಆರೋಪಗಳು ಬಂದಾಗ ಅದರಲ್ಲೂ ವೇಶ್ಯಾವಾಟಿಕೆಯಂಥವು ಕೇಳಿದಾಗ ಸ್ವಲ್ಪವೂ ವಿವೇಚಿಸದೆ ರೋಚಕವಾಗಿ ಪದೇ ಪದೇ ತೋರಿಸುವ ಕೆಲ ಮಾಧ್ಯಮಗಳ ಬಗ್ಗೆ ಅಸಹ್ಯವುಟ್ಟಿದರೂ ಹೆಣ್ಣುಮಕ್ಕಳ ವಿಷಯದಲ್ಲಿ ಸಣ್ಣ ಸತ್ಯವಲ್ಲದ ಚಾಡಿ ಮಾತು ಕೇಳಿದಾಗಲೂ  ಬಾಯಿಂದ ಬಾಯಿಗೆ ಹರಿಯಬಿಟ್ಟು ಅವಳ ಬಾಳಿನ ಬಣ್ಣಗೆಡಿಸುವ ನಮ್ಮ ಜನರ ಮನಸ್ಥಿತಿಯ ಮುಖಕ್ಕೂ ಭೂತಗಾಜು ಬಿಟ್ಟು ನೋಡಿಕೊಳ್ಳಿ ನಿಮ್ಮ ಕೊಳಕು ಮನಃಸ್ಥಿಯನ್ನ ಎನ್ನುವಂತೆ ತೋರಿಸಿದ್ದಾರೆ. ರಕ್ಷಕ ಭಕ್ಷಕನಾದಾಗ ಅಮಾಯಕರ ಪಾಡು ಇಲ್ಲಿ ಕಣ್ಣಿಗೆ ಕಟ್ಟುತ್ತದೆ. ಭಂಡರನ್ನ ಸರಿದಾರಿಗೆ ತರಲು ಮಾತಿನ ಪೆಟ್ಟಿಗಿಂತ ಬ್ರಹ್ಮಾಸ್ತ್ರದ ಪ್ರಯೋಗವೇ ಬೇಕು ಅನ್ನುವುದನ್ನೂ ಯಶಸ್ವಿಯಾಗಿ ಕಟ್ಟಿದ್ದಾರೆ. ಕೊಲೆಗಡುಕನ ಮನಸ್ಸನ್ನೂ  ಬದಲಿಸಿ ಬ್ಯುಟಿಫುಲ್ ಮನಸ್ಸುಗಳಾಗಿಸಿದ್ದಾರೆ. 

ಅಭಿನಯ :

beautiful cinema 4

ನೀನಾಸಂ ಸತೀಶ್ ಚಿತ್ರದಲ್ಲಿ ನಟಿಸಿದ್ದಾರೆ ಅಂತನ್ನಿಸುವುದಿಲ್ಲ. ನಮ್ಮೆದುರೇ ನಡೆಯುತ್ತಿರುವ ಘಟನೆಯಂತೆ, ಪಕ್ಕದಲ್ಲೇ ಇರುವ ಪೊರಕಿಯಂತೆ, ತಪ್ಪಾದಾಗ ತಿದ್ದಿಕೊಂಡು ಬೆಳೆವ ಒಳ್ಳೆ ಹುಡುಗನಂತೆ, ಪ್ರೀತಿಸಿದ ಜೀವಕ್ಕಾಗಿ ಏನನ್ನು ಬೇಕಾದರೂ ಮಾಡಿಬಿಡುವ ಧೈರ್ಯಸ್ಥನಂತೆ ಸಹಜವಾಗಿ ಕಾಣುತ್ತಾರೆ. ನಟಿಸಿದರೂ  ನಟಿಸದಂತೆ ಕಾಣುವುದು ಕಷ್ಟದ ಕೆಲಸ. ಇಷ್ಟ ಪಟ್ಟು ಸೊಗಸಾಗಿ ಮಾಡಿದಂತಿದೆ ಸತೀಶ್ ಅಭಿನಯ.

beautiful cinema 1

ಶ್ರುತಿ ಹರಿಹರನ್ ಪಾತ್ರಕ್ಕೆ ಹೇಳಿಮಾಡಿಸಿದ ನಟಿ. ಆಕೆಯ ಮುಖದಲ್ಲಿ, ಮಾತಿನಲ್ಲಿ ಪ್ರೌಢಿಮೆ ಮಿಂಚುತ್ತದೆ. ಹುಟ್ಟಿದ ಮನೆಯ ನೊಗ ಹೊತ್ತು, ಪ್ರೀತಿಯ ಕರೆಗೆ ಓಗೊಟ್ಟು ಮತ್ತೆ ಅವಮಾನಿತೆಯಾಗುವ ಸನ್ನಿವೇಶಗಳಲ್ಲೂ ಶ್ರುತಿಯದ್ದು ಮೆಚ್ಚುವ ಅಭಿನಯ.

ಅಚ್ಯುತ ಎಂದ್ರೆ ಮೆಚ್ಚುತಾ…

beautiful_manasugalu1

ಭ್ರಷ್ಟ ಪೊಲೀಸ್ ಅಧಿಕಾರಿಯಾಗಿದ್ದವ ತನ್ನದೇ ಮಗಳ ಜೀವಕ್ಕೆ ಕುತ್ತು ಬಂದಾಗ ಸಾಮಾನ್ಯ ಅಪ್ಪನಾಗಿಬಿಡುವ, ಪಶ್ಚಾತಾಪ ಪಡುವ ಪಾತ್ರದಲ್ಲಿ ಅಚ್ಚುತ ಅಭಿನಯಕ್ಕೆ ಮೆಚ್ಚುಗೆಯಲ್ಲದೆ ಮತ್ತೇನು !

ತಬಲಾ ನಾಣಿ, ಪ್ರಶಾಂತ್ ಸಿದ್ದಿ .. ಹೀಗೆ ಎಲ್ಲರು ಎಲ್ಲೂ ಎಲ್ಲೆಮೀರದೆ ಸಹಜವಾಗಿ ನಟಿಸಿದ್ದಾರೆ.

ತಾಂತ್ರಿಕವಾಗಿ ಅದ್ದೂರಿತನವಿಲ್ಲದಿದ್ದರೂ ಎಲ್ಲ.. ಎಲ್ಲರೂ ನೋಡಲೇಬೇಕಾದ ನೋಡಿ ಅರಿಯಬೇಕಾದ  ಸಿನಿಮಾ “ಬ್ಯುಟಿಫುಲ್ ಮನಸ್ಸುಗಳು”

ಕೋಟಿಗೊಬ್ಬ-2 , ಕಿಚ್ಚ ಸುದೀಪ್ ಅಭಿಮಾನಿಗಳಿಗೆ ಫುಲ್ ಮೀಲ್ಸ್ !

kotigobba-2-movie-review

ಕೋಟಿಗೊಬ್ಬ-2 ಅಭಿಮಾನಿಗಳಿಗೊಸ್ಕರವೇ ಹೇಳಿ ಮಾಡಿಸಿದ ಸಿನಿಮಾದಂತಿದೆ.

ಸತ್ಯ ಮಿಥ್ಯಗಳ ನಡುವೆ ನಡೆಯುವ ಒಂದು ಕಥೆಗೆ ಕೆ ಎಸ್ ರವಿಕುಮಾರ್ ಎಂಬ ಖ್ಯಾತ ನಿರ್ದೇಶಕರು ರಚಿಸಿರುವ ಸ್ಕ್ರೀನ್ ಪ್ಲೇ ಸಿನಿಮಾಕ್ಕೊಂದು ವೇಗ ನೀಡಿದೆ. ಸುದೀಪ್ ಅವರ ವಿಭಿನ್ನ ಮ್ಯಾನರಿಸಂ, ಸ್ಟೈಲ್ ನೋಡುಗರಿಗೆ ಕಿಕ್ ಕೊಡುತ್ತದೆ. ಕೆ ಎಸ್ ರವಿಕುಮಾರ್ ಅವರ ಚಿತ್ರಗಳಲ್ಲಿ ನಾಯಕರು ಸ್ಟೈಲ್ ಆಗಿ ಮಿಂಚುತ್ತಾರೆ ಎನ್ನುವುದಕ್ಕೆ ಕೋಟಿಗೊಬ್ಬ -2 ಸಾಕ್ಷಿ.

ದೊಡ್ಡ ಉದ್ಯಮಿಗಳ ಕೋಟಿಗಟ್ಟಲೆ ಕಪ್ಪುಹಣ ದರೋಡೆ ಮಾಡುವ ಶಿವ (ಸುದೀಪ್) ನೋಟಿನ ವಾಸನೆ ಎಂದರೆ ವಿಶ್ವದ ಅದ್ಭುತ ಪರ್ಫ್ಯೂಮ್ ಎಂದು ನಂಬಿರುವವನು. ದರೋಡೆಗೊಳಗಾದ ಉದ್ದಿಮೆದಾರನ ಭಂಟ ಪೊಲೀಸ್ ಅಕಾರಿ ಕಿಶೋರ್ (ರವಿಶಂಕರ್). ಉದ್ದಿಮೆದಾರ ದೂರು ನೀಡದೆ ಇದ್ದರೂ ಸಿಕ್ಕ ವಿಡಿಯೋವೊಂದರ ಆಧಾರದ ಮೇರೆಗೆ ರಿಯಲ್ ಎಸ್ಟೇಟ್ ಉದ್ಯಮ ನಡೆಸುವ ಸತ್ಯನನ್ನ (ಸುದೀಪ್), ಕಿಶೋರ್ ಕರೆತಂದು ಲಾಕಪ್ ನಲ್ಲಿ ಥಳಿಸುತ್ತಾನೆ. ಆದರೆ ತನ್ನ ಅವಳಿ ಸಹೋದರ ಶಿವ ಕಾಣೆಯಾದುದರ ಬಗ್ಗೆ ಸತ್ಯ ಮೊದಲೇ ದೂರು ನೀಡಿರುತ್ತಾನೆ. ಈ ಪಾತ್ರದ ಮುಗ್ಧತೆಯನ್ನು ನಂಬಿದ ಕಿಶೋರ್ ಹಿರಿಯ ಅಧಿಕಾರಿ ಸತ್ಯನಿಗೆ ಆಟೋಗು ಹಣ ಕೊಟ್ಟು ಕಳುಹಿಸುತ್ತಾರೆ.

ಮತ್ತೊಂದು ದೃಶ್ಯದಲ್ಲಿ ಕಿಶೋರ್ ಅವರ ಪೊಲೀಸ್ ಠಾಣೆಯಿಂದಲೇ ಸುರಂಗ ಕೊರೆದು ಮತ್ತೊಬ್ಬ ಉದ್ದಿಮೆದಾರನ ಕಪ್ಪುಹಣದ ದರೋಡೆ ನಡೆಯುತ್ತಾನೆ ಶಿವ. ಸತ್ಯ ಮತ್ತು ಶಿವ ವಿಭಿನ್ನ ವ್ಯಕ್ತಿಗಳೇ ಅಥವಾ ಒಬ್ಬ ವ್ಯಕ್ತಿಯ ವಿಭಿನ್ನ ವ್ಯಕ್ತಿತ್ವಗಳೇ ಎಂಬ ದ್ವಂದ್ವದೊಂದಿಗೆ ಸಿನೆಮಾ ಕಡೆಯವರೆಗೂ ನಡೆಯುತ್ತದೆ. ಇದನ್ನು ಕಂಡು ಹಿಡಿಯಲು ಪೊಲೀಸ್ ಅಧಿಕಾರಿ ಕಿಶೋರ್ ಚಿತ್ರದ ಕಡೇ ದೃಶ್ಯದವರೆಗೂ ಕಷ್ಟಪಡುತ್ತಲೇ ಇರುತ್ತಾನೆ. ಈ ನಡುವೆ ಸೈಟ್ ಕೊಳ್ಳಲು ಸತ್ಯನ ಬಳಿ ಬರುವ ಶುಭಾ(ನಿತ್ಯಾ ಮೆನನ್) ನಿಧಾನವಾಗಿ ಸತ್ಯನೊಂದಿಗೆ ಪ್ರೀತಿಯಲ್ಲಿ ಬೀಳುತ್ತಾಳೆ. ಮುಂದೆ ಸತ್ಯ ಶಿವ ಬೇರೆ ಬೇರೆಯವರಾ, ಶುಭಾ ಸತ್ಯನನ್ನು ಮದುವೆ ಆಗುತ್ತಾಳಾ ಎಂಬುದೇ ಚಿತ್ರದ ಸಸ್ಪೆನ್ಸ್.

ತಮಿಳಿನಲ್ಲಿ ರಜನಿಕಾಂತ್, ಕಮಲಹಾಸನ್‌ನಂತಹ ಸೂಪರ್ ಸ್ಟಾರ್‌ಗಳನ್ನು ನಿರ್ದೇಶಿಸಿ ಅವರಿಗೆ ಸೂಪರ್ ಹಿಟ್ ಕೊಟ್ಟಿದ್ದ ಕೆ ಎಸ್ ರವಿಕುಮಾರ್ ಸುದೀಪ್ ಅವರ ಮ್ಯಾನರಿಸಂನ್ನು ಕಥೆಯಲ್ಲಿ ಎನ್‌ಕ್ಯಾಶ್ ಮಾಡಿಕೊಂಡಿದ್ದಾರೆ. ಮನರಂಜನೆ-ಚಮತ್ಕಾರದ ಕಮರ್ಶಿಯಲ್ ಚಿತ್ರಗಳ ಫಾರ್ಮುಲಾ ಎಕ್ಸ್ಪರ್ಟ್ ನಿರ್ದೇಶಕ ರವಿಕುಮಾರ್ ಭರ್ಜರಿಯಾಗಿ ಕನ್ನಡಕ್ಕೆ ಎಂಟ್ರಿ ಕೊಟ್ಟಿದ್ದಾರೆ.

ತೆರೆಯ ಮೇಲೆ ನಿತ್ಯಾ ಮೆನನ್ ನೋಡುವುದೇ ಆನಂದ.ಅಭಿನಯ, ಕನ್ನಡ ಮಾತನಾಡುವ ಸ್ಪಷ್ಟತೆ ಎಲ್ಲದರಲ್ಲೂ ನಿತ್ಯಾ ಫುಲ್ ಮಾರ್ಕ್ಸ್ ಗಳಿಸುತ್ತಾರೆ. ಇನ್ನು ವಿಲನ್‌ಗಳಾಗಿ ಅಭಿನಯಿಸಿರುವ ಶರತ್ ಲೋಹಿತಾಶ್ವ, ರವಿಶಂಕರ್ ತಮ್ಮ ಆರ್ಭಟವನ್ನು ಎಂದಿನಂತೆ ಮುಂದುವರೆಸಿದ್ದಾರೆ. ಇದೆಲ್ಲವನ್ನೂ ಬಿಟ್ಟರೆ ಇಡೀ ಚಿತ್ರವನ್ನು ಸುದೀಪ್ ಆವರಿಸಿ ಬಿಡುತ್ತಾರೆ. ಹಾಡುಗಳ ಕೋರಿಯೋಗ್ರಾಫಿ ಹಾಡುಗಳಿಗಿಂತಲೂ ಹೆಚ್ಚು ಗಮನ ಸೆಳೆಯುತ್ತದೆ. ಚಿತ್ರದಲ್ಲಿ ಹೋದ ಪುಟ್ಟ ಬಂದ ಪುಟ್ಟ ಪಾತ್ರಗಳಂತೆ ಹಾಸ್ಯ ಪಾತ್ರಗಳು ಬಿಂಬಿತವಾಗಿವೆ. ಚಿಕ್ಕಣ್ಣ , ಸಾಧುಕೋಕಿಲಾ, ತಬಲಾ ನಾಣಿ ಅಲ್ಲಲ್ಲಿ ನಗಿಸುತ್ತಾರೆ ಅಷ್ಟೆ.

ಒಟ್ಟಿನಲ್ಲಿ ಸುದೀಪ್ ಅವರ ಅಭಿಮಾನಿಗಳಿಗೆ ರವಿಕುಮಾರ್ ಮತ್ತು ಸುದೀಪ್ ಜೋಡಿ ರಸದೌತಣ ನೀಡಿದೆ ಎಂದು ಹೇಳಬಹುದು.

ನಾಗರಹಾವು ಬಿಗಿನಿಂಗ್ ಬುಸ್ಸ್ .. ಎಂಡಿಂಗ್ ?

ವಿಷ್ಣುವರ್ಧನ್ ಅಭಿಮಾನಿಗಳು ಮತ್ತೆ ಸಾಹಸಸಿಂಹನನ್ನು ತೆರೆಯ ಮೇಲೆ  ಕಂಡು ಕಣ್ತುಂಬಿಕೊಳ್ಳುವ ಆಸೆಯಿಂದ  ಹೋದ್ರೆ ಅವ್ರಿಗೆ ಸಿಕ್ಕಿದ್ದೇನು?

ನಾಗರಹಾವು ಚಿತ್ರದ ಪ್ರಾರಂಭದಲ್ಲಿ” ನಾಗರಹಾವು “ಹಾಡಿಗೆ ಹೆಜ್ಜೆ ಹಾಕುವ ದರ್ಶನ್ ಆಮೇಲೆ ಏನಾದ್ರೂ ಅನ್ನುವುದು ಯಾರಿಗಾದ್ರೂ ಗೊತ್ತಾಗಿದ್ರೆ ಅದು ಅವರ ಪುಣ್ಯ ಅಂತಷ್ಟೇ ಹೇಳ್ಬಹುದು. ಇದು ಅಮಾಯಕ ಪ್ರೇಕ್ಷಕರನ್ನು ಯಾಮಾರಿಸುವ ಮೊದಲ ಗಿಮಿಕ್ .

ಕಥೆಯ ವಿಚಾರಕ್ಕೆ ಬಂದ್ರೆ ಇದು ಓಬಿರಾಯನ ಕಾಲದ್ದೇ. ನಮ್ಮ ವಾಹಿನಿಗಳಲ್ಲಿ ಬರುವ ನಾಗಿಣಿ ತರಹದ  ಧಾರಾವಾಹಿಗಳೇ ವಾಸಿ ಅನ್ನಬಹುದೇನೋ . ಒಂದಿಷ್ಟಾದ್ರು ಕುತೂಹಲ ಹುಟ್ಟಿಸದ ಕಥಾಹಂದರ. ಜನರ ನಂಬಿಕೆಯನ್ನು ಬಳಸಿ ಮತ್ತಷ್ಟು ಮೌಢ್ಯಕ್ಕೆ ತಳ್ಳುವ ಚಿತ್ರ.

ಟ್ರಾಯ್ , ೩೦೦ ನಂಥ ಹಾಲಿವುಡ್ ಸಿನಿಮಾ ನೋಡಿದವರಿಗೆ ಇವ್ರ್ ಕಾಪಿ ಕಲೆ ಬಹಳ ಚೆನ್ನಾಗಿ ಅರ್ಥವಾಗಿಬಿಡತ್ತೆ. ಈ ತಂಡ ಕೊಟ್ಟ ಹೈಪ್ ಗೆ ಹೋಲಿಸಿದ್ರೆ ಅದ್ರ ಕಾಲು ಭಾಗಕ್ಕೂ ನಿಲುಕುವುದಿಲ್ಲ.

ಇಲ್ಲಿ ಕೊಟ್ಟ ದುಡ್ಡಿಗೆ ಮೋಸವಿಲ್ಲ ಅನ್ನಿಸುವುದು ರಮ್ಯಾ ಅಭಿನಯ. ಮೋಹಕ ತಾರೆ ಹೆಸರಿಗೆ ತಕ್ಕಂತೆ ಸಮ್ಮೋಹಗೊಳಿಸಿಬಿಡುತ್ತಾರೆ. ಇಂಥಾ ಪ್ರತಿಭೆ ಇರುವಾಗ ನಾಯಕರಿಗೆ ಕೊಡುವಷ್ಟೇ ಸಂಭಾವನೆ ನಂಗೂ ಕೊಡಿ ಅಂಥಾ ಕೇಳೋದ್ರಲ್ಲಿ ತಪ್ಪೇನು ಇಲ್ಲ ಬಿಡಿ. ಬಹುಶಃ ಕಳೆದ ಬಾರಿ ಚುನಾವಣೆಯ ಸಮಯದಲ್ಲೇನಾದ್ರು ಈ ಚಿತ್ರದ ಜನಪರವಾದ ರಮ್ಯಾ ಡೈಲಾಗ್ಗಳನ್ನ ಮಂಡ್ಯದ  ಅಭಿಮಾನಿಗಳು ಕೇಳಿದ್ರೆ  ಗೆಲ್ಲಿಸೇ  ಬಿಡ್ತಿದ್ರೋ  ಏನೋ . ಒಂದೇ ಒಂದು ಸಿನಿಮಾದಲ್ಲೂ ಜನರ ಪರವಾಗಿ ಹೋರಾಟ ಮಾಡುವ ಪಾತ್ರ ಮಾಡಿರದಿದ್ದ ರಮ್ಯಾರನ್ನ ಮೊದಲ ಬಾರಿಗೇ ಸಂಸತ್ತಿಗೆ ಕಳುಹಿಸಿದ ಮಂಡ್ಯದ ಮುಗ್ಧ ಜನ ಇಂಥಾ ಪಾತ್ರಕ್ಕೆ ಮೆಚ್ಚಿ ಮನ್ನಣೆ ಕೊಟ್ಟಿದ್ದರೂ ಆಶ್ಚರ್ಯವಿಲ್ಲ.

ದಿಗಂತ್  ನಟನೆಗೆ ರೈಟ್ ಮಾರ್ಕ್ ಕೊಡಬಹುದು. ಪೋಷಕರ ನಟನೆಯೂ ಓಕೆ .  ಇಂಟರ್ನ್ಯಾಷನಲ್ ಕಾಂಪಿಟೇಷನ್ ನಲ್ಲಿ ಹಾಡುವ ಹಾಡು ಮತ್ತದರ  ಸಂಗೀತವಂತೂ ಸಪ್ಪೆ ಸಪ್ಪೆ .

ಪೋಸ್ಟರ್ ,ಬ್ಯಾನರ್ಗಳಲ್ಲಿ ಆ ಪಾಟಿ ವಿಷ್ಣು ದಾದಾರನ್ನ ತೋರಿಸಿದ್ದಾರಲ್ಲ ಅದನ್ನ ನಂಬಿಕೊಂಡು  ಅವರೇ ಪ್ರಮುಖ ಪಾತ್ರದಲ್ಲಿ ಮಿಂಚಿದ್ದಾರೇನೋ ಅನ್ನೋ ಆಸೆಯಲ್ಲಿ ಹೋದವರಿಗೆ ನಿರಾಸೆ ಕಟ್ಟಿಟ್ಟ ಬುತ್ತಿ. ಈಗ ಬರಬಹುದು ಆಗ ಬರಬಹುದು ಅಂತ ಕಾಯುತ್ತಿದ್ದವರಿಗೆ ಕೊನೇ ಘಳಿಗೆಯವರೆಗೂ ಕಾಯಬೇಕಾದ  ಸ್ಥಿತಿ . ಸದ್ಯ ಬಂದ್ರಲ್ಲ ನಮ್ ಆರಾಧ್ಯ ದೈವ ಅಂತ ಅಭಿಮಾನಿಗಳು ಭಾವುಕರಾಗಿ ಕಣ್ತುಂಬಿಕೊಳ್ಳೋ ಹೊತ್ತಿಗೆ ಮಿಂಚಿ ಮರೆಯಾಗಿ ಹೋಗುತ್ತಾರೆ. ಜೊತೆಗೆ ಅದು ಗ್ರಾಫಿಕ್ಸ್ ಆಗಿರೋದ್ರಿಂದ ಮುಖಭಾವದಲ್ಲಿ ಆಪ್ತತೆ ಕಾಣುವುದಿಲ್ಲ. ವಿಷ್ಣುರ  ಮುದ್ದಾದ ಮುಖಭಾವ ಕಂಡವರಿಗೆ ಛೆ .. ಛೆ.. ಅನ್ನಿಸುವುದು ಖಂಡಿತ . ತಂತ್ರಜ್ಞಾನಕ್ಕೆ ಹೆಚ್ಚು ಹಣ ಬೇಕು ಅನ್ನುವುದು ನಿಜವಾದ್ರೂ  ಇನ್ನು ಎಫೆಕ್ಟಿವ್ ಆಗಿ ತರಬಹುದಿತ್ತೇನೋ ಅನ್ನಿಸದೇ ಇರದು.

ನಾಗರಹಾವು ಅಂದಾಕ್ಷಣ ನೆನಪಾಗುತಿದ್ದದ್ದು ವಿಷ್ಣು ಅಭಿನಯದ ಮರೆಯಲಾಗದ ಸಿನಿಮಾ . ಬಾಲಿವುಡ್ ಘಟಾನುಘಟಿಗಳು ನೋಡಿ ಮೆಚ್ಚಿ  ಶಹಬ್ಬಾಶ್ ಗಿರಿ ಕೊಟ್ಟ ಅದ್ಭುತ ಚಿತ್ರ. ಚಾಮಯ್ಯ ಮೇಷ್ಟ್ರು, ಜಲೀಲ ಮನದಲ್ಲಿ ಇವತ್ತಿಗೂ ಕಾಡುವ ಪಾತ್ರಗಳು. ಹಾಡುಗಳು ಓಹ್ !! ಬಾರೇ  .. ಬಾರೇ.. ಚೆಂದದ ಚೆಲುವಿನ ತಾರೆ ಎಷ್ಟು ಕೇಳಿದ್ರೂ ಮತ್ತೆ ಮತ್ತೆ ಆವಾಹಿಸಿಕೊಳ್ಳುವುದು ನಿಜವಲ್ಲವೇ . ಈ  ನಾಗರಹಾವು ಚಿತ್ರದಲ್ಲಿ ಕಾಡುವಂಥದ್ದು ಕಣ್ಣಿಗೇನು ಬೀಳಲಿಲ್ಲ.  ಮುಂದಿನ ಪೀಳಿಗೆಯವರು ನಾಗರಹಾವು ಸಿನಿಮಾ ಅಂದಾಕ್ಷಣ ಹೊಸ ಸಿನಿಮಾವನ್ನೇ ನೆನಪಿಟ್ಟುಕೊಂಡ್ರೆ ಅದು ಕನ್ನಡ ಚಿತ್ರರಂಗದ ದುರದೃಷ್ಟವೇ ಸರಿ.

ಜನರ ಭಾವನೆಗಳನ್ನು ಬಳಸಿಕೊಳ್ಳುವುದು  ಅಂದ್ರೆ ಇದೇ ಅನಿಸುತ್ತದೆ. ವಿಷ್ಣುವರ್ಧನ್ರನ್ನ ಮುಂದಿಟ್ಟುಕೊಂಡು ಹಳಸಿದ ಕಥೆಗೆ ಕಲರ್ ಕಟ್ಟಿ ಹಣ ಗಳಿಸುವ  ಹುನ್ನಾರವಿದಷ್ಟೆ . ಅಮಾಯಕರ ಭಾವನೆಗಳು ಬಲಿಪಶುಗಳಾಗಿವೆ.

Like Us, Follow Us !

121,086FansLike
1,817FollowersFollow
1,347FollowersFollow
1,653SubscribersSubscribe

Trending This Week